Mbaʼéichapa ñanepytyvõ ñaaguantáramo jehasa asy

‘Ñahenói ovyʼaitéva umi oaguantavaʼekuépe’ (SANTIAGO 5:11.)

1, 2. Mbaʼéichapa jaikuaa Jehová ndoipotaiha jahasa asy?

 NDAIPÓRI ohasa asyséva, ha Jehová ñande Apohare voi ndoipotái jahasa asy. Ñandejára Ñeʼẽ omyesakã porã ñandéve upéva omombeʼuhápe mbaʼéichapa Jehová ojapovaʼekue ñande sy ha ñande ru ypykuépe. Pe kuimbaʼépe raẽ ojapovaʼekue. ‘Jehová ojapo yvýgui pe kuimbaʼe ha oipeju itĩme ipytu oporomoingovéva, ha upéicha pe kuimbaʼégui oiko peteĩ álma.’ (Génesis 2:7.) Adán iperfektovaʼekue, upévare hesãi ha ikatuvaʼekue oikove opa ára g̃uarã.

² Moõpa oikovaʼekue? ‘Jehová oñotỹ peteĩ hardín Edénpe, kuarahy resẽ gotyo, ha upépe omoĩ pe kuimbaʼépe. Omoheñói avei upépe opaichagua yvyra neporãva ha hiʼa héva.’ (Génesis 2:​8, 9.) Adán oikovaʼekue peteĩ hardín neporãmba jepévape. Upépe ndaiporivaʼekue ohasa asýva.

3. Mbaʼépa Jehová omoĩvaʼekue ñande ru ha ñande sy ypykue renonderãme?

³ Génesis 2:​18-pe Jehová heʼi: Pe “kuimbaʼe naiporãi oiko haʼeño. Ajapóta chupe iñirũrã, peteĩ oipytyvõvaʼerã chupe”. Jehová ojapo Adánpe hembirekorã iperféktava, upéicha rupi ikatuvaʼekue oiko hikuái vyʼápe hogapýpe (Génesis 2:​21-23). Upe rire la Biblia omombeʼu, Jehová ovendesiha chupekuéra ha heʼi: “Peñembohetáke; pemyenyhẽ ko Yvy ha pemoĩ pende poguýpe” (Génesis 1:28). Ñande sy ha ñande ru ypykuépe oñemeʼẽvaʼekue peteĩ tembiapo ijojahaʼỹva, omoporãvaʼerã ko Yvy tuichakue. Ifamiliakuéra ovyʼáta ha ndohasaʼasymoʼãi. Iporãiténepa rakaʼe upéva! (Génesis 1:31.)

Mbaʼéichapa oñepyrũrakaʼe jehasa asy

4. Mbaʼépa jahechakuaa jajesarekóramo yvypóra rembiasakuére?

⁴ Jajesarekóramo yvypóra rembiasakuére jahechakuaa oĩhague ojavykáva ñandéve pe jeikove ijojahaʼỹva oñemoñepyrũvaʼekue pe hardínpe. Hetaiterei oĩ ñande rapicha ohasa asy. Ymaite guivéma Adán ha Eva ñemoñare  hasy, ituja ha omano. Ko Yvy ndahaʼéi peteĩ hardín henyhẽva hénte ovyʼávagui. Romanos 8:​22-pe ohechauka porã mbaʼéichapa ñaime: “Jaikuaa niko koʼág̃a peve opa mbaʼe ijapopyre ohasa asyha”.

5. Mbaʼépa ojaporakaʼe ñande sy ha ñande ru ypykue ajeve ojehasa asy?

⁵ Jehová ndoguerúi arakaʼeve mbaʼeveichagua jehasa asy avavépe (2 Samuel 22:31). Yvyporakuéra ohasa asy ‘heko vai rupi, hembiapo ñanembojeguaru’ (Salmo 14: 1). Ñande sy ha ñande ru ypykue noikotevẽivaʼekue mbaʼevére. Oikove hag̃ua opa ára g̃uarã iñeʼẽrenduvaʼerã hikuái Jehovápe, péro haʼekuéra ndojapói upéicha. Oñemomombyry rupi ñande Apoharégui, Jehová omboyke chupekuéra. Upe guive oñepyrũ ituja hikuái ha upéi omano. Ha ñandéve ñanderupyty avei upéva (Génesis 3:​17-19; Romanos 5:12).

