Ehejákena Jesús tanerekomboʼe

‘Upe Ñandejára ombouvaʼekue niko omombeʼu umi mbaʼe Ñandejára heʼivaʼekue chupe.’ (JUAN 3:34.)

1, 2. Mbaʼe rehépa ikatu ñambojoja pe Sermón del Monte? Mbaʼérepa ikatu jaʼe ouha Ñandejáragui?

 PE DIAMÁNTE tuichavéva ojekuaáva ningo haʼehína pe Estrella de África, orekóva 530 quilates. Péro, pe Sermón del Monte ningo iporãve upe diamántegui. Upe Jesús omboʼéva ningo ndaijojahái ou rupi Jehovágui. Upévare la Biblia heʼi: ‘Upe Ñandejára ombouvaʼekue niko omombeʼu umi mbaʼe Ñandejára heʼivaʼekue chupe’ (Juan 3:​34-36).

² Jesús oiméne ojapoparakaʼe upe diskúrso haimete média órape. Upéicharamo jepe, oiporu veintiún téysto jatopáva ocho lívro oĩva Escrituras Hebreas-pe. Upéicha rupi idiskúrsope heʼi ‘Ñandejára heʼivaʼekue chupénte’. Jahechamína mbaʼéichapa ikatu jajapo umi mbaʼe porãita Jesús omboʼevaʼekue.

‘Eñemoĩ porã raẽ ne ermánondi’

3. Mbaʼépa Jesús heʼi hemimboʼekuérape ojapo hag̃ua?

³ Ñandejára espíritu rupive ningo ñande javyʼa ha ñandepyʼaguapy (Gál. 5:​22, 23). Jesús ningo oipotaitereivaʼekue hemimboʼekuéra ovyʼa ha ipyʼaguapy. Upévare heʼi chupekuéra oñeñangareko hag̃ua ani ipochy are (jaleemína Mateo 5:​21, 22). Upéi heʼi: ‘Rerahakuévo nembaʼekuaveʼẽ altárpe ha nemanduʼa nde rapicha ipochyha nendive, eheja nembaʼekuaveʼẽ pe altár  renondépe ha tereho nde rapicha rendápe. Eñemoĩ porã raẽ hendive ha upéi katu eju altárpe ha emeʼẽ nembaʼekuaveʼẽ’ (Mat. 5:​23, 24).

4, 5. a) Mbaʼépa pe mbaʼekuaveʼẽ oñeʼẽ hague Jesús Mateo 5:​23, 24-pe? b) Mbaʼérepa jaiko porã jey vaʼerã peteĩ ermáno ipochýramo ñanendive?

⁴ Pe “mbaʼekuaveʼẽ” Jesús oñeʼẽ hague ningo haʼe umi mbaʼe ojeporúva ojejapo hag̃ua sakrifísio Jerusalénpe. Upéva ikatu peteĩ mymba térã ambue mbaʼe. Umi sakrifísio iñimportantevaʼekue umi Israelguápe g̃uarã. Upéicha ningo haʼekuéra omombaʼeguasu avei Jehovápe. Péro Jesús heʼi oĩha peteĩ mbaʼe iñimportantevéva upévagui: peteĩ ermáno ipochýramo ñanendive, jaiko porã raẽ vaʼerã hendive ha upéi ñamombaʼeguasu hag̃ua Jehovápe.

⁵ Mbaʼépa ñanemboʼe Jesús heʼivaʼekue? Jatrata porãramo añoite ñande rapichápe, ñaime porãtaha Jehovándi (1 Juan 4:20). Upévare, yma umi Israelgua otrata vaíramo hapichápe, umi sakrifísio ojapóva Ñandejárape g̃uarã ndoservíri mbaʼeverã (jaleemína Miqueas 6:​6-8).

Nañañemombaʼeguasuivaʼerã

6, 7. Mbaʼérepa ñaneumildevaʼerã jaiko porã jey hag̃ua ñane ermánondi?

