Jaikótapa Ñandejára ‘espíritu oipotaháicha’?

“Upéva rehe haʼe peẽme peiko pe Espíritu pendeguerahaha gotyo, upéicharõ ndapejapoichéne [...] penderete ojeruréva peẽme.” (GÁLATAS 5:​16, JMP.)

1. Mbaʼépa ikatu jajapo anive hag̃ua jakyhyje japekárõ g̃uarã Ñandejára espíritu sántore?

 OIMÉRÕ jakyhyje japekáramo g̃uarã Jehová espíritu sántore, jajapovaʼerã apóstol Pablo heʼivaʼekue: “Peiko pe Espíritu pendeguerahaha gotyo, upéicharõ ndapejapoichéne [...] penderete ojeruréva peẽme” (Gálatas 5:​16, JMP). Jahejáramo Ñandejára espíritu ñanesãmbyhy, umi mbaʼe vai jajaposéva ndaipuʼakamoʼãi ñanderehe (Romanos 8:​2-10).

2, 3. Mbaʼéichapa ojapo porãta ñanderehe jaikóramo pe espíritu oipotaháicha?

² Jaikóramo Ñandejára ‘espíritu oipotaháicha’, Jehová puʼaka ñanemomýita ñaneñeʼẽrendu hag̃ua chupe. Jahechaukáta umi mbaʼe porã oúva Ñandejáragui ñaime jave predikasiónpe, kongregasiónpe, ñande rógape ha oimehápe. Umi mbaʼe porã omoheñóiva Ñandejára espíritu ojehecha jatratávo ñane rembireko térã ñane ménape, ñane família, ñane ermáno ha ambue ñande rapichakuérape.

³ Jaikógui Ñandejára espíritu oipotaháicha, jahejáma heta mbaʼe vai jajapovaʼekue (1 Pedro 4:​1-6). Ha jaikóramo pe espíritu oipotaháicha, ndajajapomoʼãi peteĩ mbaʼe ikatuʼỹva Ñandejára ñaneperdona. Péro, mbaʼépepa ñanepytyvõta avei jaikóramo pe espíritu oipotaháicha?

 Jaikókena Ñandejára ha Jesucristo oipotaháicha

4, 5. Jaikóramo pe espíritu oipotaháicha, mbaʼépa jagueroviáta Jesús rehe?

⁴ Jaiko rupi pe espíritu sánto oipotaháicha, ñaime porã Ñandejára ha Jesucristo ndive. Oñeʼẽvo umi mbaʼe Ñandejára espíritu omeʼẽvare, apóstol Pablo ohai umi ermanokuéra Corintoyguápe, oadoravaʼekue yma taʼangakuéra. Heʼi chupekuéra: “Aipota peikuaa, pejeroviámagui peẽ hese, avave oñeʼẽva [...] Ñandejára Espíritu rupi ndeʼiriha Jesús rehe ‘Maldíto!’. Ha avave ndikatúi heʼi ‘Jesús [niko Karai]!’ Espíritu Sánto rupi mante” (1 Corintios 12:​1-3, BNP). Oimeraẽ espíritu, térã puʼaka, oporomokyreʼỹva oñemaldesi hag̃ua Jesúspe, katuete ou Satanásgui. Péro ñande kristiáno jaikógui pe espíritu sánto oipotaháicha, jaguerovia Jehová omoingove jey hague Jesúspe ha omoĩhague chupe opa mbaʼe ári (Filipenses 2:​5-11). Jajerovia Jesús omeʼẽhague hekove ñanderehehápe ha jahechakuaa Ñandejára omoĩhague chupe ñanesãmbyhy hag̃ua.

⁵ Pe síglo primérope, oĩvaʼekue umi heʼíva ijehe kristianoha péro ndogueroviáiva Jesús onasehague yvypóraicha (2 Juan 7-11). Umíva apytépe oĩvaʼekue ogueroviáva upe japu ha omboykéva pe añetegua Jesús rehegua, pe Mesías ouvaʼekue (Marcos 1:​9-11; Juan 1:​1, 14). Jaikóramo pe espíritu sánto oipotaháicha, ndajahejamoʼãi Ñandejárape haʼekuéra ojapohaguéicha. Upévare ñañehaʼãvaʼerã jajapo Jehová oipotáva. Upéicharõ añoite haʼe osegíta imbaʼeporã ñanendive ha avei ‘jaikóta pe añeteguápe’ (3 Juan 3, 4). Upévare, ñamboykevaʼerã oimeraẽ mbaʼe oñemboʼéva hendapeʼỹ Ñandejáragui. Upéicha añoite ñaime porãta ñande Ru yvagapegua ndive.