6. Mbaʼépa ojaporakaʼe Satanás omoñepyrũ hag̃ua jehasa asy?

⁶ Satanás omoñepyrũvaʼekue avei pe jehasa asy. Jehová ohejavaʼekue chupekuéra oiporavo hag̃ua, ha upe ánhel aña oiporu vai upéva oipotáramo guare oñemombaʼeguasu chupe. Ha jaikuaa porã Jehovápe añoite oñemombaʼeguasuvaʼerãha. Satanás heʼíva rupive omomombyry Adán ha Évape Jehovágui. Heʼi chupekuéra: ‘Ñandejára oikuaa porã, peʼúramo upe yva pejehesapeʼataha ha peikuaáta iporãva ha ivaíva Ñandejáraicha’ (Génesis 3:5).

Jehová añoite ikatu ñanesãmbyhy

7. Mbaʼépa ñaaprende ñande ru ha ñande sy ypykue opuʼãhaguére Jehováre?

⁷ Jahecháma mbaʼépa oiko ñande sy ha ñande ru ypykue naiñeʼẽrenduihaguére Jehovápe. Ohechauka porã ñandéve Jehová añoite ikatuha ñanesãmbyhy, ha igoviérno poguýpe añoite oĩtaha tekojoja. Satanás oisãmbyhy ko múndo, ha upévare jahechakuaa ymaite guivéma umi goviérno iñaña ha iñinhustoha. Koʼã mbaʼére jahechakuaa ivaipaiteha ko múndo (Juan 12:31). Heta áñorema ogoverna yvyporakuéra, ha jahechakuaa noisãmbyhykuaaiha tekojojápe oĩ rupi Satanás poguýpe (Jeremías 10:23). Ñandejára Goviérno añoite ikatu ñanesãmbyhy porã ha upéva jahechakuaa umi mbaʼe oikovaʼekuére.

8. Mbaʼépa ojapóta Jehová umi goviérno koʼág̃a oisãmbyhývagui?

⁸ Heta áñorema Jehová oheja yvypóra oñehaʼã oisãmbyhy ko múndo. Ha noisãmbyhyporãi rupi, koʼág̃a Jehová ikatu ohundi umi goviérno ha haʼe oñepyrũ oisãmbyhy hendaguépe. Peteĩ profesía heʼi: ‘Oisãmbyhy aja koʼã mburuvichakuéra [yvyporakuéra goviérno] Ñandejára yvagapegua omopuʼãta peteĩ goviérno [oĩva Jesucristo poguýpe] noñehundimoʼãiva arakaʼeve. Ohundietéta koʼã goviernokuéra, ha igoviérno ndopamoʼãi arakaʼeve’ (Daniel 2:44). Satanás ha opavave goviérno oñehundipaitéta. Ñandejára Goviérno añoite opytáta ha ipoguýpe opytapáta yvyporakuéra. Jesucristo oisãmbyhýta upe goviérno ha umi 144.000 ojeporavovaʼekue oho hag̃ua yvágape oipytyvõta chupe (Revelación 14:1).

Mbaʼépepa ñanepytyvõta ñaaguantáramo

9, 10. Mbaʼéichapa oipytyvõ Jesúspe umi mbaʼe ohasavaʼekue?

⁹ Jahechamíta mbaʼépa ojapovaʼerã umi oisãmbyhýtava pe goviérno. Jesús ohechaukavaʼekue oisãmbyhy porãtaha. Haʼe heta tiémpo oikovaʼekue Itúva ndive, ojapopaite heʼíva guive chupe, “ipytyvõháramo” (Proverbios 8: 22-31). Jehová omboútaramo guare Jesúspe ko Yvy ape ári, kyreʼỹme haʼe ojapo Itúva heʼíva chupe. Ou rire ko Yvy ape ári haʼe oñeʼẽ meme  vaʼekue Ñandejára Goviérnore. Upéicha oheja ñandéve ehémplo porã mbaʼéichapa ñañemoĩvaʼerã Ñandejára Goviérno poguýpe (Mateo 4:17; 6:9).

