Rejepreparapareína rehasa hag̃ua Jehová ára guasu?

“Hiʼag̃uíma [Jehová] ára guasu! Hiʼag̃uíma hína ha pyaʼe ou.” (SOFONÍAS 1:14.)

1-3. a) Mbaʼépa heʼi la Biblia Jehová árare? b) Mbaʼépa hiʼag̃uimbaite jeýma?

 JEHOVÁ ára guasu ndaipukúi veinticuatro órante. Ipukuve, ha upépe Ñandejára ohundíta umi iñañávape. Haʼekuéra okyhyjevaʼerã upe áragui. Upe árape oĩta pytũ, pochy, jekyhyje ha ñehundi (Isaías 13:9; Amós 5:​18-20, Sofonías 1:15). Pe proféta Joel heʼi: “Cháke, hiʼag̃uíma Ñandejára ára! [...] oguerúva ñehundi, omboúva Ñandejára ipuʼakapáva!” (Joel 1:15.) Upéicharamo jepe, upe ára guasúpe Ñandejára oguenohẽta “heko potĩvape jejopy vaígui” (Salmo 7:10).

² La Biblia oiporu jepi pe ñeʼẽ ‘Jehová ára’ oñeʼẽvo umi huísio Ñandejára ogueruvaʼekuére. Jehová ohusgavaʼekue umi Jerusalenguápe hoʼárõ guare hikuái Babilonia poguýpe. Upéva oikovaʼekue áño 607-pe, Jesús ou mboyve (Sofonías 1:​4-7). Upeichagua huísio oikovaʼekue avei áño 70-pe, Ñandejára oiporúrõ guare Roma ehérsito okastiga hag̃ua umi hudiokuérape, omboykehaguére Itaʼýrape (Daniel 9:​24-27; Juan 19:15). Péro la Biblia heʼi ou jeytaha ‘Jehová ára’, ha upépe katu “Ñandejára osẽta oñorairõ umi tetã ndive” (Zacarías 14:​1-3). Ñandejára ohechauka apóstol Páblope upe ára oñepyrũhague 1914-pe oikórõ guare Crístogui rréi yvágape (2 Tesalonicenses 2:​1, 2). Hiʼag̃uimbaitéma rupi Jehová ára, iporãiterei pe téysto ojeporavovaʼekue áño 2007-pe g̃uarã. Upe téysto oĩ Sofonías 1:​14-pe heʼi: ‘Hiʼag̃uíma Jehová ára guasu’.

³ Jaikuaa rupi upe ára guasu hiʼag̃uimaha, koʼág̃a jahechaukavaʼerã jajepreparamaha. Mbaʼéichapa ikatu jajeprepara upérõ g̃uarã? Mbaʼépepa tekotevẽ ñambaʼapove?

Jahechauka jajepreparamaha

4. Mbaʼe ojapo hag̃uápa ourakaʼe Jesús?

⁴ Oñeʼẽrõ guare Jesús upe ára paháre, heʼi idisipulokuérape: “Peẽ avei peñembosakoʼi” (Mateo 24:44). Jesús heʼírõ guare upéva, haʼe voi oĩmavaʼekue omeʼẽ hag̃uáicha hekove ñande rehehápe (Mateo 20:28). Mbaʼéichapa ojeprepararakaʼe Jesús, ha mbaʼépa ñanemboʼe upéva?

5, 6. a) Mbaʼéichapa ñandeprepara jahasa hag̃ua Jehová ára guasu jahayhúramo Ñandejárape ha ñande rapichápe? b) Mbaʼéichapa ohechauka Jesús oporohayhuha?

⁵ Jesús ohayhuvaʼekue Jehovápe ipyʼaite guive. Hebreos 1:9 [BNP] heʼi Jesús rehe: ‘Rehayhu pe hekopeteguáva ha pe mbaʼe vai katu nderehechaséi; upéva rehe Ñandejára nembovyʼave umi neirũnguéragui’. Jesús ohayhuvaʼekue Itúvape ha upévare ojepytaso mbarete ijykére. Upéicha avei jahayhúramo Ñandejárape ha jaiko oipotaháicha, haʼe oñangarekóta ñanderehe (Salmo 31:23). Péicha jajepreparañaína jahasa hag̃ua Jehová ára guasu.

