Jajepytaso mbaretékena ñahaʼarõ aja Jehová ára

“Pende jerovia reheve peñehaʼãvaʼerã [avei pejepytaso]” (2 PEDRO 1:​5, 6.)

1, 2. Mbaʼépa heʼise jajepytaso mbarete, ha mbaʼérepa ñande kristiáno ñaikotevẽ upéva?

 JEHOVÁ ára guasu hiʼag̃uimbaitéma (Joel 1:15; Sofonías 1:14). Hiʼãitereíma ñandéve og̃uahẽ pe ára ojehechatahápe Jehová añoite ikatuha ñanesãmbyhy porã. Upe aja, ndajahejaivaʼerã Jehovápe oĩramo jepe ndaijaʼéiva ñanderehe, ojapóva mbaʼe vai térã ñandejukáva jajeroviahaguére hese (Mateo 5:​10-12; 10:22; Apocalipsis [Revelación] 2:10). Upévare ñaikotevẽ jajepytaso mbarete, térã jagueropuʼaka umi mbaʼe ijetuʼúva. Apóstol Pedro heʼi ñandéve: “Pende jerovia reheve peñehaʼãvaʼerã [avei pejepytaso]” (2 Pedro 1:​5, 6). Añetehápe ñaikotevẽ ko mbaʼére, Jesús heʼihaguéicha: “Pe oñemohatãva ijeroviápe ipaha peve katu, oikovéta” (Mateo 24:13).

² Ikatu avei ñanderasy, omano peteĩ jahayhúva térã jahasa hetave mbaʼe ivaíva. Mbaʼeichaitépa ovyʼáne Satanás jahejáramo ñande jerovia! (Lucas 22:​31, 32.) Upéicharamo jepe,  ñanepytyvõ rupi Jehová ikatu jagueropuʼaka oimeraẽ mbaʼe vai (1 Pedro 5:​6-11). Jahechami umi mbaʼe ohasavaʼekue ñande rapichakuéra ohechaukáva enterove ikatuha jajepytaso ha ‘ñañemohatã ñande jeroviápe’, ñahaʼarõ aja Jehová ára.

Mbaʼasy ndojokói chupekuéra

3, 4. Emombeʼumi peteĩ ehémplo ohechaukáva ikatuha jaservi Jehovápe ñanderasýramo jepe.

³ Koʼág̃a rupi, Ñandejára noporomonguerái ymaguaréicha, péro ñanepytyvõ jagueropuʼaka hag̃ua umi mbaʼasy (Salmo 41:​1-3). Peteĩ ermána hérava Sharon heʼi: “Chemanduʼaha guive, neʼĩrava aiko sílla de rruedaʼỹre. Anase guive, pe parálisis cerebral oipeʼa chehegui pe vyʼa ñañandúva ñane mitãme”. Péro oikuaa rire Jehovápe, ha oikuaa rire oipeʼapataha opaichagua mbaʼasy, tuichaiterei omokyreʼỹ chupe. Ha ndaikatúiramo jepe oñeʼẽ ha oguata porã, ovyʼaiterei opredika jave. Ojapo quince áño rupi, Sharon heʼihague: “Ikatu cherasykatuve ahávo, péro che jerovia Ñandejárare chemombaretéta. Avyʼaiterei Jehová oñangareko memégui cherehe ha aservihaguére chupe!”.

⁴ Apóstol Pablo heʼi umi kristiánope oĩva Tesalónicape omokyreʼỹ hag̃ua umi oñeñandu vaívape (1 Tesalonicenses 5:14). Peteĩ tapicha ikatu oñedeprimi nosẽiramo chupe peteĩ mbaʼe ohaʼarõitereivaʼekue. Sharon ohaivaʼekue 1993-pe: “Añandu nosẽporãihague chéve mbaʼevete, ha [...] aju añedeprimi vai tres áño pukukuére. [...] Umi ansiáno oñemoñeʼẽ chéve ha chemokyreʼỹ. [...] Ñemañaha rupive, Jehová chepytyvõ mborayhúpe aikuaa porãve hag̃ua mbaʼépa pe depresión vai. Haʼe ojepyʼapy añetete umi chupe oservívare ha oikuaa mbaʼéichapa ñañeñandu” (1 Pedro 5:​6, 7). Ko ermána oservi Jehovápe koʼág̃a peve ohaʼarõ aja hiʼára guasu.

