Emombaʼékena opavavépe

‘Peẽ voi peñomotenonde ha peñomombaʼevaʼerã.’ (ROM. 12:10.)

1. Mbaʼépa oiko oparupiete?

 OĨ LUGÁR ojehecha vaiha peteĩ mitã oñemboʼýramo peteĩ kakuaa oguapýva ykére. Upévare oguapyvaʼerã yvýpe orrespetágui chupe. Ha noñemolomoivaʼerã avei peteĩ kakuaápe. Upeichaite, káda tetãme idiferénte mbaʼéichapa ohechauka hikuái ojorrespetaha. Upéva ñanemomanduʼa pe léi oñemeʼẽvaʼekuére Moiséspe: ‘Pe iñakãrague morotĩmbámava renondépe reñemboʼyvaʼerã remombaʼe ha nembaʼerechakuaa rupi hendive’ (Lev. 19:​32, ÑÑB). Ñambyasýramo jepe, oparupiete avavépema ndojerrespetavéi.

2. Máva mávapepa Ñandejára Ñeʼẽ heʼi ñamombaʼevaʼerãha?

² Ñandejára Ñeʼẽme ñanemokyreʼỹ ñamombaʼe hag̃ua opavavépe, térã jarrespeta hag̃ua ñande pyʼaite guive chupekuéra. Pór ehémplo, heʼi ñandéve ñamombaʼe hag̃ua Jehová ha Jesúspe (Juan 5:23). Heʼi avei ñamombaʼe hag̃ua ñane famíliape, ñane ermanokuérape ha opaichagua ñande rapichápe (Rom. 12:10; Efe. 6:​1, 2; 1 Ped. 2:17). Péro, mbaʼéichapa jahechauka ñamombaʼeha Jehovápe? Mbaʼéichapa jahechauka jarrespetaha ñane ermanokuérape? Jahechamíta koʼã mbaʼe.

Jarrespeta Jehovápe ha ñamombaʼe héra

3. Mbaʼéichapa ikatu ñamombaʼe Jehovápe?

³ Ñamombaʼe hag̃ua Jehovápe jarrespetavaʼerã héra. Haʼe ningo ñandeporavo ‘imbaʼerã’ jagueraha hag̃ua héra (Hech. 15:14). Tuichaiterei mbaʼe ningo Ñandejára oheja haguére ñandéve jaiporu héra. Proféta Miqueas heʼi: ‘Ambue tetãnguéra iñeʼẽrendúta ñandejarakuéra guaʼúpe, ore katu roikóta Jehová rérape opa árape’ (Miq. 4:5). Ñañehaʼãvaʼerã ñanderekoporã ‘jaiko rupi Jehová rérape’. Apóstol Pablo heʼi haguéicha umi kristiáno Romayguápe ndajaikóiramo Ñandejára heʼiháicha, ‘oñeñeʼẽ vaíta’ Hérare (Rom. 2:​21-24, BNP).

4. Mbaʼérepa ñande jaikuaauka Ñandejára réra?

⁴ Ñamombaʼe avei Jehovápe japredika jave. Yma Jehová heʼi umi Israelguápe oiko hag̃ua itestígoramo, péro haʼekuéra ndojapói Jehová heʼíva (Isa. 43:​1-12). Haʼekuéra ningo pyʼỹinte naiñeʼẽrendúi Jehovápe ha ‘ombopochy chupe’ (Sal. 78:​40, 41). Upe rire, Jehová ndoguerohoryvéima chupekuéra. Péro ñande jahayhu ha jaipotaiterei oñemombaʼeguasu Jehovápe. Upévare ñamombaʼeterei ikatu haguére ñañeʼẽ Hese ha jaikuaauka Héra. Koʼág̃a ningo jaikuaáma mávapa Ñandejára ha mbaʼépa ojapóta, upévare koʼýte japredikavaʼerã. Ñañeñandu apóstol Pablo heʼi haguéicha: ‘Ajapovaʼerã voínte ko tembiapo. Aichejáranga che namoherakuãiramo pe marandu porã’ (1 Cor. 9:​16, JMP).

