‘Ñañemoĩkena Satanás rehe’ Jesús ojapo haguéicha

‘Peñemoĩ Satanás rehe, ha haʼe penderejáta.’ (SANT. 4:​7, ÑÑB.)

1. Mbaʼépa Jesús oikuaa porã ombohovaitaha ha mbaʼépa oiko upe rire?

 JESUCRISTO oikuaa porã vaʼekue ko yvy ape ári ombohovaitaha Satanáspe. Oikuaa avei mbaʼépa Jehová heʼivaʼekue Satanáspe hardín de Edénpe: ‘Pe kuña [Jehová organisasión yvagapegua] ndive romoingo vaíta, ha iñemoñare ne ñemoñare ndive. [Jesucristo] ne akãre opyrũta, nde katu reisuʼúta chupe ipytápe’ (Gén. 3:​14, 15; Rev. 12:9). Jesucrístope ningo ‘ojesuʼu ipytápe’ ojejukárõ guare chupe. Péro upéva sapyʼamínte oiko, Jehová omoingove jeýgui chupe yvágape. Pe mbói akãre katu opyrũta Jesús, ha ojukaitéta voi chupe (jaleemína Hechos 2:​31, 32 ha Hebreos 2:14).

2. Mbaʼérepa Jehová oikuaa porã Jesús ombohovaitaha Satanáspe?

² Jehová oikuaa porã Jesús ombohovaitaha Satanáspe ko yvy ape ári ha ojapotaha hembipota. Mbaʼérepa? Haʼe ningo Jesúspe raẽvete ojapovaʼekue. Ha Jesús oipytyvõ Jehovápe ojapo hag̃ua opa mbaʼe, upévare oikuaa porãiterei iñeʼẽrendutaha chupe (Pro. 8:​22-31; Col. 1:15). Upéicha rupi omboúrõ guare Jesúspe ko yvy ape ári ha oheja Satanás ombohasa asy chupe omano meve, Jehová oikuaa porã Jesús ogueropuʼakataha opa mbaʼe (Juan 3:16).

 Jehová oñangareko isiervokuérare

3. Mbaʼépa Satanás ojapose Ñandejára siervokuérare?

³ Jesús heʼivaʼekue Satanás rehe: “Ko múndo ruvicha”. Ha heʼi hemimboʼekuérape ojepersegitaha, chupe ojepersegi haguéicha (Juan 12:31; 15:20). Ko múndo oĩva Satanás poguýpe ndochaʼéi kristianokuérare oservi rupi Jehovápe ha opredika haguére (Mat. 24:9; 1 Juan 5:19). Satanás ningo oguenohẽse raẽ Jehová rapégui umi ohótavape yvágape oisãmbyhy hag̃ua Jesús ndive. Péro oñemoĩ avei pe aty guasu ohaʼarõvare oiko opa ára g̃uarã ko yvy ape ári peteĩ hardínpe. Ñandejára Ñeʼẽ heʼi porã ñandéve: ‘Satanás oiko peteĩ león pochýicha oheka mávapepa omokõta’ (1 Ped. 5:​8, JMP).

4. Mbaʼépa ojehupyty Ñandejára siervokuéra ogueropuʼaka haguére opa mbaʼe vai Satanás ojapóva?

⁴ Jehová oñangareko rupi iñorganisasiónre ogueropuʼaka opa mbaʼe vai Satanás ojapóva. Ñapensamína ko mbaʼére. Yma guive heta mburuvicha ipyʼahatãva oñehaʼã ohundi Ñandejára siervokuérape. Péro osẽ vai hikuái, pórke koʼág̃a ningo oĩma siete millones rupi testigos de Jehová, ha cien mil kongregasión rupi ko yvy ape ári. Ha mbaʼépa oiko umi mburuvicha ipyʼahatãvagui? Omanombáma, ni hapykuere ndojekuaavéima.