5. Mbaʼépa ohechauka kristianokuéra ikatuha ogueropuʼaka heta mbaʼe ijetuʼúva?

⁵ Umi mbaʼe vai ohasavaʼekue sapyʼánte ojopyeterei kristianokuérape. Harley ohechavaʼekue heta ñorairõ Segunda Guerra Mundial aja, ha upévare ndokeporãvéi. Ikérape osapukái jepi: “Háke! Háke!”, ha opáyvo ojetopa hyʼaipaiteha. Javyʼaiterei jaikuaávo ojapohague Ñandejára oipotáva, ha mbeguekatúpe ojehasave chugui koʼã mbaʼe vai.

6. Mbaʼéichapa ombohovái peteĩ kristiáno umi provléma ijetuʼúva chupe?

⁶ Peteĩ kristiáno orekovaʼekue trastorno bipolar ha ijetuʼu chupe upévare osẽ hag̃ua opredika. Upéicharamo jepe, ndohejái ko mbaʼe oikuaágui opredikáramo ikatutaha ojesalva haʼe ha umi tapicha ohendúva chupe (1 Timoteo 4:16). Sapyʼánte, ombopúta jave pe tímbre okyhyjeterei. Ko ermáno heʼi: “Apredika rire sapyʼami, añeñandu porãvéma, ahasa ambue ógape ha añehaʼã jey. Apredika meme rupi ikatuha peve, amombarete che jerovia”. Rreunionhápe oho hag̃ua avei ijetuʼu chupe. Péro oikuaa rupi iñimportanteha ojeheʼa kristianokuéra rehe, oñehaʼãmbaite oĩ upépe (Hebreos 10:​24, 25).

7. Mbaʼéichapa oĩ ermáno ojepytaso mbaretéva, okyhyjéramo jepe oñeʼẽ hag̃ua hapichakuéra renondépe térã oho hag̃ua rreunionhápe?

⁷ Oĩ avei kristiáno orekóva fobia, térã okyhyjeterei peteĩ mbaʼégui. Umíva apytépe, ikatu okyhyje oñeʼẽ hag̃ua hapichakuéra renondépe, térã oho hag̃ua rreunionhápe jepe. Jajepyʼamongetami mbaʼeichaitépa ijetuʼu chupekuéra okomenta térã oñemoñeʼẽ hag̃ua pe Eskuéla dél Ministério Teokrátikope. Upéicharõ jepe, haʼekuéra oñehaʼãmbaite, ha ñande ñamombaʼeterei umichaguápe oĩhaguére ñanendive.

8. Mbaʼépa tekotevẽta jajapo ñambohovái hag̃ua umi mbaʼe ñandepyʼapýva?

⁸ Umi tapicha ojepyʼapyetereívape katu oipytyvõta opytuʼu ha oke porãvéramo. Iporãta avei ojehechaukáramo peteĩ doktórpe. Upéicharamo jepe, ojerovia mbaretéramo Ñandejárare ha oñemboʼe meme tuicha oipytyvõta chupe. Salmo 55:23 [55:​22, NM] heʼi: “Ñandejára pópe emoĩ umi mbaʼe ndepyʼapýva ha haʼe oñangarekóta nderehe. Haʼe ndohejamoʼãi oñehundi umi hekojojáva”. Upéicharõ, ‘jajeroviákena Ñandejárare ñande pyʼaite guive’ (Proverbios 3:​5, 6).

