Ndépa reñemoĩ Jehová sãmbyhy ykére?

“Opa tetãnguéra rupi tojeʼe: ‘Ñandejára ñande ruvicha guasu hína’.” (SALMO 96:10.)

1, 2. a) Mbaʼe iñimportántevapa oiko pe áño 29-pe? b) Mbaʼéichapa opoko upe mbaʼe Jesús rehe?

 PE MÉS de octubre áño 29-pe oikovaʼekue peteĩ mbaʼe ndojehecháiva gueteri. Iñimportanteterei rupi oñemoĩ la Bíbliape, umi cuatro lívrope oñeʼẽva Jesús rekovekuére. Mateo omombeʼu kóicha: “Jesús ojevautisa rire osẽ pe ýgui ha upévo ojepeʼa pe yvága ha Jesús ohecha pe Ñandejára Espíritu peteĩ pykasúicha oúva oguejy hiʼári. Upérõ oñehendu peteĩ ñeʼẽ yvágagui heʼiva: ‘Kóva haʼe che Raʼy ahayhuetéva, [che aiporavovaʼekue]’” (Mateo 3:​16, 17, BNP; Marcos 1:​9- 11; Lucas 3:​21, 22; Juan 1:​32-34).

² Ohechávo Jesús pe espíritu sánto oguejyha hese, hesakã porãiterei Ñandejára oiporavohague chupe, ha péicha oiko chugui Mesías térã Cristo (Juan 1:33). Hasy peve ou pe “ñemoñare” oñeprometevaʼekue! Péina, Juan el Bautista renondépe oĩ pe kuimbaʼe Satanás ‘oisuʼútava ipytápe’. Péro haʼe opyrũta Satanás akãre, pe oñemoĩ mbaretevéva Jehováre ha isãmbyhýre (Génesis 3:15). Upe guive, Jesús oikuaa porãma mbaʼépa ojapóta. Ojapopaitevaʼerã Jehová rembipota ojehecha hag̃ua Haʼe añoite orekoha derécho ñanesãmbyhývo Irréino rupive.

3. Mbaʼéichapa ojeprepara Jesús ojapopaite hag̃ua Jehová rembipota ha oñemoĩ Jehová ykére?

³ Ojapo hag̃ua upe mbaʼe, “Jesús, [henyhẽva] Espíritu Sántogui ojevy Jordán ysyrýgui ha Espíritu Santo ogueraha ichupe peteĩ desiertohápe” (Lucas 4:​1, BNP; Marcos 1:12). Umi cuarenta día ohasa aja haʼeñohápe, heta ojepyʼamongeta mbaʼéichapa Satanás oñemoĩ Jehová sãmbyhýre, ha mbaʼépa haʼe ojapovaʼerã oñemyatyrõ hag̃ua upe mbaʼe. Upépe oikepaite avei enterove yvypóra ha umi yvágape oĩva. Upévare iporã jahecha mbaʼépa ojaporakaʼe Jesús, ha jahecha avei mbaʼépa jajapovaʼerã ñande ñañemoĩ hag̃ua Jehová ykére (Job 1:​6-12; 2:​2-6).

 Jesús ombohovái Satanáspe

4. Mbaʼépa ojapo Satanás oipotágui Jesús omboyke Ñandejára sãmbyhy?

⁴ Jaikuaaháicha, koʼã mbaʼe ohecha avei Satanás ha nohaʼarõi oataka hag̃ua Jesúspe, pe “kuña” yvagapegua “ñemoñare” (Génesis 3:15). Satanás omoĩ Jesús renondépe mbohapy mbaʼe ohejauka hag̃ua chupe Itúva rembipota, ha ojapo hag̃ua haʼe ojaposévante. Pe mbohapyhápe Satanás oipota Jesús omboyke Ñandejára sãmbyhy. Ohechaukapa rire Jesúspe “umi tetã yvy arigua, ha umi mbaʼeta ipype oĩva”, Satanás heʼi chupe: “Ameʼẽmbáta ndéve opa koʼã mbaʼe, reñesúramo cherenondépe ha chemombaʼeguasu”. Jesús oikuaavaʼekue “umi tetã yvy arigua” oĩmbaha Satanás poguýpe. Ha ndojapói rupi Satanás heʼíva ohechauka oñemoĩha Jehová ykére. Jesús heʼi chupe: “Tereho koʼágui Satanás. [Ñandejára] ñeʼẽme niko heʼi: ‘[Jehová] nde Jára renondépe reñesũvaʼerã, ha chupe añónte remombaʼeguasuvaʼerã’” (Mateo 4:​8-10).