⁶ Ojekuaáta ñanderehe nañañemombaʼeguasuiha, jaiko porã jeýramo ñane ermánondi. Peteĩ iñumíldeva ningo noñorairõmoʼãi osẽ hag̃ua haʼe heʼívapente. Upéva ningo ivaívamante oguerúta, oiko haguéicha yma Coríntope. Apóstol Pablo ningo heʼi chupekuéra: ‘Peikóramo ñorairõme oñondive péva haʼéma joavy. Naiporãveivaʼerã piko pehasa asy ha peropuʼaka ojejapo vaíva’ (1 Cor. 6:​7, JMP).

⁷ Jesús ndeʼirivaʼekue ñañemongeta hag̃ua ñane ermánondi jahechauka hag̃ua chupe ñande jaʼévante oĩ porãha ha haʼe ojavyha. Ñande ñañehaʼãvaʼerã guei jaiko porã jey ñande rapichándi. Ñamombeʼu porãnte vaʼerã mbaʼépa ñapensa, ha jahechakuaavaʼerã avei mbaʼéichapa oñeñandu ñande rapicha. Ha oiméramo jajavýraʼe jajerurevaʼerã chupe ñaneperdonami hag̃ua.

“Nde resa ndererahátaramo tembiapo vaípe”

8. Mbaʼépa Jesús heʼivaʼekue Mateo 5:​29, 30-pe?

⁸ Pe Sermón del Móntepe ningo Jesús heta konsého porã omeʼẽ ñandéve ñanderekopotĩ hag̃ua. Haʼe oikuaa ñaneimperfékto rupi ikatuha jajapo ivaíva. Upévare heʼi: ‘Nde resa ndeguerahátaramo tembiapo vaípe, enohẽ ha mombyry emombo. Iporãve niko oñehundi nde rete michĩraʼymi, ojeityrangue nde rekovete Gehénape. Ha nde  po ndeguerahátaramo tembiapo vaípe katu eikytĩ, ha mombyry emombo. Iporãve niko oñehundi nde rete michĩraʼymi, ojeityrangue nde rekovete Gehénape’ (Mat. 5:​29, 30).

9. Mbaʼéichapa ñande resa ha ñande po ikatu ojapouka ñandéve ivaíva?

⁹ Jesús oñeʼẽrõ guare ‘tesáre’, heʼise ñande ikatuha ñamaʼẽ ha jajesareko peteĩ mbaʼére. Ha oñeʼẽrõ guare “po” rehe katu heʼise umi mbaʼe ikatúva jajapo ñande po rupive. Nañañatendéiramo, ñande resa ha ñande po ikatu ojapouka ñandéve ivaíva ha ndajajapovéi ‘Ñandejára rembipota’ (Gén. 5:22; 6:9). Upévare, jahechakuaáramo jajaposeha ivaíva, pyaʼe ñakambiavaʼerã, jaipeʼarõguáicha ñande resa ha ñande po.

10, 11. Mbaʼépa ñanepytyvõta ani hag̃ua ñanderekovai?

¹⁰ Mbaʼépa jajapovaʼerã ani hag̃ua ñande resa ñandereity tekovaípe? Job ningo iñeʼẽrenduvaʼekue Ñandejárape. Haʼe heʼi: “Che añemoĩ peteĩ ñeʼẽme che resakuéra ndive, ani hag̃ua amaʼẽ kuñataĩ rehe aiko hag̃ua hendive” (Job 31:​1, ÑÑB). Job ningo omendáva ha heʼi voi iñeʼẽrendutaha Ñandejárape opa mbaʼépe. Ha ñande tahaʼe soltéro térã omendáva jajapovaʼerã avei upéicha. Ani hag̃ua ñanderekovai ñaikotevẽ Jehová espíritu ñanesãmbyhy. Upéva ningo ñanepytyvõta jajejokokuaa hag̃ua (Gál. 5:​22-25).

