Pemaʼẽ porãke che rembiguái rehe!

‘Pemaʼẽ porãke che rembiguái rehe. Chepyʼarory heseve!’ (ISA. 42:​1, ÑÑB.)

1. Mbaʼépa iporã jajapo koʼág̃a, hiʼag̃uíma rupi Jesús omano hague ára?

 KOʼẼRÕITÉMA ningo ñanemanduʼáta Jesús omano hague árare. Upévare iporã opavave jajapo apóstol Pablo heʼivaʼekue: ‘Pemaʼẽ Jesús rehe, pe ñande jerovia omoñepyrũvaʼekue ha omongakuaáva hekopete. Pejepyʼamongeta Jesús rehe mbaʼéichapa oñembohasa asy chupe, ha ogueropuʼaka ani hag̃ua penekaneʼõ ha penekangy’ (Heb. 12:​2, 3, JMP). Enterove ñahesaʼỹijóramo umi mbaʼe Jesús ohasavaʼekue omanoite peve, ñanepytyvõta ani hag̃ua ikangy ñande jerovia ha akóinte jaservi hag̃ua Ñandejárape (embojojami Gálatas 6:​9-re).

2. Mbaʼépepa ñanepytyvõta proféta Isaías ohaivaʼekue?

² Proféta Isaías rupive Jehová ohaika heta profesía oñeʼẽva itaʼýrare. Koʼãva ñanepytyvõta ‘ñamaʼẽ hag̃ua Jesús rehe, pe ñande jerovia omoñepyrũvaʼekue ha omongakuaáva hekopete’. a Ñahesaʼỹijo vove ko artíkulo jaikuaa porãvéta mbaʼeichaguápa haʼe ha mbaʼe mbaʼépa ohasa ñanderehehápe. Jahecháta Jesús haʼeha peteĩ Mburuvicha ha ñaneguenohẽha ñemano poguýgui. Avei hesakã porãvéta ñandéve mbaʼérepa jagueromanduʼavaʼerã Jesús omano hague ára. Ko áñope upéva hoʼáta jueves 9 de abril kuarahy oike rire.

Ojekuaa mávapa Ñandejára Rembiguái

3, 4. a) Máva mávapepa oñehenói “tembiguái”? b) Péro mávapa Ñandejára Rembiguái Isaías kapítulo 42, 49, 50, 52 ha 53-pe?

³ Isaías kuatiañeʼẽme heta hendápe ojeporu pe ñeʼẽ “tembiguái”. Pór ehémplo ojeporu jepi oñeñeʼẽ jave Isaías rehe (Isa. 20:3; 44:26). Ha avei oñeñeʼẽ jave táva Israel rehe (Isa. 41:​8, 9; 44:​1, 2, 21). Péro kapítulo 42, 49, 50, 52 ha 53-pe noñeñeʼẽi Isaías ni Israel rehe. Mávapa upéicharõ upe tembiguái? Jaikuaa hag̃ua ñahesaʼỹijomíta umi Escrituras Griegas. Pór ehémplo Héchospe heʼi peteĩ karai Etiopiaygua olee hague ohóvo Isaías kuatiañeʼẽ. Upe jave oñemboja hendápe Felipe ha omyesakã chupe Ñandejára espíritu rupive upe oleéva. Pe karai oleevaʼekue oĩ Isaías 53:​7, 8-pe. Haʼe oporandu Felípepe: “Eréna chéve, máva rehe piko pe proféta heʼi ko ñeʼẽ kóva, ijehe voi piko térã ambuére.” Felipe heʼi chupe  Isaías oñeʼẽ hague Jesús rehe (Hech. 8:​26-35, ÑÑB).

⁴ Avei Jesús onase riremi Simeón heʼi Ñandejára espíritu rupive pe mitã haʼeha “tesapeha ohesape hag̃ua tetãnguérape”. Upeichaite ojehaivaʼekue Jesús rehe Isaías 42:6 ha 49:​6-pe (Luc. 2:​25-32, JMP). Isaías 50:​6-9-pe ojeʼemavaʼekue mbaʼeichaitépa Jesús ohasa asýta umi mburuvicha poguýpe pe pyhare omano mboyve (Mat. 26:67; Luc. 22: 63). Ha áño 33-pe Pentecostés rire apóstol Pedro heʼi porã Jesús haʼeha Ñandejára “Rembiguái” (Isa. 52:13; 53:11; jaleemína Hechos 3:​13, 26). Mbaʼépa ñanemboʼe koʼã profesía oñeʼẽva Jesús rehe?

