Jehová sãmbyhy ha Ñandejára Rréino

“Nde niko [Jehová], nde tuichapa ha ndepokatu, nde pópe oĩ opa mbaʼe ha ndereko mimbipa ndaijojahái! [...] Nde hína ore Jára pe mburuvicha guasu.” (1 CRÓNICAS 29:11.)

1. Mbaʼérepa Jehová añoite oreko derécho oisãmbyhývo opa mbaʼe oĩva ko múndope?

 “ÑANDEJÁRA omoĩ iguapyha yvágape, ha upe guive oisãmbyhy opavavépe.” (Salmo 103:19.) Kóicha heʼivaʼekue pe salmísta imanduʼávo Ñandejára sãmbyhýre térã soberanía. Ojapohaguére opa mbaʼe, haʼe añoite oreko derécho oisãmbyhývo opa mbaʼe oĩva ko múndope.

2. Mbaʼépa ohecha Daniel peteĩ visión rupive?

² Peteĩ mburuvicha guasu oisãmbyhy hag̃ua, katuete orekovaʼerã umi oĩva ipoguýpe. Jehová oisãmbyhy ñepyrũvaʼekue umi yvágape oĩvape: Itaʼýrape raẽ, ha upéi umi ánhelpe (Colosenses 1:​15-17). Heta ára rire, pe proféta Daniel ohecha peteĩ visión rupive umi mbaʼe oikóva yvágape: “Amaʼẽve ha ahecha oñemoĩha upépe guapyha ha peteĩ ikaraietéva ahecha oguapy  ipype. [...] Hetaiterei umi ojapóva haʼe oipotáva, ha hetaitereive umi henondépe oñemboʼýva” (Daniel 7:​9, 10). Hetaiterei árarema Jehová oisãmbyhy peteĩ família tuichaitereíva oĩva yvágape. Koʼãva oservi chupe ojapóvo hembipota (Salmo 103:​20, 21).

3. Mbaʼépa Jehová oisãmbyhy avei, ha mbaʼéichapa ojapo upéva?

³ Upe rire Jehová ojapo hetaiteve mbaʼe yvágape, ha avei ko Yvy (Job 38:​4, 7). Umi mbaʼe jahecháva amo yvate ombaʼapo porãiterei ha haʼete ku noikotevẽiva avave ogoverna. Upéicharamo jepe, pe salmísta heʼi hesekuéra: “Iñeʼẽ rupi [Jehová] opa mbaʼe ojapovaʼekue. Haʼe omoĩvaʼekue opa mbaʼe hendápe opa árape g̃uarã, omoĩ chupekuéra mbaʼéichapa ojererekovaʼerã, mbaʼe ikatuʼỹva arakaʼeve oñemboyke” (Salmo 148:​5, 6). Upéicha jahecha Jehová osegiha oisãmbyhy umi mbaʼe. Haʼe oñatende meme opa mbaʼe ojapovaʼekuére, ndahaʼéi umi ánhel rehe añónte (Nehemías 9:6).

4. Mbaʼéichapa oisãmbyhy Jehová yvyporakuérape?

⁴ Jehová ojapórõ guare yvyporakuérape, omeʼẽ avei chupekuéra peteĩ mbaʼe. Omeʼẽmbaite umi mbaʼe oikotevẽva ovyʼa hag̃ua, péro avei oisãmbyhy hag̃ua umi mymbakuérape. Upéicha omeʼẽ chupekuéra autorida (Génesis 1:​26-28; 2:​8, 9). Ojapóvo upéva Ñandejára ohechauka ipyʼaporãha, ha avei omombaʼeha umi haʼe oisãmbyhývape. Adán ha Eva oñemoĩ aja Jehová poguýpe, ikatúta oikove opa ára g̃uarã pe Yvy iporãitévape (Génesis 2:​15-17).

5. Mbaʼépa jaikuaa Jehovágui?

⁵ Upévare, mbaʼépa ñanemboʼe umi mbaʼe jahechamavaʼekue? Primero, Jehová osegiha oisãmbyhy opa mbaʼe ojapovaʼekue. Segundo, ogoverna porãha ha omombaʼeha umi haʼe oisãmbyhývape. Ha ipahápe, ñamombaʼe ha ñaneñeʼẽrendúramo chupe, omeʼẽtaha ñandéve heta mbaʼe porã ndopamoʼãiva arakaʼeve. Ndareíri rréi David heʼivaʼekue: “Nde niko [Jehová], nde tuichapa ha ndepokatu, nde pópe oĩ opa mbaʼe ha nde reko mimbipa ndaijojahái! Opa mbaʼe oĩva yvy ári ha yvágape nembaʼénte voi. Nde hína ore Jára pe mburuvicha guasu pavẽ ha nde tuichave opavavégui!” (1 Crónicas 29:11).