⁶ Jesús oporohayhuetereivaʼekue. Haʼe “oiporiahuvereko chupekuéra. Ohechakuaa haʼekuéra ikaneʼõ ha ikangypaha ku ovecha herekuaʼỹvaicha” (Mateo 9:36). Upévare omombeʼu chupekuéra pe marandu porã. Ñande avei, jahayhúgui Jehovápe ha ñande rapichápe japredika. Upévare nañanekaneʼõi ha péicha jajeprepara jahasa hag̃ua Jehová ára guasu (Mateo 22:​37-39).

7. Og̃uahẽ aja Jehová ára, mbaʼérepa ikatu javyʼa?

⁷ Jesús ovyʼavaʼekue ojapóvo Jehová rembipota (Salmo 40:8). Ñapensa ha ñande pyʼaporãramo Jesús ojapohaguéicha, javyʼáta jaservívo Ñandejárape (Hechos 20:35). Jaservívo vyʼápe Jehovápe jajehekýita heta mbaʼe vaígui ha ñaime porãvéta jahasa hag̃ua Jehová ára guasu (Nehemías 8:10).

8. Mbaʼérepa ñañemoag̃uivaʼerã Jehováre ñemboʼe rupive?

 ⁸ Oñemboʼe rupi ipyʼaite guive Itúvape, Jesús imbareteve ombohovái hag̃ua umi mbaʼe ijetuʼútava chupe. Juan ovautisárõ guare chupe, Jesús oñemboʼevaʼekue, ha avei oiporavo mboyve ijapostolkuérape ohasa peteĩ pyhare oñemboʼehápe (Lucas 6:​12-16). Ñanemopirĩmba jahechávo la Bíbliape mbaʼéichapa Jesús oñemboʼevaʼekue upe pyhare omano mboyve (Marcos 14:​32-42; Juan 17:​1-26). Ha nde, reñemboʼépa upéicha avei? Reñemboʼe meme vaʼerã Ñandejárape ha ani rejapura remohuʼã hag̃ua ne ñemboʼe. Rejerurevaʼerã chupe ijespíritu sánto nepytyvõ hag̃ua ha ani remboyke rehechakuaávo nepytyvõha. Jahechávo mbaʼéichapa hiʼag̃uimbaitéma Jehová ára guasu tekotevẽ ñaime porã ñande Ru yvagapegua ndive. Ñañemboʼe memékena Jehovápe ha upéicha ñañemoag̃uive hese (Santiago 4:8).

9. Mbaʼérepa jaipotavaʼerã oñemomarangatu Jehová réra?

⁹ Jesús avei oñehaʼãvaʼekue omombaʼeguasu Jehová réra, ha upéva oipytyvõ chupe ombohovái hag̃ua umi mbaʼe ijetuʼúva ohasavaʼekue. Upévare heʼi hemimboʼekuérape oñemboʼe hag̃ua: “Toñemomarangatu nde réra” (Mateo 6:​9, BNP). Jaipotáramo oñemomarangatu Jehová réra, ñañehaʼãmbaitéta ani hag̃ua ñamongyʼa. Upéicha jajapóramo, ñaime porãvéta ñahaʼarõ hag̃ua Jehová ára guasu.

Reikotevẽpa reñehaʼãve?

10. Mbaʼérepa iporã enterove jajepyʼamongeta?

¹⁰ Jehová ára og̃uahẽramo koʼẽrõ, mbaʼéichapa reiméta Jehová renondépe? Enterove jajepyʼamongetavaʼerã jahecha hag̃ua oĩpa peteĩ mbaʼe tekotevẽhápe ñañehaʼãve. Ndajaikuaái rupi arakaʼe pevépa jaikovéta, ñañehaʼãvaʼerã koʼẽ koʼẽre ñañemoĩ porãve Jehová ndive (Eclesiastés 9:​11, 12; Santiago 4:​13-15). Upévare, jahechami umi mbaʼe ikatuhápe ñañehaʼãve.

