Mbaʼépa nde rejapóta rehupyty hag̃ua jeikove opaveʼỹva?
Mbaʼépa nde rejapóta rehupyty hag̃ua jeikove opaveʼỹva?
‘Mbaʼépa ikatúne omeʼẽ pe kuimbaʼe hekove rehehápe?’ (MAT. 16:26, BNP.)
1. Mbaʼérepa Jesúspe ndogustái Pedro heʼivaʼekue?
APÓSTOL Pedro ni ndogueroviaséi Jesús heʼírõ guare heta ohasa asytaha ha omano. Haʼe oiméne oipytyvõségui Jesúspe heʼi: ‘Ejeporiahuverekóna, ni mbaʼevéicharõ ndoikomoʼãi nderehe upéicha’. Jesús ojere chugui ha omaña ótro hemimboʼekuérare, opensáva avei Pédroicha, ha heʼi: ‘Tereho koʼágui ne Satanás! Nde niko chemoñepysanga. Nde repensáva ndoúi Ñandejáragui, yvypóragui ou’ (Mar. 8:32, 33; Mat. 16:21-23).
2. Mbaʼépa Jesús ohaʼarõ ojapo hemimboʼekuéra?
2 Jesús upéi ohenói umi hénte aty ha hemimboʼekuérape, ha heʼi: ‘Oiméramo chemoirũséva toñembyesarái ijehegui, tojapo Ñandejára rembipota ohasa asýramo jepe, ha tachemoirũ. Pe hekovére hakateʼỹva, omanóta. Pe omanóva cherehehápe ha pe marandu porã rehehápe katu, oikovéta’ (Mar. 8:34, 35). Koʼápe heʼivaʼekue oiméne oipytyvõ Pédrope ontende hag̃ua mbaʼérepa Jesús omongavaju chupe. Jesús ningo omeʼẽta hekove enterovéva rehehápe, upévare ohaʼarõ hemimboʼekuéra avei omeʼẽ hekove Ñandejára servísiope. Upéicha ojapóramo ohupytýta hikuái jeikove opaveʼỹva (jaleemína Mateo 16:27).
3. a) Mbaʼépa oporandurakaʼe Jesús? b) Mbaʼérepa imanduʼáneraʼe umi ohendúva Jesúspe?
3 Jesús omopensa hag̃ua chupekuéra oporandu: ‘Mbaʼépa ohupytýne pe kuimbaʼe imbaʼepárõ ko múndo ha ohundi hiʼánga?’. Ha ‘Mbaʼépa omeʼẽne pe kuimbaʼe hiʼánga rehehápe?’ (Mar. 8:36, 37, BNP). Jesús heʼi haguéicha nañaganamoʼãi mbaʼeve jahupytýramo heta mbaʼe ko múndope, ha ñahundi ñane anga, térã ñamano. Jaikuaa ningo jaikove ajánte ikatuha jaiporu umi mbaʼe jarekóva. Ha Jesús oporandúrõ guare: ‘Mbaʼépa omeʼẽne pe kuimbaʼe hiʼánga rehehápe?’, umi ohendúva chupe imanduʼáneraʼe Satanás heʼivaʼekuére Job tiémpope: “Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe” (Job 2:4). Umi ndojapóiva Ñandejára rembipota katuete opensáne avei Satanás opensaháicha, ojapóta hikuái oimeraẽ mbaʼe oikove hag̃ua, Ñandejára heʼíva jepe omboykéta. Péro ñande nañapensái upéicha koʼã mbaʼére.
