Añemohatãvaʼerãpa che haʼévapente?

MOKÕI mitã ohugahína. Upeichaháguinte, peteĩva ndoipotái hapicha opoko ihugétere, upévare osapukái chupe: “Kóva chembaʼehína!”. Ñanemichĩ guivéma ningo jahechauka ñandesenteha (Gén. 8:21; Rom. 3:23). Avei, ko múndope enterovénte heʼi: “Che raẽ vaʼerã”. Upévare, ñande jaservíva Jehovápe ñañehaʼãmbaitevaʼerã ani ñañemotenondese ñande rapicháre. Ñande jaikoséramo upéicha ñambopochýta ñande rapichápe ha ñañemoĩ vaíta Jehová ndive (Rom. 7:​21-23).

Apóstol Pablo ñanemokyreʼỹ ñapensa hag̃ua mbaʼéichapa oñeñandúta ñande rapicha jajapóramo peteĩ mbaʼe. Haʼe heʼi: “Ikatu niko añete jajapo opa mbaʼe, ndaopambaʼéinte niko iporã. Opa mbaʼe ikatu jajapo, ndaopambaʼéinte ojapo porã ñanderehe”. Upéi heʼive: “Ani pemoñepysanga avavépe” (1 Cor. 10:​23, 32, BNP). Upévare, oĩramo peteĩ mbaʼe ñandegustáva ñañeporanduvaʼerã: “Amboykénepa umi mbaʼe chegustáva ani hag̃ua ojeiko vai kongregasiónpe? Ajapótapa la Biblia heʼíva ndachegustapáiramo jepe?”.

 Jaiporavo jave ñande travahorã

Heta ningo oĩ heʼíva chupe ogustávapente ombaʼapovaʼerãha ha avave noñentremeteivaʼerãha upévape. Upéicharõ jepe, jahechami mbaʼépa oikovaʼekue peteĩ almasenéro rehe. Haʼe oiko peteĩ tavaʼípe Sudaméricape. Opárupi ojekuaa chupe ihugadór ha ikaʼuha, péro upéi okambia ostudia rupi la Biblia ha oiko Ñandejára oipotaháicha (2 Cor. 7:1). Ha heʼírõ guare peteĩ ansiánope osẽsemaha opredika, pe ansiáno heʼi porãnte chupe opensa hag̃ua itraváhore. Haʼe ningo ovende alcohol ojeporúva heta mbaʼerã, péro upérupi la hénte ombojeheʼa ótra kósare ha hoʼu okaʼu hag̃uánte.

Pe karai ohechakuaa osegínteramo ovende alcohol ha osẽrõ avei opredika, ikatuha opyta vai Ñandejára ndive ha oñeñeʼẽ vai kongregasión rehe. Ifamília retáramo jepe, oheja pe itraváho ha omoĩ peteĩ livrería omantane hag̃ua ifamília. Upéicha rupi ojevautisáma haʼe, hembireko ha mokõi umi cinco ifamília apytégui. Haʼekuéra ningo pyʼaguapýpe ha kyreʼỹme osẽ opredika.

Jaiporavo jave ñane amigorã

Heta oĩ heʼíva ñandénte jadesidivaʼerãha jajeheʼátapa umi ndoservírivare Jehovápe. Péro, mbaʼépa heʼi la Biblia upévare? Jahechamína mbaʼépa oikovaʼekue peteĩ ermánare. Haʼe ningo ohosetéma vailehápe peteĩ kariaʼy ndahaʼéiva ndive testígo. Ojeʼéramo jepe chupe ipeligrosoha, pe ermána heʼi haʼe oikuaaha ojapóva ha osẽ oho la vailehápe. Og̃uahẽmírente ojeʼuka chupe vevída oñembojeheʼáva peteĩ sedánte mbarete rehe. Ha opáy rire, otopa pe “iñamígo” oviola hague chupe (embojojami Génesis 34:2).

Ndahaʼéingo katuete oikótava ñanderehe péicha jajeheʼa haguére umi ndahaʼéivare testígo. Upéicharõ jepe, la Biblia heʼi porã: “Upe oikóva iñarandúva ndive iñaranduvaʼerã; ha upe oikóva ivýrova ndive oñembohekovaive ohóvo” (Pro. 13:​20, ÑÑB). Jaikuaa jaiporavo porã vaʼerãha ñane irũrã. Proverbios 22:3 heʼi: “Oikokuaáva ohecha yvykua ha ojere chugui heko tarováva katu ohónte ha hoʼa pype”. Upéicharõ, jaiporavo vaíramo ñane amigorã, ikatu ñasẽ vai ha ñañemomombyry Jehovágui (1 Cor. 15:33; Sant. 4:4).