5. Mbaʼérepa tekotevẽ jajerovia Jehováre ñamombaʼe hag̃ua chupe?

⁵ David ohaivaʼekue: ‘Umi oikuaáva nde réra ojerovia nderehe, Nde, Ñandejára nderehejáigui umi oñemoag̃uívape nderehe’ (Sal. 9:​10, ÑÑB). Jaikuaa porãramo Jehovápe jarrespetáta héra ha jajeroviáta hese, ojapo haguéicha yma isiervokuéra.  Upévare tekotevẽ jajerovia Jehováre ñamombaʼe hag̃ua chupe. Ha jahechami mbaʼéichapa la Biblia ohechauka upéva. Pór ehémplo umi Israelgua ndojeroviavéirõ guare Jehováre, oporandu Moiséspe: ‘Arakaʼe peve piko Israelgua ndacherrespetamoʼãi? Hetaiterei vésema ahechauka chupekuéra ndaiporiha mbaʼeve ikatuʼỹva che ajapo. Mbaʼépa ajapovevaʼerã ojerovia hag̃ua cherehe hikuái?’ (Núm. 14:11). Péro jajeroviáramo Jehová oñangarekotaha ñanderehe ha ñanepytyvõtaha jahasa asy jave, jahechaukañaína ñamombaʼeha chupe.

6. Mbaʼérepa jarrespetavaʼerã Jehovápe ñande pyʼaite guive?

⁶ Jesús heʼi jarrespetavaʼerãha Jehovápe ñande pyʼaite guive. Ha oñeʼẽrõ guare umi nomombaʼeguasúivare Jehovápe, heʼi: “Koʼã tetãygua chemombaʼeguasu ijurúpente, ipyʼapy katu mombyry chehegui” (Mat. 15:​8, JMP). Upévare, jahayhúgui Jehovápe jarrespetavaʼerã chupe ñande pyʼaite guive (1 Juan 5:3). Aníkena ñanderesarái Jehová oprometevaʼekuégui: ‘Che amombaʼéta umi chemombaʼeguasúvape’ (1 Sam. 2:​30, ÑÑB).

Umi ansiáno orrespeta hapichakuérape

7. a) Mbaʼérepa umi ansiáno orrespetavaʼerã enterove ermanokuérape? b) Mbaʼéichapa apóstol Pablo ohechaukavaʼekue orrespetaha iñermanokuérape?

⁷ Apóstol Pablo heʼivaʼekue: ‘Peẽ voi peñomotenonde ha peñomombaʼevaʼerã’ (Rom. 12:10). Upévare umi ansiáno raẽ orrespetavaʼerã enterove ermanokuérape. Ha upearã ikatu osegi apóstol Pablo ehémplo (jaleemína 1 Tesalonicenses 2:​7, 8). Pablo ovisita jave umi kongregasión, umi ermáno oikuaa ndojeruremoʼãiha chupekuéra peteĩ mbaʼe ndaikatumoʼãiva haʼe voi ojapo. Péicha Pablo ohechaukavaʼekue orrespetaha iñermanokuérape, upévare ojerrespeta avei chupe. Ha apóstol Pablo heʼírõ guare: ‘Ajerure peẽme pejapo hag̃ua che ajapóva’, katuete iñeʼẽrendu hikuái ohechávo iñehémplo (1 Cor. 4:16).

8. a) Mbaʼéichapa Jesús ohechauka orrespetaha hemimboʼekuérape? b) Mbaʼépa ikatu ojapo umi ansiáno osegi hag̃ua Jesús ehémplo?

⁸ Umi ansiáno ikatu avei orrespeta iñermanokuérape omombeʼúramo chupekuéra mbaʼérepa ojejapovaʼerã peteĩ mbaʼe. Upéicha ojapóta hikuái Jesús ojapo haguéicha. Jesús heʼi hemimboʼekuérape: ‘Pejerure pe kóga járape, tombou omonoʼõvaʼerã’. Péro heʼi chupekuéra mbaʼérepa ojapovaʼerã upéicha: ‘Heta pe ñemitỹngue, omonoʼõva katu mbovy’ (Mat. 9:​37, 38, BNP). Ha heʼírõ guare hemimboʼekuérape oñatendevaʼerãha, heʼi avei chupekuéra mbaʼérepa: ‘Ndapeikuaáigui arakaʼépa oúta pende jára’ (Mat. 24:​42, ÑÑB). Péicha jahecha Jesús heʼi hague hemimboʼekuérape mbaʼépa ojapovaʼerã ha mbaʼérepa. Ha ohechauka avei orrespeta ha otrata porãha chupekuéra. Upévare omoĩ ehémplo iporãva umi ansiánope g̃uarã.