11. Mbaʼépa ikatu rejapo releepa hag̃ua la Biblia?

¹¹ Pe ‘tembiguái jeroviaha’ ñanemomanduʼa meme jalee hag̃ua koʼẽ koʼẽre Ñandejára Ñeʼẽ (Mateo 24:45). Ikatu ñañehaʼã jaleepa la Biblia un áñope, ha jajepyʼamongeta avei hese. Jaleéramo cuatro kapítulo rupi káda día, un áñope jaleepátama umi 1.189 kapítulo. Umi rréi oisãmbyhyvaʼekue Israélpe oleevaʼerã Ñandejára Ñeʼẽ “oikove aja pukukue” ha oiméne Josué ojaporakaʼe avei upéicha (Deuteronomio 17:​14-20; Josué 1:​7, 8). Tekotevẽ avei umi ansiáno omoakãva kongregasión olee meme la Biblia! Upéva katuete oipytyvõta chupekuéra omeʼẽ hag̃ua “pe tekomboʼe hekopeguáva” (Tito 2:​1, BNP).

12. Mbaʼépa jajapovaʼerã jaikuaa rupi hiʼag̃uimbaitemaha Jehová ára?

¹² Jaikuaa rupi hiʼag̃uimbaitemaha Jehová ára ñanemomyivaʼerã jaha meme hag̃ua rreunionhápe ha ñakomenta ikatuha peve (Hebreos 10:​24, 25). Jajapóramo upéicha, ñandekatupyryvéta japredika ha ñamboʼe hag̃ua umi ipyʼaporãvape (Hechos 13:48). Ikatu avei jajapove kongregasión rehehápe. Umíva apytépe ñaipytyvõ umi ijedávape ha ñamokyreʼỹ umi imitãvévape. Javyʼaitétapa jajapóramo upéicha!

Jaiko porãve ñande rapicha ndive

13. Mbaʼépa ñañeporanduvaʼerã pe teko pyahúre?

¹³ Hiʼag̃uimbaitéma rupi Jehová ára, ikatu avei ñañehaʼãve ñañemonde hag̃ua pe ‘teko pyahúgui’ Ñandejára oipotaháicha (Efesios 4:​20-24). Ñamoheñói aja umi mbaʼe porã ñande rekovépe, ojehechakuaáta ñanderehe jaikoha espíritu sánto oipotaháicha (Gálatas 5:​16, 22-25). Ikatúpa remombeʼu peteĩ mbaʼe ohechaukáva nde ha ne família peñemondemaha pe teko pyahúgui? (Colosenses 3:​9, 10.) Pór ehémplo, rejekuaápa kongregasiónpe ha oimehápe ndepyʼaporãhaguére? Restudia meméramo la Biblia remoheñóita ãichagua mbaʼe porã ha upéicha ikatúta rehasa Jehová ára guasu.

14. Ñaikotevẽramo jajejokokuaave, mbaʼérepa jajerurevaʼerã espíritu sánto?

¹⁴ Mbaʼépa ikatu rejapo nde pire vai mantéramo ha rehechakuaa tekotevẽha rejejokokuaave? Pe espíritu sánto ikatu nepytyvõ upearã. Upévare, ejerure Jehovápe ijespíritu. Nemanduʼavaʼerã Jesús heʼihague: ‘Pejerure meme, ha oñemeʼẽvaʼerã peẽme; peheka meme ha pejuhúne; pembota meme ha ojepeʼáne. Ha peẽ pene ñañáva pemeʼẽkuaáramo mbaʼe iporãva  pende raʼykuérape, pende Ru yvagapeguáma katu omeʼẽvaʼerã Espíritu Sánto umi ichupe ojerurévape’ (Lucas 11:​9-13, BNP).

15. Mbaʼépa jajapovaʼerã oiméramo ndajajoguerahaporãi peteĩ ermáno térã ermána ndive?

¹⁵ Ikatu nderejoguerahaporãi peteĩ ermáno térã ermána ndive. Upéicharamo, reñehaʼãmbaitevaʼerã reñemoĩ porã hendive. Rejapóvo upéicha, remoheñóita joayhu ha pyʼaguapy kongregasiónpe (Salmo 133:​1-3). Rejapovaʼerã Jesús heʼiháicha Mateo 5:​23, 24-pe ha Mateo 18:​15-17-pe. Kuarahy oike mboyve reñemoĩ porã jey vaʼerã nde rapicha ndive. Rehupyty hag̃ua upéva, reperdonasevaʼerã nde rapichápe. Pablo heʼi ko mbaʼére: “Pende pyʼaporã uvei ojupe, ha pejoporiahuvereko. Peheja rei ojupe mbaʼe vai pejapóva ojuehe, [Ñandejára] oheja rei haguéicha peẽme” (Efesios 4:​25, 26, 32).

