Mbaʼe mbaʼépa ñanemboʼe Revelación (párte 1)
Jehová Ñeʼẽ ningo oikove
Mbaʼe mbaʼépa ñanemboʼe Revelación (párte 1)
OĨ AJA préso ísla Pátmospe apóstol Juánpe ojehechauka 16 visión. Umívape haʼe ohecha mbaʼépa ojapo Jehová ha Jesús oñepyrũ guive Ñandejára rréino 1914-pe opa peve Cristo goviérno mil áño rire. Juan ohai Revelación (térã Apocalipsis) áño 96-pe ha omombeʼu ñandéve umi visión.
Koʼág̃a ñahesaʼỹijóta Revelación 1:1–12:17, ha jahecháta umi siete visión ñepyrũrã orekovaʼekue Juan. Koʼãva iñimportánte ñandéve g̃uarã ohechaukágui mbaʼépa oikohína koʼág̃a ko múndope ha mbaʼépa ojapóta Jehová koʼẽrõitéma. Mayma oleéva ko kuatiañeʼẽ ha ojeroviáva heʼívare katuete ikyreʼỹ ha imbaretéta (Heb. 4:12).
PE “OVECHARAʼY” OAVRI SEIS SÉLLO UMI SIETE OĨVAGUI
Ñepyrũrã Juan ohecha Jesucrístope oikove jey rire yvágape. Avei oñemeʼẽ chupe heta marandu ohaivaʼerã peteĩ kuatiañeʼẽme ha omondo ‘umi 7 kongregasiónpe’ (Rev. 1:10, 11). Upéi Juan ohecha peteĩ tróno oĩva yvágape, ha pe oguapýva pype oreko ipo deréchape peteĩ kuatiañeʼẽ oñembotýva siete séllope. Mávape añoitépa ‘ija oavri pe kuatiañeʼẽ’? ‘Pe León Judá trivupegua’, pe ‘ovecharaʼy siete hatĩ ha hesáva’ (Rev. 4:2; 5:1, 2, 5, 6, BNP).
Pe visión mbohapyhápe ojehecha mbaʼépa oiko pe “Ovecharaʼy” oavrívo peteĩteĩ umi seis séllo tenondegua. Ojeavrívo pe séllo seisha oiko peteĩ yvyryrýi tuicháva ha og̃uahẽ Ñandejára ára guasu (Rev. 6:1, 12, 17). Pe visión oúvape upe rire Juan ohecha ‘irundy ánhel ojokovahína umi yvytu oúva irundy hendáguio, ani hag̃ua oipeju yvy ári’ ojesellapa peve umi 144.000. Upéi ohecha peteĩ “aty guasu” ndojeselláiva ‘oñemboʼyvahína pe tróno ha pe Ovecharaʼy renondépe’ (Rev. 7:1, 9, BNP).
Porandukuéra:
1:4; 3:1; 4:5; 5:6. Mbaʼépa heʼise ‘umi 7 espíritu’? Número 7 ningo heʼise peteĩ mbaʼe oĩmbaitéva Jehovápe g̃uarã. Upéicharõ, pe marandu oñemeʼẽva umi ‘7 kongregasiónpe’, oñemeʼẽ avei umi cien mil kongregasión rupi oĩva koʼág̃a (Rev. 1:11, 20). Jehová ningo omeʼẽ ijespíritu oiko hag̃ua opa mbaʼe haʼe oipotáva. Upévare ojeʼévo ‘7 espíritu’ ohechauka pe espíritu sánto oipytyvõha opaite mbaʼépe umi ojesarekóvape ko profesíare ontende ha oreko hag̃ua heta vendisión. Revelación kuatiañeʼẽme ojeporu heta vése pe número 7. Ha jaʼe haguéicha ko número heʼise peteĩ mbaʼe oĩmbaiteha. Upévare ko kuatiañeʼẽme ojehechauka mbaʼéichapa ‘oikopáta Ñandejára rembipota’ (Rev. 10:7).
1:8, 17. Mávapepa oñehenói “Alfa ha Omega”, “pe iñepyrũha ha pe ipaha”? Jehovápe oñehenói “Alfa ha Omega” ndaipórigui mbaʼeveichagua ñandejára ikatúva oñembojoja hese. Haʼehína “ijypy ha ipaha” (Rev. 21:6; 22:13). Revelación 22:13-pe [BNP] ningo ojeʼe Jehováre “pe iñepyrũha ha pe ipaha”, ndaipórigui haʼeichagua oikóva haʼe mboyve térã haʼe rire. Péro kapítulo 1-pe Jesús rehe ojeʼe avei haʼeha “pe iñepyrũha ha pe ipaha”. Haʼe ningo pe yvypóra oñemoingove jey vaʼekue tenondete peteĩ espírituicha ikatuʼỹva omano ha pe ipahaite Jehová voi omoingove jeýva (Col. 1:18).
2:7, BNP. Mbaʼépa hína ‘Ñandejára paraíso’? Ko téystope ningo oñeñeʼẽ umi kristiáno ohótava yvágape. Upéicharõ pe paraíso heʼiséne hína oĩtaha hikuái yvágape Ñandejára renondépe. Umi ungido iñeʼẽrendúva ikatúta hoʼu “pe yvyra máta oikovévagui”. Upéva heʼise nomanomoʼãveimaha arakaʼeve (1 Cor. 15:53).