Jarrespetákena umi omoakãvape Jehová organisasión ha ñaneñeʼẽrendu chupekuéra

9. Mbaʼépa jahechauka jarrespetáramo umi omoakãvape Jehová organisasión? Emombeʼu mbaʼérepa embohovái upéicha.

⁹ Ñamombaʼe hag̃ua Jehovápe jarrespetavaʼerã avei umi omoakãvape iñorganisasión. Jahechauka ningo jarrespetaha Jehovápe jajapo jave pe ‘tembiguái jeroviaha ha iñarandúva’ heʼíva. Síglo primérope, apóstol Juan oñemoñeʼẽ umi kristiáno ndorrespetáivape umi omoakãvape kongregasión. (jaleemína 3 Juan 9-11).  Apóstol Juan ohaivaʼekuére jahechakuaa avei haʼekuéra ndorrespetaiha umi apóstol omboʼéva ha naiñeʼẽrenduiha chupekuéra. Péro naentéroi ningo upéicha. Jaikuaaháicha umi apóstol oikove aja, ojerrespeta umi omoakãvape kongregasión (Fili. 2:12).

10, 11. Ehechauka la Biblia rupive mbaʼérepa oĩ omoakãva Jehová organisasión.

¹⁰ Jesús heʼi hemimboʼekuérape: ‘Peẽ oñoermáno meme’. Upévare oĩ heʼíva ndaiporivaʼerãha omoakãva kongregasión (Mat. 23:8). Péro Ñandejára Ñeʼẽme Evréo ha Griégope omombeʼu Jehová omeʼẽ hague hetaitereípe autorida. Pór ehémplo, Noé, Abrahán, Isaac ha Jacóbpe. Avei hueskuérape ha umi rréi evréope. Péicha jahechakuaa Jehová oisãmbyhyha isiervokuérape yvypóra rupive. Ha ndojerrespetáirõ guare umi omoakãvape, Jehová okorrehi chupekuéra (2 Rey. 1:​2-17; 2:​19, 23, 24).

¹¹ Primer síglope, umi apóstolpe oñemeʼẽ autorida, ha umi ermáno orrespeta chupekuéra (Hech. 2:42). Pór ehémplo apóstol Pablo heʼi mbaʼépa ojejapovaʼerã kongregasiónpe (1 Cor. 16:1; 1 Tes. 4:2). Upéicharamo jepe, haʼe iñeʼẽrendu avei umi omoakãvape chupe (Hech. 15:22; Gál. 2:​9, 10). Jahechaháicha, apóstol Pablo orrespetavaʼekue umi omoakãvape Jehová organisasión.

12. Mbaʼépa ñanemboʼe umi ehémplo jahechavaʼekue?

¹² Koʼã ehémplo ñanemboʼe mokõi mbaʼe. Ñepyrũrã, heʼiháicha la Biblia, pe ‘tembiguái jeroviaha ha iñarandúva’ oiporu pe Cuerpo Gobernante omeʼẽ hag̃ua autorida umi kuimbaʼe ikatupyrývape omoakã hag̃ua kongregasión. Ha omeʼẽ avei autorida ambue ermánope omoakã hag̃ua umi ansiánope (Mat. 24:​45-47; 1 Ped. 5:​1-3). Mokõiha katu ñanemboʼe jarrespetavaʼerãha ñanemoakãvape, umi ansiáno avei ojapovaʼerã upéicha. Péro, mbaʼéichapa ikatu ñamombaʼe umi omoakãvape Jehová organisasión?

Jarrespetákena umi superintendénte de sirkuítope

13. Mbaʼéichapa ikatu jahechauka ñamombaʼeha umi superintendénte de sirkuítope?

¹³ Pablo heʼi: ‘Rojerure ningo peẽme, ore ermanokuéra, pemombaʼe hag̃ua umi ombaʼapóva ha penemoakãvape, ha umi penerekomboʼévape. Pemombaʼe hembiapokuéra ha pehayhu chupekuéra. Peiko pyʼaguapýpe oñondive’ (1 Tes. 5:​12, 13, ÑÑB). Umi superintendénte de sirkuíto ningo hetaiterei ‘hembiapo’. Upévare ñamombaʼevaʼerã chupekuéra. Upéva ningo ikatu jajapo ñaneñeʼẽrendúramo umi konsého omeʼẽvape ñandéve. Ha heʼi jave ñandéve mbaʼépa oipota jajapo pe ‘tembiguái’, ‘Ñandejára arandu’ ñanepytyvõta  ñaneñeʼẽrendu hag̃ua (Sant. 3:17).

