“Pejepytasókena ha pehechatapeína mbaʼéichapa Jehová peneguenohẽ jejopy vaígui”

“[Jehová] oĩ chendive ha chepytyvõ, ndakyhyjéi mbaʼevégui. Máva piko ojapóta cherehe mbaʼeve?” (SALMO 118:6.)

1. Mbaʼe ijetuʼúvapa ombohovaipotaite yvyporakuéra?

 YVYPORAKUÉRA ombohovaipotaite heta mbaʼe vai ojehechaʼỹva gueteri. Jesús oñeʼẽvaʼekue ñane tiémpore heʼírõ guare hemimboʼekuérape: “Upérõ, tuicha ojehasa asýta, ojehasaʼỹhaguéicha ko Yvy ári iñepyrũmby guive. Ha arakaʼeve peichagua jehasa asy ndojehumoʼãvéi.  Ha Ñandejára nomombykýirire umi ára umi imbaʼéva rehehápe, avave [ndojesalvaivaʼerãmoʼã]. Umi imbaʼéva, haʼe oiporavovaʼekue rehehápe katu omombykýta” (Mateo 24:​21, 22).

2. Mbaʼérepa ojejoko gueteri pe jehasa asy guasu?

² Ndajahecháiramo jepe, umi ánhel ojokohína upe jehasa asy guasu. Pe apóstol Juan ohechavaʼekue mbaʼérepa ojapohína hikuái upéva. Jaleemi mbaʼépa Jesucristo ohechauka chupe: ‘Ahecha irundy ánhel oñemboʼyvahína umi irundy yvy arigua eskínape. Ahecha avei ambue ánhel oúva kuarahy resẽguio, ha oguerekóva pe Ñandejára séllo, ha hatã osapukái umi irundy anhelkuérape: “Ani pejapo mbaʼe vai pe yvy, terã mar, terã yvyra matakuéra rehe, roseñalapa peve isyvápe umi Ñandejára rembiguaikuérape”’ (Apocalipsis [Revelación] 7:​1-3, BNP).

3. Mbaʼe raẽpa oikóta oñepyrũvo pe jehasa asy guasu?

³ Pe ‘señál’ oñemoĩva umi ‘Ñandejára rembiguaikuéra’ ojeporavovaʼekuére, oñemohuʼãmbotaitéma. Upévare umi cuatro ánhel ohejapotaitéma oñepyrũ pe jehasa asy guasu. Ojapóvo hikuái upéva, mbaʼe raẽpa oikóta? Peteĩ ánhel heʼi: “Péicha ojeityvaʼerã yvýpe Babilonia, pe siuda guasu, ha arakaʼeve ndojehechaveivaʼerã” (Apocalipsis [Revelación] 18:​21, BNP). Ojevyʼaitétapa yvágape oñehundi vove Babilonia guasu, umi rrelihión japu oĩva ko múndope! (Revelación 19:​1, 2.)

4. Mbaʼépa oikóta oñemohuʼãvo pe jehasa asy guasu?

⁴ Upérõ umi tetãnguéra oñomoirũta ha opuʼãta Ñandejára siervokuérare. Ohundipátapa chupekuéra? Haʼetéta upéichava. Upéicharamo jepe, umi ánhel yvagapegua oĩva Jesucristo poguýpe ohundipaitéta koʼã tetãnguérape (Revelación 19:​19-21). Ha ipahápe, Satanás ha umi ánhel hendive oĩva ojepoíta peteĩ hendápe ikatuʼỹhápe ojapove mbaʼeve ivaíva. Ndaikatumoʼãvéima oporombotavy, opytátagui hikuái ñapytĩhápe mil áño pukukuére. Ovyʼaitétapa pe aty guasu ohasátava upe jehasa asy! (Revelación 7:​9, 10, 14; 20:​1-3.)

5. Mbaʼépa ikatúta ojapo umi ojepytasóva Jehová ykére?

⁵ Koʼã mbaʼe ñanemopirĩva oikopotaitéma. Entéro koʼã mbaʼe rupive ojehecháta Jehová añoite orekoha derécho ogoverna hag̃ua. Ñapensami ko mbaʼére: jajepytasóramo Jehová ykére, ikatúta ñaipytyvõ oñemombaʼeguasu hag̃ua héra ha ojejapopaite hag̃ua hembipota. Ajépa tuichaite mbaʼéta ñandéve jajapo upéva!

