“Kóva hína pe tape, tapeho koʼárupi”

Emilia Pederson rembiasakue

Omombeʼu Ruth E. Pappas

CHE sy héra Emilia Pederson ha onase 1878-pe. Haʼe mboʼehára eskuélape péro michĩ guive ohose Chínape oipytyvõ umi héntepe oikuaa hag̃ua Ñandejárape. Ha oreko voi peteĩ vaúl oraha hag̃ua ikosakuéra oviaháta vove. Heta tiémpo rire upe vaúl oĩ gueteri ógape opytáva Jásperpe táva Minnesota (Estados Unidos). Péro omanórõ guare che avuéla, che sy ojedeha upe viáhegui oñangareko hag̃ua iñermanitokuérare. Haʼe omenda 1907-pe Theodore Holien rehe ha oreko hikuái siete mitã. Che la ipahaguéva ha anase el 2 de diciembre de 1925.

Che sy ningo heta mbaʼe oikuaase la Bíbliagui ha hetápema ombaʼeporandu. Peteĩ árape ou ógape peteĩ pastór ha oporandu chupe heʼípa la Biblia pe infiérno haʼeha peteĩ lugár ojehapyha umi iñañávape. Pe pastór heʼi chupe natekotevẽiha la Bíbliape heʼi upéva jaguerovia hag̃ua.

Hesakã chupe heta mbaʼe Ñandejára heʼíva

Áño 1900 rupi, che tia heráva Emma ova táva Northfield (Minnesótape) ostudia hag̃ua músika. Ha oiko iprofesór rógape hérava Milius Christianson. Pe profesór rembireko testigo de Jehová ha che tia omombeʼu chupe che sy oikuaaseha heta mbaʼe la Bíbliagui. Upémaramo pe profesór rembireko ohai che sýpe peteĩ kárta omyesakãhápe chupe umi mbaʼe oikuaaséva.

Upe rire peteĩ ermána hérava Lora Oathout ova ore roikoha gotyo. Haʼe ou trénpe Sioux Fállsgui (Dakota del Sur) opredika hag̃ua. Che sy ohesaʼỹijo umi puvlikasión ohejavaʼekue chupe ha 1915 guive oñepyrũma opredika.

Áño 1916-pe oikovaʼekue peteĩ asambléa táva Sioux Cítype, opytáva 160 kilómetro roikohágui, ha upe asambléape ou ermáno Charles Taze Russell. Che sy ohoseterei la asambleahápe péro ijetuʼu oho hag̃ua orekógui cinco mitã ha la michĩvéva de cinco mése ramo. Upéicharõ jepe orahapa imembykueramimi ha oho. Upépe ohendu ermáno Russell diskúrso, ohecha pe “Foto-Drama de la Creación” ha ojevautisa. Og̃uahẽ rire ógape ohai umi mbaʼe ohenduvaʼekue asambleahápe ha upéva osẽ peteĩ diáriope hérava Jasper Journal.

Áño 1922-pe che sy oho peteĩ asambleahápe Cedar Point (Ohíope), upépe ijaty hikuái 18.000 tapicha. Omokyreʼỹeterei ningo chupe upe asambléa ha upévare osegi opredika pe marandu porã. Ha heʼi jey jey jepi oréve, “kóva hína pe tape, tapeho koʼárupi” (Isa. 30:21).

 Hetápe roipytyvõ

Áño 1920 riremi ore famíliandi rova táva Jáspergui. Che ru oreko peteĩ negósio kakuaa péro ifamília reta avei. Haʼe orepytyvõ meme rosẽ hag̃ua predikasiónpe. Ha oheja jepi opyta ógape umi superintendénte de sirkuíto ou jave ovisita ore kongregasión. Chemanduʼa hetaiterei oĩvaʼekue ohóva ógape ohendu hag̃ua umi ermáno omeʼẽ jave diskúrso. Ndoroikuaái ningo moõpa romoingepáta umi héntepe, sála, kosináme, ore koty entéro henyhẽmba.

Arekórõ guare siete áño che tia Lettie ohenói ógape ha omombeʼu oréve ivesíno Ed Larson ha hembireko ostudiaseha la Biblia. Pyaʼe ningo ojerovia hikuái Jehováre ha upe rire oinvita ivesína Martha van Dáalenpe ostudia hag̃ua avei. Martha ha ocho imembýgui oiko testígo. a

Upérõ Gordon Kammerud, peteĩ kariaʼy oikóva ore róga ládo oñepyrũ ombaʼapo che ru ndive. Ore vesinokuéra heʼi chupe: “Eñatendéke, cháke umi ne patrón rajykuéra oike peteĩ rrelihión vaípe”. Upéicharõ jepe Gordon ostudia la Biblia ha ojerovia Jehováre. Ojevautisa tres mése haguépe ha ituvakuéragui oiko avei testígo. Ipahápe ore família, umi Kammerud ha umi Van Daalen rojepokuaaiterei ojuehe.

