Jehová ñeʼẽ arakaʼeve ndopytareíri

“Ñandejára omeʼẽ [...] opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe.” (JOSUÉ 23:14.)

1. Mávapa rakaʼe Josué, ha mbaʼépa ojapo omano mboyvemi?

 JOSUÉ haʼevaʼekue peteĩ mburuvicha ipyʼaguasu ha ikatupyrýva, peteĩ kuimbaʼe ijerovia mbaretéva oipytyvõva Moiséspe. Jehová oiporavo chupe omoakã hag̃ua Israélpe ohasátarõ guare hikuái pe desiértore, og̃uahẽ hag̃ua pe yvy iporãitévape. Omano mboyve, ko kuimbaʼe oñemoñeʼẽ umi ansianokuérape oĩva Israélpe. Katuete umi chupe ohenduvaʼekue omombareteve ijerovia, ha ñanderehe ikatu avei ojapo upéicha.

2, 3. Mbaʼéichapa oĩvaʼekue Israel Josué oñeʼẽrõ guare ansianokuérape, ha mbaʼépa heʼi chupekuéra?

² Ñapensami pe oikovaʼekuére. La Biblia heʼi: “Ñandejára oipytyvõ Israelguápe ha upéicha rupi opytuʼu puku hikuái ñorairõgui tetãnguéra ndive oĩva umi ijere rupi. Josué katu itujáma. Haʼe ombyaty maymáva Israelguápe:  karaikuéra, myakãharakuéra ha umi oñorairõva ruvichakuérape. Heʼi chupekuéra kóicha: ‘Che niko chetujáma’” (Josué 23:​1, 2).

³ Josué orekóma haimete 110 áño ha hetaiterei mbaʼéma ohasa Ñandejára puévlo ndive. Ohecha umi milágro ijojahaʼỹva ojapovaʼekue Jehová ha mbaʼéichapa okumpli umi mbaʼe heʼivaʼekue. Upévare heʼi porã: “Peẽ katu peikuaa porã pende pyʼaite guive Ñandejára omeʼẽhague peẽme opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe” (Josué 23:14).

4. Mbaʼe promésapa ojapo Jehová umi Israelguápe?

⁴ Mbaʼe promésa Jehová ojapovaʼekuépa oñekumpli Josué oikórõ guare? Jahechamíta koʼág̃a mbohapy. Primero, Ñandejára heʼivaʼekue omosãsotaha Israelguápe Egipto poguýgui. Segundo, oñangarekotaha hesekuéra, ha tercero, oñatende ha omeʼẽtaha chupekuéra hemikotevẽ. Jehová opromete avei koʼã mbaʼe isiervokuéra koʼag̃aguápe. Ha ñande jahecháma oñekumpliha umi mbaʼe Jehová heʼivaʼekue. Péro jahecha mboyve mbaʼépa ojapo Jehová isiervokuéra koʼag̃aguáre, jahechamíta mbaʼépa ojapo Israel rehe Josué oikórõ guare.

Jehová omosãso isiervokuérape

5, 6. Mbaʼéichapa Jehová oguenohẽ Israelguápe Egipto poguýgui, ha mbaʼépa ohechauka upéva?

⁵ Umi Israelgua oiko asýrõ guare Egíptope, oñemboʼe Ñandejárape ha haʼe ohendu chupekuéra (Éxodo 2:​23-25). Oĩrõ guare Moisés peteĩ ñana máta hendýva renondépe, Jehová heʼi chupe: “Péina aguejy aipeʼa hag̃ua Egiptoygua poguýgui Israelguápe, upégui araha hag̃ua chupekuéra peteĩ yvýpe tuicha ha iporãva. Ýicha osyry kamby ha eíra upéva upe yvýpe” (Éxodo 3:8). Ovyʼaiteneparakaʼe Moisés ohechávo Jehová okumpliha heʼivaʼekue! Ndopoiséirõ guare faraón umi Israelguápe, Moisés heʼi chupe Ñandejára puʼaka rupive pe rrío Nílogui oikopataha tuguy. Ha Jehová heʼivaʼekue oñekumpli. Pe Nílogui oiko tuguy, ha upévare ndaikatuvéi hoyʼu hikuái ha umi pirakuéra katu omanomba (Éxodo 7:​14-21). Ipyʼahatãmaramo faraón, Jehová omondo jey chupe nueve plága, péro heʼi raẽ chupe mbaʼépa ojapóta (Éxodo, kapítulo 8 guive 12 peve). Pe diez plága oúvo katu omanombaite umi taʼýra ypykue oĩva Egíptope, ha upe rire faraón oheja osẽ umi Israelguápe (Éxodo 12:​29-32).