6. Hiʼag̃uimbaitéma rupi pe jehasa asy guasu, mbaʼépa iporã jahechami?

⁶ Jajepreparapañaína ñambohovái hag̃ua umi mbaʼe? Jajeroviápa Jehová ikatutaha ñandesalva? Jajeroviápa hese ñanepytyvõtaha jajejopy vaive jave, ha ojapotaha upéva haʼe oikuaaháicha? Ñambohovái hag̃ua koʼã porandu, ñanemanduʼavaʼerã mbaʼépa heʼi apóstol Pablo umi Romayguápe: ‘Opa mbaʼe ojeʼevaʼekue yma Ñandejára Ñeʼẽme, ojeʼe ñanerekomboʼe hag̃ua. Ikatu hag̃ua ñaaguanta, ha umi mbaʼe ojeʼéva rupive ñanekonsola jahupyty hag̃ua pe ñahaʼarõva’ (Romanos 15:4). Umi mbaʼe ojehaivaʼekue apytépe ikatútava ñanepytyvõ, oĩ umi Israelgua oñemosasõhague Egipto poguýgui. Hiʼag̃uimbaitéma rupi pe jehasa asy guasu, tuichaiterei ñanemokyreʼỹta jahecha umi mbaʼe Jehová ojapovaʼekue osalva hag̃ua umi Israelguápe.

Jehová oguenohẽ isirvokuérape jejopy vaígui

7. Mbaʼépa oiko Egíptope áño 1513-pe, Jesús ou mboyve?

⁷ Jahechami mbaʼépa oikovaʼekue áño 1513-pe, Jesús ou mboyve. Jehová omboúma nueve plága Egíptope. Ohasa rire upe nueveha, pe rréi omosẽ Moiséspe ha heʼi chupe: “Tereho koʼágui ha anive reju. Cháke rohecha jevýramo remanóta!”. Ha Moisés heʼi chupe: “Oikóta erehagueichaite. Ndacherechamoʼãvéi!” (Éxodo 10:​28, 29).

8. Mbaʼépa ojapovaʼerã umi Israelgua nomanoséiramo, ha mbaʼépa oiko?

⁸ Koʼág̃a Jehová heʼi Moiséspe omboutaha ipahávo peteĩ mbaʼe ivaietereíva upe tetãre. Pe 14 de abib térã nisán, umi kuimbaʼe Egiptogua raʼy ypykue ha mymbakuéra raʼy  ypykue omanóta. Upéicharamo jepe, umi Israelgua famíliape ndojehumoʼãi mbaʼeve ojapopaitéramo Ñandejára heʼíva chupekuéra Moisés rupive. Ohypyivaʼerã peteĩ ovecha raʼy ruguykue umi hóga rokẽ márkore, ha nosẽivaʼerã upégui. Mbaʼépa oiko upe pyhare? Moisés voi omombeʼu: “Pyhare pyte [Jehová] ojuka Egíptope opa taʼýra ypykue”. Pyaʼe porã, pe rréi ohenói Moisés ha Aarónpe ha heʼi chupekuéra: “Pepuʼã ha pesẽ ore retãgui peẽ ha opa Israelgua ha tapeho pemombaʼeguasu [Jehovápe] pejehaguéicha”. Umi Israelgua pyaʼe osẽ. Haʼekuéra oĩ tres millón rupi, ha osẽ avei hendivekuéra hetaiterei Egiptoygua (Éxodo 12:​1-7, 29, 31, 37, 38).

9. Mbaʼe tapépa oiporavo Ñandejára onohẽ hag̃ua Israelguápe Egíptogui, ha mbaʼérepa?

⁹ Pe tape hiʼag̃uivéva oho pe már Mediterráneo rembeʼýre ha ohasáva Filistea rupi. Péro umi hénte upepegua ndaijaʼéi hesekuéra. Upévare, ani hag̃ua oñorairõ umi Israelgua, Jehová ogueraha chupekuéra desiértore, pe már Rojo gotyo. Hetaitereíramo jepe hikuái, ndohói sarambikuépe. La Biblia heʼi umi Israelgua osẽhague Egíptogui “ñorairõrãicha” (Éxodo 13:​17, 18).