¹¹ Iporãta ñañeporandu: “Aleépa umi lívro tieʼỹ térã amañápa umi taʼanga tieʼỹ osẽvare Internét térã télepe?”. Ñanemanduʼavaʼerã Santiago ohaivaʼekuére: ‘Oiméramo oñandúva ojaposeha ivaíva, upéva pe mbaʼe vai oĩ ipyʼapýpe. Upe mbaʼe vaígui osẽ pekádo ha pe pekádo ogueru ñemano’ (Sant. 1:​14, 15, BNP). Upévare oĩramo ‘osegíva omaʼẽ’ peteĩ kuña térã kuimbaʼe rehe oiko hag̃ua hendive, pyaʼe okambiavaʼerã oipeʼarõguáicha hesa ha omombo (jaleemína Mateo 5:​27, 28).

12. Mbaʼépa heʼivaʼekue apóstol Pablo jajapo hag̃ua?

¹² Ñande po rupive ikatu jajapo hetaiterei mbaʼe ivaíva Jehová renondépe. Upévare, jajapovaʼerã apóstol Pablo heʼivaʼekue: ‘Pejukákena pende rete rembipota vai, anítei avave oiko oñondive omendaʼỹre, hekokyʼa, térã oiko hembipota vai rapykuéri, térã heko taryrýi, upéva haʼete jeýnteva taʼanga ñemombaʼeguasu’ (Col. 3:​5, BNP). Péicha jahecha pyaʼe ñakambiavaʼerãha ani hag̃ua jaiko ñande rete rembipota rapykuéri.

13, 14. Mbaʼérepa jaipeʼavaʼerã ñane akãgui ha jahapoʼo ñande pyʼapýgui umi mbaʼe vai?

¹³ Heta oĩ ñande rapicha ohejáva ojepeʼa chugui hetyma ani hag̃ua omano. Upéicha avei jaipeʼavaʼerã ñane akãgui ha jahapoʼo ñande pyʼapýgui umi mbaʼe vai, ñaneguenohẽtava Ñandejára rapégui. Ñanderekopotĩvaʼerã opaite mbaʼépe ani hag̃ua jaha Gehénape ha ñañehundiete.

¹⁴ Ñaneimperfékto rupi ijetuʼu ñandéve ñanderekopotĩ hag̃ua. Apóstol Pablo heʼi: ‘Añehaʼãmbaite ajoko che rete heta mbaʼe vaígui, opyta hag̃ua che rembipota poguýpe. Ani hag̃ua che amboʼe rire che rapichápe, che voi apia Jesucristo rapégui’ (1 Cor. 9:​27, ÑÑB). Upévare, jajapókena koʼã konsého Jesús omeʼẽvaʼekue. Ha akóinte jahechauka opa mbaʼe jajapóvape ñamombaʼetereiha Jesús omeʼẽ hague hekove ñanderehehápe (Mat. 20:28; Heb. 6:​4-6).

Ñanembaʼeporãkena

15, 16. a) Mbaʼéichapa Jesús ohechauka ñandéve ñanembaʼeporãvaʼerãha? b) Mbaʼépa heʼisehína Lucas 6:​38-pe heʼíva?

¹⁵ Jesús ningo ohechauka voi ñandéve heʼíva ha ojapóva rupive ñanembaʼeporãvaʼerãha. Upearã ou ko yvy ape ári omeʼẽ hekove yvyporakuéra  imperfékto rehehápe (jaleemína 2 Corintios 8:9). Chupe ningo ndojeovligái ou hag̃ua onase kuimbaʼéramo ko yvy ape ári, ha omeʼẽ hag̃ua hekove ñanderehehápe. Ha Jesús ojapo rupi upéicha, heta ñande rapicha ikatu oho yvágape oisãmbyhy hag̃ua hendive Ñandejára Rréino (Rom. 8:​16, 17).

¹⁶ Jesús ningo ñanemokyreʼỹ ñanembaʼeporã hag̃ua: “Pemeʼẽ ambuépe, ha [Ñandejára] omeʼẽne peẽme. Ipojeráne penendive ha omeʼẽne peẽme pende vosa renyhẽ chovi. Peẽ pemeʼẽháicha pende rapichápe, [Ñandejára] omeʼẽ jeýne peẽme” (Luc. 6:38). Heʼívo “omeʼẽne peẽme pende vosa renyhẽ chovi”, heʼisehína yma umi ombaʼevendéva omyanyhẽha jepi umi imarchantekuéra ao ruguái. Péicha Jesús ohechauka ñandéve ñandepojeravaʼerãha, Ñandejára ipojera hag̃ua avei ñanendive ñaikotevẽve jave (Ecl. 11:2).

