Jaiporúke Ñandejára Ñeʼẽ ñande rekovépe

“Ne ñeʼẽ niko mbaʼe rendy chereraháva tape porãre, ha ohesapéva chéve che raperã” (SALMO 119:105.)

1, 2. Mbaʼérepa yvyporakuéra ndotopái pyʼaguapy ha vyʼa?

 NEMANDUʼÁPA rehóramo guare peteĩ hendápe ha ndaikatúimarõ reg̃uahẽ reporandúmante peteĩ tapichápe? Ikatu namombyryvéima ndehegui péro ndereikuaaporãi moõitépa. Térã rekañyete voi. Péicha jave tekotevẽ jajapo ñande rapicha heʼíva ñandéve. Haʼe ningo oikuaa porã pe lugár ha ikatu ñanepytyvõ ñag̃uahẽ hag̃ua.

² Ymaiterei guive yvyporakuéra oñehaʼã oiko porã ijeheguínte ha omboyke Ñandejárape. Upéicha rupi oho vai ha ndaikatúi otopa pyʼaguapy ha vyʼa. Ojavyeténiko hikuái hape! Mbaʼérepa jaʼe upéva? Ojapóma dos mil quinientos áño rupi Jeremías heʼihague: “Aikuaa yvypóra ndahaʼeiha hekove jára, ndoikuaaiha mbaʼépa oikóta chugui” (Jeremías 10:23). Oimeraẽ oikóva oikoseháichante ha nohenduséiva hapicha iñaranduvévape, osẽ vaíta katuete. Upéicha jahechakuaa enterove ñaikotevẽha ojehechauka ñandéve mbaʼépa iporã jajapo.

3. Mbaʼérepa Jehová oikuaa porãve yvyporakuéra oikotevẽva ha mbaʼépa heʼi ojapotaha?

 ³ Ñandejára Jehová hína pe oikuaa porãvéva yvypóra oikotevẽva. Mbaʼérepa? Haʼe ningo ñandekuaa porãiterei. Oikuaa mbaʼérepa yvyporakuéra oho tape vaíre ha avei mbaʼéichapa ikatu ojevy tape porãme. Jehová ningo ñande Apohare ha katuete oikuaa mbaʼépa iporãve ñandéve g̃uarã (Isaías 48:17). Upévare ikatu jaguerovia Jehová ojapotaha Salmo 32:8 heʼíva: “Che rohekomboʼéta. Ahechaukáta ndéve moõ rupípa rehovaʼerã, ha nderehe ajesarekóta opa árare”. Upéicharõ Jehová heʼíva iporãve ñandéve g̃uarã. Mbaʼéichapa omyesakã ñandéve ñande raperã?

4, 5. Mbaʼéichapa Ñandejára heʼíva ohechauka ñandéve ñande raperã?

⁴ Peteĩ salmísta oñemboʼevaʼekue péicha Jehovápe: “Ne ñeʼẽ niko mbaʼe rendy chereraháva tape porãre, ha ohesapéva chéve che raperã” (Salmo 119:105). Ñandejára heʼíva oĩmbaite la Bíbliape ha ñanepytyvõ jagueropuʼaka hag̃ua umi provléma. Jaleévo la Biblia ha jajapóvo heʼíva, jahecha añeteha Isaías 30:​21-pe heʼíva: “Pehendúta peteĩ ñeʼẽ pende rapykuéri heʼítava peẽme: ‘Kóva hína pe tape, tapeho koʼárupi’”.

⁵ Salmo 119:​105-pe jahecha Ñandejára Ñeʼẽ ñanepytyvõha mokõi mbaʼépe. Primero, Iñeʼẽ ojogua peteĩ mbaʼe rendýpe ñandereraháva tape porãre. Jajapóramo Ñandejára heʼíva ñambohovái jave umi provléma ára ha ára, jadesidi porãta ha ko múndo aña nañandereitymoʼãi iñuháme. Segundo katu, Ñandejára heʼíva ohesape ñande raperã. Péicha ikatu ñamaña mombyry ha jaiporavo umi mbaʼe iporãva ñanepytyvõtava ani hag̃ua ikangy ñane esperánsa Ñandejára múndo pyahúre. Ojehesape porã rupi ñande raperã, jahechakuaáta mbaʼépepa osẽta umi mbaʼe jajapóva (Romanos 14:21; 1 Timoteo 6:9; Apocalipsis [Revelación] 22:12). Jahechami mbaʼéichapa Jehová heʼíva ojogua peteĩ mbaʼe rendýpe ñandereraháva tape porãre ha ohesapéva ñande raperã.

