Ñahaʼarõ iporãva ko múndo vaípe

“KOʼÁG̃A rupi yvyporakuéra ikatu ojapo hetave mbaʼe oipytyvõ hag̃ua hapichakuérape yma guarégui”. Upéva heʼi Bill Clinton, Estados Unidos presidentekue ohóramo guare Ottawa, Canadápe, marzo 2006-pe. Haʼe heʼi hentekuéra oparupigua oipytyvõseveha hapichápe oiko guive pe tsunami 2004-pe. Avei heʼi “koʼág̃a ñaikotevẽveha ñande rapichakuérare yma guarégui”.

Ikatúpa umi ama guasu, yvyryrýi térã tsunami omokyreʼỹ hentekuérape oñopytyvõ hag̃ua ha upéicha oñehaʼã oiko porãve? ‘Ñaikotevẽve rupi ñande rapicháre’, ikatúpa jaʼe jaikotaha pyʼaguapýpe ha jakyhyjeʼỹre?

Esperánsa añetetéva

Yvyporakuéra ningo seis mil áñorema oñehaʼã ojapo iporãva, upéicharõ jepe pyʼỹi ombotavy ha pichakuérape. Upévare la Biblia heʼi: “Poguasukuérare ani pejerovia, umíva niko yvypórante ha ndaikatúi ñanerenohẽ jejopy vaígui” (Salmo 146:3). Jajerovia reíta yvypóra organisasionkuérare, umi mbaʼe porã orekóvare ha umi mbaʼe ojaposévare. Mbaʼérepa? Ko múndo ningo ‘ohasa ha opa hembipota avei’ (1 Juan 2:​17, JMP).

Péro ymaite guivéma Ñandejára oñangareko yvyporakuéra heko potĩvare. La Biblia heta vése heʼi umi Israelgua ohaʼarõ ha ojeroviahague hese. Pór ehémplo heʼi “Israel nderehe ojerovia” ha “ituvakuéra ypykue jeroviaha” (Jeremías 14:8; 17:13; 50:7). Upéicha la Biblia ñanemokyreʼỹ ‘jajerovia hag̃ua Jehováre’ (Salmo 27:14).

Proverbios 3:​5, 6 heʼi: “Ejerovia Ñandejárare nde pyʼaite guive, ha ani ndejehe añónte. Eikuaáke haʼe oĩha opárupi, ha haʼe omyesakãtaha ndéve nde rape”. Ikatu jajerovia Jehová heʼívare koʼápe, haʼe ningo nokambiái ha ndaijapúi (Malaquías 3:6; Santiago 1:17). Haʼe oipota iporãvéva ñandéve g̃uarã. Upévare jajapóramo la Biblia heʼíva, Ñandejára ohechaukáta ñandéve ñande raperã ko múndo hetaite iprovlémavape (Isaías 48:​17, 18).

Peteĩ tapicha oñehaʼãva ojapopaite Ñandejára heʼíva ojeroviakuaa ko mbaʼére: ‘Ani rekyhyje, che aime nendive, ani rejepyʼapy, che hína nde Jára. Che romokyreʼỹ ha roipytyvõ, che rojoko che pyapy mbaretépe’ (Isaías 41:10). Entéro jahayhúva Jehovápe ñanekyreʼỹta ñañemboʼéramo Chupe ñande pyʼaite guive ha jajepyʼamongeta koʼápe heʼívare. Haʼe ñanepytyvõta jagueropuʼaka hag̃ua oimeraẽ mbaʼe ñandepyʼapýva.

Jahechamína mbaʼépa heʼi Andrea, haʼe testigo de Jehová ha oreko mokõi mitã. Haʼe heʼi: “Añemboʼe ha ajepyʼamongeta rupi Jehová promesakuérare ikatu agueropuʼaka umi mbaʼe chepyʼapyetereíva. Ajerovia rupi Jehováre, pyaʼeve ahechakuaa mbaʼépa ajapovaʼerã”.

Emombarete nde jerovia Jehováre

Peteĩ salmísta ohechaukavaʼekue mbaʼérepa jajeroviavaʼerã Jehováre. Haʼe heʼi: “Umi ne rembiapoukapy [léi] ohayhúva pyʼaguapýpe oiko, ndaipóri mbaʼeve osẽ vaíva chupekuéra” (Salmo 119:165). Jastudiáramo Ñandejára Ñeʼẽ ñamombaʼéta ha jahayhúta ‘opa umi mbaʼe añetéva, opa ikatúva ñamombaʼeguasu, opa umi hekopeguáva, opa umi ipotĩva, opa umi oporombohorýva ha herakuã porãva’. Koʼã mbaʼe katuete ñanepytyvõta imbarete hag̃ua ñande jerovia. Ñañehaʼãramo ñahendu, jaikuaa, ñamombaʼe ha jajapo koʼã mbaʼe ‘Ñandejára ñanembopyʼaguapýva oĩta ñanendive’ (Filipenses 4:​8, 9, BNP).

