Ñamoheñói umi mbaʼe oñekotevẽva jajapo hag̃ua Jesucristo remimboʼe

“Tapeho aipóramo opa tetã rupi ha pejapo chuguikuéra che remimboʼéramo.” (MATEO 28:19.)

1. Mbaʼépa oikotevẽvaʼekue Ñandejára siervokuéra ymaguare?

 ÑANDEJÁRA siervokuéra oikotevẽ omoheñói hekovépe umi mbaʼe porã oipytyvõtava chupekuéra ojapo hag̃ua Jehová rembipota. Pór ehémplo, Abrahán ha Sara iñeʼẽrendúrõ guare Jehovápe ha oheja pe táva Ur, oikotevẽvaʼekue omoheñói umi mbaʼe oipytyvõtava chupekuéra oiko hag̃ua óga kárpape (Hebreos 11:​8, 9, 15). Josué katu, oikotevẽvaʼekue  ipyʼaguasu, oikuaa porã Ñandejára léi ha ojerovia Jehováre omoinge hag̃ua umi Israelguápe upe yvy oñeprometevaʼekuépe (Josué 1:​7-9). Avei Bezalel ha Oholiab ikatupyrýmane voi rakaʼe, péro Jehová espíritu ombokatupyryve chupekuéra. Upéicha rupi haʼekuéra oipytyvõ ojejapórõ guare pe lugár ojeadora hag̃ua Jehovápe oñehenóiva tavernákulo, ha omoakã avei umi tembiapo (Éxodo 31:​1-11).

2. Mbaʼe porandúpa ñambohováita koʼág̃a?

² Ohasa rire heta tiémpo, Jesucristo heʼi hemimboʼekuérape: “Tapeho aipóramo opa tetã rupi ha pejapo chupekuéra che remimboʼéramo [...], ha pemboʼe chupekuéra ojapopa hag̃ua opa umi mbaʼe ahejavaʼekue peẽme” (Mateo 28:​19, 20). Upérõ oñemeʼẽ ypy vaʼekue ojejapo hag̃ua upe tembiapo ijojahaʼỹva. Mbaʼéichapa ikatu ñaipytyvõ ñande rapichápe oiko hag̃ua chugui Jesucristo remimboʼe? Ha mbaʼéichapa ikatu ñamoheñói umi mbaʼe ñanepytyvõtava?

Jahayhuvaʼerã Ñandejárape ñande pyʼaite guive

3. Mbaʼépa jahechaukáta ñamboʼéramo ñande rapichápe oiko hag̃ua chugui Jesús remimboʼe?

³ Jahayhuvaʼerã Jehovápe ñande pyʼaite guive, upéicha ñaipytyvõta ñande rapichakuérape omombaʼeguasu hag̃ua Jehovápe. Umi Israelgua ikatu vaʼekue ohechauka ohayhuha Jehovápe iñeʼẽrendúvo, omombaʼeguasúvo chupe purahéi rupive ha ojapóvo umi sakrifísio ojeruréva chupekuéra (Deuteronomio 10:​12, 13; 30:​19, 20; Salmo 21:13; 96:​1, 2; 138:5). Ñande avei jahechauka jahayhuha Ñandejárape ñaneñeʼẽrendúvo chupe. Ha jahechauka avei upéva ñamboʼévo ñande rapichápe oiko hag̃ua chugui Jesús remimboʼe. Upévare, ñañeʼẽ jave Jehováre ha umi mbaʼe ojapótavare, ojehechavaʼerã jaguerovia ha ñamombaʼeha umi mbaʼe. Upearã jaikuaa porã vaʼerã mbaʼépa jaʼéta (1 Tesalonicenses 1:5; 1 Pedro 3:15).