3:7. Arakaʼépa oñemeʼẽ Jesúspe “David lláve”, ha mbaʼéichapa oiporu? Jesúspe ojeporavo oisãmbyhy hag̃ua David rendaguépe ojevautisárõ guare áño 29-pe. Péro áño 33-pe ae oñemeʼẽ chupe “David lláve”, oho rire yvágape oguapy Ñandejára deréchape. Péicha oñemeʼẽmbaite Jesúspe pe derécho oisãmbyhývo David rendaguépe. Upe guive Jesús oiporu ko lláve omeʼẽ hag̃ua oportunida hetavépe ombaʼapo hag̃ua ko rréino rehehápe. Áño 1919-pe omoĩ “opa oguerekóva” pe ‘tembiguái jeroviaha ha iñarandúva’ poguýpe, ha péicha omeʼẽ chupekuéra ‘David rogapegua lláve’ (Isa. 22:22, ÑÑB; Mat. 24:45, 47).
3:12. Mbaʼépa hína Jesús “réra pyahu”? Ko téra ohechauka umi tembiapo pyahu Jesús orekóva (Fili. 2:9-11). Jepe avave ndaikatúi oikuaa ko téra Jesús oikuaaháicha, haʼe ohai héra pyahu umi iñermanokuérare oikove jeýva ha ohóva yvágape. Péicha oñemoag̃uive hesekuéra (Rev. 19:12). Ha haʼekuéra oreko avei umi rresponsavilida Jesús orekóva.
Mbaʼépa ñanemboʼe:
1:3. “Hiʼag̃uímagui pe ára paha”, Ñandejára ohusgatahápe Satanás múndo, tekotevẽterei ñantende Revelación kuatiañeʼẽ heʼíva ha ñañehaʼã jajapo.
3:17, 18. Ñande jerovia imbarete hag̃ua jajoguavaʼerã Jesúsgui “óro oñemopotĩvaʼekue tatápe”. Upearã ñañehaʼãvaʼerã jajapo iporãva (1 Tim. 6:17-19). Tekotevẽ ñamoĩ “ao morotĩ” ohechaukáva ñande Jesús remimboʼeha. Ha jaiporuvaʼerã avei ‘pohã ñamoĩ hag̃ua ñande resápe’, péva hína umi konsého osẽva Ñemañahápe ha ambue puvlikasiónpe. Péicha jahecha porãvéta Jehová oipotáva (Rev. 19:8).
7:13, 14. Umi 24 karai orrepresenta umi 144.000 oñemoingove jey rire yvágape. Upépe haʼekuéra oisãmbyhy ha oservi saserdóteramo. Ko mbaʼe oñerrepresentavaʼekue yma Israélpe, rréi David omohendárõ guare umi saserdótepe 24 atýpe. Peteĩva umi karai apytégui omombeʼu Juánpe mávapa umi oĩva pe aty guasúpe. Áño 1935-pe ojekuaaukákuri umi ungido oĩvape ko yvy ape ári mávapa umi oĩvahína pe aty guasúpe. Upéva ohechauka umi ungido oñepyrũ hague oikove jey upe áño mboyve (Luc. 22:28-30; Rev. 4:4; 7:9).
OJEAVRÍVO PE SÉLLO SIETEHA OÑEPYRŨ IPU SIETE TROMPÉTA
Pe Ovecharaʼy oavri pe séllo sieteha, ha oñemeʼẽ siete trompéta siete ánhelpe. Seis ánhel ombopu itrompéta oikuaauka hag̃ua umi mbaʼe vai oikótava umi rrelihión heʼívare ijehe osegiha Jesúspe (Rev. 8:1, 2, 7-12; 9:15, 18, BNP). Koʼã mbaʼe Juan ohecha pe visión cincohápe. Pe visión seishápe katu Juan hoʼu peteĩ kuatiañeʼẽ michĩva ha omedi pe santuário Ñandejára templopegua. Ha ipu rire pe trompéta sieteha, ohendu ojeʼe hatã yvágape: ‘Rreinokuéra yvy arigua Ñandejára ha Cristo mbaʼepáma’ (Rev. 10:10; 11:1, 15, BNP).
Revelación 11:15, 17 omombeʼu pe visión sieteha. Ojehecha peteĩ mbaʼe yvágape: peteĩ kuña imemby peteĩ mitãkuimbaʼe. Upéi Satanáspe oñemosẽ yvágagui ha ipochyetereígui pe kuñáre ‘oho oñorairõ iñemoñarekuéra hembýva ndive’ (Rev. 12:1, 5, 9, 17).
