Jehová ohendu umi oñemboʼévape ipyʼaite guive
Jehová ohendu umi oñemboʼévape ipyʼaite guive
‘Toikuaa hikuái nde, nderérava Jehová, nde añoiteha pe Ijyvatevéva.’ (SAL. 83:18, NM.)
1, 2. Mbaʼépa oikóma heta ñande rapicháre? Mbaʼépa ñahesaʼỹijóta ko artíkulope?
PETEĨ kuñakarai róga ládo oiko peteĩ mbaʼe vai ha ojepyʼapyeterei anga haʼe upévare. Haʼe ningo onasevaʼekue peteĩ família katólikape. Upéicha rupi, oho peteĩ paʼi rendápe oipytyvõmi hag̃ua chupe, péro ni nosẽi orresivi chupe. Upémaramo oñemboʼe: “Ndoroikuaáiramo jepe Ñandejára [...], aikuaa reimeha. Ha ehejamíntena toroikuaa!”. Upe riremínte og̃uahẽma hendápe testigos de Jehová, oipytyvõ ha omboʼe chupe oikuaaséva. Omboʼe chupe Ñandejára heraha Jehová. Upéva haʼe omombaʼeterei, ha heʼi: “Maʼẽmína, péva ningo Ñandejára réra che michĩ guive aikuaaséva!”.
2 Heta ñande rapichárema oiko péicha. Oikuaa hikuái Ñandejára réra oleévo Salmo 83:18. Traducción del Nuevo Múndope heʼi: ‘Toikuaa hikuái nde, nderérava Jehová, nde añoiteha pe Ijyvatevéva’. Ha ndépa reñeporandúmava mbaʼérepa ojehaivaʼekue Salmo 83? Mbaʼe mbaʼépa ohechaukáta enterovépe Jehová añoite haʼeha Ñandejára? Mbaʼe mensáhepa oreko ñandéve g̃uarã ko salmo? Koʼã mbaʼe ñahesaʼỹijóta ko artíkulope. *
Oñepuʼã Jehová siervokuérare
3, 4. Mávapa oiméne ojaporakaʼe pe Salmo 83, ha mbaʼérepa oñeʼẽ?
3 Ko salmo ningo oiméne ojaporakaʼe Asaf familiare. Haʼe ningo levíta ha músiko katupyry David ogovernaha tiémpope guare. Oñepyrũ mboyve pe Salmo 83 heʼi voi haʼeha ‘Asaf purahéi’. Pe salmísta ningo ojerure Jehovápe odefende hag̃ua isãmbyhy ha oikuaauka hag̃ua héra. Ko salmo oiméne ojejaporakaʼe Salomón omano riréma. Mbaʼérepa jaʼe upéva? Pórke umi Tiroygua oiko porã Israel ndive David ha Salomón ogovernárõ guare. Péro, upe rire ko Salmo 83 ojehaírõ guare, umi Tiroygua oñomoirũ Israel enemigokuéra ndive opuʼã hag̃ua hese.
4 Pe salmísta omombeʼu oĩha diez tetã Israel jerére oñomoirũva ohundi hag̃ua Ñandejára siervokuérape. Heʼi: ‘Umi Edom, Ismael ha Moabgua, ha umi hagrita, Guebal, Ammón, Amaleq ñemoñare, Filistea, Tiro ha Asiriaygua omoirũ chupekuéra’ (Sal. 83:6-8, ÑÑB). Mbaʼérepa oñeʼẽ ko salmo? Oĩ ningo heʼíva pe salmísta oñeʼẽha Jehosafat tiémpope oñomoirũmbárõ guare oñorairõ hag̃ua Israel ndive Ammón, Moab ha umi Seirgua (2 Cró. 20:1-26). Oĩ katu heʼíva pe salmísta oñeʼẽha opa tetã opuʼãvaʼekue Israel rehe.
