Konsého ñanepytyvõva opa ára g̃uarã

YMAITE guive yvyporakuéra oparupigua omombaʼe teko potĩ. Ha ajépa enterove ñamombaʼe umi ndaijapúivape, ipyʼaporãva, oporoporiahuverekóvape ha oipytyvõva hapichápe.

Mávapa heʼivaʼerã ñandéve jajapótava?

Síglo primérope, peteĩ kuimbaʼe ijestúdio porãva hérava Saulo oikovaʼekue hudío, griégo ha rrománo apytépe. Jepe koʼã tetã oreko heta kostúmbre ha léi, Saulo ohechakuaa yvyporakuéra oparupigua oikuaaha ijehegui mbaʼépa iporã ha ivai. Upéicha hína ñane konsiénsia rupi. Upéi ningo Sáulogui oiko apóstol Pablo, ha heʼi: ‘Umi ndahaʼéiva hudío ha oguerekoʼỹva upe léi, ijehegui voi ojapo upe léi heʼíva, haʼekuéra voi upe léi. Hekovére ohechauka oguerahaha upe léi ipyʼapýpe. Pe oñandúva voi ohechauka upeichaha’ (Romanos 2:​14, 15).

Upéicharõ, jaikuaátapa ñandejeheguínte iporãva ha ivaíva? Nahániri. Jaikuaáningo yvyporakuéra hetaiterei vése ojavyha. Upévare oĩ heta heʼíva ñaikotevẽha peteĩ iñaranduvévare ohechauka hag̃ua ñandéve mbaʼépa iporãve. Hetápe g̃uarã ñande Apohare añoite ikatu ojapo upéva. Peteĩ lívro héravape Presente y Futuro doktór Carl Jung heʼi: “Peteĩ tapicha ndojeroviáiva Ñandejárare ndaikatumoʼãi ijehegui rei ogueropuʼaka umi tentasión omoĩva ko múndo”.

Upéva ningo peteĩ proféta yma guare heʼihaguéicha: “Aikuaa yvypóra ndahaʼeiha hekove jára, ndoikuaaiha mbaʼépa oikóta chugui” (Jeremías 10:23). Ñande Apohare heʼi: ‘Romboʼe ou porãtava ndéve ha ahechauka ndéve nde raperã’ (Isaías 48:17).

Konsého iporãvéva

Umi mbaʼe angete jaleéva oĩ peteĩ lívro hetaiterei tapicha orekóvape ha ñanemboʼéva heta mbaʼe porã. Upéva hína Ñandejára Ñeʼẽ. Hetaiterei tapicha, ndojeroviáiva Crístore térã irrelihionʼỹva omombaʼe la Biblia ha olee iñaranduve hag̃ua. Peteĩ poéta Alemaniaygua hérava Johann Wolfgang von Goethe heʼivaʼekue: “Che ahayhu ha amombaʼe [la Biblia] hetaiterei mbaʼe porã chemboʼehaguére”. Ha oñemombeʼu India mburuvicha Mohandas Gandhi heʼihague: “Eñehaʼãkena reikuaa porã Jesús omboʼevaʼekue oñemoñeʼẽrõ guare sérro ári guive [...]. Upépe heʼíva oipytyvõ opaichagua tapichápe”.

Apóstol Pablo ohechauka avei mbaʼéicha la Biblia ñanepytyvõ ñande reko potĩ hag̃ua: ‘Ñandejára Ñeʼẽ niko henyhẽ Ñandejára puʼakágui ha iporã ñaporomboʼe hag̃ua’ (2 Timoteo 3:16). Añete piko upéva?

 Mbaʼérepa ndete voi nderehechái? Emañamína umi konsého oĩva páhina 6-pe. Ajépa iporãite! Ehechamína mbaʼéicha upépe heʼíva ñanepytyvõkuaa jaiko porãve ha jajogueraha porãve hag̃ua ñande rapichándi.

Mbaʼépa nde rejapóta?

Koʼápe jahecha mbaʼeichaitépa la Biblia ikatu ñanepytyvõ. Avei Ñandejára Ñeʼẽ ohechauka mbaʼérepa naiporãi ñapensa, jaʼe ha jajapo ivaíva (Proverbios 6:​16-19).

La Bíbliape oĩ peteĩ mbaʼe yvyporakuéra oikotevẽtereíva: konsého ñande reko potĩ hag̃ua. Umi ojapóva la Biblia heʼíva tuichaiterei okambia. Oñehaʼã opensa ha ojapo iporãvante (Efesios 4:​23, 24). Oikuaa rupi Ñandejára heʼíva heta hénte yma ndochaʼéiva hapicháre koʼág̃a ohayhu opavavépe (Hebreos 4:12). Umi mbaʼe porã la Biblia heʼíva oipytyvõ heta tapichápe ipyʼaporãve hag̃ua.

Avei ojapo rupi la Biblia heʼíva oĩ heta ohejáva umi vísio ha mbaʼe vai ojapovaʼekue yma. Umi mbaʼe ohundíma heta tapichápe (1 Corintios 6:​9-11). Oipytyvõ chupekuéra okambia hag̃ua opensáva, oiko porã hag̃ua hogaygua ndive ha omeʼẽ chupekuéra esperánsa. Jepe ko múndo ivaive ohóvo, hénte oparupigua oñehaʼã heko porãve. Ha ko mbaʼe ndopamoʼãi. ‘Pe kapiʼi ipiru, haviru pe yvoty, Ñandejára ñeʼẽ katu opyta opa árape g̃uarã.’ (Isaías 40:8.)