5. Mbaʼéichapa Jehová okumpli heʼíva Isaías 54:​17-pe?

⁵ Jehová heʼi pe tetã Israélpe: “Ndaipóri gueteri oikuaáva mbaʼépepa ikatúta nerundi. Rembotýta nembojovakeséva juru. Kóva oñemeʼẽta Ñandejára rembiguaikuérape: Che amyakãrapuʼãta chupekuéra” (Isa. 54:​11, 17). Ko ‘ára pahápe’ jahecháma mbaʼéichapa Jehová okumpli oprometevaʼekue (2 Tim. 3:​1-5, 13). Ha jaikuaa rupi Jehová ñanepytyvõtaha ha ndohejamoʼãiha Satanás ñanerundi, jagueropuʼaka gueteri umi mbaʼe vai ojapóva ñanderehe (Sal. 118:​6, 7).

6. Mbaʼépa heʼi proféta Daniel oikotaha umi goviérno oĩvagui Satanás poguýpe?

⁶ Koʼẽrõitéma Jehová ohundíta ko múndo oĩva Satanás poguýpe ha omyatyrõmbáta hembiapo vaikue. Proféta Daniel heʼi mbaʼéichapa oikóta upéva: ‘Oisãmbyhy aja koʼã mburuvichakuéra, Ñandejára yvagapegua omoĩta peteĩ goviérno noñehundimoʼãiva arakaʼeve. Ndoʼamoʼãi ambue tetã poguýpe. Ohundietéta guei ambue goviernokuéra ha ndopamoʼãi arakaʼeve’ (Dan. 2:44). Oñekumpli vove ko profesía, nogovernamoʼãvéima Satanás ni yvyporakuéra imperfékto. Ñandejára goviérno oisãmbyhýta ko yvy tuichakue ha ndajahechamoʼãvéima umi mbaʼe vai ojapóva ko múndo oĩva Satanás poguýpe (jaleemína 2 Pedro 3:​7, 13).

7. Mbaʼéichapa jaikuaa ikatuha ñandepuʼaka Satanás rehe?

⁷ Ñande ningo jajeroviaiterei Jehová akóinte ovendesitaha iñorganisasión ha noñehundimoʼãiha arakaʼeve (jaleemína Salmo 125:​1, 2). Péro ñandesalvátapa avei káda únope? La Biblia ohechauka porã ikatuha ñandepuʼaka Satanás rehe, Jesús ojapo haguéicha. Apóstol Pablo ohaivaʼekue peteĩ ‘aty guasu’ ojesalvataha oiko hag̃ua ko yvy ape ári, oñemoĩramo jepe hese Satanás. Haʼekuéra heʼíta: ‘Pe salvasión niko ou Ñandejáragui, oguapyvahína pe trónope, ha pe Ovecha Raʼy Jesucrístogui’ (Rev. 7:​9-14, BNP). La Biblia heʼi umi ungido ha umi ‘ambue ovechakuéra’ ipuʼakataha Satanás rehe (Juan 10:16; Rev. 12:​10, 11). Ha upearã enterove odesidivaʼerã ojepytaso mbarete Jehová ykére ha ojerure chupe oipeʼamínte hag̃ua chupekuéra Satanás poguýgui (Mat. 6:13).

 Jasegíkena Jesús ehémplo

8. Mbaʼépa Satanás heʼi ñepyrũrã Jesúspe, ha mbaʼéichapa ombohovái chupe?

⁸ Jesús ogueropuʼakavaʼekue opa mbaʼe Satanás ojapóva omokangységui chupe. Pór ehémplo oĩrõ guare desiértope, tres vése voi Satanás oñehaʼã omoñuhã chupe. Ñepyrũrã, Jesús iñembyahýirõ guare heʼi chupe: ‘Ndéramo añete Ñandejára Raʼy, ere koʼã itápe toiko chugui pán’. Péro Jesús oiporurangue ipodér Ñandejára omeʼẽvaʼekue chupe, ombohovái Satanáspe péicha: ‘Ñandejára Ñeʼẽme heʼi: “Ndahaʼéi tembiʼu añónte oikotevẽva yvypóra oikove hag̃ua, opa ñeʼẽ Ñandejára jurúgui osẽva avei”’ (Mat. 4:​1-4; Deu. 8:3).

