Opa mbaʼe ‘ojeʼevaʼekue ñanerekomboʼe hag̃ua’

“KUATIA jehai heta ndopái arakaʼeve.” (Eclesiastés 12:12.) Hetaiterei ha opaichagua lívro ojejapo koʼág̃a rupi, upévare ikatu jaʼe añeteha ko mbaʼe yma ojehaivaʼekue. Upéicharõ, mbaʼéichapa jaikuaáta mbaʼépa iporã jalee?

Oheka jave peteĩ lívro olee hag̃ua heta tapicha oikuaase máva rembiapokuépa. Upévare umi lívro omombeʼu jepi moõpa onase ijapohare, mbaʼépa ostudia ha mbaʼeichagua lívropa ojapóma. Iñimportánte jaikuaa máva rembiapokuépa peteĩ lívro, upévare ymave umi kuña ohaíva lívro oñembohéra kuimbaʼéicha. Péicha umi oleéva ndeʼimoʼãi vyroreiha kuña rembiapokue rupi.

Péro jahechahaguéicha oĩ umi nomombaʼéiva “Antiguo Testamento” * oimoʼãgui oñeʼẽha peteĩ Ñandejára ipyʼahatãvare, ohundi reíva umi ndaijaʼéivape hese. Jahechami mbaʼépa heʼi Evréo Kuatiañeʼẽ ha avei Griégo Kuatiañeʼẽ la Biblia Apohare rehe.

Mbaʼépa ohechauka Ijapoharére

Evréo Kuatiañeʼẽme Ñandejára heʼivaʼekue umi Israelguápe: “Che hína pende Jára koʼag̃aite peve” (Malaquías 3:6). Ohasa rire 500 áño rupi, Santiago heʼi Ñandejárare: ‘Ñandejára, heko peteĩnte opa ára, haʼe naiñambuéi’ (Santiago 1:17). Mbaʼérepa upéicharõ oĩ heʼíva Evréo Kuatiañeʼẽ ha Griégo Kuatiañeʼẽ noñeʼẽiha peteĩ Ñandejárarente?

La Biblia heʼi heta vése mbaʼéichapa Ñandejára oñeñandu ha mbaʼépa ojapo. Pór ehémplo Génesis heʼi hese ‘ombyasyha ipyʼaite guive’, ha ohenói chupe ‘yvága ha yvy apohare’ ha ‘ko yvy tuichakue hués’ (Génesis 6:6; 14:22; 18:​25, ÑÑM). Oñeñeʼẽpa koʼápe peteĩ Ñandejárarente? Peteĩrente oñeñeʼẽ.

Ikatu ñambojoja ko mbaʼére: Peteĩ huéspe ikatu ojekuaa ojapohaguére pe léi heʼihaichaite. Itaʼyrakuérape  g̃uarã katu ndaipóri túva oporohayhu ha ipojeravéva. Iñirũnguéra katu heʼi hese horyeterei ha ovyʼakuaaha. Koʼápe oñeñeʼẽ peteĩ tapichárente, péro ojeʼe haʼeha hués, túva ha amígo. Ojekuaa chupe umi mbaʼe ojapóvare.

Upéicha avei Evréo Kuatiañeʼẽ heʼi Jehováre “oporombyasýva ha oporoporiahuverekóva, ipochykuaaʼỹva, oporohayhuetéva ha nopyrũiva iñeʼẽngue rehe”. Péro heʼi avei ‘ndohejaiha oinupaʼỹ rehe hembiapo vaívape’ (Éxodo 34:​6, 7). Koʼápe ojeʼéva ñanepytyvõ jaikuaave hag̃ua mbaʼépa heʼise Ñandejára réra. “Jehová” heʼise ‘Chehegui oikóta pe oikótava’. Upéicharõ Ñandejára ikatu ojapo oimeraẽ mbaʼe oñekotevẽva okumpli hag̃ua iñeʼẽ (Éxodo 3:​13-15, NM). Ha Ñandejára nokambiái. Jesús heʼivaʼekue: ‘Jehová Ñandejára niko peteĩnte’ (Marcos 12:29).

Oñemyengoviápa Evréo Kuatiañeʼẽ?

Pyʼỹi umi lívro osẽ pyahúva omyengovia umi itujavévape, térã oñekambia hentekuéra ndoleevéi rupi. Upéicharõ opytápa Griégo Kuatiañeʼẽ Evréo Kuatiañeʼẽ rekovia? Nahániri.

