Jaikuaaukáke opárupi ha hekoitépe pe marandu porã

‘Ha heʼi oréve ropredika hag̃ua opárupi ha hekoitépe.’ (HECH. 10:​42, BNP.)

1. Mbaʼe tembiapópa heʼi Pedro oñemeʼẽ hague umi apóstolpe?

 PETEĨ mburuvicha Roma ehersitopegua hérava Cornelio ombyaty ihénte ha iñamigokuéra peteĩ rreunionrã. Ko rreunión iñimportanteterei pórke upe guive entéro yvypóra ikatútama oñemoag̃ui Jehováre. Apóstol Pedro oĩvaʼekue upe atýpe ha omombeʼu umi apóstolpe oñemeʼẽ hague peteĩ tembiapo. Haʼekuéra ‘opredikavaʼerã opárupi ha hekoitépe’ Jesucristo omboʼevaʼekue. Péicha Pedro oipytyvõ umi hudioʼỹvape ojerovia hag̃ua Jesús rehe. Upéi oñemeʼẽ chupekuéra espíritu sánto, ojevautisa hikuái ha oreko oportunida ohóvo yvágape oisãmbyhy hag̃ua Jesús ndive. Jahecha mbaʼeichaitépa apóstol Pedro oipytyvõ hetápe ipredikasión rupive (Hech. 10:​22, 34-48, BNP).

2. Mbaʼéichapa jaikuaa ndahaʼeiha umi doce apóstol añónte opredikavaʼerã?

² Koʼã mbaʼe oikovaʼekue áño 36-pe. Dos áño rupi upe mboyve, peteĩ kuimbaʼe oñemoĩ hatã vaʼekue kristianokuérare tuicha okambia. Haʼe ningo Saulo Tarsopegua, ha peteĩ jey ohokuévo Damáscope osẽ chupe Jesús ha heʼi: “Eike upe távape, upépe ojeʼéta ndéve upe rejapovaʼerã”. Upéi Jesús heʼi peteĩ hemimboʼe héravape Ananías, Saulo opredikataha ‘opa tetã ambueguápe, mburuvicha guasukuérape ha avei Israelguakuérape’ (jaleemína Hechos 9:​3-6, 13-20). Og̃uahẽvo Saulo rendápe, Ananías heʼi chupe: ‘Ñandejára, ndeporavo reñeʼẽ hag̃ua hese opa yvypórape’ (Hech. 22:​12-16). Sáulope ningo upe rire oñehenói Pablo. Mbaʼéichapa haʼe ohecha ko tembiapo oñemeʼẽva chupe?

Pablo oikuaauka opárupi pe marandu porã

3. a) Mbaʼépa jahecháta koʼág̃a? b) Mbaʼépa ojaponerakaʼe umi ansiáno Efesoygua, ha mbaʼérepa jaʼe omeʼẽha ñandéve ehémplo iporãva?

³ Hetaiterei mbaʼe ningo ñaaprendekuaa Páblogui, péro koʼág̃a jahechátante peteĩ diskúrso omeʼẽvaʼekue áño 56-pe ha oĩva Hechos kapítulo 20-pe. Upérõ Pablo omohuʼãmbota pe viáhe mbohapyha ojapóva opredika hag̃ua. Og̃uahẽ rire Milétope, peteĩ  puérto oĩva már Egéope, ohenoiuka umi ansiáno Efesoyguápe. Oiménepa ovyʼaite hikuái oikuaávo Pablo ohechaseha chupekuéra (embojoja Proverbios 10:​28-re). Umi ansiáno oviahavaʼerã 50 kilómetro og̃uahẽ hag̃ua Pablo rendápe. Upearã oiméne ombotyrakaʼe hikuái inegósio térã ojerure permíso ipatronkuérape. Koʼág̃a rupi heta ñane ermáno ojapo avei upéicha ani hag̃ua ofalta ni peteĩ ára asambléa de distrítope.

