Umi ijedáva tuicha oipytyvõ imitãvape
Umi ijedáva tuicha oipytyvõ imitãvape
“Koʼág̃a niko chetujáma ha che akã iñapatĩ, [Ñandejára], anítei chereja rei. Amombeʼúne gueteri umi ouvaʼerãme umi mbaʼe pyapy mbaretépe rejapovaʼekue.” (SALMO 71:18.)
1, 2. Mbaʼépa ohechakuaavaʼerã Ñandejára siervokuéra ijedáva, ha mbaʼépa jahecháta koʼág̃a?
ÁFRICAPE peteĩ superintendénte ovisita peteĩ ermáno ungido ijedávape ha oporandu chupe mbaʼéichapa oiko. Pe ermáno tujami ohaʼanga guaʼu opopoha ha heʼi: “Ha rehecháma, ikatúningo adispara ha apopo, péro ndaikatúinte aveve”. Péicha ohechauka ovyʼaha umi mbaʼe ikatúvare ojapo. Pe superintendénte koʼág̃a orekóma 80 áño rasa ha imanduʼa gueteri mbaʼéicha pe ermáno opukámi oimeraẽ mbaʼére ha mbaʼeichaitépa ohayhu Jehovápe.
2 Umi ermáno ijedáva oñehaʼãva ojapo Jehová heʼíva tuicha ñanepytyvõ enterovépe. Upéicharõ jepe, ndahaʼéi peteĩ tapicha oikove puku haguérente iñarandúmava térã oiko chugui kristiáno katupyry (Eclesiastés 4:13). La Biblia heʼi: ‘Mbaʼe iporãva akãrague morotĩ, upéva ohechauka ojeikohague tekojojápe’ (Proverbios 16:31). Oimérõ ndetuja térã neg̃uaig̃uíma rehóvo, rehechakuaápa mbaʼéicha umi mbaʼe ere ha rejapóva ikatu oipytyvõ ótrope? Jahechamína la Bíbliape mbaʼéicha umi ijedáva tuicha oipytyvõvaʼekue imitãvape.
Jerovia oguerúva mbaʼe porã
3. Mbaʼéichapa koʼág̃a peve ñanevenefisia Noé ojeroviahaguére Ñandejárare?
3 Noé ojeroviavaʼekue Jehováre ha ojapo meme haʼe heʼíva. Upévare yvyporakuéra oñevenefisia koʼag̃aite peve. Noé orekovaʼekue 600 áño rupi ojapórõ guare pe árka, omoinge pype mymbakuéra, ha opredika hapichakuérape (Génesis 7:6; 2 Pedro 2:5). Okyhyje rupi Ñandejáragui, haʼe ha ifamília ojesalva ku ama guasuete oúrõ guare. Ha upévare chuguikuéra jaju entéro yvypóra. Jepe upérõ umi hénte oikove puku vaʼekue, Noé iñeʼẽrendu Ñandejárape itujaite peve. Upéva ogueru heta mbaʼe porã. Mbaʼépa umíva?
4. Mbaʼéichapa Noé omeʼẽ ehémplo porã Jehová siervokuérape?
4 Noé orekóramo guare 800 áño rupi Nemrod oñepyrũ omopuʼã pe óga yvate oĩva Babélpe. Haʼe ojapo upéva Jehová heʼíramo jepe chupekuéra: “Pemyenyhẽ ko yvy” (Génesis 9:1; 11:1-9, ÑÑM). Noé katu noñemoĩri Jehováre. Upéicha rupi Jehová nokambiaichéneraʼe chugui iñeʼẽ okambiárõ guare umi hénte idióma Babélpe. Noé ojeroviahaguére Jehováre ha ojapo haʼe heʼíva oikove aja pukukue, omeʼẽ ehémplo neporãva entéro kristiánope g̃uarã (Hebreos 11:7).
Oipytyvõ ifamiliakuérape
5, 6. a) Abrahán orekórõ guare 75 áño, mbaʼépa Jehová heʼi chupe ojapo hag̃ua? b) Mbaʼépa ojapo Abrahán?