Mbaʼérepa ñaikotevẽ Ñandejára Rréinore?

6. Maʼerãpa oiporu Jehová Irréino?

⁶ Jaikuaa rupi Jehová oisãmbyhyha opa mbaʼe oĩva ko múndope, maʼerãpa upéicharõ ojeporu Ñandejára Rréino? Ñambohovái hag̃ua ko mbaʼe, ñapensami mbaʼéichapa ogoverna umi mburuvichakuéra. Haʼekuéra pyʼỹinte ojevale ambuére upearã. Upéicha avei Jehová oiporu Irréino. Upéva rupive Jehová oisãmbyhy avei opa umi ipoguýpe oĩvape.

7. Mbaʼérepa odesidi Jehová oisãmbyhy peteĩ fórmape neʼĩrava oiporu?

⁷ Jahechahaguéicha, Jehová oisãmbyhýma heta hendáicha. Oĩrõ guare peteĩ provléma hardín de Edénpe, Jehová odesidi oisãmbyhy peteĩ fórmape neʼĩrava oiporu. Ko mbaʼe oñepyrũvaʼekue peteĩ ánhel oñehenóiva Satanás opuʼãrõ guare Ñandejárare. Ojapóvo upéva ogueraha Adán ha Évape hapykuéri. Upéicha opuʼã Jehová sãmbyhýre. Mbaʼérepa jaʼe upéva?  Jehová heʼivaʼekue Adán ha Évape ani hag̃ua hoʼu peteĩ yva péro Satanás heʼi Évape nomanomoʼãiha hoʼúramo upéva. Upéicha heʼihína Jehová ijapuhague, ha upévare ndaikatuiha jajerovia hese. Péro heʼive: “[Ñandejára] oikuaa porã, peʼúramo upéva upe yva pejehesapeʼataha ha peikuaáta iporãva ha ivaíva. Ha peẽta [Ñandejáraicha]”. Heʼívo upéva, Satanás heʼise avei Adán ha Évape oho porãvetaha naiñeʼẽrendúiramo Ñandejárape ha omboykéramo chupe (Génesis 3:​1-6). Hesakã porãiterei upéicha opuʼãhague Ñandejára sãmbyhýre. Mbaʼépa ojapóta koʼág̃a Jehová?

8, 9. a) Mbaʼépa ojapóta peteĩ rréi oĩramo opuʼãva hese? b) Mbaʼépa ojapo Jehová oñepuʼãrõ guare hese Edénpe?

⁸ Mbaʼépa ojapóta peteĩ rréi oĩramo opuʼãva igoviérnore? Enterove jaikuaa porã, ipyʼaporãramo jepe pe rréi ndohejareimoʼãiha umi hese opuʼãvaʼekuépe. Katuete omoĩta peteĩ kuimbaʼe ojoko hag̃ua upe mbaʼe oikovaʼekue ha omoĩ jey pyʼaguapy. Upéicha avei, Jehová ndohejareíri umi hese opuʼãvaʼekuépe. Adán ha Évape omosẽ pe hardíngui, nomereséigui oikove hikuái opa ára g̃uarã (Génesis 3:​16-19, 22-24).

⁹ Jehová okondena avei Satanáspe. Heʼírõ guare mbaʼépa ojehúta chupe, Jehová omombeʼu mbaʼéichapa oisãmbyhýta upe guive, ha upéva rupive omoĩtaha pyʼaguapy opa henda rupi. Ñandejára heʼi Satanáspe: “Kuña ndive romoingo vaíta, ha iñemoñare neñemoñare ndive. Kuña ñemoñare neakãre opyrũta, nde katu rehaʼãta reisuʼu ipytápe” (Génesis 3:15). Ko profesía rupive, Jehová ohechauka omoĩtaha peteĩ “ñemoñare” ohundítava Satanáspe ha umi chupe omoirũvape. Ha upéicha ojehecháta Haʼe añoite orekoha derécho ñanesãmbyhývo (Salmo 2:​7-9; 110:​1, 2).

10. a) Máva mávapa pe “ñemoñare” oñeprometevaʼekue? b) Mbaʼépa heʼi Pablo pe profesía ñepyrũguáre?

¹⁰ Pe ñemoñare haʼevaʼekue Jesucristo ha umi ogovernátava hendive yvágape. Haʼekuéra oñondive oforma pe Ñandejára Rréino (Daniel 7:​13, 14, 27; Mateo 19:28; Lucas 12:32; 22:​28-30). Péro upéva ñepyrũrã ndojekuaaivaʼekue. Upévare apóstol Pablo ohenói ko profesía ñepyrũguápe “mbaʼe ñemi [...] okañyvaʼekue ko yvy oĩ mboyve guive” (Romanos 16:25). Hetaiterei árarema, kuña ha kuimbaʼe jeroviaha ohaʼarõ ojekuaa ko “mbaʼe ñemi”. Ha pe profesía ñepyrũgua heʼiháicha, ojehecháta Jehová añoite orekoha derécho ñanesambyhývo (Romanos 8:​19-21).

