Ndaijojahái Jesús ojapóva oñekumpli hag̃ua Jehová rembipota

‘Che niko haʼe pe tape, pe añetegua ha pe tekove. Che rupímante ikatu oñeg̃uahẽ che Ru rendápe.’ (JUAN 14:​6, JMP.)

1, 2. Mbaʼérepa ñahesaʼỹijovaʼerã Jesús ojapovaʼekue oñekumpli hag̃ua Jehová rembipota?

 YMA guivéma heta ñande rapicha oñehaʼã ivaleve opavavégui ojapóvape, péro ndaikatúi. Saʼieterei oĩ ikatúva heʼi ndaiporiha ohupytýva chupe ojapóvape. Péro Jesucrístope ndaipóri ohupytýva opa mbaʼépe voi.

² Mbaʼérepa ñahesaʼỹijovaʼerã Jesús ojapovaʼekue oñekumpli hag̃ua Jehová rembipota? Jahechakuaa hag̃ua ñaime porãpa Jehovándi. Jesús heʼi: ‘Che niko haʼe pe tape, pe añetegua ha pe tekove. Che rupímante ikatu oñeg̃uahẽ che Ru rendápe’ (Juan 14:​6, JMP; 17:3). Koʼág̃a jahechamíta mbaʼérepa Jesús ndaijojahái. Upéicha ñantende ha ñamombaʼéta Jesús ojapovaʼekue oñekumpli hag̃ua Jehová rembipota.

‘Taʼýra peteĩetéva’

3, 4. a) Mbaʼépa heʼise ‘taʼýra peteĩetéva’? b) Maʼerãpa Jehová oiporu Jesúspe?

³ Jesús ningo pe ‘Ñandejára Raʼy peteĩetéva’ (Juan 3:​16, 18). Pe ñeʼẽ ojetradusíva griégogui ‘taʼýra peteĩetéva’ heʼise ‘ndaiporiha haʼeichagua, ndaijojahái’ ha haʼeñoitenteha. Péro Jehová ningo hetaiterei itaʼýra yvágape, mbaʼérepa upéicharõ ikatu jaʼe Jesús haʼeñoitenteha?

⁴ Ñandejaraite voi ojapo haguére chupe. Jesúspe ningo ‘Ñandejára ojapovaʼekue iñepyrũmby’, ‘itaʼýra ypykue’ (Col. 1:15; Rev. 3:14). Jehová ningo ojapovaʼekue Jesúspe, ha oiporu chupe ojapo hag̃ua opa mbaʼe ijojahaʼỹva yvágape ha ko yvy ape ári (jaleemína Juan 1:3). Apóstol Pablo ohai: ‘Ñandéve g̃uarã Ñandejára peteĩ añónte. Ñande Ru ojapovaʼekue opaite mbaʼe, ha ñande jaikove chupe g̃uarã. Oĩ avei peteĩnte Jesucristo, ha haʼe rupive oiko opa mbaʼe, ha ñande avei’ (1 Cor. 8:​6, BNP).

5. Mbaʼéichapa la Biblia ohechauka Jesús ndaijojahaiha?

⁵ Upéicharamo jepe, hetave mbaʼére ikatu jaʼe Jesús ndaijojahaiha. Pór ehémplo la Biblia ohechauka Jesús ndaijojahaiha ohenóivo chupe heta hendáicha. Umíva ohechauka mbaʼe mbaʼépa haʼe ojapo oñekumpli hag̃ua Jehová rembipota. Jahechamíta koʼág̃a Jesúspe oñehenoiha cinco hendáicha.