9. Mbaʼérepa ñamboykevaʼerã umi mbaʼe vai jajaposéva?

⁹ Koʼág̃a rupi Satanás oiporu umi mbaʼe vai jajaposéva ñanemoñuhã hag̃ua. Pór ehémplo, oiporu tekotieʼỹ oparupiete ojehecháva. Péro nañamanoséiramo ñañehaʼãmbaitevaʼerã ñamboyke umi mbaʼe vai ani hag̃ua jaʼa iñuhãme. Ñandejára Ñeʼẽ heʼi porã ñandéve: ‘Ndapeikuaái piko peẽ umi hekopeʼỹ oikóva ndoikemoʼãiha Ñandejára Rréinope? Aníke peñembotavy pendejupe voi, umi hekovaíva, taʼanga omombaʼeguasúva, oporomoakãratĩva ha kuimbaʼe oikóva hapicha kuimbaʼéndi ndoikemoʼãi Ñandejára Rréinope’ (1 Cor. 6:​9, 10, BNP). Jahechaháicha umi hekokyʼáva ha nokambiaséiva ndoikemoʼãi Ñandejára múndo pyahúpe.

10. Mbaʼéichapa Satanás oñehaʼã omoñuhã jey Jesúspe?

¹⁰ La Biblia ohechauka avei mbaʼéichapa Satanás oñehaʼã omoñuhã jey Jesúspe: ‘Satanás ogueraha chupe Jerusalénpe ha ohupi chupe pe témplo ári ha heʼi: “Ndéramo añete Ñandejára Raʼy, ejepoi koʼágui. Ñandejára Ñeʼẽme niko heʼi: ‘Ñandejára heʼitaha hiʼanhelkuérape oñangareko hag̃ua nderehe, ha heʼi avei ipopekuéra nderupitaha ani hag̃ua reñepysãnga ita rehe’”’ (Mat. 4:​5, 6). Jesús ojapórire Satanás heʼíva ohechaukavaʼerãmoʼã haʼeha pe Mesías. Péro ojapórõ upéicha ohechaukáta ojeroviaitereiha ijehénte ha upéva ombopochýta Ñandejárape. Jesús ohechauka jey iñeʼẽrenduha Jehovápe ha heʼi péicha: ‘Ñandejára Ñeʼẽme niko heʼi avei: “Aníke remoñuhãse Ñandejárape”’ (Mat. 4:7; Deu. 6:16).

11. Mbaʼépa Satanás ikatu oiporu ñanemoñuhã hag̃ua? Mbaʼépa ikatu oiko ñanderehe ñanemoñuhãramo?

¹¹ Ñande ningo jaipota ñande rapichakuéra ñanderecharamo, ha Satanás ikatu oiporu upéva ñanemoñuhã hag̃ua. Pór  ehémplo, ikatu ñanemokyreʼỹ ñañemonde hag̃ua ko mundopeguáicha ha jaiko hag̃ua vyʼarã rapykuéri. Péro jaikóramo ko múndope ojeikoháicha ha ñamboyke Ñandejára Ñeʼẽ, ikatúpa jaʼe ndoikomoʼãiha ñanderehe mbaʼeve? ñahaʼarõ Ñandejára anhelkuéra oñangareko ñanderehe?Ñahaʼarõtapa Ñandejára oñangareko ñanderehe hiʼanhelkuéra rupive? Yma rréi David oñembyasy hembiapo vaikuére, péro Jehová oheja ohasa asy hekovai haguére Bat-sébandi (2 Sam. 12:​9-12). Upévare, aníkena ñamoñuhãse Jehovápe jaikóvo ko múndo amígoramo (jaleemína Santiago 4:4 y 1 Juan 2:​15-17).

