Mbaʼe mbaʼépa ñanemboʼe Malaquías
Jehová Ñeʼẽ ningo oikove
Mbaʼe mbaʼépa ñanemboʼe Malaquías
OHASÁMA 70 áño oñemopuʼã jey hague Jehová róga Jerusalénpe. Upérõ umi hudío oheja rei Jehová rape. Umi saserdóte jepe ndahekoporãi. Mávapa ohechaukáta chupekuéra ivaiha ojapóva ha oipytyvõta oñemoag̃ui jey hag̃ua Ñandejárare? Jehová oiporavo upearã proféta Malaquíaspe.
Ko lívro Malaquías ohaivaʼekue omohuʼã Evréo Kuatiañeʼẽ, ha ipype oĩ heta profesía. Malaquías oñemoñeʼẽ mbarete umi héntepe. Jajapóramo haʼe heʼíva ñanepytyvõta jajeprepara hag̃ua “og̃uahẽ mboyve Ñandejára ára. Pévata hína ára ndetuicháva ha ojekyhyjetereiha”. Upe árape Jehová ohundíta ko múndo aña (Malaquías 4:5).
SASERDOTEKUÉRA ‘OITY HETÁPE UPE OMBOʼÉVA RUPI’
Jehová heʼi umi Israelguápe: “Che pohayhu”. Umi saserdóte katu oapoʼi Ñandejára réra. Mbaʼéichapa ojapo upéva? Haʼekuéra oikuaveʼẽ Jehová “altárpe pán itujupáva” ha “mymba hesatũva, ikarẽva ha hasýva” (Malaquías 1:2, 6-8).
Saserdotekuéra ‘oity hetápe upe omboʼéva rupi’. Umi hénte ‘ombotavy’ hapichápe. Oĩ heta hudío omendáva kuña ambue tetãyguáre. Ha oĩ katu umi omoakãratĩva ‘hembireko ikariaʼýpe guare’ (Malaquías 2:8, 10, 11, 14-16).
Porandukuéra:
2:2. Mbaʼéichapa Jehová oharu umi saserdóte ñaña ñeʼẽngue? Jehová ombojere mbaʼe vaípe umi mbaʼe porã ojeruréva hikuái ha upéicha oharu haʼekuéra heʼíva.
2:3. Mbaʼépa umi ‘mymba repoti’ ojepetéva umi saserdóte rováre? Pe léi heʼi oikuaveʼẽ jave hikuái peteĩ mymba, orahavaʼerãha mombyry hepoti ha ohapy (Levítico 16:27). Jehová heʼívo oipetetaha mymba repoti hovakuéra rehe, ohechauka ndoguerohoryiha pe mymba oñekuaveʼẽva ha avei umi oguerahávape.
2:13. Máva resaýpa upe ombojahúva Jehová altár? Koʼãva ningo umi kuña témplope ohóva resay, haʼekuéra hasẽ jave Jehovápe. Mbaʼérepa hasẽ hikuái? Imenakuéra oheja rei chupekuéra, ojedivorsia omenda hag̃ua kuña tetã ambuegua imitãvéva rehe.
Mbaʼépa ñanemboʼe:
1:10. Jehová ndoguerohorýi umi saserdóte taryrýi atýra oikuaveʼẽva. Haʼekuéra ningo okovra ombotyhaguére témplo rokẽ térã omyendyhaguére tata altarpegua. Kóva ohechauka umi mbaʼe jajapóva Jehovápe g̃uarã, pór ehémplo japredika, jajapovaʼerãha ñande pyʼaite guive, jahayhúgui Jehovápe ha ñande rapichakuérape. Aníke ni mbaʼevéicharõ jajapo pláta potágui (Mateo 22:37-39; 2 Corintios 11:7).
1:14; 2:17. Jehová ndochaʼéi umi hovamokõivare.
2:7-9. Entéro oporomboʼéva kongregasiónpe oiporuvaʼerã Ñandejára Ñeʼẽ Marangatu heʼíva, ha umi lívro ha rrevísta onohẽva pe “majordómo iñakãporãva” (Lucas 12:42, BNP; Santiago 3:11).
2:10, 11. Jehová oipota isiervokuéra omenda umi ‘Hese ojeroviávare’ añónte (1 Corintios 7:39).
