Jaipyguara ‘umi mbaʼe ipypukuvéva Ñandejára rehegua’

“[Pe] Espíritu niko oipyguara opa mbaʼe, umi mbaʼe pypukuvéva [Ñandejára] rehegua jepe.” (1 CORINTIOS 2:10.)

1. Mbaʼe mbaʼe oikuaa rirépa ovyʼaiterei jepi umi ostudia ramóva la Biblia?

 HAIMETE enterove kristiáno ñanemanduʼa mbaʼéichapa javyʼavaʼekue jaikuaa ypýrõ guare umi mbaʼe porã oĩva Ñandejára Ñeʼẽme. Ñaaprende mbaʼérepa iñimportánte Jehová réra, mbaʼérepa oheja jahasa asy, mbaʼérepa oĩ ohóva yvágape ha mbaʼépa ohaʼarõ umi tapicha ipyʼaporãvape. Oiméne jaleémava voi la Biblia, péro hetápe ojehuháicha, nahesakãivaʼekue ñandéve umi mbaʼe. Jajogua peteĩ tapicha oviahávape koʼẽ mboyve. Ñepyrũrã ndohechái mbaʼeve iñypytũgui, péro osẽvo ohóvo kuarahy ohecháma hetave mbaʼe. Ha hesakãmbaitévo katu ohechapaitéma umi mbaʼe oĩva ijerére. Upéicha avei oiko ñanderehe: jaikuaa ypýrõ guare Ñandejára Ñeʼẽ, ñañepyrũ jahecha ‘umi mbaʼe ipypukuvéva Ñandejára rehegua’ (1 Corintios 2:​8-10).

2. Mbaʼérepa opa árare javyʼáta ñaaprende aja Ñandejára Ñeʼẽ?

² Upéicharamo jepe, oĩ porãmapa ñamaña ‘sapyʼamínteramo’ umi mbaʼe Ñandejára Ñeʼẽ omboʼévare? ‘Umi mbaʼe ipypukuvéva Ñandejára  rehegua’ ojeʼe pe Ñandejára arandúre, oñeñomíramo jepe hetaitereígui, oñemyesakã kristianokuérape espíritu sánto rupive (1 Corintios 2:7). Ndaijapýrai umi mbaʼe ikatúva jaikuaa Ñandejára arandu rupive! Ipypukuetereígui, arakaʼeve ndajaikuaapamoʼãi mbaʼépa opensa ha ojapo Jehová. Upéicharamo jepe, jasegíramo jaipyguara ‘umi mbaʼe ipypukuvéva Ñandejára rehegua’, javyʼáta opa árare, javyʼahaguéicha jaikuaa ypýrõ guare la Biblia omboʼéva.

3. Mbaʼérepa tekotevẽ jaikuaa porã umi mbaʼe jagueroviáva?

³ Ha mbaʼérepa ñaaprendevaʼerã ‘umi mbaʼe ipypukuvéva’? Ñamombarete hag̃ua ñande jerovia. Upearã ndahaʼéi jaikuaantevaʼerã umi mbaʼe ñamboʼéva, avei jaikuaavaʼerã mbaʼérepa jaguerovia umi mbaʼe. Ñandejára Ñeʼẽ heʼi ñandéve jaiporu hag̃ua ñane apytuʼũ, jahechakuaa hag̃ua ñande voi “Ñandejára rembipota, [...] pe iporãva, pe haʼe oguerohorýva, pe oĩmbaitéva” (Romanos 12:​1, 2, BNP). Avei, jaikuaáramo mbaʼérepa Jehová ojerure ñandéve peteĩ mbaʼe, ñaime porãvéta jajapo hag̃uáicha. Upéicharamo, jaikuaávo ‘umi mbaʼe ipypukuvéva’ ñanemombarete ani hag̃ua jaʼa umi mbaʼe vai jajaposévape, ha ñanemomýi ‘jajapo hag̃ua opa mbaʼe porã’ (Tito 2:14).