Upéva oiko John rehe, haʼe heʼi: “Akambia hag̃ua apensáva che renonderãre, ahechakuaa añemoag̃uivaʼerãha Ñandejárare, jepe haʼe imarangatu ha ndaikatúi jahecha chupe. Ajapo hag̃ua upéva ahejaitevaʼerã che lája tuja. Ha añehaʼãvaʼerã amombarete che jerovia ha avei amombaʼe Ñandejára omombaʼéva. Upéva ahupyty alee ha ajepyʼamongeta rupi Iñeʼẽre”.

Umi mbaʼe oĩva Ñandejára Ñeʼẽme ojogua y hoʼysã asývape omboguéva ñande yʼuhéi. Ñanepytyvõ ani hag̃ua oguapyeterei ñanderehe umi notísia vai káda diaygua. Jajapóramo la Biblia heʼíva ñanepytyvõta avei jajogueraha porãve hag̃ua ñande rogaygua ndive ha ani hag̃ua jajepyʼapyeterei oimeraẽ mbaʼére. Ñandejára ningo heʼíma ‘oipytyvõtaha umi hese añetehápe ojeroviávape’ (2 Crónicas 16:9). Haʼe ojapóta oñekotevẽva ani hag̃ua jakyhyjeve.

Phinehas ningo peteĩ karai ohechavaʼekue mbaʼéichapa hetápe ojejuka gerrahápe. Haʼe heʼi: “Umi mbaʼe ahasáva chemboʼe ahejavaʼerãha Jehová pópe che rekove. Ajapo rupi la Biblia heʼíva ajehekýi hetaiterei provlémagui”. Upéicha avei rejerovia añetéramo Ñandejára Jehováre, haʼe katuete nepytyvõta regueropuʼaka hag̃ua umi provléma  tuichavéva jepe (Salmo 18:29). Peteĩ mitã ohayhúva itúva ha isýpe, ojerovia hesekuéra. Haʼe oikuaa haʼekuéra oñangarekotaha hese oúramo hasy sapyʼa térã okyhyje jave. Upéicha avei ñañeñandúta jajeroviáramo Jehováre (Salmo 37:34).

Mbaʼérepa ikatu jajerovia

Jesucristo heʼivaʼekue hemimboʼekuérape: “Peñemboʼe peẽ kóicha: ‘Ore Ru reiméva yvágape, toñemomarangatu nde réra. Tou ne rréino, tojejapo ne rembipota yvy ári yvagapeguáicha’” (Mateo 6:​9, 10, BNP). Ko Rréino yvagapegua ningo peteĩ goviérno oĩva Jesucristo poguýpe. Ñandejára oiporúta ko goviérno ohechauka hag̃ua haʼenteha Mburuvicha Guasu ko Yvy ape ári (Salmo 2:​7-12; Daniel 7:​13, 14).

Jaiko kyhyjepópe oikógui hetaiterei mbaʼe vai. Koʼã mbaʼe ohechauka ñaikotevẽha Ñandejára ñanepytyvõ. Ha javyʼavaʼerã upéva hiʼag̃uímagui! Ñandejára omoĩma Jesucrístope rreirã ha omeʼẽma chupe autorida. Jesús ohechaukáta Jehová añonteha Mburuvicha Guasu ha omomarangatúta Héra (Mateo 28:18). Koʼẽrõitéma Ñandejára goviérno oipeʼapaitéta ko Yvýgui umi mbaʼe ñanemongyhyjéva ha ñandepyʼapýva. Isaías 9:5 [9:​6, NM] ohechauka mbaʼérepa oñemeʼẽ Jesúspe ko tembiapo ha mbaʼérepa ikatu jajerovia haʼe ojapotaha koʼã mbaʼe. Pór ehémplo ojeʼe Jesúsre “Túva opa ára oikovéva”, ‘Mboʼehára ijojahaʼỹva’ ha “Mburuvicha guasu pyʼaguapy reruha”.