Pe “mbaʼe ñemi” hesakã mbeguekatúpe

11. Mbaʼé mbaʼépa Jehová omombeʼu Abrahánpe?

¹¹ Mbeguekatúpe, Jehová omyesakãve heta tapichápe pe ‘mbaʼe ñemi Ñandejára Rréino rehegua’ (Marcos 4:11). Umíva apytépe oĩvaʼekue Abrahán, ‘Jehová amígo’ (Santiago 2:23). Ñandejára heʼi ‘oikotaha chugui peteĩ tetã guasu’. Upe rire heʼi avei chupe iñemoñare apytépe oĩtaha heta rréi. Ha tenondeve katu heʼi chupe: “Ha opa tetã ko yvy arigua ojehovasáta neñemoñare rupi” (Génesis 12:​2, 3; 17:6; 22:​17, 18).

12. Máva mávapa oñemoĩ Satanás ñemoñare ndive dilúvio rire?

¹² Abrahán mboyve, yvyporakuéra oñehaʼãmavaʼekue ogoverna hapichápe. Upéicha ojapo Nemrod, Noé bisnieto. Heʼiháicha la Biblia, ko mymba jukaha oñemoĩva Jehováre oñepyrũvaʼekue ‘oñemombaʼe tavakuérare’ (Génesis 10:​8, 9). Enterove umi hénte oñemombaʼeguasuvaʼekue Nemrod ojapohaguéicha, oñemoĩ Satanás poguýpe. Haʼekuéra ha umi oñemoĩva hendivekuéra oĩ Satanás ñemoñare ndive (1 Juan 5:19).

13. Mbaʼépa Jehová heʼi Jacob rupive?

¹³ Péro ndaipóri ikatu vaʼerã ombyai Ñandejára rembipota, tahaʼe jepe umi Satanás omopuʼãva ogoverna hag̃ua. Jacob rupive, Jehová heʼi: ‘Ndojepeʼamoʼãi Judágui pe autorida ha ndojepeʼamoʼãi avei chugui hetã puʼaka, ou peve Siloh [...] ha hese oñembyatyvaʼerã tetãnguéra’ (Génesis 49:​10, ÑÑM). Péicha ojeʼe ouvaʼerãha peteĩ hérava Siloh, heʼiséva ‘Upe Ijára teéva’. Chupe añoite ikatu oñemeʼẽ oisãmbyhy hag̃ua tetãnguérape. Péro mávapa pe Siloh?

 “Ou peve Siloh”

14. Mbaʼe kompromísopa Jehová ojapo David ndive?

¹⁴ Judá famíliagui Jehová oiporavo ypy vaʼekue Davídpe ogoverna hag̃ua Israélpe (1 Samuel 16:​1-13). * Ojavy vaíramo jepe Davíd, Jehová ohayhu chupe ojerovia rupi Hese ha oñemoĩ ipoguýpe. Ñandejára ojapo peteĩ pákto térã kompromíso hendive ha omyesakãve pe profesía oñemeʼẽvaʼekue Edénpe. “Amoĩta peteĩ neñemoñare ha amohendáta chupe nde guapyhápe”. Ko ñemoñare ndojeʼéi David raʼy Salomón rehe añónte. Upéva jaikuaa Ñandejára heʼihaguére: ‘Ha amoĩta chupe iguapyhápe opa ára g̃uarã’. Upe pákto heʼi pe “ñemoñare” oñeprometevaʼekue ouvaʼerãha David famíliagui (2 Samuel 7:​12, 13).

15. Mbaʼérepa ikatu jaʼe pe goviérno oĩvaʼekue Judápe orrepresentahague Ñandejára Rréinope?

¹⁵ David ha enterove umi itaʼýra ogovernavaʼekuére oñeñohẽ ypy vaʼekue aséite iñakãre. Upéva ojapovaʼekue pe saserdóte guasu. Upévare ikatu oñehenói chupekuéra ungido, térã Ñandejára oiporavovaʼekue (1 Samuel 16:13; 2 Samuel 2:4; 5:3; 1 Reyes 1:39). La Biblia heʼi haʼekuéra oguapyhague Jehová trónope ha ogovernaha Ñandejárape g̃uarã Jerusalénpe (2 Crónicas 9:8). Upévare, ikatu jaʼe pe goviérno oĩvaʼekue Judápe orrepresentahague Ñandejára Rréinope, Jehová voi oisãmbyhýgui upéva rupive.