12. Mbaʼépa Satanás upéi oikuaveʼẽ Jesúspe? Ha mbaʼépa ojapo Jesús?

¹² Upéi Satanás oikuaveʼẽ Jesúspe umi goviérno ko yvy arigua. Ohechaukapaite chupe umi goviérno ko mundopegua ha heʼi: ‘Che ameʼẽmbáta ndéve opa koʼã mbaʼe, reñesũramo che renondépe ha chemombaʼeguasu’ (Mat. 4:​8, 9). Koʼápe jahecha mbaʼéichapa Satanás oipota Jesús omombaʼeguasu chupe ha omboyke Jehovápe. Upe ánhel ningo oipotágui voi oñemombaʼeguasu chupe omboykevaʼekue Jehovápe ha péicha oiko chugui peteĩ tekove iñaña ha itaryrýiva (Sant. 1:​14, 15). Péro Jesús odesidíma iñeʼẽrendutaha Jehovápe ha ojepytasotaha ijykére. Upévare heʼi chupe: ‘Tereho koʼágui Satanás! Ñandejára Ñeʼẽme niko heʼi: “Ñandejára renondépe reñesũvaʼerã, ha chupe añónte remombaʼeguasuvaʼerã”’. Ñandejára Raʼy oñemoĩ Satanás rehe, ndoipotái voi mbaʼeve oikuaveʼẽva chupe. Ni mbaʼevéicharõ nomombaʼeguasumoʼãi upe tekove añáme! (Mat. 4:10; Deu. 6:13; 10:20.)

‘Peñemoĩ Satanás rehe, ha haʼe penderejáta’

13, 14. a) Mbaʼépa ohechauka Satanás oikuaveʼẽvo Jesúspe umi goviérno ko mundopegua? b) Mbaʼépa Satanás oiporu koʼág̃a rupi ñanemoñuhã hag̃ua?

¹³ Satanás oikuaveʼẽvo Jesúspe umi goviérno ko mundopegua, ohechauka ikatuha omeʼẽ chupe opa mbaʼe oĩva ko yvy ape ári. Satanás ningo oimoʼã Jesús ohechávo umi mbaʼe oipotaitereitaha. Koʼág̃a rupi Satanás noikuaveʼẽi ñandéve peteĩ goviérno, haʼe omongyʼase guei ñande pyʼapy umi mbaʼe ñahendu ha ñapensáva rupive.

¹⁴ Satanás ningo oreko ipoguýpe ko múndo. Upévare ikatu jaʼe oiporuha ñanemoñuhã hag̃ua téle, rrádio, internét ha hetave mbaʼe. Upévare ko múndope ojeleéva, ojehecháva ha oñehendúva henyhẽ tieʼỹ ha violénsiagui. Umi propagánda ikatu ñanemoakãraku jajogua hag̃ua umi mbaʼe nañaikotevẽiva. Upéicha, Satanás ñanemoñuhãse jaiko hag̃ua pláta rapykuéri. Péro ñande jaʼe: ‘Tereho koʼágui Satanás!’. Upévare ndajaleéi, ndajahechái ha nañahendúi umi mbaʼe ivaíva kristianokuérape g̃uarã. Ha upéicha jasegiñaína Jesús ehémplo. Avei jahechauka hag̃ua ndajajeheʼaiha ko múndo añáre, ñamombeʼuvaʼerã ñande testigos de Jehováha ñande travahohápe, koléhiope, ñane vesíno ha ñane hentekuérape (jaleemína Marcos 8:38).