5 Umi ijedáva ikatu oipytyvõ ifamiliakuérape ojerovia hag̃ua Ñandejárare. Upéicha ojapovaʼekue heta tapicha oikóva Noé rire. Abrahán orekórõ guare 75 áño Ñandejára heʼi chupe: “Eheja ne retã ha nde ru róga, ha tereho upe yvy che ahechaukátava ndévepe. Ambohetáta ne ñemoñare ha oikóta chugui tetã guasu. Rohovasáta” (Génesis 12:1, 2).
6 Epensamína ojeʼeha ndéve reho hag̃ua nde rógagui, eheja ne retã, ne amigokuéra, ne hentekuéra, ha reho reiko peteĩ lugár reikuaaʼỹvape. Abrahánpe ningo ojeʼe ojapo hag̃ua upéva. Ha mbaʼépa ojapo? Abrahán oho “Ñandejára heʼihaguéicha chupe”, ha omano meve oiko óga kárpape, tetã ambuépe ha ova ápe ha pépe (Génesis 12:4; Hebreos 11:8, 9). Jehová heʼíramo jepe ojapotaha chugui “tetã guasu”, Abrahán omano upéva oiko mboyve. Hembireko Sara ndive oreko peteĩ mitãnte, hérava Isaac. Haʼe onase 25 áño Abrahán ova rire Canaánpe (Génesis 21:2, 5). Upéicharõ jepe, Abrahán naikaneʼõi ha ndojevýi Úrpe, pe táva oikohague. Mbaʼeichaitépa ojerovia ha ohaʼarõkuaa!
7. Mbaʼéichapa Abrahán jerovia oipytyvõ Isaácpe, ha entéro yvyporakuérape?
7 Abrahán ojerovia ha oaguanta rupi tuicha oipytyvõ itaʼýra Isaácpe oaguanta hag̃ua avei. Isaac oikove 180 áño Canaánpe ha ova ápe ha pépe. Isy ha itúva tujami oipytyvõ chupe ojerovia hag̃ua Jehováre ha upéi Jehová oñeʼẽvo chupe ijerovia imbareteve (Génesis 26:2-5). Isaac ojerovia meme rupi, ikatu oñekumpli Jehová heʼivaʼekue Abrahánpe, ‘iñemoñare’ rupive oñevendesitaha opa tetãnguéra. Heta áño upe rire ou Jesucristo, haʼe hína pe “ñemoñare”. Upéicha entéro ojeroviáva hese ikatu oĩ porã Ñandejára ndive ha ohupyty jeikove opaveʼỹva (Gálatas 3:16; Juan 3:16).
8. Mbaʼéichapa Jacob ohechauka ojerovia mbareteha, ha mbaʼépa ohupyty upévare?
8 Isaac avei oipytyvõ itaʼýra Jacóbpe ojerovia mbarete hag̃ua Jehováre. Jacob ndohejái ijerovia omano meve. Orekórõ guare 97 áño oñorairõ peteĩ pyhare pukukue peteĩ ánhel ndive ovendesi hag̃ua chupe (Génesis 32:24-28). Omano mboyve orekórõ guare 147 áño, Jacob ovendesi raẽ peteĩteĩ umi doce itaʼýrape (Génesis 47:28). Umi mbaʼe heʼivaʼekue ha oĩva Génesis 49:1-28-pe oñekumpli gueteri hína koʼág̃a peve.
9. Mbaʼéichapa umi ijedáva ikatu oipytyvõ ifamiliakuérape?
9 Umi Ñandejára siervokuéra ijedáva ikatu oipytyvõ ifamiliakuérape heta mbaʼépe. Haʼekuéra niko oikuaa heta mbaʼe la Bíbliagui, ohasáma heta mbaʼére ha ogueropuʼaka atyraite provléma. Upévare oipytyvõkuaa umi imitãvévape ojerovia mbarete hag̃ua Jehováre (Proverbios 22:6). Naiporãi umi ijedáva opensa ndaikatuveimaha oipytyvõ hogayguakuérape.
