Koʼẽrõitéma opáta opaichagua jehasa asy

“Haʼe hína pe Ita guasu, ha pe hembiapo iporãitereíva.” (DEUTERONOMIO 32:​4, ÑÑM.)

1, 2. a) Mbaʼérepa ñamombaʼeterei pe jeikove opaveʼỹva ñahaʼarõva? b) Mbaʼérepa heta ndogueroviái oĩha peteĩ Ñandejára oprometéva jaikovetaha opa ára g̃uarã?

 NDÉPA repensáva jepi mbaʼéichapa ojeikóta pe Paraísope? Ikatu repensa rehoha opa henda rupi rehecha hag̃ua opaichagua mbaʼe oikovéva ko Yvy ape ári. Ikatu avei repensa mbaʼeichaitépa revyʼáta rembaʼapóvo oñeñangareko hag̃ua ko Yvýre, oiko hag̃ua chugui peteĩ lugár iporãitereíva. Térã ikatu reñembokatupyryve pintúra, arkitektúra, músika ha oimeraẽ mbaʼépe koʼág̃a ndaikatúiva rejapo, hiʼãramo jepe ndéve. Tahaʼe haʼeháicha, remombaʼeterei pe jeikove opaveʼỹva rehaʼarõva, ha la Biblia ohenóiva “jeikove añeteguáva”. Upearã voi Ñandejára ñandeapovaʼekue (1 Timoteo 6:​19).

² Ajépa tuichaite mbaʼe ñandéve g̃uarã ñañeʼẽ ñande rapicha ndive umi mbaʼe porãitére? Upéicharamo jepe, oĩ heta ndogueroviáiva, ha heʼi umi ivýrovante ogueroviaha koʼã mbaʼe. Umichaguápe ijetuʼúma voi ohechakuaa oĩha peteĩ Ñandejára oprometéva jaikovetaha opa ára g̃uarã. Mbaʼérepa ndogueroviái? Heta oĩ ndogueroviáiva ohechágui umi mbaʼe vai oikóva ko múndope. Haʼekuéra heʼi oĩramo peteĩ Ñandejára ipuʼakapáva ha ñanderayhúva, ndohejamoʼãi oiko umi mbaʼe vai ñanembohasa asýva. Chupekuéra g̃uarã ndaikatúi peteĩ Ñandejára oheja oiko mbaʼe vai, ha ohejáramo, heʼise ndaipuʼakaiha umi mbaʼére térã ndojepyʼapyiha ñanderehe. Upéicha jahecha mbaʼeichaitépa Satanás ombotavy tapichakuérape (2 Corintios 4:4).

3. Mbaʼe ijetuʼúvapa ñambohovaivaʼerã, ha mbaʼérepa ñaime porãve oimeraẽvagui jajapo hag̃ua upéva?

³ Ñande testigos de Jehová ñaime porãve oimeraẽvagui ñaipytyvõ hag̃ua umi ñande rapichápe Satanás ha ko múndo ombotavyvaʼekuépe (1 Corintios 1:20; 3:19). Jahechakuaa heta ndogueroviaiha umi promésa oĩva Ñandejára Ñeʼẽme, ndoikuaái rupi Jehovápe. Ikatu ndoikuaái Ñandejára réra ha mbaʼépa heʼise. Ha ikatu avei ndoikuaái mbaʼeichaguápa Haʼe: ndohejareiriha umi  mbaʼe heʼivaʼekue. Ñande katu jaikuaa umi mbaʼe. Upévare, iporã jajepyʼamongeta sapyʼapyʼa jahecha hag̃ua mbaʼéichapa ikatu ñaipytyvõ umi ‘pytũmbýpe’ oĩvape, oikuaa hag̃ua hikuái ko mbaʼe ijetuʼuvéva: mbaʼérepa Ñandejára oheja oiko hetaite mbaʼe vai oporombohasa asýva? (Efesios 4:​18.) Ñañepyrũ hag̃ua jahecháta mbaʼéichapa ñambohovaikuaa ko porandu. Upéi jahecháta mbaʼéichapa Jehová ohechauka iñarandu ha ñanderayhuha ohejávo oiko umi mbaʼe vai.

Mbaʼépa jajapo raẽ vaʼerã

4, 5. Mbaʼépa jajapo raẽ vaʼerã oñeporandúramo ñandéve mbaʼérepa Ñandejára oheja jahasa asy? Emyesakãvemi.

