Ñandejára rembiguái omano ñanderehehápe
Ñandejára rembiguái omano ñanderehehápe
‘Chupe ojekutu ha oñemyanguʼipa ñane rembiapo vaikuére. Ha chupe ojekutu rupi jakuera.’ (ISA. 53:5.)
1. Mbaʼe rehépa jajepyʼamongetavaʼerã jaha jave Conmemoraciónpe? Mbaʼe profesíapa ñanepytyvõta upearã?
KÁDA áño jaha Conmemoraciónpe jajepyʼamongeta hag̃ua umi mbaʼe porã ojehupytývare Jesús omano haguére. Upe ára ñanemomanduʼa iñimportanteha ñamombaʼeguasu Jehová réra, ñadefende isãmbyhy ha avei oñekumpli hembipota. Isaías 53:3-12 ohechauka porãiterei Jesús ohasavaʼekue omeʼẽrõ guare hekove ñanderehehápe ha mbaʼépa ojehupyty upéva rupive. Proféta Isaías heʼimavaʼekue Ñandejára Rembiguái ohasa asytaha ha mbaʼéichapa omanóta. Avei omombeʼu mbaʼépa ohupytýta umi ohótava yvágape ha ‘ambue ovechakuéra’ (Juan 10:16).
2. Mbaʼépa Jehová heʼimavaʼekue Isaías rupive, ha maʼerãpa ñanepytyvõta upéva?
2 Siete síglo Jesús onase mboyve, Jehová heʼimavaʼekue Isaías rupive Hembiguái iñeʼẽrendutaha ojejopy vaivéramo jepe chupe. Upéicha ohechauka ojeroviaha itaʼýra iñeʼẽrendutaha chupe. Ñahesaʼỹijóvo ko profesía ñanepytyvõta jajeroviave hag̃ua Ñandejárare ha jahayhuve hag̃ua chupe.
Jesúsre ningo ‘ojejahéi’ ha ‘ndojeapói mbaʼevérõ’
3. a) Mbaʼérepa umi hudío omombaʼevaʼerãmoʼã Jesúspe? b) Péro mbaʼépa ojapo hikuái?
3 (Jaleemína Isaías 53:3.) Jesúspe ijetuʼúneraʼe oheja Itúvape ha ou ko yvy ape ári omano ñanderehehápe ñandepeʼa hag̃ua pekádo ha ñemano poguýgui (Fili. 2:5-8). Isakrifísio ndaikatúi ñambojoja umi mymba oñekuaveʼẽvaʼekuére Israélpe. Jesús sakrifísio rupive ikatu oñeperdonambaite yvyporakuéra pekádo (Heb. 10:1-4). Umi hudío ohaʼarõma voi pe Mesías oñeprometevaʼekuépe. Upévare omombaʼe ha oguerohoryvaʼerãmoʼã chupe (Juan 6:14). Péro, haʼekuéra ‘ojahéi’ Jesúsre ha ‘ndoapói chupe mbaʼevérõ’, heʼi haguéicha Isaías. Apóstol Juan ohai: “Hetã teépe ou, umi hetãygua katu nomog̃uahẽi chupe” (Juan 1:11). Ha apóstol Pedro katu heʼi umi hudíope: ‘Ñandejára omombaʼeguasu itaʼýra Jesúspe, upe peẽ pemeʼẽ ha penegavaʼekue Pilato renondépe haʼe opoiséramo jepe chugui. Peẽ katu penega pe imarangatu ha imbaʼeporãvape’ (Hech. 3:13, 14, BNP).
4. Mbaʼérepa ojeʼe Jesús ojepokuaataha mbaʼasýre?
4 Isaías heʼivaʼekue avei Jesús ‘ojepokuaataha mbaʼasy rehe’. La Biblia heʼíramo jepe Jesús ikaneʼõ hague jepi, ndeʼiriete hasyha (Juan 4:6). Mbaʼérepa upéicharõ ojeʼe Jesús ojepokuaataha mbaʼasýre? Haʼe ningo opredika jave oikuaa heta hasývape, ha hetápe omonguera (Mar. 1:32-34). Ha péicha Jesús okumpli upe profesía: “Haʼe katu ogueraha ijapére ñane mbaʼasy, ha ogueropuʼaka opa mbaʼe hasýva ñandéve” (Isa. 53:4a; Mat. 8:16, 17).