¹⁰ Jesúspe ojepersegivaʼekue ojejuka peve chupe. Ha opredikakuévo ohechavaʼekue mbaʼéichapa heta yvypóra ohasa asy. Oipytyvõpa chupe haʼe voi ohasa asy hague ha ohecha mbaʼéichapa hapicha ohasa asy? Katuete oipytyvõ chupe. Hebreos 5:​8-pe heʼi: ‘Ñandejára Raʼýramo jepe, oikuaa pe jehasa asy rupi mbaʼépa heʼise ñaneñeʼẽrendu’[JMP]. Umi mbaʼe ohasavaʼekue ko Yvy ape ári oipytyvõ Jesúspe ñandeporiahuverekove hag̃ua. Jesús oikuaa porãiterei vaʼekue mbaʼéichapa ohasa asy yvyporakuéra, upévare ikatuvaʼekue oporoporiahuvereko ha oipytyvõ oikotevẽvape. Apóstol Pablo ohaivaʼekue: ‘Oikovaʼekue ipehenguekueéraicha, opa mbaʼépe oiko hag̃ua chugui peteĩ Saserdóte Guasu heko jeroviaháva ha oporoporiahuverekokuaáva, ombaʼapóva Ñandejárape g̃uarã ha oheja rei hag̃ua yvypórape hembiapo vaikue. Ha haʼe voi ohasa asy ha ojepyʼaraʼã rupi, koʼág̃a ikatu oipytyvõ umi ojepyʼaraʼãvape avei’. ‘Jesús ñande Saserdóte Guasu, ikatu ñandeporiahuvereko ñanekangyhápe, haʼe voi niko ohasa asy vaʼekue ñandéicha. Ñañemboja jeroviápe Ñandejárare, haʼe ñandeporiahuvereko hag̃ua ha ipyʼaporãgui ñanepytyvõ ñaikotevẽ jave.’ (Hebreos 2:​17, 18; 4:​14-16; Mateo 9:36; 11:​28-30.)

11. Mbaʼépepa oipytyvõ umi mbaʼe ohasavaʼekue ko Yvy ape ári umi ohótavape yvágape oisãmbyhy hag̃ua?

¹¹ Umi 144.000 ojeporavovaʼekue ko Yvy ape árigui oisãmbyhy hag̃ua Jesucristo ndive, ñanepytyvõ avei ñaikotevẽve jave (Revelación 14:4). Haʼekuéra heta áñore ohasa asy ha ohecha avei mbaʼéichapa jahasa asy. Ojepersegi ha ojejuka chupekuéra iñeʼẽrenduhaguére Jehovápe ha oñehaʼãhaguére omoirũ Jesucrístope. Upéicha avei notĩri omosarambi hag̃ua pe marandu porã, ohasa asýramo jepe (2 Timoteo 1:8). Umi mbaʼe ohasavaʼekue hikuái ko Yvy ape ári ombokatupyry chupekuéra oisãmbyhy hag̃ua yvyporakuérape yvága guive. Upéicha ipyʼaporã hikuái ha ñandeporiahuverekokuaa, koʼã mbaʼe omomýi chupekuéra ñanepytyvõse hag̃ua (Revelación 5:10; 14:​2-5; 20:6).

Mbaʼeichaitépa ovyʼa umi ohaʼarõva oikove opa ára g̃uarã ko Yvy ape ári

12, 13. Mbaʼéichapa ñanepytyvõ ñaaguantáramo jehasa asy?

