“Eju chemoirũ”

‘Oiméramo chemoirũséva toñembyesarái ijehegui, tohupi ijyvyra pohýi ijapére, ha tachemoirũ.’ (LUC. 9:23.)

1, 2. a) Mbaʼépa heʼivaʼekue Jesús peteĩ mitãkariaʼýpe? b) Mbaʼépa ikatu ñande jajapo?

 OMOHUʼÃMBOTÁVO hembiapo ko yvy ape ári, Jesús opredika Peréape, peteĩ lugár opytáva rrío Jordán mboypýri. Upépe peteĩ mitãkariaʼy oñemboja hese ha oporandu chupe mbaʼépa ojapovaʼerã ikatu hag̃uáicha oiko opa ára g̃uarã. Jesús ohechakuaa hese okumpliha pe léi Moisés ohaivaʼekue, upévare oinvita chupe ojapo hag̃ua peteĩ mbaʼe iñimportantetereíva. Heʼi chupe: ‘Tereho evendepa opa mbaʼe rerekóva ha emeʼẽ mboriahúpe. Péicharõ rerekóta mbaʼeta yvágape. Upéi, eju chemoirũ’ (Mar. 10:21). Epensamíntena ikatu omoirũ Jesucrístope. Aje piko tuichaite mbaʼe upéva!

² Upe mitãkariaʼy nomoirũiramo jepe Jesúspe, heta oĩ ojapóva upéva. Jesús heʼimavaʼekue Felípepe: “Eju chemoirũ” (Juan 1:43). Ha Felipe oho hendive, upéi oiko chugui apóstol. Upe rire Jesús oinvita Matéope ha haʼe omoirũ avei chupe (Mat. 9:9; 10:​2-4). Jesús ningo oinvita voi enterovépe. Haʼe heʼi: ‘Oiméramo chemoirũséva toñembyesarái ijehegui, tohupi ijyvyra pohýi ijapére, ha tachemoirũ’ (Luc. 9:23). Upéicharõ, opavave omoirũséva Jesúspe ikatu ojapo upéva. Kongregasiónpe hetáma ñaime ñamoirũva Jesúspe ha ñasẽ ñainvita ñande rapichakuérape ojapo hag̃ua avei upéva.

3. Mbaʼépa ñanepytyvõta ani hag̃ua jaheja pe tape potĩ?

³ Heta ningo oĩ oñepyrũvaʼekue ostudia la Biblia, péro noñehaʼãi oikuaave. Saʼi saʼípe ‘opía pe tapégui’ ha nomoirũvéi Jesúspe (Heb. 2:1). Mbaʼépa ikatu jajapo ani hag̃ua oiko ñanderehe upéva? Upearã tekotevẽ jajepyʼamongetami koʼã mbaʼére: “Mbaʼérepa ñamoirũsevaʼekue Jesúspe? Mbaʼépa heʼisehína upéva?”. Ñambohováiramo koʼã mbaʼe, ñanepytyvõta ani hag̃ua jaheja pe tape potĩ jaiporavovaʼekue. Avei ñanekyreʼỹvéta ñaipytyvõ hag̃ua ñande rapichápe omoirũ hag̃ua Jesúspe.

Mbaʼérepa ñamoirũ Jesúspe?

4, 5. Mbaʼérepa ikatu jaʼe Jesús ñanegoverna porãvetaha?

⁴ Pe proféta Jeremías heʼivaʼekue: “Ha che Jára! Aikuaa yvypóra ndahaʼeiha hekove jára, ndoikuaaiha mbaʼépa oikóta chugui” (Jer. 10:23). Umi mbaʼe oikóvare yma guive jaikuaa añeteha koʼápe heʼíva. Jahecha porãiterei ningo yvyporakuéra ndaikatuiha ogoverna porã. Jesús katu ñanegoverna porãitereíta ha upévare ñamoirũse chupe. Jahechamína mbaʼérepa ikatu jaʼe upéva.