Umi asambléa oremokyreʼỹ

Che sýpe omokyreʼỹ pe asambléa ojejapovaʼekue Cedar Póintpe ha upévare ndofaltaséi ni peteĩ asambléape. Chemitãkuñaʼípe mombyrymbyry rohomivaʼerã asambleahápe, chemanduʼa 1931-pe rohórõ guare Colúmbuspe (Ohio). Upe asambléa guive ojeporu pe téra testigos de Jehová (Isa. 43:​10-12). Chemanduʼa avei 1935-pe peteĩ asambleahápe Wáshingtonpe oñemyesakã hague mávapa pe “aty guasu” Revelaciónpe heʼíva (Rev. 7:9). Upérõ ochocientos ári ojevautisa ha che ermána Lilian ha Eunice oĩ ijapytepekuéra.

Roho avei pe asambléa ojejapovaʼekue Colúmbuspe (Ohio) 1937-pe, ha Seáttlepe (Washington) 1938-pe, ha Nueva Yórkpe 1939-pe. Roho umi ermáno Van Daalen, Kammerud ha hetave ermánondi. Áño 1940-pe, Eunice omenda Leo van Daalen rehe ha ojapo hikuái iprekursorádo. Upe áñope omenda avei Lilian, Gordon Kammerud rehe, ha ojapo hikuái iprekursorádo.

Pe asambléa ojejapovaʼekue 1941-pe iñimportanteterei chéve g̃uarã. Upérõ osẽ peteĩ lívro pyahu hérava Hijos. Upe riremi el 1 de septiembre 1941-pe, arekópe 15 áño  amoñepyrũ che prekursorádo. Che ermáno Marvin ha hembireko Joyce ojapo avei.

Heta ermánope ijetuʼu oho hag̃ua asambleahápe ombaʼapógui kokuépe, ha kosécha tiémpope oiko jepi umi asambléa. Upévare roju rire asambleahágui rojapo peteĩ aty ógape ha romombeʼu umi ndohoivaʼekuépe mbaʼépa ojeʼe asambleahápe. Rovyʼajoa ningo oñondivepa.

Aha Eskuéla de Galaádpe ha upéi tetã ambuépe

Áño 1943-pe oñepyrũ pe Escuela de Galaad ombokatupyrýva prekursorkuérape oservi hag̃ua misionéroramo. Upe áñope oñemondo misionéroramo seis Van Daalen famíliape. Umíva apytépe: Emil, Arthur, Homer, Donald, Leo ha hembireko Eunice. Upérõ saʼi testígo oĩ Puerto Rícope ha oñemondo chupekuéra opredika hag̃ua upépe. Ohórõ guare hikuái rovyʼa ha rombyasy avei, ndoroikuaáigui arakaʼépa rohecha jeýne chupekuéra.

Un áño haguépe Lilian, Gordon, Marvin ha Joyce oho Galaádpe ha oñemondo avei chupekuéra Puerto Rícope. Arekórõ guare 18 áño, 1944-pe chehaitéma aha Galaádpe, ha 1945-pe chemondo avei hikuái Puerto Rícope che ermanokuéra oĩháme. Upépe opa mbaʼe ijetuʼu oréve, ñepyrũrã noroñeʼẽkuaái kastellánope. Upéicharõ jepe ore apytépe oĩ ojapóva veinte estúdio vívliko ndahetavéi mbaʼérõ. Jehová ovendesi ore rembiapo, ha koʼág̃a ohasáma veinticinco mil oservíva Jehovápe upe tetãme.

Ojere vaipaite ningo oréve

Áño 1950-pe che ermána Eunice imemby ha opyta iménandi oiko Puerto Rícope. Dos áño haguépe ohosemoʼã hikuái ovisita ore hentekuérape. El 11 de abril de 1952 ojupi aviónpe oho hag̃ua, péro osẽ riremi pe avión hoʼa márpe. Leo ha Eunice omano, che sovrinoʼi katu ojesalva. Peteĩ karai oĩva kanóape onohẽ ýgui ha peteĩ aparáto rupive omborrespira jey chupe. b

Cinco áño oiko rire upéva, el 7 de marzo de 1957 oiko jey peteĩ mbaʼe vai ore famíliape. Che ru ha che sy oho salónpe imbaʼyrúpe ha upeichahágui okapu irruéda. Che ru oñemboyke pe tapépe okambia hag̃ua pe rruéda ha upe jave ou peteĩ kóche ha ohasa hiʼári. Pepete anga omano. Che túvape ojehayhuvaʼekue, upévare ojejapórõ guare chupe pe diskúrso ijaty seiscientos tapicha rupi voi. Ha upéicha heta ohendu Jehová rembipota.