 Omanóramo peteĩ jahayhúva

9-11. a) Mbaʼépa ñanepytyvõta ñambohasa hag̃ua pe vyʼaʼỹ omano jave peteĩ ñande rogaygua? b) Mbaʼéichapa ikatu ñanepytyvõ Ana ojapovaʼekue?

⁹ Omanóramo peteĩ ñande rogaygua, ikatu ñambyasyeterei. Abrahán hasẽvaʼekue omanórõ guare hembireko (Génesis 23:2). Jesús, iperféktoramo jepe, “hasẽ” omanórõ guare iñamígo Lázaro (Juan 11:35). Upévare ñambyasy voínte omano jave peteĩ jahayhúva. Upéicharamo jepe, ñande jaikuaa umi omanovaʼekue oñemoingove jeytaha (Hechos 24:15). Upévare nañambyasýi ‘umi oguerekoʼỹva esperánsa’ ombyasyháicha (1 Tesalonicenses 4:​13, BNP).

¹⁰ Mbaʼéichapa ikatu jagueropuʼaka omano jave peteĩ jahayhúva? Ñambojojami peteĩ mbaʼére. Peteĩ ñane amígo oviaháramo, nañambyasyetereíri jaikuaágui ou jeytaha. Upéicha avei jahechavaʼerã omano jave peteĩ kristiáno jeroviaha, jaikuaágui oñemoingove jeytaha katuete (Eclesiastés 7:1).

¹¹ Jajeroviáramo Ñandejárare, ikatúta jagueropuʼaka upe mbaʼe jaikuaágui haʼe ‘tapia oporokonsolaha’ (2 Corintios 1:​3, 4, BNP). Iporãta avei jajepyʼamongetami mbaʼépa heʼi la Biblia peteĩ viúdare hérava Ana. Siete áño omendahaguépe, omano iména. Upéicharamo jepe, orekópe 84 áño oho gueteri Jehová rógape oservi hag̃ua chupe (Lucas 2:​36-38). Oservi rupi Jehovápe ipyʼaite guive oipytyvõ chupe ogueropuʼaka hag̃ua hemimbyasy. Upéicha avei, japredika meméramo ha jajapo hetave mbaʼe Jehovápe g̃uarã, ñanepytyvõta ñambohasa hag̃ua pe vyʼaʼỹ og̃uahẽva omano jave peteĩ ñande rogaygua.

Mbaʼéichapa ñambohovaikuaa hetave mbaʼe ñandepyʼapýva

12. Mbaʼe provlémapa ikatu ombohovái peteĩ kristiáno hogapýpe?

¹² Oĩ kristiáno ombohovaivaʼerã umi provléma ijetuʼúva hogapýpe. Pór ehémplo, hembireko térã iména omoakãratĩramo chupe, upéva ikatu ojapo vaieterei hese. Ohechágui mbaʼeichaitépa oñembotavy chupe, pe kristiáno ikatu hasẽmba rei ha ndokeporãvéi. Oimeraẽ mbaʼe rei ojapótava ijetuʼu chupe, ha ipahápe ikatu ojavy térã ojehu chupe peteĩ mbaʼe ivaivéva. Ikatu voi ndokarusevéi, ipiruve ha ou ndopytaporãvéi. Ijetuʼuvéma chupe ojapo hag̃ua hembiapo kongregasionpegua. Ha mbaʼeichaitépa avei ikatu ohasa asy ifamília!

13, 14. a) Mbaʼéichapa ñanemokyreʼỹ Salomón ñemboʼe ojejapopárõ guare Jehová róga? b) Mbaʼérepa jajerurevaʼerã espíritu sánto?