4. Mbaʼérepa Jesús ovyʼaitereivaʼekue oñeʼẽ jave hapichakuérape Jehová rehe?

⁴ Jesús ohayhuvaʼekue Jehovápe ipyʼaite guive, upévare ovyʼaitereivaʼekue oñeʼẽ jave umi mbaʼe Jehová ojapótavare, Igoviérnore ha mbaʼéichapa oñemombaʼeguasuvaʼerã Chupe (Lucas 8:1; Juan 4:​23, 24, 31). Upéicha rupi, peteĩ jey heʼi: “Che rembiʼu niko kóva: ajapovaʼerã upe chembouvaʼekue rembipota ha amog̃uahẽvaʼerã huʼãme pe chéve omeʼẽvaʼekue ajapo hag̃ua” (Juan 4:34). Hese avei oñekumpli pe salmísta heʼivaʼekue: ‘Che Jára, nde reipotávante niko che aipota, ne ñeʼẽ areko che ánga ruguápe. Ñandejára, nde reikuaa akirirĩrangue, opavavépe aikuaaukahague nderekojoja’ (Salmo 40:​8, 9; Hebreos 10:​7-10).

5, 6. Mbaʼépa ñanemomýi ñamboʼe hag̃ua ñande rapichápe oiko hag̃ua chugui Jesús remimboʼe?

⁵ Oĩ ñande rapicha oikuaávo la Biblia omboʼéva ohayhuetereíva Ñandejárape. Upéva omomýi chupe oñeʼẽ hag̃ua kyreʼỹme Jehová ha Igoviérno rehe. Upéicha rupi heta oĩ oikuaasevéva la Biblia omboʼéva (Juan 1:41). Upéicha avei, jahayhúgui Jehovápe ñamboʼe ñande rapichápe oiko hag̃ua chugui Jesús remimboʼe. Upévare, jahayhu meme hag̃ua Jehovápe, jaleemante vaʼerã la Biblia ha jajepyʼamongeta heʼívare (1 Timoteo 4:​6, 15; Apocalipsis [Revelación] 2:4).

⁶ Jesucristo ohayhuetereígui Jehovápe kyreʼỹme oporomboʼevaʼekue. Péro ndahaʼéi upévare añónte osẽ porãmba vaʼekue chupe opredika jave. Mbaʼépa oipytyvõ avei chupe oporomboʼekuaa hag̃ua?

Jajepyʼapýkena ñande rapicháre

7, 8. Mbaʼépa Jesús oñanduvaʼekue yvyporakuérare?

⁷ Jesús ojepyʼapyvaʼekue hapichakuérare ha oñehaʼã oipytyvõ chupekuéra. Ou mboyve ko Yvy ape ári jepe, ohayhuetereimavaʼekue yvyporakuérape (Proverbios 8:​30, 31). Ha oĩrõ guare ko Yvy ape ári oiporiahuvereko ha ombopyʼaguapy umi oñembojávape hendápe (Mateo 11:​28-30). Jesús ohayhu ha oiporiahuvereko umi tapichakuérape Itúvaicha, upéicha rupi heta hénte omombaʼeguasu  Jehovápe. Opaichagua tapicha ohendu chupe ohechakuaa rupi ojepyʼapyha hesekuéra (Lucas 7:​36-50; 18:​15-17; 19:​1-10).

⁸ Peteĩ kuimbaʼe oporandúrõ guare Jesúspe mbaʼépa ojapovaʼerã ohupyty hag̃ua jeikove opaʼỹva, Jesús “omaʼẽvo hese ohayhuete” chupe (Marcos 10:​17-21). Ótro hendápe katu jalee Jesús ohayhuhague Mártape, iñermánape ha Lázarope, hemimboʼekuéra oikovaʼekue Betániape (Juan 11:​1, 5). Jesús ojepyʼapyetereígui umi héntere, ndopytuʼuporãvéi omboʼe hag̃ua rehehápe chupekuéra marandu porã Rréino rehegua (Marcos 6:​30-34). Péicha ohayhu ha ojepyʼapy rupi hapichakuérare, oiko chugui upe Mboʼehára Ikatupyryvéva. Upévare oĩvaʼekue heta omombaʼeguasúva Jehovápe.

