Umi ijedáva ikatu gueteri ojapo heta mbaʼe Jehovápe g̃uarã

‘Umi yvyra oñeñotỹva Ñandejára rógape ituja rire jepe hiʼáne.’ (SALMO 92:​14, 15 [92:​13, 14 NM].)

1, 2. a) Mbaʼépa ou jepi ñane akãme oñeñeʼẽvo umi ituja ha ig̃uaig̃uívare? b) Mbaʼépa heʼi la Biblia oikotaha umi mbaʼe vai jahupytývare Adán opekahaguére?

 TUJA ha g̃uaig̃ui. Mbaʼépa ou ne akãme rehendúvo upéva? Nerepensáipa peteĩ hova chaʼĩvare, nohenduporãiva, naimbaretevéimava ha ndoguataporãvéiva? Térãpa repensa omombeʼúvare Eclesiastés 12:​1-7? Upépe heʼi mbaʼéicha ñandetuja vove og̃uahẽ “teko asy”. Oimérõ repensa koʼã mbaʼére, nemanduʼákena koʼãva ndouiha ñande Apoharégui. Umíva ñanderupyty Adán opekahaguére (Romanos 5:12).

² Ñandeeda jahávo ningo ndaivaíri. Jaikuaáningo yvypóra ha mymbakuéra hesãiva okakuaavaʼerãha. Ojapóma seis mil áño <oñepyrũhague umi mbaʼe vai oguerúva pekádo ha imperfeksión, péro koʼẽrõitéma ojepeʼapáta. Entéro yvypóra iñeʼẽrendúva Ñandejárape oikóta Haʼe oipotahaguéicha. Ndohasaʼasymoʼãvéima itujahaguére ha nomanomoʼãvéima (Génesis 1:28; Apocalipsis [Revelación] 21:​4, 5). Upérõ avave ndeʼimoʼãi: ‘Cherasyʼaína’ (Isaías 33:24). Umi itujáva ‘hete hesãi jeýta, ha oiko jeýta imitãramo guaréicha’ (Job 33:25). Koʼág̃a katu enterove ñambohovaivaʼerã Adán ohejavaʼekue ñandéve. Upéicharamo jepe Jehová siervokuéra ohupyty heta mbaʼe porã ijedavévo ohóvo.

3. Mbaʼérepa ojeʼe umi kristiáno ‘ituja rire jepe hiʼaha’?

³ Ñandejára Ñeʼẽ heʼi ‘umi yvyra oñeñotỹva Ñandejára rógape ituja rire jepe hiʼáne’ (Salmo 92:​14, 15 [92:​13, 14 NM]). Péicha ko salmísta ohechauka Ñandejára siervokuéra ikatuha gueteri ojapo heta mbaʼe Ñandejárape g̃uarã ikangyvéramo jepe yma guarégui. Heta ehémplo oĩva la Bíbliape ha koʼag̃agua ohechauka upeichaha.

‘Arakaʼeve nosẽiva Ñandejára rógagui’

4. Mbaʼéichapa Ana ohechauka ojeroviaha Jehováre, ha mbaʼépa ohupyty upévare?

⁴ Ñapensami Ánare, peteĩ kuñakarai oservivaʼekue Ñandejárape. Haʼe ningo orekóma 84 áño ha upéicharõ jepe ‘arakaʼeve nosẽiva Ñandejára rógagui, ha omombaʼeguasúva Ñandejárape ára ha pyhare oajunávo ha oñemboʼévo’. Ana túva niko ndahaʼéi Leví trivuygua, haʼe “Aser ñemoñaregua”, upévare ndaikatúi opytaite voi oiko témplope. Ñapensamíntena,  Ana ohovaʼerã pyharevete káda día oĩ hag̃ua oñemeʼẽvo ofrénda pyharevegua ha opyta oñemeʼẽ meve ofrénda kaʼarugua. Péicha ojapohaguére ohupyty peteĩ mbaʼe iporãitereíva. Ana oĩ témplope José ha María oguerahárõ guare Jesúspe onase riremi, opresenta hag̃ua Jehovápe, heʼiháicha Ñandejára Léi. Ohechávo Jesúspe, Ana ‘oagradese Ñandejárape. Ha upéi oñeʼẽ pe mitã Jesús rehe opa umi ohaʼarõvape Jerusalén osẽ jejopy vaígui’ (Lucas 2:​22-24, 36-38; Números 18:​6, 7).