Oipytyvõ hikuái ermanokuérape
10. Mbaʼépa heʼi José ‘ojejapovaʼerãha hetekuégui’, ha mbaʼéicha oipytyvõ upéva umi Israelguápe?
10 Umi ijedáva oipytyvõ avei ermanokuérape. Jacob raʼy hérava José, ojapovaʼekue ituja rire peteĩ mbaʼe oipytyvõva Jehová siervokuérape oikóva heta áño upe rire. Orekórõ guare 110 áño, José heʼi “mbaʼépa ojejapovaʼerã hetekuégui”. Haʼe oipota umi Israelgua ogueraha ikanguekue osẽ vove Egíptogui (Hebreos 11:22; Génesis 50:25). Ko mbaʼe oipytyvõ umi Israelguápe ogueropuʼaka hag̃ua heta mbaʼe vai ha jeiko asy ohasavaʼekue Egíptope, José omano rire. Upévare haʼekuéra ojerovia Jehová omosãsotaha chupekuéra.
11. Mbaʼéichapa Moisés oipytyvõ Josuépe?
11 José jerovia omombaretevaʼekue avei Moiséspe. Haʼe orekórõ guare 80 áño oraha José kanguekue Egíptogui (Éxodo 13:19). Upérõ oikuaa Josuépe, imitãitevéva chugui. Josué omoirũ Moiséspe 40 áñore (Números 11:28). Oho hendive sérro Sinaípe. Upépe ohaʼarõ Moisés oguejy peve ha ogueru Ñandejára Léi ojehaíva itáre (Éxodo 24:12-18; 32:15-17). Hetaite konsého porã omeʼẽneraʼe Moisés Josuépe!
12. Mbaʼéichapa Josué oipytyvõ oikove aja pukukue umi Israelguápe?
12 Josué oikove aja omokyreʼỹ avei umi Israelguápe. Jueces 2:7 heʼi: ‘Josué ha umi karaikuéra opytáva Josué rendaguépe niko ohecha umi mbaʼe guasuete Jehová ojapovaʼekue Israel rehehápe. Haʼekuéra oikove aja pukukue Israel omombaʼeguasu Jehovápe’. Péro Josué ha umi karaikuéra omano rire, umi Israelgua oñepyrũ ipyʼamokõi ha omboyke jepi Jehovápe. Upéva oiko 300 áñore proféta Samuel oñepyrũ meve hembiapo.
Samuel “oporombohekojoja”
13. Mbaʼéichapa Samuel “oporombohekojoja”?
13 La Biblia ndeʼíri mboy áñopa oreko Samuel omanórõ guare. Péro umi mbaʼe oñemombeʼúva Primero de Samuélpe oiko 102 áño aja, ha Samuel ohechapa lénto umíva. Hebreos 11:32, 33 heʼi oĩhague hués ha proféta ‘oporombohekojojáva’. Ha upeichaite, Samuel oipytyvõ hapichakuérape oheja hag̃ua hape vai (1 Samuel 7:2-4). Mbaʼéicha ojapo upéva? Samuel iñeʼẽrendu Jehovápe omano meve (1 Samuel 12:2-5). Ndokyhyjéi oñemoñeʼẽ hag̃ua mburuvichápe jepe (1 Samuel 15:16-29). Avei ‘ituja ha iñakã apatĩmba’ rire jepe omeʼẽ ehémplo oñemboʼévo Ñandejárape hapichakuéra rehehápe. Samuel heʼi umi Israelguápe: “Ndaipotái Ñandejára oheja ajapo ivaíva henondépe nañemboʼéivo penderehe” (1 Samuel 12:2, 23).
14, 15. Mbaʼéichapa umi ijedáva ikatu oñemboʼe Samuel ojapohaguéicha?