5. Mbaʼéichapa Salmo 83 oipytyvõ avei koʼág̃a Ñandejára siervokuérape?
5 Hesakã porã ñandéve Jehová ojapouka hague ko salmo, Israel rehe oñepuʼãmbárõ guare. Ko salmo ningo ñanepytyvõ ha ñanemokyreʼỹ avei koʼág̃a rupi. Heta vésema Ñandejára enemigokuéra ñanerundise avei. Ha katuete ñanepytyvõta ág̃a Gog de Magog ha iñirũnguéra ohundise vove enterove omombaʼeguasúvape Ñandejárape (jaleemína Ezequiel 38:2, 8, 9, 16).
Mbaʼépa ñamotenondevaʼerã
6, 7. a) Mbaʼépa heʼi pe salmísta oñemboʼérõ guare? b) Mbaʼe rehépa ojepyʼapyve pe salmísta?
6 Ñañatendemi mbaʼépa heʼi pe salmísta ipyʼaite guive oñemboʼérõ guare: ‘Ñandejára, ani rekirirĩtei, ani repyta rejapoʼỹre mbaʼeve. Nderehechái piko umi nderayhuʼỹva opuʼãha nderehe. Ne retãygua rehe oñemoĩ hikuái. Oñemoĩmba peteĩ ñeʼẽme opuʼã hag̃ua nderehe’ (Sal. 83:1-3, 5).
7 Mbaʼe rehépa ojepyʼapyve pe salmísta? Ojepyʼapýneraʼe ijehe ha ifamíliare. Upéicharõ jepe, haʼe ojepyʼapyve Jehová réra rehe, oñemboʼe anive hag̃ua oñemongyʼa Héra, ha oipytyvõ hag̃ua Israélpe oñepuʼã haguére hese. Jagueropuʼaka aja heta mbaʼe vai ko ára pahápe, iporãta ndajajepyʼapyetereíriramo ñandejehe pe salmístaicha (jaleemína Mateo 6:9, 10).
8. Mbaʼérepa opuʼã Israel rehe umi tetãnguéra?
8 Pe salmísta omombeʼu Israel enemigokuéra heʼíva: ‘Jaha ñahundi Israel opyta hag̃ua tesaráipe’ (Sal. 83:5; [83:4, NM]). Umi tetãnguéra ningo ndaijaʼeieterei Ñandejára siervokuérare, péro ndahaʼéi upévarente opuʼãva hese hikuái. Haʼekuéra oipota Israel yvy ha heʼi: ‘Jaha ñañemombaʼe umi yvy Ñandejára mbaʼévare’ (Sal. 83:13 ; [83:12, NM]). Koʼág̃a rupi oikóma avei upéicha.
“Nde róga marangatu”
9, 10. a) Mbaʼépepa ojeʼe yma Ñandejára “róga marangatu”? b) Mbaʼe mbaʼépa ohupyty umi ungido ha umi “ambue ovechakuéra”?
9 Yma ningo ojeʼe ‘Ñandejára róga marangatu’ pe yvy oñeprometevaʼekuére Israélpe. Ñanemanduʼamínte mbaʼéichapa opurahéi umi Israelgua osẽrõ guare Egíptogui: ‘Reisãmbyhy pyʼaporãme ne retãygua resalvavaʼekuépe. Nde po mbaretépe reraha chupekuéra, nde róga marangatu peve’ (Éxo. 15:13). Upe rire, upe lugárpe oñemoĩ Jerusalén, pe témplo, umi saserdotekuéra, ha upépe oisãmbyhy Jehová rérape umi rréi David familiaréva (1 Cró. 29:23). Ndareíri Jesús heʼivaʼekue Jerusalén rehe: “Mburuvicha guasu siuda” (Mat. 5:35, BNP).