9. Mbaʼépa apóstol Pablo oñandu hapichakuérare?

⁹ Apóstol Pablo ojepyʼapyetereivaʼekue avei hapichakuérare. Pór ehémplo, umi kristiáno Tesalonicayguápe heʼi: “Tuichaitégui ore mborayhu penderehe niko romeʼẽsevaʼekue peẽme ndahaʼéi pe [...] Ñandejára ñeʼẽ año, ore rekove jepe voi katu avei, pohayhuetereígui”. Apóstol Pablo ojepyʼapy ha ohayhueterei rupi umi Tesalonicayguápe, oĩvaʼekue ohejáva umi taʼanga ñemombaʼe ojapo hag̃ua Ñandejára oipotáva (1 Tesalonicenses 1:9; 2:​8, BNP). Ñande avei jajepyʼapyvaʼerã ñande rapicháre, Jesús ha apóstol Pablo ojapohaguéicha. Upéicha ikatúta avei jahecha mbaʼéichapa pe marandu porã oipytyvõ chupekuéra, ohupyty hag̃ua jeikove opaveʼỹva (Hechos 13:48).

Ñañehaʼãmbaitékena ñande rapicha rehehápe

10, 11. Mbaʼérepa ñañehaʼãmbaitevaʼerã ñande rapichakuéra rehehápe?

¹⁰ Mávapa ikatupyryve omboʼe hag̃ua hapichápe oiko hag̃ua chugui Jesús remimboʼe? Umi oñehaʼãmbaitéva hapicha rehehápe. Haʼekuéra ndoikói ombyaty mbaʼereta ijupe g̃uarã. Heʼihaguéicha Jesús hemimboʼekuérape: ‘Hasy oike hag̃ua Ñandejára rréinope umi mbaʼeta rerekoha!’. Hemimboʼekuéra oñemondýi ohendúvo upe heʼíva. Upéicharamo jepe heʼive chupekuéra péicha: ‘Hasy oike hag̃ua Ñandejára rréinope umi imbaʼereta rehe ojeroviáva! Ndahasyive ohasa hag̃ua peteĩ kaméllo ju resa rupi, pe mbaʼeta rerekoha oike hag̃ua Ñandejára Rréinope’ (Marcos 10:​23-25). Upévare Jesús heʼi chupekuéra ani hag̃ua oheka hetaiterei mbaʼe ijupe g̃uarã, ikatu hag̃uáicha omboʼe porãve hapichápe (Mateo 6:​22-24, 33). Upéicharõ, mbaʼérepa ñañehaʼãmbaitevaʼerã ñande rapicha rehehápe?

¹¹ Oñekotevẽgui heta mbaʼe ñamboʼe hag̃ua chupekuéra umi mbaʼe Jesús heʼivaʼekue. Umi ikatupyrýva oporomboʼe hag̃ua, oñehaʼãmbaite omboʼe káda semána Ñandejára Ñeʼẽ hapichakuérape. Oĩ avei saʼive ombaʼapóva ikatu hag̃uáicha oipytyvõ hetavépe. Ha heta oĩ oñehaʼãva oikuaa ótro idióma opredika  hag̃ua opaichagua tapichápe. Upéicha avei oĩ ováva ótro hendápe térã ótro tetãme oipytyvõ porãve hag̃ua hapichakuérape (Mateo 9:​37, 38). Jajapo hag̃ua koʼã mbaʼe ñañehaʼãmbaitevaʼerã ñande rapichakuéra rehehápe. Péro ñamoheñoivaʼerã hetave mbaʼe ñande katupyryve hag̃ua ñamboʼévo ñande rapichápe oiko hag̃ua chugui Jesús remimboʼe.

Ñahaʼarõkuaákena, péro ani japerde ñane tiémpo

12, 13. Mbaʼérepa ñahaʼarõkuaavaʼerã ñamboʼe jave ñande rapichakuérape?