‘Pe Ñeʼẽ’

6. Mbaʼérepa oñehenói Jesúspe ‘pe Ñeʼẽ’?

⁶ (Jaleemína Juan 1:14.) Mbaʼérepa oñehenói Jesúspe ‘pe Ñeʼẽ’ térã Logos? Jehová oiporu rupi chupe omombeʼu hag̃ua umi anhelkuérape ha yvyporakuérape mbaʼépa oipota ojapo hikuái. Jesús ningo haʼe pe Ñeʼẽ ha upéva jahechakuaa koʼápe heʼívare umi hudíope: ‘Che aporomboʼéva nachembaʼéi, upe chembouvaʼekue mbaʼénte. Pe ojaposéva Ñandejára rembipota ohechakuaáta pe che aporomboʼévapa Ñandejára  mbaʼe térãpa che añeʼẽ chejeheguínte’ (Juan 7:​16, 17). Jesúspe oñehenói ‘pe Ñeʼẽ’ oho rire jey yvágape jepe (Rev. 19:​11, 13, 16).

7. Mbaʼe ehémplopa omoĩ ñandéve Jesús?

⁷ Ñapensamína mbaʼépa heʼise ‘pe Ñeʼẽ’. Jesús ningo iñaranduvéramo jepe ndojeroviái ijehénte, upévare omombeʼu Itúva heʼívante. Haʼe opa mbaʼe heʼíva ha ojapóvape ohechauka omombaʼeguasuha Jehovápe (Juan 12:50). Ha omoĩ ñandéve peteĩ ehémplo iporãva. Jehová oipota ñande avei péicha ñamombeʼu pe marandu porã ñande rapichakuérape (Rom. 10:15). Jesús ningo iñumildevaʼekue ha iñehémplo ñanemomyivaʼerã ñañatende porã hag̃ua mbaʼépa jaʼéta. Avei ñamombeʼúta jave Ñandejára Ñeʼẽ, ‘ndajahaivaʼerã amo gotyove Ñandejára Ñeʼẽ heʼívagui’ (1 Cor. 4:6).

‘Pe Amén’

8, 9. a) Mbaʼépa heʼise ‘amén’ ha mbaʼérepa oñehenói Jesúspe ‘pe Amén’? b) Mbaʼéichapa Jesús ohechauka haʼeha ‘pe Amén’?

⁸ (Jaleemína Revelación 3:14.) Pe ñeʼẽ evréo ‘amén’ heʼise “taupéicha” ha “jeroviaha”. Ojeporu avei ojeʼe hag̃ua Jehová katuete okumpliha heʼíva (Deu. 7:9; Isa. 49:7). Péro, mbaʼéichapa ohechauka Jesús ndaijojahaiha oñehenói rupi chupe ‘pe Amén’? Jahechamína upéva 2 Corintios 1:​19, 20-pe: ‘Jesucristo, Ñandejára raʼy ndeʼíri “si” ha upe rire “no”. Jesucristo heʼíva guive ojapopaite. Haʼe rupive Ñandejára promésa oikopa katuete. Upévare ñamombaʼeguasu jave Ñandejárape jaʼe “Amén”’. Ha mbaʼérepa Jesúspe oñehenói ‘pe Amén’?

⁹ Jesús rupive Jehová ojapopaitéta oprometéva. Haʼe ningo iñeʼẽrendu Itúvape onase guive omano meve. Ha omeʼẽ rupi hekove ñanderehehápe, jajerovia Jehová okumplitaha katuete oprometevaʼekue. Jesús ningo ohechauka haʼeha ‘pe Amén’ iñeʼẽrendúvo Itúvape. Upéicha avei, ohechauka Satanás ijapuha heʼírõ guare oservíva guive Jehovápe ohasa asýramo ohejataha chupe (Job 1:​6-12; 2:​2-7). Ñandejára raʼykuéra apytépe ningo Jesús añoite ikatuvaʼekue ombohovái Satanáspe. Haʼeñoite avei ikatu odefende Jehová sãmbyhy. Ha upéva ningo iñimportanteve opa mbaʼégui.

