Ikatu jaiko vyʼápe!

HETA tapicha ombyatyse pláta ha mbaʼerepy. Oĩ katu ifamososéva; oĩ avei umi artísta oñehaʼãva ára koʼẽre ojapo porãve hembiapo. Ha oĩ oipytyvõséva umi tapicha oikotevẽvape. Péro oĩ avei heta ndoikuaáiva maʼerãpa oikove térã mbaʼépa iporãve ojapo.

Ha ndépa mbaʼe repensa? Reñeporandúmapa mbaʼépa rejapóta nde rekovépe? Jahechamína mbaʼépa ojapo heta hénte ha oimépa koʼã mbaʼe ombovyʼa chupekuéra. Mbaʼépa ikatu jajapo javyʼa hag̃ua ñande rekovépe?

Ndaivaíri pe pláta ha umi vyʼarã

La Biblia heʼi Eclesiastés 7:​12-pe: “Arandu niko oporopytyvõ pirapiréicha avei, arandu tuichave jepe omoingove rupi herekohápe”. Upéicharõ pe pláta iñimportánte. Ñaikotevẽ jaikove hag̃ua, ha ñañangareko hag̃ua ñane famíliare (1 Timoteo 5:8).

 Ñandeplátarõ ikatu javyʼa jajapóvo heta mbaʼe, ajépa? Jesucristo heʼivaʼekue ndorekoiha moõpa ombojekóta iñakã, upéicharõ jepe heta vése hoʼu tembiʼu ha víno iporãmbajepéva. Avei orekovaʼekue ao iporãva ha hepýva (Mateo 8:20; Juan 2:​1-11; 19:​23, 24).

Upéicharamo jepe, Jesús ndoikoivaʼekue vyʼarã rapykuéri. Haʼe oikuaa porã mbaʼépa iporãve ojapo. Jesús heʼivaʼekue: “Peteĩ oguerekopáramo jepe, ndahaʼéi pe oguerekóva pe omoingovéva ichupe”. Upéi omombeʼu peteĩ káso. Peteĩ kuimbaʼe iplátava oñemitỹ ha ikóga okakuaa porãiterei. Ko karai heʼi: “Mbaʼépa ajapóta. Ndarekovéima moõpa añongatúta che ñemitỹnguekuéra [...]. Aitypáta koʼã che ñemitỹnguekuéra ñongatuha ha amopuʼãta tuichavéva, ha upépe ambyatypáta koʼã che ñemitỹngue ha mayma mbaʼe arekóva guive. Upémaramo haʼéta chejupe: ‘Nde, che ánga, rerekóniko heta mbaʼe ñongatupy, heta ára peve g̃uarã; epytuʼu, ekaru, emboyʼu, ehasa porã’”. Mbaʼérepa ivai ko kuimbaʼe opensáva? Jesús heʼi: “Ha [Ñandejára] katu heʼi chupe: ‘Výro, ko pyharépe remanóta, mávapepa opytapáta pe nde rembyatyvaʼekue’”. Pe kuimbaʼe ombyatýramo jepe heta mbaʼe, omano rire ndaikatumoʼãvéima oiporu umi mbaʼeta orekóva. Omohuʼãvo Jesús heʼi: “Upéicha ojehu umi ombyatýva ijupe g̃uarãnte ombaʼaporangue [Ñandejárape] g̃uarã” (Lucas 12:​13-21, JMP).

Añetehápe ñaikotevẽ pláta ha avei umi vyʼarã. Péro naiporãi ñamotenonde koʼã mbaʼe. Iñimportanteve ñaime porã Ñandejára renondépe, ha ñañehaʼã jaiko haʼe oipotaháicha.

Iñimportántepa ñanefamóso?

Heta tapicha ningo ifamososeterei. Ha ndaivaíriko jaipota ñande rapicha imanduʼa porã ñanderehe. La Biblia heʼi: “Terakuã porã iporãve tyakuã porãgui. Iporãve oñemanoha ára oñenaseha áragui” (Eclesiastés 7:1).

Peteĩ tapicha omanoha ára haʼete ku ojehaipámava hekovekue. Oimérõ ojapóraʼe iporãva oikove aja, iporãvéta pe omanoha ára. Upérõ ojekuaáma mbaʼeichagua tapichápa. Onasévo katu ndojekuaái gueteri mbaʼevete chugui.