“Pehechatapeína mbaʼéichapa Jehová peneguenohẽ jejopy vaígui”

10. Mbaʼérepa Ñandejára heʼi Israélpe opyta hag̃ua Pi Hahirot rovái?

¹⁰ Upeichaháguinte oiko peteĩ mbaʼe oñeimoʼãʼỹva. Jehová heʼi Moiséspe: “Ere Israelguápe tojevy ha topyta Pi Hahirot renondépe, Migdol ha [már] paʼũme, Baal Zefón rovái”. Ojapóvo ko mbaʼe, umi Israelgua ojecha pe már Rojo ha montáña paũme. Ndaipórivaicha ohasa hag̃ua hikuái. Péro Jehová oikuaa mbaʼépa ojapóta. Heʼi Moiséspe: ‘Ahejáta Faraón oñembopyʼahatã ha osẽta pende rapykuéri. Che katu ahechaukáta chereko mimbipa Faraón ha ijehérsitope, oikuaa hag̃ua hikuái cheha opa mbaʼe Jára’ (Éxodo 14:​1-4).

11. a) Mbaʼépa ojapo upe rire faraón, ha mbaʼépa ojapo umi Israelgua? b) Mbaʼépa heʼi Moisés umi Israelguápe?

¹¹ Pe faraón oimoʼã ojavyhague ohejávo oho umi Israelguápe. Upémaramo oiporavo 600 kárro ojeporúva oñeñorairõ hag̃ua ha ojepoi hapykuerikuéra. Ohechávo umi Egiptoygua ehérsitope, umi Israelgua oñemondýi ha osapukaipa Moiséspe: “Ndaipóri piko Egíptope yvy roñeñotỹ hag̃ua, ajeve orereru romano hag̃ua yvy ojeikoʼỹháme?”. Ojeroviaitereígui Jehováre, Moisés heʼi: ‘Ani pekyhyje mbaʼeve rehe! Pejepytasókena ha pehechatapeína mbaʼéichapa Jehová peneguenohẽ jejopy vaígui. Jehová voi oñorairõta pende rehehápe ha natekotevẽi pejepyʼapy mbaʼeve rehe’ (Éxodo 14:​5-14).

12. Mbaʼéichapa osalva Jehová umi Israelguápe?

¹² Heʼihaguéicha Moisés, Jehová voi oñorairõ umi Israelgua rehehápe. Upe rire, pe ánhel oñepyrũ oipytyvõ chupekuéra. Peteĩ milágro rupive, Jehová ánhel oguerova tapykuépe pe arai oĩvaʼekue umi Israelgua renondépe. Hesakã porã aja chupekuéra, iñypytũmbaite umi Egiptoyguápe (Éxodo 13:​21, 22; 14:​19, 20). Heʼívo chupe Jehová, Moisés oipyso ipo. La Biblia heʼi: ‘Jehová ombou peteĩ yvytu atã pyhare pukukue kuarahy resẽguio ombojaʼóva pe már. Upémaramo Israelgua ohasa pe már Rojo yvy rupi ha pe y oñemboʼy ijyke rehekuéra mokõive hendáguio’. Umi Egiptoygua ojepoi hapykuerikuéra, péro Jehová oĩ Israelgua ndive. Ñepyrũrã Jehová ojapo sarambi umi Egiptoygua apytépe, ha upéi heʼi Moiséspe: ‘Eipyso nde po pe y ári ha toʼa hiʼarikuéra, ikárro ha umi soldadokuéra ári’. Ojapóvo upéicha, oñehundipaite hikuái ha ndopytái ni peteĩ soldádo (Éxodo 14:​21-28; Salmo 136:15).