“Mbaʼe rendy chereraháva tape porãre”

6. Mbaʼéicha javépa Ñandejára heʼíva ojogua peteĩ mbaʼe rendýpe ñandereraháva tape porãre?

⁶ Káda día jadesidivaʼerã heta mbaʼe. Oĩ umi mbaʼe michĩva, ha oĩ avei umi  ñandeporupaitéva. Heta vése ikatu jajejopy jaʼa hag̃ua teko vaípe, japoko mbaʼe ahénore térã jaike hag̃ua polítikape. Ñambohovái hag̃ua koʼã mbaʼe ‘jajepokuaavaʼerã jahecha mbaʼépa iporã ha mbaʼépa ivai’ (Hebreos 5:14). Jastudia memérõ Ñandejára Ñeʼẽ hesakã porãta ñandéve upe heʼíva, upéicharamo jaikuaáta mbaʼépa iporãve jajapo ñambovyʼa hag̃ua Jehovápe (Proverbios 3:21).

7. Mbaʼéicha javépa peteĩ kristiáno ikatu osẽse iñirũnguéra itravahopegua ndive?

⁷ Epensamína ko mbaʼére. Ndépa reñehaʼã rembovyʼa Jehovápe? (Proverbios 27:11.) Upéva ningo iporãiterei. Péro mbaʼépa oikóne ne irũnguéra nde travahopegua ndeguerahaséramo hendivekuéra partidohápe. Haʼekuéra ndeguerohoryeterei ha oĩsemie nendive traváho rire. Ndéve g̃uarã haʼekuéra naiñañái. Ha ikatu voi omombaʼe hikuái teko potĩ. Mbaʼépa rejapóta? Ivaítapa rehóramo hendivekuéra? Mbaʼéichapa Ñandejára Ñeʼẽ ikatu ñanepytyvõ jadesidi porã hag̃ua?

8. Mbaʼépa heʼi la Biblia ñanepytyvõva jaiporavo hag̃ua ñane irũnguéra?

⁸ Jahechami la Biblia heʼíva ko mbaʼére. Ikatu ñanemanduʼa raẽ 1 Corintios 15:33 (BNP) heʼívare: “Irũnguéra vai jepokuaa porã mbyaiha”. Heʼípa koʼápe ñamboyketevaʼerãha umi ndahaʼéivape kristiáno tee? La Biblia ndeʼíri upéva. Apóstol Pablo voi ohayhu ‘opavavépe’, jepe oĩ umi ndojeroviáiva Jesús rehe (1 Corintios 9:22). Jaiko hag̃ua kristiáno teéicha jajepyʼapyvaʼerã ñande rapichakuérare, ndojeroviáiramo jepe Jehováre (Romanos 10:​13-15). Mbaʼéicha piko ñañemohaʼeñóramo ‘jajapóta iporãva opavavépe g̃uarã’? (Gálatas 6:10.)

9. Mbaʼéichapa la Biblia ñanepytyvõ jahecha hag̃ua moõ pevépa ikatu jajeheʼa umi ombaʼapóvandi ñanendive?

⁹ Péro jatrata porã ñande rapichápe ndeʼiséi jaiporavotaha chupe ñane amigorã. Ko mbaʼépe ñanepytyvõ avei la Biblia heʼíva. Apóstol Pablo heʼivaʼekue kristianokuérape: “Ani peñemoĩ umi ogueroviaʼỹva ykére” (2 Corintios 6:14). Mbaʼépa heʼise koʼápe? Oĩ Biblia omoĩva “ani pejuaju”, “aníke peiko”. Mbaʼéicha javépa ivaítama jajeheʼa umi ñanendive ombaʼapóva rehe? Moõ pevépa ikatu jajeheʼa hesekuéra? Ñandejára Ñeʼẽ ohechauka mbaʼépa jajapovaʼerã koʼã mbaʼépe.

10. a) Mbaʼéichapa Jesús oiporavo iñamigorã? b) Mbaʼépa iporã ñañeporandu jaiporavo hag̃ua ñane amigorã?

¹⁰ Ñapensamína Jesús ojapovaʼekuére. Haʼe ohayhu yvyporakuérape ojejapo ypy guive chupekuéra (Proverbios 8:31). Ha oikórõ  guare ko Yvy ape ári, ohayhu hemimboʼekuérape (Juan 13:1). Avei ‘ohayhu’ peteĩ tapichápe jepe nomombaʼeguasúi Jehovápe hekopete (Marcos 10:​17-22, BNP). Péro Jesús oikuaa porã mávapepa oiporavóta iñamigorã. Haʼe ndoiporavói umi ndojaposéivape Itúva heʼíva. Peteĩ jey heʼi: “Peẽ niko che irũ hína, pejapóramo upe haʼéva peẽme” (Juan 15:14). Ikatúningo rejegueraha porã peteĩ ombaʼapóvandi nendive, tahaʼe kuña térã kuimbaʼe. Péro eñeporandumína: “Ojaposépa haʼe Jesús heʼíva? Oikuaasépa Jehovápe, upe Jesús heʼíva ñamombaʼeguasuvaʼerãha? Omombaʼépa teko potĩ che amombaʼéva?” (Mateo 4:10). Koʼã mbaʼe reikuaáta reñeʼẽvo hendivekuéra. Avei rehechávo mbaʼépa ojapo hikuái nde ere jave rejapotaha la Biblia heʼíva.