⁵ Primero, Jehová voi oiporavo Jesúspe ñanesãmbyhy hag̃ua. Ha ñande Apohare ningo ndojavymoʼãi! Segundo, Jesús ohechauka opa mbaʼe heʼíva ha ojapóvare ikatuha jajerovia hese (jaleemi Isaías 11:​2, 3). Haʼe ningo oheja ñandéve pe ehémplo iporãvéva (1 Ped. 2:21). Ha tercero, Jesús ojepyʼapyeterei hemimboʼekuérare ha upévare omano hesehapekuéra (jaleemi Juan 10:​14, 15). Haʼe oñangareko porã ñanderehe ha ohechauka ñandéve mbaʼéichapa jaiko porãvéta koʼág̃a ha opa  ára g̃uarã (Juan 10:​10, 11; Rev. 7:​16, 17). Koʼã mbaʼe ñanemokyreʼỹvaʼekue ñamoirũ hag̃ua chupe. Péro mbaʼépa jajapovaʼerã ñamoirũvo Jesúspe?

6. Mbaʼépa jajapovaʼerã ñamoirũramo Jesúspe?

⁶ Ñamoirũramo Jesúspe ndahaʼéi jaʼénteva ñande kristianoha. Oĩ ningo dos mil millones rupi umi heʼíva upéva, péro ndoikóiva Ñandejára oipotaháicha, ‘mbaʼe vai apoha’ katu hikuái (jaleemi Mateo 7:​21-23). Ñamoirũramo Jesúspe ñañehaʼãvaʼerã jaiko haʼe heʼi haguéicha ha ñamboʼe avei upéva umi omoirũsévape chupe. Jaikuaamiéna koʼág̃a Jesúspe ha jahecha mbaʼéichapa ikatu jajoguave chupe.

Ñañehaʼãke ñanearandu

7, 8. a) Mbaʼépa ojapo peteĩ tapicha iñarandúva ha mbaʼérepa Jesús iñaranduete? b) Mbaʼéichapa Jesús ohechauka iñaranduha ha mbaʼéichapa ikatu jajogua chupe?

⁷ Jesúspe ningo jaguerohory heta mbaʼe iporãitereívare, umíva apytégui jahechami koʼág̃a cuatro: iñarandu, noñemombaʼeguasúi, ikyreʼỹ opredika hag̃ua ha oporohayhu. Jahecha raẽta pe arandu. Jaʼe peteĩ tapicha iñaranduha oikuaa ha ontendéramo umi mbaʼe ojapótava. Apóstol Pablo heʼivaʼekue Jesús rehe: “Ipype niko oñeñongatuhína opa arandu ha mbaʼekuaa” (Col. 2:3). Mbaʼére piko Jesús iñaranduete? Haʼe voi heʼi: “Che Ru chemboʼevaʼekue upévante haʼe peẽme” (Juan 8:​28, BNP). Upéicharõ Jehová voi omboʼe Jesúspe, ha upévare haʼe iñarandu ha oikuaa porã ojapótava.

⁸ Pór ehémplo, Jesús odesidi omotenonde Ñandejára rembipota, upévare ndoikói ambue mbaʼe rapykuéri. Oiporu porã itiémpo ha oñemeʼẽmbaite opredika hag̃ua Ñandejára Rréino. Jajogua hag̃ua chupe jajesarekovaʼerã peteĩ mbaʼérente, ha ani ñambyaty umi mbaʼe hoʼu reítava ñanetiémpo (Mat. 6:22). Oĩ umi ermáno ohejáva heta mbaʼe itiempove hag̃ua predikasiónpe, ha oĩ voi ojapóva iprekursorádo. Roguerohoryeterei oiméramo nde rejapo upéicha. Katuete javyʼa ha jaiko porãvéta ‘jaheka raẽramo Ñandejára rréino’ (Mat. 6:​33, BNP).

Aníkena ñañemombaʼeguasu

9, 10. Mbaʼéichapa Jesús ohechauka noñemombaʼeguasuiha?