¹² Ñahaʼarõkuaáramo ñanepytyvõta avei ñaporomboʼe hag̃ua. Ñandejára Ñeʼẽ ohechaukáramo jepe tekotevẽha umi tapicha okambia pyaʼe, heta vése imbegue hikuái ojapo hag̃ua upéva (1 Corintios 7:29). Jesús ndojaheirivaʼekue iñermáno Santiágore ndoikopyaʼeihaguére hemimboʼéramo. Oimérõ jepe Santiago oikuaa porã mbaʼépa Jesús omboʼe, oĩ rupi ojokóva chupe ndojedesidipyaʼéi (Juan 7:5). Upéicharamo jepe oiméne oikóma chugui Jesús remimboʼe áño 33 rupi, pe tiémpo ohasavaʼekue Jesús omanoha ára guive Pentecostés peve. Ikatu jaʼe upeichaha, Ñandejára Ñeʼẽ ohechauka rupi upérõ oñembyatymaha isy, iñermanokuéra ha umi apóstol ndive oñemboʼe hag̃ua (Hechos 1:​13, 14). Santiágope oho porãiterei vaʼekue Jehová servísiope, ha upe rire oñemeʼẽ chupe ojapo hag̃ua heta mbaʼe kongregasiónpe (Hechos 15:13; 1 Corintios 15:7).

¹³ Heta mbaʼe oñeñotỹva kokuépe hasýpe okakuaa. Upéicha avei oiko ñamboʼe jave ñande rapichakuérape, oĩ hasýpe ontende porãva Ñandejára Ñeʼẽ, ohayhúva Jehovápe ha oikóva chugui Jesús remimboʼe. Upévare, ñahaʼarõkuaavaʼerã. Santiago ohaivaʼekue: “Che pehenguekuéra, pehaʼarõkuaa ou [jey] peve [...] Jesucristo. Pemaʼẽmína mbaʼéichapa umi oñemitỹva ohaʼarõkuaa umi ama ára, upéi omonoʼõ hag̃ua ikogaʼa. Peẽke avei pehaʼarõkuaa ha ani penekangy, vokoieténte niko ou jevýta [...] Jesucristo” (Santiago 5:​7, 8). Santiago omokyreʼỹvaʼekue iñermanokuérape ‘ohaʼarõkuaa hag̃ua ou jey peve Jesucristo’. Jesús voi ipasiensiavaʼekue hemimboʼekuérare. Nontendéi jave hikuái peteĩ mbaʼe, omyesakã porã chupekuéra, ha upearã heta vése oiporu umi ehémplo (Mateo 13:​10-23; Lucas 19:11; 21:7; Hechos 1:​6-8). Koʼág̃a Jesús oisãmbyhymahína yvágape. Upéicharamo jepe, tekotevẽ gueteri ñanepasiénsia ñamboʼe hag̃ua ñande rapichakuérape, ha ikatu hag̃ua oiko chuguikuéra Jesús remimboʼe (Juan 14:9).

14. Ñanepasiénsiaramo jepe umi ñane estudiántere, mbaʼépa jajapo avei jaiporu porã hag̃ua ñane tiémpo?

¹⁴ Ñanepasiénsiaramo jepe umi ñane estudiántere, Ñandejára Ñeʼẽ nomomýiri enterovépe okambia hag̃ua (Mateo 13:​18-23). Ñande ñañehaʼãmbaite ñaipytyvõ hag̃ua chupekuéra. Péro nokambiáiramo hikuái, jahejantevaʼerã chupekuéra ha jaiporu ñane tiémpo jaheka hag̃ua umi omombaʼévape Ñandejára Ñeʼẽ (Eclesiastés 3:​1, 6). Upéicharamo jepe, jahechakuaavaʼerã avei oĩha ñande rapicha oikotevẽva ñaipytyvõve chupekuéra okambia hag̃ua umi mbaʼe opensáva, oñandúva ha omombaʼevéva. Upévare, ñanepasiensiavaʼerã Jesús ipasiensiahaguéicha hemimboʼekuérare, hasýramo guare chupekuéra okambia hag̃ua (Marcos 9:​33-37; 10:​35-45).

Ñañehaʼãkena ñandekatupyryve ñaporomboʼe hag̃ua

15, 16. Mbaʼérepa tekotevẽ peteĩ kristiáno ojeprepara porã ha omboʼe hesakã porã hag̃uáicha?

