Jehová omombaʼeterei ñaneñeʼẽrendúramo chupe

“Nearandúke, che raʼy, upéva chembovyʼa.” (PROVERBIOS 27:11.)

1. Mbaʼeichagua espíritupa ombyai ko múndope?

 KO MÚNDOPE oĩ hetaiterei oikóva iñakãrente ha naiñeʼẽrendúiva. Apóstol Pablo omombeʼu mbaʼérepa upéva ohaírõ guare umi kristiáno Efesoyguápe: “Yma niko peẽ ku pemanoramoguáicha peikovaʼekue, napeneñeʼẽrendúigui [Ñandejárape]  ha pene rembiapo vaígui. Peikovaʼekue opa yvypóra heko añáva oikoháicha, ha pejapo pe espíritu aña ruvicha [...] oipotaháicha, ha oguerekóva ipoguýpe umi [Ñandejárape] ohenduseʼỹvape” (Efesios 2:​1, 2). Upévare Satanás, “pe espíritu aña ruvicha”, ombyai ko múndope ani hag̃ua iñeʼẽrendu. Ojapovaʼekue upéicha pe síglo primérope, ha ombaʼapo mbaretevéntema koʼág̃a oñemosẽ rire yvágagui, pe primera gérra mundiál guive (Apocalipsis [Revelación] 12:9).

2, 3. Mbaʼe mbaʼérepa ñaneñeʼẽrenduvaʼerã Jehovápe?

² Upéicharõ jepe, ñande kristianokuéra jaikuaa ñaneñeʼẽrenduvaʼerãha Jehovápe ñande pyʼaite guive. Upéicha vaʼerã haʼégui ñande Apohare, Ñanemoingovéva, Ñanesãmbyhýva mborayhúpe ha Ñanemosãsóva (Salmo 148:​5, 6; Hechos 4:24; Colosenses 1:13; Revelación 4:11). Umi Israelgua Moisés tiémpope guare oikuaa Jehová omeʼẽhague chupekuéra hekove ha onohẽhague jejopy vaígui. Upévare Moisés heʼi: “Peñehaʼãmbaitéke pejapo opa mbaʼe [Jehová] pende Jára heʼivaʼekue peẽme” (Deuteronomio 5:32). Péro oikuaáramo jepe hikuái iñeʼẽrenduvaʼerãha Ñandejárape, pyaʼe oheja rei chupe.

³ Mbaʼérepa tekotevẽ ñaneñeʼẽrendu Ñandejárape, opa mbaʼe ojapovaʼekue? Peteĩ árape, Ñandejára omondo proféta Samuélpe heʼi hag̃ua rréi Saúlpe: ‘Ñaneñeʼẽrendu Ñandejárape iporãve peteĩ sakrifísiogui’ (1 Samuel 15:​22, 23). Mbaʼérepa iporãve upéva?

Mbaʼérepa iporãve ñaneñeʼẽrendu jajaporangue peteĩ sakrifísio

4. Mbaʼépa ikatu ñameʼẽ Jehovápe?

⁴ Jehová ningo ñande Apohare, upévare opa mbaʼe jarekóva imbaʼénte voi. Mbaʼépa upéicharõ ñameʼẽta chupe? Oĩ peteĩ mbaʼe iporãitereíva ikatúva ñameʼẽ chupe. Mbaʼépa upéva? Jehová heʼi ñandéve: “Nearandúke, che raʼy, upéva chembovyʼa, ha ikatúta ambohovái cherehe ojahéivape” (Proverbios 27:11). Upéicharõ, ikatu ñaneñeʼẽrendu chupe. Nañaiméiramo jepe enterove peteĩcha, ñaneñeʼẽrendúramo jahechaukáta Satanás ijapuha heʼírõ guare jahejataha Ñandejárape jahasa asy vove. Ajépa tuichaite mbaʼe pe ikatúva jajapo!

5. Mbaʼéichapa oñeñandu ñande Apohare ndajajapóiramo upe heʼíva ñandéve, ha mbaʼérepa ikatu ñambojoja upéva?

⁵ Ñandejárape g̃uarã iñimportánte umi mbaʼe jadesidíva, ha ombyasy ndajajapóiramo heʼíva ñandéve. Mbaʼérepa upéva? Hasy chupe ohecháramo jaiporavo vai (Salmo 78:​40, 41). Ñamoĩ chupe peteĩ tapicha huguy asukáva ndosegiriha pe diéta oñemeʼẽvaʼekue chupe, ha hoʼuse katuete umi mbaʼe ojapo vaítava hese. Mbaʼéichapa oñeñandúta pe doktór ojepyʼapy añetéramo hese? Upéicha avei, Jehová ombyasýta nañaneñeʼẽrendúiramo chupe, oikuaágui mbaʼépa oikóta ñanderehe ndajajapóiramo upe heʼíva ñandéve.