2:15, 16. Jehová siervokuéra omombaʼevaʼerã ‘hembireko ikariaʼýpe guare’.
‘ÑANDEJÁRA OIKÉTA ITÉMPLOPE’
Jehová ‘oikéta itémplope’ ha hendive oĩta pe ‘oñemboúva ha oguerúva ñeʼẽmeʼẽ’. Kóva hína Jesucristo. Ñandejára ‘oúta ombohovake’ ipuévlope umi mbaʼe vai ojapóvare. Ha “ojehai peteĩ kuatia oĩháme umi omombaʼéva Ñandejárape” (Malaquías 3:1, 3, 5, 16).
Pe ára “hendýva tatakuáicha” oúta ohundi hag̃ua iñañávape. Og̃uahẽ mboyve upe ára oñemondóta peteĩ proféta ha haʼe “omoingo porãta túva taʼyrakuérandi” (Malaquías 3:19, 23, 24 [4:1, 5, 6, NM]).
Porandukuéra:
3:1-3. Arakaʼépa ‘Ñandejára’ ha ‘pe oñemboúva ha oguerúva ñeʼẽmeʼẽ’ ou pe témplope, ha mávapepa oñembou haʼekuéra mboyve? Jesucristo rupive Jehová ou omopotĩ hag̃ua itémplo 10 de Nisán áño 33-pe. Upérõ Jesús oike Jehová rógape ha omosẽ umi ombaʼevende ha oñemúvape upépe (Marcos 11:15). Upéva oiko 3 áño ha 6 mése ojeporavo rire Jesúspe ogoverna hag̃ua Ñandejára rréino. Upéicharõ 3 áño ha 6 mése Jesús oñepyrũ rire ogoverna yvágape, ou Jehová ndive ohecha hag̃ua isiervokuérape ko Yvy ári. Ha otopa hikuái tekotevẽha oñemopotĩ chupekuéra. Síglo primérope oñembouvaʼekue Juan Bautístape oprepara hag̃ua umi hudíope Jesús ou mboyve. Ñane tiémpope oĩ avei opreparáva pe tape Jehová ou hag̃ua. Áño 1880 rupi oĩvaʼekue peteĩ aty ostudiáva la Biblia ha oñehaʼãva omboʼe umi tapicha ipyʼaporãvape Ñandejára Ñeʼẽ.
3:10. Heʼívo ñameʼẽha “diézgui peteĩ” térã diezmo, heʼisépa upéva ñañemeʼẽha Jehovápe? Jesús omanóvo ojepeʼavaʼekue pe léi heʼíva ñameʼẽvaʼerãha diezmo. Upéicharõ ko diezmo orrepresenta ambue mbaʼe (Efesios 2:15). Ndeʼiséi ñañemeʼẽha Jehovápe. Mbaʼérepa? Pe diezmo ningo oñemeʼẽvaʼekue káda áño, péro ñande peteĩ jeýnte ñañemeʼẽ Jehovápe ha jahechauka jajevautisávo. Upe guive opa mbaʼe jarekóva Jehová mbaʼéma. Upéicharõ jepe haʼe oheja ñande jadesidi mboýpa jaiporúta jaservi hag̃ua chupe, haʼeramoguáicha peteĩ diezmo. Ñameʼẽ Jehovápe ñande pyʼaite guive opa ikatumíva. Koʼãva apytépe oĩ ñane tiémpo, mbaretekue ha umi mbaʼeta jarekóva, jaiporúva japredika ha ñaporomboʼe hag̃ua. Ñameʼẽ avei Chupe jahávo rreunionhápe, javisitávo hasýva térã ijedávape ha ñameʼẽvo pláta ojepredika hag̃ua opárupi.
4:3. Mbaʼéichapa Jehová siervokuéra ‘opyrũta iñañáva rehe’? Upéva ndeʼiséi Ñandejára siervokuéra oñorairõtaha oñehundi vove umi iñañávape. Koʼápe ohechauka mbaʼéichapa haʼekuéra ovyʼáta ha ofesteháta ág̃a oñehundi rire Satanás múndo aña (Salmo 145:20; Apocalipsis [Revelación] 20:1-3).