4. Mbaʼéichapa jastudiavaʼerã la Biblia?

⁴ Upéicha avei, ñantende hag̃ua umi mbaʼe ipypukúva jastudiavaʼerã. Ndaikatúi jaikuaa peteĩ mbaʼe jalee vaivaínteramo. Jaleevaʼerã mbeguekatu porã, jahecha hag̃ua mbaʼéichapa omyesakãve pe jaikuaámava (2 Timoteo 1:13). Jahechavaʼerã mbaʼérepa ojeʼe peteĩ mbaʼe. Jastudia jave la Biblia, jajepyʼamongetavaʼerã avei jaikuaa hag̃ua mbaʼéichapa jaiporúta umi ñaaprendevaʼekue. Upéicha jadesidi porã ha ñaipytyvõta ñande rapichápe. Ha jaikuaágui la Biblia ouha Ñandejáragui, jastudiavaʼerã “opa ñeʼẽ [Jehová] jurúgui osẽva avei” (2 Timoteo 3: 16, 17; Mateo 4:4). Jaikuaa upearã ñañehaʼãvaʼerãha, péro upéva ikatu avei ñanembovyʼaiterei. Avei, ndahasyetereíri jaikuaa hag̃ua ‘umi mbaʼe ipypukuvéva Ñandejára rehegua’.

Jehová ombokatupyry iñumíldevape

5. Mávapa ikatu ontende ‘umi mbaʼe ipypukuvéva Ñandejára rehegua’?

⁵ Avave nopensaivaʼerã ndaikatumoʼãiha ontende ‘umi mbaʼe ipypukuvéva Ñandejára rehegua’ ndohoporãihaguére chupe eskuélape térã ndojepokuaáigui ostudia. Oĩrõ guare Jesús ko Yvy ape ári, mávapepa Jehová oikuaauka umi mbaʼe ojapótava? Ndahaʼéi umi iñarandu ha iñakã porãvape, oikuaauka uvei  umi ‘naiñarandúivape’, ohejavaʼekue Jesucristo omboʼe chupekuéra. Umíva haʼetevaʼekue mitã ñambojojáramo umi ijestúdio yvatéva rehe (Mateo 11:25; Hechos 4:13). Oñeʼẽvo umi mbaʼe Ñandejára opreparavaʼekuére ohayhúvape g̃uarã, apóstol Pablo heʼi umi kristianokuérape: “Koʼãva haʼe hína umi mbaʼe [Ñandejára] oikuaaukáva ñandéve Espíritu Santo rupi. Espíritu niko oipyguara opa mbaʼe, umi mbaʼe pypukuvéva [Ñandejára] rehegua jepe” (1 Corintios 2:​9, 10).

6. Mbaʼépa heʼise 1 Corintios 2:10?

⁶ Mbaʼéichapa Ñandejára espíritu ‘oipyguara opa mbaʼe, umi mbaʼe ipypukuvéva Ñandejára rehegua jepe’? Omyesakãrangue iñeʼẽ peteĩteĩme, Jehová oiporu ijespíritu oisãmbyhy hag̃ua iñorganisasión. Upéicha omyesakã isiervokuérape iñeʼẽ, ha haʼekuéra oservi chupe peteĩcha (Hechos 20:28; Efesios 4:​3-6). Ko Yvy tuichakuére, umi kongregasión ostudia pe informasión peteĩchapa, ha upéicha ndohasaʼaréi ohecha jey hag̃ua umi mbaʼe omboʼéva Ñandejára Ñeʼẽ. Upéicha, kongregasión rupive, pe espíritu sánto oipytyvõ umi tapichápe iñumílde hag̃ua, ha upéicha ontende ‘umi mbaʼe ipypukuvéva Ñandejára rehegua’ (Hechos 5:32).

Mbaʼe mbaʼépa oike ‘umi mbaʼe ipypukuvévape’?

7. Mbaʼérepa heta oĩ nontendéiva ‘umi mbaʼe ipypukuvéva Ñandejára rehegua’?

⁷ Nañapensaivaʼerã ‘umi mbaʼe ipypukuvéva’ ijetuʼutaha ñantende hag̃ua. Jaikuaa ndahetaiha oikuaáva koʼã mbaʼe. Péro upéva ndeʼiséi ndaikatumoʼãiha jahupyty Ñandejára arandu. Ojehu uvei upéva Satanás ombotavyhaguére yvyporakuérape, ha upévare ndohejái Ñandejára oipytyvõ chupekuéra iñorganisasión rupive (2 Corintios 4:​3, 4).