6. Mbaʼeichagua mbaʼe porãpa omoheñói ñandepype Ñandejára espíritu jaikóramo haʼe oipotaháicha?

⁶ Apóstol Pablo omoĩ taʼangakuéra ñemombaʼeguasu ha sectas ‘umi mbaʼe ñande rete oipotáva’ ndive. Umíva apytépe oĩ avei teko vai ha teko tieʼỹ. Péro heʼi: “Umi Cristo mbaʼéva niko omoĩma [peteĩ yvyráre] pe ñande rete oipotáva. Jaikovéramo pe Espíritu rupive jaheja tañandegueraha pe espíritu voi” (Gálatas 5:​19-21, 24, 25, JMP). Mbaʼeichagua mbaʼe porãpa omoheñói ñandepype Ñandejára espíritu jaikóramo haʼe oipotaháicha? Apóstol Pablo heʼi: “Pe Espíritugui katu ou mborayhu, vyʼa, pyʼaguapy, pasiénsia, pyʼaporã, mbaʼeporã, jeroviaha, jejapoʼỹ ha jererekokuaa.” (Gálatas 5:​22, 23, BNP.) Koʼág̃a jahechami mbaʼépa heʼise umi mbaʼe porã omoheñóiva Ñandejára espíritu.

‘Jajoayhúkena’

7. Mbaʼépa pe mborayhu ha mbaʼeichagua mbaʼe porãpa ojehechauka hendive?

⁷ Pe mborayhu heʼise jahayhuha ñande pyʼaite guive ñande rapichápe ha jajepyʼapy añeteha hese. La Biblia heʼi: ‘Ñandejára niko mborayhu’, ndaipórigui haʼéicha oporohayhúva. Ñandejára ha Itaʼýra ohechaukavaʼekue mbaʼeichaitépa ñanderayhu Jesucristo omanórõ guare ñanderehehápe (1 Juan 4:8; Juan 3:16; 15:13; Romanos 5:8). Ñande katu jahechauka Jesús remimboʼeha jajoayhu rupi (Juan 13:​34, 35). Ha ojeʼe voi ñandéve ‘jajoayhuvaʼerãha’ (1 Juan 3:23). Apóstol Pablo heʼi: ‘Pe mborayhu ipasiensiakuaa, ipyʼaporã naiñenvidiósoi, ndojejapói. Naitieʼỹi térã ndohekái imbaʼerãvante; ndaipochýi térã ndaipyʼavaíri hapicha ndive. Ndovyʼái pe hekopeguaʼỹva reheve, pe añeteguáva reheve uvei ovyʼa. Opa mbaʼe ogueropuʼaka, oguerovia ha ohaʼarõ. Pe mborayhu arakaʼeve nosẽvaíri’ (1 Corintios 13:​4-8, BNP).

8. Mbaʼérepa ojehechavaʼerã jahayhuha ñane ermanokuérape?

⁸ Jahejáramo Ñandejára espíritu omoheñói mborayhu ñandepype, jahechaukáta japorohayhuha jaservívo Ñandejárape ha ñaime jave ñande rapichakuéra ndive (Mateo 22:​37-39). Apóstol Juan ohaivaʼekue: “Pe oporohayhuʼỹva omano gueteri. Pe ohayhuʼỹva hapichápe hína peteĩ porojukaha, ha peikuaa pe oporojukáva ndaikatuiha oguereko[...] ipype jeikove opaʼỹva” (1 Juan 3:​14, 15). Yma Israélpe oĩramo peteĩ ojukáva hapichápe ojaposeʼỹre, ikatu  vaʼekue okañy peteĩ távape. Péro oiméramo ndaijaʼéima voi raʼe hese ndaikatumoʼãi ojapo upéva (Deuteronomio 19:​4, 11-13). Jahejáramo pe espíritu sánto ñanesãmbyhy, jahechaukáta jahayhuha Ñandejárape, ñane ermanokuéra ha ambue ñande rapichakuérape.