Jehová ombokatupyry Hembiguáipe

5. Mbaʼéichapa oñembokatupyry Jesúspe?

⁵ Isaías ohaivaʼekue ohechauka mbaʼéichapa Jehová ha itaʼýra oñoamigoitevaʼekue Jesús ou mboyve ko yvy ape ári (jaleemína Isaías 50:​4-9). Jesús voi omombeʼu itúva ombokatupyry hague chupe: ‘Haʼe chemombáy pyhareve ha oñeʼẽ che apysápe ahendukuaa hag̃ua hemimboʼe teéramo’ (Isa. 50:​4, ÑÑB). Eguatamína ekalkula, Jesús ou mboyve ko yvy ape ári iñeʼẽrendu ko univérso Apoharépe ha oaprende chugui!

6. Mbaʼérepa jaʼe Jesús iñeʼẽrendu hague itúvape opa mbaʼépe?

⁶ Jesús iñeʼẽrendúgui itúvape opa mbaʼépe heʼi: ‘Mburuvicha Guasu Jehová oavri che apysa ha che añemomirĩ ha namboykéi iñeʼẽ’. Koʼápe ohenói itúvape ‘Mburuvicha Guasu’. Upéva ohechauka Jesús oikuaa porãha ndaiporiha Jehová rasaharã (Isa. 50:​5, ÑÑB). Jehová ojapo mboyve opa mbaʼe, Jesús ‘oĩvaʼekue ijykére ipytyvõháraramo’. Vyʼápe oipytyvõ chupe, oguerohory ko yvy ha ohayhu yvyporakuérape (Pro. 8:​22-31).

7. Mbaʼépa Jesús oikuaa porã ohasa asýramo jepe?

⁷ Ko yvy ape ári Jesús heta ohasa asy. Péro ogueropuʼaka Jehová ombokatupyrýgui chupe ha ohayhueterei rupi yvyporakuérape. Heta ningo oĩ oñemoĩvaʼekue hese ha ohasa heta mbaʼe vai. Upéicharõ jepe haʼe ovyʼa ojapóvo Jehová rembipota (Sal. 40:8; Mat. 26:42; Juan 6:38). Jesús oikuaa porã itúva oipytyvõha chupe ha oguerohoryha ojapóva. Oñeñandu Isaías heʼi haguéicha: ‘Ag̃uiete oĩ chehegui chembojovakehára. Mávapa opuʼãkuaa cherehe? Ñandejára upe chepytyvõva’ (Isa. 50:​8, 9, ÑÑB). Jehová oipytyvõ Hembiguáipe ojapo hag̃ua hembipota, heʼiháicha pe profesía ñahesaʼỹijótava koʼág̃a.

Mbaʼépa ojapo Ñandejára Rembiguái ko yvy ape ári?

8. Mbaʼéichapa jaikuaa Jesús rehe oñekumpli hague pe profesía oĩva Isaías 42:​1-pe?

⁸ La Biblia heʼi mbaʼépa oiko Jesús ojevautisárõ guare áño 29-pe: ‘Oguejy hiʼári pe espíritu sánto ha oñehendu yvágagui peteĩ ñeʼẽ heʼíva: “Nde ningo che Raʼy ahayhúva ha chembovyʼáva”’ (Luc. 3:​21, 22, ÑÑB). Isaías 42:​1-pe heʼi Jehová ‘oiporavo’ hague hembiguáipe ha jahechakuaa haʼeha Jesús upe oikovaʼekuére ojevautisárõ guare (jaleemína 42:​1-7). Haʼe okumplipaite upe profesía oĩrõ guare ko yvy ape ári. Avei Mateo oñeʼẽrõ guare Isaías ohaivaʼekuére heʼi Jesús rehe oñekumpli hague upe profesía (Mat. 12:​15-21).

9, 10. a) Mbaʼéichapa Jesús okumpli Isaías 42:​3-pe heʼíva? b) Mbaʼéichapa Jesús ohechauka mbaʼépa heʼise tekojoja? c) Arakaʼépa Jehová Rembiguái oguerúta “hustísia yvy apére”?

⁹ Umi Israelgua rrelihión omoakãva oapoʼi umi imboriahu ha ohasa asývape (Juan 7:​47-49). Otrata vai chupekuéra ha upévare umi hénte ojogua peteĩ plánta  omanombotávape térã tataindy rendy oguepotávape. Péro Jesús okumpli Isaías 42:​3-pe heʼíva, oiporiahuvereko umi imboriahu ha ohasa asývape (Mat. 9:​35, 36). Haʼe heʼi chupekuéra: “Pejupa cherendápe peẽ penekaneʼõ ha pembaʼapo pohýiva, ha che pomombytuʼúta” (Mat. 11:​28, BNP). Avei Jesús ohechauka mbaʼépa heʼise tekojoja omboʼévo mbaʼépa iporã ha ivai Jehovápe g̃uarã (Isa. 42:3). Omboʼe ndovaleiha jajopy ñande rapichakuérape okumplipa hag̃ua Ñandejára Léi, iñimportanteveha guei jaiporiahuvereko chupekuéra (Mat. 23:23). Haʼe ndoiporavói mávapepa opredikáta, peteĩcha otrata imboriahu ha iplátavape (Mat. 11:5; Luc. 18:​18-23).