5, 6. Mbaʼéichapa heta ermáno koʼag̃agua ojapo Ana ojapohaguéicha?

⁵ Koʼág̃a rupi oĩ heta ermáno ha ermána ijedáva, Ánaicha avei ohayhúva Ñandejárape. Haʼekuéra oho meme rreunionhápe, oñemboʼe ipyʼaite guive oiko hag̃ua Ñandejára rembipota, ha ikyreʼỹeterei opredika hag̃ua. Peteĩ ermáno orekóva 80 áño rupi ha oho meméva rreunionhápe hembirekóndi heʼi: “Rojepokuaáma roho rreunionhápe, upépente roimese. Roimese Jehová siervokuéra apytépe. Upépe rovyʼa”. Ajépa ñanemokyreʼỹete koʼã ehémplo! (Hebreos 10:​24, 25.)

⁶ “Che ningo mbaʼeveichavérõ ndajavymoʼãi umi mbaʼe ojejapóva Jehovápe g̃uarã, ikatúma guive ajapo.” Péicha heʼi peteĩ ermána viúda hérava Jean orekómava 80 áño ári. Haʼe heʼi avei: “Heta vése ningo ndavyʼái, péro mbaʼére piko umi ótro ndovyʼamoʼãi avei che naimeporãihaguérente?” Hesa ningo ojajái omombeʼúvo mbaʼeichaitépa ovyʼa ohohaguére asambleahápe ótro tetã rupi. Ramoite oviaha ha heʼi iñirũnguérape ojepasea aja hikuái: “Che ningo ndahechasevéima koʼã óga guasu. Jahána japredika!”. Noñeʼẽiramo jepe upepegua idióma, Jean omokyreʼỹ umi héntepe oikuaaseve hag̃ua la Biblia heʼíva. Avei, heta áñore oipytyvõ peteĩ kongregasión oikotevẽvape. Upearã oñehaʼã oaprende ótro idióma ha oviaha una óra ohokuévo rreunionhápe ha una óra oukuévo.

Eñehaʼãkena reaprendeve

7. Mbaʼéichapa Moisés ituja rire ohechauka oñemoag̃uiseha Ñandejárare?

⁷ Umi ijedavéva ohecha ha oikuaa hetave mbaʼe (Job 12:12). Péro ndahaʼéi upe haguérente ijerovia imbaretevétava. Upévare, opytarangue umi mbaʼe oaprendevaʼekuére yma, Ñandejára siervokuéra oñehaʼã ‘oikuaave’ (Proverbios 9:9). Moisés orekovaʼekue 80 áño Jehová omondórõ guare chupe omosãso hag̃ua ipuévlope (Éxodo 7:7). Upérõ ndahetái umi ohupytýva upe eda. Haʼe ohai: “Amo 70 áño rupi jaikove, imbaretevéva ohupyty 80” (Salmo 90:10). Upéicharamo jepe Moisés nopensái itujaitereimaha oaprende hag̃ua. Are oservi rire Ñandejárape, ha ojapo rire heta mbaʼeguasu, Moisés ojerure Jehovápe: “Ehechaukána chéve nde rape ikatu hag̃ua che roikuaa” (Éxodo 33:13). Moisés akóinte oñehaʼã oñemoag̃uive Jehováre.

8. Mbaʼépa ojapo Daniel orekóramo jepe 90 áño ári, ha mbaʼe mbaʼépa ohupyty upévare?

⁸ La Biblia heʼi proféta Daniel ohesaʼỹijo meme hague Ñandejára Ñeʼẽ, jepe orekóma 90 áño ári. Haʼe ostudia umi ‘kuatiañeʼẽ’ heʼíva. Koʼãva apytépe oĩneraʼe Levítico, Isaías, Jeremías, Oseas ha Amós. Umi mbaʼe oikuaáva omokyreʼỹ chupe oñemboʼe hag̃ua Jehovápe ipyʼaite guive (Daniel 9:​1, 2). Upévare Ñandejára oikuaauka chupe arakaʼépa og̃uahẽta Mesías ha avei mbaʼépa oikóta Jehová adorasióngui (Daniel 9:​20-27).

