Jajesarekókena ñane renonderãre

“ANI pejepyʼapýtei koʼẽrõ g̃uarã rehe” heʼivaʼekue Jesús oñemoñeʼẽrõ guare hemimboʼekuérape peteĩ sérro ári guive, táva Galiléape. Heʼiháicha pe Biblia Jesucristo Marandu Porã Jesús heʼi avei: “Koʼẽrõko oĩta voi hína ambue jepyʼapy” (Mateo 6:34).

Mbaʼépa heʼise ndéve g̃uarã “koʼẽrõko oĩta voi hína ambue jepyʼapy”? Heʼisépa jaikovaʼerãha koʼág̃a g̃uarãnte, ha natekotevẽiha jajepyʼapy ñane renonderãre? Opensaparakaʼe péicha Jesús ha hemimboʼekuéra?

“Ani pejepyʼapýtei”

Eleemína nde Bíbliape Mateo 6:​25-32. Upépe Jesús heʼi: ‘Ani pejepyʼapy pende rekovére ha peje mbaʼépa jakarúta, térã pende retére ha peje mbaʼépa ñamondéta. Pemaʼẽna umi guyra ovevéva rehe noñemitỹi ha nomonoʼõi, ha nombyatýi ikóga; upéicharõ jepe, pende Ru yvágape oĩva omongaru ichupekuéra. Mávapa peẽkuérava ojepyʼapýramo ikatu oiko pukuve michĩmínte jepe? Ha maʼerãtepa pejepyʼapy aóre. Pemaʼẽ mbaʼéichapa okakuaa umi yvoty ñumegua, nombaʼapói ha noipovãi. Mbaʼe rehépa aipóramo pejepyʼapyetéta ha peje mbaʼépa jaʼúta, térã mbaʼépa ñamboyʼúta, térã katu mbaʼépa ñamondéta. Umi ogueroviaʼỹvanteko ojepyʼapýva koʼã mbaʼe rehe. Pende Ru yvagapeguáko oikuaa peikotevẽha opa koʼã mbaʼe’.

Jesús omohuʼãvo umi mbaʼe heʼíva omeʼẽ mokõi konsého. Peteĩha: ‘Peheka raẽ Ñandejára rréino ha pe teko marangatu haʼe oipotáva, ha upéi oñemeʼẽvaʼerã avei peẽme opa koʼã mbaʼe’. Mokõiha katu: “Ani pejepyʼapýtei koʼẽrõ g̃uarã rehe, koʼẽrõko oĩta voi hína ambue jepyʼapy. Ha iporãmante ko jehasa ko arapegua” (Mateo 6:​33, BNP, 34, JMP).

Pende Ru yvagapegua oikuaa porã mbaʼépa peikotevẽ

Jesús remimboʼekuéra apytépe oĩvaʼekue heta ombaʼapóva kokuépe. Ndépa ere haʼe heʼinehague chupekuéra ani hag̃ua ‘oñotỹ, omonoʼõ térã ombyaty ikóga’? Térã ani hag̃ua ‘ombaʼapo ha oipovã’ ojapo hag̃ua ao oikotevẽva? (Proverbios 21:5; 24:​30-34; Eclesiastés 11:4.) Nahániri. Haʼekuéra nombaʼapóiramo ningo ‘oñemonoʼõ jave ndojuhumoʼãi mbaʼeve’, ha ndorekomoʼãi hikuái hoʼu térã omondevaʼerã (Proverbios 20:4).

Heʼíparaʼe Jesús hemimboʼekuérape ani hag̃ua ojepyʼapy mbaʼevete asýre? Ndaikatumoʼãiningo ojapo hikuái upéva. Jesús voi ojepyʼapyetereivaʼekue pe pyhare ohótarõ guare préso (Lucas 22:24).

Jesús ningo ohechaukánte mbaʼépa oikóta jajepyʼapyetereíramo: ndaikatumoʼãi ñasolusiona mbaʼeveichagua provléma. Ha ndajaikoarevemoʼãi upe haguére. Jesús heʼi ndaikatumoʼãiha  ‘jaiko pukuve michĩmínte jepe’ (Mateo 6:​27, JMP). Upéva rangue katu pyaʼeve ñamanóta jaikóramo jajepyʼapy mante.