5. Mbaʼe ijetuʼúvapa ojapovaʼerã Jesús?

⁵ Jesúspe g̃uarã ndaiporivaʼekue iñimportantevéva Jehová sãmbyhýgui, ha odefende oikove aja pukukue. Haʼe oikuaa ojepytasovaʼerãha Ñandejára ykére omanoite peve, ha péicha ohechauka Jehová añoite ikatuha ñanesãmbyhy. Upéicha oñekumplíta pe profesía heʼíva Satanás oisuʼuvaʼerãha ipytápe pe kuña “ñemoñarépe” (Mateo 16:21; 17:12). Avei oikuaaukavaʼerã Ñandejára Rréino rupive Jehová ipuʼakataha Satanás rehe, ha omoĩ jeytaha pyʼaguapy opa henda rupi (Mateo 6:​9, 10). Mbaʼéichapa okumplíta Jesús ko mbaʼe ijetuʼúva?

“Ñandejára rréino hiʼag̃uíma”

6. Mbaʼéichapa Jesús oikuaauka Ñandejára oiporutaha Irréino “ombyai hag̃ua upe [Satanás] ojapovaʼekue”?

⁶ Ojapo hag̃ua Ñandejára heʼivaʼekue chupe, “Jesús omoherakuã oúvo Galiléape [...] Ñandejára [marandu porã], ha heʼi: ‘Pe ára og̃uahẽma, [...] Ñandejára rréino hiʼag̃uíma’” (Marcos 1:​14, 15, BNP). Haʼe voi heʼi  upe rire: “Tekotevẽ umi siudakuéra ambuépe avei amoherakuã [...] Ñandejára rréino rehegua ñeʼẽ, upearã niko añembouvaʼekue” (Lucas 4:​18-21, 43, BNP). Ha upeichaite ojapo: oho opa rupi Israélpe “omoherakuãvo [...] Ñandejára rréino rehegua ñeʼẽ” (Lucas 8:​1, BNP). Ojapo avei heta milágro: omongaru hetaitereípe, ojoko ára pochy, omonguera hasývape ha omoingove jey omanovaʼekuépe. Upéicha, Jesús ohechauka Ñandejára ikatuha omyatyrõmbaite umi mbaʼe vai ojejapovaʼekue Edénpe, ha “ombyai hag̃ua upe ojapovaʼekue [Satanás]” (1 Juan 3:8).

7. Maʼerãpa ombokatupyry Jesús hemimboʼekuérape? Ha mbaʼéichapa oho chupekuéra?

⁷ Ikatu hag̃uáicha hetave ohendu pe marandu porã, Jesús ombokatupyry hemimboʼekuérape. Ñepyrũrã oiporavo doce apóstol ha “omondo ichupekuéra oñemoñeʼẽ hag̃ua [...] Ñandejára rréino rehe” (Lucas 9:​1, 2, BNP). Upe rire omondo avei 70 hemimboʼekuéra opredika hag̃ua: “Ñandejára rréinoko oñemoʼag̃uíma” (Lucas 10:​1, 8, 9, BNP). Ojevy rire hikuái ha omombeʼu Jesúspe mbaʼéichapa oho porã chupekuéra, haʼe heʼi: “Che ahecha Satanáspe hoʼáramo yvágagui aratirícha” (Lucas 10:​17, 18).

8. Mbaʼépa ohechauka Jesús umi mbaʼe ojapovaʼekuére?

⁸ Jesús ombaʼapo Ñandejára Rréino rehehápe ára ha pyhare. Upearã omboykevaʼekue heta mbaʼe oikotevẽva jepe. Heʼivaʼekue: “Umi aguara oguereko haity, ha umi guyra yvategua oguereko hupa, ko Yvypóra raʼy katu ndoguerekói moõpa oñenóta opytuʼumi” (Lucas 9:​58, JMP; Marcos 6:31; Juan 4:​31-34). Avei, opredika opa ijahápe chupe. Upéicha, omano mboyvemi Jesús heʼi Pilátope: “Che niko ajuvaʼekue ko Yvy ári haʼe hag̃ua umi mbaʼe añeteguáva” (Juan 18:37). Umi mbaʼe ojapovaʼekuére, Jesús ohechauka ndouihague ko Yvy ape ári oporomboʼe, ojapo milágro térã omano hag̃ua ñanderehehápe añónte. Chupe g̃uarã iñimportanteve omombaʼe Jehová sãmbyhy ha oikuaauka Ñandejára ojapotaha hembipota Irréino rupive (Juan 14:6).