9, 10. Mbaʼépa oñehaʼã ojapo heta ermáno ijedámava?

⁹ Moisés ha Daniel ojapohaguéicha, ñañehaʼãkena ñande avei ñaaprendeve ha  jastudia Ñandejára Ñeʼẽ ikatu aja. Heta ermáno ojapo upéicha. Worth héra peteĩ ansiáno kongregasionpegua orekómava 80 áño ári. Haʼe oñehaʼã oleepaite umi mbaʼe pyahu omeʼẽva ‘tembiguái jeroviaha ha iñarandúva’ (Mateo 24:45). Haʼe heʼi: “Chembovyʼaiterei la Biblia heʼíva, ha chembopyʼarory ahechávo mbaʼéicha hesakãve ohóvo heʼíva ipype” (Proverbios 4:18). Ermáno Fred katu 60 áñorema oservi de tiémpo kompléto ha ovyʼa ikatu jave oñemongeta la Biblia heʼívare ermanokuérandi. Haʼe heʼi: “Chemanduʼa meme vaʼerã la Biblia heʼívare. Ñandejára Ñeʼẽ oikovéta ñandéve g̃uarã ñañehaʼãramo ñantende porã pe heʼíva. Upéicharõ jahecháta mbaʼéichapa opa mbaʼe oĩ hendaitépe” (2 Timoteo 1:13).

¹⁰ Ndahaʼéi ñandetujahaguérente nañantendemoʼãiva umi mbaʼe ipyahu ha ijetuʼúva. Heta tapicha orekóva 60, 70 ha 80 áño jepe oaprende olee ha oskrivikuaa hag̃ua. Oĩ katu oaprendéva ótro idióma. Péicha ojapo heta testigos de Jehová opredika hag̃ua tapicha opa tetãyguápe (Marcos 13:10). Ermáno Harry ha hembireko oreko riréma 70 áño oñepyrũ oaprende portugués. Pe ermáno heʼi: “Añetehápe ningo oimeraẽ mbaʼe ijetuʼumie ñandetuja rire”. Upéicharamo jepe, oñehaʼã meme hikuái ha upévare haʼe ha hembireko ostudia la Biblia heta tapichándi oñeʼẽva portugués. Ha heta áñorema ermáno Harry ojapo diskúrso upe ñeʼẽme asambléa de distríto jave.

11. Maʼerãpa ñamombeʼu ojapóva umi ermáno ijedáva?

¹¹ Naentéroi ikatu ojapo ã mbaʼe. Oĩ hasy katúva térã ojokóva chupe ambue mbaʼe. Mbaʼérepa upéicharõ ñamombeʼuñaína koʼã mbaʼe? Ndahaʼéi pepensa hag̃ua enterove ojapovaʼerãha koʼã mbaʼe peteĩchapa. Jajaposénte niko apóstol Pablo heʼivaʼekue oñeʼẽvo umi kongregasión omoakãvare: ‘Pejepyʼamongetamína hekovekuéra rehe ha peñehaʼã peiko haʼekuéra oikohaguéicha’ (Hebreos 13:7). Jahechávo mbaʼéichapa ikyreʼỹ koʼã ermáno ijedáva, ñanekyreʼỹ avei péicha jajerovia hag̃ua Jehováre. Ermáno Harry, orekómava 87 áño heʼi mbaʼépa ojapose: “Aikove aja ajapose opa ikatumíva Jehovápe g̃uarã”. Ñañeʼẽmakuri avei ermáno Fred rehe, haʼe ovyʼa ombaʼapohaguére Betélpe. Haʼe heʼi: “Jahechavaʼerã moõpa ikatu jaservi porãve Jehovápe ha japyta upépe”.

Iñeʼẽrendu hikuái ijetuʼúramo jepe

12, 13. Mbaʼéichapa Barzilai ituja rire jepe ohechauka ohayhuha Ñandejárape?