¹³ Jahasávo ãichagua provléma rehe, Jehová ñanepytyvõ ñaikotevẽhápe (Salmo 94:19). Jehová ohendu umi chupe oservívape. Upéva jahecha Salomón oñemboʼérõ guare ojejapopa riremi Jehová róga. Pe rréi heʼi: “Upéramo ehendu opa ñemboʼe osẽva oimeraẽvagui, térã ojapóva opa ne retã Israelgua, ohechávo ijeharu ha imbaʼasy oñemboʼévo oipysóvo ipo ko [óga] gotyo. Ehendu yvága reikohágui, ha eheja rei oréve ore rembiapo vaikue; emyengovia peteĩteĩme hembiapokuére, neñoite niko reikuaa mbaʼépa oĩ pe máva pyʼapýpe ha mbaʼépa haʼe ojapose. Upéicha nemomorãne ha ohendúne neñeʼẽ oikove aja ko yvýpe remeʼẽvaʼekue ore rukuéra ypykuépe” (1 Reyes 8:​38-40).

¹⁴ Iñimportanterei avei jajerure meme pe espíritu sánto (Mateo 7:​7-11). Pe espíritu omoheñói vyʼa ha pyʼaguapy (Gálatas 5:​22, 23). Upévare, ñande Ru yvagapegua omeʼẽ jave ñandéve espíritu sánto jajerurehaguére chupe, tuichaiterei ñanembopiroʼy. Pe vyʼa oipeʼa ñandehegui ñembyasy, ha pyʼaguapy katu oipeʼa jepyʼapy.

15. Mbaʼe téystopa ñanepytyvõ anive hag̃ua jajepyʼapy?

¹⁵ Jajejopyeterei jave, pyʼỹinte jajepyʼapy. Péro upéva ikatu ñambohasa ñanemanduʼárõ Jesús heʼivaʼekuére: “Ani pejepyʼapy pende rekove rehe, pene rembiʼurã rehe, térã peyʼuvaʼerã rehe, térã pende rete rehe mbaʼépa pemondéta. [...] Peheka raẽ pe [...] Ñandejára rréino ha pe teko marangatu haʼe oipotáva, ha upéi oñemeʼẽvaʼerã avei peẽme opa koʼã mbaʼe” (Mateo 6:​25, 33, 34, BNP). Apóstol Pedro ñanemokyreʼỹ ‘ñamoĩmba hag̃ua Ñandejára pópe umi mbaʼe  ñandepyʼapýva, haʼe oñangarekógui ñanderehe’ (1 Pedro 5:​6, 7, JMP). Upéicharamo jepe, ñañehaʼãvaʼerã ñamyatyrõ umi provléma. Péro jajapopa rire ikatumíva, natekotevẽi jaiko jajepyʼapy, upéva rangue ñañemboʼevaʼerã. Pe salmísta heʼi: “Ñandejára pópe emoĩ nde rekove, hese ejerovia, ha haʼe oñangarekóne nderehe” (Salmo 37:5).

16, 17. a) Mbaʼérepa ndaikatúi jaipeʼapaite ñandejehegui umi mbaʼe ñandepyʼapýva? b) Mbaʼépa ñañandúta jajapóramo Filipenses 4:​6, 7 heʼíva?

¹⁶ Pablo heʼivaʼekue: ‘Ani pejepyʼapy mbaʼevére. Pemoĩ uvei opa mbaʼe Ñandejára pópe peñemboʼévo. Pejerure ha pejeaguijemeʼẽ avei chupe. Ha [Ñandejára] omeʼẽne peẽme ipyʼaguapy, tuichavéva opa ikatuvaʼerãgui yvypóra ohaʼarõ. Ha pe pyʼaguapy oñangarekóne [pene korasõ] ha pene remiandúre, Cristo Jesús rupi’ (Filipenses 4:​6, 7). Upéicharamo jepe, ñaneimperfékto rupi ndaikatúi jaipeʼapaite ñandejehegui umi mbaʼe ñandepyʼapýva (Romanos 5:12). Upéva jahecha oikovaʼekue Isaac ha Rebeca rehe. Umi kuña hitita Esaú omendahague, “heta ombohasa asy vaʼekue” chupekuéra (Génesis 26:​34, 35). Timoteo ha Trófimo oiméne ojepyʼapyrakaʼe umi mbaʼasy orekovaʼekuére (1 Timoteo 5:23; 2 Timoteo 4:20). Pablo ojepyʼapyvaʼekue avei iñermanokuérare (2 Corintios 11:28). Péro pe ‘ñemboʼe Renduha’ katuete oĩ ohendu hag̃uáicha umi chupe ohayhúvape (Salmo 65:3 [65:​2, NM]).