6. Mbaʼépa ñanepytyvõta ñaneñeʼẽrendu hag̃ua Ñandejárape?

⁶ Mbaʼépa ñanepytyvõta ñaneñeʼẽrendu hag̃ua? Jajerurevaʼerã Ñandejárape ñaneñeʼẽrendu hag̃ua ñande pyʼaite guive, ojapohaguéicha Salomón. Ko rréi oikuaavaʼekue  upéicha añoite ohechakuaataha pe ‘iporãva ha ivaíva’ ohusga hag̃ua umi hetãyguápe (1 Reyes 3:9). Ñande avei ñaikotevẽ ñaneñeʼẽrendu ñande pyʼaite guive jahechakuaa hag̃ua pe iporãva ha ivaíva. Upéva ñaikotevẽ hetaitereígui ko múndope naiñeʼẽrendúiva. Upearã, Ñandejára omeʼẽ ñandéve Iñeʼẽ, umi puvlikasión ñahesaʼỹijo hag̃ua la Biblia, umi rreunión ha umi superintendénte ñanderayhúva. Jaiporupaitepañaína koʼã mbaʼe porãita omeʼẽva Ñandejára?

7. Mbaʼérepa Jehová omombaʼeve pe ñeʼẽrendu ojejaporangue umi sakrifísio?

⁷ Ñanemanduʼavaʼerã avei Jehová heʼihague umi chupe oservívape omombaʼeveha pe ñeʼẽrendu, ojejaporangue umi sakrifísio (Proverbios 21:​3, 27; Oseas 6:6; Mateo 12:7). Péro mbaʼérepa upéva? Ndeʼíri piko haʼe voi ojejapo hag̃ua umi sakrifísio? Upeichaite, péro mbaʼépa omomýi pe tapichápe ojapo hag̃ua umi sakrifísio? Ojapópa ombovyʼaségui Ñandejárape, térã ojapovaʼerãgui reínte? Pe kristiáno oĩ porãséva Ñandejára ndive ojapopaitéta Haʼe ojeruréva. Ñandejárape natekotevẽi jasakrifika mymbakuéra, péro omombaʼeterei ñaneñeʼẽrendúramo chupe.

Peteĩ ehémplo naiporãiva

8. Mbaʼérepa Ñandejára oipeʼa Saúlgui pe goviérno?

⁸ Ñandejára Ñeʼẽ omombeʼu Saúl rehe oikovaʼekue ohechauka hag̃ua tekotevẽha ñaneñeʼẽrendu. Ñepyrũrã haʼe iñumílde ha ndojejapói, ‘haʼe voi ohechakuaa michĩetereiha’. Upe rire katu umi mbaʼe odesidívare ohechauka oñemombaʼeguasuha ha upéicha tuicha ojavy (1 Samuel 10:​21, 22; 15:​17, ÑÑM). Peteĩ árape haʼe oñorairõvaʼerã umi filistéo ndive, ha ojeʼe chupe ohaʼarõ hag̃ua Samuélpe. Og̃uahẽ rire Samuel ojapovaʼerã sakrifísio Jehovápe ha heʼíta avei chupe mbaʼépa ojapóta. Ohechávo nog̃uahẽiha pe proféta ha umi oñembyatyvaʼekue upépe oñepyrũmaha isarambipa, ‘haʼe voi ojapo pe sakrifísio’. Upéva ivaieterei Jehovápe g̃uarã. Og̃uahẽvo Samuel, Saúl heʼi chupe naiñeʼẽrenduihague haʼe nog̃uahẽvoíri rupi, ha upévare ojapómante pe sakrifísio oñemoĩ porã hag̃ua Jehová renondépe. Saúl omombaʼeve pe sakrifísio iñeʼẽrendurangue ha ohaʼarõ Samuélpe ojapo hag̃ua upéva. Upémaramo Samuel heʼi chupe tuichaiterei ojavyha. Heʼi Saúlpe: “Neremombaʼéi Ñanderuete ñeʼẽ heʼivaʼekue ndéve rejapo hag̃ua”. Naiñeʼẽrenduihaguére Jehovápe nogovernamoʼãvéima Israélpe (1 Samuel 10:8; 13:​5-13, ÑÑM).