Jaiporavo jave ñande aorã

La móda ningo pyʼỹinte okambia. Péro la Biblia heʼívo mbaʼéichapa ñañemondevaʼerã, nokambiái. Apóstol Pablo heʼivaʼekue: ‘Kuñanguéra toñemonde hekópe porã’. Péicha  avei oñemondevaʼerã kuimbaʼekuéra (1 Tim. 2:9). Pablo ningo ndeʼirivaʼekue opavave kristiáno oñemondevaʼerãha peteĩcha. Péro heʼi oñemondevaʼerãha hikuái hekópe porã. Pe hekópe oñemondéva rehe ojeʼe iñumílde ha ndojejapoiha.

Ñañeporanduvaʼerã: “Ikatúpa haʼe chejehe añemondeha hekópe porã, añemondeséramo oñemañamba hag̃uáichante cherehe? Oñepensa vaítapa cherehe ojehechávo mbaʼéichapa añemonde?”. Ani hag̃ua ñambopochy avavépe, jajapovaʼerã apóstol Pablo heʼivaʼekue: ‘Ani peheka pe peẽmente ou porãva, pehekavaʼerã pe ou porãva avei pende rapichakuérape’ (2 Cor. 6:3; Fili. 2:4).

Mbaʼéichapa jaiporu pláta

Apóstol Pablo oñemoñeʼẽvaʼekue pe kongregasión Corintoyguápe. Upépe ningo iprovléma hikuái oĩ rupi ipokarẽva térã oporombotavyséva. Apóstol Pablo heʼi: ‘Naiporãveivaʼerãpa peropuʼaka pe inhustísia? Naiporãveivaʼerãpa peheja tapenemonda?’. Upéicharõ, iporãve jahejánte ojegueraha ñandehegui ñande kosakuéra jagueraharangue trivunálpe peteĩ ermánope (1 Cor. 6:​1-7). Peteĩ ermáno Estados Unidosgua ojapo upéicha. Haʼe ombaʼapovaʼekue peteĩ ermánondi ha ojoavy hendive heʼívo mboýpa odeve chupe. Haʼekuéra ojapo la Biblia heʼiháicha ha heta vése oñeʼẽ oñondive, péro nosolusionái mbaʼeve. Upéi oñeʼẽ hikuái ansianokuéra kongregasionpegua ndive (Mat. 18:​15-17).

Péro noñesolusionái jeýnte mbaʼeve. Upe ermáno heta oñemboʼe rire, odesidi oñembyesaráintema upévagui. Mbaʼérepa ojapo upéicha? Haʼe heʼi: “Upe provlemakuére ningo ndavyʼavéi ha oipeʼa chehegui heta tiémpo aiporurangue Jehová servísiope”. Péicha ojapo rire ae pe ermáno ovyʼa jey ha oñandu Jehová ovendesiha chupe.

Umi mbaʼe michĩvape jepe

Nañañemohatãiramo umi mbaʼe michĩvape jepe, jahupytýta heta mbaʼe porã. Pe primer día de asambléape peteĩ prekursór ha hembireko, voi og̃uahẽ ha oiporavo hikuái moõpa oguapýta. Oñepyrũvo la asambléa, apúrope og̃uahẽ oúvo peteĩ família. Ha umi prekursór ohechakuaa hetaha hikuái ha ohekaha oikóvo moõpa oguapýta. Upévare omeʼẽ chupekuéra isílla oguapy hag̃ua hikuái oñondivepa. Upe asambléa riremínte, pe família omondo umi prekursórpe peteĩ kárta oagradese hag̃ua chupekuéra imbaʼeporã haguére. Upe kártape omombeʼu hikuái mbaʼeichaitépa oñeñandu vai og̃uahẽ haguére tárde upe díape. Péro, ovyʼaha jey hikuái imbaʼeporã rupi hendivekuéra umi prekursór.

Upévare ija vove ñandéve, ñamboykéntekena umi mbaʼe ñandegustáva ñambovyʼa hag̃ua ñande rapichakuérape. Nañañemohatãiramo ñande jaʼévapente, jaiko porãta ñane ermanokuéra ndive ha ambue ñande rapicha ndive (1 Cor. 13:5). Ha iñimportantevéva katu, Jehová akóinte ñane amígota.

[Nóta oĩva taʼanga ndive páhina 20]

Ñamboykétapa umi mbaʼe ñandegustáva, jaiporavóta jave ñande aorã?

[Nóta oĩva taʼanga ndive páhina 21]

Ñameʼẽtapa ñande sílla ambue ermánope?