10 Áño 33-pe katu oñepyrũ peteĩ tetã pyahu: ‘Israel Ñandejára mbaʼéva’ (Gál. 6:16, JMP). Upe tetã ningo haʼe umi ungido omoirũva Jesucrístope. Haʼekuéra ojapo pe Israel ymaguare ndojapoivaʼekue: odefende Ñandejára réra (Isa. 43:10; 1 Ped. 2:9). Ha opromete haguéicha Israélpe, Jehová heʼi avei chupekuéra: ‘Che pende Járata, ha peẽ chembaʼéta’ (2 Cor. 6:16, BNP; Lev. 26:12). Áño 1919 guive Jehová oipytyvõ jey pe ‘Israel Ñandejára mbaʼévape’ térã umi ungídope opytáva gueteri yvy ape ári. Ha upérõ oñemeʼẽ chupekuéra peteĩ “yvy” ombaʼapo hag̃ua Ñandejárape g̃uarã ha upéicha oĩ porã hag̃ua hendive (Isa. 66:8). Áño 1930 guive, omoirũ chupekuéra umi ‘ambue ovecha’ (Juan ). Koʼã ungido ha ambue ovechakuéra ohupyty heta mbaʼe porã. Haʼekuéra ovyʼa ha koʼẽ koʼẽre hetave oĩ oñemoag̃uíva Ñandejárare. Péicha jahechakuaa iporãveha Jehová ñanesãmbyhy (jaleemína 10:16Salmo 91:1, 2). Ha upéva ningo ombopochyeterei Satanáspe.
11. Mbaʼépa ymaite guive oñehaʼãmbaite ojapo Satanás?
11 Ko ára pahápe ningo Satanás omokyreʼỹ gueteri yvyporakuérape oñemoĩ hag̃ua umi ungido ha umi ambue ovechakuéra rehe. Upéicha oikovaʼekue Európape, umi nazi poguýpe ha avei Unión Soviéticape umi komunísta poguýpe. Upéicha oikóma heta tetãme, ha oiko jeýta avei pe ipahaitépe opuʼãvo Gog de Magog Ñandejára siervokuérare. Upe jave, yma oiko haguéicha umi ndaijaʼéiva ñanderehe ikatu oñemombaʼe Jehová organisasión orekóvare. Ha ymaite guive Satanás oñehaʼãmbaite ohundi enterove Jehová siervokuérape anive hag̃ua avave imanduʼa Jehováre. Mbaʼépa ojapo Jehová oñepuʼã haguére péicha isãmbyhýre? Jahechami jey mbaʼépa heʼi pe salmísta.
Jehová heta vésema ogana
12-14. Mbaʼe mokõi ñorairõpa Israel oganavaʼekue táva Meguidó ypýpe?
12 Jahechami mbaʼeichaitépa pe salmísta ojerovia Jehová ikatuha ipuʼaka Israel enemigokuérare. Pe salmo omombeʼu Israel ogana hague mokõi ñorairõ. Mokõive oikovaʼekue Meguidó ypýpe, upe táva ningo opyta peteĩ ñúme. Ha rrío Cisón ohasa upe rupi, haku tiémpope hypa ha itapere. Péro tuicha ijaguaséro jave, y ojagarrapa pe ñu, ha upévare oiméne ojeʼe avei upe rríope “Meguidó y” (Jue. 4:13; 5:19).
13 Peteĩ ñorairõ oikovaʼekue sérro de Morépe, opytáva quince kilometrohápe Meguidógui. Hués Gedeón oho oñorairõ hag̃ua upépe umi Madián, Amaleq ha orientalkuéra ndive (Jue. 7:1, 12). Gedeón ehérsito ningo michĩ, 300 soldádonte oreko. Péro Jehová oipytyvõ chupekuéra ogana hag̃ua iñenemigokuérape. Mbaʼéichapa ojapo upéva? Ñandejára heʼi chupekuéra pyhare oho hag̃ua omongora iñenemigokuéra oĩha. Ha káda soldádo ogueraha hag̃ua peteĩ harrónpe antórcha rendy. Upéi ojoka hikuái umi harrón Gedeón heʼírõ guare chupekuéra, ha opyta umi antórcha reheve. Ombopu avei turu ha osapukái: ‘Jehová ha Gedeón rérape!’. Upéva iñenemigokuérape ombohesareapa, ha oñemoĩ ojojukapa hikuái. Umi nomanoivaʼekue ohasa rrío Jordán okañy hag̃ua, ha heta isrraelíta omuña avei chupekuéra. Péicha omano 120.000 soldádo (Jue. 7:19-25; 8:10).