16. Mbaʼépepa umi omendáva tekotevẽ ojoporiahuvereko?

¹⁶ Umi omendáva tekotevẽ ‘ojoporiahuvereko’ ha oñoperdona. Rehechakuaáramo reiporiahuvereko ha rehayhuvevaʼerãha ne rembireko térã ne ménape, ikatu rejerure Ñandejárape tanepytyvõ ha avei releevaʼerã la Biblia. Mbaʼe ñanemboʼe 1 Corintios 7:​1-5-pe ani hag̃ua oñomoakãratĩ umi omendáva? Katuete ko mbaʼépe tekotevẽ umi omendáva ojoporiahuvereko.

17. Mbaʼépa tekotevẽ ojapo umi hembiapo vai vaʼekue?

¹⁷ Ha oiméramo rejapóraʼe peteĩ mbaʼe ivaíva? Upéicharamo, aníkena rehaʼarõ. Rejerurevaʼerã ansianokuérape tanepytyvõ. Oñeʼẽ rire nendive ha oñemboʼévo nderehe nepytyvõta reime porã jey hag̃ua Jehovándi (Santiago 5:​13-16). Reñembyasy ha reñemboʼevaʼerã Jehovápe. Nderejapóirõ upéicha, reñeñandu vaivéta. Upéicha oñeñanduvaʼekue David. Upéicharamo jepe, tuicha ipyʼaguapy omombeʼu rire Jehovápe hembiapo vaikue! Upe rire ohaivaʼekue: “Ovyʼa upe ojeheja reívape hembiapo vaikue ha umívagui oiko tesarái. Ovyʼa upe hovamokõiʼỹva, Ñandejára oheja reívape hembiapo vaikue” (Salmo 32:​1-5). Upeichaite, Jehová operdona umi oñembyasývape ipyʼaite guive (Salmo 103:​8-14; Proverbios 28:13).

Ani rejeheʼa ko múndore

18. Mbaʼéichapa rehechavaʼerã ko múndo?

¹⁸ Katuete nde rehaʼarõ asy pe múndo pyahu iporãitéva oprometevaʼekue ñande Ru yvagapegua. Péro mbaʼépa repensa ko múndore, umi ndoikuaaséiva Ñandejárape? Satanás, oisãmbyhýramo jepe ko múndo, ndaipuʼakaivaʼekue Jesucrístore (Juan 12:21; 14:30). Ha katuete nde avei ndereipotái haʼe ipuʼaka nderehe. Upévare, jajepyʼamongeta porã vaʼerã apóstol Juan heʼivaʼekuére: “Ani pehayhu ko múndo, térã umi mbaʼe ipype oĩva”. Iporã jajapo upéva, ‘ko múndo niko opa vaʼerã, opa koʼã mbaʼe ojehayhúva ipype oĩva reheve, pe ojapóva Ñandejára rembipota katu opytavaʼerã opa ára g̃uarã’ (1 Juan 2:​15-17, BNP).

19. Mbaʼépa jaipota mitãrusukuéra kongregasionpegua omotenonde?

¹⁹ Peẽ tuvakuéra, peipytyvõpa pende raʼykuérape ani hag̃ua ojeheʼa ko múndore? (Santiago 1:27.) Umi ñande rapicha oguenohẽháicha pira ipindáre, Satanás avei ojapose upéva umi mitãre, ha upearã oiporu heta mbaʼe. Oĩ heta ojopýva mitãrusukuérape ojeheʼa hag̃ua Satanás múndore. Upéicharõ jepe, Jehová organisasión añoite opytáta ko múndo oñehundi vove ha ñande ñaiméma hendive. Upévare, enterove ñañehaʼãvaʼerã ñamokyreʼỹ mitãrusukuérape ‘ombaʼapove hag̃ua Ñandejárape g̃uarã’ (1 Corintios 15:58). Koʼýte tuvakuéra omokyreʼỹvaʼerã ifamíliape omotenonde hag̃ua umi mbaʼe ikatúva oipytyvõ chupekuéra ohasa hag̃ua Jehová ára guasu. Upéicha añoite ovyʼáta omombaʼévo Ñandejárape.