¹⁷ Ñahaʼarõ aja Jehová ára, jajeroviakuaa “Ñandejára ñanembopyʼaguapýva” oĩtaha ñanendive (Filipenses 4:​9, BNP). Haʼe ‘ñandeporiahuvereko ha ipyʼaporã’, ‘oheja rei ñane rembiapo vaikue’ ha ‘oikuaa yvynteha voi ñande’ (Éxodo 34:6; Salmo 86:5; 103:​13, 14). Upévare, ñamombeʼuvaʼerã Ñandejárape umi mbaʼe ñandepyʼapýva. Upéicha ñanembopyʼaguapýta ñande ñaimoʼãʼỹháicha.

18. Heʼiháicha Job 42:​5, mbaʼéichapa ikatu “jahecha” Ñandejárape?

¹⁸ Ombohováivo Ñandejára ñane ñemboʼe, jahechakuaa haʼe oñangarekoha ñanderehe. Ohasa rire heta jejopy vaíre, Job heʼi Jehovápe: “Ahendúgui reínte raʼe roikuaáva. Koʼág̃a katu rohecha cheresaite rupi” (Job 42:5). Ikatu “jahecha” porãve Ñandejárape jajepyʼamongetáramo mbaʼeichaitépa oñangareko ñanderehe, jajerovia hese ha ñamombaʼe chupe ojapohaguére upéva. Ñañemoag̃uíramo hese tuichaiterei ñanembopyʼaguapýta.

19. Mbaʼépa oikóta ñamoĩramo Jehová pópe umi mbaʼe ñandepyʼapýva?

¹⁹ Ñamoĩramo Jehová pópe umi mbaʼe ñandepyʼapýva, tuicha ñanembopyʼaguapýta, ha jagueropuʼakáta umi mbaʼe ijetuʼuvéva. Ñane ánga ruguaite guive ndajakyhyjemoʼãi mbaʼeve ivaívagui. Ha ndajaikomoʼãi jajepyʼapyeterei umi mbaʼe ñandejopývare.

20, 21. a) Mbaʼéichapa oñeñanduvaʼekue Esteban ojepersegírõ guare? b) Emombeʼumi mbaʼeichaitépa peteĩ kristiáno ipyʼaguapy ojejuka mboyve.

²⁰ Pe disípulo Esteban ohechaukavaʼekue upeichagua pyʼaguapy ojejopy vaírõ guare. Omano mboyvemi, oñeʼẽ umi mburuvichakuéra renondépe. Umi oĩva Sanedrínpe “omaʼẽvo Esteban rehe ohecha hikuái ánhel rovaichaha pe hova” (Hechos 6:​15, BNP). Esteban rováre ndojekuaái mbaʼeveichagua jepyʼapy, haʼetévaicha Ñandejára ánhel. Heʼírõ guare umi hués ojukaukahague Jesúspe, “ipochyeterei hikuái hese ha omopururũ hãinguéra”. Esteban “katu, [henyhẽva] Espíritu Sántogui, omaʼẽ yvága rehe ha ohecha [...] Ñandejára glória, ha Jesúspe oñemboʼyhína [...] Ñandejára [deréchape]”. Omombaretégui chupe upe ohechavaʼekue, ndohejái ijerovia omanoite peve (Hechos 7:​52-60, BNP). Ndajahecháiramo  jepe koʼág̃a umi mbaʼe, jajepersegi jave Ñandejára ñanembopyʼaguapýta.

