Jehová ‘ojesareko’ opavavére
Jehová ‘ojesareko’ opavavére
‘Jehová ojesareko ha ohecha mbaʼéichapa yvyporakuéra oiko.’ (SAL. 11:4.)
1. Mbaʼeichagua amígopa jahayhúta katuete?
OIMÉNE jaguereko peteĩ amígo imbaʼeporãva, ojepyʼapýva ñanderehe, oñemoñeʼẽva ñandéve ani hag̃ua jajapo ivaíva, ha ñanepytyvõva ñaikotevẽ jave. Mbaʼépa ñapensa hese? (Sal. 141:5; Gál. 6:1.) Jahayhúta katuete chupe. Ha upeichaite ningo Jehová ha Jesús avei. Ndaipóri ningo haʼekuéraicha ojepyʼapýva ñanderehe. Nañanepytyvõi oipotágui ñameʼẽ chupekuéra peteĩ mbaʼe, ñanepytyvõse guei ‘jahupyty hag̃ua jeikove opaveʼỹva’ (1 Tim. 6:19; Rev. 3:19).
2. Mbaʼeichaitépa Jehová ojepyʼapy ñanderehe?
2 Pe salmísta David ohechauka mbaʼeichaitépa Jehová ojepyʼapy ñanderehe heʼívo: ‘Jehová ojesareko ha ohecha mbaʼéichapa yvyporakuéra oiko’ (Sal. 11:4). Péicha jahechakuaa Ñandejára ndahaʼeiha omañánteva ñanderehe, ojesareko voi ñanderehe. David heʼi: ‘Nde rejesareko che pyʼapýpe oĩvare, pyharekue reju remaña cherehe, ha nderejuhuichéne ajapoha ivaíva’ (Sal. 17:3). David oikuaa porã Jehová ojesarekoha hese ha ipochytaha opensáramo ivaívare. Jahechápa Jehovápe upéicha avei?
Jehová ohecha ñande pyʼapýpe oĩva
3. Mbaʼe ehémplopa ohechauka Jehová ombohasanteha jaʼe térã jajapo jave vyrorei?
3 Jehovápe g̃uarã iñimportantevéva ningo ñande pyʼapýpe oĩva, térã mbaʼeichaguápa ñande (Sal. 19:14; 26:2). Haʼe ñanderayhueterei ha naipyʼahatãi, upévare ombohasánte jaʼe térã jajapo jave vyrorei. Ñanemanduʼami koʼã ehémplore: Sara ningo Abrahán rembireko, ha oporandúrõ guare chupe peteĩ ánhel mbaʼérepa opuka, haʼe onega. Pe ánhel ohechakuaa okyhyje ha otĩguinte onega hague, upévare ojaʼoʼimínte chupe (Gén. 18:12-15). Upéicha avei Job heʼíramo guare hekopotĩha, ha naimanduʼái Ñandejárare, Jehová osegi ovendesi chupe. Haʼe oikuaa porã Satanás hetaitereíma ombohasa asy hague Jóbpe (Job 32:2; 42:12). Ha pe viúda Sareptaygua, heta ojeplageavaʼekue avei Elíaspe. Péro Jehová ndaipochýi hese, oikuaa porã mbaʼéichapa oñeñandu omano haguére chugui imemby peteĩmi (1 Rey. 17:8-24).
4, 5. Mbaʼéichapa Jehová oiporiahuvereko Abimélecpe?
4 Jehová otrata porã avei umi ndojeroviáivape hese, ohecha rupi opavave pyʼapýpe oĩva. Pór ehémplo ñanemanduʼami Abimélec rehe, peteĩ rréi filistéo ogovernáva táva Guerárpe. Ndoikuaáigui Sara Abrahán rembirekoha, omendamoʼã hese. Péro Abimélec ojapo mboyve upéva, Jehová oñeʼẽ chupe iképe. Heʼi chupe: ‘Aikuaa voi pyʼaporãme rejapo hague, ha upévare ndahejái repoko hese ha rejapo ivaíva che renondépe. Koʼág̃a emeʼẽ jey pe kuña iménape. Iména ningo proféta, ha oñemboʼéta nderehe ani hag̃ua remano’ (Gén. 20:1-7).
