Ñaipytyvõkena chupekuéra pyaʼe ou jey hag̃ua
Ñaipytyvõkena chupekuéra pyaʼe ou jey hag̃ua
‘Máva rendápe piko rohóta? Ne ñeʼẽ ningo oporomoingove opa ára g̃uarã.’ (JUAN 6:68.)
1. Mbaʼépa heʼi Pedro oĩrõ guare oheja reíva Jesúspe?
PETEĨ árape Jesús oporomboʼe jave heta oĩ ipochýva ha osẽ oheja rei chupe. Upémarõ Jesús heʼi hemimboʼekuérape: “Peẽ piko pehose avei?”. Pedro heʼi: ‘Máva rendápe piko rohóta? Ne ñeʼẽ ningo oporomoingove opa ára g̃uarã’ (Juan 6:51-69). Ha upeichaite ningo, moõ piko ohóta hikuái, umi omoakãva hudiokuéra rrelihión omboʼéva nomeʼẽmoʼãi chupekuéra tekove opaveʼỹva. Ha koʼág̃a umi rrelihión japu ndaikatuínte avei omeʼẽ mbaʼeve. Upévare ‘opayhápema’ umi oñemomombyrýva Jehovágui, pyaʼe ou jey hag̃ua kongregasiónpe (Rom. 13:11).
2. Mbaʼépa ojapovaʼerã pe puvlikadór oikuaáramo upe ermáno ojapo hague peteĩ mbaʼe ivaietereíva Jehová renondépe?
2 Jehová ningo ojepyʼapy umi Israelgua ‘ovecha okañyvaʼekuére’ (jaleemína Ezequiel 34:15, 16). Upéicha avei umi ansiáno oipytyvõvaʼerã umi ovecha oñemomombyrývape kongregasióngui. Upévare oĩramo ojeruréva oñepytyvõ hag̃ua chupe, umi ansiáno heʼikuaa peteĩ puvlikadórpe ostudia hag̃ua hendive peteĩ puvlikasión. Péro mbaʼépa ojapovaʼerã pe puvlikadór oikuaáramo upe ermáno ojapo hague peteĩ mbaʼe ivaietereíva Jehová renondépe? Haʼe oipytyvõrangue chupe, heʼivaʼerã omombeʼu hag̃ua ansianokuérape, péro ndojapóiramo haʼete omombeʼuvaʼerã (Lev. 5:1; Gál. 6:1).
3. Mbaʼéichapa oñeñandu pe kuimbaʼe otopávo ijovecha okañyvaʼekue?
3 Pe artíkulo ñahesaʼỹijovaʼekuépe jahechákuri mbaʼépa ojapo pe kuimbaʼe 100 ijovecháva ohechakuaárõ guare okañy hague chugui peteĩ. Oheja umi 99 ha oho oheka upe okañyvaʼekue. Ovyʼaiténe piko otopávo! (Luc. 15:4-7.) Upeichaite avei ñande ñañeñandu oĩramo ou jeýva Jehová ovecha atýpe. Oĩ ningo ou jeýva, umi ansiáno ha ambue ermáno ovisita ha omokyreʼỹ haguére chupe. Heʼi chupe hikuái mbaʼeichaitépa ojevyʼáta ou jeýramo kongregasiónpe, ha Jehová oipytyvõta, oñangarekóta ha ovendesíta chupe (Deu. 33:27; Sal. 91:14; Pro. 10:22). Mbaʼépa ikatu jajapo ojeʼéramo ñandéve ñaipytyvõ hag̃ua peteĩ ermánope?
4. Mbaʼépa ñanemboʼe Gálatas 6:2, 5-pe heʼíva?
4 Ñamokyreʼỹ hag̃ua peteĩ oñemomombyrývape ñamomanduʼavaʼerã chupe Jehová ñanderayhuetereiha ha ndojerureiha ñandéve ikatuʼỹtava jajapo. Umíva apytépe oipota ñahesaʼỹijo la Biblia, jaha rreunionhápe ha japredika. Iporãta avei jaleéramo Gálatas 6:2, 5 ha jaʼe chupe ikatuha ñañopytyvõ jagueropuʼaka hag̃ua ñane provlemakuéra. Péro jaikuaaháicha ‘ñande peteĩteĩ jajecháta Jehovándi ñane rembiapokuére’.