²¹ Jajepyʼamongetami mbaʼéichapa oñeñanduvaʼekue heta kristiáno omano mboyve umi nazi poguýpe Segunda Guerra Mundial aja. Omombeʼúvo ohasavaʼekue pe trivunál renondépe, peteĩ kristiáno heʼi: “Heʼíma hikuái ajejukataha. Ahendu upéva, ha haʼepa rire chejupe ‘Ejepytasóke nde jeroviápe remanoite peve’, ha hetave mbaʼe Jesús heʼivaʼekue, añandu upépe opaitemaha. [...] Upéicharamo jepe, koʼág̃a napeimoʼãichéne mbaʼeichaitépa chepyʼaguapy”. Jahechami avei mbaʼépa ohaivaʼekue ituvakuérape peteĩ kristiáno ohaʼarõ aja ojejuka. Ko mitãrusu heʼi: “Pyharepytéma, ha ikatu gueteri adesidi. Péro ikatúnepa avyʼa jey amboykéramo Jesucrístope? Ndaikatumoʼãi! Upéicharamo jepe, peikuaavaʼerã ahejaha ko múndo vyʼa ha pyʼaguapýpe”. Koʼã ehémplo ohechauka mbaʼeichaitépa Jehová oipytyvõ umi hembiguaikuéra hese ojeroviávape.

Ikatu jajepytaso mbarete ñambohovái jave umi mbaʼe ijetuʼúva

22, 23. Mbaʼérepa jajeroviakuaa jajepytaso mbaretéramo ñahaʼarõ aja Jehová ára?

²² Ikatu ñande ndajahasái umi mbaʼe jahechavaʼekue. Upéicharamo jepe, Job ohechakuaavaʼekue ko mbaʼe: “Ore yvypóra ore rekove mbyky ha orerenyhẽ jepyʼapýgui” (Job 14:1). Ikatu nde peteĩ túva térã sy oñehaʼãmbaitevahína ohekomboʼe ifamíliape Ñandejára oipotaháicha. Haʼekuéra ohasavaʼerã heta mbaʼe ijetuʼúva eskuélape, ha nembovyʼaiterei rehechávo mbaʼéichapa ojepytaso hikuái Jehová rape potĩme. Ikatu nde voi rehasa heta mbaʼe ijetuʼúva nembaʼapohápe. Tahaʼe haʼeháicha, ikatu jagueropuʼaka koʼã mbaʼe Jehová ‘ohupígui opa árape ñanembaʼe pohýi’ (Salmo 68:20 [68:​19, NM]).

²³ Ikatu ñaimoʼã ñande ndahaʼeiha mbaʼeve. Péro ñanemanduʼavaʼerã Jehová ndahesaraimoʼãiha umi mbaʼe porã jajapovaʼekuégui héra rehehápe (Hebreos 6:10). Haʼe ñanepytyvõ rupi jagueropuʼakáta oimeraẽ mbaʼe ikatúva omokangy ñande jerovia. Upévare, jajerurevaʼerã Ñandejárape tañanepytyvõ jajapo hag̃ua hembipota, ha ñanemanduʼa hese oimeraẽ mbaʼe jajaposévape. Jajapóramo upéicha, jajeroviakuaa Jehová omeʼẽtaha ñandéve heta mbaʼe porã ha ñanepytyvõtaha jajepytaso mbaretéramo ñahaʼarõ aja hiʼára guasu.

Mbaʼépa ñambohováita?

• Mbaʼérepa kristianokuéra ñaikotevẽ jajepytaso mbarete?

• Mbaʼépa ñanepytyvõta jagueropuʼaka hag̃ua mbaʼasy ha omanóramo peteĩ jahayhúva?

• Mbaʼéichapa pe ñemboʼe ñanepytyvõ jagueropuʼaka hag̃ua umi mbaʼe ijetuʼúva?

• Mbaʼérepa ikatu jajepytaso mbarete ñahaʼarõ aja Jehová ára?

[Porandu ñahesaʼỹijóva]

[Nóta oĩva taʼanga ndive páhina 23]

Jajeroviáramo Jehováre ikatúta jagueropuʼaka omanóramo peteĩ jahayhúva