14 Mokõiha ñorairõ katu oikovaʼekue mónte Tabórpe, opytáva Meguidó ñu mboypýri, seis kilometrohápe sérro de Morégui. Upépe hués Barac ogueraha 10.000 soldádo isrraelíta oñorairõ hag̃ua rréi Jabín ehérsitondi, ha upe ehérsito ningo omoakã Sísara. Koʼã Canaangua oreko 900 kárro ha umi rruédare omoĩ hikuái kyse akua. Israel ehérsito katu ndorekoguasúi mbaʼeve ha oĩ aja hikuái pe mónte Tabórpe, Sísara soldadokuéra oho meme pe ñu gotyo. Upémaramo ‘Jehová ombohesareapa Sísara ha ijehérsitope’, ha sarambi oiko chuguikuéra. Oiméne umi kárro opaʼãmbarakaʼe tuju kuápe ou rupi peteĩ aguaséro ha tuichaiterei ojupi rrío Cisón. Umi isrraelíta katu ojukapaite chupekuéra (Jue. 4:13-16; 5:19-21).
15. a) Mbaʼépa pe salmísta ojerure asy Jehovápe ojapo hag̃ua? b)Mbaʼe rehépa ñanemomanduʼa Ñandejára ñorairõ guasu réra?
15 Pe salmísta tiémpope ningo oĩ avei umi tetã opuʼãva Israel rehe. Upévare haʼe ojerure asy Jehovápe ojapo hag̃ua yma ojapo haguéicha umi tetãnguérare. Heʼi chupe: ‘Ejapo hesekuéra ku Madián, Sísara ha Jabín rehe rejapo haguéicha Cisón ysyrýpe. Omanombavaʼekue En-dor-pe, ha hetekuégui oiko avóno’ (Sal. 83:9, 10, ÑÑB). Ha iñimportánte jahechakuaa Ñandejára ñorairõ guasu Satanás múndo ndive oñemboheraha avei Har-magedón (heʼiséva “Montaña de Meguidó”). Ko téra “Armagedón” ñanemomanduʼa umi ñorairõ guasu oikovaʼekuére Meguidó ypýpe. Umi ñorairõ ningo Jehová oganavaʼekue ha ohechauka ñandéve ogana jeytaha Armagedónpe (Rev. 16:13-16).
Ñañemboʼékena Jehová réra oñemopotĩ hag̃ua
16. Mbaʼérepa oñemotĩ koʼág̃a rupi Jehová enemigokuéra?
16 Ko ára pahápe Jehová ndohejái avei oñehundi iñorganisasión (2 Tim. 3:1). Upévare iñenemigokuéra oñemotĩ. Salmo 83:16 heʼimavaʼekue oikótava: ‘Oñemotĩta hikuái, upéicharamo oĩne heta oñembojáva ne rendápe’. Heta tetã rupi, umi omokirirĩséva Jehová siervokuérape osẽ vai. Umi rupi, heta tapicha ipyʼaporãva ohechakuaa mbaʼéichapa umi ermáno ojepytaso mbarete ha ogueropuʼaka heta mbaʼe vai, upévare ‘oñemboja hikuái Jehová rendápe’. Heta hendápe yma oñembohasa asy testigokuérape, péro koʼág̃a g̃uarã hetaiteve oĩ omombaʼeguasúva Ñandejárape umi rupi. Mombyryetépa Jehová ogana, ha tuichaite oñemotĩ iñenemigokuéra! (Jaleemína Jeremías 1:19.)