Ko konsého ningo iporãiterei. Heta vése ndoikói umi mbaʼe ñandepyʼapyetéva. Pe Gran Bretañapegua mburuvicha Winston Churchill ohechakuaa ko mbaʼe Segunda Guerra Mundial aja. Imanduʼávo umi mbaʼe ohasavaʼekuére, haʼe ohai: “Apensávo mbaʼéichapa rojepyʼapyvaʼekue chemanduʼa peteĩ karai itujávare, omano mboyvemi heʼivaʼekue hetaiterei iprovlemahague. Péro añetehápe heta mbaʼe oipyʼapýva chupe arakaʼeve ndoikói hese”. Upévare iporã ñambohovái umi provléma káda diagua, ha ani jajepyʼapyeterei umi provléma oútavare.

‘Peheka raẽ Ñandejára rréino’

Ndahaʼéi Jesús oipotánteva hemimboʼekuéra hesãive, ha upévare ndoipotái ojepyʼapy hikuái. Haʼe ningo oikuaa jajepyʼapyetereíramo umi mbaʼe ñaikotevẽvare, ha jaikóramo pláta ha vyʼarã rapykuéri, ñamboyketaha umi mbaʼe iñimportantevéva (Filipenses 1:10). Ha ikatu piko jaʼe ivaiha ñañehaʼã jahupyty ñaikotevẽva? Nahániri, péro oĩ peteĩ mbaʼe iñimportantevéva upévagui. Upéva hína jaikuaa Ñandejárape ha jaadora chupe. Upévare Jesús heʼi porã vaʼekue: ‘Peheka raẽ Ñandejára rréino ha pe teko marangatu haʼe oipotáva’ (Mateo 6:​33, BNP).

Jesús tiémpope heta tapicha oikovaʼekue pláta rapykuéri. Haʼekuéra omombaʼeterei pláta ha umi mbaʼerepy. Péro Jesús omokyreʼỹ chupekuéra ani hag̃ua opensa péicha. Haʼekuéra ningo Ñandejára puévlo, ha upévare okyhyjevaʼerã Jehovágui ha ‘ojapo hembipota’ (Eclesiastés 12:13).

Umi ohendúva Jesúspe ikatu omboyke Ñandejárape ‘ojepyʼapýramo umi mbaʼe Yvy arigua rehe, ha mbaʼeta rerekose ombotavyetéramo chupekuéra’ (Mateo 13:22). Apóstol Pablo heʼivaʼekue: ‘Umi imbaʼeretaséva hoʼa jepyʼaraʼãme ñuhãmeguáicha, ha ojecha heta mbaʼepota vaípe, oitýva chupekuéra pyʼatarovápe ha ñehundípe’ (1 Timoteo 6:9). Oipytyvõ hag̃ua hemimboʼekuérape ani hag̃ua hoʼa ko ‘ñuhãme’, Jesús omomanduʼa chupekuéra Jehová oikuaaha voi mbaʼépa oikotevẽ hikuái. Ñandejára oñangarekóta hesekuéra  oñangarekoháicha umi “guyra ovevéva rehe” (Mateo 6:​26, 32). Tekotevẽramo jepe oñehaʼã hikuái ohupyty hemikotevẽ káda diagua, naiporãmoʼãi ojepyʼapyeterei umívare. Ojeroviavaʼerã Jehová oñangarekotaha hesekuéra (Filipenses 4:​6, 7).

Jesús heʼívo “koʼẽrõko oĩta voi hína ambue jepyʼapy” ohechaukánte naiporãiha jajepyʼapyeterei koʼẽrõ g̃uarãre. Jajapóramo upéva ningo ñambojoʼavéta umi provléma jarekómava voi koʼág̃a.

“Tou ne rréino”

Naiporãiningo jajepyʼapyeterei koʼẽrõ g̃uarãre, péro upéva ndeʼiséi natekotevẽiha ni michĩmi jajepyʼapy ñane renonderãre. Jesús arakaʼeve ndeʼíri hemimboʼekuérape ojapo hag̃ua upéva. Heʼi guei chupekuéra tojesareko meme henonderãre. Iporãta ojeruréramo Jehovápe umi mbaʼe oikotevẽva upe árape, pór ehémplo hembiʼurã. Péro upéva mboyve ojerurevaʼerã hikuái tou Ñandejára rréino ha tojejapo Hembipota Yvy ape ári yvagapeguáicha (Mateo 6:​9-11).

Nahiʼãi jaiko umi hénte Noé tiémpope oikohaguéicha. Upérõ ‘umi hénte oikovaʼekue okaru ha hoʼuha rehe, omenda ha omomenda itajyrakuéra’. Upévare ‘ndohechakuaái hikuái mbaʼeve’. Mbaʼépa oiko hesekuéra? ‘Og̃uahẽ pe dilúvio ha ohundipa chupekuéra.’ (Mateo 24:​36-42, BNP.) Apóstol Pedro oñeʼẽvaʼekue pe dilúviore ohechauka hag̃ua tekotevẽha jajesareko ñane renonderãre. ‘Opa mbaʼe opavaʼerã péicha, upévare marangatuetépe ha kyhyjepópe peẽ peikovaʼerã. Pehaʼarõ ha peipotákena pende pyʼaite guive tog̃uahẽ Ñandejára ára.’ (2 Pedro 3:​5-7, 11, 12, BNP.)