Haʼete ‘Ñandejára oinupãva chupe’
5. Mbaʼépa opensa umi ohechavaʼekue Jesús ohasa asy ha omano? Ha mbaʼéichapa oñeñandúneraʼe Jesús?
5 (Jaleemína Isaías 53:4b.) Jesús oĩrõ guare ko yvy ape ári, saʼi oĩ ontendéva mbaʼérepa haʼe ohasa asy ha omano. Heta oĩ opensáva Ñandejára okastigaha itaʼýrape, ku ombourõguáicha peteĩ mbaʼasy vai chupe (Mat. 27:38-44). Umi hudío heʼi hese oñeʼẽ vaiha Ñandejárare (Mar. 14:61-64; Juan 10:33). Péro Jesús ningo ndojapói upéva ni mbaʼeve ivaíva. Haʼe ohayhueterei Itúvape, upévare oiméne oñeñandu vaieterei ojeʼe haguére hese heta mbaʼe vai. Upéicharamo jepe, Jesús ojaposevaʼekue Jehová rembipota (Mat. 26:39).
6, 7. a) Mbaʼérepa ojeʼe Jehová ojopyse hague itaʼýrape? b) Mbaʼérepa ojeʼe Jehová ovyʼa hague itaʼýra omano haguére?
6 Proféta Isaías heʼi oĩtaha opensáva ‘Ñandejára oinupãha Jesúspe’. Ha heʼi avei ‘jeiko asýpe Ñandejára ojopyse hague chupe’ (Isa. 53:10). Péro mbaʼéicha piko Jehová ojaposéta upéva itaʼýrare? Haʼe voi ningo heʼivaʼekue: ‘Pemaʼẽ porãke che rembiguái rehe, che rembiporavopyre, chepyʼarory heseve’ (Isa. 42:1, ÑÑB). Upéicharõ, mbaʼépa heʼiséraʼe Jehová?
7 Ñantende hag̃ua ko profesía, ñanemanduʼavaʼerã Satanás oñemoĩ hague Ñandejára sãmbyhýre. Ha upérõ heʼi hague ni peteĩ yvypóra ha ánhel naiñeʼẽrendumoʼãiha Jehovápe (Job 1:9-11; 2:3-5). Péro Jesús iñeʼẽrendúvo Itúvape omano meve ohechauka Satanás ijapu hague. Upeichaite, Jehová ohejáramo jepe ojejuka Jesúspe, ovyʼa ohecha rupi mbaʼeichaitépa itaʼýra iñeʼẽrendu chupe (Pro. 27:11). Avei Jehová ovyʼa oikuaágui itaʼýra omeʼẽvo hekove ikatuha oñeperdona umi oñembyasy ha ojevývape hembiapo vaikuégui (Luc. 15:7).
Omano ñanderehehápe
8, 9. a) Mbaʼéichapa Jesús oheja ‘ojekutu chupe ñane rembiapo vaikuére’? b) Mbaʼéichapa apóstol Pedro ohechauka upeichaha?
8 (Jaleemína Isaías 53:6.) Ñande ningo jajogua ovecha okañývape, jaheka jaikóvo mbaʼéichapa jajeíta mbaʼasy ha ñemano poguýgui (1 Ped. 2:25). Entéro ñaneimperfékto ha ndaikatúi ñamoĩ porã jey Adán ombyaivaʼekue (Sal. 49:7). Upéicharamo jepe, Jehová ñanderayhuetereígui ‘omoĩ itaʼýra atiʼy ári ñane rembiapo vaikue’. Cristo oheja ‘ojekutu ha oñemyanguʼipa chupe ñane rembiapo vaikuére’. Péicha omano ñanderehehápe ñandepeʼa hag̃ua pekádo poguýgui.