¹⁰ Isaías heʼi Jehová Rembiguái oguerutaha “hustísia yvy apére” (Isa. 42:​4, ÑÑB). Ha upeichaite Jesús ojapóta koʼẽrõite oisãmbyhy vove ko yvy ape ári. Ohundíta umi goviérno koʼag̃agua ha oisãmbyhýta tekojojápe. Upe vove ‘opa mbaʼe oikóta Ñandejára oipotaháicha, tekojojápe’ (2 Ped. 3:13; Dan. 2:44).

‘Resapehára’ ha ‘promésa’

11. a) Mbaʼéichapa Jesús okumpli Isaías 42:6 heʼíva? b) Ha mbaʼéichapa koʼág̃a ojehesape tetãnguérape?

¹¹ Heʼiháicha Isaías 42:6 Jehová omoĩ Jesúspe ‘ohesape hag̃ua tetãnguérape’. Ipredikasión rupive ohesapeʼa umi hudíope ha upéicha okumpli upe profesía (Mat. 15:24; Hech. 3:26). Jesús heʼi: “Che hína yvypóra resapehára” (Juan 8:12). Haʼe omyesakã heta mbaʼe Ñandejára Ñeʼẽme oĩva ha omeʼẽ hekove ñanderehehápe (Mat. 20:28). Jesús oñemoingove jey rire heʼi hemimboʼekuérape ojekuaaukataha pe marandu porã ko “yvy rugua pahaite peve” (Hech. 1:​8, ÑÑB). Upévare Pablo ha Bernabé oñeʼẽrõ guare Isaías 42:6 rehe, heʼi haʼekuéra opredika hague umi ndahaʼéivape hudío ha upéicha ‘ohesape tetãnguérape’ (Hech. 13:​46-48). Ha koʼág̃a umi ohótava yvágape ha ambue ovechakuéra opredika avei opárupi pe marandu porã. Upéicha omyesakã Ñandejára Ñeʼẽ ha oipytyvõ opavavépe ojerovia hag̃ua Jesús rehe, pe ‘Tesapehára’.

12. Mbaʼéichapa Jehová ojapo peteĩ promésa Jesús rupive?

¹² Upéi Jehová heʼi Hembiguáipe: ‘Añangarekóta nderehe ha ajapóta tetãnguéra ndive peteĩ promésa’ nde rupive (Isa. 42:6). Satanás oñehaʼãmbaite ohundi Jesúspe ani hag̃ua ojapopa pe tembiapo itúva omeʼẽvaʼekue chupe. Péro Jehová oñangareko hese omano meve (Mat. 2:13; Juan 7:30). Upéi omeʼẽ ipuévlope peteĩ ‘promésa’ térã garantía omoingove jeývo Jesúspe. Upéicha haʼekuéra ojeroviakuaa opa árare Ñandejára Rembiguái ohesapetaha chupekuéra. Avei oguenohẽtaha  pytũmbýgui umi oĩva Satanás poguýpe (jaleemína Isaías 49:​8, 9). b

13. Mbaʼéichapa Jesús okumplivaʼekue Isaías 42:​7-pe heʼíva? Mbaʼéichapa ñanepytyvõ koʼág̃a?

¹³ Isaías heʼiháicha Jesús ‘ohesapeʼáta umi ohechaʼỹvape, omosãsóta umi oñeñapytĩvape. Ha oguenohẽta koty ypytũgui umi pytũmbýpe oikóvape’ (Isa. 42:7). Upearã Jesús ohechauka umi rrelihión omoakãva ijapuha ha oikuaauka pe marandu porã (Mat. 15:3; Luc. 8:1). Upéicha heta hudío ojei pe rrelihión japu poguýgui ha ojerovia Jesús rehe (Juan 8:​31, 32). Avei oipytyvõ hetaiterei ndahaʼéivape hudío oiko hag̃ua Ñandejára rapére. Jesús heʼi mayma hemimboʼekuérape: ‘Tapeho opa tetã rupi ha pejapo chuguikuéra che remimboʼe’. Avei opromete oĩtaha hendivekuéra ára paha peve (Mat. 28:​19, 20). Upeichaite, Jesús koʼág̃a yvága guive ñanepytyvõ japredika hag̃ua pe marandu porã oparupiete.