¹² Ñande ñahaʼarõ jaiko opa ára g̃uarã ko Yvy ape ári, ndaiporimoʼãveimahápe hasýva, ojepyʼapýva ni omanóva. Ñandévepa  ñanepytyvõ avei ñaaguantáramo jehasa asy? Ndajahasaʼasyséiramo jepe, umíva ñanepytyvõ ñande reko porãve ha javyʼa hag̃ua.

¹³ Jahechamína mbaʼépa heʼi Ñandejára Ñeʼẽ upévare: ‘Pehasa asýramo jepe pejapohaguére pe iporãva pevyʼa vaʼerã’. “Pevyʼaiténte oĩramo pende jaʼóva Crístore.” (1 Pedro 3:14; 4:14 BNP.) “Pevyʼa vaʼerã pejejaʼo ha pehasa asýramo, ha ojeʼéramo pende rehe opa mbaʼe vai, chendive peikógui. Pevyʼa ha pende pyʼarorýke, tuicha jopói oñemeʼẽtagui peẽme yvágape.” (Mateo 5:​11, 12.) ‘Ovyʼaite vaʼerã niko pe oaguantáva jehasa asy. Osẽ porã rire, oñemeʼẽta chupe jeikove opa ára g̃uarãva.’ (Santiago 1:12.)

14. Mbaʼérepa ikatu javyʼa jahasa asýramo jepe?

¹⁴ Jahechahaguéicha ndahaʼéi jahasa asy haguére javyʼáva. Javyʼañaína jajapohaguére Jehová rembipota ha ñañehaʼãhaguére jaiko Jesús oikohaguéicha. Pe primer síglope umi apóstolpe ojeguerahavaʼekue kárselpe ha hués renondépe opredikahaguére Jesucristo omboʼevaʼekue chupekuéra. Ha ombyepoti raẽ chupekuéra ha upéi opoi chuguikuéra. Mbaʼéichapa ombohovairakaʼe hikuái umi mbaʼe ohasavaʼekue? Ñandejára Ñeʼẽme heʼi ‘osẽhague oho hikuái pe hués renondégui, ha ovyʼaiterei ojehecha rupi chupekuéra ohasa asy hague Jesús rérare’ (Hechos 5:​17-41). Haʼekuéra ovyʼaitereivaʼekue ohasa asy haguére iñeʼẽrendu rupi Jehovápe ha oñehaʼãhaguére omoirũ Jesucrístope. Ndahaʼéi oñembyepotihaguére chupekuéra ovyʼáva (Hechos 16:25; 2 Corintios 12:10; 1 Pedro 4:13).

15. Ñanepytyvõtapa jagueropuʼakáramo koʼág̃a jehasa asy?

¹⁵ Ñambohováiramo pyʼaguapýpe oĩ jave oñemoĩva ñanderehe térã ñandepersegíva, upéva ñanemombaretéta jagueropuʼaka hag̃ua ijetuʼuvéva. Ñandejára Ñeʼẽme heʼi: ‘Che ermanokuéra, pevyʼákena peaguanta haguére opaichagua jehasa asy pende jerovia rehehápe, upévako penemombaretevéta’ (Santiago 1:​2, 3). Romanos 5:​3-5-pe katu heʼi péicha: ‘Javyʼa avei jahasa asýramo jepe, jaikuaágui ñanemombareteha jaropuʼaka hag̃ua pe jehasa asy. Ha ñanemombarete rupi ñasẽ porã, upéva omeʼẽta ñandéve jerovia, ha pe jerovia nañanembotavýi’. Heta mbaʼe jahasa asýta gueteri ñande jerovia rehehápe ko múndo añáme. Koʼág̃a voi ñaaguanta mémeramo ñanepytyvõta jagueropuʼaka hag̃ua ijetuʼuvéva.