10. Mbaʼéichapa ikatu jasegi Jesús ehémplo?

¹⁰ Mbaʼéichapa ikatu jasegi Jesús ehémplo? Upearã ñaneñeʼẽrenduvaʼerã Jehovápe ha ñadefende isãmbyhy. Upéicharõ jajapóta Proverbios 27:​11-pe heʼíva: ‘Nearandúke che raʼy, upéva chembovyʼa, ha ikatúta ambohovái cherehe oñembohorývape’.

‘Pe oñeʼẽva ñanderehehápe’

11, 12. Mbaʼérepa jaʼe Jesús haʼeha peteĩ mediador ijojahaʼỹva?

¹¹ (Jaleemína 1 Timoteo 2:​5, 6.) Jesús rupive Ñandejára ojapo peteĩ kompromíso pyahu yvyporakuérandi, haʼe ningo pe ‘oñeʼẽva ñanderehehápe’ (Heb. 9:15; 12:24). Ñandejára ojapomavaʼekue peteĩ kompromíso Israel ndive Moisés rupive, péicha Moisésgui oiko peteĩ mediador (Gál. 3:19).

¹² Pe ñeʼẽ griégo ojetradusíva “mediador” ojeporu oñeñeʼẽ hag̃ua peteĩ abogado rembiapóre térã peteĩ oñeʼẽvare ñanderehehápe. Ha mbaʼérepa jaʼe Jesús haʼeha peteĩ mediador ijojahaʼỹva? Pórke Jesús rupive Ñandejára ojapo peteĩ kompromíso pyahu yvyporakuérandi. Péicha oñepyrũ pe ‘Israel Ñandejára mbaʼéva’ (Gál. 6:16). Umi ohótavape yvágape Ñandejára oiporavo ijespíritu rupive oiko hag̃ua chuguikuéra ‘saserdóte marangatu’ (1 Ped. 2:9; Éxo. 19:6). Péro pe kompromíso Moisés ojapovaʼekue Ñandejárandi ndahaʼéi upéicha.

13. Mbaʼérepa Jesús haʼe peteĩ Mediador?

 ¹³ Mbaʼérepa Jesús haʼe peteĩ Mediador? Omeʼẽ rupi hekove yvyporakuéra rehehápe, ha Jehová ningo ohecha hekojojávaramo umi oikévape pe kompromíso pyahúpe (Rom. 3:24; Heb. 9:15). Upévare haʼekuéra ikatúta oisãmbyhy yvágape, ha Jesús katu oipytyvõ chupekuéra hekopotĩ ha oĩ porã hag̃ua Ñandejára renondépe (Heb. 2:16).

14. Mbaʼépa ojehupyty pe kompromíso pyahu rupive, ha mbaʼépa enterove jahechaukavaʼerã?

¹⁴ Péro oĩ heta opytátava ko yvy ape ári opa ára g̃uarã. Ha mbaʼépa ohupyty hikuái pe kompromíso pyahu rupive? Haʼekuéra ningo ohupyty heta mbaʼe porã, Ñandejára operdona chupekuéra hembiapo vaikue ha ikatu hekojoja ha oiko chuguikuéra Ñandejára amígo (Sant. 2:23; 1 Juan 2:​1, 2). Upévare, tahaʼe jaikótava opa ára g̃uarã ko yvy ape ári térã yvágape, enterove jahechaukavaʼerã ñamombaʼeha Jesús ojapovaʼekue.

Pe Saserdóte Guasu

15. Mbaʼérepa jaʼe Jesús haʼeha peteĩ Saserdóte Guasu ijojahaʼỹva?

¹⁵ Yma oĩramo jepe heta saserdóte guasu, Jesús haʼevaʼekue peteĩ Saserdóte Guasu ijojahaʼỹva. Mbaʼérepa jaʼe upéva? Apóstol Pablo heʼi: ‘Haʼe ndahaʼéi umi ambue saserdóte guasúicha, ojapo raẽ vaʼerã sakrifísio hembiapo vaikuére koʼẽ koʼẽre, ha upéi opavave rembiapo vaikuére. Jesús omeʼẽ hekove sakrifísioramo opa ára g̃uarã. Moisés léi niko omoĩ saserdóte guasúramo yvypóra imperféktope. Péro Ñandejára opromete haguéicha, omoĩ Saserdóte Guasúramo Itaʼýrape opa ára g̃uarã’ (Heb. 7:​27, 28). *