Ñanembovyʼa ha ñanemombarete jajapóramo Ñandejára rembipota

9, 10. Mbaʼépa heʼise javyʼa, ha mbaʼe mbaʼépa ñanembovyʼa?

⁹ Javyʼáramo ñañeñandu porã ha ñandepyʼarory. Jehová hína pe Ñandejára ovyʼáva (1 Timoteo 1:11; Salmo 104:31). Jesús ovyʼa ojapóvo Itúva rembipota (Salmo 40:8; Hebreos 10:​7-9). Ha ñandéve avei ñanembovyʼa jajapóramo Ñandejára rembipota, ha upéva ñanemombarete (Nehemías 8:10).

¹⁰ Pe vyʼa oúva Ñandejáragui ñanembopyʼarory jajapóvo haʼe oipotáva. Upéichata jajejopy vai térã jajepersegíramo jepe. Ha mbaʼeichaitépa ñanembovyʼa jaikuaa Ñandejárape! (Proverbios 2:​1-5.) Javyʼaiterei ñaime porã haguére hendive. Upéva upéicha jaikuaa porã haguére chupe, jajerovia hese ha pe sakrifísio Jesús ojapovaʼekuére (1 Juan 2:​1, 2). Avei ñanembovyʼa ñaimehaguére peteĩ família ijojahaʼỹva ha ojoayhu añetetévape (Sofonías 3:9; Ageo 2:7). Javyʼa avei ñahaʼarõgui Ñandejára goviérno ha ikatu haguére ñamosarambi pe marandu porã (Mateo 6:​9, 10; 24:14). Upéicha avei ñahaʼarõgui jaikove opa ára g̃uarã (Juan 17:3). Ñanembovyʼaiterei ñahaʼarõhaguére ko mbaʼe ijojahaʼỹva (Deuteronomio 16:15).

Pyʼaguapy tuicha pasiénsia reheve

11, 12. a) Mbaʼépa heʼise pyʼaguapy? b) Mbaʼépepa ñanepytyvõ pe pyʼaguapy omeʼẽva Ñandejára?

¹¹ Pe pyʼaguapy, omoheñóiva avei Ñandejára espíritu, heʼise jaikoha ñorairõʼỹme ha akãguapýpe. Ñande Ru yvagapegua haʼe pe Ñandejára omeʼẽva pyʼaguapy, ha opromete ‘ovendesitaha hetã pyʼaguapýpe’ (Salmo 29:11; 1 Corintios 14:33). Jesús heʼivaʼekue hemimboʼekuérape: “Aheja peẽme pyʼaguapy. Ameʼẽ peẽme chepyʼaguapy” (Juan 14:​27, BNP). Mbaʼéichapa oipytyvõta chupekuéra pe pyʼaguapy?

¹² Jesús ombopyʼaguapy hemimboʼekuérape, ha upévare iñakãguapy ha ndokyhyjéi hikuái. Ha oñemeʼẽrõ guare chupekuéra espíritu sánto, tuichavéntema ipyʼaguapy hikuái (Juan 14:26). Koʼág̃a avei, jaheja rupi pe espíritu ñanesãmbyhy, ha Ñandejára ombohováigui ñane ñemboʼe, tuichaiterei ñanembopyʼaguapy (Filipenses 4:​6, 7). Avei, Jehová espíritu ñanepytyvõ jaiko hag̃ua pyʼaguapýpe ñane ermanokuéra ha ambue ñande rapichakuéra ndive (Romanos 12:18; 1 Tesalonicenses 5:13).

13, 14. Mbaʼéichapa jahechauka ñanepasiensiaha, ha mbaʼérepa jahechaukavaʼerã upéva?