Jehová ñanevendesíta

16. Mbaʼépa ohupytýta umi kristiáno ohótava yvágape ohasa asýramo jepe koʼág̃a?

¹⁶ Ñaneñeʼẽrendúramo Ñandejárape, oĩta katuete oñemoĩva ñanderehe, ñandepersegíva ha ikatu ojepeʼapa ñandehegui umi mbaʼe jarekomíva. Upéicharamo jepe javyʼa meméta jaikuaa rupi Jehová ñanevendesitaha. Apóstol Pablo ohaivaʼekue umi kristiáno ohótavape yvágape: “Ojepeʼáramo jepe pendehegui umi  penembaʼe teéva, pevyʼantevaʼekue avei, peikuaágui perekoha peteĩ pene mbaʼerã iporãitevéva ha tapia g̃uarã”, ikatúta oisãmbyhy hikuái Ñandejára Rréinope (Hebreos 10:​34, BNP). Ñapensamína mbaʼeichaitépa javyʼáta ñaime vove pe múndo pyahúpe. Jehová ha Jesucristo poguýpe hetaiterei mbaʼe porã jahupytýta. Apóstol Pablo ohaivaʼekue umi kristiánope: ‘Pe jehasa asy koʼag̃agua ndahaʼéi mbaʼeve ñambojojáramo pe vyʼa jahasátava upe rire’ (Romanos 8:18).

17. Mbaʼépa omeʼẽta Jehová hembiguaikuéra iñeʼẽrendúvape ohaʼarõva oiko ko Yvy ape ári?

¹⁷ Umi ohaʼarõva jeikove opaveʼỹva ko Yvy ape ári ohupytýta avei heta vendisión. Jehová omyengoviáta umi mbaʼe ojepeʼa vaʼekue chuguikuéra ha ovendesíta umi mbaʼe ojapovaʼekue oservívo chupe. Ha oikovéta opa ára g̃uarã ko Yvy ape ári. La Bíbliape heʼi pe múndo pyahúpe Jehová ‘omokãmbáta hesaykuéra ha ndaiporimoʼãvéima ñemano, tasẽ, jaheʼo, jehasa asy ha mbaʼasy’ (Revelación 21:4). Ajépa iporãite koʼã mbaʼe ñahaʼarõva! Jahasa asýramo jepe koʼág̃a ndaikatúi ñambojojávo pe jeikove opaveʼỹvare.

18. Mbaʼe neporãvapa jahupytýta Jehová múndo pyahúpe?

¹⁸ Jahasa asýramo jepe koʼág̃a, katuete javyʼáta opa árare Ñandejára múndo pyahúpe. Upépe jaiko porãitereíta. Umi mbaʼe jahasavaʼekue, ndahaʼemoʼãi mbaʼevete. Isaías 65:​17, 18-pe heʼi: “Yma guare opytáta tesaráipe, avave naimanduʼamoʼãi hese. Tahenyhẽ tory ha vyʼágui opa árape g̃uarã upe ajapótava rehe”. Upévare Santiago, Jesús ermáno ohaivaʼekue: ‘Ñahenói ovyʼaitéva umi oaguantávape’ (Santiago 5:11). Ñaaguantáramo opaichagua jehasa asy jahupytýta heta mbaʼe porã koʼág̃a voi ha tenonderãme katu hetavéntema.

Mbaʼépa ñambohováita?

• Mbaʼéichapa oñepyrũvaʼekue jehasa asy ko Yvy ape ári?

• Mbaʼéichapa oipytyvõ pe jehasa asy umi ohótava yvágape ha umi ohaʼarõva jeikove opaveʼỹva ko Yvy ape ári?

• Mbaʼérepa ikatu javyʼa jahasa asýramo jepe?

[Porandu ñahesaʼỹijóva]

[Nóta oĩva taʼanga ndive páhina 17]

Ñande sy ha ñande ru ypykuépe ohaʼarõvaʼekue hetaiterei mbaʼe neporãmba jepéva

[Nóta oĩva taʼanga ndive páhina 19]

Jesús ohecha rupi mbaʼeichaitépa ojehasa asy oipytyvõ chupe oisãmbyhy ha oiko hag̃ua chugui peteĩ Saserdóte iñaranduetereíva

[Nóta oĩva taʼanga ndive páhina 21]

Umi apóstol ovyʼavaʼekue ohasa asy haguére ijeroviáre