16. Mbaʼérepa ndaijojahái Jesús ojapovaʼekue sakrifísio?

¹⁶ Jesús ningo perfektovaʼekue, Adán perfékto haguéicha (1 Cor. 15:45). Ha pe sakrifísio ojapovaʼekue ndaijojahái, haʼeñoite ikatu rupi omeʼẽ hekove enterovéva rehehápe. Pe léi oñemeʼẽvaʼekue Moisés rupive heʼi ojejapovaʼerãha sakrifísio káda día. Upéicharamo jepe, umi sakrifísio ojejapóva ndohupytýi Jesús ojapovaʼekuépe (Heb. 8:5; 10:1). Jesús ningo peteĩ Saserdóte Guasu ijojahaʼỹva, ojehupyty rupi heta mbaʼe porã ndopamoʼãiva isakrifísio rupive.

17. Mbaʼérepa ñaikotevẽ Jesús, pe Saserdóte Guasu rehe? Ha mbaʼépa ojapo Ñandejára siervokuéra ohechakuaáva upéva?

¹⁷ Ñaneimperfékto rupi ñaikotevẽ Jesús, pe Saserdóte Guasu ojapo peteĩ sakrifísio ñaime porã hag̃ua Ñandejárandi. Apóstol Pablo ohai: ‘Jesús ningo ñande Saserdóte Guasu ikatúva ñandeporiahuvereko ñanekangy jave, chupe voi niko oñemoñuhãsevaʼekue ñandéicha. Haʼe ningo nahembiapovaírinte arakaʼeve, ndahaʼéi ñandéicha’ (Heb. 4:15). Ñandejára siervokuéra ohechakuaáva ko mbaʼe ‘ndoikovéima ijupe g̃uarãnte, oikove guei upe hesehapekuéra omano ha oikove jey vaʼekuépe g̃uarã’ (2 Cor. 5:​14, 15; Luc. 9:23).

Pe Ñemoñare

18. a) Mbaʼépa Jehová oprometevaʼekue Adán omboykérõ guare chupe? b) Mbaʼépa ojeʼe upe Ñemoñare rehe?

¹⁸ Adán omboykérõ guare Jehovápe,  haʼetévaicha yvyporakuéra ndaikatumoʼãvéimava oiko porã Ñandejárandi ni oiko opa ára g̃uarã vyʼápe peteĩ hardínpe. Péro Jehová oprometevaʼekue omboutaha peteĩ ñemoñare osalva hag̃ua yvyporakuérape (Gén. 3:15). Ha yma ojehai hetaiterei profesía oñeʼẽva upe Ñemoñare rehe. Ojeʼe ouvaʼerãha Abrahán, Isaac, Jacob ha rréi David familiarégui (Gén. 21:12; 22:​16-18; 28:14; 2 Sam. 7:​12-16).

19, 20. a) Mávapa pe Ñemoñare oñeprometevaʼekue? b) Mbaʼérepa umi ohótava yvágape oĩ avei Abrahán Ñemoñare apytépe?

¹⁹ Mávapa rakaʼe upe Ñemoñare? Gálatas 3:​16-pe omombeʼu (jaleemína). Upéicharamo jepe, apóstol Pablo upe rire heʼi umi ohótavape yvágape: ‘Peẽ Cristo remimboʼe rupi, Abrahán ñemoñare hína, ha pehupytýta Ñandejára oprometevaʼekue’ (Gál. 3:​29, BNP). Mbaʼérepa apóstol Pablo heʼi Cristo haʼeha upe Ñemoñare oñeprometevaʼekue ha upéi heʼi haʼeha avei umi ohótava yvágape?