Upéicharõ, rehejátapa ‘Ñandejára ñeʼẽ’ nepytyvõ? Testigos de Jehová kyreʼỹme ohechaukáta ndéve mbaʼéicha la Biblia ikatu nepytyvõ. Jajapóramo upépe heʼíva ñaime porãta Ñandejára renondépe ha ikatúta jaiko opa ára g̃uarã.

 [Taʼanga ha rrekuádro oĩva páhina 6-pe]

KONSÉHO OPA ÁRA G̃UARÃ

Mbaʼéichapa japorotratavaʼerã. ‘Upéva rehe, opa peipotáva ojejapo penderehe, pejapo avei peẽ pende rapichakuéra rehe; upéicha niko heʼi Moisés léi ha profetakuéra kuatiañeʼẽme.’ (Mateo 7:​12, BNP.)

Japorohayhu. ‘Ehayhu nde rapichápe rejehayhuháicha ndejupe voi.’ (Mateo 22:​39, BNP.) ‘Pe oporohayhúva ndojapói ivaíva hapicha rehe; upéicha rupi pe mborayhúpe ojejapo hekoitépe Ñandejára léi.’ (Romanos 13:​10, BNP.)

Ñamombaʼe ñande rapichakuérape. “Pejoayhu oñopehẽnguéicha, peñombojerovia ha peñomombaʼe.” (Romanos 12:10.)

Jaiko pyʼaguapýpe. “Peiko pyʼaguapýpe oñondive.” (Marcos 9:50.) “Ikatuha peve, peñehaʼãmbaite peiko hag̃ua pyʼaguapýpe opavave ndive.” (Romanos 12:18.) “Jahekáke opa mbaʼe oguerúva pyʼaguapy.” (Romanos 14:19.)

Ñaperdonakuaa. “Eheja rei oréve ore rembiapo vaikue, ore roheja reiháicha opavave orerehe ojapo vai vaʼekuépe.” (Mateo 6:12.) “Tapendepyʼaporã uvei oñondive, ha pejoporiahuvereko ha peñoperdona.” (Efesios 4:​32, BNP.)

Ani ñaporombotavy. ‘Eiko ne rembireko ndive añónte, ha chupe añónte ehayhu. Evyʼa ne rembireko ndive pe kuña remendahague, ne mitãme gueteri. Tanemongaʼu imborayhúpe ha tanembovyʼa ikunuʼũme opa ára. Che raʼy, mbaʼérepa ne akãrakúta nde rapicha rembireko rehe?’ (Proverbios 5:​15-20.) “Pe mbaʼe michĩvape heko potĩva, heko potĩ avei hetávape; ha pe ipojojaʼỹva mbaʼe michĩme, ndaikatúi avei ipojojávo mbaʼe hetápe.” (Lucas 16:10.) “Umi tembijokuái tekotevẽ ohechauka ikatuha ojejerovia hesekuéra.” (1 Corintios 4:​2, BNP.)

Ani ñanemonda. “Mbaʼéicha piko aheja reíta oiporúvape mbaʼe pohýi raʼãha [pésa] vai ha ijapúva?” (Miqueas 6:11.) “Roikuaa añetehápe orepyʼaporãha ha hiʼãite niko oréve rojapo hekopete opa mbaʼe.” (Hebreos 13:​18, BNP.)

Ani ñandejapu. “Pehejáke ivaíva, pehayhúke iporãva! Peñehaʼã penderekojoja.” (Amós 5:15.) ‘Peje ojupe añeteguáva, peporombohovake hekópe ha toĩ pyʼaguapy huisiohápe.’ (Zacarías 8:16.) “Anive pendejapu ojupe. Añeteguánte peje pende rapichápe.” (Efesios 4:25.)

Ani ñaneateʼỹ. “Rehechávapa kuimbaʼe ikatupyrýva hembiapópe? Upéva ombaʼapóne umi mburuvicha guasu ndive.” (Proverbios 22:29.) “Peñehaʼãke ani peneateʼỹ.” (Romanos 12:11.) “Opa pejapóva pejapo vyʼápe, pembaʼaporamoguáicha Ñandejárape g̃uarã, ndahaʼéi yvypórape.” (Colosenses 3:23.)

Japoroporiahuvereko ha ñandepyʼaporã. ‘Peñemonde poriahuverekópe, pyʼa porãme, jejapoʼỹme, teko pochyʼỹ ha ñehaʼãrõkuaápe.’ (Colosenses 3:12.)

Ñandepuʼaka ivaívare iporãvape. “Pehayhu umi penderehe ijaʼeʼỹvape, ha peñemboʼe umi penembohasa asývare.” (Mateo 5:44.) “Ani reheja ipuʼaka nderehe ivaíva. Upéva rangue, ndepuʼaka nde ivaívare iporãvape.” (Romanos 12:21.)

Ñameʼẽ iporãvéva Ñandejárape. ‘Ehayhu Jehová nde Járape nde pyʼaite guive, ne ánga rugua guive ha opa ne arandukue reheve. Kóva hína pe [léi] tuichavéva ha pe tenondeguáva.’ (Mateo 22:​37, 38.)

[Taʼanga]

La Biblia oipytyvõ familiakuérape oiko porã hag̃ua ha avei tapichakuéra ojogueraha porãve hag̃ua