⁹ Koʼág̃a jahecháta mbaʼéichapa Jesús ohechaukavaʼekue noñemombaʼeguasuiha. Ñaneimperfékto rupi sapyʼánte ñañemombaʼeguasuse oñemeʼẽramo ñandéve peteĩ puésto iñimportánteva. Péro Jesús ndojapoivaʼekue upéva. Haʼe noñemombaʼeguasúi oñemeʼẽramo jepe chupe peteĩ tembiapo tuichaitereíva ojejapo hag̃ua Jehová rembipota. La Biblia heʼi voi naiporãiha ñañemombaʼeguasu. Apóstol Pablo heʼivaʼekue: ‘Jesucristo ningo oikovaʼekue Ñandejárandi voi, upéicharamo jepe noñemohatãi upépente. Oheja guei upe oguerekovaʼekue ha ou oiko tembiguáiramo onasévo kuimbaʼéicha’ (Fili. 2:​5-7, BNP). Mbaʼépa jahechakuaa koʼápe Jesús rehe?

¹⁰ Haʼe oikovaʼekue Itúvandi yvágape.  Upéva peteĩ mbaʼe tuichaitereíva. Péro Jesús ‘noñemohatãi upépe’. Ñandejára oguerova hekove peteĩ kuñataĩ hudía retepýpe hérava María, ha nueve mése rire onase peteĩ mitãmicha. María ha iména José omongakuaa chupe, haʼekuéra ningo imboriahuvaʼekue. Jesús oñepyrũ opoñy, upéi oguata ha okakuaa ohóvo oiko peve chugui peteĩ mitãrusu. Haʼe oñemoĩ ituvakuéra poguýpe, jepe iñimperfékto hikuái (Luc. 2:​51, 52). Hasy jatopa hag̃ua peichagua tapicha noñemombaʼeguasúiva!

11. Mbaʼéichapa jahechaukáta nañañemombaʼeguasuiha?

¹¹ Jahechaukáta jajoguaseha Jesúspe jajapóramo kyreʼỹme umi tembiapo noñemombaʼéiva. Pór ehémplo japredika pe marandu porã. Oĩ nomombaʼéiva ko tembiapo koʼýte ohechávo oĩha umi nopenáiva ha ndochaʼéiva ñanderehe, térã iñañáva voi katu ñanendive. Péro ñande jaikuaa ikatuha ñaipytyvõ ñande rapichápe ojesalva hag̃ua. Upévare ñañehaʼãvaʼerã ñaipytyvõ chupekuéra omoirũ hag̃ua avei Jesúspe (jaleemi 2 Timoteo 4:​1-5). Avei ñamopotĩ jave ñane Salón del Reino, ñamombovaʼerã yty, jaitypei ha ñamopotĩ umi váño. Koʼã tembiapo ningo Ñandejárape g̃uarã avei pórke Salónpe añoite oñemboʼe Jehová heʼíva. Kyreʼỹme jajapóvo ãichagua tembiapo jahechauka nañañemombaʼeguasuiha ha jasegiha Cristo pypore.

Ñanekyreʼỹke japredika hag̃ua

12, 13. a) Mbaʼéichapa Jesús ohechauka ikyreʼỹ hague opredika hag̃ua ha mbaʼérepa opredikase? b) Mbaʼépa ñanepytyvõta ñanekyreʼỹ hag̃ua predikasiónpe?

¹² Jesús opredika kyreʼỹ vaʼekue. Haʼe ojapo heta mbaʼe oikórõ guare ko yvy ape ári. Ombaʼapóneraʼe ituvanga ndive karpinteríape. Ha ojevautisa rire omonguera umi hasývape ha omoingove jey omanovaʼekuépe. Péro haʼe oiporuve itiémpo opredika ha omboʼe hag̃ua hentekuérape (Mat. 4:23). Ha oheja avei ñandéve ko tembiapo. Mbaʼéichapa ikatu ñanekyreʼỹ haʼéicha? Upearã iporã jahecha mbaʼérepa Jesús opredikasevaʼekue.