Eclesiastés ningo ohaivaʼekue rréi Salomón. Haʼe orekovaʼekue peteĩ iñermáno tuichavéva chugui hérava Absalón. Upe iñermáno ifamososeterei. Haʼe mbohapy itaʼýra, péro umíva omano imitã reheve, ha ndopytái avave imanduʼátava hese. Mbaʼépa ojapo Absalón? La Biblia heʼi: “Absalón [...] omopuʼãukavaʼekue peteĩ ita guasu aty manduʼarã, oĩva David ñúme ha omoĩukavaʼekue hese héra, ndaipórigui itaʼýra” (2 Samuel 14:27; 18:18). Koʼag̃aite peve ndojetopái gueteri moõpa oĩ ko lugár. Umi ostudiáva la Biblia katu oikuaa Absalón opuʼãhague itúva David rehe oitységui chupe, ikatu hag̃uáicha haʼe opyta hendaguépe mburuvicháramo.

Koʼág̃a rupi avei heta tapicha oipota ojegueromanduʼa chupekuéra umi mbaʼe  ojapóvare. Oipota ojeguerohory chupekuéra, péro umi hénte pyaʼe hesarái chuguikuéra. Ha mbaʼépa oiko upéicharõ? Pe lívro La cultura del Narcisismo ohaivaʼekue Christopher Lasch heʼi: “Koʼág̃a rupi hentekuéra oguerohory umi tapicha imitãva, iporãva ha ipyahu aja. Upéi pyaʼe hesarái chuguikuéra. Upévare umi ifamósova ojepyʼapyháre oiko ndoipotáigui umi hénte hesarái chuguikuéra”. Upéva rupi heta ifamósova oñenvisia dróga ha vevídare ha omano imitãreve. Upéicha jahecha haʼekuéra ndovyʼaiha añetehápe.

Upéicharõ, máva renondépepa ñañehaʼãvaʼerã ñaime porã? Oñeʼẽvo umi oñehaʼãvare ojapo hembipota Jehová heʼi proféta Isaíaspe: ‘Ameʼẽta chupekuéra mbaʼe iporãvéva. Herakuéra ojehaíta opa árape g̃uarã che rógape ha itápia ryepýpe. Ameʼẽta chupekuéra téra opa árape g̃uarãva, ojepeʼaveʼỹvaʼerã arakaʼeve’ (Isaías 56:​4, 5). Ñandejára omeʼẽta chupekuéra ‘téra opa árape g̃uarãva’, iñeʼẽrendu rupi hikuái. Haʼe imanduʼáta hesekuéra “opa árare”. La Biblia ñanemokyreʼỹ ñaime porã hag̃ua ñande Apohare Jehová renondépe.

Isaías omombeʼu avei umi tapicha iñeʼẽrendúva Ñandejárape oikotaha opa ára g̃uarã peteĩ paraísope ko Yvy ape ári. Ñandejára ojapo ypy guive yvyporakuérape oipotavaʼekue oiko hikuái opa árare. Kóva hína pe “jeikove añeteguáva” (1 Timoteo 6:​12, 19). Jaikorangue jaheka umi mbaʼe pyaʼe opáva, mbaʼérepa nañañehaʼãi jahupyty ko jeikove opaveʼỹva?

Umi artísta térã umi oñehaʼãva oipytyvõ oikotevẽvape ndovyʼapáinte avei

Heta artísta oñehaʼã ivaleve ikatu hag̃uáicha hembiapo iporãitereive. Péro koʼág̃a ndajaikovepukúi ha ndaikatúi ohupyty hikuái upéva. Pe artísta ñañeʼẽhague hérava Hideo orekopotápe 90 áño oñehaʼã gueteri ivaleve ojapóvape. Ha jepe peteĩ artísta ivaleterei hembiapópe, ndaikatuvéima ojapo heta mbaʼe ojapohaguéicha imitãvépe. Péro mbaʼépa ojapovaʼerãmoʼã oikovérire opa ára g̃uarã? Epensamíntena mbaʼeichaitépa ikatuvaʼerãmoʼã ivaleve hembiapópe!

Ha mbaʼépa ikatu jaʼe umi tapicha oñehaʼãvare oipytyvõ umi oikotevẽvape? Jaguerohory koʼã tapichápe oipytyvõse rupi umi imboriahu ha oikotevẽvape; ha oiporuhaguére orekomíva upearã. La Biblia heʼi voi: “Javyʼave ñameʼẽvo” (Hechos 20:35). Katuete ningo javyʼa ñaipytyvõramo ñande rapichápe. Péro ñañehaʼãramo jepe ñaipytyvõ umi oikotevẽvape jaikove aja pukukue, ikatúnepa ñaipytyvõ enterovépe? Nahániri, ndaikatúiningo ñameʼẽmba ñande rapichápe opa oikotevẽva ñañehaʼãvéramo jepe. Avei oĩ peteĩ mbaʼe entéro ñaikotevẽva, jepe heta ndohechakuaái. Mbaʼépa upéva?