11. Mbaʼe mbaʼe jahasávapepa ñanepytyvõ Ñandejára heʼíva?

¹¹ Heta mbaʼépe Ñandejára Ñeʼẽ ojogua peteĩ mbaʼe rendýpe ñandereraháva tape porãre. Pór ehémplo, ñapensami peteĩ ermáno opytaha travahoʼỹre. Upéi oñehenoiuka chupe ombaʼapo hag̃ua. Haʼe ningo oikotevẽ pe traváho. Péro ombaʼapoitereivaʼerã ha ndaikatumoʼãi oho meme rreuniónpe ha ojapo kongregasiónpe oñekotevẽva (Salmo 37:25). Oĩ avei umi kristiáno ohechasetereíva pelíkula térã umi prográma naiporãiva (Efesios 4:​17-19). Ha oĩ avei umi ipochy reíva ermanokuérandi (Colosenses 3:13). Koʼã mbaʼépe jahejavaʼerã Ñandejára Ñeʼẽ tomyesakã ñandéve ñande rape. Jajapóramo la Biblia heʼíva jagueropuʼakáta oimehaichagua provléma. Ñandejára Ñeʼẽ niko ‘iporã ñamboʼe ha ñañemoñeʼẽ hag̃ua ñande rapichápe, japorohekomboʼe ha ñaporomoarandu hag̃ua hekopete’ (2 Timoteo 3:16).

“Ohesapéva chéve che raperã”

12. Mbaʼéichapa Ñandejára heʼíva ohesape ñande raperã?

¹² Salmo 119:105 avei ohechauka Ñandejára heʼíva ohesapeha ñande raperã. Jaikuaa mbaʼépa oikóta tenonderãme, la Biblia omombeʼúgui mbaʼérepa ojehasa asy opárupi ha mbaʼépepa opáta koʼã mbaʼe. Jahechakuaa jaikoha ko múndo aña ‘ára pahápe’ (2 Timoteo 3:​1-5). Jaikuaa rupi oikótava tenonderã jajepyʼamongetavaʼerã umi mbaʼe jajapóvare. Apóstol Pedro ohai: ‘Opa mbaʼe opavaʼerã upéicha, upévare marangatuetépe ha kyhyjepópe peẽ peikovaʼerã! Pehaʼarõ ha peipotákena pende pyʼaite guive tog̃uahẽ upe Ñandejára ára’ (2 Pedro 3:​11, 12, BNP).

13. Jaikuaa rupi jaikoha ára pahápe, mbaʼépa ñapensa ha jajapovaʼerã?

¹³ Umi mbaʼe ñapensáva ha jajapóvare jahechaukavaʼerã jagueroviaha ‘ko múndo opavaʼerãha, opa koʼã mbaʼe ojehayhúva ipype reheve’ (1 Juan 2:​17, BNP). La Biblia heʼíva ñanepytyvõta jaiporavo porã hag̃ua umi mbaʼe jahupytyséva. Pór ehémplo, Jesús heʼivaʼekue: ‘Peheka raẽ Ñandejára  rréino ha pe teko marangatu haʼe oipotáva, ha upéi oñemeʼẽvaʼerã avei peẽme opa koʼã mbaʼe’ (Mateo 6:​33, BNP). Jaguerohory umi mitãrusu ha mitãkuña ojeroviáva Jesús heʼivaʼekuére ha oñehaʼãva ojapove Jehovápe g̃uarã. Oĩ avei umi testígo ifamília reheve ováva ótro tetãme oipytyvõ hag̃ua predikasiónpe.