Pembyaty mbaʼeta yvágape

Upéicharõ ‘ñahaʼarõ’ memékena Jehová ára. Jahechavaʼerã mbaʼépepa jaiporu ñane tiémpo, pláta, ñane mbaretekue ha ñande katupyrykue. Naiporãmoʼãi jaiko meme pláta rapykuéri, tahaʼe ñaikotevẽgui térã jaipotasevéguinte heta mbaʼe. Jajapóramo upéva ndaikatumoʼãi jaiko Ñandejára oipotaháicha. Ikatu ñapensa iporãvetaha ñañehaʼãramo jaiko porã koʼág̃a. Péro umi mbaʼe jahupytýva ndopytaʼaremoʼãi. Upévare iporãvéta jajapo Jesús heʼivaʼekue ha ‘ñambyaty mbaʼeta yvágape’ Yvy ape ári rangue (Mateo 6:​19, 20).

Omyesakã porãve hag̃ua ko mbaʼe Jesús omombeʼuvaʼekue peteĩ káso. Heʼi oĩhague peteĩ karai tuicha ojepreparáva tenonderãme g̃uarã péro hesaráiva Ñandejáragui. Ijyvy ningo iporãiterei ha upévare ko karai ojapose galpón tuichavéva oñongatu hag̃ua omonoʼõva. Upéicha ikatúta ohasa porã, okaru, omokõ ha ndojepyʼapýi mbaʼevére. Mbaʼérepa tuichaite ojavy? Haʼe ningo omano ha ndaikatuvéima ojapo opensavaʼekue. Ha ivaiveha katu, hesarái Ñandejáragui. Jesús heʼi omohuʼã hag̃ua: ‘Péicha ojehu pe yvypóra omonoʼõvape mbaʼereta ijupe g̃uarã año, ha imboriahúva Ñandejára renondépe’ (Lucas 12:​15-21; Proverbios 19:21).

Mbaʼépa ikatu jajapo?

Aníkena jajavy ojavyhaguéicha pe kuimbaʼe Jesús oñeʼẽhague. Ñañehaʼãkena jaikuaa mbaʼépa ojapóta Ñandejára koʼẽrõite, ha jaiko Haʼe oipotaháicha. Ñandejára nomokañýi yvyporakuéragui umi mbaʼe ojapótava. Proféta Amós heʼivaʼekue: ‘Ñandejára ndojapóiva mbaʼeve, heʼiʼỹre umi profetakuérape’ (Amós 3:7). La Biblia rupive ikatu jaikuaa umi mbaʼe Jehová heʼivaʼekue iprofetakuérape (2 Timoteo 3:​16, 17).

La Biblia omombeʼu peteĩ mbaʼe tuichaitereíva oikótava koʼẽrõite ha ohupytýtava ko Yvy tuichakue. Jesús heʼi: “Upérõ, tuicha ojehasa asýta, ojehasaʼỹhaguéicha ko Yvy ári iñepyrũmby guive” (Mateo 24:21). Ndaipóri yvypóra ikatúva ojoko ko mbaʼe. Ha Ñandejára rembiguaikuéra ndojokoséi voi ko oikótava. Mbaʼérepa? Ko jehasa asy og̃uahẽ rire ojepeʼapaitéta ko Yvy ape árigui opaichagua mbaʼe vai. Upéi oĩta peteĩ ‘yvága ipyahúva ha peteĩ yvy ipyahúva’, koʼãva hína peteĩ goviérno pyahu ha tapicha heko porãva oikótava ko Yvy ape ári. Upe múndo pyahúpe Ñandejára  ‘omokãta ñande resay, ndaiporimoʼãvéima ñemano, tasẽ, jaheʼo ha tembimbyasy’ (Apocalipsis [Revelación] 21:​1-4).

Upévare, naiporãipa ndéve g̃uarã rehechami mbaʼépa heʼi la Biblia koʼã mbaʼére? Reikotevẽpa nepytyvõva upearã? Ikatu rejerure testigos de Jehovápe tanepytyvõ, térã rehai umi ojapóvape ko rrevísta. Ha eñehaʼãkena ani reiko koʼág̃a g̃uarãnte, eñehaʼã guei ehupyty umi mbaʼe porãita og̃uahẽtavahína.