8. Mbaʼe ipypukúvarepa oñeʼẽ Pablo Efesios kapítulo 3-pe?

⁸ ‘Umi mbaʼe ipypukuvéva’ apytépe, heʼiháicha apóstol Pablo umi Efesoyguápe, oike heta mbaʼe Ñandejára siervokuéra oikuaa porãva. Umíva apytépe mávapa pe Ñemoñare (Descendencia) oñeprometevaʼekue, ha oĩha ojeporavovaʼekue oho hag̃ua yvágape. Apóstol Pablo heʼi Ñandejára omyesakãha ijespíritu rupive ijapóstol ha iprofetakuérape umi tapicha opa tetãmegua ohotaha avei yvágape. Umíva ojeporavo avei oĩ hag̃ua hendivekuéra ha Jesucristo ndive yvágape. Pablo imanduʼa avei oñemeʼẽhague chupe oikuaauka hag̃ua enterovépe Ñandejára rembipota, oguerekovaʼekue ñemiháme ymaite guive (Efesios 3:​5-9).

9. Mbaʼérepa tuichaiterei mbaʼe jaikuaa ‘umi mbaʼe ipypukuvéva Ñandejára rehegua’?

⁹ Pablo avei imanduʼa Ñandejára oipotaha yvágape ojekuaauka pe kongregasión rupive mbaʼeichaitépa Ñandejára iñarandu (Efesios 3:10). Umi ánhel ovyʼa ohechávo mbaʼéichapa Jehová oisãmbyhy pe kongregasión, ha upéicha oikuaa porãve Ñandejára arandu. Tuichaite mbaʼépa ñantende heta mbaʼe umi ánhel jepe oikuaaséva! (1 Pedro 1:​10-12.) Upe rire, Pablo heʼi: “Ikatu hag̃ua peikuaa porã opavave umi hese ojerioviáva ndive mbaʼeichaitépa ipy, ipuku, ipypuku ha ijyvatekue” ñande jerovia (Efesios 3:​11, 18, BNP). Jahechami mbaʼépa oike umi mbaʼe ipypukúva apytépe ha ikatúva ndajahechái gueteri.

Umi mbaʼe ipypukuvéva

10, 11. Heʼiháicha la Biblia, arakaʼépa oiko Jesúsgui pe “kuña” yvagapegua “ñemoñare”?

¹⁰ Jaikuaa niko Jesús haʼeha pe “kuña” yvagapegua “ñemoñare”, oñeñeʼẽva Génesis 3:​15-pe. Ñantende porãve hag̃ua upe mbaʼe, ikatu ñañeporandu: “Arakaʼépa oiko Jesúsgui pe Ñemoñare oñeprometevaʼekue? Oikópa upéva ou mboyve ko Yvy ape ári, onase rire yvypóraicha térãpa oñemoingove jey rire?”.

¹¹ Ñandejára heʼivaʼekue upe “kuña”, ojeʼéva Jehová organisasión yvagapeguáre, orekotaha iñemoñare ha opyrũtaha pe mbói akãre. Upéicharamo jepe, ohasa hetaiterei ára ha pe “kuña” yvagapegua ndorekói gueteri peteĩ ñemoñare ohundi hag̃ua Satanáspe ha umi mbaʼe vai ojapovaʼekue. Upévare, proféta Isaías ohenói chupe “kuña ikatuʼỹva nememby” ha “revyʼaʼỹva” (Isaías 54:​1, 5, 6). Og̃uahẽvo pe ára, Jesús onase Belénpe. Upéicharõ jepe, ojevautisa rire ae Ñandejára  heʼi hese: “Kóva haʼe che raʼy”. Upérõ Ñandejára oiporavo Jesúspe ijespíritu sánto rupive (Mateo 3:17; Juan 3:3). Koʼág̃a ojekuaáma mávapa pe kuña “ñemoñare”. Upe riréma ojeporavo avei pe espíritu rupive Jesús remimboʼekuérape. Heta tiémpo ojepyʼapy rire ndaikatúigui imemby, ko “kuña” yvagapegua ikatúma koʼág̃a osapukái vyʼágui (Isaías 54:1; Gálatas 3:29).

12, 13. Mbaʼe téystopa oĩ la Bíbliape ohechaukáva umi kristiáno ohótava yvágape haʼeha pe “tembiguái jeroviaha ha iñarandúva”?