“Oikopáma”

9. Mbaʼéichapa Satanás oisuʼu ipytápe “kuña ñemoñarépe”?

⁹ Upe tembiapo ojapovaʼekue Jesús pe Rréino rehehápe, nombovyʼái Satanáspe. Upévare, ojevale umi “iñemoñare” yvyporakuérare omokirirĩ hag̃ua Jesucrístope, haʼéva pe “kuña ñemoñare”. Jesús onase guive ha omano meve, Satanás oñehaʼã ojapo hese mbaʼe vai. Ipahápe, áño 33-pe og̃uahẽ upe ára Jesucristo ‘ojesuʼu hag̃ua ipytápe’ (Mateo 20:​18, 19; Lucas 18:​31-33). Ñandejára Ñeʼẽ omombeʼu porã mbaʼéichapa Satanás oiporu umi héntepe okondena ha ojuka asy hag̃ua Jesúspe peteĩ yvyráre. Umíva apytépe oĩvaʼekue Judas Iscariote, umi saserdóte, fariséo ha romayguakuéra(Hechos 2:​22, 23).

10. Mbaʼépa pe iñimportantevéva ojapovaʼekue Jesús omanórõ guare pe yvyráre?

¹⁰ Mbaʼépa ñapensa ñanemanduʼa jave mbaʼéichapa omano asy vaʼekue Jesús? Ikatu ñanemanduʼa omeʼẽhague hekove ñanderehehápe (Mateo 20:28; Juan 15:13). Ikatu avei jahechakuaa mbaʼeichaitépa Jehová ñanderayhu omboúvo Itaʼýrape omano hag̃ua (Juan 3:16). Térã ikatu jaʼe pe mburuvicha Romaygua heʼihaguéicha: “Kóva niko añetehápe [Ñandejára] Raʼy raʼe” (Mateo 27:54). Entéro koʼã mbaʼe oĩ porãiterei. Péro ñanemanduʼami Jesús heʼivaʼekuére omanombotaitépe: “Oikopáma” (Juan 19:​30, BNP). Mbaʼépa upe oikopamavaʼekue? Añete, Jesús ojapo heta mbaʼe ko Yvy ape ári, ha omanóvo ojehupyty avei heta mbaʼe. Péro jaikuaaháicha, chupe g̃uarã iñimportanteve vaʼekue oñemyesakã porã Jehová añoite ikatuha ñanesãmbyhy. Ha heʼiháicha la Biblia, Satanás heta ombohasa asýta ko ‘ñemoñarépe’ ikatu hag̃ua omopotĩ Jehová réra (Isaías 53:​3-7).  Jesús okumplipaitevaʼekue ko mbaʼe. Ajépa tuichaite mbaʼe upéva!

11. Mbaʼépa ojapóta Jesús oñekumplipaite hag̃ua Génesis 3:15?

¹¹ Jesús ndohejái Jehovápe, upévare haʼe omoingove jey chupe, ndahaʼéi yvypóraicha sino “espíritu oporomoingovéva[ramo] (1 Corintios 15:45; 1 Pedro 3:18). Upéi Jehová heʼi Itaʼýrape: “Eguapy che [derécha] gotyo, tamoĩ nepyendáramo umi nderayhuʼỹva” (Salmo 110:1). Umi ‘ohayhuʼỹva’ chupe hína Satanás ha enterove “iñemoñare”. Haʼe rupi Rréi Jehová goviérnope, Jesucristo ohundipaitéta umi opuʼãvape Ñandejárare, toĩ yvágape térã Yvy ape ári (Apocalipsis [Revelación] 12:​7-9; 19:​11-16; 20:​1-3, 10). Upéicha oñekumplipaitéta pe profesía oĩva Génesis 3:​15-pe. Avei Jesús heʼivaʼekue padrenuéstrope: “Tou ne rréino, tojejapo nerembipota yvy ári yvagapeguáicha” (Mateo 6:10; Filipenses 2: 8- 11).

Peteĩ ehémplo ñandéve g̃uarã

12, 13. a) Mbaʼéichapa ohecha hetaiterei tapicha pe marandu porã Rréino rehegua? b) Mbaʼépa ñañeporanduvaʼerã jaguataséramo Cristo pyporépe?