9 Apóstol Pedro ohai: ‘Ñandejára penerenoivaʼekue, ha Cristo voi ohasa asy vaʼekue penderehehápe ha ohechauka peẽme mbaʼéichapa peikovaʼerã ipyporépe. Cristo voi oguerahavaʼekue ñande pekadokuéra omanóvo yvyráre, ndajaikovéima hag̃ua pekádope, jaiko hag̃ua guei teko marangatúpe’. Ha omombeʼu avei proféta Isaías heʼíva: ‘Chupe ojekutuvaʼekue peẽ pekuera hag̃ua’ (1 Ped. 2:21, 24, BNP; Isa. 53:5). Péicha rupi yvyporakuéra imperfékto ikatu oĩ porã Ñandejárandi. Heʼi haguéicha apóstol Pedro: ‘Cristo niko omano ñane rembiapo vaikuére peteĩ jey opa ára g̃uarã. Haʼe nahembiapovairivaʼekue, ha ohasa asy umi iñañáva rehehápe, penemoĩ porã hag̃ua Ñandejárandi’ (1 Ped. 3:18).
“Ojereraha ovecharaʼýicha, ojejuka hag̃uáme”
10. a) Mbaʼépa heʼi Juan Bautista ohechávo Jesúspe? b) Mbaʼérepa ohenói chupe upéicha?
10 (Jaleemína Isaías 53:7, 8.) Juan Bautista ohechávo Jesús ou, heʼi: ‘Kóva haʼe pe Ñandejára Ovecharaʼy oipeʼáva yvyporakuéra pekádo’ (Juan 1:29, BNP). Oiporúvo pe ñeʼẽ “Ovecharaʼy”, Juan Bautista oiméne imanduʼa proféta Isaías heʼivaʼekuére: “Ojereraha ovecharaʼýicha, ojejuka hag̃uáme” (Isa. 53:7). Avei Isaías heʼi: ‘Oñemeʼẽ omano hag̃ua’ (Isa. 53:12). Upévare Jesús omoñepyrũrõ guare pe Conmemoración omeʼẽ peteĩ kópa de víno umi once ijapostolkuérape, ha heʼi: ‘Kóva hína che ruguy, oñeñohẽva heta rehehápe, ojeheja rei hag̃ua chupekuéra hembiapo vaikue’ (Mat. 26:28).
11, 12. a) Mbaʼépa ohechauka ñandéve Isaac ojapovaʼekue? b) Mbaʼépa ñanemanduʼavaʼerã jaha jave Conmemoracionhápe?
11 Jesús omeʼẽsevaʼekue hekove sakrifísioramo Jehovápe, Isaac ojapo haguéicha (Gén. 22:1, 2, 9-13; Heb. 10:5-10). Jaikuaa ningo Isaac oheja hague itúva omeʼẽ chupe sakrifísioramo, péro Abrahán hína la oikuaveʼẽva upe sakrifísio (Heb. 11:17). Upéicha avei, Jesús omanosevaʼekue ñanderehehápe, péro ojapo upéva Jehová oipota rupi. Upéicharõ pe sakrifísio Jesús ojapovaʼekue ohechauka mbaʼeichaitépa Ñandejára ñanderayhu.
12 Jesús voi heʼivaʼekue: ‘Ñandejára ohayhuetereígui yvyporakuérape, omeʼẽvaʼekue Itaʼýra peteĩetépe, ani hag̃ua omano umi hese ojeroviáva, oikove hag̃ua guei opa ára g̃uarã’ (Juan 3:16). Apóstol Pablo ohaivaʼekue: ‘Ñandejára ohechaukáma imborayhu ñandéve, Jesucristo omanóvo ñanderehehápe, jajavýramo jepe’ (Rom. 5:8, ÑÑB). Ñamombaʼéramo jepe Jesús omeʼẽ hague hekove ñanderehehápe, ñanemanduʼavaʼerã Jehová ojapouka hague upéva. Upévare jaha Conmemoracionhápe, ñamombaʼeguasu hag̃ua Jehovápe.