¹³ Ñandepyʼaguapýramo ñanepasiénsiata avei. Upéva rupi ikatúta jagueropuʼaka oĩ jave ñandetrata vaíva térã ojapóva mbaʼe vai ñanderehe, jajeroviágui koʼã mbaʼe ohasataha. Ñandejára ningo ipasiensiaiterei (Romanos 9:​22-24). Jesús avei ohechauka ko mbaʼe porã, ha upéva ñanepytyvõ Pablo heʼihaguéicha: ‘Ñandejára cheporiahuvereko, Jesucristo ohechauka hag̃ua che rupive, ipasiensiaitereiha’. Upéicha ojapóta umi ojeroviávare hese ohupyty hag̃ua hikuái jeikove opaveʼỹva (1 Timoteo 1:16).

¹⁴ Ñanepasiénsiaramo ñanepytyvõta jagueropuʼaka hag̃ua ojeʼe térã ojejapo jave ñanderehe ivaíva. Apóstol Pablo omokyreʼỹvaʼekue umi ermanokuérape ‘ipasiénsia hag̃ua opavave rehe’ (1 Tesalonicenses 5:​14, BNP). Enterove ñaneimperfékto ha jajavy. Upévare, jaagradese ñande rapichakuéra ipasiensiahaguére ñanderehe ndajatrataporãi jave chupekuéra. Upéicharõ, ñañehaʼãmbaitékena jaropuʼaka opa mbaʼe “pasiénsia ha vyʼapópe” (Colosenses 1: 9-12, BNP).

Pe pyʼaporã ha mbaʼeporã

15. Mbaʼéichapa jahechauka ñandepyʼaporã ha ñanembaʼeporãha, ha máva mávapa ohechauka upéva?

¹⁵ Pyʼaporã ha mbaʼeporã ojeporu jepi peteĩchante, ha upéva jahechauka jajepyʼapy jave ñande rapichakuérare, ha jaʼe térã jajapóvo iporãva hesekuéra. Jehová ha Itaʼýra Jesús ningo ipyʼaporãiterei (Romanos 2:4; 2 Corintios  10:1). Ha ñande jaservíva Ñandejára ha Jesucrístope upéicha vaʼerã avei (Miqueas 6:8; Colosenses 3:12). Umi ndoikuaaporãiva Ñandejárape jepe ikatu “imbaʼeporãiterei” (Hechos 27:3; 28:2). Upévare, ñande jaikóva Ñandejára espíritu oipotaháicha, katuete ñanembaʼeporãvaʼerã.

16. Mbaʼéicha javépa jahechaukavaʼerã ñandepyʼaporãha?

¹⁶ Sapyʼánte ñandepochy oĩramo oñeʼẽ pohýiva ñandéve térã ñandetrata vaíramo. Péro upéicharõ jepe ñandepyʼaporãvaʼerã. Apóstol Pablo heʼivaʼekue: “Pendepochýramo, ani peʼa tembiapo vaípe. Ani peheja kuarahy oike jepe pendepochy poi hag̃ua. Ani pemeʼẽ juruja Añáme. Pendepyʼaporã [...] ha pejoporiahuvereko. Peheja rei ojupe mbaʼe vai pejapóva ojuehe, [Ñandejára] oheja rei haguéicha peẽme pene rembiapo vaikue Cristo rupi” (Efesios 4:​26, 27, 32). Koʼýte ñandepyʼaporãvaʼerã umi ohasa asýva ndive. Ha peteĩ ermáno oĩramo oheja hag̃uáicha Ñandejára rape, ajépa naiporãmoʼãi umi ansiáno noipytyvõiramo chupe Ñandejára Ñeʼẽ reheve, okyhyjégui ipochýramo g̃uarã (Efesios 5:9).

17, 18. Mbaʼépa avei pe pyʼaporã, ha mbaʼérepa tekotevẽ jahechauka upéva?

¹⁷ Pyʼaporã heʼise avei ñande voi ñanderekoporã ha ñanembaʼeporãha. Ha Ñandejáraicha ipyʼaporãva katu ndaipóri (Salmo 25:8; Zacarías 9:17). Ha Jesúspe ojekuaa hekoporã ha imbaʼeporãhaguére. Upéicharõ jepe, oĩrõ guare ohenóiva chupe “Mboʼehára marangatu”, haʼe ndoipotaivaʼekue oñemoĩ chupe pe título marangatu (Marcos 10:​17, 18). Upéichane rakaʼe ohechakuaágui ndaiporiha Ñandejáraicha imarangatu térã ipyʼaporãva.