4. Mbaʼéichapa ñantendevaʼerã Jesús oporanduvaʼekue?
4 Ñande ningo jaikuaa Jesús ndoúi hague ñanemonguera ha ñanembopláta heta hag̃ua, ni jaiko porã hag̃ua ko múndope. Ou guei omeʼẽ hekove ikatu hag̃uáicha jaikove opa ára g̃uarã Ñandejára múndo pyahúpe, ha upéva ningo ndaijojahái (Juan 3:16). Jesús oporanduvaʼekue ningo ikatu ñantende péicha: “Maʼerã piko jahupytyse heta mbaʼe ko múndope ñañehundítaramo hapykuéri?”. Vyroreietépe ñasẽta (1 Juan 2:15-17). Ha upéi oporanduvaʼekue ikatu ñantende péicha: “Aimépa ajesakrifika hag̃uáicha aikoveségui opa ára g̃uarã?”. Upéva ojekuaáta opa mbaʼe jajapóvare ha ojehecháta avei jajepytaso mbaretepañaína Jehová ykére (ñambojojami Juan 12:25-re).
5. Mbaʼépa jajapovaʼerã jaikove hag̃ua opa ára g̃uarã?
5 Jesús ndeʼirivaʼekue ikatuha jahupyty jeikove opaveʼỹva ñandejeheguínte. Ha ñanemanduʼavaʼerã avei mbykýramo jepe ñande rekove peteĩ rregaloha. Avave ningo ndaikatúi ojogua hekove ni ndaikatúi ojapo mbaʼeve omerese hag̃ua. Péro, ñande ikatu jaikove opa ára g̃uarã jajeroviáramo Jesús ha Jehováre, pórke Ñandejára katuete ‘ohepymeʼẽ umi oñemoag̃uívape hese’ (Gál. 2:16; Heb. 11:6, ÑÑB). Upévare, jahechaukavaʼerã jajeroviaha jajapóva rupive, pórke ‘ndojehecháiramo ñande jerovia ñane rembiapóre’, ndovaléi mbaʼeverã (Sant. 2:26, BNP). Upéicharõ, jajepyʼamongeta jave Jesús oporanduvaʼekuére, jahechavaʼerã mbaʼe sakrifísiopa ñaime jajapo hag̃uáicha Jehová servísiope.
‘Ni Jesucristo ndojapoivaʼekue haʼe ojaposévante’
6. Mbaʼépa nomboykeivaʼekue Jesús?
6 Jesús ningo nomboykeivaʼekue Jehová rembipota oiko porãségui ha ndohecharamói ko múndo oikuaveʼẽva. Ojesakrifika guei oservi hag̃ua Ñandejárape ha iñeʼẽrendu chupe opa mbaʼépe. Jesús opensarangue ijehénte ojapo opa mbaʼe ombovyʼa hag̃ua Jehovápe (Juan 8:29). Mbaʼéichapa ojesakrifika ombovyʼa hag̃ua Jehovápe?
7, 8. a) Mbaʼépa Jesús ojaporakaʼe ha mbaʼépa ohupyty upévare? b) Mbaʼépa iporã ñañeporandu?
7 Jesús heʼi hemimboʼekuérape: ‘Che ndajúi aporojokuái hag̃ua, aju guei aiko hag̃ua tembiguáiramo ha ameʼẽ hag̃ua cherekove heta rehehápe’ (Mat. 20:28, ÑÑB). Jahecha haguéicha Jesús heʼírõ guare hemimboʼekuérape ‘omeʼẽtaha hekove’, Pedro heʼíkuri chupe opensamie hag̃ua ijehe. Péro Jesús ndohejái oike hese Pedro heʼíva. Haʼe oĩ guei omeʼẽ hag̃uáicha hekove opavave rehehápe. Upévare, Jehová omoingove jey ha omoĩ chupe ideréchape oisãmbyhy hag̃ua (Hech. 2:32, 33). Aje piko iporãite ko ehémplo Jesús ohejavaʼekue ñandéve!
8 Apóstol Pablo omomanduʼa umi kristiáno Romayguápe: ‘Ni Jesucristo ndojapoivaʼekue haʼe ojaposévante’. Ha heʼi avei chupekuéra ojapo hag̃ua upéicha (Rom. 15:1-3, ÑÑB). Upévare iporã ñañeporandu: Aimépa jajesakrifika hag̃uáicha Jesús ojapo haguéicha?