Ñandejára Rembiguái ‘omopotĩ heta yvy ariguápe hembiapo vaígui’
13, 14. Mbaʼéichapa Ñandejára rembiguái ‘omopotĩ heta yvy ariguápe hembiapo vaígui’?
13 (Jaleemína Isaías 53:11, 12, ÑÑB.) Jehová heʼi Hembiguái oiporavovaʼekuére: “Haʼe, pe hekopotĩva omopotĩ heta yvy ariguápe hembiapo vaígui”. Mbaʼépa heʼise upéva? Versíkulo 12 opakuévo heʼíva ñanepytyvõ jaikuaa hag̃ua: ‘Haʼe oñemboʼe hembiapo vaívare’. Enterove ñande Adán familiare ha upévare ñanase pekadór ha jajavy. Ha jaikuaaháicha “mbaʼe vai apo oporogueraha ñemanóme” (Rom. 5:12; 6:23). Upévare tekotevẽ ñañemoĩ porã Jehovándi. Ha Isaías kapítulo 53 ohechauka mbaʼéichapa Jesús omano yvyporakuéra pekadór rehehápe. Heʼi péicha: ‘Hoʼa hiʼári pe kastígo oguerúva pyʼaguapy. Ha chupe ojekutu rupi jakuera’ (Isa. 53:5).
14 Jesús omanóvo enterove rembiapo vaikuére, ‘hetaitereípe omopotĩ’. Apóstol Pablo ohai: ‘Crístope niko Ñandejára omoĩvaʼekue opa ipokatu. Ha haʼe rupi, Ñandejára omoingo porã jey hendive opa mbaʼe oĩva ko yvy ári ha yvágape. Ha ojapo upéva Cristo ruguy rupi, oñohẽvaʼekue yvyráre’ (Col. 1:19, 20, BNP).
15. a) Mávapa ‘umi mbaʼe oĩva yvágape’ oñeʼẽ hague Pablo, ha mbaʼérepa ikatu ojerereko chupekuéra hekopotĩvaramo? b) Máva añoitépa ikatu hoʼu pe pán ha víno Conmemoración jave?
15 Umi ‘mbaʼe oĩva yvágape’ oñemoĩ porãva Ñandejárandi ningo umi ungido. Haʼekuéra oisãmbyhýta Cristo ndive. Chupekuéra ningo ojeporavo oho hag̃ua yvágape, ha ‘ojerereko hekopotĩvaramo ohupyty hag̃ua tekove tapia g̃uarã’ (Heb. 3:1; Rom. 5:1, 18, BNP). Upéicha Jehová oreko chupekuéra itaʼýraramo. Espíritu sánto rupive umi ungido ohechakuaa ohotaha yvágape Jesús ndive. Upépe haʼekuéra oisãmbyhýta ha oikóta saserdóteramo Ñandejára Rréinope (Rom. 8:15-17; Rev. 5:9, 10). Péicha oiko chuguikuéra ‘pe Israel Ñandejára mbaʼéva’, ha oike hikuái pe kompromíso pyahúpe (Gál. 6:16, JMP; Jer. 31:31-34). Conmemoración jave umi ohótava yvágape añoite ikatu hoʼu pe pán ha víno, Jesús heʼi hague: ‘Kóva haʼe pe pákto pyahu che ruguy rupi, penderehehápe oñeñohẽva’ (Luc. 22:20, BNP).
16. a) Mávapa hína ‘umi mbaʼe oĩva ko yvy ári’? b) Mbaʼéichapa ojerereko chupekuéra hekopotĩvaramo Jehová renondépe?
16 ‘Umi mbaʼe oĩva ko yvy ári’ katu haʼe hína umi oikótava opa ára g̃uarã ko yvy ape ári peteĩ hardínpe. Koʼãvape Ñandejára Rembiguái omopotĩ avei oĩ porã hag̃ua Jehovándi. Haʼekuéra ojerovia Jesús rehe ha ‘ojohéi ijaokuéra ha omomorotĩ pe Ovecha Raʼy ruguýpe’. Upévare Jehová oreko chupekuéra hekopotĩvaramo ha iñamígoramo, ha ikatu ojesalva pe jehasa asy guasúpe (Rev. 7:9, 10, 14, ÑÑB; Sant. 2:23). Haʼekuéra ningo ndoikéi pe kompromíso térã pákto pyahúpe ha upévare ndohomoʼãi yvágape. Upéicha rupi umi oikótava ko yvy ape ári ndoʼúi pe pán ha víno oĩva Conmemoración jave. Upéicharamo jepe oho ko rreuniónpe ohechauka hag̃ua omombaʼeha.