Mbaʼépa ñanemboʼe ojesalvávo Israélpe

13. Mbaʼépa ojapo umi Israelgua oñeguenohẽrõ guare chupekuéra jejopy vaígui?

¹³ Mbaʼéichapa oñeñandu umi Israelgua ko mbaʼére? Moisés ha umi Israel raʼykuéra oñepyrũ opurahéi Jehovápe: “Che aropurahéita [Jehovápe], tuichaite oñemombaʼeguasúgui [...]. [Jehová] oisãmbyhyvaʼerã ára paha ha opaite ára peve” (Éxodo 15:​1, 18, ÑÑM). Jahechaháicha, Ñandejárape raẽ omombaʼeguasu hikuái. Ojehecháma Jehová añoite ikatuha oporosãmbyhy.

14. a) Mbaʼépa ñanemboʼe Jehovágui umi mbaʼe Israel ohasavaʼekue? b) Mbaʼe téystopa jareko 2008-pe g̃uarã?

 ¹⁴ Mbaʼépa ñanemboʼe koʼã mbaʼe oikovaʼekue? Mbaʼéichapa ñanekonsola ha mbaʼépa ñahaʼarõkuaa? Katuete jahecha Jehová oĩha ñanepytyvõ hag̃uáicha ijetuʼuvehápe, ha ikatuha omyatyrõ oimeraẽ provléma ñambohováiva. Pór ehémplo, jahecha pe már Rojo ndojokoihague umi Israelguápe Jehová omopuʼãrõ guare pe yvytu atã kuarahy resẽguio. Ha avei pe y rupive ojukapaite faraón ehérsitope. Ñapensávo upe mbaʼére, ikatu avei jaʼe pe salmísta heʼihaguéicha: “Ñandejára oĩ chendive, ndakyhyjéi mbaʼevégui. Máva piko ojapóta cherehe mbaʼeve?” (Salmo 118:6). Avei, ñanemokyreʼỹ Pablo heʼivaʼekue Romanos 8:​31-pe: “[Ñandejára] oĩramo ñanendive, piko máva oñemoĩta ñanderehe?”. Tuichaitépa ñanemombarete ã ñeʼẽ! Añetehápe, ombohasapaite pe kyhyje ikatúva jareko ha ñanemokyreʼỹ ñamañávo tenonderã. Upéicha rupi, iporãiterei pe téysto 2008-pe g̃uarã: “Pejepytasókena ha pehechatapeína mbaʼéichapa Jehová peneguenohẽ jejopy vaígui” (Éxodo 14:​13, NM).

15. Mbaʼérepa Jehová onohẽ Israélpe jejopy vaígui, ha mbaʼépa ñanemboʼe upéva?

¹⁵ Mbaʼépa ñanemboʼeve umi Israelgua ohasavaʼekue? Tekotevẽha ñaneñeʼẽrendu Jehovápe tojerure ojeruréva ñandehegui. Umi Israelgua iñeʼẽrenduvaʼekue ojapopárõ guare umi mbaʼe oñekotevẽva Páscuape g̃uarã, ha opytávo hogakuérape upe 14 de nisán pyhare. Ha osẽrõ guare Egíptogui, osẽ hikuái “ñorairõrãicha” (Éxodo 13:18). Upéicha avei koʼág̃a, tekotevẽ jajapo pe ‘tembiguái jeroviaha ha iñarandúva’ heʼíva ñandéve (Mateo 24:45). Jajapysaka porã vaʼerã Ñandejára heʼívare ñandéve. “Ha pepiáramo pende [derécha] térã pende asu gotyo, pehendúta peteĩ ñeʼẽ pende rapykuéri heʼítava peẽme: ‘Kóva hína pe tape, tapeho koʼa rupi’” (Isaías 30:21). Ñañemoag̃uivévo pe jehasa asy guasúgui, ikatu ojeʼe porãve ñandéve umi mbaʼe tekotevẽva jajapo. Ikatúta jahasa koʼã ára ijetuʼútava ñañehaʼãmbaitéramo Jehová siervokuéra jeroviaha ndive.