5 Jaikuaa porã ningo Abimélec omombaʼeguasuha ñandejára guaʼúpe, ha Jehová ikatuhákuri oaprovecha okastiga hag̃ua chupe. Péro, ohechakuaa pe rréi ndojaposéi hague ivaíva. Jehová oiporiahuvereko Abimélecpe ha ani hag̃ua omano heʼi mbaʼépa ojapovaʼerã operdona hag̃ua chupe. Aje piko igustoite ñamombaʼeguasu peichagua Ñandejárape!
6. Mbaʼéichapa Jesús ojapo opa mbaʼe Jehová ojapohaichaite?
6 Jesús ojapo opa mbaʼe Jehová ojapohaichaite. Upévare, iporãvante ohecha idisipulokuérare ha ojavýramo operdona chupekuéra (Mar. 10:35-45; 14:66-72; Luc. 22:31, 32; Juan 15:15). Jesús ningo heʼi voi maʼerãpa itúva ombou chupe: ‘Ñandejára ningo nomboúi itaʼýrape ko yvy ape ári ohusga hag̃ua yvyporakuérape. Ombou guei osalva hag̃ua opavavépe’ (Juan 3:17, ÑÑB). Jehová ha Jesús ningo ipyʼaite guive ñanderayhu, ha upévare oipota jaikove opa ára g̃uarã (Job 14:15). Jaikuaávo mbaʼeichaitépa Jehová ñanderayhu, hesakã porã ñandéve mbaʼérepa ojesareko ñanderehe, mbaʼépa ohecha ñanderehe ha mbaʼéichapa ñanepytyvõ (jaleemína 1 Juan 4:8, 19).
Ñanderayhúgui ojesareko ñanderehe
7. Maʼerãpa Jehová omaña ñanderehe?
7 Tuichaite piko jajavy oimérõ ñapensa Jehová peteĩ polisíaicha opeskaha ñanderehe yvága guive, ñandepilla hag̃ua jajapo jave ivaíva. Satanás hína pe ombovaíva opa mbaʼe jajapóva ha otaky ñanderehe (Rev. 12:10). Ha jajapóramo jepe iporãva heʼi jajapoha jaipota rupi mbaʼe porãnte (Job 1:9-11; 2:4, 5). Péro Jehová ndahaʼeiete upéicha. Upévare pe salmísta ohai: ‘Nemanduʼátarõ ore rembiapo vaikuére, máva piko oñemboʼýta ne renondépe?’ (Sal. 130:3). Ni peteĩ ndaikatumoʼãi (Ecl. 7:20). Jehová omaña oñangareko hag̃ua ñanderehe mborayhúpe peteĩ túvaicha, ndahaʼéi otaky hag̃ua ñanderehe. Omombeʼu ñandéve mbaʼépepa ñanekangy ha mbaʼépepa jajavy ndoipotáigui oiko ñanderehe mbaʼeve ivaíva (Sal. 103:10-14; Mat. 26:41).
8. Mbaʼéichapa Jehová ñandekorrehi ha ñanerekomboʼe?
8 Jehová ningo ñanderayhueterei, upévare ñandekorrehi ha ñanerekomboʼe la Biblia ha ‘tembiguái jeroviaha rupive’ (Mat. 24:45; Heb. 12:5, 6). Ñanepytyvõ avei kongregasión ha ansianokuéra rupive (Efe. 4:8). Ha ndahaʼéi upévante ojapóva, ojesareko avei ñanderehe oikuaa hag̃ua mbaʼépepa tekotevẽ ñanepytyvõve. Upévare Salmo 32:8-pe, heʼi porã: ‘Che romoarandúta ha rohekomboʼéta, ahechaukáta ndéve moõ rupípa rehovaʼerã, ha nderehe ajesarekóta opa árape’. Aje piko iñimportantete ñaneñeʼẽrendu Jehovápe opa mbaʼépe! Ñaneumildevaʼerã jaikuaa rupi Jehová haʼeha ñane Mboʼehára ha ñande Ru ñanderayhuetéva (jaleemína Mateo 18:4).
