Ahecha mbaʼéichapa oĩ hetave Ñandejárape oservíva Coréape

Omombeʼu Milton Hamilton

“Rombyasyeterei ningo péro pe goviérno Coreaygua heʼi ndaikatumoʼãiha peike upe tetãme. Upévare pehóta Japónpe raẽ peservi hag̃ua misionéroramo.”

ÁÑO 1954-pe Broóklyngui oñembou oréve upe kárta roĩ aja Indianápolispe (Estados Unidos). Upe áñope roho Escuela de Galaádpe (Nueva York).

Che ha che rembireko ningo oñoamigoite ore mitã guive, eskuélape roikevaʼekue oñondive, ha romenda 1948-pe. Che rembireko héra Liz ha ogustaiterei chupe la prekursorádo. Péro okyhyje ova hag̃ua ótro tetãme roservi porãve hag̃ua Jehovápe. Tamombeʼumína peẽme mbaʼéichapa okambia!

Áño 1953-pe peteĩ asambléa jave roho che rembirekóndi pe rreunión ojejapóva umi ohosévape g̃uarã Galaádpe. Oremokyreʼỹeterei ningo upe rreunión ha upe rire romyanyhẽ peteĩ solicitud. Ha rohaʼarõʼỹre roñeinvita roho hag̃ua pe kláse oñepyrũtavape febrero de 1954.

Corea del Súrpe oiko gérra tres áño aja, ha opa 1953-pe. Sarambímanteko opyta upe rire. Upépe rohovaʼerã seis ermáno ndive roservi hag̃ua misionéroramo. Péro haʼe haguéicha iñepyrũme roho raẽ Japónpe. Veinte óra roviaha rire várkope, rog̃uahẽ pyharevete la seis rupi. Upépe oreraʼarõma ermáno Lloyd Barry, omoakãva sukursál de Japón. Ha oregueraha Yokohámape roikotahápe ha upe díape voi roñepyrũ ropredika.

Hasýpe rog̃uahẽ Coréape

Tiémpo rire pe goviérno Corea del Surpegua oheja roike upe tetãme. El 7 de marzo de 1955 rojupi aviónpe ha roho Coréape, rog̃uahẽ tres órape Youido (Seúlpe). Upépe hetaiterei ermáno oreraʼarõ ha rovyʼaiterei rohechávo chupekuéra. Upérõ Coréape oĩ mil Testígonte. Ore roimoʼãvaʼekue peteĩchanteha umi coreáno ha japonés, péro pyaʼe ropilla ndaupeichaiha. Umi coreáno idiferénte iñeʼẽ, ijao, hembiʼu, hóga ha hovakuéra jepe.

Ñepyrurã ijetuʼueterei oréve roñeʼẽ hag̃ua iñidiomakuéra, ha ndoroguerekói voi ni peteĩ lívro coreánope.  Rohechakuaa tekotevẽha roaprende raẽ pe avesedário coreáno roñeʼẽkuaa hag̃ua.

Heta ningo rojavy ñepyrũrã, peteĩ árape Liz oporandu peteĩ óga járape orekópa la Biblia. Pe óga jára omaña porã hese, oike hógape ha ogueru chupe fósforo ryru. Liz heʼíraʼe chupe ogueru hag̃ua sungnyang (fósforo) heʼirangue sungkyung (la Biblia).

Upe rire oréve ha mokõi ermána misionérape roñemondo roservi hag̃ua Pusánpe. Upépe roalkila peteĩ óga mbohapy ikotýva ha orekóva peteĩ letrína. Ha roñoturna de madrugadakue rombyaty hag̃ua y, pórke roiko segundo pisohápe ha upe órapente osẽ hetamie la y. Royʼu hag̃ua katu rombopupu térã romoĩ pype lavandína.

Péro ndahaʼéi upévante rombohovaivaʼerã, nog̃uahẽporãi avei eléctricidad upe ógape. Upévare ndaikatúi roiporu lavarrópa ni pláncha. Pasíllope katu roguereko peteĩ kosína a kerosén ha roñoturna rokosina hag̃ua. Ha rorekomívaguinte rojapovaʼerã ore rembiʼurã. Tres áño roiko haguépe Coréape Liz ha chéve orejagarrami hepatitis. Upérõ heta misionérope ojagarra ko mbaʼasy. Hasýpe ningo rokuera ha upe rire heta mbaʼasy rogueropuʼaka.

Roipytyvõ ermanokuérape ohasa asy jave

Heta áñore Corea oiko ñorairõme ha ojedividi mokõi tetãme: Corea del Norte ha Corea del Sur. Péro imbytepekuéra oĩ peteĩ frontéra ndaiporihápe soldádo ni militarkuéra. Upe lugár opyta 55 kilómetro Seúlgui (Corea del Sur). Upépe roho ermáno Frederick Franz ndive 1971-pe oúrõ guare orevisita Brooklýngui. Heta áñorema oñembyaty upépe umi Naciones Unidaspegua oñeʼẽ hag̃ua umi Corea del Norte ha Surgua ndive.