15. Mbaʼérepa iporã akóinte ñañatende?

¹⁵ Tres vése Satanás oñehaʼã omoñuhã Jesúspe, ha ndaikatúimaramo ojapo upéva ‘oheja chupe’ (Mat. 4:11). Péro upéva ndeʼiséi ikaneʼõmaha, la Biblia heʼi voi: ‘Satanás ndojuhuvéimaramo mbaʼéichapa omoñuhãta Jesúspe, oheja sapyʼami chupe’ (Luc. 4:​13, BNP). Oimérõ ñambohováima heta mbaʼe vai, jaagradesevaʼerã Jehovápe. Ha jasegivaʼerã jajerure chupe ñanepytyvõ hag̃ua, jaikuaágui Satanás ndopytuʼuiha, ñahaʼarõʼỹve jave oĩ ojapo hag̃uáicha oimeraẽ mbaʼe ñanemboyke hag̃ua Jehová rapégui. Upévare, iporã akóinte ñañatende ikatu hag̃uáicha ñambohovái  Satanáspe ha jajepytaso mbarete Jehová ykére.

16. Mbaʼépa Jehová omeʼẽ ñandéve ñanepytyvõ hag̃ua, ha mbaʼérepa jajerurevaʼerã chupe?

¹⁶ Jehová espíritu sánto ningo ñanepytyvõta ani hag̃ua jaʼa Satanás ñuhãme. Upévare jajerurevaʼerã chupe ha katuete omeʼẽta ñandéve. Ijespíritu sánto ñanemombarete rupi jagueropuʼakáta oimeraẽ mbaʼe ijetuʼúva. Jesús opromete hemimboʼekuérape Ñandejára omeʼẽtaha espíritu sánto chupekuéra: ‘Peẽ peneimperféktoramo jepe pemeʼẽkuaáramo iporãva pende raʼykuérape, koʼýte pende Ru yvagapegua omeʼẽta espíritu sánto umi chupe ojerurévape’ (Luc. 11:13). Akóintekena jajerure Jehovápe ijespíritu sánto, upéicharõmante ñambohováita Satanáspe ha jagueropuʼakáta opa mbaʼe vai. Ha ani hag̃ua Satanás ñanemokangy, ñañemboʼe meme vaʼerã Jehovápe ha jaiporu opa mbaʼe omeʼẽva ñandéve ñanepytyvõ hag̃ua (Efe. 6:​11-18).

17. Mbaʼépa oipytyvõ Jesúspe oñemoĩ hag̃ua Satanás rehe?

¹⁷ La Biblia ohechauka avei mbaʼépa oipytyvõ Jesúspe oñemoĩ hag̃ua Satanás rehe, ha upéva ikatúta avei ñanepytyvõ: ‘Haʼe niko ogueropuʼakavaʼekue jehasa asy yvyráre, otĩʼỹre omano oikuaágui ohasa asy rire ovyʼataha, ha oguapyvaʼekue Ñandejára tróno akatúape’ (Heb. 12:​2, BNP). Ñande ningo javyʼaitereíta avei jajepytaso mbaretéramo Jehová ykére, ñamombaʼe héra ha akóinte ñanemanduʼa ikatuha jaiko opa ára g̃uarã ko yvy ape ári. Javyʼaitéta ningo Jehová ohundi vove Satanás ha imúndope, avei oñekumplívo ko profesía: ‘Umi iñeʼẽrendúvape opytáne ko yvy, ha pyʼaguapýpe oikóne hikuái’ (Sal. 37:11). Upéicharõ, jasegíkena Jesús ehémplo ha ñañemoĩ Satanás rehe ñande pyʼaite guive (jaleemína Santiago 4:​7, 8).

Ñambohovaimi koʼã porandu

• Mbaʼépa ojehupyty Jehová oñangareko haguére isiervokuérare?

• Mbaʼérepa Jesús oheja ñandéve ehémplo iporãva oñemoĩrõ guare Satanás rehe?

• Mbaʼéichapa ñande ikatu ñañemoĩ Satanás rehe?

[Porandu ñahesaʼỹijóva]

[Nóta oĩva taʼanga ndive páhina 29]

Jahayhúramo ko múndo oikóta ñandehegui Jehová enemígo

[Nóta oĩva taʼanga ndive páhina 31]

Jesús ndoipotái umi goviérno ko mundopegua Satanás oikuaveʼẽrõ guare chupe