16. Mbaʼéichapa oñehundi pe rréino oĩvaʼekue Judápe?

¹⁶ Upe rréi ha umi hénte iñeʼẽrendu aja Jehovápe, haʼe oñangareko ha omeʼẽ chupekuéra heta mbaʼe porã. Upéicha oikovaʼekue Salomón ogoverna aja. Upérõ oĩvaʼekue pyʼaguapy ha ojeguereko hetaiterei mbaʼe iporãva. Avei, péicha ojehechauka mbaʼéichatapa Ñandejára Goviérno poguýpe. Upépe ndaiporimoʼãvéima Satanás ha umi mbaʼe haʼe oiporúva ha ojehechátama Jehová añoite ikatuha ñanesãmbyhy (1 Reyes 4:​20, 25). Péro jaikuaaháicha, enterove nunga umi rréi ouvaʼekue David famíliagui ndojapói Ñandejára oipotáva. Upévare umi hénte mante heko vai ha omombaʼeguasu taʼangakuérape. Ipahápe, Jehová oheja umi Babiloniaygua ohundi ko rréino 607-pe Jesús ou mboyve. Haʼete ku Satanás ojapovaʼekue oipotáva: omoĩ vai Jehová sãmbyhýpe.

17. Mbaʼéichapa Jehová ohechauka oisãmbyhyha gueteri, oñehundíramo jepe Judá rréino?

¹⁷ Ojehuhaguéicha Israel rréinope, oñehundi avei pe rréino ha umi rréi oĩvaʼekue Judápe. Upéicharamo jepe, upéva ndohechaukái Jehová ndorekoiha derécho ñanesãmbyhývo, térã ogoverna vaiha. Ohechauka uvei umi mbaʼe vai oguerúva oñemboykévo Ñandejárape ha ojejapo Satanás oipotáva (Proverbios 16:25; Jeremías 10:23). Ohechauka hag̃ua Jehová oisãmbyhyha gueteri, heʼi proféta Ezequiel rupive: “Ojepeʼáta ndehegui jeguaka neakã rehegua [...]. Opa mbaʼe ohejáta yvýre ñembyaikuepa. Ha upéva oikóta ou vove ku, che haʼégui chupe, omoĩtava tekojoja” (Ezequiel 21:​26, 27). Upéicha ohechauka pe “ñemoñare” oñeprometevaʼekue ndouiha gueteri.

18. Mbaʼépa ánhel Gabriel heʼi Maríape?

¹⁸ Jahechami koʼág̃a mbaʼépa oikovaʼekue áño 2-pe Jesús ou mboyve. Pe ánhel Gabriel ovisita peteĩ kuñataĩme oikóva Nazarétpe, opytáva nórte gotyo Galiléape. Gabriel heʼi chupe: “Nde ryeguasúta ha nemembýta, ha pe mitã rembohérata Jesús. Haʼe tuicha mbaʼéta ha ojeʼéta hese: ‘[Ñandejára] Yvatetegua Raʼy’. Ha [...] Ñandejára ojapóta chugui mburuvicha guasu, ijypykue Davídcha. Haʼe oisãmbyhýta Jacob retãguápe opa árape g̃uarã” (Lucas 1:​31-33).

19. Onasévo Jesús, mbaʼépa hiʼag̃uimbaitéma?

¹⁹ Hasy peve hesakã porãta pe “mbaʼe ñemi”. Hiʼag̃uimbaitéma pe “ñemoñare” oñeprometevaʼekue (Gálatas 4:4; 1 Timoteo  3:16). ‘Ojesuʼútaramo’ jepe chupe ipytápe, ko “ñemoñare” ojukáta Satanáspe ha upéicha oñehundietéta chupe ha umi hendive oĩvape. Ko “ñemoñare” ohechaukáta avei Ñandejára Rréino omyatyrõtaha opa mbaʼe vai Satanás ojapovaʼekue, ha upéicha ojehecháta Jehová añoite orekoha derécho ñanesãmbyhývo (Hebreos 2:14; 1 Juan 3:8). Péro mbaʼéichapa ojapóta Jesús koʼã mbaʼe? Mbaʼe ehémplopa omoĩ ñandéve? Koʼã mbaʼe ñambohováita pe artíkulo oúvape

[Nóta]

Ikatúpa ñamyesakã?

• Mbaʼérepa Jehová añoite oreko derécho oisãmbyhývo opaite mbaʼe?

• Maʼerãpa Jehová omoĩ pe Rréino?

• Mbaʼéichapa Jehová omyesakã mbeguekatúpe pe “mbaʼe ñemi”?

• Mbaʼéichapa Jehová ohechauka oisãmbyhyha gueteri, oñehundíramo jepe Judá rréino?

[Porandu ñahesaʼỹijóva]

[Nóta oĩva taʼanga ndive páhina 25]

Mbaʼépa Jehová omyesakã Abrahán rupive?