Jahechakuaavaʼerã mbaʼépa ñaneraʼarõ Jehová ára guasu rire

20. Mbaʼérepa ñanemanduʼa meme vaʼerã pe jeikove opaveʼỹvare?

²⁰ Ikatu ñahaʼarõ Jehová ára jajepyʼapyʼỹre ñanemanduʼa meméramo jeikove opaveʼỹvare (Judas 20, 21). Katuete reimeséta upe múndo pyahúpe ikatutahápe reiko tesãime, ha rembaʼapotahápe opa ára g̃uarã remombaʼeguasu hag̃ua Jehovápe ha reikuaave chugui. Ikatúta jaikuaave Ñandejárape opa árare, saʼieterei  gueteri umi mbaʼe jaikuaáva chugui (Job 26:14). Iporãitépa umi mbaʼe ñaneraʼarõva!

21, 22. Mbaʼépa ñaaprendéta umi oñemoingove jeýtavagui, ha mbaʼépa ñamboʼéta chupekuéra?

²¹ Ñandejára múndo pyahúpe, umi oñemoingove jeýva ikatúta omombeʼu ñandéve heta mbaʼe. Upépe oĩta Enoc, omombeʼútava ñandéve mbaʼérepa ndokyhyjéi omombeʼu hag̃ua Jehová heʼivaʼekue umi iñañávape (Judas 14, 15). Noé avei omombeʼúta ñandéve mbaʼéichapa ojapovaʼekue pe árka. Abrahán ha Sara katu heʼíta ñandéve mbaʼéichapa oñeñandu hikuái osẽrõ guare Úrgui ha oiko umi óga kárpape. Ñapensami avei Ester omombeʼutaha mbaʼéichapa oipytyvõ hetãme ani hag̃ua oiko Hamán ojaposevaʼekue (Ester 7:​1-6). Ha Jonás, ohasavaʼekue mbohapy ára pe pira ryepýpe, térã Juan el Bautista omombeʼúvo mbaʼéichapa oñeñandu ovautisárõ guare Jesúspe (Lucas 3:​21, 22; 7:28). Hetaite mbaʼe piko jaikuaáta!

²² Upe Mil Áño Jesucristo ogoverna aja, ikatu nde avei remboʼe Ñandejára ñeʼẽ umi oñemoingove jeýtavape (Proverbios 2:​1-6). Koʼág̃a javyʼa jahechávo ñande rapicha oikuaave Ñandejárape ha iñeʼẽrendu Chupe. Jajepyʼamongetami mbaʼeichaitépa javyʼáta jahechávo umi tapicha yma oikovaʼekue omombaʼetereiha pe ñamboʼéva chupekuéra.

23. Mbaʼépa jajapovaʼerã koʼág̃a?

²³ Hetaiterei mbaʼe porã jahupyty jaservihaguére Jehovápe ha ndaikatuvéima jaikuaapa (Salmo 40:5). Jaagradeseterei Jehovápe umi mbaʼére, ha koʼýte umi mbaʼe ñanepytyvõva ñaime porã hag̃ua hendive (Isaías 48:​17, 18). Upévare, tañaime ñaimeháicha, jaservivaʼerã Ñandejárape ñande pyʼaite guive ñahaʼarõ aja Jehová ára guasu.

Mbaʼépa rembohováita?

• Mbaʼépa pe Jehová ára?

• Mbaʼéichapa ikatu rehechauka rejepreparahareína rehasa hag̃ua Jehová ára?

• Hiʼag̃uimbaitéma rupi Jehová ára guasu, mbaʼépepa ikatu ñañehaʼãve?

• Mbaʼépa ikatu rejapose ohasa rire Jehová ára guasu?

[Porandu ñahesaʼỹijóva]