Ojepyʼapyetereíparaʼe hemikotevẽre?
5, 6. a) Mbaʼérepa jajapysaka porã vaʼerã pe ermáno omombeʼuséramo ñandéve mbaʼéichapa oñeñandu? b) Mbaʼépa ikatu pe ansiáno oporandu umi ndouvéivape rreunionhápe?
5 Pe ermáno omombeʼuséramo peteĩ ansiánope térã ñandéve mbaʼéichapa oñeñandu, jajapysaka porã vaʼerã hese. Ha ñamoĩ chupe peteĩ ansiáno ohoha ovisita peteĩ família ndohovéivape rreunionhápe ‘ojepyʼapy rupi hemikotevẽre’ (Luc. 21:34). Oiméne ijetuʼúraʼe chupekuéra omantene hag̃ua ifamília, ha upévare mbeguekatúpe oñemomombyry kongregasióngui. Heʼíramo hikuái tekotevẽha opytuʼumi, pe ansiáno heʼivaʼerã: “Reñemomombyrýramo neresolusionamoʼãi mbaʼeve” (jaleemína Proverbios 18:1). Ikatu oporandu porãnte chupe: “Pevyʼave piko koʼág̃a, ndapehovéi haguére rreunionhápe? Pejogueraha porãvéiko pene família ndive? Pevyʼápa pejapórõ guaréicha Jehová oipotáva?” (Neh. 8:10).
6 Koʼãichagua porandu oipytyvõta umi ndouvéivape rreunionhápe ohechakuaa hag̃ua ijerovia ikangyha ha ndovyʼaveimaha yma guaréicha (Mat. 5:3; Heb. 10: 24, 25). Avei ohechakuaáta hikuái mbaʼeichaitépa ovyʼámi predikasionhápe (Mat. 28: 19, 20). Mbaʼépa ojapovaʼerã upéicharõ?
7. Mbaʼépa jaʼevaʼerã umi oñemomombyrývape?
7 Jesús heʼi: ‘Peñeñangarekóke ani peʼa mbaʼeveichagua mbaʼe vaípe, jekaʼu térã pejepyʼapyeterei pene remikotevẽre. Peñembosakoʼíke ha peñemboʼe opa ára, ikatu hag̃uáicha pejesalva koʼã mbaʼe oikótavagui’ (Luc. 21:34-36). Umi oñemomombyrývape jaʼevaʼerã tojerure Jehovápe ijespíritu oipytyvõ hag̃ua chupekuéra. Péro haʼekuéra ojapovaʼerã avei ojerure haguéicha iñemboʼépe (Luc. 11:13).
Ipochýparaʼe peteĩ ermánore?
8, 9. Mbaʼéichapa peteĩ ansiáno ikatu oipytyvõ umi ipochýva ha oñemomombyrývape kongregasióngui?
8 Entéro ñaneimperfékto rupi sapyʼánte jajoavy, upévare ikatu oĩ ermáno ipochýva ha oñemomombyry kongregasióngui. Oĩ avei ipochýva peteĩ ermáno ojapo haguére ivaíva. Peteĩ ansiáno ohóramo ovisita peichaguápe heʼivaʼerã chupe ndovaleiha ipochy Jehováre ni kongregasiónre, pórke Jehová ningo ndofallái hendive. Mbaʼére piko ndohejáinte Jehová pópe, haʼe ningo ohecha opa mbaʼe ha osolusiona porãvéta (Gén. 18:25; Col. 3:23-25). Ñamoĩ chupe ñañepysanga ha jaʼa mbaʼéramo, pyaʼeterei ningo ñapuʼã jeýta. Upéicha avei pyaʼe ñasolusionavaʼerã ñane provléma.
9 Pe ansiáno ikatu omombeʼu chupe oĩha jepi ermáno ipochýva avei péro upe rire opilla vyroreírente ipochy hague. Ha ikatu voi ymáma oñesolusiona upe provléma ombopochyvaʼekue chupe. Oĩ avei ermáno ipochýva ojekorrehi haguére chupe. Haʼekuéra oñemboʼevaʼerã Jehovápe ha ojepyʼamongeta, ikatu hag̃uáicha ohechakuaa mbaʼérepa ojekorrehi ha ani hag̃ua ipyʼaro upévare (Sal. 119:165; Heb. 12:5-13).