9. Mbaʼéichapa ohechauka Saúl ndojaposeiha ojeʼéva chupe?

⁹ Ohechakuaápa Saúl mbaʼépa ojapovaʼerã koʼág̃a? Nahániri. Upe rire, Jehová heʼi chupe ojukapa hag̃ua umi Amaleqguápe. Haʼekuéra opuʼã reiete vaʼekue Israel rehe yma. Upévare umi hymbakuéra jepe ojukapavaʼerã chuguikuéra. Saúl ‘ojuka umi Amaleqguápe Havilá guive Sur peve’, péro ndojapopái ojeʼevaʼekue chupe. Samuel oúrõ guare hendápe, pe rréi ovyʼaiterei oganahaguére pe ñorairõ, ha heʼi chupe: “Ñandejára tanderovasa. Ajapóma haʼe heʼivaʼekue”. Péro Saúl ha umi oĩva hendive ndojapói ojeʼehaguéicha chupekuéra. Ndojukái pe rréi Agag ha umi “ovecha, tóro, tororaʼy ha ovecha mácho iporãve ha ikyravéva”. Saúl katu omombeʼu mbaʼérepa ndojapói ojeʼevaʼekue chupe, heʼívo: “Kuimbaʼekuéra ogueru [...] Amaléqgui umi ovecha ha tóro iporãvéva oikuaveʼẽ hag̃ua Ñandejára[pe]” (1 Samuel 15:​1-15).

10. Mbaʼépa ndohechakuaái Saúl?

¹⁰ Samuel heʼi Saúlpe: ‘Ombovyʼápa Ñandejárape umi sakrifísio ojejapóva ombovyʼaháicha ñaneñeʼẽrendu chupe? Iporãve ñaneñeʼẽrendu jajaporangue peteĩ sakrifísio, jajapo pe heʼíva ñaikuaveʼẽrangue ovecha mácho kyrakue’ (1 Samuel 15:​22, NM). Jehová heʼíma rupi oñehundi hag̃ua koʼã mymbakuéra, ndoipotavéima ojesakrifika chupe.

 Ñaneñeʼẽrendúkena opa mbaʼépe

11, 12. a) Mbaʼéichapa ñanderecha Jehová ñañehaʼãramo jaservi chupe haʼe oipotaháicha? b) Mbaʼéichapa ikatu oĩ oimoʼãva oserviha Jehovápe ojapo aja ivaíva?

¹¹ Jehová ovyʼa ohechávo mbaʼéichapa nañamboykéi chupe jajepersegi jave ha jasegi ñañeʼẽ Igoviérnore, oĩramo jepe nañanerenduséiva. Avei jasegi jaha rreunionhápe ijetuʼúramo jepe jahupyty umi mbaʼe ñaikotevẽva. Mbaʼeichaitépa ombovyʼa Jehovápe ñaneñeʼẽrendu koʼã mbaʼe iñimportantetévape! Haʼe omombaʼeterei ñañehaʼãramo jaservi chupe jahayhúgui. Ikatu ñande rapichakuéra ndohechakuaái mbaʼeichaitépa ñañehaʼã, péro Jehová ohecha umi mbaʼe jajapóva ha imanduʼa umívare (Mateo 6:4).

¹² Upéicharamo jepe, ñaime porã hag̃ua Ñandejára renondépe, ñaneñeʼẽrenduvaʼerã chupe opa mbaʼépe. Aníkena ñaimoʼã jaservihaguére chupe ikatuha avei sapyʼapyʼa jajapo ivaíva. Umíva apytépe ikatu oĩ oimoʼãva oho meme haguére rreunionhápe térã osẽhaguére opredika ojeheja reitaha chupe heko tieʼỹramo, térã ojapóramo oimeraẽ mbaʼe ivaíva. Upéicha ojapóramo tuichaiterei ojavyhína (Gálatas 6:​7, 8).