Jehová oipota ñameʼẽ chupe iporãvéva
9. Mbaʼépa jajapo ñañemeʼẽ jave Jehovápe?
9 Pe Léi Jehová omeʼẽvaʼekue Moiséspe heʼi umi tembiguái ojepoivaʼerãha 7 áño ombaʼapo rire. Ha ojepoikuaa avei chuguikuéra pe áño de Jubiléope, peteĩ arete guasu ojejapóva káda 50 áño. Péro umi tembiguái ikatu odesidi opyta ijára ndive omano meve, ovyʼa rupi hendive ha otrata porã haguére chupe (jaleemína Deuteronomio 15:12, 16, 17). Upéicha avei jajapo ñañemeʼẽ jave Jehovápe. Ñande voi jadesidi jajapo hembipota jajaporangue ñandéve ñandegustávante. Upéicha jahechauka jahayhuha Jehovápe ñande pyʼaite guive ha jaserviseha chupe opa ára g̃uarã.
10. Mbaʼérepa jaʼekuaa ñande Jehová mbaʼeha? Ha mbaʼéichapa ñapensa ha jaikovaʼerã upévare?
10 Oiméramo restudia la Biblia testigos de Jehová ndive, repredika ha reho meme rreunionhápe, upéva iporãiterei. Ha rohaʼarõite ningo reñemeʼẽ Jehovápe ha ere peteĩ kuimbaʼe Etiopiaygua heʼi haguéicha Felípepe: ‘Mbaʼépa chejoko ajevautisa hag̃ua?’ (Hech. 8:35, 36). Apóstol Pablo heʼivaʼekue avei umi Corintoyguápe: ‘Peẽ pende rekove ndahaʼevéima penembaʼe. Ñandejára pendejoguamavaʼekue’. Upéicha rejapóramo reime porãta avei Ñandejára ndive (1 Cor. 6:19, 20, BNP). Ñañemeʼẽvo Jehovápe, ñande imbaʼéma, tahaʼe ñahaʼarõ jaikove opa ára g̃uarã ko yvy ape ári térã yvágape. Upévare nañapensaveimavaʼerã ñandejehénte ha ani jaiko ‘ñande rapicha rembiguáiramo’ (1 Cor. 7:23). Tuichaiterei mbaʼe ningo jaservi Jehovápe ha jaheja haʼe ñanesãmbyhy.
11. Mbaʼépa ñameʼẽvaʼerã Jehovápe? Mbaʼéichapa yma ojapovaʼerã umi sakrifísio Ñandejára siervokuéra?
11 Apóstol Pablo heʼivaʼekue iñermanokuérape: ‘Pemeʼẽ pende rekove Ñandejárape sakrifísioramo’, ha peservi chupe pende pyʼaite guive (Rom. 12:1, ÑÑB). Omomanduʼáneraʼe umi kristiánope umi sakrifísio ojapovaʼekuére yma omombaʼeguasu hag̃ua Ñandejárape. Haʼekuéra oikuaa umi mymba iporãvéva ha hesãiva oikuaveʼẽvaʼerãha. Oikuaa ivaietereiha Jehová renondépe oñekuaveʼẽ mymba hasýva térã noĩmbáiva (Mal. 1:8, 13). Upéicha avei ñañemeʼẽ jave Jehovápe jaservi hag̃ua, ñameʼẽvaʼerã Jehovápe iporãnguete, ndahaʼéi tembyrénte. Ñañemeʼẽvo Jehovápe ñamoĩma ipópe ñande rekove ha opa mbaʼe jarekóva jaservi hag̃ua chupe (Col. 3:23). Péro, mbaʼéichapa ikatu jajapo upéva?
