Jehová ojesareko ñanderehe

‘Ñandejára niko omaʼẽ opa mbaʼe ko yvy ape ári oikóvare oipytyvõ hag̃ua umi ipyʼaite guive ojeroviávape hese.’ (2 CRÓ. 16:9.)

1. Maʼerãpa Jehová ojesareko ñanderehe?

 JEHOVÁ ningo peteĩ Túva ijojahaʼỹva. Ñandekuaa porãiterei, oikuaápa voi “opa mbaʼe jarekóva ñande pyʼapýpe” jepe (1 Cró. 28:9). Ha ndojesarekói ñanderehe ohecha hag̃uánte mbaʼépepa jajavy (Sal. 11:4; 130:3). Ojesareko ñanderehe ñanderayhúgui ha ndoipotáigui mbaʼeve ñanemomombyry chugui. Ha ñanepytyvõse avei jahupyty hag̃ua tekove opaveʼỹva (Sal. 25:​8-10, 12, 13).

2. Mávapepa oipytyvõ Jehová?

² Jehová ohecha opa mbaʼe ha ipoderosoiterei. Ha upévare oipytyvõ isiervokuéra iñeʼẽrendúvape ha omombarete chupekuéra ohasa asy jave. Heʼiháicha 2 Crónicas 16:9: ‘Ñandejára niko omaʼẽ opa mbaʼe ko yvy ape ári oikóvare oipytyvõ hag̃ua umi ipyʼaite guive ojeroviávape hese’. Koʼápe jahecha Jehová oiporuha ipodér oipytyvõ hag̃ua umi ipyʼaite guive oservívape chupe. Upéva heʼise umi ndaipyʼamokõiriva ha iñeʼẽrendúva ipyʼaite guive. Péro Jehová ndaupeichaiete umi ijapúva ha hovamokõiva ndive (Jos. 7:​1, 20, 21, 25; Pro. 1:​23-33).

 Jaguatákena Ñandejárandi

3, 4. Mbaʼépa heʼise jaguata Jehovándi? Máva mávapa oguatavaʼekue Jehovándi?

³ Ñandejára ningo ojapovaʼekue opa mbaʼe ha iñarandueterei, upévare heta oĩ oimoʼãva ndaikatumoʼãiha jaguata hendive. Péro Jehová voi oipota jajapo upéva. Pór ehémplo, yma Enoc ha Noé oguatavaʼekue Jehovándi (Gén. 5:24; 6:9). Moisés avei oikovaʼekue ‘ohecharamoguáicha Ñandejárape’ (Heb. 11:27). Ha rréi David iñumildevaʼekue ha oguata Ñandejárandi. Upévare heʼi: ‘Opa árape Ñandejárare chemanduʼa haʼe oĩgui che ypýpe ndaʼaichéne’ (Sal. 16:8).

⁴ Jaikuaa ningo ndaikatuiha jaguata Jehovándi jaguataháicha ñande rapichándi. Upéicharõ, mbaʼépa heʼise jaguata Jehovándi? Pe salmísta Asaf heʼi: ‘Che aĩ nendive opa árape, nde chegueraha che pógui. Ha chemboguata tape porã rehe cherekomboʼe rupi’ (Sal. 73:​23, 24, ÑÑB). Upéicharõ jaguata Jehovándi heʼise, jajapo opa mbaʼe Haʼe heʼíva, ‘pe tembiguái jeroviaha’ ha la Biblia rupive (Mat. 24:45; 2 Tim. 3:16).

5. Mbaʼérepa ojesareko Jehová ñanderehe? Mbaʼépa ñañeporanduvaʼerã?

⁵ Jehová ningo ohayhu umi oguatávape hendive ha upévare ojesareko hesekuéra peteĩ Túvaicha. Ojesareko isiervokuérare oipytyvõ ha ohekomboʼe hag̃ua. Jehová heʼi: “Che rohekomboʼéta, ahechaukáta ndéve moõ rupípa rehovaʼerã, ha nderehe ajesarekóta opa árape” (Sal. 32:8). Ñañeporanduvaʼerã: “Aguatapaʼaína Jehovándi? Cheñeʼẽrendúpa chupe ha chemanduʼa haʼe ojesarekoha cherehe opa árape? Chemanduʼápa Jehová cherechaha apensa, haʼe, térã ajapo jave peteĩ mbaʼe? Akyhyjépa Jehová chekastigárõ g̃uarã ajapóramo peteĩ mbaʼe ombopochýtava chupe? Térãpa ahecha chupe peteĩ túva, imbaʼeporãva ha oporoperdonávaicha?” (Sal. 51:17).