Porandukuéra:
8:1-5, ÑÑB. Mbaʼérepa oñekirirĩmbaite yvágape, ha mbaʼépa pe oñemombóva ko yvy ape ári? Oñekirirĩmba yvágape oñehendu hag̃ua umi “hekopotĩva ñemboʼe”. Péva oiko opávo pe Primera Guerra Mundial. Umi ungido ndohói yvágape upérõ, oĩramo jepe heta oimoʼãva ohotaha. Haʼekuéra heta ohasa asy pe ñorairõ aja ha upévare ojerure meme Jehovápe oipytyvõ hag̃ua chupekuéra. Revelación heʼi peteĩ ánhel opoi hague tata ko yvy ári, ha upéva omokyreʼỹ umi ungídope ombaʼapo hag̃ua Jehovápe g̃uarã. Jepe mbovy hikuái, oñepyrũ omoherakuã Ñandejára Rréino opárupi ko yvy ape ári. Avei oikuaauka Jehová oporokastigataha ha upéva haʼete ku omyendýva tata umi rrelihión japu apytépe. Ñandejára Ñeʼẽ katu omimbi umi hénte renondépe, ha umi rrelihión japu oryryipa umi edifísio okachaháicha yvyryrýi jave.
8:6-12; 9:1, 13; 11:15. Arakaʼépa umi siete ánhel ojeprepara ombopu hag̃ua umi siete trompéta? Arakaʼe ha mbaʼéichapa ipu umi trompéta? Oñembopu mboyve umi siete trompéta oñehekomboʼe raẽ umi ungídope. Upéicha rupi áño 1919 guive 1922 peve koʼã kristiáno ombaʼapo ojepredika hag̃ua pe marandu porã ha omopuʼã umi lugár oñekotevẽva ojejapo hag̃ua lívro ha rrevísta (Rev. 12:13, 14). Umi trompéta ipu Ñandejára siervokuéra oikuaaukávo pyʼaguasúpe mbaʼéichapa Jehová ohundíta Satanás múndo. Ko mbaʼépe oipytyvõ avei umi ánhel. Umi trompéta ipu ñepyrũ peteĩ aty guasúpe ojejapovaʼekue Cedar Point (Ohio-pe) 1922-pe ha opáta og̃uahẽvo pe jehasa asy guasu.
8:13; 9:12; 11:14. Mbaʼérepa ojeʼe umi mbohapy trompéta oñembopúva ipahápe ogueruha “sarambi guasu”? Umi irundy trompéta tenondegua oikuaauka mbaʼeichaitépa umi rrelihión japu oĩ mombyry Jehovágui. Umi mbohapy ipahapegua katu ohechauka mbohapy mbaʼe oikótava. Pe trompéta cincoha ipúvo Ñandejára puévlo osẽ pe ‘yvykua pypukúgui’, oĩ haguépe ojapoʼỹre mbaʼeve áño 1919-pe. Osẽvo hikuái upégui oñepyrũ opredika kyreʼỹme, haʼete peteĩ plága oúva umi rrelihión japúpe (Rev. 9:1). Pe trompéta seisha ipúvo áño 1922-pe oñepyrũ oñemosarambi pe marandu porã opárupi ko yvy ape ári, haʼete osẽva atýra kavaju arigua oñorairõ hag̃ua. Ha pe sieteha katu ohechauka oñepyrũmaha Ñandejára Rréino oĩva Jesús poguýpe.
Mbaʼépa ñanemboʼe:
9:10, 19, BNP. Pe ‘tembiguái jeroviaha ha iñarandúva’ ohai heta puvlikasión oikuaauka hag̃ua marandu oikutu rasýva umi iñañávape (Mat. 24:45). Koʼã marandúre ningo ojeʼe ‘ipopĩaha alakrán ruguáicha’ ha oñembojoja kavajúre ‘huguái ojoguáva mbóipe’. Mbaʼérepa upéva? Pórke umi puvlikasión omoherakuã og̃uahẽtamaha ‘upe ára Ñandejára oñevengataha umi hembiapo vaívare’ (Isa. 61:2). Upévare pyʼaguasúpe ha kyreʼỹme ñamosarambivaʼerã koʼã marandu.
9:20, 21. Oĩ tetã ndaiporihápe umi rrelihión heʼíva osegiha Jesúspe. Ha Revelaciónpe oñeñeʼẽ jave hesekuéra ojeʼe haʼeha “umi yvypóra hembýva”. Jepe koʼã tetãme oĩ umi tapicha ipyʼaporãva ha ohenduséva japredika jave, nañahaʼarõi enterove oservi Ñandejárape. Upéicharõ jepe kyreʼỹme japredikavaʼerã chupekuéra.
12:15, 16. Pe “yvy” ningo umi goviérno polítiko Satanás mundopegua. Haʼekuéra odefende pe derécho orekóva enterove oiporavo hag̃ua irrelihionrã. Áño 1940 guive umi goviérno heta tetãmegua omokõ pe ‘ysyry (térã persekusión) Satanás onohẽvaʼekue ijurúgui’. Jahechaháicha, Jehová oipota vove ikatu ojevale mburuvichakuérare ojapo hag̃ua hembipota. Upéicharõ hendaitépe Proverbios 21:1 heʼi: “Mburuvicha guasu pyʼapy, ysyrýicha Ñandejára pópe, oisãmbyhýva oipotahápe”. Jaikuaávo ko mbaʼe jajeroviave Jehováre.