Jaiporu porãkena ñane tiémpo
12, 13. Mbaʼéichapa ikatu ñameʼẽ iporãnguete Jehovápe?
12 Jaiporu porãramo ñane tiémpo ningo ñameʼẽta avei Ñandejárape iporãnguete (jaleemína Efesios 5:15, 16). Ha upearã, jahechavaʼerã mbaʼépa ñamotenondéta. Pórke heta vése ikatu ñamotenonde vyʼarã térã ñapensa ñandejehénte ñane imperfékto ha jaiko rupi ko múndo añáme. Jaikuaa ningo oĩha tiémpo opa mbaʼe jajapo hag̃ua, tahaʼe javyʼa térã ñambaʼapo hag̃ua. Upéicha ikatúta jahupyty ñane remikotevẽ ha jajapo porã ñane rembiapo Jehová servísiope (Ecl. 3:1). Ñanemanduʼavaʼerã ñañemeʼẽmagui Jehovápe jaiporu porã vaʼerãha ñane tiémpo.
13 Apóstol Pablo ohóramo guare Aténaspe, ohechakuaa umi “Atenasgua ha tetã ambuegua oikóva upépe”, hekorei ha oikuaasenteha mbaʼe novedápa oĩ (Hech. 17:21, JMP). Koʼág̃a rupi avei oĩ heta hekoreíva, operde itiémpo téle renondépe, videohuegohápe térã Internétpe. Hetaiterei ningo oĩ umi vyʼarã ikatúva hoʼu rei ñane tiémpo jaservirangue Jehovápe. Upévare, jajedeskuidáramo, ikatu ikangy ñande jerovia ha ñapensáma voi ñane rembiapoitereiha ñambaʼapo hag̃ua Jehová servísiope. Ha péicha ñamboyke umi mbaʼe iñimportantevéva (Fili. 1:9, 10).
14. Mbaʼépa ñañeporanduvaʼerã jaservíva guive Jehovápe?
14 Jaservíva guive Jehovápe ñañeporanduvaʼerã: “Amboyképa che tiémpo alee hag̃ua la Biblia, ajepyʼamongeta ha añemboʼe hag̃ua?” (Sal. 77:12; 119:97; 1 Tes. 5:17). “Ajepreparápa rreunionrã ha amokyreʼỹpa ermanokuérape che komentário rupive?” (Sal. 122:1; Heb. 2:12.) La Bíbliape ningo heʼi Pablo ha Bernabé ‘oñeʼẽ hague kyhyjeʼỹme ha jeroviápe Ñandejárare’ (Hech. 14:3, BNP). Ndépa ikatu remohenda porã ne tiémpo repredika hag̃ua térã rejapo hag̃ua nde prekursorádo? (Jaleemína Hebreos 13:15.)
15. Mbaʼéichapa ansianokuéra oiporu porã itiémpo?
15 Apóstol Pablo ha Bernabé ohórõ guare Antioquíape ‘are opyta iñermanokuéra ndive’ omokyreʼỹ hag̃ua chupekuéra (Hech. 14:28). Upéicha avei, koʼág̃a rupi umi ansiáno oiporu porã itiémpo omokyreʼỹ hag̃ua ermanokuérape. Haʼekuéra ningo omoakãramo jepe predikasión, oipytyvõ ermanokuérape, umi ikangývape, hasývape ha ojapo hetave mbaʼe kongregasiónpe. Ha peẽ ermanokuéra peñeporanduvaʼerã: “Ikatúpa ambaʼapove Jehovápe g̃uarã kongregasiónpe? Mbaʼépa añehaʼã ajapo upearã?”.