⁶ Osẽ rire hikuái upégui, Jehová oiporavo Israélpe imbaʼerã. Upe oikovaʼekue omombaʼeguasu avei Jehová réra ha ohechauka katuete okumpliha umi mbaʼe heʼivaʼekue. Ohechauka avei ndaiporiha peteĩ ñandejára haʼeichagua. Jaleévo Jehová oguenohẽhague umi Israelguápe omombarete ñande jerovia, ha koʼýte oiméne oipytyvõraʼe chupekuéra. Josué ohechakuaa Jehová ‘añonteha upe Ijyvatevéva ko Yvy tuichakue’ (Salmo 83:18).

Jehová oñangareko isiervokuérare

7. Mbaʼéichapa Jehová oñangareko Israelguáre faraón ehérsitogui?

⁷ Mbaʼépa ikatu jaʼe pe segunda promésare, Jehová oñangarekotaha isiervokuérare? Upéva opromete avei oñeguenohẽtarõ guare Israelguápe Egíptogui ha omeʼẽ chupekuéra pe yvy iporãitéva. Ñanemanduʼavaʼerã faraón ipochyetereígui osẽhague Israel rapykuéri. Ogueraha hendive peteĩ ehérsito tuichaitereíva, hetaiterei kárro reheve. Oñemombaʼeguasu rupi oiméne ojeroviaitereirakaʼe ijehe, ha koʼýte oimoʼãgui umi Israelgua ndaikatuiha okañy opytágui hikuái pe már ha umi montáña paʼũme. Péro Ñandejára oñangareko isiervokuérare. Upearã omoĩ umi mokõi kampaménto paʼũme peteĩ arai ojokóva umi Egiptoyguápe. Umi Egiptoygua oĩha gotyo iñypytũ, ha umi Israelgua oĩha gotyo katu hesakã. Upémaramo Moisés ohupi pe yvyra orekovaʼekue ipópe ha pe már Rojo oñembojaʼo. Upéva onohẽ umi Israelguápe jejopy vaígui, péro ojukapaite umi Egiptoyguápe. Jehová ohundi faraón ehérsitope, ha upéicha ndohejái ojehu mbaʼeve isiervokuérape (Éxodo 14:​19-28).

8. Mbaʼéichapa oñangareko Jehová umi Israelguáre a) oĩrõ guare pe desiértope ha b) oikérõ guare hikuái pe Yvy oñeprometevaʼekuépe?

 ⁸ Ohasa rire pe már Rojo, umi Israelgua oguata rei peteĩ “yvy ojeikoʼỹha rupi, tuichaitéva ha oporomongyhyjéva, oĩhaguépe mbói ha alakrán. Pe yvýpe ndaiporihápe y” (Deuteronomio 8:15). Umi áño oiko aja hikuái pe desiértore, Jehová oñangareko hesekuéra. Ha mbaʼépa oiko oikérõ guare hikuái pe Yvy oñeprometevaʼekuépe? Oñemoĩramo jepe hesekuéra umi ehérsito Canaangua, Jehová heʼi Josuépe: “Pehasa Jordán ysyry mboypýri upe yvy ameʼẽvape peẽme. Reikove aja, avave ndaipuʼakamoʼãi nderehe. Aĩta nendive Moisés ndive aĩhaguéicha. Opa árape aĩta nendive, ndorohejamoʼãi tyreʼỹ” (Josué 1:​2, 5). Ko mbaʼe heʼivaʼekue Jehová oñekumplipaite avei. Seis áño haguépe, Josué ipuʼaka 31 rréi rehe ha haimete ojagarrapa pe yvy oñeprometevaʼekue (Josué 12:​7-24). Jehová noñangarekóirire hesekuéra, ndojejapoivaʼerãmoʼã upéva.