Jahechamína mbaʼérepa ojeʼe hese “Túva opa ára oikovéva”. Ko mbaʼe ohechauka Jesús ipuʼakaha ha orekoha autorida omeʼẽ hag̃ua yvyporakuéra iñeʼẽrendúvape oportunida oikove hag̃ua opa ára g̃uarã. Upéva ojehupyty Jesús sakrifísio rupi. Upéicha ojepeʼáta yvyporakuérape pekádo poguýgui (Mateo 20:28; Romanos 5:12; 6:23). Ha Ñandejára heʼihaguéicha chupe, Cristo omoingove jeýta umi omanovaʼekuépe (Juan 11:​25, 26).

Oikórõ guare ko Yvy ape ári Jesús ohechaukavaʼekue haʼeha ‘Mboʼehára ijojahaʼỹva’. Haʼe oikuaa porã Ñandejára Ñeʼẽ ha avei yvyporakuérape, upévare oikuaa mbaʼéichapa jagueropuʼakáta umi mbaʼe ñandepyʼapýva ára ha ára. Oñemoĩ guive chupe rreirã yvágape, Ñandejára ojevale hese oikuaauka hag̃ua yvyporakuérape hembipota. Jesús haʼe gueteri koʼág̃a peve ‘Mboʼehára ijojahaʼỹva’. Umi mbaʼe haʼe heʼivaʼekue iporãiterei ha jatopa la Bíbliape. Jaikuaa ha jagueroviáramo umíva, ndajakyhyjemoʼãi ñane renonderãgui.

Isaías 9:5 [9:​6, NM] heʼi avei Jesúsre “Mburuvicha guasu pyʼaguapy reruha”. Upéva ohechauka Jesús oipeʼataha opa mbaʼe omoingo vaíva yvyporakuérape. Opáta polítika, ndaiporimoʼãi ipláta hetáva térã imboriahúva, ha enterove jaikóta peteĩchapa. Mbaʼéichapa ojapóta upéva? Oĩta peteĩ goviérnonte ko Yvy ape ári ha ndaiporimoʼãvéi mbaʼeveichagua ñorairõ (Daniel 2:44).

Ñandejára goviérno poguýpe ojeikóta pyʼaguapýpe opa ára g̃uarã. Mbaʼérepa ikatu jajerovia ko mbaʼére? Isaías 11:9 omombeʼu: “Ndaiporimoʼãi ñembyai térã sarambikue che yvyty marangatúpe, henyhẽtagui pe tetã Ñandejárape oikuaávagui, y omyenyhẽháicha yguasu [már]”. Mbeguekatúpe opa yvyporakuéra oikuaáta Ñandejárape ha iñeʼẽrendúta chupe. Nderevyʼáipa upévare? Upéicharõ, aníke rehaʼarõ reikuaa hag̃ua Jehovápe.

Ikatu rejapo upéva restudiáramo la Biblia. Upéicha remombaretéta nde jerovia ha reikuaáta mbaʼérepa oiko umi mbaʼe vai, ha mbaʼéichapa Ñandejára omyatyrõmbáta opa mbaʼe. Upévare, iporãitéta restudiáramo la Biblia testigos de Jehová ndive. Péicha nderekyhyjemoʼãvéima ha reguerekóta esperánsa jaikóramo jepe ko múndo henyhẽvape provlémagui.

 [Taʼanga ha rrekuádro oĩva páhina 7-pe]

Mbaʼérepa jajeroviakuaa Ñandejára Goviérnore

Jesucristo ningo pe Rréi ogovernátava Ñandejára Rréinope. Chupe oñembokatupyry ha oñemeʼẽ puʼaka ogoverna hag̃ua opárupi (Mateo 28:18). Haʼe omoporã jeýta ko Yvy. Avei omongueráta opaichagua mbaʼasy. Umi milágro Jesús ojapovaʼekue oikórõ guare ko Yvy ape ári ohechauka umi mbaʼe porãita ojapótava ogoverna vove. Upévare jaikuaa ndaiporiha ombojojáva chupe ha ikatuha jajerovia hese. Koʼã mbaʼe apytépe, mbaʼépa reguerohoryve Jesúsre?

▪ Haʼe oñatende opavavére (Marcos 10: 13- 16).

▪ Iñakãguapy ha chupe g̃uarã enterove peteĩcha (Marcos 10:​35-​45).

▪ Ndaijapúi ha ipojera (Mateo 4:​5-7; Lucas 6: 19).

▪ Ihústo (Isaías 11:​3-5; Juan 5:​30; 8:​16).

▪ Imbaʼeporã, imbaʼerechakuaa ha noñemombaʼeguasúi (Juan 13:​3-​15).

[Nóta oĩva taʼanga ndive páhina 4]

Jaleéramo la Biblia ha jajepyʼamongeta hese ñanepytyvõ jajerovia hag̃ua Jehováre