¹² Umi mbaʼe ipypukúva apytépe ha oñemyesakãvaʼekue avei ñandéve oĩ umi 144.000, Ñandejára oiporavóva oho hag̃ua yvágape (Revelación 14:​1, 4). Ñande testigos de Jehová jaikuaa umi kristiáno ojeporavovaʼekue oho hag̃ua yvágape ha oĩva gueteri ko Yvy ape ári haʼeha pe ‘tembiguái jeroviaha ha iñarandúva’. Heʼihaguéicha Jesús, pe tembiguái ‘omongaruvaʼerã hiʼórape umi hogayguápe’ (Mateo 24:​45, BNP). Mbaʼéichapa ikatu jahechauka upéva la Biblia rupive? ¿Ndaikatúipa raʼe Jesús heʼi upéva oimeraẽ kristiánore oipytyvõva iñermanokuérape?

¹³ Ñandejára heʼivaʼekue umi Israelguápe: “Peẽ hína [che testígo] [...], ha cherembiguaikuéra. Che poiporavovaʼekue” (Isaías 43:10). Upéicharamo jepe, upe 11 de nisán áño 33-pe, Jesús heʼi Ñandejára oheja rei hague pe tetãme ha ndorekoveimaha chupekuéra hembiguáiramo. “[Ñandejára] sãmbyhy ojepeʼáta pendehegui ha oñemeʼẽta [peteĩ tetãme], omeʼẽtava hiʼa hekoitépe”, heʼi Jesús umi Israel oisãmbyhývape. Ha heʼi avei umi hénte atýpe: “Pemaʼẽke, opytáko pende róga taperéicha” (Mateo 21:43; 23:38). Upeichaite, umi Israelgua ndoikói Jehová rembiguái jeroviaha ha iñarandúvaramo (Isaías 29:​13, 14). Upévare, oporandúrõ guare Jesús upe árape mávapa pe tembiguái jeroviaha ha iñarandúva, heʼisevaʼekue mávapa pe tetã opytátava Israel rekovia Ñandejára rembiguáiramo. Pe apóstol Pedro omyesakãvaʼekue upéva ohaírõ guare umi kristiáno yvágape ohótavape: “Peẽ niko [...] peteĩ tetã imarangatúva, [Ñandejára] ojoguavaʼekue imbaʼerã” (1 Pedro 1:4; 2:9). Ko tetãgui, oñehenóiva avei ‘Israel Ñandejára mbaʼéva’, oiko Jehová rembiguái (Gálatas 6:16). Pe tetã Israel rehe ojeʼehaguéicha Jehová ‘rembiguaiha’, upéicha avei umi kristiáno ohótava yvágape oñehenói “tembiguái jeroviaha ha iñarandúva”. Tuichaite mbaʼépa pe ‘tembiguái’ omeʼẽva ñandéve ñamombarete hag̃ua ñande jerovia Jehováre!

Pe estúdio jajapóva ñaneaño ikatu ñanembovyʼaiterei

14. Mbaʼérepa jastudiáramo la Biblia, ha ndahaʼéi jaleénteva, ikatu ñanembovyʼaiterei?

¹⁴ Javyʼaiterei ñamyesakã porãvo umi mbaʼe omboʼéva la Biblia, jahechágui ñande jerovia imbareteveha. Upévare, jastudiávo la Biblia, ha ndahaʼéi jaleénteva, ikatu ñanembovyʼaiterei. Upéicharamo, jaleévo umi puvlikasión, ñañeporanduvaʼerã: “Hesakã porãvépa chéve koʼág̃a upe aikuaámava voi? Oĩvépa téysto ikatúva aiporu hesakãve hag̃ua pe artíkulo heʼíva? Oĩramo peteĩ mbaʼe nahesakãporãiva gueteri, emoĩ peteĩ kuatiápe ikatu hag̃ua reheka porãve upe rire.

15. Mbaʼeichagua estúdiopa ikatu ñanembovyʼa? Ha mbaʼe jajapórõpa ñanepytyvõta opa árare?

¹⁵ Mbaʼe mbaʼépa ikatu jajapo ñamyesakã porãve hag̃ua pe jastudiáva? Ikatu jastudia jaikuaave hag̃ua umi pacto Ñandejára ojapovaʼekue yvyporakuéra rehehápe. Ikatu avei jastudia umi profesía oñeʼẽva Jesucrístore térã jahecha umi  lívro profétiko oĩva la Bíbliape ha ñahesaʼỹijo umi versíkulo peteĩteĩ. Térã ikatu voi jahecha jey umi mbaʼe ohasavaʼekue testigos de Jehová. Upearã ikatu jaiporu pe lívro Los testigos de Jehová proclamadores del Reino de Dios, oĩramo peteĩ idióma jaikuaávape. * Iporã avei jalee jey umi “Preguntas de los lectores” osẽvaʼekue La Atalaya-pe, ikatu hag̃ua ñantende porãve heta téysto oĩva la Bíbliape. Ñañatende porã vaʼerã jahecha hag̃ua mbaʼéichapa la Biblia omyesakã umi artíkulo heʼíva. Upéicha ñandekatupyryvéta jahechakuaa hag̃ua pe iporãva ha ivaíva (Hebreos 5:14). Avei, ñaanotáramo ñande Bíbliape térã peteĩ kuatiápe umi púnto iñimportánteva, ñanepytyvõta opa árare ñandéve ha avei umi ñande rapichápe.