4:4. Mbaʼérepa ‘ñanemanduʼavaʼerã Moisés léi rehe’? Kristianokuéra ningo noĩri ko léi poguýpe, péro ko léi ohechauka “umi mbaʼe porã ouvaʼerã” (Hebreos 10:1). Ñañatende porãvo hese jahecha mbaʼéichapa oñekumpli heʼíva ipype (Lucas 24:44, 45). Pe léipe oĩ avei “umi mbaʼe yvagapegua joguaha”. Upévare, tekotevẽ jastudia upe léi, hesakã porã hag̃ua ñandéve mbaʼépa ogueroviavaʼerã peteĩ kristiáno, ha mbaʼéichapa jaikovaʼerã (Hebreos 9:23, BNP).
4:5, 6. Mávapepa orrepresenta ‘proféta Elías’? Ojeʼéningo “Elías” oipytyvõtaha umi hénte ipyʼaporã hag̃ua. Síglo primérope Jesucristo heʼivaʼekue “Elías” haʼeha Juan Bautista (Mateo 11:12-14; Marcos 9:11-13). Koʼág̃a oñembou Elíaspe ‘og̃uahẽ mboyve Ñandejára ára, tuicháva ha ojekyhyjeha’. Haʼe hína pe ‘tembiguái jeroviaha ha iñarandúva’ (Mateo 24:45). Koʼã kristiáno ohótava yvágape oipytyvõ avei kyreʼỹme umi héntepe oñemoĩ porã hag̃ua Jehová ndive.
Mbaʼépa ñanemboʼe:
3:10. Nañameʼẽiramo Jehovápe iporãvéva, haʼe nañanevendesimoʼãi.
3:14, 15. Umi saserdóte ojapohaguére ivaíva, umi hénte nomombaʼevéi Jehová servísio. Péva ohechauka umi omotenondéva kongregasión omeʼẽvaʼerãha ehémplo iporãva (1 Pedro 5:1-3).
3:16. Jehová oikuaa porã mávapa okyhyje chugui ha iñeʼẽrendu chupe ha ndahesaraimoʼãi chuguikuéra. Haʼe oñangarekóta hesekuéra ág̃a ohundi vove Satanás múndo aña. Upévare aníkena jaheja mbaʼeve ñanemokangy ha jajei Jehová rapégui (Job 27:5).
4:1. Og̃uahẽvo pe ára Jehová oporohusga hag̃ua, oñehundiháicha pe yvyra rapo oñehundíta hakã. Péva heʼise umi mitã michĩvape ohupytytaha ituvakuérape ohupytýva. Upéicharõ, tuichaite rresponsavilida oreko tuvakuéra ifamília michĩva rehe. Sy ha túva oservíva Jehovápe oñehaʼãmbaitevaʼerã oĩ porã henondépe (1 Corintios 7:14).
Jakyhyjékena Ñandejáragui
Mávapa ojesalváta ág̃a ‘og̃uahẽ vove Jehová ára tuicháva ha ojekyhyjetereiha’? (Malaquías 3:23 [4:5, NM].) Jehová heʼi: “Peẽ chemombaʼévape katu che rekojoja omimbíta kuarahýicha oguerúva tesãi imbaʼerendýpe, ha peẽ vyʼágui pepopóta vakaraʼýicha osẽva ikorágui” (Malaquías 4:2).
Jesucristo hína ‘tekojoja omimbíva kuarahýicha’ ohesapéva entéro okyhyjévape Jehovágui ha omombaʼéva héra (Juan 8:12). Chupekuéra g̃uarã ‘ogueru tesãi imbaʼerendýpe’. Upéva heʼise koʼág̃a ikatuha oĩ porã Jehová ndive ha avei pe múndo pyahúpe okueraitetaha hikuái opaichagua mbaʼasýgui ha oikóta pyʼaguapýpe (Apocalipsis [Revelación] 22:1, 2). Upérõ ningo javyʼaitereíta ku “vakaraʼýicha osẽva ikorágui”. Ñapensávo koʼã mbaʼe porãre ñañehaʼãvaʼerã jajapo ñande pyʼaite guive rréi Salomón heʼivaʼekue: ‘Pekyhyje Ñandejáragui ha pejapo hembipota. Upéva niko tembiaporã tuichavéva orekóva yvypóra’ (Eclesiastés 12:13).