Jarekópa peteĩ álma nomanóiva?

Jarekópa ñande yvypóra ñande retepýpe peteĩ párte oikovéva ñamano rire?

JEPE opárupi umi rrelihión omboʼe heta mbaʼe oikoha ñamano rire, enterove heʼi jarekoha peteĩ párte nomanóiva. Heta hénte oguerovia ko mbaʼe haʼeha ñane álma. Mbaʼépa nde reguerovia? Jarekópa ñande retepýpe peteĩ ánga térã álma? Mbaʼépa upéva? Nomanóipa? Iñimportánte jaikuaa porã koʼã mbaʼe.

‘Kuimbaʼégui oiko peteĩ álma oikovéva’

Jarekópa peteĩ álma osẽva ñande retégui ñamanóvo ha osegíva oikove? Pe Diccionario Bíblico Conciso Holman heʼi álma heʼiseha jepi “yvypóra”. Pór ehémplo Génesis 2:7 [NM] heʼi: ‘Ñandejára Jehová ojapo kuimbaʼépe yvýgui ha oipeju itĩme pytu oporomoingovéva, ha kuimbaʼégui oiko peteĩ álma oikovéva’. Upéicharõ Adán, pe kuimbaʼe ypykue peteĩ álma vaʼekue.

Heta téysto ohechauka ojeʼeha álma yvypórare. Pór ehémplo, la Biblia heʼi peteĩ álma ombaʼapoha (Levítico 23:30). Ojeʼe avei ikatuha ikuerairo, ipochy, ndokevéi, oñemondýi ha naikyreʼỹvéi (Jueces 16:16; Job 19:2; Salmo 119:28; Hechos 2:43; 1 Tesalonicenses 5:14). Ohechaukávo álma haʼeha yvypóra Romanos 13:1 [NM] heʼi: ‘Opavave álma toñemoĩ mburuvichakuéra poguýpe’. Ha 1 Pedro 3:20 [NM] heʼi: ‘Noé oikoveha árape, mbovymi hénte, térã ocho álma, ojesalvavaʼekue pe ýgui’. Koʼã téystope ndaipóri mbaʼeve ohechaukáva pe ánga oĩha ñande retepýpe ha osegiha oikove ñamano rire.

Ha mbaʼépa jaʼekuaa mymba ha plantakuérare? Haʼekuéra piko álma avei?  Jahechami mbaʼéicha omombeʼu la Biblia ojejapohague mymbakuérape. Ñandejára heʼivaʼekue: ‘Ýgui taheñói umi álma oikovéva’. Upe rire Ñandejára heʼi: ‘Tomoheñói pe yvy álma oikovéva haʼéva ojuehegua, mymba ogaha rupi oikóva ha mymba omýiva ha mymba kaʼaguy haʼéva ojuehegua’ (Génesis 1:​20, 24, NM). Upéicharõ yvypóra ha mymbakuéra álma hína. La Biblia katu ndeʼíri plantakuéra haʼeha álma.

Pe ñeʼẽ álma heʼise avei ambue mbaʼe. Job 33:22 heʼi: “[Hiʼálma] yvykua rembeʼýpema oĩ, ha [hekove] imano rokẽme”. Koʼápe álma ha tekove heʼise peteĩ mbaʼénte, ha ojeporu oñondive ojehechauka porãve hag̃ua mbaʼépa heʼise. Upéicharõ álma heʼise avei yvypóra rekove. Jaleévo la Bíbliape umi ndaijaʼéiva Moisés rehe ‘ohekahague hiʼálma’, upéva heʼise ojukasehague Moiséspe (Éxodo 4:​19, NM). Ha Jesucrístore katu heʼi: ‘Yvypóra raʼy ou omeʼẽ hag̃ua hiʼálma [hekove] rreskáteramo heta rehehápe’ (Mateo 20:​28, NM).

La Bíbliape omombeʼu porã mbaʼépa heʼise álma. Heʼise yvypóra, mymba térã tekove. Ha jaikuaa upeichaha jahechávo mbaʼépa heʼi la Biblia oikoha pe álmare ñamanóvo.