¹² Heʼihaguéicha Jesús, pe marandu porã Rréino rehegua ojepredikahína hetaiterei tetãre (Mateo 24:14). Upéicha rupi, hetaiterei ñande rapicha oservíma Ñandejárape. Haʼekuéra ovyʼaiterei umi mbaʼe porã oguerútavare Ñandejára Rréino. Oikose hikuái opa ára g̃uarã pyʼaguapy ha kyhyjeʼỹme peteĩ Yvy iporãitereítavape. Upévare, ovyʼa ikatu haguére omombeʼu koʼã mbaʼe hapichakuérape (Salmo 37:11; 2 Pedro 3:13). Rejapópa nde avei upéva? Oiméramo upéicha, rejapohína peteĩ mbaʼe iporãitereíva. Upéicharamo jepe, iporã jajepyʼamongetami peteĩ mbaʼére.

¹³ Apóstol Pedro heʼi: “Cristo voi avei ohasa asy vaʼekue penderehehápe ha ohechauka peẽme mbaʼéichapa peikovaʼerã ipyporépe” (1 Pedro 2:21). Mbaʼérepa Pedro imanduʼa koʼápe Jesús ohasa asy hague ha naimanduʼái mbaʼéichapa haʼe opredikavaʼekue kyreʼỹme, térã ikatupyryhague? Pedro oikuaa mbaʼérepa heʼi upéva. Haʼe ohechapaite umi mbaʼe vai Cristo ohasavaʼekue. Ha oikuaa oaguantahague oñemoĩ hag̃ua Jehová poguýpe, ha upéicha ohechauka Satanás ijapuha. Ha ñande, mbaʼéichapa ikatu jaguata Jesús pyporépe? Iporã ñañeporandumi: “Añemoĩtapa Jehová goviérno poguýpe ahasa asýtaramo jepe? Ojehechápa umi mbaʼe ajapóvare ha apredika rupive omotenondeha Ñandejára sãmbyhy?” (Colosenses 3:17).

14, 15. a) Ojejapoukasérõ guare Jesúspe umi mbaʼe naiporãiva Ñandejára renondépe, mbaʼépa ojapo haʼe ha mbaʼérepa? b) Mbaʼérepa ñanemanduʼa meme vaʼerã? (Ekomenta avei pe rrekuádro “Oñemoĩ hikuái Jehová ykére”.)

¹⁴ Koʼẽ koʼẽre ñambohovái opaichagua provléma. Mbaʼépa jajapovaʼerã jahasa jave umi mbaʼére? Pór ehémplo, mbaʼépa jajapóta oĩramo peteĩ mbaʼe ikatúva ñanemboyke Jehová rapégui? Mbaʼéichapa Jesús ombohovái Pedro heʼírõ guare chupe ojeporiahuvereko hag̃ua? Jesús heʼi chupe: ‘Tereho koʼágui Satanás!’. Ha heʼive: ‘Nde niko repensa yvypóraicha ha nerepensái Ñandejáraicha’  (Mateo 16:​21-23). Ha ikatúramo ñambaʼapo porãve térã ñande platave ñamboykemiéramo Ñandejárape, jajapótapa Jesús ojapohaguéicha? Ojapo rire heta milágro, Jesús ohechakuaa umi héntere “haʼekuéra ojaposeha ichugui mburuvicha guasu, ha upémarõ okañy ichuguikuéra” (Juan 6:​15, JMP).

¹⁵ Mbaʼérepa Jesús ojapo upéicha? Ohechakuaágui oĩha peteĩ mbaʼe iñimportantevéva. Jesúspe g̃uarã, iñimportanteve ojapo Itúva rembipota ha ohechauka Chupe añoite oñemombaʼeguasuvaʼerãha (Mateo 26:​50-54). Mbaʼépa ñanemboʼe upéva? Ñande avei ñanemanduʼa meme vaʼerã Jehová añoite ikatuha ñanesãmbyhy. Ndajajapóiramo upéicha ikatu japyta vai Jehová renondépe. Ndahasymoʼãi jaʼa hag̃ua Satanás ñuhãme, ikatupyrýva ñaneraʼã hag̃ua mbaʼe vaípe, ojapohaguéicha Eva rehe (2 Corintios 11:14; 1 Timoteo 2:14).