6. Mbaʼérepa Jehová ikatu ñanepytyvõ pyaʼeve peteĩ túvagui?

⁶ Jehová ikatu ñanepytyvõ jaha mboyve tape vaíre jepe. Pór ehémplo, ikatu haʼe oikuaáma jajaposeha ivaíva (Jer. 17:9). Upéicha jave Jehová ñanepytyvõ pyaʼeve peteĩ túvagui. Haʼe ningo ohechapa umi mbaʼe jarekóva ñande pyʼapýpe, umi mbaʼe ñapensáva jepe oikuaapa (Sal. 11:4; 139:4; Jer. 17:10). Jahechami mbaʼéichapa Jehová oipytyvõvaʼekue Barúcpe, proféta Jeremías sekretário.

Itúva teéicha oñangareko Baruc rehe

7, 8. a) Mávapa Baruc? Mbaʼépa oñepyrũ oheka Baruc? b) Mbaʼéichapa Jehová ojepyʼapy peteĩ túvaicha Baruc rehe?

⁷ Baruc ningo escriba ha ombaʼapovaʼekue Jeremías ndive omeʼẽ hag̃ua peteĩ mensáhe ijetuʼuetereíva umi hudiokuérape (Jer. 1:​18, 19). Péro upe rire Baruc oñepyrũ oheka ‘heta mbaʼe ijupe g̃uarãnte’. Oiméne Baruc hentekuéra oĩ porã rakaʼe ha upévare ipláta hetase avei haʼe. Jehová ohechakuaa Baruc oñepyrũha ipláta rayhu, ha upévare pyaʼe oipytyvõ chupe. Jeremías rupive heʼi chupe: ‘Baruc nde ningo ere: Áina, jeiko asy ha akã rasýmante omeʼẽ chéve Ñandejára! Che resa rasypáma cherasẽ hague ha ndajuhúi pytuʼu. Ha reheka heta mbaʼe ndejupe g̃uarãnte’ (Jer. 45:​1-5).

⁸ Jehová ndojeréi heʼi hag̃ua Barúcpe mbaʼépepa ofalla, péro ndaipochýi hese, peteĩ túvaicha ojepyʼapy hese. Katuete ohechakuaa Baruc ojavýnte hague, ndahaʼéi ipyʼahatãva térã iñañáva. Avei  oikuaa Jerusalén ha Judá oñehundipotaitemaha ha ndoipotái Baruc upe javéte ojapo ivaíva ha omano. Upévare Jehová omomanduʼa chupe ohunditaha umi táva ha iñeʼẽrendúramo osalvataha chupe. Upéva oipytyvõ Barúcpe pyaʼe okambia hag̃ua (Jer. 45:5). Haʼete ku heʼíva chupe Jehová: “Anína ndevýro Baruc. Che ningo ahundítama Judá ha Jerusalénpe hembiapo vaikuére. Ejapóna che haʼéva ndéve ha reikovéta, che añangarekóta nderehe”. Katuete oikéneraʼe Baruc rehe upe Jehová heʼivaʼekue. Upévare ojesalva Jehová ohundírõ guare Jerusalén diecisiete áño rire.

9. Mbaʼéichapa rembohováita umi porandukuéra?

⁹ Jaiporu koʼã téysto ha porandukuéra jajepyʼamongeta hag̃ua. Mbaʼéichapa Jehová otrata Barúcpe, ha mbaʼépa ñanemboʼe chugui? (Jaleemína Hebreos 12:9.) Jaiko rupi ára pahápe mbaʼépa ñanemboʼe pe konsého Jehová omeʼẽvaʼekue Barúcpe? Baruc ningo pyaʼe okambia, mbaʼépa ñanemboʼe upéva? (Jaleemína Lucas 21:​34-36.) Mbaʼéichapa umi ansiáno ikatu ohechauka Jehová ojepyʼapyha isiervokuérare Jeremías ojapo haguéicha? (Jaleemína Gálatas 6:1.)

Jesús ningo ñanderayhu Jehová ñanderayhuháicha

10. Mbaʼépa oipytyvõ Jesúspe omoakã porã hag̃ua kongregasión?

¹⁰ Jesús ou mboyve ko yvy ápe ári, Jehová ohechauka ohayhuha yvyporakuérape umi proféta ha ambue isiervokuéra rupive. Ha koʼág̃a rupi ohechauka Jesucristo rupive, omoakãvahína pe kongregasión (Efe. 1:​22, 23). Upévare Revelaciónpe oñerrepresenta Jesúspe peteĩ ovecha raʼy ‘siete hesávaramo, umíva hína Ñandejára espíritu oñembouvaʼekue ko yvy ápe ári’ (Rev. 5:6). Upéva heʼise Ñandejára oipytyvõ hag̃ua Jesúspe omeʼẽmbaiteha chupe ijespíritu sánto, upévare haʼe ohechakuaa iporãva ha ivaíva. Itúvaicha Jesús ohechapa ñande pyʼapýpe oĩva jepe, mbaʼeve voi nokañýi chugui.