Peteĩ mbaʼe enterove ñaikotevẽva

Jesús oñemoñeʼẽrõ guare peteĩ sérro ári guive, omombeʼu mbaʼépa enterove ñaikotevẽ: ‘Ovyʼavaʼerã umi ohechakuaáva oikotevẽha Ñandejárare, imbaʼekuérako pe rréino yvagapegua’ (Mateo 5:​3, JMP). Upéicharõ la Biblia ndeʼirihína javyʼa hag̃ua tekotevẽha ñandepláta, ñanefamóso, oiko ñandehegui artísta vale, térã ñaipytyvõ oikotevẽvape. Tekotevẽ guei jaikuaa Ñandejárape ha jaadora chupe.

Apóstol Pablo omokyreʼỹvaʼekue enterovépe oikuaa hag̃ua ijapoharépe ha oñemoag̃ui hese. Haʼe heʼi: ‘Peteĩ kuimbaʼégui añónte Ñandejára ojapo opa tetãnguéra, oiko hag̃ua yvy ári, ha heʼi chupekuéra arakaʼépa ha moõpa oikóta, ikatu hag̃ua oheka Ñandejárape ha ku jepovyvyperamoguáicha ojuhu mbaʼe chupe, añetéramo jepe Ñandejára noĩriha mombyry ñandehegui. Ñandejára rupi niko jaiko, jakuʼe ha jaikove’ (Hechos 17:​26-28).

 Javyʼaséramo añetehápe jaadoravaʼerã Ñandejárape. Ha jajapóramo upéva ikatúta jahupyty “jeikove añeteguáva”. Jahechami Teresa rehe oikovaʼekue. Haʼe ningo peteĩ aktrís ifamósava hetãme. Upérõ ndaiporivaʼekue aktrís morenaitéva orekóva iprográma télepe, ha Teresa katu oreko peteĩ prográma osẽva káda semána. Péro upéi haʼe ohejapa koʼã mbaʼe. Mbaʼérepa? Haʼe heʼi: “Ahechakuaa iporãveha ajapóramo Ñandejára Ñeʼẽ heʼíva”. Teresa ndojaposéi mbaʼeve ombopochýva Ñandejárape ha upévare ndojapói mbaʼeveichagua prográma ohechaukáva séyso térã ñorairõ. Upéi nombaʼapovéi télepe. Haʼe oiporupaite itiémpo opredika hag̃ua pe marandu porã ha oipytyvõ hapichakuérape oñemoag̃ui hag̃ua Ñandejárare. Teresa ovyʼa ojapóvo koʼã mbaʼe.

Peteĩ karai ombaʼapovaʼekue Teresa ndive heʼi: “Ambyasyeterei ahechávo haʼe ohejapa reiha hetaite mbaʼe porã ohupytyvaʼekue. Péro upéi ahechakuaa haʼe otopahague peteĩ mbaʼe iporãvéva”. Teresa upéi omano peteĩ aksidéntepe. Omano rire, pe karai ombaʼapovaʼekue hendive heʼi: “Haʼe ovyʼavaʼekue, ha péicha pevétamante, ndaikatúiningo pévagui jajerureve. Ikatúpa jaʼe ñandejehe javyʼaha avei?”. Umi omotenondéva Ñandejárape, omanóramo jepe, ikatu oikove jey Ñandejára rréino poguýpe (Juan 5:​28, 29).

Ñandejára ojapovaʼekue ko Yvy yvyporakuéra oiko hag̃ua ipype. Haʼe oipota enterove jaikuaa porã hembipota ha jaiko vyʼápe peteĩ paraísope ko Yvy ape ári (Salmo 37:​10, 11, 29). Koʼág̃a ñañehaʼãvaʼerã jaikuaave Jehovápe, yvága ha Yvy Apohare, ha mbaʼépa oipota enterovépe g̃uarã. Testigos de Jehová oĩva nde reikoha rupi nepytyvõta reikuaa hag̃ua koʼã mbaʼe. Ikatu reñeʼẽ chupekuéra térã rehai umi ojapóvape ko rrevísta.

[Nóta oĩva taʼanga ndive páhina 5]

Mbaʼérepa oĩ vai opensavaʼekue pe kuimbaʼe iplátava Jesús oñeʼẽhague?

[Nóta oĩva taʼanga ndive páhina 7]

Reikosénepa opa ára g̃uarã peteĩ Paraísope ko Yvy ape ári?