16. Mbaʼépa ñañehaʼãmbaitevaʼerã jajapo japredika jave?

¹⁶ Japredika jave, ñañehaʼã jahechauka ñande rapichápe mbaʼéichapa Ñandejára Ñeʼẽ ikatu oipytyvõ chupe omyatyrõ hag̃ua iprovlemakuéra. Jajapóvo upéicha, ñaporomokyreʼỹ ojestudia hag̃ua la Biblia. Upéicharamo jepe, ndahaʼéi umi mbaʼe añónte ñamboʼeséva ñande rapichápe. Iñimportanteve oikuaa hikuái Jehová añoite orekoha derécho ñanesãmbyhývo. Oikótapa chuguikuéra kristiáno añetetéva, ohasa asýtaramo jepe Ñandejára Rréino rehehápe? (Marcos 8:34.) Oñemoĩtapa avei Jehová sãmbyhy ykére ha upéicha ohechauka Satanás ijapuha? (Proverbios 27:11.) Tuichaite mbaʼépa upe oñemeʼẽva ñandéve jajapo hag̃ua! Ikatu ñañemoĩ Jehová sãmbyhy ykére ha ñaipytyvõ avei ñande rapichápe ojapo hag̃ua upéicha (1Timoteo 4:16).

Pe ára Ñandejára “haʼepa hag̃ua opa mbaʼépe”

17, 18. Mbaʼe ára iporãitereívapa ñahaʼarõkuaa ñañemoĩramo Jehová sãmbyhy ykére?

¹⁷ Ñañehaʼã memékena jahechauka umi mbaʼe jajapóvare ha japredika rupive ñamotenondeha Jehová sãmbyhy. Upéicha javyʼáta ñahaʼarõ aja Cristo “omoĩ hag̃ua [...] Ñandejára pe Túva poguýpe pe Rréino”. Arakaʼépa oikóta upéva? Apóstol Pablo heʼi: ‘Cristo oipeʼapaha ára mburuvichakuéra, autorida ha puʼaka. Ha tekotevẽ Cristo orreina Ñandejára omoĩmba peve iñenemigokuéra ipyguýpe. Upémaramo pe Taʼýra voi avei oñemoĩvaʼerã Ñandejára poguýpe, omoĩmbavaʼekue opa mbaʼe ipoguýpe, Ñandejára haʼepa hag̃ua opa mbaʼépe’ (1 Corintios 15:​24, 25, 28, BNP).

¹⁸ Iporãitétapa pe ára Jehová “haʼepa hag̃ua opa mbaʼépe”. Irréino ojapopátama umi mbaʼe oñekotevẽva. Umi oñemoĩvaʼekue Jehová sãmbyhýre oñehundítama, ha oĩ jeýta pyʼaguapy opaite henda rupi. Heʼihaguéicha pe salmísta, enterove opurahéita: “Pemombaʼeguasu Ñandejárape héra tuichágui [...]. Opa tetãnguéra rupi tojeʼe ‘Ñandejára ñande ruvicha guasu hína’” (Salmo 96:​8, 10).

Mbaʼéichapa ñambohováita?

• Mbaʼéichapa Jesús ohechauka Ñandejára sãmbyhy iñimportanteveha chupe g̃uarã?

• Maʼépa pe iñimportantevéva ojapovaʼekue Jesús opredika ha omano rupi?

• Mbaʼéichapa ikatu jahechauka ñaimeha Jehová sãmbyhy ykére, ojapohaguéicha Jesús?

[Porandu ñahesaʼỹijóva]

[Rrekuádro oĩva páhina 29-pe]

OÑEMOĨ HIKUÁI JEHOVÁ YKÉRE

Oikuaa porãháicha heta ermáno Corea ha ambue tetãmegua, jahasa asy jave iñimportánte jaikuaa porã mbaʼérepa ojehu ñandéve upéva.

Peteĩ testigo de Jehová ohasa asy vaʼekue goviérno Soviético poguýpe, heʼi: “Tuicha orepytyvõ roaguanta hag̃ua rontende upe mbaʼe oikovaʼekue Edénpe [...]: Jehová añoite orekoha derécho ñanesãmbyhývo. Roikuaavaʼekue ikatuha roñemoĩ Jehová goviérno ykére. [...] Upéva oremombarete ha orepytyvõ rojepytaso hag̃ua Jehová ykére”.

Peteĩ ermáno omombeʼu avei mbaʼéichapa ojepytaso haʼe ha ambue testigokuéra ojejopy vai jave. Heʼi: “Jehová arakaʼeve ndaorerejái. Rohasa asýramo jepe, ore jerovia imbarete. Roñomokyreʼỹ oremanduʼávo upéicha roñemoĩharoína Jehová sãmbyhy ykére”.

[Nóta oĩva taʼanga ndive páhina 31]

Mbaʼéichapa Jesús oñemoĩ Jehová sãmbyhy ykére otentárõ guare chupe Satanás?