11. Mbaʼéichapa Jesús ojesareko ñanderehe Jehováicha? Ha mbaʼépa Jesús ojapo koʼág̃a?

¹¹ Jesús ndahaʼéi avei peteĩ polisía opeskáva ñanderehe ohecha hag̃ua jajapópa ivaíva. Jehováicha avei ojesareko ñanderehe  ñanderayhúgui. Chupe ningo oñehenói “Túva opa ára g̃uarã”, upéva ñanemomanduʼa ojapótavare Ñandejára goviérno guýpe. Omeʼẽta tekove opaveʼỹva umi ojeroviávape hese (Isa. 9:​6, ÑÑB). Ha koʼág̃a Jesús omoakã pe kongregasión, ha ñanepytyvõ hag̃ua ojevale heta ermánore, iñakãguapy ha imbaʼeporãvare. Oiporu avei umi ansiánope ñanemokyreʼỹ ha ñanekonsola hag̃ua ñaikotevẽ jave (1 Tes. 5:14; 2 Tim. 4:​1, 2).

12. a) Mbaʼépa jahechakuaa umi kárta Jesús omondovaʼekuére umi siete kongregasiónpe? b) Mbaʼéichapa umi ansiáno ohechauka Jesucristo ojepyʼapyha ñanderehe?

¹² Jesús ojepyʼapy Jehová ovechakuérare, upéva jahechakuaa omondórõ guare kárta umi siete kongregasión ansianokuérape (Rev. 2:1–3:22). Umi kártape jahecha Jesús oikuaapaha mbaʼépa oiko káda kongregasiónpe ha ojepyʼapyha hemimboʼekuérare. Ha koʼág̃a, koʼýte ojapo upéicha oñekumpli rupi ko ára pahápe pe profesía Revelacionpegua (Rev. 1:10). * Jesucristo ohechauka meme ñanderayhuha ansianokuéra rupive. Haʼe oiporu koʼã kuimbaʼe ikatupyrýva ñanekonsola, ñanemokyreʼỹ, ha oñemoñeʼẽ hag̃ua ñandéve ñaikotevẽ jave (Efe. 4:8; Hech. 20:28; jaleemína Isaías 32:​1, 2). Jahechakuaápa umi ansiáno ojapóva rupive Jesucristo ojepyʼapyha ñanderehe?

Ñanepytyvõ ñaikotevẽve jave

13-15. Mbaʼéichapa Jehová ombohovái ñane ñemboʼe? Emombeʼumi peteĩ ehémplo.

¹³ Sapyʼánte ñañemboʼe Jehovápe ñanepytyvõ hag̃ua ha haʼe oiporu peteĩ ermáno ñanemokyreʼỹ hag̃ua (Sant. 5:​14-16). Ikatu avei ombohovái ñane ñemboʼe peteĩ diskúrso térã peteĩ puvlikasión rupive. Jahechami peteĩ ermána rehe oikovaʼekue, hese ningo ojejapókuri peteĩ inhustísia. Ha upe riremi oñemeʼẽ ikongregasiónpe peteĩ diskúrso oñeʼẽva upévare. Opa rire la diskúrso oho oñeʼẽ pe ansiánondi. Péro, ojekeha rangue iprovlémare, oagradese chupe hetaite konsého porã omeʼẽ haguére la Biblia rupive, ha heʼi omokyreʼỹ hague chupe umíva. Ovyʼaiterei ningo oho haguére rreunionhápe!

¹⁴ Jahechamíta ótro ehémplo ñanemboʼéva iñimportanteha ñañemboʼe. Mbohapy kuimbaʼe ostudia la Biblia oĩ aja kárselpe, ha oiko chuguikuéra puvlikadór. Haʼekuéra omombeʼu: “Peteĩ árape umi guárdia okastiga enterovépe oikógui peteĩ ñorairõ. Ipochypa lo mitã ha upévare heʼi ág̃a pyhareve noromeʼẽmoʼãiha pe vandéha ojegueruha oréve ore rambosag̃ua. Ndoroikuaái ningo mbaʼépa rojapóta: roñemoĩramo umi mburuvichakuérare romboykéta Jehová heʼíva Romanos 13:​1-pe. Ha ndorojapóiramo haʼekuéra heʼíva, ivaíta orendive”.

¹⁵ Umi ermáno ndaikatúi oñemongeta ohecha hag̃ua mbaʼépa ojapóta hikuái.  Péro koʼẽ rire opilla mbohapyvéva odesidi hague norambosamoʼãihánte. Ha upéicharõ noñemeʼẽmoʼãi voi chupekuéra la vandéha. Ovyʼaiterei ningo hikuái ohechakuaávo Jehová ‘ohendu hague iñemboʼe’ (Sal. 65:2).