Jesús oipotárire upéva heʼi porã vaʼerãmoʼã upe ojehaíva hese ha hemimboʼekuéra ohaíva, opytaha Evréo Kuatiañeʼẽ rekovia. Péro haʼe ndoipotái upéva. Oho mboyve yvágape haʼe oñeʼẽ mokõi hemimboʼekuéra ndive, ‘ha oñepyrũ Moisésgui ha umi proféta ñeʼẽnguégui [Evréo Kuatiañeʼẽ], ha oikuaauka ichupekuéra opaite umi mbaʼe Ñandejára Kuatiañeʼẽme ojeʼevaʼekue hese’. Upéi Jesús ojehechauka ambue hemimboʼekuérape ha heʼi chupekuéra: ‘Pe ojehuvaʼekue chéve niko, pe haʼéva peẽme aimérõ gueteri penendive: oikovaʼerãha cherehe pe oĩva Moisés léipe, umi proféta kuatiápe ha Salmokuérape’  (Lucas 24:​27, BNP, 44). Maʼerãpa Jesús oiporúta Evréo Kuatiañeʼẽ omohuʼãvo hembiapo ko Yvy ári ndovalevéiramo umi mbaʼe oĩva ipype?

Kongregasión oñepyrũ rire, Jesús remimboʼekuéra oiporu meme Evréo Kuatiañeʼẽ ohechauka hag̃ua mbaʼéicha oñekumplíta umi profesía. Avei ohechauka hag̃ua umi mbaʼe porã oĩva Moisés léipe ha Ñandejára siervokuéra ojapovaʼekue yma. Umíva omokyreʼỹ kristianokuérape iñeʼẽrendu hag̃ua Ñandejárape (Hechos 2:​16-21; 1 Corintios 9:​9, 10; Hebreos 11:1–12:1). Upévare apóstol Pablo heʼi opa ‘Ñandejára Ñeʼẽ niko henyhẽ Ñandejára puʼakágui, ha iporã’ (2 Timoteo 3:16). * Mbaʼéichapa ñanepytyvõ Evréo Kuatiañeʼẽ koʼág̃a rupi?

Konsého ñande rekovépe g̃uarã

Jahechami umi provléma oĩva ndojechaʼeihaguére umi tapicha ambue tetãyguáre. Európape oiko peteĩ mitãkariaʼy Etiopiaygua orekóva 21 áño. Haʼe heʼi: “Rosẽséramo, ndaikatúi rosẽ oreaño. Rosẽvaʼerã ore irũnguérandi ani hag̃ua umi hénte orenupã”. Heʼi avei: “Ndaikatúi rosẽ kaʼaruete ha ipeligrosove rojupi trénpe. Umi hénte omaʼẽvo orerehe, omañánte ore pire kolór rehe”. Mbaʼépa heʼi ko mbaʼére Evréo Kuatiañeʼẽ?

Umi Israelguápe ojeʼevaʼekue: “Ani pembohasa asy mombyryguápe oikóva pende apytépe. Pehayhu chupe, peẽichagua avei niko. Peẽ mombyryguavaʼekue avei Egíptope” (Levítico 19:​33, 34). Yma Israélpe pe léi voi heʼi oñemombaʼevaʼerãha umi oúvape ambue tetãgui térã ‘mombyrygua’, ha upe léi oĩ Evréo Kuatiañeʼẽme. Ojejapóramo upépe heʼíva opáta umi provléma oĩva ndojechaʼeihaguére ambue tetãyguáre.

Noñeʼẽiramo jepe plátare, Evréo Kuatiañeʼẽme jatopa konsého jaiporu porã hag̃ua ñande pláta. Pór ehémplo Proverbios 22:7 heʼi: ‘Viru oiporukáva oguereko ipoguýpe  umi ombaʼeporúvape’. Heta tapicha oñemoñeʼẽva koʼã mbaʼére heʼi jadeve reíramo ikatuha japyta mbaʼeveʼỹre.

Avei omombeʼu porã mbaʼépa oiko umi ipláta hetasévare. Hetaiterei tapicha oiko pláta rapykuéri koʼág̃a rupi. Rréi Salomón ningo hetaiterei ipláta vaʼekue. Haʼe heʼi: “Pirapire ohayhúva oipotapotave; pe imbaʼeretáva arakaʼeve voi noimoʼãi oguereko hetamaha. Péva avei jetavy poru rei” (Eclesiastés 5:9 [5:​10, NM]). Ha añetete ningo haʼe heʼíva!

Ñane renonderã iporã

Oñepyrũ guive opa peve la Biblia oñeʼẽ peteĩ mbaʼérente: mbaʼéichapa Ñandejára ohechaukáta Haʼe añoite ñanegovernavaʼerãha ha omopotĩta héra. Upearã oiporúta irréino térã igoviérno oĩva Jesucristo poguýpe (Daniel 2:44; Apocalipsis [Revelación] 11:15).