¹⁵ Ñamboʼeséramo ñande rapichakuérape oiko hag̃ua chuguikuéra Jesús remimboʼe, jahayhuvaʼerã Ñandejárape. Avei ñahaʼarõkuaa, jajepyʼapy ha ñañehaʼãmbaitevaʼerã hesehapekuéra. Péro ñañehaʼãvaʼerã avei ñañembokatupyryve ñaporomboʼe hag̃ua, upéicha añoite hesakã porãvéta pe jaʼéva. Pór ehémplo, pe Mboʼehára Guasu Jesucristo, heta vése oñeʼẽ mbykymínte vaʼekue péro hesakã porãiterei pe heʼíva. Oiméne ñanemanduʼa  koʼã ñeʼẽ Jesús heʼivaʼekuére: “Pembyaty uvei mbaʼeta yvágape”, “Ani pemeʼẽ umi mbaʼe imarangatúva jaguápe”, “Arandu Ñandejáragui oúva katu, ojehecha ñane rembiapokue rupi” ha “Pemeʼẽ mburuvicha guasúpe mburuvicha mbaʼéva, ha [Ñandejárape Ñandejára] mbaʼéva” (Mateo 6:20; 7:6; 11:19; 22:21). Upéicharamo jepe, haʼe ndoiporuivaʼekue peichagua ñeʼẽ añónte. Oñekotevẽ jave, omyesakã porãve umi mbaʼe heʼíva. Mbaʼéichapa ikatu ñaporomboʼe Jesús ojapohaguéicha?

¹⁶ Oñentende porã hag̃ua pe ñamboʼéva tekotevẽ jajeprepara porã. Umi ndojepreparáiva katuete oñeʼẽterei. Heʼipaite oikuaamíva guive pe témare, ha upéicha nahesakãporãvéima upe omboʼeséva. Péro pe ojeprepara porãva omboʼe hag̃ua katu opensa raẽ hapicháre, ojepyʼamongeta pe téma oñeʼẽtavare ha omyesakãve umi mbaʼe oñekotevẽvante (Proverbios 15:28; 1 Corintios 2:​1, 2). Oiporu avei pe hapicha oikuaámava voi ha ohecha mbaʼépa omyesakã porãvéta oporomboʼe jave. Ikatu oikuaave heta mbaʼe, péro omboykénte umi natekotevẽiva, ha upéicha hesakã porãve upe omboʼéva.

17. Mbaʼéichapa ikatu ñaipytyvõ ñande rapichápe ontende hag̃ua la Biblia omboʼéva?

¹⁷ Jesús omboʼéramo jepe heta mbaʼe, oipytyvõ avei chupekuéra opensa hag̃ua. Pór ehémplo, peteĩ jave oporandu: ‘Mbaʼépa nde ere Simón? Mávapa omeʼẽ impuésto ha kontrivusión umi mburuvicha guasu ko mundopeguápe, itaʼyrakuéra térãpa ambuekuéra?’ (Mateo 17:​25, BNP). Koʼág̃a avei ñamboʼe jave ñande rapichápe, jahejavaʼerã chupe tomyesakã térã tomombeʼu mbaʼéichapa ohecha pe téma ñahesaʼỹijovañaína. Upearã jajejokokuaavaʼerã, koʼýte oiméramo ñamyesakãseterei Ñandejára Ñeʼẽ omboʼéva. Upéva ndeʼiséi ñaporandutaha chupe ojoʼaripa, heʼise uvei ñaporandutaha umi mbaʼe tekotevẽvante hesakã porã hag̃uáicha. Péicha ñaipytyvõta chupe ontende porã hag̃ua umi mbaʼe omboʼéva la Biblia ñane puvlikasionkuéra rupive.