Jehová omoĩ Jesúspe opa mbaʼe ári

14, 15. Mbaʼérepa Jehová omoĩ Jesúspe opa mbaʼe ári? Mbaʼéichapa ojapo upéva?

¹⁴ Jehová upe rire heʼi: “Che rembiguái oñakãrapuʼãta, ojehupi ha oñemoĩta yvate” (Isa. 52:13). Jesús iñeʼẽrendu itúvape opa mbaʼépe ijetuʼúramo jepe ha odefende Jehová sãmbyhy. Upévare Jehová omoĩ chupe opa mbaʼe ári.

¹⁵ Apóstol Pedro heʼi Jesús rehe: ‘Yvágape oĩ Ñandejára akatúape, oñemoĩ ipoguýpe anhelkuérape. Oñemeʼẽ chupe autorida ha opa puʼaka’ (1 Ped. 3:​22, BNP). Apóstol Pablo katu heʼi: ‘Oñemomirĩ ha iñeʼẽrendu omano meve pe yvyra rehe. Upévare Ñandejára ohupi chupe yvateve opavavégui, ha omeʼẽ chupe herarã peteĩ tuichavéva opa téragui. Ikatu hag̃uáicha Jesús réra renondépe oñesũ opavave oĩva yvágape, yvýpe ha yvyguýpe. Opavave ohechakuaa hag̃ua Jesucristo haʼeha Ñandejára raʼy ha oñemombaʼeguasu hag̃ua Itúvape’ (Fili. 2:​8-11).

16. a) Mbaʼéichapa Jesúspe oñemoĩ opa mbaʼe ári áño 1914-pe? b) Mbaʼépa ojapo upe rire?

 ¹⁶ Áño 1914-pe Jesús oñepyrũ oisãmbyhy yvága guive, upéicha Jehová omoĩ chupe opaite mbaʼe ári (Sal. 2:6; Dan. 7:​13, 14). Upe áño guive oisãmbyhy iñenemigokuéra paʼũme (Sal. 110:2). Tenondete omosẽ yvágagui Satanás ha idemoniokuérape (Rev. 12:​7-12). Upéi oguenohẽ umi ungídope ‘Babilonia Guasu’ poguýgui (Rev. 18:2; Isa. 44:28). Ha koʼág̃a katu omotenonde peteĩ tembiapo ijojahaʼỹva, ombyatypa hag̃ua umi ohótava yvágape ha avei umi ambue ovechakuérape opytátava ko yvy ape ári (Rev. 12:17; Juan 10:16; Luc. 12:32).

17. Mbaʼépa ñanemboʼe Ñandejára Rembiguái rehe umi profesía ñahesaʼỹijovaʼekue?

¹⁷ Umi profesía ñahesaʼỹijovaʼekue katuete ñanepytyvõ ñamombaʼeve hag̃ua Ñandejára Rembiguái ojapovaʼekue ñanderehehápe. Jesús ningo iñeʼẽrendu itúvape ha upéva ohechauka Jehová omboʼe porã hague chupe ou mboyve ko yvy ape ári. Avei Jesús rehe ojeʼe ‘ohesapeha tetãnguérape’ opredika rupi, ha ñanesãmbyhy haguére jaikuaauka hag̃ua pe marandu porã. Pe artíkulo oúvape jahecháta ambue profesía heʼíva mbaʼéichapa Ñandejára Rembiguái ohasa asy ha omanovaʼerã ñanderehehápe. Koʼẽrõite ningo ñanemanduʼáta Jesús omano hague árare, upévare iporã ‘jajepyʼamongeta’ koʼã mbaʼére (Heb. 12:​2, 3, ÑÑB).

[Nóta]

Nemanduʼápa?

• Mávapa Ñandejára ‘Rembiguái’, ha mbaʼéichapa jaikuaa upéva?

• Mbaʼéichapa Jehová ombokatupyry Jesúspe?

• Mbaʼéichapa Jesús ‘ohesape tetãnguérape’?

• Mbaʼéichapa Jesúspe oñemoĩ opa mbaʼe ári?

[Porandu ñahesaʼỹijóva]

[Nóta oĩva taʼanga ndive páhina 21]

Felipe oikuaa porã Ñandejára Rembiguái haʼeha Jesús

[Nóta oĩva taʼanga ndive páhina 23]

Jesús oiporiahuvereko umi imboriahu ha ohasa asývape

[Nóta oĩva taʼanga ndive páhina 24]

Jehová omoĩ Jesúspe opaite mbaʼe ári 1914-pe