⁴ Mbaʼépa jaʼe oĩ jave oporandúva mbaʼérepa Ñandejára oheja ojehasa asy? Ikatu ñañepyrũ ñamombeʼupaite umi mbaʼe oikovaʼekue hardín de Edénpe. Sapyʼánte iporã jajapo upéicha, péro iporã avei jajepyʼamongetami mbaʼépa ikatu jajapo raẽ ñambohovái hag̃ua (Proverbios 25:11; Colosenses 4:6). Jahechami mbohapy mbaʼe iporãva ñanemanduʼa ñambohovái mboyve ko porandu.

⁵ Primero, pe tapicha ojepyʼapýramo umi mbaʼe vai oikóvare, ikatu oime haʼe térã hogaygua ohasámaraʼe umi mbaʼére. Upévare, iporã vaʼerã jahechauka chupe ñamombaʼeha pe ohasavaʼekue. Apóstol Pablo heʼivaʼekue kristianokuérape: “Penerasẽ umi hasẽva ndive” (Romanos 12:15). Ñamombaʼéramo ñande rapicha ohasavaʼekue, ha jaiporiahuvereko chupe, ikatúta oikuaaseve (1 Pedro 3:8). Ohecháramo jajepyʼapyha hese, ikatu ñanerendu porãve.

6, 7. Mbaʼérepa iporã jaguerohory ñande rapichápe oporandúramo peteĩ mbaʼe oipyʼapýva chupe ha la Biblia ombohováiva?

⁶ Segundo, jaguerohoryvaʼerã ñande rapichápe oporanduhaguére ko mbaʼe. Oĩ oimoʼãva koʼãichagua ikangyha ijeroviápe térã nomombaʼeiha Ñandejárape oporandúgui umi mbaʼe. Ikatu voi peteĩ omboʼéva rrelihión heʼi chupekuéra upéicha. Péro umi ojeroviáva Ñandejárare jepe oñeporanduvaʼekue ã mbaʼe. Umíva apytépe oĩ David, heʼivaʼekue: “Mbaʼére piko [Jehová] reñemomombyry chehegui? Mbaʼére piko rekañy chehegui ajecha vai jave?” (Salmo 10:1). Upéicha avei, Habacuc heʼi: “Che Jára, arakaʼe peve piko asapukáita ndéve chepytyvõ hag̃ua ha nacherendumoʼãi? Arakaʼe peve piko asapukáita oĩgui jejuka ha nderejumoʼãi orepeʼa jejopy vaígui? Maʼerã piko rehechauka chéve jeiko asy ha ñaña? Monda ha jejuka opárupi ahecha, ñorairõ opaichagua opárupi oiko” (Habacuc 1:​2, 3).

⁷ Umi kuimbaʼe jeroviaha omombaʼetereivaʼekue Ñandejárape. Oñemongavajúpa chupekuéra oporanduhaguére ã mbaʼe? Nahaniriete, Jehová omoĩuka uvei koʼã porandu Iñeʼẽme. Koʼág̃a rupi, umi tapicha ohasa asýva ikatu oikuaaseterei mbaʼérepa oiko umi mbaʼe vai la Biblia añoite ikatúva omyesakã. Ñanemanduʼavaʼerã Jesús oñeʼẽ porã hague umi oikuaasevévare Ñandejárape, umi “ohechakuaáva iporiahuha ijespíritupe” (Mateo 5:​3, BNP). Tuichaiterei mbaʼe ñandéve g̃uarã ñaipytyvõ ãichagua tapichápe ovyʼa hag̃ua Jesús heʼihaguéicha.

8. Mbaʼe mbaʼépa oñemboʼe tapichakuérape ogueroviaukáva chupekuéra Ñandejára ñanembohasa asyha? Mbaʼéichapa ikatu ñaipytyvõ chupekuéra?

⁸ Tercero, ikatu jahechauka upe tapichápe umi mbaʼe vai oikóva ndouiha Ñandejáragui. Hetápe oñemboʼe Ñandejára ogovernaha ko múndo, omohendamaha ymaiterei guive umi mbaʼe ojehútava ñandéve, ha haʼeñoite oikuaaha mbaʼérepa ñanembohasa asy. Tuichaitépa ojavy hikuái! Koʼã mbaʼe omongyʼa Ñandejára réra ha omboja hese ombouha umi mbaʼe vai oikóva ko múndope. Upévare, iporã vaʼerã jaiporu Ñandejára Ñeʼẽ ñamyesakã hag̃ua koʼã mbaʼe (2 Timoteo 3:​16).  Jehová nogovernái ko múndo aña; Satanás ojapo upéva (1 Juan 5:​19). Haʼe ndojapói avavépe ohasa asy hag̃ua, oheja uvei ñande jaiporavo pe iporãva térã ivaíva (Deuteronomio 30:19). Avei, Jehová nomboúi umi mbaʼe vai oikóva. Upéva rangue ndaijaʼéi umi mbaʼe vaíre, ha ojepyʼapy umi ohasa asývare (Job 34:10; Proverbios 6:​16-​19; 1 Pedro 5:7).