Ndogueroviapái pe tembiguái jeroviaha omboʼéva
10, 11. Mbaʼépa ikatu jaʼe umi ndogueroviapáivape peteĩ mbaʼe tembiguái jeroviaha omboʼéva?
10 Oĩ ningo ohejáva Jehovápe ndogueroviapái rupi peteĩ mbaʼe tembiguái jeroviaha omboʼéva. Upéicha oikovaʼekue umi Israelguáre Jehová oguenohẽ rire chupekuéra Egíptogui. ‘Haʼekuéra pyaʼe hesarái Jehová rembiapógui ha nohaʼarõivéi ikonsého.’ (Sal. 106:13, ÑÑB.) Upévare iporãta ñamomanduʼa pe ermánope Jehová oiporuha ‘pe tembiguái jeroviahápe’ omeʼẽ hag̃ua isiervokuérape oikotevẽva omombarete hag̃ua ijerovia (Mat. 24:45). Ha upéicha rupínte ningo enterove jaikuaa Jehovápe. Upévare iporãvéta ou jeýramo kongregasiónpe (2 Juan 4).
11 Pe ansiáno ikatu avei omomanduʼa pe ermánope yma oĩ hague heta ndogueroviapáiva Jesús omboʼéva, upévare ipochy ha oheja rei chupe (Juan 6:53, 66). Péro oñemomombyry rupi Jesús ha hemimboʼekuéragui, ikangy ijerovia ha ndovyʼavéi hikuái. Ha mbaʼépa oiko koʼág̃a rupi? Oĩnepa ótro lugár ñamombarete hag̃ua ñande jerovia ndahaʼéiramo kongregasiónpe? Ndaiporiete voi.
Ojapóparaʼe ivaíva?
12, 13. Mbaʼépa jajapovaʼerã peteĩ ermáno omombeʼúramo ñandéve ojapo hague peteĩ mbaʼe ivaietereíva?
12 Oĩ ermáno ojapo haguére peteĩ mbaʼe vai nosẽvéimava opredika ha ndohovéima ni rreunionhápe. Oimoʼã omombeʼúramo ansianokuérape ojapovaʼekue oñemosẽtaha kongregasióngui, ha upévare ndouveintéma voi. Péro noñemosẽmoʼãi ningo ndojapovéimaramo ivaíva ha oñembyasy hembiapo vaikuégui (2 Cor. 7:10, 11). Enterove katu ovyʼáta ou jeýramo, ha umi ansiáno oipytyvõta chupe omombarete hag̃ua ijerovia.
13 Ojeʼéramo ñandéve ñaipytyvõ hag̃ua peteĩ ermánope, mbaʼépa jajapovaʼerã omombeʼúramo ñandéve ojapo hague peteĩ mbaʼe ivaietereíva Jehová renondépe? Jahecháma haguéicha, jaʼevaʼerã chupe toñeʼẽ ansianokuérandi, ñande ñaipytyvõrangue chupe. Ha ndojaposéirõ katu jajapovaʼerã Ñandejára Ñeʼẽ heʼiháicha (jaleemína Levítico 5:1). Upéicha jahechaukáta ñamombaʼeha Jehová réra ha ikongregasión. Umi ansiáno ningo oikuaa porã mbaʼéichapa oipytyvõvaʼerã umi ouse jeývape kongregasiónpe. Ha tekotevẽramo jepe ojekorrehi chupe ojejapóta mborayhúpe (Heb. 12:7-11). Umi ansiáno oipytyvõta pe ermánope ojevýramo hembiapo vaikuégui ha oñembyasýramo ipyʼaite guive. Upéicharõ Jehová katuete operdonáta chupe (Isa. 1:18; 55:7; Sant. 5:13-16).