¹³ Jesús opredikase ha omboʼese hentekuérape ohayhu rupi Ñandejárape ha omombaʼégui Haʼe heʼíva. Jesúspe g̃uarã koʼã mbaʼe ndaijojahái ha oipotaiterei  umi hénte oikuaa. Ñande avei jaipota upéva. Ñapensamíntena umi mbaʼe jaikuaávare Ñandejára Ñeʼẽgui. Pór ehémplo jaikuaa ojetaky hague Jehová sãmbyhýre ha mbaʼéichapa oñesolusionáta ko mbaʼe. Avei mbaʼépa oiko umi omanovaʼekuégui ha umi mbaʼe porã oĩtava pe múndo pyahúpe. Oiméramo aréma jaikuaa koʼã mbaʼe térã nahániri, ñamombaʼeterei (jaleemi Mateo 13:52). Ñanekyreʼỹramo japredika hag̃ua, umi hénte ohechakuaáta ñamombaʼeha Jehová heʼíva.

14. Mbaʼéichapa ikatu ñamboʼe Jesús omboʼe haguéicha?

¹⁴ Iporã jahechami avei mbaʼéichapa Jesús omboʼevaʼekue umi héntepe. Haʼe pyʼỹi oiporu Ñandejára Ñeʼẽ ha upévare heʼi jepi: “Ñandejára ñeʼẽme heʼi” (Mat. 4:4; 21:13). Jesús imanduʼa chupekuéra heta mbaʼe oĩvare Evréo Kuatiañeʼẽme. Ñande avei jaiporu la Biblia japredika jave ha ñañehaʼã jalee umi óga járape peteĩ téysto jepe. Upéicha haʼekuéra ohechakuaáta ñamboʼeha Ñandejára heʼíva, ndahaʼéi ñande ñapensáva. Javyʼa oĩ jave peteĩ oipotáva jalee chupe peteĩ téysto ha ñamyesakã mbykymi. Ha javyʼavéntema jahecháramo omoirũseha avei Jesúspe.

Jahayhúkena ñande rapichakuérape

15. Mbaʼépa jaguerohoryve Jesús rehe ha mbaʼéichapa ñañeñandu ñapensávo upévare?

¹⁵ Ipahápe katu jahechami pe mbaʼe jaguerohoryvéva Jesús rehe: mbaʼéichapa ohayhu yvyporakuérape. Apóstol Pablo heʼivaʼekue: “Cristo mborayhu oremokyreʼỹ” (2 Cor. 5:​14, BNP). Ñapensáramo mbaʼeichaitépa Jesús ñanderayhu enterovépe, opoko ñane korasõitére ha ñanemokyreʼỹ jaiko hag̃ua haʼe oiko haguéicha.

16, 17. Mbaʼéichapa Jesús ohechauka ohayhuha hentekuérape?

¹⁶ Mbaʼéichapa Jesús ohechauka ohayhuha hentekuérape? Jahecha porãiterei upéva omano rupi ñanderehehápe (Juan 15:13). Avei hetaiterei mbaʼe ojapovaʼekuére oĩ aja ko yvy ape ári. Pór ehémplo, haʼe oiporiahuvereko umi ohasa asývape. Lázaro omanórõ guare, oguapyeterei hese ohechávo María ha umi hénte hasẽmbáva. Jepe oikuaa omoingove jeytaha Lázarope, haʼe ombyasyeterei ha “hasẽ” (Juan 11:​32-35).

¹⁷ Jesús oñepyrũvo opredika, peteĩ lepróso oñemboja hendápe ha ojerure chupe: “Chemopotĩséramo, ikatu Nde chemopotĩ”. Mbaʼépa heʼi chupe Jesús? La Biblia ningo omombeʼu ‘oiporiahuverekoiterei hague chupe’ ha upéi katu avave ohaʼarõʼỹre ‘ipojái ha opoko hese ha heʼi ichupe: Aipota,  tanepotĩ. Ha upepete voi haʼe okuera ha ipotĩ opytávo”. Jesús oikuaa Moisés Léi heʼiha umi iléprava naipotĩriha. Ha ikatu voi omonguera pe kuimbaʼépe opokoʼỹre hese. Péro haʼe oipota ko kuimbaʼe oñandu jey hapicha opokóramo hese, oimevaʼerã ningo aréma avave noñembojavéi hese. Ajépa imbaʼeporãite hendive! (Mar. 1:​40-42.)