14. Mbaʼéichapa jahechauka jarrespetaha umi superintendénte de sirkuítope? Ha mbaʼépa jahupytýta jajapóramo upéicha?

¹⁴ Péro, mbaʼépa jajapóta ojeruréramo ñandéve peteĩ mbaʼe ndajajapóiva jepi? Upéicha oikóramo, naiporãmoʼãi jaʼe: “Koʼápeko ore ndorojapoite upéicha”, térã “Upévako ikatu oiko nde róga ládo mbaʼe, péro ore kongregasiónpe nahániri”. Ani hag̃ua jajapo upéicha ñanemanduʼavaʼerã Jehová mbaʼeha la kongregasión ha Jesús omoakãha. Ñahendu porã ha jajapóramo umi konsého omeʼẽva ñandéve superintendénte de sirkuíto, jahechaukañaína jarrespetaha chupe. Apóstol Pablo ningo oguerohoryeterei umi ermáno Corintoyguápe iñeʼẽrendu haguére superintendénte Títope (2 Cor. 7:​13-16). Koʼág̃a rupi avei, ñahendu porãramo umi konsého omeʼẽva superintendénte de sirkuíto javyʼavéta japredika ha ñaporomboʼe jave (jaleemína 2 Corintios 13:11).

‘Pemombaʼe opavavépe’

15. Mbaʼéichapa ikatu jahechauka ñamombaʼeha ñane ermanokuérape?

¹⁵ Apóstol Pablo ohai: ‘Ani ne ñeʼẽ pohýi umi itujávape eñeʼẽ guei chupekuéra nde ruramoguáicha, ha umi mitãrusúpe ne ermanorõguáicha. Ha ig̃uaig̃uívape, nde syramoguáicha, ha umi kuñataĩme ne reindyramoguáicha, teko potĩme. Emombaʼe ha eipytyvõ umi viúdape’ (1 Tim. 5:​1-3). Péicha Ñandejára Ñeʼẽ heʼi ñamombaʼevaʼerãha enterove ermanokuérape. Péro mbaʼépa jajapóta jajoavýramo peteĩ ermánondi? Ndajarrespetamoʼãvéimapa chupe? Térãpa ñamañáta umi mbaʼe porã ojapóvare Ñandejára servísiope? Umi omoakãva kongregasión oñatende porã vaʼerã ko mbaʼére, orrespetavaʼerã iñermanokuérape ha iñumildevaʼerã (1 Ped. 5:3). Upéicha, kongregasiónpe ikatu ñamombaʼe ha jarrespeta ñane ermanokuérape (jaleemína Juan 13:​34, 35).

16, 17. a) Mbaʼépa ñanepytyvõta jarrespeta hag̃ua umi oñemoĩvape ñanderehe ha ñande rapichakuéra japredikávape? b) Mbaʼéichapa ikatu ñamombaʼe opaichagua tapichápe?

 ¹⁶ Ñande ningo ndahaʼéi ñane ermanokuérapente jarrespetáva. Apóstol Pablo ohaivaʼekue péicha: ‘Ikatu aja jajapo iporãva opavavére, jajapovaʼerã’ (Gál. 6:10). Upéva ningo ijetuʼu jajapo hag̃ua oĩramo ñane irũ ñande travahohápe térã koléhiope ñandetrata vaíva. Upéicha jave, iporã ñanemanduʼa ko mbaʼére: “Ani ndepochy oĩ haguére iñañáva” (Sal. 37:1). Upéva ñanepytyvõta jarrespeta hag̃ua umi oñemoĩvape ñanderehe japredika haguére. Avei ñañehaʼãvaʼerã japredika jave ñaneumílde, jarrespeta ñande rapichakuérape ha ñañeʼẽ chupekuéra pyʼaporãme (1 Ped. 3:15). Ha ñañemonde lájare jepe ikatu jahechauka jarrespetaha ñande rapichakuéra japredikávape.

¹⁷ Upeichaite, ñaiméramo ermáno térã ambue ñande rapicha ndive, jasegivaʼerã ko konsého: ‘Pemombaʼe opavavépe, pehayhu pene ermanokuérape, pemombaʼeguasu Ñandejárape, pemombaʼe mburuvicha guasúpe’ (1 Ped. 2:17).

Mbaʼépa ñambohováita?

Mbaʼéichapa ikatu jahechauka jarrespetaha...

• ... Jehovápe?

• ... ansianokuérape ha superintendénte de sirkuítope?

• ... ñane ermanokuéra kongregasionpeguápe?

• ... ñande rapichakuéra japredikávape?

[Porandu ñahesaʼỹijóva]

[Nóta oĩva taʼanga ndive páhina 23]

Umi kristiáno ypykue orrespetavaʼekue pe Cuerpo Gobernántepe

[Nóta oĩva taʼanga ndive páhina 24]

Oparupiete ko yvy ape ári ansianokuéra orrespeta umi superintendénte de sirkuítope, omoĩ rupi chupekuéra pe Cuerpo Gobernante