Asignasión pyahu

Che ru omano mboyve, 1957-pe ava táva Mendózape (Argentina) apredika hag̃ua. Upe rire, 1958-pe ou George Pappas oservi hag̃ua misionéroramo upépe. Haʼe che amigoite vaʼekue ha 1960-pe romenda. Un áño amenda haguépe omano che sy, orekópe 83 áño. Haʼe ningo iñeʼẽrendu Jehovápe omano meve, ha hetápe oipytyvõ oikuaa hag̃ua chupe.

Diez áño aja che ménandi roservi heta hendápe misionéroramo. Upéi che ménape  oñenombra superintendénte de sirkuíto ha siete áño rovisita kongregasionkuérape. Áño 1975-pe roho jey Estados Unídospe roñatende hag̃ua ore hénte hasývare. Ha 1980-pe che ména oñepyrũ ovisita umi kongregasión oñeʼẽva kastellánope superintendénteramo. Rojapo upéva veintiséis áño aja. Ñepyrũrã oĩ seiscientas kongregasión kastellánope ha koʼág̃a oĩ tres mil rasáma.

Roiko Ñandejára ‘rapére’

Che sy ningo ovyʼaiterei ihentekuéra apytépe oĩ haguére heta ombaʼapo meméva Jehovápe g̃uarã. Pór ehémplo che príma Carol 1953-pe oñepyrũ iprekursorádo. Upéi haʼe omenda Dennis Trumbore rehe ha mokõivégui oiko prekursór. Che príma Lois omenda Wendell Jensen rehe ha oho Galaádpe, quince áño oservi hikuái misionéroramo Nigériape. Mark pe che sovríno ituvakuéra omanovaʼekue aksidéntepe okakuaa Ruth La Londe ha iména Curtis ndive. Mark ha hembireko Lavonne heta áñore ojapo prekursorádo. Upéi cuatro ifamília hikuái ha omongakuaa chupekuéra Ñandejára ‘rapére’ (Isa. 30:21).

Koʼág̃a peteĩ che ermánontema oikove. Haʼe héra Orlen, orekóma 90 áño ári ha oservi Jehovápe ipyʼaite guive. Che ména ha che, koʼág̃a peve roiporupaite ore tiémpo roservi hag̃ua Jehovápe.

Amombaʼeterei che sy ohejavaʼekue chéve

Amombaʼeterei ningo peteĩ eskritório ohejavaʼekue chéve che sy. Upe eskritório orregalavaʼekue chupe che túva omendárõ guare ha ikahónpe oĩ heta kárta ha diário síglo véintepe guare. Umíva ningo che sy ohaivaʼekue oikuaauka hag̃ua pe marandu porã. Upe eskritóriope oĩ avei heta kárta che ha che ermanokuéra romondovaʼekue chupe roservírõ guare tetã ambuépe misionéroramo. Pyʼỹinte ningo alee umi kárta ha igustoiterei! Ha aguereko avei heta kárta che sy omondovaʼekue oréve ha chemokyreʼỹeterei alee jave. Che sy ndaikatúiramo jepe oservi misionéraramo tetã ambuépe, heta áñore oservi Jehovápe ipyʼaite guive. Upéva oremokyreʼỹ romotenonde hag̃ua Jehovápe ore rekovépe. Káda día ningo apensa mbaʼeichaitépa rovyʼáta Jehová múndo pyahúpe. Upépe rojotopapa jeýta che pehẽnguekuéra ndive (Rev. 21:​3, 4).

[Nóta]

[Nóta oĩva taʼanga ndive páhina 17]

Emilia Pederson

[Nóta oĩva taʼanga ndive páhina 18]

Che sy, che ru (Marvin ijyva ári). Yvy gotyo Orlen, Ester, Lilian ha Mildred (1916)

[Nóta oĩva taʼanga ndive páhina 19]

Leo ha Eunice omano mboyvemi

[Nóta oĩva taʼanga ndive páhina 20]

Yvate Ester, Mildred, Lilian, Eunice ha che. Yvy gotyo Orlen, che sy, che ru ha Marvin (1950)

[Nóta oĩva taʼanga ndive páhina 20]

Che ménandi, oservírõ guare superintendénteramo (2001)