17. Mbaʼe oportunidápa ndorekomoʼãvéi koʼẽrõite umi ndaijaʼéiva ñanderehe? Ha mbaʼérepa ñanemanduʼavaʼerã?
17 Péro ñande jaikuaa neʼĩraha opa ko ñorairõ. Upévare jasegi japredika umi ndaijaʼéivape ñanderehe (Mat. 24:14, 21). Umíva ningo koʼẽrõitéma ndorekomoʼãvéi oportunida ojevy hag̃ua hembiapo vaikuégui ha ojesalva hag̃ua. Ha ñande rekovégui iñimportantevehína Jehová réra oñemopotĩ (jaleemína Ezequiel 38:23). Ñandejára Ñeʼẽ heʼiháicha enterove tetã oñomoirũta ohundi hag̃ua Ñandejára siervokuérape. Upe jave, ñanemanduʼavaʼerã pe salmísta ojerurevaʼekuére: ‘Toñemotĩ ha toñemondýi hikuái opa ára g̃uarã, tojesarea ha tomano’ (Sal. 83:17, ÑÑB).
18, 19. a) Mbaʼépa ohaʼarõ umi oñemoĩ mbaretévape Jehová sãmbyhýre? b) Mbaʼépa jajapovaʼerã jaikuaágui Jehová koʼẽrõitéma omopotĩtaha héra?
18 Umi oñemoĩ mbaretéva Jehová sãmbyhýre tuichaiterei oñemotĩta. Ñandejára Ñeʼẽ heʼi umi ‘iñeʼẽrenduseʼỹva marandu porãme oñehunditaha opa ára g̃uarã’, ojejukáta rupi chupekuéra Armagedónpe (2 Tes. 1:7-9). Oñehundíta iñañávape ha ojesalváta umi omombaʼeguasúva Jehovápe, upéicha ojekuaa porãta Haʼe añoiteha Ñandejára teéva. Pe múndo pyahúpe avave ndahesaraimoʼãi ko ñorairõ guasu Ñandejára oganátavagui. Umi ‘oñemoingove jeýva, tahaʼe hekopotĩva térã iñañáva’ oikuaáta ko mbaʼeguasu Jehová ojapovaʼekue (Hech. 24:15). Ohechakuaáta hikuái iporãveha jaiko Ñandejára poguýpe. Ha umi ipyʼaporãva pyaʼe ohechakuaáta Jehová añoiteha Ñandejára teéva.
19 Ñande Ru yvagapegua omeʼẽta ñandéve heta mbaʼe porã. Upévare ñande jajerure avei Jehovápe ombohovái hag̃ua pe salmísta ñemboʼe: ‘Toñemotĩ ha tomano ne enemigokuéra. Toikuaa hikuái nde, nderérava Jehová, nde añoiteha pe Ijyvatevéva’ (Sal. 83:17, 18).
[Nóta]
Mbaʼépa ñambohováita?
• Mbaʼépa ohasavaʼekue Israel ojehaírõ guare pe Salmo 83?
• Mbaʼe rehépa ojepyʼapyve pe salmísta?
• Mávarepa oñemoĩ Satanás ko ára pahápe?
• Mbaʼéichapa Jehová ombohováita pe ñemboʼe oĩva Salmo 83:18-pe?
[Porandu ñahesaʼỹijóva]
[Mápa oĩva páhina 15-pe]
(Emaña pe kuatiañeʼẽre rehecha hag̃ua osẽ hagueichaite ko párte)
Mbaʼépa ohechauka ñandéve umi ñorairõ oikomavaʼekue Meguidó ypýpe?
Rrío Cisón
Haróset
Monte Carmelo
Jezreel ñu
Meguidó
Taanac
Monte Guilboa
Póso de Harod
Moré
En-dor
Monte Tabor
Mar de Galilea
Rrío Jordán
[Nóta oĩva taʼanga ndive páhina 12]
Mbaʼérepa pe salmísta ohairakaʼe Salmo 83?