Ñamombaʼékena Jehová ha Hembiguái ojapovaʼekue
17. Mbaʼéichapa umi profesía ñahesaʼỹijovaʼekue ñandeprepara Conmemoracionrã?
17 Ñahesaʼỹijóvo proféta Isaías ohaivaʼekue Ñandejára Rembiguái rehe, jajepreparañaína Conmemoracionrã. Avei jajesareko hese, haʼe ningo ‘ñande jerovia omoñepyrũvaʼekue ha omongakuaáva hekopete’ (Heb. 12:2, BNP). Jahecha Ñandejára Raʼy nopuʼãi hague Itúvare. Jesús ohechakuaa Jehová haʼeha Mburuvicha tuichavéva, upévare oipota ohekomboʼe chupe. Ndojoguái ni michĩmi Satanáspe. Oĩrõ guare ko yvy ape ári Jesús oiporiahuvereko umi héntepe, oipytyvõ chupekuéra oikuaa hag̃ua Ñandejárape ha omonguera umi hasývape. Péicha ohechauka mbaʼépa ojapóta ág̃a oisãmbyhy vove pe múndo pyahúpe. Upérõ haʼe ‘omoĩta tekojoja’ ko yvy ape ári (Isa. 42:4). Jesús opredikavaʼekue kyreʼỹme ha péicha ‘ohesape tetãnguérape’. Ñande avei kyreʼỹme ñamyasãivaʼerã pe marandu porã oparupiete (Isa. 42:6, ÑÑB).
18. Mbaʼérepa ñanembovyʼa Isaías ohaivaʼekue?
18 Isaías ohaivaʼekue ñanepytyvõ avei ñamombaʼe hag̃ua pe sakrifísio Jehová ojapovaʼekue omboúvo itaʼýrape ohasa asy ha omano hag̃ua ñanderehehápe. Jehová ndovyʼái Itaʼýra ohasa asy haguére, ovyʼa guei Jesús iñeʼẽrendu haguére omano meve. Ñande avei javyʼa Jesús ohechauka haguére Satanás ijapuha, omopotĩ Jehová réra ha odefende isãmbyhy. Hiʼarive Jesús ñandepeʼa pekádo poguýgui ha omeʼẽ hekove ñanderehehápe. Upéicha rupi umi ungido ha umi opytátavape ko yvy ape ári ojerereko hekopotĩvaramo Jehová renondépe. Upévare ág̃a ñañembyaty vove Conmemoracionrã, katuete ñamombaʼetereíta Jehová ha Jesús ojapovaʼekue.
Ñanemanduʼápa?
• Mbaʼérepa ojeʼe Jehová ovyʼa hague itaʼýra omano haguére?
• Mbaʼéichapa Jesús oheja ‘ojekutu chupe ñane rembiapo vaikuére’?
• Mbaʼéichapa Ñandejára Rembiguái ‘omopotĩ heta yvy ariguápe hembiapo vaígui’?
• Mbaʼéichapa Isaías ohaivaʼekue ñandeprepara Conmemoracionrã?
[Porandu ñahesaʼỹijóva]
[Nóta oĩva taʼanga ndive páhina 26]
Jesúsre ningo ‘ojejahéi’ ha ‘ndojeapói mbaʼevérõ’
[Nóta oĩva taʼanga ndive páhina 28]
‘Oñemeʼẽ omano hag̃ua’
[Nóta oĩva taʼanga ndive páhina 29]
Umi oikótava ko yvy ape ári oho Conmemoracionhápe omombaʼe hag̃ua Jehovápe