¹² Ijetuʼu jagueropuʼaka hag̃ua umi mbaʼe oúva ñandetuja térã ñaneg̃uag̃ui vove. Upéicharamo jepe ikatu jahechauka jahayhuha Ñandejárape. Peteĩ ehémplo porã hína Barzilai, Galaadgua. Orekóramo jepe 80 áño, oñehaʼãmbaite oñatende porã David ha isoldadokuérare, Absalón opuʼãrõ guare itúvare. Upérõ Barzilai omeʼẽ chu pekuéra tembiʼu ha lugár opyta hag̃ua. David oho jeývo Jerusalénpe, Barzilai oho hendive rrío Jordán peve. Upépe rréi David heʼi chupe oho hag̃ua hendive ipalásiope. Barzilai heʼi chupe: “Arekómaniko 80 áño ha ndaheguasuvéima chéve mbaʼeve haʼúva térã hayʼúva ha ndaikatuvéima haʼe hépa térãpa ndahéi; ndaikatuvéima avei ahendu umi kuimbaʼe térã kuña purahéi. [...] Ha kóina ápe rereko, che ruvicha guasu, ambue ne rembijokuairã che raʼy Kimham. Toho nendive, che ruvicha guasu, ha ejapo hese pe rejuhu porãvéva” (2 Samuel 17:​27-29; 19:​31-40).

¹³ Barzilai niko itujáma ha naimbaretevéima, upéicharõ jepe ojapo opa ikatumíva rréi David rehehápe, oikuaágui Jehová omoĩhague chupe. Ohechakuaáramo jepe ndaheveimaha chupe hoʼúva ha nohenduporãveimaha, haʼe noñembyasýi upévare. Nopensái ijehénte ha heʼi Davídpe oho hag̃ua hendive Kimham. Péicha Barzilai ohechauka ipyʼaporãha. Koʼág̃a rupi oĩ avei heta ermáno ha ermána ijedámava, nopensáiva ijehénte ha oñehaʼãva oipytyvõ hapichápe. Ojapo hikuái oimeraẽ mbaʼe Jehová rehehápe oikuaágui Haʼe ‘oguerohoryha umi mbaʼe’. Javyʼaiténingo koʼã ermáno ha ermána oĩhaguére ñanendive! (Hebreos 13:16.)

14. Mbaʼérepa Jehová oipotavaʼekue Salmo 37:​23-25-pe oñemombeʼu David itujamaha?

¹⁴ David avei ohasavaʼekue heta mbaʼére, ha ohechakuaa Jehová oñangareko memeha isiervokuérare opa árape. Ituja rire ohai peteĩ purahéi ha upéva hína Salmo 37. Epensamína David oguapyha ojepyʼamongeta, upéi ombopu hiʼárpa ha opurahéi péicha: “Ñandejára oisãmbyhy yvypóra rekove, haʼe omboguata chupe hapére. Hoʼáramo jepe opuʼã jevýne, Ñandejára oguerekógui chupe ipópe. Chemitãvaʼekue, koʼág̃a katu chetujáma, ha ndahecháiva heko potĩva oikotevẽramo, térã taʼyrakuéra ojeruréramo upérupi hoʼuvaʼerã” (Salmo 37:​23-25). Jehová oipotavaʼekue ko sálmope oñemombeʼu David itujamaha, ñantende porãve hag̃ua mbaʼéicha Haʼe oñangareko isiervokuérare.

15. Mbaʼe ehémplopa omeʼẽ apóstol Juan ituja ha ohasáramo jepe heta mbaʼére?

¹⁵ Apóstol Juan oservi avei Jehovápe ituja ha ohasáramo jepe heta mbaʼére. Péicha omeʼẽ ehémplo iporãva. Oservi rire Jehovápe 70 áño rupi, oñemondo chupe préso peteĩ íslape hérava Patmos. Upéva oiko hese ‘oñeʼẽhaguére Ñandejára Ñeʼẽ rehe ha omoherakuãhaguére Jesucrístope’ (Apocalipsis [Revelación] 1:​9, BNP). Péro Juan ndopytuʼúi, osegi ombaʼapo meme. Umi mbaʼe ohaivaʼekue ha oĩva la Bíbliape ojapo ituja riréma. Oĩ aja upe íslape Jehová ohechauka chupe heta mbaʼe, ha haʼe ohai Apocalipsis (Apocalipsis [Revelación] 1:​1, 2). Ojeʼéningo mburuvicha guasu Romaygua hérava Nerva opoihague chugui. Áño 98-pe Juan orekómaneraʼe 90 térã 100 añokuéra, ha upérõ ohai lívro hérava Juan ha mbohapy kárta oĩva la Bíbliape.