²⁰ Koʼág̃a rupi hetaiterei oĩ oñemombaʼeguasúva haʼégui Abrahán familiare. Ha oĩ voi rrelihión heʼíva iprofetakuéra haʼeha Abrahán ñemoñare. Péro añetehápe piko upéicha? Nahániri. Heʼi haguéicha apóstol Pablo enterove Abrahán familiare ndahaʼéi pe Ñemoñare. Hetáramo jepe Abrahán ifamília, Isaac rupivénte ouvaʼerã pe Ñemoñare (Heb. 11:18). Ha peteĩtante avei pe ñemoñare iñimportantevéva, upéva hína Jesucristo. La Biblia ningo heʼi voi Jesús haʼeha Abrahán ñemoñare onaségui Isaac familiarégui. * Upe rire, ‘Cristo remimboʼe rupi’ umi  kristiáno ohótava yvágape oĩ avei Abrahán ñemoñare apytépe. Péicha jahecha ndaijojahaiha Jesús ojapóva oñekumpli hag̃ua pe primera profesía oĩva la Bíbliape.

21. Mbaʼépa nde remombaʼeve Jesús ojapovaʼekue apytépe?

²¹ Mbaʼépa ñanemboʼe koʼã mbaʼe jahechavaʼekue? Jesús ndaijojahaiha. Upéicharamo jepe, haʼe oservi Jehovápe, ojapo hembipota ha nopensái ijehénte (Juan 5:41; 8:50). Aje piko iporãite pe ehémplo omoĩva ñandéve! Upévare, ñañehaʼãkena Jesús ojapo haguéicha, ha ‘jajapo opa mbaʼe oñemombaʼeguasu hag̃ua Jehovápe’ (1 Cor. 10:​31, BNP).

[Nóta]

Ñambohovaimi koʼã porandu

• Mbaʼéichapa oñehenói la Bíbliape Jesúspe ha mbaʼépa ñanemboʼe upéva? (Jahechami pe rrekuádro.)

• Mbaʼépa jajapovaʼerã jasegi hag̃ua Jesús ehémplo?

[Porandu ñahesaʼỹijóva]

[Taʼanga ha rrekuádro oĩva páhina 15-pe]

Ndaijojahái rupi Jesús ojapóva oñehenói chupe:

◼ Pe Ñandejára Raʼy peteĩetéva (Juan 1:3). Jehováite voi ojapovaʼekue Jesúspe.

◼ Pe Ñeʼẽ (Juan 1:14). Jehová oiporu itaʼýrape heʼi hag̃ua mbaʼépa oipota ojejapo.

◼ Pe Amén (Rev. 3:14). Jesús omano rupi ñanderehehápe ha iñeʼẽrendúgui oĩrõ guare ko yvy ape ári, ohechauka Jehová katuete okumpliha oprometéva.

◼ Pe Mediador (1 Tim. 2:​5, 6). Jesús oñeʼẽ rupi yvyporakuéra rehehápe oñepyrũ peteĩ Israel pyahu, ‘pe Israel Ñandejára mbaʼéva’. Ha umíva hína umi ohótava yvágape saserdoterã (Gál. 6:16; 1 Ped. 2:9).

◼ Saserdóte Guasu (Heb. 7:​27, 28). Jesús añoite ikatu vaʼekue ojapo peteĩ sakrifísio perfékto ha opa ára g̃uarãva. Haʼe añoite ikatu ñandepeʼa pekádo ha ñemano poguýgui.

◼ Pe Ñemoñare (Gén. 3:15). Jesucristo haʼe pe ñemoñare iñimportantevéva. Ha upéi umi kristiáno ohótava yvágape haʼe avei pe ñemoñare ‘Cristo remimboʼe rupi’ (Gál. 3:29).