Ou jey che raʼy oikovaʼekue iñakãre
14. Emombeʼumi pe ehémplo oĩva Lucas 15:11-24-pe.
14 Ñaipytyvõ hag̃ua peteĩ ermáno oñemomombyrývape ikatu jaiporu pe ehémplo oĩva Lucas 15:11-24-pe. Upépe Jesús omombeʼu peteĩ kariaʼy oiporu vaipa hague iñerénsia, haʼe hekovai ha oiko iñakãre. Péro upe rire, ndaigustovéi chupe mbaʼeve, iñembyahýi ha ohechagaʼueterei ifamíliape, upévare odesidi ou jey hógape. Itúva ohechávo ouhahína itaʼýra, ovyʼaiterei ha odipara ohug̃uaitĩ chupe, oañua ha ohetũ itaʼýrape. Ko ehémplo ikatu omokyreʼỹ pe ermánope ou jey hag̃ua kongregasiónpe. Jaikuaa ningo ko múndo aña oñehundipotaitemaha ha upévare pyaʼe ou jey vaʼerã kongregasiónpe.
15. Mbaʼérepa oĩ ermáno oñemomombyrýva Jehovágui?
15 Heta ermáno ndojoguái pe kariaʼy oikóvape iñakãre. Ojogua guei peteĩ kanóape, mbeguekatúpe yvytu omomombyrýva pe oríllagui. Upeichaite avei heta ermáno mbeguekatúpe oñemomombyry Jehovágui. Pór ehémplo oĩ ermáno ojepyʼapyetereíva hemikotevẽre ha ndojapovéima Ñandejára rembipota. Oĩ katu ipochy haguére peteĩ ermánondi ohejáva Jehovápe. Térã oñemomombyry ndogustáigui chupe peteĩ mbaʼe omboʼéva pe tembiguái jeroviaha. Ha ótro katu oñemomombyry ojapo haguére ivaíva Jehová renondépe. Péro jajapóramo koʼã konsého jahechavaʼekue ikatúta ñaipytyvõ chupekuéra pyaʼe ou jey hag̃ua kongregasiónpe, ani ág̃a upe rire ndaiporivéima tiémpo.
Avyʼaite piko reju jey haguére che memby!
16-18. a) Mbaʼéichapa peteĩ ansiáno oipytyvõ peteĩ oñemomombyrývape? b) Mbaʼérepa oñemomombyrýraʼe upe ermáno? Mbaʼépa oipytyvõ chupe ou jey hag̃ua? Mbaʼéichapa orresivi chupe umi ermáno?
16 Peteĩ ansiáno omombeʼu mbaʼépa ojapo haʼe ha umi ótro ansiáno oipytyvõ hag̃ua umi oñemomombyrývape: “Roñehaʼã rovisita enterove oñemomombyrývape. Upérõ peteĩ ermáno ostudiavaʼekue chendive ojapóma veinticinco áño oñemomombyry hague. Haʼe ningo heta iprovléma ha upévare rohecha mbaʼéichapa Ñandejára Ñeʼẽ ikatu oipytyvõ chupe. Upe rire ou jey rreunionhápe ha rostudia jey oñondive omombarete hag̃ua ijerovia”.
17 Mbaʼérepa oñemomombyrýraʼe upe ermáno? Haʼe heʼi: “Mbeguekatúpe amombaʼeve ahávo ko múndo oikuaveʼẽva ha napenavéima Jehová heʼívare. Upéi ndastudiavéi, nasẽvéi apredika ha ndahavéi rreunionhápe. Añemeʼẽrõ guare enkuénta, añemomombyrýma kongregasióngui. Péro ahechakuaa pe ansiáno ojepyʼapyha cherehe, upéva chepytyvõ aju jey hag̃ua kongregasiónpe”. Upe ermáno ostudia jey rire, iprovlemakuéra jepe oñesolusiona ohóvo. Haʼe omombeʼu: “Ahechakuaa Jehová reheʼỹ ndarekoiha mbaʼevete. Aikotevẽterei ningo hese ha kongregasiónre avei”.
18 Mbaʼéichapa orresivi chupe umi ermáno? Haʼe heʼi: “Jesús ningo omombeʼuvaʼekue mbaʼéichapa oñeñandu peteĩ mitãrusu oikovaʼekue iñakãre ou jeýrõ guare hógape. Upeichaite avei che añeñandu aju jeýrõ guare. Ha peteĩ ermána treinta áñorema oservíva Jehovápe ningo heʼimi chéve: ‘Avyʼaite piko reju jey haguére che memby’. Oguapyeterei ningo cherehe upéva, ha añeñandu che rogapeguáicha. Ndaikuaái mbaʼéichapa aagradeséta upe ansiáno ha umi ermanokuérape ipasiénsia ha ojepyʼapy haguére cherehe. Ahecha avei mbaʼeichaitépa ohayhu hikuái Jehovápe ha enterovépe. Upéva ningo chepytyvõ aju jey hag̃ua kongregasiónpe”.