9. Mbaʼépa ndajajapoivaʼerã, ha mbaʼérepa?
9 Aníkena ñañemombaʼeguasu térã jaheja ñande jerovia ikangy ha upévare ñañemohatã ñande jaʼévapente ñaimoʼãgui upéicha iporãveha (Heb. 3:13; Sant. 4:6). Hetáre oiko upéicha osegi haguére opensa ivaívare. Upéi nohendusevéima umi konsého oĩva la Bíbliape ha osegi ojapo upe mbaʼe vai. Ha amo ipahápe, oikóma chugui Jehová enemígo. Ivaietéta piko upéva oikóramo ñanderehe! (Pro. 1:22-31.) Jahechami koʼág̃a mbaʼépa oikovaʼekue Caín rehe.
Jehová ohecha opa mbaʼe ha ñanepytyvõ
10. Mbaʼérepa Jehová ndoguerohorýi Caín sakrifísio? Ha mbaʼépa Caín osegi ojapo upévare?
10 Peteĩ árape, Caín ha Abel ombaʼekuaveʼẽ Jehovápe. Péro Jehová nomañái umi mbaʼe oikuaveʼẽvarente, omaña avei mbaʼépa oreko hikuái ipyʼapýpe. Jehová ohecha Abel ojeroviaha hese ha upévare oguerohory isakrifísio. Péro Caín ndojeroviái hese ha upévare ndoguerohorýi isakrifísio (Gén. 4:4, 5; Heb. 11:4). Ñambyasýramo jepe, Caín oñemohatã oimoʼãvapente. Ha okambia rangue, ipochyete iñermánore ha osegi opensa ivaívare (Gén. 4:6).
11. Mbaʼéichapa jaikuaa Caín ipyʼahatã hague? Ha mbaʼépa ñanemboʼe upéva?
11 Jehová ohechakuaa Caín opensáva ivai ha ipeligrosoha. Upévare oñemongeta porã hendive ha heʼi ojapóramo iporãva oguerohorytaha chupe. Péro haʼe nopenái Ñandejára heʼívare ha ojuka iñermánope. Caín ningo ipyʼahatã ha Jehová oporandúramo guare chupe: ‘Moõ piko oĩ ne ermáno Abel?’, haʼe iñeʼẽ arhél chupe: ‘Ndaikuaái che piko che ermáno rerekua mbaʼe?’ (Gén. 4:7-9). Oĩ vaietéma piko raʼe! Ñandejára konsého jepe omboyke! (Jer. 17:9.) Aníkena ñanderesarái ñanemboʼéva Caín rehe oikovaʼekue. Jajaposéramo ivaíva térã ñapensáramo jepe, pyaʼe jaipeʼavaʼerã ñane akãgui (jaleemína Santiago 1:14, 15). Ha jaagradesevaʼerã oĩramo ermáno oñemoñeʼẽva ñandéve la Biblia rupive. Jehová ningo ñanderayhúgui oiporu chupe ñanepytyvõ hag̃ua.
Ndaipóri okañýva chugui
12. Mbaʼérepa Jehová haʼe peteĩ hués hekojojáva?
12 Oĩ ojapóva ñemihápe ivaíva, ha oimoʼã Ñandejára ndokastigamoʼãiha chupe (Sal. 19:12). Péro, jaʼe porãsérõ g̃uarã avave ndaikatúi ojapo ivaíva ñemihápe. Jehová “opa mbaʼe ohecha ha oikuaa” ha jajecháta hendive ñane rembiapokuére (Heb. 4:13, BNP). Jehová ningo peteĩ hués hekojojáva, ojesareko umi mbaʼe jaguerekóva ñande pyʼapýpe. Pór ehémplo ñañembyasýramo ha jajevy ñane rembiapo vaikuégui, haʼe ñaneperdonáta. Haʼe ningo “Ñandejára oporombyasýva, ha oporoporiahuverekóva, ipochykuaaʼỹva, oporohayhuetéva ha nopyrũiva iñeʼẽngue rehe”. Péro, ‘ñane rembiapo vaíramo jajaposégui rei’, térã jakalkula voi jajapo hag̃ua ivaíva, ni mbaʼeveichavérõ ‘ndohejareimoʼãi ñandéve ñane rembiapo vaikue’ (Éxo. 34:6, 7; Heb. 10:26). Upéva jahechakuaa Acán, Ananías ha Safira rehe oikovaʼekuére.
