Oñeporandúva jepi

Nehemías 8:​10-pe Jehová heʼi umi israelguápe “peʼu tembiʼu ikyráva”. Péro Levítico 3:​17-pe heʼi ‘mbaʼeveichagua kyrakue ndapeʼuivaʼerã’. Mbaʼépa heʼise koʼã téysto?

Levítico 3:​17-pe heʼihápe “kyrakue” ojeporu pe ñeʼẽ evréo jélev heʼiséva mymba térã yvypóra roʼo kyrakue (Lev. 3:3; Jue. 3:22). Pe versíkulo 17 mboyve heʼi, ‘opaite ikyrakue Ñandejára mbaʼenteha’. Upévare ndovaléi hoʼu hikuái mbaʼeveichagua kyrakue tahaʼe oĩva hyekue, irriñón térã ilómore (Lev. 3:​14-16). Upéicharõ umi Israelgua ojapo jave sakrifísio Jehovápe ndovaléi hoʼu pe soʼo kyrakue.

Péro Nehemías 8:10-pe heʼihápe “tembiʼu ikyráva” ojeporu pe ñeʼẽ evréo maschmanním. Ko ñeʼẽ ou pe verbo schamén-gui heʼiséva “ikyráva”. Ha ojeporu jepi ojeʼe hag̃ua peteĩ tapicha rehe oiko porãha (embojojami Isaías 25:6 rehe). Avei ojeporu pe ñeʼẽ schémen ojeʼe hag̃ua “aséite”, pór ehémplo “aséite de olíva” (Deu. 8:8; Lev. 24:2). Nehemías 8:​10-pe maschmanním heʼise umi tembiʼu ikyráva, isoʼóva péro ndorekóiva soʼo kyrakue.

Umi Israelgua ndaikatúiramo jepe hoʼu soʼo kyra ikatu hoʼu tembiʼu ikyráva. Pór ehémplo tórta de cereal, upéva ojejapo hag̃ua ojeporu aséite de olíva (Lev. 2:7). Upévare, Perspicacia para comprender las Escrituras heʼi “‘tembiʼu ikyráva’ heʼiseha umi tembiʼu hypyʼũ asýva, isoʼóva, ha ñanemombaretéva. Heʼise avei umi tembiʼu oñemoĩva pype aséite”.

Jaikuaaháicha upe Léi oñemeʼẽvaʼekue umi Israelguápe g̃uarãnte, upévare koʼág̃a ñande natekotevẽvéima ñakumpli (Rom. 3:20; 7:​4, 6; 10:4; Col. 2:​16, 17).