Jehová oñatende ha omeʼẽ isiervokuérape hemikotevẽ

9, 10. Mbaʼéichapa omongaru ha oñatende Jehová isiervokuérare oĩrõ guare hikuái desiértope?

⁹ Jahechami koʼág̃a pe tercera promésa: Jehová oñatende ha omeʼẽtaha isiervokuérape hemikotevẽ. Osẽ rire hikuái Egíptogui, Ñandejára opromete chupekuéra: “Amondóta peẽme pán yvágagui. Peteĩteĩ tosẽ tombyaty ára koʼẽre hembiʼu upe árape g̃uarã”. Heʼihaguéicha, Ñandejára omeʼẽ chupekuéra ‘pán yvagapegua’. “Israelgua ohechávo upéva heʼijoa ojupe: ‘Mbaʼe piko kóva?’.” Upéva haʼevaʼekue pe maná, upe pán Jehová oprometevaʼekue chupekuéra (Éxodo 16:​4, 13-15).

¹⁰ Umi cuarenta áño oĩ aja hikuái desiértope, Jehová omeʼẽ chupekuéra y ha hembiʼurã. Oñangareko avei ani hag̃ua ijao oñembyai ha ipy rurupa hikuái (Deuteronomio 8:​3, 4). Josué ohechapaite umi mbaʼe. Upéicha Jehová omosasõ, oñangareko ha omongaru isiervokuérape, oprometehaguéicha chupekuéra.

Jehová omosãso koʼág̃a isiervokuérape

11. Mbaʼépa oiko Brooklynpe 1914-pe, ha mbaʼe árapa og̃uahẽ upérõ?

¹¹ Ha mbaʼépa ikatu jaʼe koʼág̃a? Pe viernes 2 de octubre de 1914 pyhareve, Charles Russell, omoakãva upérõ umi Estudiantes de la Bíbliape, oike pe koty ojekaruhápe, oĩva Betélpe (Brooklyn, Nueva York) ha opukavývo heʼi: “Maitei enterovépe g̃uarã!”. Ha oguapy mboyve, kyreʼỹme heʼi: “Umi tetãnguéra ára opáma; umi rréi oisãmbyhýva ára ohasáma”. Upérõ og̃uahẽ jey pe ára Jehová ojapo hag̃ua heta mbaʼe isiervokuéra rehehápe. Ha upeichaite ojapo.

12. Mbaʼépa ojapo Jehová 1919-pe, ha mbaʼépa oiko upéva rupi?

 ¹² Cinco áño haguépe, Jehová oguenohẽ isiervokuérape umi rrelihión japu poguýgui, oñehenóiva avei Babilonia Guasu (Revelación 18:2). Ndahetáiramo jepe ñande apytépe ohechavaʼekue upéva, jahechakuaa umi mbaʼe porã oguerúvare. Upe guive oñemombaʼeguasu jey Jehovápe hekopete ha haʼe voi omoĩ oñondive umi chupe oadorasévape. Upéicha heʼimavaʼekue pe proféta Isaías: ‘Ojehúta pe ára pahápe: Pe montáña oĩháme Ñandejára Róga, montañakuéra ruʼãme opyta hatãta ha opaite montáñagui ijyvatevéta. Opa tetã hese oñembyatýta.’ (Isaías 2:2.)

13. Mboy testigo de Jehovámapa oĩve nde reñepyrũ ypy guive restudia la Biblia?

¹³ Ko profesía omeʼẽvaʼekue Isaías oñekumpli hendaitépe. Pe áño 1919-pe, umi kristiáno ohótava yvágape oñepyrũ opredika pyʼaguasúpe, ha upéicha oñemombaʼeguasuve Ñandejára añeteguápe. Pe áño treinta rupi ojehechakuaa oñepyrũmaha oñembyaty umi “ambue ovechakuérape” (Juan 10:​16, BNP). Ñepyrũrã ndahetaguasúi, upéi hetavéma ha koʼág̃a katu oĩma millónes oadoráva Ñandejárape. Peteĩ visión apóstol Juan ohechavaʼekuépe ojekuaa “peteĩ aty guasu, avave ikatuʼỹ vaʼerã oipapa, opa tetã, ha tetãygua, ha trívu, ha ñeʼẽ rehegua” (Apocalipsis [Revelación] 7:​9, BNP). Rehechápa nde mbaʼéichapa oñembohetave ohóvo pe aty? Mboy testigo de Jehovápa oĩvaʼekue nde reikuaa ypýrõ guare Ñandejára Ñeʼẽ? Koʼág̃a ohasáma 6.700.000. Oguenohẽrõ guare Jehová isiervokuérape Babilonia Guasu poguýgui, hetaiterei ñande rapicha oñepyrũ oike iñorganisasiónpe jahechaháicha koʼág̃a.