‘Álma opekáva omanóta’

La Biblia heʼi: ‘Pe álma opekáva, upéva omanóta’ (Ezequiel 18:​4, NM). Ojepyʼapyetereíramo guare proféta Elías ojerure Jehovápe: ‘Eipeʼa katu chehegui che álma’ (1 Reyes 19:​4, NM). Avei Jonás ohasa asýramo guare ojerure tomano hiʼálma (Jonás 4:8). Upéicharõ pe álma omano; ndoikovéi opa ára g̃uarã. Peteĩ tapicha ningo peteĩ álma, upéicharõ omanóvo pe tapicha omano pe álma.

Mbaʼérepa upéicharõ oĩ téysto heʼíva ñane ánga osẽ térã ou jeyha? Omombeʼúvo mbaʼépa oikovaʼekue Raquel rehe imembykuévo, la Biblia heʼi: “Ha ojehu ojehekýivo ichugui hiʼánga (omanógui), ombohéra Benoni, upéicharõ itúva ombohéra Benjamin” (Génesis 35:​18, ÑÑM). Peteĩ viúda memby kuimbaʼe oñemoingove jey vaʼekue rehe, 1 Reyes 17:22 [ÑÑM] heʼi: “Ha Ñanderuete ohendu Elías ñeʼẽ, ha pe mitã ánga ou jevy chupe, ha oikove  jevy”. Ohechaukápa koʼã téysto ñane ánga ikatuha osẽ ha oike jey ñande retepýpe?

Ani ñanderesarái ánga heʼiseha avei “tekove”. Upéicharõ, Raquélgui ojehekýivo hiʼánga heʼise haʼe omanohague. Upévare oĩ Biblia heʼíva upépe opaha hekove térã “ipytuhẽ peteĩteĩvo”. Upéicha avei pe viúda memby kuimbaʼépe ou jey hekove (1 Reyes 17:23).

Mbaʼépa hína yvypóra

La Biblia ohechauka porã mbaʼépa hína yvypóra. Ndajarekói peteĩ ánga, ñande voi ningo peteĩ ánga. Upévare oĩ hag̃ua esperánsa umi omanóvape g̃uarã oñemoingove jey vaʼerã chupekuéra. La Biblia heʼi: ‘Og̃uahẽtahína ára opa omanóva ohendu hag̃ua che ñeʼẽ [Jesús], ha osẽmbáta ityvykuéragui. Umi hembiapo porã vaʼekue, opuʼã jevýta oikove hag̃ua opa ára g̃uarã. Umi hembiapo vai vaʼekue katu, opuʼãta ojehusga hag̃ua’ (Juan 5:​28, 29). Koʼápe ndeʼíri pe álma nomanoiha, heʼi guei oñemoingove jeytaha umi omanovaʼekuépe.

Upéicharõ iñimportanteterei jaikuaa porã mbaʼéicha oñemoingove jeýta umi omanovaʼekuépe ha mbaʼépa oguerúta upéva yvyporakuérape. Avei tekotevẽ jaikuaa Ñandejára ha Jesucrístope. Upévare Jesús heʼi: ‘Ha upe jeikove opaʼỹva niko kóva: Tandekuaa ndéve Ñandejára añete ha peteĩetéva, ha Jesucrístope, upe nde rembouvaʼekuépe’ (Juan 17:3). Testigos de Jehová oikóva nde róga jerére nepytyvõkuaa restudia hag̃ua la Biblia ha péicha reikuaave Ñandejára, Itaʼýrape ha umi mbaʼe porã Ñandejára ojapótava. Rovyʼaitéta reñeʼẽramo peteĩ testigo de Jehovándi térã rehai umi ojapóvape ko rrevísta.

[Nóta oĩva taʼanga ndive páhina 4]

Koʼãva álma hína

[Roagradese]

Kavara: CNPC—Centro Nacional de Pesquisa de Caprinos (Sobral, CE, Brasil)