16. Mbaʼéichapa ikatu ‘jajapo iporãva ñane ermanokuéra rehe’?
16 Heta hendáicha ningo ikatu ‘jajapo iporãva ñane ermanokuéra rehe’ (Gál. 6:10). Pór ehémplo, heta ermáno oñekuaveʼẽ oipytyvõ hag̃ua umi oikoha rupi yvyryrýi, ama guasu, tornádo térã oñekotevẽhápe. Peteĩ ermána orekóva 60 áño ningo oservi Betélpe, ha oiporu jepi ivakasión oipytyvõ hag̃ua mombyrymbyry oñekotevẽhápe. Mbaʼérepa ojapo upéicha? Haʼe heʼi: “Che ningo ndahaʼéi la chevaletereíva, péro ojejeruremíva chéventeko ajapo. Chemokyreʼỹeterei ahechávo mbaʼéichapa imbarete umi ermanokuéra jerovia, oñehundipáramo jepe chuguikuéra orekomíva entéro”. Upéicha avei, oparupiete oĩ ermáno oipytyvõva ojejapo hag̃ua Salón del Reino ha Salón de Asambléa.
‘Aiméta penendive opa árape’
17. Mbaʼépa ñaimevaʼerã jajapo hag̃uáicha jahupytységui jeikove opaveʼỹva?
17 Umi oñemomombyrýva Ñandejáragui ningo oñehundipapotaitéma. Ndajaikuaáiramo jepe arakaʼépa oikóta upéva, jaikuaa porã ko múndo ivaiveha ohóvo ha ‘saʼíma ofaltaha’ oñehundi hag̃ua (jaleemína 1 Corintios 7:29-31). Upévare, ñande ñamombaʼeterei Jesús oporanduvaʼekue: ‘Mbaʼépa omeʼẽne pe kuimbaʼe hiʼánga rehehápe?’. Ñande ningo ñaime jajesakrifika hag̃uáicha Jehová servísiope, jahupytységui ‘jeikove opaveʼỹva’ (1 Tim. 6:19). Upévare tekotevẽterei jasegi Jesús ehémplo ha ñamotenonde Ñandejára Rréino (Mat. 6:31-33; 24:13).
18. Mbaʼe rehépa jajeroviakuaa?
18 Ijetuʼu ningo jasegi hag̃ua Jesús ehémplo. Ha haʼe heʼi haguéicha hetápe ojejuka osegi haguére iñehémplo. Upéicharamo jepe, ñañehaʼãvaʼerã jajapo opa mbaʼe Jesús ojapo haguéicha ha ani ñapensa ñandejehénte. Jajerovia ningo Jesús oprometevaʼekuére hemimboʼekuérape: ‘Opa árape aiméta penendive ára paha peve’ (Mat. 28:20, BNP). Upévare, jaiporu porãkena ñane tiémpo ha ñañehaʼãmbaite jaservi porã Jehovápe. Upéicha jahechaukáta jajeroviaha Jehová ñandesalvataha, ha ñamanóramo katu ñanemoingove jeytaha (Heb. 6:10). Péicha jajapóramo ñamombaʼéta ñande rekove.
Mbaʼépa ñambohováita?
• Mbaʼéichapa Jesús ohechaukavaʼekue omombaʼeha Jehovápe ha yvyporakuérape?
• Mbaʼérepa ñaimevaʼerã jajesakrifika hag̃uáicha Jehová servísiope? Ha mbaʼéichapa jajapo upéva?
• Mbaʼeichagua sakrifísiopa oguerohoryrakaʼe Jehová? Ha mbaʼépa ñanemboʼe upéva?
• Mbaʼéichapa jaiporu porã vaʼerã ñane tiémpo?
[Porandu ñahesaʼỹijóva]
[Nóta oĩva taʼanga ndive páhina 26]
Jesús ojapovaʼekue opa mbaʼe Jehovápe ombovyʼáva
[Nóta oĩva taʼanga ndive páhina 28]
Umi Israelgua iñeʼẽrendúva omeʼẽvaʼekue Jehovápe iporãnguete
[Nóta oĩva taʼanga ndive páhina 29]
Jehová ovyʼa jaiporu porãramo ñane tiémpo