16. Mbaʼépa ñanemboʼe jahechávo mbaʼéichapa Jehová omosãso umi Israelguápe?

¹⁶ Ñanemanduʼavaʼerã avei, Jehová oguerahahague umi Israelguápe pe már Rojo ha umi montáña paʼũme. Haʼete ku Jehová ojavyvaʼekue ha ndaikatumoʼãitava haʼekuéra osẽ upégui. Péro Jehová oikuaa porã mbaʼépa ojapóta, ha upéicha oñemombaʼeguasu ha osalva chupekuéra. Koʼág̃a avei, ikatu sapyʼánte ndajaikuaái mbaʼérepa ojejapo peteĩ mbaʼe Jehová organisasiónpe. Upéicharamo jepe, jajeroviakuaa Ñandejára ñanesãmbyhyha iñorganisasión rupive. Sapyʼánte ikatu ñaimoʼã umi ndaijaʼéivape ñanderehe oho porãitereiha. Upéva ojehu ndajahechapái rupi umi mbaʼe oikóva. Péro Jehová ikatu ojapo oimeraẽ mbaʼe oñekotevẽva, ojapohaguéicha umi Israelgua rehehápe (Proverbios 3:5).

Jajeroviákena Jehováre

17. Mbaʼérepa jajeroviavaʼerã Ñandejárare?

¹⁷ Oiméne ojeroviaite Jehováre umi Israelgua imanduʼávo mbaʼéichapa arakuépe omoirũ chupekuéra peteĩ arai ha pyharekue katu peteĩ tata rendy. Upéva ohechauka Ñandejára ánhel oñangarekoha ohóvo hesekuéra (Éxodo 13:​21, 22; 14:19). Upeichaite avei koʼág̃a, ikatu jajerovia Jehová oñangarekoha ipuévlore onohẽ hag̃ua chupekuéra jejopy vaígui. Jajeroviakuaa ko promésare: “[Jehová] ndohejareichéne umi hese ojeroviávape” (Salmo 37:28). Ñanemanduʼavaʼerã koʼág̃a avei oñangarekoha ñanderehe umi ánhel. Haʼekuéra ñanepytyvõ rupi, ikatu ‘jajepytaso ha jahecha mbaʼéichapa Jehová ñaneguenohẽ jejopy vaígui’ (Éxodo 14:13).

18. Mbaʼérepa ñaikotevẽ ñamoĩmbaite pe armadúra omeʼẽva Ñandejára?

¹⁸ Mbaʼépa ñanepytyvõta ‘jajepytaso hag̃ua’ Jehová ykére? Ñamoĩvaʼerã ñandejehe pe ekípo térã armadúra Pablo imanduʼahague umi Efesoyguápe. Upépe haʼe heʼi ñamoĩvaʼerãha ‘opa mbaʼe Ñandejára omeʼẽva’. Ñamoĩmbaitepañaína umi mbaʼe ñandejehe? Ko áño 2008-pe, iporãta jahechami oĩmbaitépa ñandejehe pe armadúra ha ñañangareko porãpa hese. Satanás ñandekuaa porã, ha ikatu ñandejopy ñanekangyhápe. Upeichaite, ñañorairõñaína umi  tekove aña yvagapegua ndive. Péro Jehová ñanepytyvõ rupive, ikatúta ñandepuʼaka hesekuéra (Efesios 6:​11-18; Proverbios 27:11).

19. Mbaʼépa ikatu jahupyty jajepytasóramo?

¹⁹ Jesús heʼivaʼekue hemimboʼekuérape: “Pejepytasóke, pehupyty hag̃ua jeikove opaʼỹva” (Lucas 21:19). Ñañehaʼãmbaitékena ñaime hag̃ua umi ojepytasóva ykére. Jajapóramo upéicha, ikatúta ‘jajepytaso ha jahecha mbaʼéichapa Jehová ñaneguenohẽ jejopy vaígui’.

Mbaʼépa ñambohováita?

• Mbaʼépa hiʼag̃uimbaitéma?

• Mbaʼéichapa pe áño 1513-pe Jesús ou mboyve Jehová ohechauka ikatuha oporoguenohẽ jejopy vaígui?

• Mbaʼépa reñehaʼãmbaitéta rejapo koʼág̃a

[Porandu ñahesaʼỹijóva]