14. Mbaʼépa ojapóta gueteri Jehová isiervokuéra rehehápe?

¹⁴ Oĩ gueteri peteĩ mbaʼeguasu Ñandejára ojapótava ha ojehechátava ko Yvy tuichakue. Jehová oiporúta ipuʼaka ohundipaite hag̃ua umi chupe ndohayhúivape. Upéicha omosãsóta isiervokuérape ikatu hag̃uáicha oike hikuái peteĩ múndo ipotĩvape. Ñapensami mbaʼeichaitépa javyʼáta jahechávo opaha umi mbaʼe vai ha oñepyrũ pe ára iporãvétava enterovégui. Iporãitéta piko! (Revelación 21: 1-4.)

Jehová oñangareko avei koʼág̃a isiervokuérare

15. Mbaʼérepa ñaikotevẽ avei koʼág̃a Jehová oñangareko ñanderehe?

¹⁵ Jahechahaguéicha, Josué tiémpope umi Israelgua oikotevẽvaʼekue Jehová oñangareko hesekuéra. Ñaikotevẽpa avei Jehová oñangareko ñanderehe koʼág̃a rupi? Katuete. Jesús heʼimavaʼekue hemimboʼekuérape: “Upérõ penemeʼẽvaʼerã hikuái pehasa asy hag̃ua ha pejejukavaʼerã ha opavave ndaijaʼeivaʼerã penderehe che réra rehe” (Mateo 24:​9, BNP). Heta áñorema, heta tetã rupi ojepersegi ha oñembohasa asy testigos de Jehovápe. Péro Jehová ndohejái isiervokuérape (Romanos 8:31). Ñandejára Ñeʼẽ ohechauka ñandéve, tahaʼe haʼéva ojejapóva ñanderehe, ndaiporimoʼãi  ñande jokóva japredika ha ñaipytyvõ hag̃ua ñande rapichápe (Isaías 54:17).

16. Mbaʼéichapa jahecháma Jehová oñangarekoha isiervokuérare?

¹⁶ Ndaijaʼéiramo jepe ko múndo Jehová siervokuérare, ñanderetave koʼág̃a opa henda rupi. Testigos de Jehová opredikáma 236 tetãme, ha upéva ohechauka Jehová oñangarekohague ñanderehe umi ñanehundisévagui. Ñanemanduʼápa umi polítiko térã rrelihióso réra otrata vaivaʼekue Ñandejára siervokuérape? Mbaʼépa oiko chuguikuéra? Moõpa oĩ koʼág̃a hikuái? Enterove nungáma omanomba, umíva apytépe oĩ faraón, oikovaʼekue Moisés ha Josué tiémpope. Ha umi Ñandejára siervokuéra omanomavaʼekue? Koʼãva oĩ Jehová memóriape, ikatuʼỹhápe avave oipeʼa. Ndaipóri heʼivaʼerã Jehová noñangarekoihague isiervokuérare.

Jehová oñatende ha omeʼẽ avei hemikotevẽ koʼág̃a isiervokuérape

17. Mbaʼépa Jehová heʼi omeʼẽtaha omombarete hag̃ua ñande jerovia?

¹⁷ Jehová omongaruhaguéicha isiervokuérape oĩrõ guare desiértope, koʼág̃a avei omeʼẽ ñandéve heta mbaʼe omombaretéva ñande jerovia pe ‘tembiguái jeroviaha ha iñarandúva’ rupive (Mateo 24:45). Oikuaauka ñandéve umi mbaʼe oñeñomivaʼekue hetaiterei árare. Upéicha oñekumpli pe ánhel heʼivaʼekue Daniélpe: “Eñongatu koʼã mbaʼe ñemiháme, ha ejokua hatã pe kuatia ñeʼẽ og̃uahẽ meve upe ára paha. Heta oĩ oikótava águio pégotyo arandu rekávo [ha hetáta oikuaáva]” (Daniel 12:4).