4. Mbaʼépa ojapo Pablo Éfesope?

⁴ Mbaʼépa nde ere ojapóne hague Pablo Milétope ohaʼarõ aja 3 térã 4 día og̃uahẽ meve umi ansiáno? Mbaʼépa nde rejapovaʼerãmoʼã? (Embojoja Hechos 17:​16, 17-re.) Oiméne Pablo opredikáraʼe ojapo haguéicha oiko aja Éfesope (haʼe oikovaʼekue upépe áño 52-55 rupi). Upéva jahecha umi mbaʼe heʼívare umi ansiánope oñembyatývo hendivekuéra. Pablo omombeʼu chupekuéra mbaʼéichapa opredika Éfesope ha ambue henda rupi (jaleemína Hechos 20:​18-21). Haʼe heʼi umi ansiánope: ‘Peẽ peikuaa mbaʼéichapa aiko aju ypy guive Ásiape, maymávape haʼe hague ojevy hag̃ua Ñandejára rendápe’. Jahecha Pablo oho hague Ásiape ojapo hag̃ua hekópe pe tembiapo Jesús omeʼẽvaʼekue chupe. Lucas omombeʼu avei Pablo opredika hague umi hudíope oĩ aja Éfesope. Haʼe ojapo diskúrso umi sinagógape ha oñehaʼã ogueroviauka chupekuéra pe marandu porã. Umi hudío katu ‘oñembopyʼahatã ha ndogueroviaséi’, upémarõ Pablo oheka pe távare mávapepa opredikáta. Upéicha opredika umi griégope avei (Hech. 19:​1, 8, 9).

5, 6. Mbaʼérepa jaʼekuaa Pablo opredika hague umi ndojeroviáivape Jesús rehe?

⁵ Pablo oipytyvõ hetápe ojerovia hag̃ua Jesucrístore. Upéi umíva apytépe oĩma heta oservíva ansiánoramo. Koʼãva hína umi ohovaʼekue oñembyaty Pablo ndive Milétope. Haʼe imanduʼa chupekuéra hembiapóre ha heʼi: “Opáichavo, ndahejaivaʼekue amyerakuãʼỹre peẽme opa mbaʼe iporãtava peẽme g̃uarã, pomboʼévo opavave renondépe ha pende rogakuéra rupi”. Oĩ oimoʼãva koʼápe Pablo heʼiha ovisita hague ermanokuérape hógape. Péro haʼe heʼívo “pomboʼe opavave renondépe ha pende rogakuéra rupi”, ohechauka opredika hague umi ndojeroviáivape Jesús rehe. Upéva japilla jaleévo heʼíva upe rire: ‘Aikuaauka Judayguápe ha tetã ambueguakuérape mbaʼéichapa ojevyvaʼerã Ñandejára rendápe, ha mbaʼéichapa ojerovia añete vaʼerã Jesucristo rehe’. Koʼápe heʼi umi hénte tekotevẽha ojevy ha ojerovia Jesús rehe, upéicharõ haʼekuéra  ndahaʼéi gueteri kristiáno (Hech. 20:​20, 21, ÑÑB).

⁶ Peteĩ karai arandu heʼi Hechos 20:​20-re: “Upérõ Pablo oikóma tres áño Éfesope. Opredikáma opárupi ha oñeʼẽma enterovéndi (versíkulo 26). Ko téysto ohechauka mbaʼérepa kristianokuéra opredikavaʼerã ogaha rupi ha atyhápe”. Oiméramo añete opredikáma káda óga, térã nahániri, Pablo oipota umi ansiáno Efesoygua imanduʼa mbaʼépa ojehupyty ipredikasión rupive. Lucas heʼi: “Opa oikóva Asia rupi, Israelguáva ha Israelguaʼỹva, ohendu Ñandejára Ñeʼẽ” (Hech. 19:10). Añete piko enterove oikóva Ásiape ohendu pe marandu porã? Ha mbaʼépa ñanemboʼe upéva?

