Iñimportantevéva ára porã térã ára vaígui

HETA henda rupi oĩ ñeʼẽnga oñeʼẽva ára porã ha ára vaíre. Pór ehémplo, Inglatérrape ojeʼe: Ára pytãramo pyhare, marinéro ovyʼave. Ára pytãramo pyhareve, cháke marinéro, peñatende! Koʼág̃a rupi umi ostudiáva árare heʼi koʼã ñeʼẽnga añeteha. Haʼekuéra oikuaa ñamañávo yvágare pyhareve ikatuha jaikuaa ára porã térã ára vaítapa.

Jesús oikórõ guare umi hénte omañavaʼekue avei yvágare oikuaa hag̃ua ára porãtapa. Pór ehémplo, haʼe heʼi umi hudíope: “Kuarahy oikévo peẽ peje: ‘Ára porãta hína’ pehecháramo ára pytãmbaha. Ha koʼẽvo katu peje: ‘Ára vaíta hína. Ára niko ijaraipa ha pytãmba’. Peẽ niko peikuaa mbaʼépa ojehúta árare pemañárõ”. Péro Jesús heʼi avei: “Mbaʼéicha rupi piko ndapeikuaái mbaʼépa heʼise umi mbaʼe koʼág̃a ojehúva?” (Mateo 16:​2, 3).

Mbaʼépa raʼe ‘umi mbaʼe ojehúva’? Koʼãva hína umi mbaʼe ohechaukáva Jesús haʼeha pe Mesías Ñandejára ombouvaʼekue. Jesús ojapóva ojehecha porãiterei, ojehechaháicha avei yvága pytã jave. Upéicharamo jepe heta hudío nopenái umi mbaʼe Jesús ojapóvare ha ohechaukáva Ñandejára ombouhague chupe. Hiʼarive upéva iñimportanteve ára porã térã ára vaígui.

Koʼág̃a rupi avei oĩ heta mbaʼe iñimportantevéva áragui. Jesús heʼivaʼekue ko múndo aña oñehunditaha ha oĩtaha hekovia peteĩ múndo pyahu. Péro upéva oiko mboyve, heʼi oikotaha heta mbaʼe. Umíva apytépe ñorairõ guasu ha ñembyahýi. Jesús heʼi koʼã mbaʼe oiko vove jaikuaavaʼerãha hiʼag̃uimaha upe ára Ñandejára omopotĩ hag̃ua ko Yvy (Mateo 24:​3-21).

Ndépa rehechakuaa mbaʼépa heʼise “umi mbaʼe koʼág̃a ojehúva”?