18. Mbaʼérepa koʼág̃a hetave mbaʼe ojekuaa Ñandejáragui?

¹⁸ Jaikoñaína pe ára pahápe, ha ojeʼehaguéicha, heta mbaʼe Ñandejára omyesakã koʼág̃a. Pe espíritu sánto rupive, opaichagua tapicha ohayhúva pe iporãva ikatu oikuaa Ñandejárape ha umi mbaʼe haʼe ojapótava. La Biblia hína pe lívro ojekuaavéva ko múndope. Ha oĩ avei heta puvlikasión ikatúva ñanepytyvõ jaikuaa porã hag̃ua mbaʼépa ñanemboʼe. Ikatu jahecha pe lívro hérava Mbaʼépa Añetehápe Omboʼe la Biblia? * Oĩ kapítulo hérava “Mbaʼépa pe añetegua jaikuaavaʼerã Ñandejáragui?”, “Moõpa oĩ umi omanovaʼekue?”, “Mbaʼépa pe Ñandejára Rréino?” ha “Mbaʼérepa oheja Ñandejára oĩ pe jehasa asy?”. Ymaite guivéma yvypóra oñeporandu koʼã mbaʼe, ha péina koʼág̃a ikatúma jaikuaa umíva. Jepe heta tiémporema ndojekuaái umi mbaʼe, ha umi heʼíva ijehe kristianoha nomombeʼúi pe añetegua, Ñandejára Ñeʼẽ imbareteve ha koʼág̃a oipytyvõ umi Jehovápe oservisévape.

19. Mbaʼe promésapa nde rehecháma oñekumpliha, ha mbaʼépa nemboʼe upéva?

 ¹⁹ Umi mbaʼe jahasavaʼekuére, ñande avei ikatu jaʼe Josué heʼihaguéicha: “Ñandejára omeʼẽ [...] opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe” (Josué 23:14). Katuete jaʼekuaa Jehová omosãso, oñangareko ha omeʼẽha hemikotevẽ isiervokuérape. Reikuaápa nde peteĩ promésa oñekumpliʼỹvaʼekue hiʼárape? Ndereikuaaichéne. Ñandejára Ñeʼẽ ndojavýi, upévare jajeroviakuaa hese.

20. Mbaʼépa ñahaʼarõkuaa koʼág̃a?

²⁰ Ha mbaʼépa ñahaʼarõ koʼág̃a? Haimete enterovépe Jehová heʼi ikatutaha oikove peteĩ Yvy iporãitereívape. Ha peteĩ aty michĩvape katu omeʼẽta ogoverna hag̃ua Jesucristo ndive yvágape. Jahasa porã térã jahasa vaíramo jepe, ikatu jajepytaso mbarete Ñandejára ykére Josué ojapohaguéicha, jaikuaa rupi Jehová ojapopaitetaha umi mbaʼe ñahaʼarõva. Ha ñanemanduʼávo Jehová promésare, ñande avei jaʼéta: “Ndaipóri peteĩ mbaʼe ohejavaʼekue ojapoʼỹ rehe”.

[Nóta]

Ikatúpa rembohovái?

• Mbaʼe promésa Jehová ojapovaʼekuépa Josué ohecha oñekumplírõ guare?

• Mbaʼe promésapa nde rehecháma oñekumpliha?

• Mbaʼérepa jajeroviakuaa Ñandejára Ñeʼẽre?

[Porandu ñahesaʼỹijóva]

[Nóta oĩva taʼanga ndive páhina 25]

Jehová omosãso isiervokuérape

[Nóta oĩva taʼanga ndive páhina 25]

Mbaʼéichapa Jehová oñangareko isiervokuérare ohasárõ guare pe már Rojo?

[Nóta oĩva taʼanga ndive páhina 26]

Mbaʼéichapa Jehová oñatende isiervokuérare oĩrõ guare hikuái desiértope?

[Nóta oĩva taʼanga ndive páhina 27]

Jehová avei ojepyʼapy koʼág̃a isiervokuérare