¹⁸ Ñande avei ñandepyʼaporã, péro ndaikatúi jahechauka porã upéva ñaneimperfékto rupi (Romanos 5:12). Upéicharõ jepe, ikatu jahechauka ñandepyʼaporãha jajeruréramo Ñandejárape ñanemboʼe hag̃ua upéva (Salmo 119:66). Apóstol Pablo ohaivaʼekue umi kristianokuéra Romayguápe, oikuaa porãva Ñandejárape: ‘Chepehenguekuéra, aikuaa porã penerenyhẽha pyʼaporãgui’ (Romanos 15:​14, BNP). Pe superintendénte ‘imbaʼeporãvaʼerã’ (Tito 1:​7, 8). Jahejáramo Ñandejára espíritu ñanesãmbyhy, ojekuaáta ñanderehe  ñandepyʼaporãha, ha Jehová imanduʼáta umi mbaʼe porã jajapovaʼekuére (Nehemías 5:19; 13:31).

‘Jerovia añetetéva’

19. Mbaʼépa pe jerovia ojeʼeháicha Hebreos 11:​1-pe?

¹⁹ Pe jerovia, omoheñóiva avei Ñandejára espíritu, “heʼise jaroviaha jahupytytaha katuete upe ñahaʼarõva, ha jaroviaha pe mbaʼe jahechaʼỹramo jepe” (Hebreos 11:​1, BNP). Jajeroviáramo, jahechakuaáta Jehová ojapotaha katuete umi mbaʼe heʼivaʼekue. Jaikuaa porãgui oikotaha umi mbaʼe heʼivaʼekue, ha neʼĩraramo jepe jahecha, jajerovia upévare. Pór ehémplo, umi mbaʼe oĩva ñande jerére ohechauka porã ñandéve oĩha peteĩ Apohare. Kóicha jajeroviáta jaikóramo Ñandejára espíritu oipotaháicha.

20. Mbaʼépa “pe pekádo ñandepykuáva”, ha mbaʼéichapa ikatu ñamboyke upéva ha umi mbaʼe ñande rete ojaposéva?

²⁰ Pe jeroviaʼỹ hína “pe pekádo ñandepykuáva” (Hebreos 12:​1, BNP). Ñamboyke hag̃ua umi mbaʼe ñande rete ojaposéva, umi mbaʼeta jaipotáva ha umi japu oñemboʼéva ha ohundíva ñande jerovia, jahejavaʼerã Ñandejára espíritu ñanesãmbyhy (Colosenses 2:8; 1 Timoteo 6:​9, 10; 2 Timoteo 4:​3-5). Upéva omombarete Jehová siervokuéra jerovia, ojeroviahaguéicha hembiguaikuéra yma guare ha ambue tapicha la Biblia omombeʼúva (Hebreos 11:​2-40). Avei, jahechaukáramo pe ‘jerovia añetetéva’ ikatúta omombarete ñande rapichakuéra jerovia (1 Timoteo 1:​5, BNP; Hebreos 13:7).

Nañandepochyreíri ha jajejokokuaa

21, 22. Mbaʼépa heʼise nañandepochyreíri, ha mbaʼérepa jahechaukavaʼerã upéva?

²¹ Nañandepochyreíri heʼise ñandepyʼaporãha umi mbaʼe jajapóvape ha jatratávo ñande rapichápe. Ha upéva oĩhína umi mbaʼe porã Ñandejáragui oúva apytépe. Jaikuaa upéva Jesús ndaipochyreíri rupi, ha upéicha ojogua Itúvape (Mateo 11:​28-30; Juan 1:18; 5:19). Upéicharõ, mbaʼépa oñehaʼarõ umi oservívagui Ñandejárape?

²² Oñehaʼarõ ñande kristiáno jahechauka nañandepochyreiriha enterove ñande rapichakuéra ndive (Tito 3:2). Ha upéva jajapoñaína japredika jave. Ojeʼe avei umi ijerovia mbaretévape oñemoñeʼẽ hag̃ua “pyʼaporã reheve” umi ojavyvaʼekuépe (Gálatas 6:​1, BNP). Enterove ikatu ñaipytyvõ ojeiko porãmba hag̃ua ermanokuéra apytépe ‘nañandejejapóivo ha nañandepochyreírivo’ (Efesios 4:​1-3). Ha ani hag̃ua ñandepochy rei, jajejokokuaavaʼerã ha jaiko meme Ñandejára espíritu oipotaháicha.