18. Mbaʼéichapa ñantendevéta ñane ermanokuérape?

¹⁸ Ñamoirũramo Jesúspe jahayhuvaʼerã ñane ermanokuérape. Upéva jahechaukáta ñañehaʼãramo ñantende mbaʼéichapa oñeñandu hikuái (1 Ped. 3:8). Ñaneresãiramo ikatu hasy ñandéve ñantende porã hag̃ua mbaʼéichapa oñeñandu peteĩ ermáno orekóva depresión térã hasyetéva. Péro Jesús ndahasýiramo jepe ontende umi hasývape. Mbaʼépa ikatu ñande jajapo? Jajapysaka porã vaʼerã peteĩ ermáno omombeʼúramo ñandéve mbaʼéichapa oñeñandu. Ikatu ñapensa: “Mbaʼéichapa añeñanduvaʼerãmoʼã chéve ojehúrire péicha?”. Ikatúramo ñantende mbaʼéichapa oñeñandu ñande rapicha, ‘ñamokyreʼỹta’ umi ndovyʼavéivape (1 Tes. 5:​14, BNP). Péicha jajoguáta Jesúspe.

19. Mbaʼépa jajapóta jaikuaa porãvévo Jesúspe?

¹⁹ Iporãite piko jaikuaave Jesús heʼi ha ojapovaʼekue. Upéva ñanemokyreʼỹ jaiko hag̃ua haʼe oiko haguéicha ha ñaipytyvõ hag̃ua ñande rapichakuérape ojapo hag̃ua avei upéva. Upévare, ñañehaʼãkena jaikuaave Jesúspe ha ñamoirũ chupe koʼág̃a ha opa ára g̃uarã.

Ikatúpa ñambohovái

• Mbaʼéichapa ikatu ñanearandu Jesús iñarandu haguéicha?

• Mbaʼéichapa ikatu jahechauka nañañemombaʼeguasuiha?

• Mbaʼépa ñanepytyvõta japredika hag̃ua kyreʼỹme?

• Mbaʼéichapa ikatu jahayhu hentekuérape Jesús ohayhu haguéicha?

[Porandu ñahesaʼỹijóva]

[Taʼanga ha rrekuádro oĩva páhina 5-pe]

PETEĨ LÍVRO ÑANEPYTYVÕVA JAJOGUA HAG̃UA JESÚSPE

Ñande aty guasu tres diagua, 2007pe, osẽkuri kastellánope pe lívro “Ven, sé mi seguidor”, orekóva 192 páhina. Ko lívro ojejapo jaikuaa porãve hag̃ua Jesúspe. Oñepyrũ riremi, pe primera párte oñeʼẽma voi umi mbaʼe jaguerohoryetévare Jesúsre. Upépe ohechauka haʼe noñemombaʼeguasuiha, ipyʼaguasu, iñarandu, iñeʼẽrendu ha ogueropuʼakaha heta mbaʼe.

Umi mokõi párte oĩva upéi ohechauka mbaʼéichapa haʼe omboʼe ha opredika hentekuérape. Avei mbaʼéichapa ohechauka oporohayhuha. Ko lívro ñanemboʼe jaiko hag̃ua Jesús oiko haguéicha.

Upévare ko lívro katuete ñanepytyvõta jajepyʼamongeta hag̃ua ha upéicha jahecha mbaʼéichapa ñamoirũñaína Jesúspe. Oipytyvõta avei umi ipyʼaporãvape omoirũ hag̃ua chupe (Hech. 13:48).

[Nóta oĩva taʼanga ndive páhina 4]

Mbaʼépa ohechauka Jesús ohejávo Itúva ombou chupe ha onase peteĩ mitãraʼýicha?

[Nóta oĩva taʼanga ndive páhina 6]

Mbaʼépa ñanepytyvõta ñanekyreʼỹ hag̃ua predikasiónpe?