13. Mbaʼérepa ojapo Acán ivaíva?
13 Acán naiñeʼẽrendúi Jehovápe ha ogueru ñemihápe heta mbaʼe táva Jericógui. Ha ifamíliandi oñomi hógape umi mbaʼe ogueruvaʼekue. Haʼe oikuaa porã kuri upéva ombopochytaha Jehovápe. Ojepillárõ guare haʼe heʼi: ‘Che cherembiapo vai Jehová renondépe’ (Jos. 7:20). Acán osegi opensa ivaívare Caín ojapo haguéicha. Ha itaryrýigui ombotavy hapichakuérape. Umi mbaʼe haʼe oñomivaʼekue ningo Jehová mbaʼe, upéicharõ chugui omonda. Upéva ningo ivaieterei, ha mombyry osẽ operde hikuái (Jos. 7:25).
14, 15. Mbaʼérepa Jehová okastiga Ananías ha Safírape? Ha mbaʼépa Jehová ohechauka upe oikovaʼekuére?
14 Áño 33-pe Pentecostés riremi, heta ermáno pyahu ou mombyrýgui ha opyta Jerusalénpe. Upévare umi ermáno upe kongregasionpegua ombyaty pláta oipytyvõ hag̃ua chupekuéra (oñemeʼẽsemívante oñemeʼẽ la pláta). Ananías ha hembireko Safira upe kongregasiongua. Ananías ovende ijyvy ha heʼi hembirekópe nomeʼẽmbamoʼãiha pe yvy repykue. Péro, heʼi umi ermánope omeʼẽmbaha la pláta. Oipotáneraʼe oñemombaʼe chupekuéra upe ojapovaʼekuére. Péro upéicha ojapóvo hikuái ijapu umi ermánope. Peteĩ milágro rupive Jehová oikuaauka Pédrope upéva, ha haʼe ombohovake Ananíaspe. Upepete voi Ananías hoʼa omano ha upe riremi omano avei hembireko, upéicha Jehová okastiga chupekuéra (Hech. 5:1-11).
15 Ndahaʼéi ningo Ananías ha Safira ijerovia kangýnteva. Haʼekuéra okalkula porã kuri mbaʼéichapa ombotavýta umi apóstolpe. Ha ivaiveha katu ‘ombotavyse espíritu sánto ha Ñandejárape’. Péro Jehová ohechauka oñangarekoha ikongregasiónre okastiga rupi chupekuéra. Ha opavave hovamokõiva oikuaáta avei ‘ivaietereiha jaʼa Ñandejára pópe’ (Heb. 10:31).
Ñaneñeʼẽrendúkena opa mbaʼépe
16. a) Mbaʼéichapa Satanás oñehaʼãmbaite ñanemoñuhã? b) Mbaʼépa Satanás ojapo nde reikoha rupi oporomoñuhã hag̃ua?
16 Satanás ningo oñehaʼãmbaite ñanemoñuhã, ha upéicha ñanemomombyry Jehovágui (Rev. 12:12, 17). Upearã haʼe omoakãraku opavavépe hekokyʼa ha oñorairõ hag̃ua. Pór ehémplo koʼág̃a rupi ndahasyiete jahecha hag̃ua taʼanga tieʼỹ, tahaʼe komputadórape térã selulárpe ha mbaʼe. Péro aníkena jaʼa umi ñuhãme. Upéva rangue jajapo David heʼi haguéicha: “Añehaʼãta aiko tape ikareʼỹvare. [...] Che rógape voi aikóta ajapoʼỹre ivaíva” (Sal. 101:2).
17. a) Mbaʼérepa Jehová oikuaauka umi mbaʼe vai ojejapóva? b) Mbaʼépa ñañehaʼãvaʼerã jajapo?