9. Mbaʼépa omeʼẽ ñandéve pe “tembiguái jeroviaha ha iñarandúva” ñamyesakã hag̃ua ñande rapichápe mbaʼérepa Ñandejára oheja jahasa asy?

⁹ Jajapopa rire koʼã mbaʼe, jahechakuaátama ikatúpa ñamyesakãve ñande rapichápe mbaʼérepa Ñandejára oheja jahasa asy. Ñanepytyvõ hag̃ua, pe “tembiguái jeroviaha ha iñarandúva” omeʼẽ ñandéve heta mbaʼe ikatúva jaiporu (Mateo 24:​45-​47). Pe asambléa de distríto “Ñaneñeʼẽrendu Ñandejárape”, ojejapovaʼekue 2005 ha 2006-pe, oñemeʼẽ pe tratádo Koʼẽrõitéma opáta opaichagua jeiko asy! Mbaʼérepa ndajaleéi ha jaikuaa porã mbaʼépa heʼi? Pe lívro Mbaʼépa añetehápe omboʼe la Biblia?, oĩva 157 ñeʼẽme, oreko avei peteĩ kapítulo oñeʼẽva ko mbaʼe iñimportantetévare. Jaiporuvaʼerã ikatuhaguéicha koʼã puvlikasión, omyesakã porãgui ñandéve Edénpe oñeñeʼẽ vai hague Jehová goviérnore ha mbaʼérepa haʼe oheja oiko koʼã mbaʼe jahecháva. Ñanemanduʼavaʼerã ñañeʼẽ jave ko mbaʼére, ñaipytyvõhañaína ñande rapichápe oikuaa hag̃ua pe mbaʼe iñimportantevéva: mávapa Jehová ha mbaʼeichaguápa haʼe.

Jaikuaauka mbaʼeichaguápa Jehová

10. Mbaʼépa ndaikatúi ontende heta ñande rapicha? Mbaʼépa ikatu oipytyvõ chupekuéra?

¹⁰ Ñamombeʼúvo mbaʼérepa Ñandejára oheja yvyporakuéra hoʼa Satanás poguýpe, ñañehaʼãvaʼerã jaikuaauka umi mbaʼe porã ohechaukáva Jehová. Heta oĩ oikuaáva Ñandejára Ipuʼakapaha. Ohendu jepi hikuái ndaiporiha haʼéicha ipuʼakáva. Upéicharamo jepe, nontendéi mbaʼérepa Ñandejára ndoiporúi ipuʼaka oipeʼáma hag̃ua umi mbaʼe oĩva hendapeʼỹ ha pe jehasa asy. Ikatu haʼekuéra ndohechakuaái Jehová imarangatuha [orekoha santidad], ihústo, iñarandu ha ñanderayhuetereiha. Jehová oiporu koʼã mbaʼe hendapete; upévare la Biblia heʼi: “Hembiapokue ndaijojahái” (Deuteronomio 32:4). Mbaʼéichapa ikatu jahechauka koʼã mbaʼe oñeporandu jave ñandéve mbaʼérepa Ñandejára oheja jahasa asy? Jahechami koʼã ehémplo.

11, 12. a) Mbaʼérepa ndaikatuivaʼekue oñeperdona Adán ha Évape? b) Mbaʼérepa Jehová nañanderejamoʼãi pekádo poguýpe opa ára g̃uarã?

¹¹ Ndaikatúi piko rakaʼe Jehová ombohasánte Adán ha Eva ojapovaʼekue ha operdona chupekuéra? Ko mbaʼépe ndaikatúi ojapo upéva. Iperfékto rupi, haʼekuéra oikuaa porã vaʼekue ojapóva omboykérõ guare Jehová goviérno ha oñemoĩ Satanás poguýpe. Upévare nombyasýi hikuái ni michĩmi ojapovaʼekue. Upéicharamo jepe, oĩ jave oporandúva mbaʼérepa Jehová noperdonái, oporanduhína mbaʼérepa haʼe nopyrũinte heʼivaʼekuére ha oheja rei Adán ha Eva rembiapo vaikue. Ñantende porã hag̃ua, jahechakuaavaʼerã peteĩ mbaʼe iñimportantetereíva: Jehová imarangatuha (Éxodo 28:36; 39:30).