Peipytyvõ pene famíliape ovyʼa hag̃ua ostudiávo la Biblia

16. Mbaʼéichapa tuvakuéra oipytyvõkuaa ifamíliape ovyʼa hag̃ua ostudiávo la Biblia?

¹⁶ Heta mbaʼe ikatu ojapo tuvakuéra omokyreʼỹ hag̃ua ifamíliape ohayhu hag̃ua Ñandejárape. Haʼekuéra nopensaivaʼerã umi mitã ndaikatumoʼãiha ontende umi mbaʼe ipypukuvéva. Ikatu peje chupekuéra oheka hag̃ua informasión peteĩ témare, ha upe rire pestudia jave pene família ndive peporandukuaa mbaʼépa oaprende hikuái. Ko estúdio jave iporã avei peñensaja hendivekuéra odefendekuaa hag̃ua umi mbaʼe ogueroviáva, ha ohechauka hag̃ua añeteha umi mbaʼe oaprendevaʼekue. Ikatu avei peiporu pe folléto Veamos “la buena tierra” *, pemboʼe hag̃ua pene famíliape umi lugár la Biblia imanduʼaha ha hesakã porãve hag̃ua chupekuéra olee jave Ñandejára Ñeʼẽ.

17. Mbaʼérepa ñañatendevaʼerã pe tiémpo jaiporúvare jaheka hag̃ua informasión Bibliapegua?

¹⁷ Jaikuaa porã niko jajapóvo entéro umi mbaʼe ñande jerovia imbareteveha. Upéicharamo jepe, naiporãi oipeʼa ñandehegui pe tiémpo ñaikotevẽva jajeprepara hag̃ua rreunionrã, jaikuaágui upéva rupi Jehová ñanemboʼeha pe “tembiguái jeroviaha ha iñarandúva” rupive. Péro iporã avei ñanemanduʼa jastudia pypukuvéramo ñakomenta porãvéta rreunionhápe. Umíva apytépe oĩ pe Estudio de Libro de Congregación, térã umi púnto iñimportantevéva ojeleéva la Bíbliagui káda semána Eskuéla del Ministério Teokrátikope.

18. Mbaʼérepa iporã ñañehaʼã jaikuaave ‘umi mbaʼe ipypukuvéva Ñandejára rehegua’?

¹⁸ Upeichaite, jastudia pypukuvéramo la Biblia, ikatu ñanemoag̃uive Jehováre. La Biblia voi heʼi ñandéve: “Arandu niko oporopytyvõ pirapiréicha avei, [péro] arandu tuichave [...] omoingove rupi herekohápe” (Eclesiastés 7:12). Upévare iporã ñañehaʼã ñantende porãve umi mbaʼe Ñandejára ñanemboʼéva. Entéro umi oñehaʼãvape oikuaave umi mbaʼe ipypukuvéva, la Biblia heʼi: “Rehechakuaáne upépe mbaʼépa heʼise hína pe [Ñandejára] ñemombaʼe, ha reikuaáne chupe” (Proverbios 2:​4, 5).

[Nóta]

Ikatúpa ñamyesakã?

• Mbaʼépa hína ‘umi mbaʼe ipypukuvéva Ñandejára rehegua’?

• Mbaʼérepa ndajaikuaapamoʼãi arakaʼeve umi mbaʼe ipypukuvéva?

• Mbaʼérepa enterove kristiáno ikatu oikuaa ‘umi mbaʼe ipypukuvéva Ñandejára rehegua’?

• Mbaʼépa ikatu jajapo ñanepytyvõve hag̃ua ‘umi mbaʼe ipypukuvéva Ñandejára rehegua’?

[Porandu ñahesaʼỹijóva]

[Nóta oĩva taʼanga ndive páhina 32]

Arakaʼépa oiko Jesúsgui pe Ñemoñare oñeprometevaʼekue?