14. Mbaʼépa ojapo peteĩ família opredikave hag̃ua?

¹⁴ Jahechami mbaʼépa ojapo peteĩ família Estados Unidosgua. Haʼekuéra ova República Dominicánape, opredika hag̃ua peteĩ puévlo oikohápe 50.000 tapicha rupi. Upe kongregasiónpe oĩ 130 puvlikadór rupi ha 12 de abril 2006-pe ohomi 1.300 tapicha Conmemoraciónpe. Upépe ‘kogaʼa otyarõmbáma oñemonoʼõ hag̃ua’. Cinco mése og̃uahẽ rire, pe karai, hembireko, itaʼýra ha itajýra ostudiáma la Biblia 30 tapicha ndive (Juan 4:35). Pe túva omombeʼu: “Treinta ermáno ou orepytyvõ hag̃ua kongregasiónpe. Veinte ou Estados Unídosgui ha umi ótro katu ou Bahamas, Canadá, España, Italia ha Nueva Zelándagui. Opredikasetereíningo hikuái ha omokyreʼỹ umi ermanokuérape”.

15. Mbaʼeichagua vendisiónpa rehupytýma remotenondehaguére Ñandejára Rréino?

¹⁵ Jaikuaáningo oĩha heta ndaikatúiva ova ótro tetãme opredikave hag̃ua. Péro umi ikatúva ojapo upéva ohupytýta heta mbaʼe porã. Jaiko jaikohápe, enterove javyʼakuaa ñañemeʼẽmbaitévo Jehová servísiope. Ñamotenondéramo Ñandejára rréino, Jehová ‘ohykuavóta ñande ári ivendisión renyhẽ chovi’ (Malaquías 3:10).

Mbaʼe porã jahupytýva jajapóvo Jehová heʼíva

16. Mbaʼéichapa ñanepytyvõ Ñandejára heʼíva?

¹⁶ Jahechahaguéicha, Jehová heʼíva ñanepytyvõ mokõi mbaʼépe. Primero, ojogua peteĩ mbaʼe rendýpe ñandereraháva tape porãre, ha ñanepytyvõva jadesidi hag̃ua. Segundo katu, Ñandejára Ñeʼẽ ohesape ñande raperã, ha hesakã ñandéve. Upéva ñanepytyvõta jajapo hag̃ua apóstol Pedro heʼíva: ‘Peñembosakoʼíke ha peneakã porãke. Pehaʼarõkuaa opáichavo, pe mbaʼe Ñandejára imbaʼeporã rupi omeʼẽtava peẽme Jesucristo ou vove’ (1 Pedro 1:13).

17. Mbaʼéichapa jastudiáramo la Biblia ñanepytyvõta jajapo hag̃ua Ñandejára heʼíva?

¹⁷ Jehová ningo ohechauka ñandéve mbaʼéichapa ñasẽ porãvéta. Péro, jajapópa haʼe heʼíva? Jaleéramo la Biblia káda día ñantende porãta haʼe oipotáva. Jajepyʼamongetavaʼerã jaleévare jahecha hag̃ua mbaʼépa Jehová rembipota. Tekotevẽ avei ñapensa mbaʼéicha jaiporúta pe jaleéva (1 Timoteo 4:15). Upéi hesakãtama ñandéve mbaʼépa iporãve jadesidi (Romanos 12:1).

18. Mbaʼe vendisiónpa jahupyty jahejáramo Ñandejára Ñeʼẽ omyesakã ñande rape?

¹⁸ Jahejáramo Ñandejára Ñeʼẽ ohesape ñande raperã jadesidi porãta. Jehová Ñeʼẽ katuete “omoarandu oikuaaʼỹvape” (Salmo 19:7). Ha jajapóramo la Biblia heʼíva ñandepyʼaguapýta ha javyʼáta jaikuaágui Jehová ñandeguerohoryha (1 Timoteo 1:​18, 19). Iporãveha katu, jahejáramo Ñandejára ñeʼẽ ohesape ñande rape káda día, haʼe omeʼẽta ñandéve peteĩ rregálo ijojahaʼỹva: jeikove opaʼỹva (Juan 17:3).

Nemanduʼápa?

• Mbaʼérepa tekotevẽ Jehová ohechauka ñandéve mbaʼéicha jaikovaʼerã?

• Mbaʼéichapa Ñandejára heʼíva ojogua peteĩ mbaʼe rendýpe ñandereraháva tape porãre?

• Mbaʼéichapa Ñandejára heʼíva ohesape ñande raperã?

• Mbaʼéichapa jastudiáramo la Biblia ñanepytyvõta jajapo hag̃ua Ñandejára heʼíva?

[Porandu ñahesaʼỹijóva]

[Nóta oĩva taʼanga ndive páhina 17]

Jesús oiporavo iñirũrã umi ojapóva Jehová heʼívante

[Nóta oĩva taʼanga ndive páhina 18]

Ojekuaápa cherehe amotenondeha Ñandejára Rréino?

[Nóta oĩva taʼanga ndive páhina 19]

Mbaʼéicha javépa ivaíma jajeheʼa peteĩ ndahaʼéiva kristiáno tee rehe?