¹² Ñandejára Ñeʼẽme hetaiterei hendápe oñemombeʼu Jehová imarangatuha. Upéicharamo jepe, ko múndo añáme ndahetái oikuaa mbaʼépa heʼise upéva. Jehová ipotĩ, ha ndojeheʼái mbaʼeveichagua mbaʼe vaíre (Isaías 6:3; 59:2). Ha omoĩma peteĩ mbaʼe ñandepeʼaite hag̃ua pekádo poguýgui. Ñanderejárire Jehová opa ára rehe mbaʼe vai poguýpe, japytavaʼerãmoʼã esperansaʼỹre (Proverbios 14:12). Hiʼaraitépe, omyatyrõta opa mbaʼe oĩhagueichaite iñepyrũme. Ha upéichata katuete, Jehová imarangatúgui.

13, 14. Mbaʼérepa Jehová nohundíri umi hese opuʼãvaʼekuépe amo Edénpe?

 ¹³ Ndaikatúipa rakaʼe Jehová ohundi umi opuʼãvaʼekuépe hese ha oñepyrũ jey? Ikatu ojapo, ha koʼẽrõite ojapóta upéva ohundi vove umi iñañávape. Upévare oĩ oñeporandúva: “Mbaʼérepa ndojapói upéva oĩrõ guare mbohapy mbaʼe vai apohánte? Naiporãmoʼãvéipa upéva isarambi mboyve mbaʼe vai apo, ha hendive opaichagua jehasa asy?”. Mbaʼérepa Jehová ndojapói upéicha? Deuteronomio 32:​4-pe heʼi Jehová ‘rape hekojojaha’. Jehová hustísia ndaijojahái. Haʼe ohayhu pe hustísia (Salmo 37:28). Ohayhúgui pe hustísia ojejoko ha nohundíri umi hese opuʼãvaʼekuépe amo Edénpe. Mbaʼérepa jaʼe upéva?

¹⁴ Opuʼãrõ guare Ñandejárare, Satanás heʼi Jehová ogoverna vaiha. Omombaʼégui pe hustísia, Jehová ohecha tekotevẽha ombohovái Satanáspe hekoitépe. Upépe voi ohundírire umi hese opuʼãvaʼekuépe, omereséramo jepe hikuái, noñemyesakãmoʼãi upe ojeʼéva hese. Ojekuaáta ndaiporiha imbaretéva haʼéicha, péro Satanás ndotakýi upe mbaʼére. Avei, Ñandejára heʼimavaʼekue Adán ha Évape mbaʼépa ojapovaʼerã: ifamília reta ha omyenyhẽvaʼerãha ko Yvy. Avei oñangareko ha oguerekovaʼerãha ipoguýpe opa mbaʼe Jehová ojapovaʼekue (Génesis 1:​28). Ohundírire upépe voi Adán ha Évape, upe heʼivaʼekue yvyporakuérape g̃uarã opyta rei vaʼerãmoʼã. Ohayhúgui pe hustísia, Jehová ndohejamoʼãi oiko upéva, heʼivaʼekue oñekumplivaʼerã katuete (Isaías 55:​10, 11).

15, 16. Oĩramo heʼíva ñandéve mbaʼéichapa ikatuvaʼerãmoʼã oñemyatyrõ umi mbaʼe oikovaʼekue Edénpe, mbaʼéichapa ñaipytyvõkuaa chupe?

¹⁵ Oĩnepa peteĩ iñaranduvéva Jehovágui ikatuvaʼerã omyatyrõ porãve pe provléma Satanás omoñepyrũvaʼekue? Oĩ heʼíva oikuaaha mbaʼéichapa ikatu oñemyatyrõ upéva.  Péro heʼívo upéicha, ndeʼiseipahína iñaranduveha Jehovágui? Ikatu heʼínte upéva, ndahaʼéi ipyʼa vaígui Jehová ndive, péro añetehápe ndoikuaái chupe ha mbaʼeichaitépa haʼe iñarandu. Omondórõ guare peteĩ kárta umi kristiáno Romayguápe, apóstol Pablo omombeʼuve mbaʼeichaitépa Ñandejára iñarandu. Oñeʼẽ pe “mbaʼe ñemi” Jehová orekovaʼekuére, oiporutaha Irréino oipeʼa hag̃ua yvyporakuéra pekádo poguýgui ha omombaʼeguasu hag̃ua héra. Mbaʼépa heʼi Pablo Ñandejára arandúre, omoñepyrũvaʼekue koʼã mbaʼe? Omohuʼãvo ikárta heʼi: “Ñandejára, haʼe añoite iñarandúva, toñemombaʼeguasu Jesucristo rupi tapia g̃uarã. Amén” (Romanos 11:25; 16:​25-​27, BNP).

