Mbaʼépa ñaikotevẽ javyʼa hag̃ua?

KENNY ningo peteĩ karai ombaʼapo porã vaʼekue peteĩ emprésa guasúpe. Haʼe oreko peteĩ áuto iporãitereíva, avei hóga porã ha oiko oĩháme umi hénte iplátavante. Ko karai ningo parakaidísta vale ha igustoiterei chupe ojepoi jave yvatégui. Péro ovyʼápa haʼe? Pe diário The Wall Street Journal omombeʼu haʼe heʼihague: “Arekóma 45 áño ha ndaikuaái gueteri mbaʼépa ajapose che rekovépe [...]. Ndavyʼaieténingo”.

Peteĩ kuña hérava Elyn katu heta oñentrenavaʼekue oiko hag̃ua chugui patinadóra vale. Haʼe ohupyty upe oipotáva ha ou ifamosaiterei. Péro upe rire Elyn oñembyasy ha heʼi: “Chéngo aimoʼãkuri avyʼataha, ha mbaʼére piko ndavyʼaiete? Añeñandu cheaño peteĩ. Aikuaa upéi cheg̃uaig̃uitaha, ha jepe chepláta heta, ndaikatumoʼãvéima avyʼa umi mbaʼe ajapovaʼekuére”.

 Peteĩ karai hérava Hideo katu opintakuaaiterei ha oiko chugui artísta katupyry ifamósova. Haʼe omombaʼeterei hembiapokue ha upévare novendéi. Omanombotávo orekópe 98 áño Hideo omeʼẽmba hembiapokue peteĩ muséope. Oikove aja pukukue haʼe oñehaʼãvaʼekue ivaleve hembiapópe. Péro ndovyʼáinte avei oikuaágui arakaʼeve ndaikatumoʼãiha ojapo porã oipotahaichaite.

Heta tapicha katu oiporu itiémpo ha umi mbaʼe orekóva oipytyvõ hag̃ua umi oikotevẽvape. Jahechami mbaʼépa ojapo peteĩ karai ombaʼapovaʼekue Hóllywoodpe. Haʼe visepresidénte peteĩ emprésa iñimportántevape, ojapóva pelíkula, oĩva Estados Unídospe. Ko karai oiko umi ifamósova apytépe. Hóga opyta peteĩ várrio oĩháme umi hénte iplatavéva. Peteĩ jey katu oho Cambóyape ojepasea, peteĩ siuda héravape Phnom Penh. Osena aja upépe oñemboja hendápe peteĩ mitãkuña ojeruréva pláta. Haʼe omeʼẽ chupe un dólar ha ojogua chupe peteĩ gaseósa. Pe mitãkuña ovyʼaiterei anga. Péro ótro día ko karai ohecha jey pe mitãkuña ojerure jeýma pláta upérupi. Upépe haʼe ohechakuaa tekotevẽha ojapo hetave mbaʼe oipytyvõ hag̃ua umichagua tapichápe.

Un áño ohasa rire ko karai oheja itraváho. Nombaʼapovéima sinehápe, oñehaʼã guei oipytyvõ umi imboriahúvape oikóva Cambóyape. Omoĩ chupekuéra peteĩ eskuéla, hogarã, tembiʼu ha avei oñehaʼã ombostudia. Péro ko karai ndovyʼapái. Oñeñandu porã oipytyvõhaguére oikotevẽvape, péro ohecha mbaʼéichapa oĩ heta hetave provléma haʼe ndaikatúiva osolusiona.

Koʼã tapicha ñañeʼẽhague oikosevaʼekue vyʼápe. Heta oñehaʼã hikuái upearã, péro amo ipahápe oñeñandu vai jey. Ha ndépa mbaʼe rehupytyse? Mbaʼépa iñimportanteve ndéve g̃uarã? Nerembyasymoʼãipa upe rire umi mbaʼe rejapóva koʼág̃a?