13. Mbaʼéicha javépa ikatu nañaneñeʼẽrendúi Jehovápe ñaime jave ñaneñohápe?

¹³ Upévare ñañeporanduvaʼerã: “Cheñeʼẽrendúpa Jehovápe opa mbaʼe ajapóvape, umi mbaʼe chénte aikuaávape jepe? Jesús heʼivaʼekue: ‘Pe mbaʼe michĩvape hekopotĩva, hekopotĩ avei hetávape; ha pe mbaʼe michĩvape ndahekojojáiva, ndahekojojái avei hetávape’ (Lucas 16:10). Jajapópa iporãva ñande pyʼaite guive ñaiméramo jepe ñande rogapýpe, avave ñanderechaʼỹhápe? (Salmo 101:2.) Upeichaite, ñande rogapýpe voi ikatu ñamokangy ñande jerovia. Yma, umi ohechaséva taʼanga tieʼỹ ohovaʼekue umi lugár ojehechaukahápe umi mbaʼe. Koʼág̃a katu umi tetã ojeporu hetahápe komputadóra, ojejopýntema peteĩ votõ ojehecha hag̃ua umi taʼanga tieʼỹ. Jajapótapa ñande pyʼaite guive Jesús heʼivaʼekue: “Oimeraẽva omaʼẽva kuña rehe ha oguerekoséva ichupe, upéva oikóma hendive ipyʼapýpe”? Jajapótapa opa ikatúva ani hag̃ua ñamaña jepe umi taʼanga tieʼỹre? (Mateo 5:​28, BNP; Job 31:​1, 9, 10; Salmo 119:37; Proverbios 6:​24, 25; Efesios 5:​3-5.) Ha mbaʼépa jajapo ojehechauka jave télepe umi oñorairõ ha ojojukáva? Jahechápa ñande umi mbaʼe Jehová ohechaháicha, ‘ndoikuaaséiva mbaʼeve umi omombaʼévagui ñorairõ’? (Salmo 11:5.) Térã mbaʼépa ikatu jaʼe oĩramo omokõitereíva hogapýpe avave ohechaʼỹhápe chupe? La Biblia heʼi  ivaietereiha jakaʼu, péro heʼi avei ani hag̃ua jaʼueterei vevída (Tito 2:3; Lucas 21:​34, 35; 1 Timoteo 3:3).

14. Mbaʼéichapa jahechavaʼerã pe pláta ñaneñeʼẽrendúramo Ñandejárape?

¹⁴ Ñañangarekovaʼerã avei mbaʼéichapa jahecha pe pláta. Pór ehémplo, jajapótapa peteĩ mbaʼe ñande pláta heta hag̃ua sapyʼaitépe naiporãmbáirõ jepe upe jajapótava? Jajapópa umi mbaʼe naiporãiva ndajapagaséigui umi impuésto? Térãpa jajapo heʼihaichaite ñandéve la Biblia japagávo umi impuésto oñemoĩva? (Romanos 13:7.)

Ñaneñeʼẽrendu jahayhúgui Jehovápe

15. Mbaʼérepa ñaneñeʼẽrendu Jehovápe?

¹⁵ Jajapóramo Jehová heʼíva jahupytýta heta mbaʼe porã. Upéicharõ, ñande rekopotĩramo, ñamombaʼéramo pe tuguy ha ndajaiporúiramo petỹ jajeíta heta mbaʼasýgui. Avei, jajapóvo hetave mbaʼe Ñandejára Ñeʼẽme heʼiháicha, jaiko porãvéta ha javyʼavéta ñande rogaygua ndive (Isaías 48:17). Ikatúramo jepe jaʼe koʼã mbaʼe porã ouha jajapógui Ñandejára heʼíva, ñande ñaneñeʼẽrendu jahayhúgui chupe. Ndajaservíri Jehovápe umi mbaʼe porã omeʼẽvare ñandéve (Job 1:​9-11; 2:​4, 5). Jehová oheja ñande jaiporavo mávapepa ñaneñeʼẽrendúta. Ha ñande jaʼéma ñaneñeʼẽrendutaha Jehovápe, ñambovyʼaségui chupe ha jajaposégui iporãva (Romanos 6:​16, 17; 1 Juan 5:3).

16, 17. a) Mbaʼéichapa ohechauka Jesús iñeʼẽrenduha ohayhúgui Ñandejárape? b) Mbaʼéichapa ikatu jajapo Jesús ojapohaguéicha?