23, 24. Mbaʼépa jajapóta jajejokokuaáramo, ha mbaʼéichapa ñanepytyvõta upéva?

²³ Jajejokokuaáramo ñañangarekóta umi mbaʼe ñapensa, jaʼe ha jajapóvare. Jehová ‘ojejokokuaavaʼekue’ umi Babiloniaygua ndive ohundírõ jepe hikuái Jerusalénpe (Isaías 42:14). Jesús ojejokokuaavaʼekue ohasa asýrõ  guare, ha upéicha omoĩ ñandéve peteĩ ehémplo. Ha apóstol Pedro heʼi iñermanokuérape ojejokokuaavaʼerãha avei oikuaáramo jepe Ñandejárape (1 Pedro 2:​21-23; 2 Pedro 1:​5-8).

²⁴ Umi ansianokuéra tekotevẽ ojejokokuaa (Tito 1:​7, 8). Añetehápe, enterove ohejáva oisãmbyhy chupe espíritu sánto ojejokokuaavaʼerã. Upéicharõ ojehekýita hikuái teko vai, juru tieʼỹ ha oimeraẽ mbaʼe ikatúvagui omoĩ vai chupekuéra Ñandejára renondépe. Jahejáramo Ñandejára espíritu ñanepytyvõ jajejokokuaa hag̃ua, ñande rapichakuéra ohechakuaáta upéva ñane ñeʼẽre ha umi mbaʼe jajapóvare.

Jaiko memékena Ñandejára espíritu oipotaháicha

25, 26. Mbaʼéichapa jaikóta ñande rapichakuéra ndive ha mbaʼépa ikatu ñahaʼarõ jaikóramo Ñandejára espíritu oipotaháicha?

²⁵ Jaikóramo Ñandejára espíritu oipotaháicha, ñañeʼẽta kyreʼỹme Jehová goviérnore (Hechos 18:​24-26). Ñande rapichakuéra, ha koʼýte umi ohayhúva Ñandejárape, ojeheʼaséta ñanderehe. Upéicha avei jaikóramo Ñandejára espíritu oipotaháicha, ñamokyreʼỹta ñane ermanokuérape oservi meme hag̃ua Jehovápe (Filipenses 2:​1-4). Ajépa jajapose koʼã mbaʼe?

²⁶ Ko múndo oĩ rupi Satanás poguýpe, ijetuʼu jepi jaiko hag̃ua pe espíritu oipotaháicha (1 Juan 5:19). Upéicharõ jepe, hetaiterei tapicha ojapohína upéva. Jajeroviáramo Jehováre ñande pyʼaite guive, javyʼáta koʼág̃ama voi ha ikatúta jaguata opa ára g̃uarã Ñandejára rape potĩre, omeʼẽva ñandéve ijespíritu sánto ñanderayhuetereígui (Salmo 128:1; Proverbios 3: 5, 6).

Mbaʼépa ñambohováita?

• Jahejáramo pe espíritu ñanesãmbyhy, mbaʼéichapa ñaiméta Ñandejára ha Itaʼýra renondépe?

• Mbaʼe mbaʼépa omoheñói pe espíritu sánto?

• Mbaʼéichapa ojehecha ñanderehe umi mbaʼe porã omoheñóiva Ñandejára espíritu?

• Mbaʼéichapa jaikóma koʼág̃a ha mbaʼépa ikatu ñahaʼarõ jaikógui Ñandejára espíritu oipotaháicha?

[Porandu ñahesaʼỹijóva]

[Nóta oĩva taʼanga ndive páhina 17]

Jehová espíritu ñanemomýi jahayhu hag̃ua ñane ermanokuérape

[Nóta oĩva taʼanga ndive páhina 18]

Jahechauka ñande pyʼaporãha ñane ñeʼẽre ha umi mbaʼe jajapóvare