Jaikuaaháicha ñande Testígo ndajajeheʼái ko múndore ni polítikare (Juan 17:14). Upévare hetaiterei ermáno Corea del Surguápe ojegueraha kárselpe ndohói haguére gerrahápe. Ha ohasa hikuái hetaiterei áño upépe (2 Cor. 10:​3, 4). Umi mitãrusu ndokyhyjéi oikuaa porãramo  jepe ojejopytaha chupekuéra oho hag̃ua gerrahápe. Ñambyasyete ningo ñane ermanokuéra ojegueraha haguére kárselpe vandídoicha, ojapo rupi Ñandejára heʼíva.

Che ningo aikuaa porã mbaʼeichaitépa ohasa asy anga umi mitãrusu kárselpe. Chemanduʼa 1944-pe Segunda Gérra Mundiálrõ guare che ndahái kuartélpe. Ha upévare chemondo hikuái kárselpe dos áño rasa Lewisburg Pensilvániape (Estados Unidos). Heta ermáno ikyreʼỹ oikuaávo oĩha misionéro ohasa asy vaʼekue avei haʼekuéraicha umi mburuvicha poguýpe (Isa. 2:4).

Rombohovái peteĩ mbaʼe ijetuʼúva

Áño 1977 guive 1987 peve ndaikatúi roho ore retãme ni rovisitami hag̃ua ore hentekuérape. Umi mburuvichakuéra heʼi ore misionéro káusare umi mitãrusu ndohoseiha kuartélpe ha upévare osẽva guive Coréagui ndoikemoʼãveimaha upépe.

Heta vése ningo roho umi mburuvichakuéra rendápe roʼe hag̃ua chupekuéra roservi rupi Jehovápe ndorojeheʼaiha ko múndore ni polítikare. Ha heta tiémpo rire ohechakuaa hikuái ndoroguevimoʼãiha. Upévare diez áño haguépe oheja hikuái roike ha rosẽ Coréape. Upe mboyve ningo heta misionéro hasýva térã iprovlémava oho jey hetãme ha ndaikatuvéi oike Coréape. Péro umi ndorohoivaʼekue rovyʼaiterei ropyta haguére upépe.

Upe rire mburuvichakuéra heʼi umi romoakãva pe sukursál Coreapegua romoingeha mitãrusukuéra akãme heta mbaʼe vai ani hag̃ua oho kuartélpe. Upévare orerenoika hikuái ombaʼeporandu hag̃ua oréve. Péro el 22 de enero de 1987 oñesolusiona upe provléma, pe fiscalía heʼi ndaikatuiha ohechauka hikuái siertoha la heʼíva orerehe.

Jehová orerovasa

Coréape káda áño umi mburuvicha hatãve oñemoĩ orerehe ha upévare ijetuʼu rokonsegi hag̃ua peteĩ lugár rojapo hag̃ua ore asambléa. Upémaramo rodesidi rojapo peteĩ Salón de Asamblea Pusánpe. Ha oñeinaugura el 5 de abril de 1976, oreaty 1.300 ha che ameʼẽ la diskúrso.

Áño 1950 guive hetaiterei soldádo Estados Unidosguápe oñemondo Coréape, ha ore ropredika chupekuéra. Upévare oĩ heta oho rire hetãme ojevautisáva. Pyʼỹinte ningo haʼekuéra ogueruka oréve kárta ha rovyʼaiterei  roipytyvõ haguére chupekuéra oikuaa hag̃ua Jehovápe.

Pe el 26 de septiembre de 2006 oiko peteĩ mbaʼe ambyasyetereíva: omano anga cheirũmi ahayhuetéva, ahechagaʼueterei ningo chupe apytávo. Cincuenta y un áño oservi Jehovápe ko tetãme ha kyreʼỹme ojapo opaichagua tembiapo oñemeʼẽvaʼekue chupe. Ñepyrũrã ningo haʼe okyhyjevaʼekue ova hag̃ua ótro tetãme, péro arakaʼeve ndeʼíri chéve roho jey hag̃ua Estados Unídospe.

Koʼág̃a che ambaʼapo Betélpe, aime Comite de Sukursál Coreayguápe. Ha ñepyrũrã orembovy Betélpe, péro koʼág̃a 250 rupi roime.

Corea ningo peteĩ tetã mboriahuvaʼekue rog̃uahẽrõ guare, péro koʼág̃a iporã ha imodérno. Oĩ noventa y cinco mil rasa testigos de Jehová ha umíva apytégui 40% ojapo precursorado regular térã auxiliar. Upévare ahechávo mbaʼéichapa hetave oĩ oservíva Ñandejárape Coréape, aagradese Jehovápe che pyʼaite guive aservi haguére chupe ko tetãme.

[Nóta oĩva taʼanga ndive páhina 24]

Rog̃uahẽro guare Coréape misionerokuéra ndive

[Nóta oĩva taʼanga ndive páhina 24 ha 25]

Ropredikárõ guare Pusánpe

[Nóta oĩva taʼanga ndive páhina 25]

Ermáno Franz ndive 1971-pe

[Nóta oĩva taʼanga ndive páhina 26]

Liz ndive omano mboyvemi

[Nóta oĩva taʼanga ndive páhina 26]

Betél Coreapegua, ambaʼapohápe koʼág̃a