14 Koʼã mbaʼe ohechauka porãiterei mbaʼéicha umi ermáno ijedáva ikatu oipytyvõ hapichakuérape. Oĩramo jepe heta mbaʼe ndaikatuvéiva ojapo ijedágui ha nahesãivéigui, haʼekuéra ikatu oñemboʼe ótrore. Oimérõ nde ndetuja térã neg̃uaig̃uíma, rehechakuaápa ikatuha reipytyvõ kongregasiónpe reñemboʼe rupi? Rejerovia rupi Cristo ruguy oñeñohẽvaʼekuére reime porã Jehovándi. Avei regueropuʼakahaguére heta mbaʼe nde jerovia imbareteve (Santiago 1:3, 1 Pedro 1:7). Aníke nderesarái: “Imarangatúva ñemboʼe osẽva ipyʼaite guive, ipokatu”, térã tuicha ipuʼaka (Santiago 5:16).
15 Iñimportanteterei reñemboʼe oho porã hag̃ua predikasión. Heta ermáno oĩ préso ojapohaguére Jehová heʼíva. Oĩ katu ohasa asýva oikohaguére yvyryrýi, torménta guasu, gérra térã oimehaichagua ñorairõ. Ñane kongregasiónpe jepe ikatu oĩ ermáno ombohováiva tentasión térã oñehaʼãva oservi Jehovápe oĩramo jepe oñemoĩva hese (Mateo 10:35, 36). Umi ermáno omotenondéva predikasión térã omoakãva kongregasión oikotevẽ avei reñemboʼe meme hesekuéra (Efesios 6:18, 19). Iporãitétapa reñemboʼéramo ermanokuérare, ojapohaguéicha Epafras! (Colosenses 4:12.)
Ehekomboʼe umi ouvaʼerãme
16, 17. Mbaʼépa ojeʼevaʼekue Salmo 71:18-pe, ha mbaʼéicha oñekumpli?
16 Umi kristiáno ohótava yvágape, oñehenóiva ovecha aty ‘mbovyvéva’, omboʼe heta mbaʼe iñimportánteva umi oikótavape ko Yvy ape ári. Koʼãvape oñehenói “ambue ovecha” (Lucas 12:32; Juan 10:16). Salmo 71:18-pe ojeʼéma upéva oikotaha. Upépe heʼi: “Koʼág̃a niko chetujáma ha che akã iñapatĩ, [Ñandejára], anítei chereja rei. Amombeʼúne gueteri umi ouvaʼerãme umi mbaʼe pyapy mbaretépe rejapovaʼekue”. Oho mboyve yvágape ogoverna Jesús ndive, umi ungido kyreʼỹme ombokatupyry ambue ovechakuérape oñemeʼẽ hag̃ua chupekuéra hetave rresponsavilida.
17 Salmo 71:18 oñekumpli avei umi kristiáno oikótavare ko Yvy ape ári. Jehová heʼi umi ijedávape oñeʼẽ hag̃ua hese umi oikeramóvape kongregasiónpe, ha péicha ohekomboʼe avei hikuái “umi ouvaʼerãme” (Joel 1:2, 3). Ha enterove ikatu jajapo upéva, ndahaʼéi umi ijedávante. Upévare ambue ovechakuéra ikyreʼỹ omboʼe hag̃ua la Biblia hapichakuérape, omboʼehaguéicha chupekuéra umi ungido (Apocalipsis [Revelación] 7:9, 10).
18, 19. a) Mbaʼe iñimportántevapa ikatu ñanemboʼe umi kristiáno ijedáva? b) Mbaʼépa ikatu oguerovia umi kristiáno ijedáva?