7. Mbaʼéichapa hetave hénte ikatúneraʼe ohendu pe marandu porã?

⁷ Heta hénte ohenduvaʼekue pe marandu porã Pablo opredikárõ guare Éfesope. Ha ikatu koʼãva apytépe oĩ umi upéi ohóva ambue hendápe ojapo hag̃ua negósio, ohecha ihentekuérape térã opytuʼumi hag̃ua. Avei, upérõ ojeho meme Éfesope ojejapo hag̃ua negósio ha ambue mbaʼe. Opyta aja upe távape oĩneraʼe hénte ohendúva Páblope opredika jave. Mbaʼépa ojapóta hikuái oho jeývo ivállepe? Umi ojeroviáva Pablo heʼívare opredikáneraʼe hapichakuérape, ha umi ndojeroviaivaʼekue jepe oñemongetáne upe ohenduvaʼekuére. Péicha umi ihénte, ivesíno térã ikliénte ikatu ohendu pe marandu porã ha ojerovia Ñandejárare (embojoja Marcos 5:​14-re). Mbaʼépa ohechauka ñandéve ko mbaʼe?

8. Mbaʼéichapa ojekuaauka pe marandu porã umi táva oĩva Ásiape?

⁸ Oikórõ guare Éfesope, Pablo heʼi ojeavri hague chupe ‘peteĩ okẽ ombaʼapo hag̃ua’ (1 Cor. 16:​8, 9). Mbaʼeichagua okẽre piko oñeʼẽ? Ha mbaʼéichapa ojeavri? Éfesogui ningo namombyrýi opyta umi táva Colosas, Hierápolis ha Laodicea, ha Pablo ndohoivaʼekue upérupi. Umi rupi oikovaʼekue peteĩ kristiáno hérava Epafras (Col. 2:1; 4:​12, 13). La Biblia nomombeʼúi oimépa Pablo opredikáraʼe Epáfraspe oĩ aja Éfesope. Ñande ningo jaikuaánte Pablo heʼi hague hese: “Ore irũ rohayhuetéva, haʼe ningo peteĩ Jesucristo rembiguái hekopeguáva” (Col. 1:​7, ÑÑB). Epafras opredikárõ guare ivállepe, oiméne oñeʼẽraʼe Pablo rérape.  Ikatu avei pe marandu porã ojekuaa Filadelfia, Sardis ha Tiatira rupi, Pablo opredika tiémpope Éfesope.

9. a) Mbaʼe tembiapópa omombaʼetereivaʼekue Pablo? b) Mbaʼe téystopa ojeporavo ko 2009-pe g̃uarã, ha mbaʼérepa nde repensa oĩ porãha?

⁹ Upéicharõ umi ansiáno Efesoygua oikuaa añeteha ko mbaʼe Pablo heʼivaʼekue: ‘Che rekove jepe namombaʼéi ikatúma guive añani ipahaite peve, ha ajapopa upe tembiapo Jesús omeʼẽvaʼekue chéve, aikuaauka hag̃ua opárupi ha hekoitépe pe marandu porã ha Ñandejára pyʼaporã’. Koʼágui oñenohẽ ñande téysto ko áño 2009-pe g̃uarã: ‘Jaikuaaukáke opárupi ha hekoitépe pe marandu porã’ (Hech. 20:​24, NM).

Koʼág̃a japredika opárupi ha hekoitépe

10. Mbaʼéichapa jaikuaa ñande avei japredikavaʼerãha?

¹⁰ Ndahaʼéi umi apóstolpe añónte ojeʼevaʼekue opredika hag̃ua. Jesús oikove jey rire oñeʼẽ 500 hemimboʼekuérape oñembyatyvaʼekue Galiléape ha heʼi: ‘Tapeho aipóramo opa tetãnguéra rupi ha pejapo chuguikuéra che remimboʼe. Pevautisa Túva, Taʼýra ha espíritu sánto rérape, ha pemboʼe chupekuéra tojapopa opa umi mbaʼe che haʼevaʼekue peẽme’. Umi mbaʼe Jesús heʼíva upe rire ohechauka ko tembiapo oñemeʼẽha avei ñandéve: ‘Ha peikuaa che aimeha penendive opa árape ipaha peve’ (Mat. 28:​19, 20, BNP).