¹⁶ Pablo ohechakuaa Jehová “añoite iñarandu[ha]”, ndaipórigui haʼeichagua mamove hendápe. Mbaʼeichagua yvypóra iñimperféktovapa ikatúta ombohovái porãve oimehaichagua provléma, koʼýte pe provléma tuichavéva ombohováiva Ñandejára? Upévare, ñamokyreʼỹvaʼerã ñande rapichápe ñandéicha avei omombaʼeguasu hag̃ua Ñandejárape, “ndaihasaháiva puʼaka ha arandúpe” (Job 9:4). Jaikuaavévo mbaʼeichaitépa Jehová iñarandu, jajeroviavéta hese omyatyrõ porãvetaha oimeraẽ mbaʼe (Proverbios 3:​5, 6).

Ñamombaʼevaʼerã pe mbaʼe iporãvéva Jehová ohechaukáva

17. Mbaʼéichapa oipytyvõta umi ojepyʼapývape Jehová ohejahaguére oiko mbaʼe vai oikuaáramo haʼe ñanderayhuha?

¹⁷ “[Ñandejára] niko mborayhu.” ( Juan 4:8.) Péicha Ñandejára Ñeʼẽ omombeʼu pe mbaʼe iporãvéva Jehová ohechaukáva, oipytyvõva umi ojepyʼapývape mbaʼe vai oikóvare. Jehová ohechauka ñanderayhuha opa mbaʼe ojapovaʼekuére oipeʼa hag̃ua umi mbaʼe vaieta oguerúva pekádo yvyporakuérape. Oporohayhúgui, Ñandejára omeʼẽ peteĩ esperánsa Adán ha Eva famíliape (Génesis 3:15). Oheja chupekuéra oñemoag̃ui hese ha oñemoĩ porã hendive. Ñanderayhúgui, omeʼẽ peteĩ sakrifísio ñandepeʼaitétava pekádo poguýgui ha omeʼẽ jeýtava ñandéve tekove opaveʼỹva (Juan 3:​16). Ha ñanderayhúgui, Jehová ipasiénsia ñanderehe ha oipytyvõma hetaiterei tapichápe omboyke hag̃ua Satanáspe ha oñemoĩ hag̃ua Igoviérno poguýpe (2 Pedro 3:9).

18. Mbaʼépa tuichaite mbaʼe ñandéve g̃uarã? Mbaʼépa jahecháta pe artíkulo oúvape?

¹⁸ Imanduʼárõ guare peteĩ mbaʼe ivaietereívare ojapovaʼekue umi terrorísta, peteĩ pastór heʼi umi oñembyatyvaʼekuépe: “Ndajaikuaái mbaʼérepa Ñandejára oheja oiko umi mbaʼe vai ha jehasa asy”. Ñambyasyetéiko heʼihaguére péicha! Ajépa tuichaite mbaʼe ñandéve g̃uarã jaikuaa mbaʼérepa Ñandejára oheja oiko koʼã mbaʼe! (Deuteronomio 29:29.) Jehová ihústo, iñarandu ha ipyʼaporã, upévare jaikuaa koʼẽrõite oipeʼapataha opaichagua jehasa asy. Heʼíma voi katu ojapotaha upéva (Apocalipsis [Revelación] 21:​3, 4). Ha mbaʼépa oikóta umi ymaitereíma omanovaʼekuégui? Ohejápa chupekuéra Jehová esperansaʼỹre? Nahániri. Oporohayhúgui, Ñandejára omoingove jeýta chupekuéra. Ko mbaʼe jahecháta pe artíkulo oúvape.

Mbaʼéichapa ñambohováita?

• Mbaʼépa ikatu jaʼe oñeporandúramo ñandéve mbaʼérepa Ñandejára oheja ojehasa asy?

• Mbaʼéichapa ojekuaa Jehová imarangatu ha ihustoha jahechávo mbaʼéichapa ombohovái upe oikovaʼekue Edénpe?

• Mbaʼérepa ñaipytyvõvaʼerã ñande rapichápe ohecha hag̃ua mbaʼeichaitépa ñanderayhu Jehová?

[Porandu ñahesaʼỹijóva]

[Nóta oĩva taʼanga ndive páhina 13]

Ñañehaʼãvaʼerã ñaipytyvõ umi ojepyʼapývape ojehasa asy haguére

[Nóta oĩva taʼanga ndive páhina 15]

David ha Habacuc jepe oporanduvaʼekue Ñandejárape heta mbaʼe