¹⁶ Jesús ohechauka porã vaʼekue mbaʼéicha vaʼerãpa peteĩ iñeʼẽrendúva Jehovápe ipyʼaite guive (Juan 8:​28, 29). Oĩrõ guare ko Yvy ape ári, “jehasa asýpe oikuaa mbaʼépa heʼise ñeʼẽrendu” (Hebreos 5:​8, 9). Mbaʼéichapa rakaʼe upéva? Jesús “oñemomirĩ ha iñeʼẽrendu omano meve [peteĩ yvyráre]” (Filipenses 2:​7, 8). Oĩrõ guare yvágape  iñeʼẽrendumavaʼekue, péro ko Yvy ape ári ohasa heta mbaʼe oikuaaʼỹva gueteri. Upévare ikatu jaʼe Jesús oservi porãtaha Saserdóte Guasúramo umi iñermanokuéra rehehápe, ha avei umi opytátava oiko hag̃ua ko Yvy ape ári rehehápe (Hebreos 4:15; 1 Juan 2:​1, 2).

¹⁷ Ha ñande? Ñande jajapóta Jesús ojapohaguéicha jahechaukáramo ñande rekovépe iñimportanteveha ñandéve g̃uarã jajapo Ñandejára heʼíva (1 Pedro 2:21). Javyʼaiterei jajapóramo Ñandejára heʼíva jahayhúgui chupe, oĩramo jepe ñandejopýva ani hag̃ua ñaneñeʼẽrendu (Romanos 7:​18-20). Jajapo hembipota heʼise avei jajapoha kyreʼỹme umi ansianokuéra heʼíva, iñimperféktoramo jepe hikuái (Hebreos 13:17). Jehová omombaʼeterei ñaneñeʼẽrendúramo chupe ñaime jave ñaneñohápe.

18, 19. Mbaʼépa jahupyty ñaneñeʼẽrenduhaguére Ñandejárape?

¹⁸ Ñaneñeʼẽrendu rupi Jehovápe, sapyʼánte ikatu jajejopy vai nañamboykeséigui chupe (Hechos 5:29). Upéicha avei, japredika ha ñamboʼe hag̃ua ñande rapichápe jagueropuʼakavaʼerã heta mbaʼe oñehundi peve ko múndo aña (Mateo 24:​13, 14; 28:​19, 20). Ñanembaretevaʼerã jasegi hag̃ua ñañembyaty ñane ermanokuéra ndive ñandeahoʼíramo jepe umi provlemaita oĩva ko múndope. Ñandejára ñanderayhuetéva ohechapaite jajapóva ñaneñeʼẽrendu hag̃ua chupe koʼã mbaʼépe. Upéicharõ jepe, jajapopaite hag̃ua heʼíva nañañemeʼẽivaʼerã umi mbaʼe vai jajaposévape. Avei, jajeivaʼerã ivaívagui ha ñañehaʼã jahayhu umi mbaʼe iporãva (Romanos 12:9).

¹⁹ Jaservíramo Jehovápe jahayhu ha ñamombaʼégui chupe, ñandete voi jahechakuaáta haʼe “omyengovia porãha umi ichupe ohekávape” (Hebreos 11:​6, BNP). Iporãramo jepe jajapo umi sakrifísio Ñandejárape, haʼe ovyʼaiteve ñaneñeʼẽrendúramo jahayhúgui chupe (Proverbios 3:​1, 2).

Mbaʼéichapa ñambohováita?

• Mbaʼérepa jaʼekuaa oĩha peteĩ mbaʼe ikatúva ñameʼẽ Jehovápe?

• Mbaʼe mbaʼépepa ojavy Saúl?

• Mbaʼéichapa jahechauka iporãveha ñaneñeʼẽrendu jajaporangue umi sakrifísio?

• Mbaʼépa ñanemomýi ñaneñeʼẽrendu hag̃ua Jehovápe?

[Porandu ñahesaʼỹijóva]

[Nóta oĩva taʼanga ndive páhina 16]

Mbaʼéichapa oñeñandu peteĩ doktór ojepyʼapýva peteĩ hasývare ndojapóiramo heʼíva chupe?

[Nóta oĩva taʼanga ndive páhina 18]

Mbaʼérepa Jehová omboyke pe rréi Saúlpe?

[Nóta oĩva taʼanga ndive páhina 19]

Jajapópa Jehová heʼíva ñande rogapýpe, avave ñanderechaʼỹhápe?