Jajapokuaáva ñane ñeʼẽ rupi

PETEĨ jirafa kũ omedi 45 centímetro rupi, ikatu omomýi ágotyo pégotyo ha imbarete. Oiporu ikũ ohogueʼo hag̃ua umi yvyra máta okaruha. Pe ballena azul kũ katu tuicha peteĩ elefánteicha. Mbaʼeichaite piko imbaretevaʼerã omomýi hag̃ua!

Ñambojojávo koʼãvare ñane kũ michĩetereirasa. Péro hetaitereive mbaʼe jajapokuaa heseve. La Biblia heʼi: “Ñane ñeʼẽre oĩ jaikove térã ñamano” (Proverbios 18:21). Ha añete, heta vése ningo ñahendu mbaʼéichapa heta hénte ijapu ha ohundi hapichápe, térã ikatu ojejuka rei umi inoséntepe upévare.

Avei heta oñoamigoitevaʼekue ipochyete oñondive ojeʼehaguére peteĩ mbaʼe vai. Ha ajépa ñañeñandu vai oñeñeʼẽ pohýiramo ñandéve. “Arakaʼe peve piko pechemyangekóita, ha pechekutúta pene ñeʼẽme?” heʼivaʼekue Job iñirũnguérape, heta oñeʼẽ vai rire chupe hikuái (Job 19:2). Santiago omombeʼu mbaʼeichaitépa ndajajokóiramo ñande juru ikatu jajapo ivaíva. Haʼe heʼi: “Ñane kũ; peteĩ ñande rete rehegua michĩmíva, upéicharamo jepe ipuʼaka heta mbaʼe rehe. Ñanemanduʼavaʼerã mbaʼéichapa peteĩ tata piriri ikatu ohapypa peteĩ kaʼaguy guasu. Ha pe ñane kũ niko tatáicha” (Santiago 3:​5, 6, BNP).

Péro ikatu avei jaiporu ñande juru jajapo hag̃ua iporãva. Ñane ñeʼẽre ikatu ñamokyreʼỹ umi tapicha oñedeprimíva ha ndoikosevéimavape. Avei heta tapicha ojedrogavaʼekue ha umi oporojukáva jepe okambia ojapohaguére ojeʼéva chupekuéra. Umi mbaʼe heʼíva peteĩ tapicha heko potĩva “oporomoingove”, ha mansána raʼanga órogui ojejapóva ha “ojeguáva plátape pe ñeʼẽ hendapete ojeʼéva” (Proverbios 15:4; 25:11).

Péro jaiporu porãvéta ñande juru jaiporúramo ñamombaʼeguasu hag̃ua Ñandejára Jehovápe, ñamombeʼu pe marandu porã, ha ñamboʼe ñande rapichakuérape la Biblia heʼíva. Mbaʼérepa? Jesús heʼi: ‘Ha upe jeikove opaʼỹva niko kóva: Tandekuaa ndéve Ñandejára añete ha peteĩetéva, ha Jesucrístope, upe nde rembouvaʼekue’ (Juan 17:3; Mateo 24:14; 28:​19, 20).