Evréo Kuatiañeʼẽ omombeʼu mbaʼéichapa jaikóta Ñandejára goviérno poguýpe. Koʼã mbaʼe ñanemokyreʼỹ ha ñanemoag̃uive Ñandejára Jehováre. Haʼe ningo omeʼẽ ñandéve pyʼaguapy. Pór ehémplo proféta Isaías heʼivaʼekue mymba ha yvyporakuéra oiko porãtaha oñondive. Haʼe heʼi: “Aguara guasu ovecha raʼy ndive oikóta, jaguarete ha kavara raʼy ojoykére oñenóta, vaka raʼy ha león okarúta oñondive, ha mitãʼíta herekua” (Isaías 11:​6-8). Ajépa iporãitéta koʼã mbaʼe!

Ha mbaʼépa heʼi umi ohasa asývare ndoikói rupi hetãme, hasyete térã imboriahuetereívare? Evréo Kuatiañeʼẽ heʼi mbaʼéicha Jesús ogovernáta: ‘Haʼe onohẽta imboriahúvape jejopy vaígui, ha oikotevẽvape ndorekóiva mamo oho hag̃ua. Oiporiahuverekóne imboriahúvape ha chupe onohẽne jejopy vaígui’ (Salmo 72:​12, 13). Koʼã promésa ohechauka ñane renonderã iporãtaha (Hebreos 11:6).

Upévare apóstol Pablo heʼi: ‘Opa mbaʼe ojeʼevaʼekue yma Ñandejára Ñeʼẽme, ojeʼe ñanerekomboʼe hag̃ua. Ikatu hag̃ua umi mbaʼe ojeʼéva rupi jahupyty teko mbarete ha pyʼa pytuʼu ha jareko esperánsa’ (Romanos 15:4). Upéicharõ Evréo Kuatiañeʼẽ ndojepeʼaivaʼerã Ñandejára Ñeʼẽgui. Umi mbaʼe heʼíva iporã ñandéve g̃uarã. Roipotaiténingo reikuaave la Biblia añetehápe omboʼéva ha upéicha reñemoag̃uive Ijapoharére Ñandejára Jehová (Salmo 119:​111, 112).

[Nóta]

[Rrekuádro oĩva páhina 6-pe]

“ANTIGUO TESTAMENTO” TÉRÃPA EVRÉO KUATIAÑEʼẼ?

Pe ñeʼẽ “Antiguo Testamento” jatopa 2 Corintios 3:​14-pe, Biblia héravape Jesucristo Marandu Porã. Upépe ojetradusi ‘testamento’ pe ñeʼẽ griégo di·a·thḗ·kē. Péro heta Bíbliape, pór ehémplo Buenas Nuevas para el Paraguay heʼi ‘pákto’ térã kontráto ‘testamento’ rangue. Mbaʼérepa?

Peteĩ karai ojapóva diksionário hérava Edward Robinson heʼi: “Pe pákto yma guare oĩ umi lívro Moisés ohaivaʼekuépe. Upéicharõ di·a·thḗ·kē orrepresenta pe lívro oĩháme pe pákto, Moisés kuatiañeʼẽnguéra, térã pe léi”. Apóstol Pablo oñeʼẽ 2 Corintios 3:​14-pe Moisés léi rehe ha upéva peteĩ pártente oĩva Evréo Kuatiañeʼẽme.

Upéicharõ, mbaʼéichapa ñahenoivaʼerã umi 39 lívro oĩ raẽva la Bíbliape? Heʼirangue ko párte ituja ha ndovaleveimaha, Jesucristo ha hemimboʼekuéra heʼivaʼekue hese “Ñandejára Ñeʼẽ” ha ‘Kuatiañeʼẽ Marangatu’ (Mateo 21:42; Romanos 1:​2, BNP). Upévare testigos de Jehová ohenói “Antiguo Testaméntope” Evréo Kuatiañeʼẽ. Ko párte ningo ojehai ypy vaʼekue evréope ha michĩmi ambue ñeʼẽme. Ha pe “Nuevo Testaméntope” katu Griégo Kuatiañeʼẽ ojehaihaguére griégope.

[Nóta oĩva taʼanga ndive páhina 4]

Peteĩ karaípe ikatu ojekuaa huésramo, túva oporohayhúva ha amígoramo

[Nóta oĩva taʼanga ndive páhina 5]

Jesús oiporu Evréo Kuatiañeʼẽ opredika hag̃ua

[Nóta oĩva taʼanga ndive páhina 7]

Mbaʼe konsého oĩva la Bíbliape ñanepytyvõta jadesidi porã hag̃ua?