11. Mbaʼe tembiapo ojapo haguérepa ojekuaa testigos de Jehovápe?

¹¹ Ñande jajapo kyreʼỹme ko tembiapo ha ñañehaʼã ‘jaikuaauka opárupi ha hekoitépe pe marandu porã’. Upearã japredika ogaha rupi, Pablo ojapo haguéicha. Haʼe imanduʼa ko mbaʼére oñeʼẽrõ guare umi ansiáno Efesoyguándi. Pe lívro ohaivaʼekue David Stewart, 2007-pe omombeʼu mbaʼéichapa oñemoherakuã Ñandejára Ñeʼẽ, ha heʼi: “Umi testigo de Jehová ningo ivaleve omboʼe hag̃ua Ñandejára Ñeʼẽ umi héntepe. Haʼekuéra ndahaʼéi opytánteva oñemoñeʼẽ peteĩ tupaópe. Heta testígo heʼi voi ovyʼaitereiha opredika jave”. Ha avei heʼi: “Áño 1999-pe mokõi táva guasu oĩva Európape añemongeta umi héntendi. Umívagui 2 ha 4 por ciéntonte heʼi umi mormón opredika hague chupekuéra. Péro 70 por ciento voi heʼi umi testigo de Jehová opredika hague chupekuéra, ha oĩ voi heʼíva ojepredikáma hague chupe heta vése”.

12. a) Mbaʼérepa jaha jey jey japredika ñande rapichakuérape? b) Reikuaápa peteĩ yma nohenduseivaʼekue japredika jave ha koʼág̃a oservíva Jehovápe?

¹² Upéichante avei ñande territóriope, ha oiméne ñande voi ñasẽ meme jepi ñamosarambi pe marandu porã. Japredika jave ogaha rupi ñañemongeta opaichagua tapichándi. Oĩ nañanerenduséiva jepe heta vésema jaha hendapekuéra. Oĩ oñeʼẽva ñanendive sapyʼaitemi ha oheja jalee peteĩ téysto. Ha oĩ avei umi oñemongeta pukúva ñanendive ha oikuaasevéva Ñandejárape. Péva oiko ñañehaʼã rupi ‘jaikuaauka opárupi ha hekoitépe pe marandu porã’. Ñande jaikuaa avei heta ñane ermáno yma nohenduséi hague pe marandu porã. Péro upéi oiko hesekuéra térã ihentekuérare peteĩ mbaʼe vai ha upévare okambia ha ou ohenduse. Upéicharõ aníkena ñanekangy oĩramo heta nañanerenduséiva. Jaikuaa naentéroi oikuaasetaha la Biblia heʼíva. Upéicharamo jepe Jehová oipota akóinte japredika kyreʼỹme ha hekoitépe.

 Ndajaikuaái mamópa heñóita pe ñañotỹva

13. Mbaʼéichapa ñane predikasión ikatu og̃uahẽ hetave tapichápe?

¹³ Pablo ningo oipytyvõ hetápe oservi hag̃ua Jehovápe. Péro ipredikasión rupive pe marandu porã og̃uahẽ hetave tapichápe. Ha ñande ningo upéicha avei. Ñañehaʼã ñag̃uahẽ entéro ógape japredika hag̃ua hetave ñande rapichápe. Ñamombeʼu pe marandu porã ñane hénte, ñane vesíno, ñane kompañéro de traváho ha kolehiopeguápe. Oĩpa ijapytepekuéra umi pyaʼe oservíva Ñandejárape? Sapyʼánte oĩ umi pyaʼe voi oserviséva Jehovápe. Péro hetave vése are ñahaʼarõvaʼerã heñói hag̃ua pe marandu porã ñande rapicha korasõme. Ha nog̃uahẽiramo jepe ikorasõme oĩta katuete upéi omombeʼúva hapichakuérape umi mbaʼe jaʼéva, jagueroviáva ha jajapóva. Péicha oipytyvõ hikuái hetave ojerovia hag̃ua Ñandejárare.

14, 15. Mbaʼe iporãvapa ojehupyty peteĩ ermáno opredika rupi ikompañéro de traváhope?