18 Umi Jehová siérvo ijedáva, tahaʼe ohótava yvágape térã opytátava ko Yvy ape ári, ñanepytyvõ jaikuaa hag̃ua heta mbaʼe iñimportánteva oikovaʼekue yma. Oĩ ohechavaʼekue “Foto-Drama de la Creación”. Oĩ oikuaáva umi ermáno omotenondéva Jehová organisasión ha ohóva préso 1918-pe. Avei oĩ ermáno ombaʼapóva pe rrádio hérava WBBR orekovaʼekue yma testigos de Jehová. Haʼekuéra ikatu omombeʼu ñandéve mbaʼéichapa heta ojeiko trivunalkuéra rupi testigos de Jehová oreko hag̃ua liverta opredika hag̃ua. Oĩ avei heta ohasa asýva umi goviérno opersegírõ guare testigokuérape. Umi ermáno ha ermána ijedáva omombeʼukuaa mbaʼéicha oñemyesakãve ohóvo la Biblia heʼíva. Ñandejára Ñeʼẽ ñanemokyreʼỹ ñahendu hag̃ua chupekuéra (Deuteronomio 32:7).
19 Umi kristiáno ijedávape ojeʼe omeʼẽ hag̃ua ehémplo imitãvévape (Tito 2:2-4). Ikatu koʼág̃a nderehechái mbaʼépepa oipytyvõ ne ñemboʼe, umi konsého remeʼẽva ha umi mbaʼe regueropuʼakáva. Noé, Abrahán, José, Moisés ha hetave tapicha ndoikuaaivaʼekue avei mbaʼéicha umi mbaʼe ojapóva hikuái oipytyvõta umi imitãvévape. Upéicharamo jepe, ijerovia ha iñeʼẽrendu rupi tuicha oipytyvõ hapichakuérape. Ha umi mbaʼe nde rejapóva upéichata avei.
20. Mbaʼe iporãvapa ohupytýta umi ojeroviáva Jehováre ipahaite peve?
20 Reikovérõ ‘jehasa asy guasu’ rire, térã reñemoingove jeýrõ pe múndo pyahúpe, ikatúta rehupyty “jeikove añeteguáva”. Upérõ katuete vyʼa pópe jaikóta! (Mateo 24:21; 1 Timoteo 6:19.) Epensamíntena mbaʼéichapa jaiko porãta Cristo ogoverna vove mil áñore. Jehová omomitã jeýta ituja ha ig̃uaig̃uívape. Jahecharangue mbaʼéicha ñande rete ikangyve ohóvo, koʼẽ koʼẽre ñanderetiaʼevéta. Ñanembaretevéta, jahecha ha ñahendu porãvéta ha ñaneresãivéta (Job 33:25; Isaías 35:5, 6). Umi oikóva Ñandejára múndo pyahúpe imitãta opa ára g̃uarã (Isaías 65:22). Upévare jajerovia memékena Jehováre ha jaservi chupe ñande pyʼaite guive ipahaite peve. Ikatu jaguerovia Jehová okumplitaha oprometéva ha umi mbaʼe iporãvetaha ñande ñaimoʼãvagui (Salmo 37:4; 145:16).
Mbaʼépa ere chupe?
• Mbaʼe iporãvapa ojehupyty Noé ojapo meme haguére Jehová heʼíva?
• Mbaʼéichapa Abrahán, Isaac ha Jacob jerovia oipytyvõ ifamiliakuérape?
• Mbaʼéichapa omokyreʼỹ Jehová siervokuérape ojapovaʼekue José, Moisés, Josué ha Samuel?
• Mbaʼe iporãvapa oikuaauka ñandéve ñane ermanokuéra ijedáva?
[Porandu nahesaʼỹijóva]
[Nóta oĩva taʼanga ndive páhina 27]
Abrahán oaguantahaguére heta mbaʼe tuicha oipytyvõ Isaácpe
[Nóta oĩva taʼanga ndive páhina 29]
Moisés omokyreʼỹ Josuépe oñemoñeʼẽvo chupe
[Nóta oĩva taʼanga ndive páhina 30]
Iporãiterei reñemboʼe nde rapichakuéra rehehápe
[Nóta oĩva taʼanga ndive páhina 31]
Imitãva oñevenefisia ohendúramo umi kristiáno ijedávape