Ndajajepyʼapyivaʼerã ñane renonderãre

16. Mbaʼéichapa predikasión rupive Jehová ohechauka ojepyʼapyha umi ipyʼaporãvare?

¹⁶ Ojepredika ningo oparupiete, ha upéva ohechauka avei Jehová ojepyʼapyha umi ipyʼaporãvare (Gén. 18:25). Upearã Jehová oiporu jepi anhelkuéra, omog̃uahẽ hag̃ua marandu porã mombyryvehápe jepe, umi neʼĩravape ojepredika (Rev. 14:​6, 7). Primer síglope peteĩ ánhel omondo Felípepe ohug̃uaitĩ hag̃ua peteĩ kuimbaʼe Etiopiayguápe ha omboʼe hag̃ua chupe la Biblia. Ha mbaʼépa oiko? Pe mburuvicha ohendu pe marandu porã ha ojevautisa (Juan 10:14; Hech. 8:​26-39). *

17. Mbaʼérepa natekotevẽmoʼãi jajepyʼapyeterei ñane renonderãre?

¹⁷ Ko múndo aña oñehundipotávo, hetave ojehasa asýta (Mat. 24:8). Ikatu hiʼupy hepyvéntema, oiko yvyryrýi, ou torménta vai, térã saʼipaite la traváho ha hetave oĩ imboriahúva. Térã ñambaʼapovevaʼerã yma guarégui. Péro ijetuʼuvéramo jepe, ñamotenondéma guive Ñandejára rembipota ha javyʼa jarekomívare, natekotevẽmoʼãi jajepyʼapyeterei ñane renonderãre. Jaikuaa porã ningo Jehová ñanderayhuha ha oñangarekotaha ñanderehe (Mat. 6:​22-34). Iporãta ñanemanduʼami mbaʼéichapa Jehová oñangarekovaʼekue Jeremías rehe, ohundi mboyve Jerusalén áño 607-pe Jesús ou mboyve.

18. Mbaʼéichapa Jehová oñangareko Jeremías rehe oĩrõ guare kárselpe?

¹⁸ Opakuévo pe ñorairõ guasu Jerusalénpe, umi Babiloniaygua oraha préso Jeremíaspe Patio de la Guardia-pe. Mávapa omeʼẽta Jeremíaspe hembiʼurã? Haʼe ningo oĩ kárselpe ha upévare ndaikatúi osẽ oheka hembiʼurã, oñemeʼẽmíva chupémanteko hoʼúta. Ha umi oĩva ijerére katu ndaijaʼéi hese. Upévare, Jeremías ojerovia rangue yvypórare ojerovia Ñandejárare, haʼe oprometékuri oñangarekotaha hese. Okumplíparaʼe? Jehová ningo káda día ‘omeʼẽuka chupe peteĩ pán, opa peve pe pán upe távape’ (Jer. 37:​21, ÑÑB). Jeremías, Baruc, Ébed-mélec ha iñeʼẽrendúva guive ojesalva. Jehová oñangareko hesekuéra ani hag̃ua iñembyahýi, hasykatu térã omano (Jer. 38:2; 39:​15-18).

19. Mbaʼépa jasegivaʼerã jajapo?

¹⁹ Jaikuaa porã ningo ‘Ñandejára omañaha hekopotĩvare ha ojapysaka porã iñemboʼére’ (1 Ped. 3:​12, ÑÑB). Revyʼápa Jehová ojepyʼapy haguére nderehe? Ndepyʼaguapýpa reikuaa rupi Jehová ojesarekoha nderehe? Upéicharõ, toiko oikóva tenonderãme resegivaʼerã reguata Jehová ndive. Aníkena nderesarái Jehová ojesarekoha ñanderehe peteĩ túvaicha (Sal. 32:8; jaleemína Isaías 41:13).

[Nóta]

Mbaʼépa ñambohováita?

• Mbaʼéichapa jahechauka ‘jaguataha Ñandejárandi’?

• Mbaʼéichapa Jehová ojepyʼapy peteĩ túvaicha Baruc rehe?

• Mbaʼéichapa Jesús ohechauka ñanderayhuha Jehováicha omoakãvo kongregasión?

• Mbaʼéichapa jahechauka jajeroviaha Jehováre ko ára pahápe?

[Porandu ñahesaʼỹijóva]

[Nóta oĩva taʼanga ndive páhina 9]

Jehová oiporu Jeremíaspe oñangareko hag̃ua Baruc rehe. Ha koʼág̃a oiporu ansianokuérape oñangareko hag̃ua ñanderehe

[Nóta oĩva taʼanga ndive páhina 10]

Mbaʼéichapa Jehová ñanepytyvõ ñaikotevẽve jave?