¹⁴ Ñapensamíntena oikovaʼekue Ryan ha hembireko Mandi rehe. Haʼekuéra testígo ha oiko Florídape (Estados Unidos). Ryan oñemongetáva jepi la Bíbliare peteĩ ikompañéro de traváhondi. Upe karai ningo hindú ha oguerohoryeterei mbaʼéichapa Ryan oñemonde ha oñeʼẽ. Haʼekuéra oñemongeta ñemoingove jeýre ha mbaʼépa oiko umi omanovaʼekuégui. Peteĩ jey, enérope upe karai oporandu hembirekópe, hérava Yodi, haʼépa oikuaa umi testigos de Jehovápe. Yodi ningo católica vaʼekue. Haʼe oikuaa umi testígo opredikaha ogaha rupi ha upévante. Upévare oheka informasión oñeʼẽva testigos de Jehováre Internétpe. Yodi otopa ñane direksión www.watchtower.org, ha heta mésere olee la Biblia ha umi informasión ogustáva chupe.

¹⁵ Upe tiémpope ou oikuaa Mándipe, mokõivéva ningo enferméra. Mandi omyesakãmbaite chupe umi mbaʼe oikuaaséva. Upe riremínte oñemongeta hikuái la Biblia heʼívare “Adán guive Armagedón peve”, ha Yodi oñepyrũ ostudia la Biblia. Pyaʼe voi oho rreunionhápe. Octúbrepe osẽma opredika ha febrérope ojevautisáma. Haʼe heʼi: “Koʼág̃a aikuaávo Ñandejárape, avyʼa ha añeñandu porã”.

16. Mbaʼépa ñanemboʼe Ryan ohasavaʼekue?

¹⁶ Ryan noimoʼãi oñemongetávo la Bíbliare ikompañéro de traváhondi oipytyvõtaha ambue tapichápe oikuaa hag̃ua Jehovápe. Upéi ningo Ryan oikuaa mbaʼépa oiko oñehaʼã haguére ‘oikuaauka opárupi ha hekoitépe pe marandu porã’, péro ñande ikatu ndajaikuaái mbaʼépa oiko japredika rire. Ikatu japredika ogaha rupi, ñambaʼapohápe, eskuélape térã ambue hendápe, ha pe marandu porã og̃uahẽ ambue tapichápe. Pablo ndoikuaaivaʼekue mbaʼépa ohupytýta opredikávo “Asia rupi”, ha ñande avei ikatu ndajaikuaái mbaʼépa ojehupyty ñane predikasión rupive (jaleemína Hechos 23:11; 28:23). Upéicharamo jepe, akóinte ñamoherakuãvaʼerã pe marandu porã.

17. Mbaʼépa enterove jajapose ko 2009 aja?

¹⁷ Ko áño 2009 aja, jasegíkena japredika kyreʼỹme ogaha rupi ha oimehápe. Péicha ikatúta jaʼe Pablo heʼi haguéicha: ‘Che rekove jepe namombaʼéi ikatúma guive añani ipahaite peve, ha ajapopa upe tembiapo Jesús omeʼẽvaʼekue chéve, aikuaauka hag̃ua opárupi ha hekoitépe pe marandu porã ha Ñandejára pyʼaporã’.

Mbaʼépa ere chupe?

• Mbaʼéichapa Pedro, Pablo ha ambue kristiáno síglo primeropegua opredika opárupi ha hekoitépe?

• Mbaʼéichapa ñane predikasión rupive ikatu ojehupyty heta mbaʼe ñaimoʼãʼỹva?

• Mbaʼe téystorepa ñanemanduʼa meméta ko 2009-pe, ha mbaʼérepa ikatu jaʼe oĩ porãha?

[Porandu ñahesaʼỹijóva]

[Rrekuádro oĩva páhina 19-pe]

Téysto 2009-pe g̃uarã: ‘Jaikuaaukáke opárupi ha hekoitépe pe marandu porã’ (Hech. 20:​24, NM).

[Nóta oĩva taʼanga ndive páhina 17]

Umi ansiáno Efesoygua oikuaa Pablo opredika hague ogaha rupi

[Nóta oĩva taʼanga ndive páhina 18]

Mbaʼépa ikatu ojehupyty ñane predikasión rupive?