17 Koʼág̃a rupi, Jehová nomombeʼuvéima milágro rupive mávapa hembiapo vai. Upéicharõ jepe, ohecha opa mbaʼe ojejapóva ha oikuaauka haʼe oipota vove. Upévare Pablo heʼi: ‘Oĩ tembiapo vai, voi ojekuaáva ha oĩ tembiapo vai ojekuaáva upe rire ae’ (1 Tim. 5:24, JMP). Jehová ningo oporohayhúgui oikuaauka umi mbaʼe vai ojejapóva. Ha ohayhúgui ikongregasión oñangareko hese ani hag̃ua ikyʼa. Upéicha ohechauka oiporiahuverekoha avei umi oñembyasývape ha ojevýva hembiapo vaikuégui (Pro. 28:13). Iñimportánte ningo ñañehaʼãmbaite jaservi Jehovápe ñande pyʼaite guive ha ñamboyke opa mbaʼe vai!
Jaservíkena Jehovápe ñande pyʼaite guive
18. Mbaʼe ojapo hag̃uápa omokyreʼỹ David itaʼýrape?
18 Rréi David heʼi itaʼýra Salomónpe: ‘Ehayhúke Ñandejárape ha ejapo haʼe heʼíva nde pyʼaite guive. Cháke haʼéko oikuaa opa mbaʼe jarekóva ñande pyʼapýpe ha nokañýi chugui mbaʼeve’ (1 Cró. 28:9). David nomokyreʼỹi itaʼýrape oguerovia hag̃uánte Jehovápe, omokyreʼỹ guei chupe omombaʼe hag̃ua mbaʼéichapa Ñandejára oñangareko isiervokuérare. Jajapópa ñande avei upéicha?
19, 20. Heʼiháicha Salmo 19:7-11, mbaʼépa oipytyvõ Davídpe oñemoag̃uive hag̃ua Jehováre? Mbaʼéichapa ñande ikatu jasegi iñehémplo?
19 Jehová oikuaa umi ipyʼaporãva oñemoag̃uitaha hese ha ikyreʼỹtaha hikuái oikuaávo mbaʼeichaguápa haʼe. Upévare oipota ñañemoag̃ui hese ha jaikuaa mbaʼeichaitépa imbaʼeporã. Péro, mbaʼéichapa ikatu jajapo upéva? Ñahesaʼỹijovaʼerã la Biblia ha jajepyʼamongeta umi mbaʼe porã omeʼẽvare ñandéve (Pro. 10:22; Juan 14:9).
20 Jaleépa la Biblia koʼẽ koʼẽre ha ñañemboʼépa chupe ikatu hag̃uáicha ñantende porã? Jahechakuaápa iñimportanteha jaiko Ñandejára Ñeʼẽ heʼiháicha? (Jaleemína Salmo 19:7-11.) Jajapóramo upéicha ñande jerovia imbaretevéta ha jahayhuvéta Jehovápe koʼẽ koʼẽre. Ha Jehová oñemoag̃uivéta ñanderehe, haʼetéta voi ñandegueraháva ñande pógui tape porã rehe (Isa. 42:6; Sant. 4:8). Upéicharõ Jehová ohechaukáta ñanderayhuha omeʼẽvo ñandéve heta mbaʼe porã, ha oñangarekóvo ñanderehe jahupyty peve pe tekove opaveʼỹva (Sal. 91:1, 2; Mat. 7:13, 14).
Mbaʼépa ñambohováita?
• Maʼerãpa Jehová ojesareko ñanderehe?
• Mbaʼéichapa yma hetágui oiko Ñandejára enemígo?
• Mbaʼépa ñañehaʼãvaʼerã jajapo jaikuaágui Jehová ohechaha opa mbaʼe?
• Mbaʼépa ñanepytyvõta jasegi hag̃ua jaservi Jehovápe ñande pyʼaite guive?
[Porandu ñahesaʼỹijóva]
[Nóta oĩva taʼanga ndive páhina 4]
Mbaʼéichapa Jehová ojesareko ñanderehe peteĩ túvaicha?
[Nóta oĩva taʼanga ndive páhina 5]
Mbaʼépa ñanemboʼe Ananías rehe oikovaʼekue?
[Nóta oĩva taʼanga ndive páhina 6]
Mbaʼépa ñanepytyvõta jasegi hag̃ua jaservi Jehovápe ñande pyʼaite guive?