 Jehová ndahesaraimoʼãi pejapovaʼekuégui

16. Mbaʼéichapa ikatu ohechauka ohayhuha Jehovápe umi ndaikatuvéiva oñeʼẽ porã?

¹⁶ Heta mbaʼe ndaikatuvéi jajapo ñandetuja térã ñaneg̃uaig̃ui rire. Pór ehémplo, oĩ ermáno ndaikatuvéiva oñeʼẽ porã. Upéicharõ jepe, haʼekuéra imanduʼa meme mbaʼéichapa Jehová ohayhu chupekuéra ha oñangareko hesekuéra. Ndaikatúiramo jepe heʼi heta mbaʼe, ipyʼapýpe heʼi kóicha Jehovápe: ‘Ahayhueterei nde léi. Ára pukukue hese ajepyʼamongeta’ (Salmo 119:97). Ko múndope ningo hetave umi tapicha ndoikuaaséiva Jehová heʼíva. Upévare Haʼe oguerohory umi chupe ‘omombaʼévape’ (Malaquías 3:16; Salmo 10:4). Mbaʼeichaitépa ñandepyʼaguapy Jehová oikuaahaguére ñande pyʼapýpe jaʼéva! (1 Crónicas 28:9; Salmo 19:14.)

17. Mbaʼépa imanduʼavaʼerã umi aréma oservíva Ñandejárape?

¹⁷ Ñanemanduʼavaʼerã avei Jehová arakaʼeve ndahesaraimoʼãiha umi mbaʼe ojapovaʼekuégui umi ermáno ha ermána aréma oservíva chupe. Heʼihaguéicha Jesús: “Pejepytasóke, pehupyty hag̃ua jeikove opaʼỹva” (Lucas 21:19). Tekotevẽ jajepytaso térã ñaaguanta jahupyty hag̃ua jeikove opaveʼỹva. Umi ojapóva Ñandejára “rembipota” ha iñeʼẽrendúva chupe opa árape, ikatu oguerovia ohupytytaha Jehová “heʼivaʼekue omeʼẽtaha” (Hebreos 10:36).

18. a) Mbaʼépa omombaʼe Jehová umi ijedávare? b) Mbaʼépa jahecháta párte oúvape?

¹⁸ Jehová omombaʼeterei pejapóva chupe g̃uarã pende pyʼaite guive ndahetáiramo jepe. Ojehúramo jepe oimeraẽ mbaʼe ‘ñande retépe’, ‘ñande pyʼapy’ ipyahuve ohóvo ára koʼẽre (2 Corintios 4:16). Katuete ningo Jehová omombaʼe pejapovaʼekue yma, péro tuichaiterei mbaʼénte avei Chupe g̃uarã koʼág̃a pejapóva (Hebreos 6:10). Pe párte oúvape jahecháta mbaʼéicha umi mbaʼe pejapóva oipytyvõ pende rapichakuérape.

Mbaʼépa ere chupe?

• Mbaʼe ehémplo neporãvapa omeʼẽ Ana umi ermáno ijedávape?

• Mbaʼérepa ñandetuja térã ñaneg̃uaig̃ui ndeʼiséi ndaikatuveimaha jajapo mbaʼeve?

• Mbaʼéichapa umi ijedáva ikatu ohechauka ohayhuha Ñandejárape?

• Mbaʼépa opensa Jehová umi ijedáva ojapóvare chupe g̃uarã?

[Porandu ñahesaʼỹijóva]

[Nóta oĩva taʼanga ndive páhina 24]

Daniel ituja rire ohechakuaa umi ‘kuatiañeʼẽ’ heʼívare arakaʼe pevépa Judá opytáta tapere

[Nóta oĩva taʼanga ndive páhina 26]

Heta tapicha ijedáva ehémplo porã oho memégui rreunionhápe, opredika kyreʼỹ ha oaprendesehaguére