18. Mbaʼépa jajapovaʼerã ñaporomboʼekuaa hag̃ua?

¹⁸ La Biblia heʼi ñaporomboʼekuaavaʼerãha (2 Timoteo 4:2; Tito 1:9). Upéva ndeʼiséi ñamboʼeha ñande rapichápe oikuaánte hag̃ua la Biblia heʼíva. Ñaipytyvõse uvei chupekuéra ontende ha ohechakuaa hag̃ua mbaʼéichapa ojoavy pe añetegua japúgui, iporãva ivaívagui, ha arandu tavýgui. Ñañehaʼãramo jajapo upéva ha ñaipytyvõ chupekuéra ohayhu hag̃ua Jehovápe, ikatu ohechakuaa hikuái mbaʼérepa iñeʼẽrenduvaʼerã chupe.

 Ñañehaʼãmbaitékena ñamboʼe ñande rapichápe oiko hag̃ua chugui Jesús remimboʼe

19. Mbaʼéichapa enterove ñaipytyvõ ñande rapichápe oiko hag̃ua chugui Jesús remimboʼe?

¹⁹ Kongregasiónpe enterove ñañehaʼã ñaipytyvõ ñande rapichápe oiko hag̃ua chugui Jesús remimboʼe. Upévare, oiko jave ñande rapichágui Jesús remimboʼe, ndahaʼéi pe omboʼevaʼekue chupe añónte ovyʼáva. Haʼete avei peteĩ aty oñemoĩva oheka peteĩ mitã okañyvaʼekuépe. Peteĩnteramo jepe ojuhúva pe mitãme, enterove ovyʼa pe mitã ikatu haguére oĩ jey isy ha itúva ndive (Lucas 15:​6, 7). Upéicha avei, ñaipytyvõ jave ñande rapichápe oiko hag̃ua chugui Jesús remimboʼe, ndajajapói ñaneaño. Enterove ñambaʼapo jajapo hag̃ua upéva. Ha oho ñepyrũvo Salónpe katu enterove ñaipytyvõ ohayhuve hag̃ua Jehovápe ha iñorganisasiónpe (1 Corintios 14:​24, 25). Upéicha avei, javyʼa káda áño hetaitereive haguére ñande rapicha odesidíva oiko Jesús remimboʼéramo.

20. Mbaʼépa jajapovaʼerã ñamboʼeséramo ñande rapichápe Ñandejára Ñeʼẽ?

²⁰ Heta oĩ ñane ermáno oipytyvõsetereíva hapichápe oikuaa ha oservi hag̃ua Jehovápe. Ha oñehaʼãmbaitéramo jepe ndaikatúi ohupyty upéva. Oiméramo upéicha oiko ñanderehe, ñañehaʼãvaʼerã jahayhuve Jehovápe ha jajepyʼapy ñande rapichakuérare. Avei ñanepasiénsia ha ñañehaʼã ñañembokatupyryve ñaporomboʼe hag̃ua. Ha iñimportantevéva, ñamombeʼu Jehovápe ñamboʼeseha ñande rapichápe (Eclesiastés 11:1). Ha ani ñanekangy. Ñanemanduʼavaʼerã opa mbaʼe jajapóvape ñaipytyvõhañaína ojejapo hag̃ua Jesús remimboʼe ha oñemombaʼeguasu hag̃ua Jehovápe.

Ikatúpa ñamyesakãmi?

• Mbaʼéichapa jahechauka jahayhuha Ñandejárape ñaipytyvõ jave ñande rapichápe oiko hag̃ua chugui Jesús remimboʼe?

• Mbaʼépa ñaikotevẽ ñamboʼe hag̃ua ñande rapichápe oiko hag̃ua chugui Jesús remimboʼe?

• Mbaʼépa jajapovaʼerã ñaporomboʼekuaa hag̃ua?

[Porandu ñahesaʼỹijóva]

[Nóta oĩva taʼanga ndive páhina 13]

Ñamboʼéramo ñande rapichápe oiko hag̃ua chugui Jesús remimboʼe, jahechaukañaína jahayhuha Ñandejárape ñande pyʼaite guive

[Nóta oĩva taʼanga ndive páhina 15]

Mbaʼérepa jajepyʼapyvaʼerã ñande rapicháre oiko hag̃ua chugui Jesús remimboʼe?