Ñamokyreʼỹkena pyaʼe ou jey hag̃ua
19, 20. Mbaʼéichapa ikatu ñamokyreʼỹ umi oñemomombyrývape? Mbaʼéichapa ikatu ñaipytyvõ chupekuéra ontende hag̃ua Jehová ndojerureiha mbaʼeve ikatuʼỹvaʼerã jajapo?
19 Jaiko ningo ára pahápe ha koʼẽrõitéma oñehundíta ko múndo aña. Upévare ñamokyreʼỹkena umi oñemomombyrývape pyaʼe ou jey hag̃ua rreunionhápe. Upearã jaʼevaʼerã chupekuéra Satanás oñehaʼãha ñanemomombyry Jehovágui. Ha heʼi guaʼu jajapóramo upéicha saʼivetaha ñane provléma. Jaʼékena avei chupekuéra jasegíramo Jesúspe añoite japytuʼutaha opa mbaʼe vaígui (jaleemína Mateo 11:28-30).
20 Ñaipytyvõ chupekuéra ontende hag̃ua Jehová ndojerureiha mbaʼeve ikatuʼỹvaʼerã jajapo. Yma ningo Jesús omano mboyvemi, Lázaro ermána María oñohẽ Jesús rehe peteĩ aséite hepyetereíva. Upévare heta oĩ oñeʼẽ vaíva Maríare, ha Jesús katu heʼi: ‘Pehejána chupe, haʼe ningo ojapo ikatumíva’ (Mar. 14:6-8, ÑÑB). Peteĩ viúda mboriahúmi omeʼẽrõ guare ikontrivusión témplope, Jesús oguerohory michĩramo jepe. Haʼéngo omeʼẽ avei ikatumíva (Luc. 21:1-4). Enterove ningo ikatu jaha rreunionhápe ha ñasẽ predikasiónpe. Ha Jehová oipytyvõta avei umi oñemomombyrývape ojapo hag̃ua upéicha.
21, 22. Mbaʼéichapa oñeñandúta umi ou jeýva kongregasiónpe?
21 Otĩramo ermanokuéragui oho jey hag̃ua rreunionhápe, ikatu ñamombeʼu chupe mbaʼeichaitépa ojevyʼavaʼekue pe mitãrusu oho jeýrõ guare hógape. Peichaite avei javyʼa kongregasiónpe oĩramo ou jeýva. Ñamokyreʼỹkena chupe oñemoĩ hag̃ua Satanás rehe ha oñemoag̃ui hag̃ua Jehováre (Sant. 4:7, 8).
22 Enterove jaguerohorýta umi ou jeývape kongregasiónpe (Lam. 3:40). Haʼekuéra oservírõ guare Jehovápe ovyʼáneraʼe ha katuete ou jeýrõ ovyʼáta ha ohupytýta heta mbaʼe porã.
Mbaʼépa ñambohováita?
• Mbaʼéichapa ikatu ñaipytyvõ umi ipochýva ha oñemomombyrývape kongregasióngui?
• Mbaʼépa ikatu jaʼe umi ohejávape Jehovápe ndogueroviapái rupi peteĩ mbaʼe tembiguái jeroviaha omboʼéva?
• Mbaʼépa ikatu jaʼe umi oñemomombyrývape otĩramo ou jey hag̃ua?
[Porandu ñahesaʼỹijóva]
[Nóta oĩva taʼanga ndive páhina 13]
Jajapysaka porã vaʼerã, peteĩ ermáno omombeʼuséramo ñandéve mbaʼéichapa oñeñandu
[Nóta oĩva taʼanga ndive páhina 15]
Ñamombeʼúramo Jesús heʼivaʼekue peteĩ mitãrusúre, ikatu oipytyvõ ñane ermánope ou jey hag̃ua