17. Mbaʼéichapa Jehová omoĩ pe ehémplo iporãvéva, ha mbaʼépa jajapovaʼerã avei javyʼa hag̃ua?

¹⁷ Jehová ohayhu ha ovendesi umi imbaʼeporãvape. Haʼe voi omoĩ pe ehémplo iporãvéva, omeʼẽvo Itaʼýra peteĩetéva rekove “ani hag̃ua omano umi hese ojeroviáva, oikove hag̃ua uvei opa ára g̃uarã” (Juan 3:16). Apóstol Pablo ohai: ‘Pe oñemitỹ michĩva, michĩ omonoʼõta. Pe oñemitỹ hetáva, heta omonoʼõta. Peteĩteĩ omeʼẽvaʼerã ipyʼapýpe oñanduháicha, ombyasyʼỹre. Ñandejára niko ohayhu pe ipyʼaite guive omeʼẽvape’ (2 Cor. 9:​6, 7). Jahechaháicha javyʼáta ha hetaiterei mbaʼe porã jahupytýta jaiporúramo ñane tiémpo, ñane mbaretekue ha opa mbaʼe jarekóva Ñandejára servísiope (jaleemína Proverbios 19:17 ha Lucas 16:9).

‘Ani rembopu turu ne renonderã’

18. Mbaʼérepa ‘ñande Ru oĩva yvágape nomyengoviamoʼãi ñandéve mbaʼevépe’?

¹⁸ ‘Peñehaʼãke ani pejapo pene rembiapo porã yvyporakuéra renondépe pejechauka hag̃uánte. Upéicha pejapórõ pende Ru oĩva yvágape nomyengoviamoʼãi peẽme mbaʼevépe.’ (Mat. 6:​1, JMP.) Koʼápe Jesús ndeʼíri ndovaleiha jajapo iporãva ñande rapichakuéra ohecha hag̃uáme. Haʼe ningo heʼi voi hemimboʼekuérape: “Peẽ pehesapevaʼerã yvyporakuéra renondépe” (Mat. 5:​14-16, JMP). Péro, ñanembaʼeporãramo jajechauka hag̃uánte, ‘ñande Ru oĩva yvágape nomyengoviamoʼãi ñandéve mbaʼevépe’. Ha arakaʼeve nañaimeporãmoʼãi Jehovándi ha ndajahupytymoʼãi umi mbaʼe  porãita ñaneraʼarõva Ñandejára Rréino poguýpe.

19, 20. a) Mbaʼépa ohechauka Jesús heʼírõ guare ‘ani rembopu turu ne renonderã’? b) Mbaʼépa heʼise ‘ndajaikuaaukái ñande po asúpe ojapóva ñande po derécha’?

¹⁹ Ñanembaʼeporãramo jajapóta Jesús heʼivaʼekue: ‘Reipytyvõramo oikotevẽvape ani rembopu turu ne renonderã, ojapoháicha sinagógape ha tapére umi hovamokõiva, oipotágui oñemombaʼeguasu chupekuéra. Añetehápe haʼe peẽme upéicha ojehepymeʼẽma chupekuéra’ (Mat. 6:​2, JMP). Yma oñemeʼẽ heta mbaʼe ‘oñepytyvõ hag̃ua oikotevẽvape’ (jaleemína Isaías 58:​6, 7). Pór ehémplo, Jesús ha hemimboʼekuéra ombyatyvaʼekue heta mbaʼe oñemeʼẽva oñepytyvõ hag̃ua oikotevẽvape (Juan 12:​5-8; 13:29). Péro avave ningo yma nombopúi turu omeʼẽta jave peteĩ mbaʼe umi oikotevẽvape. Jesús ningo ontendekasénte ndovaleiha ñamopropagánda ñaipytyvõ jave oikotevẽvape. Yma ningo umi fariséo ojapovaʼekue upéicha. Ha Jesús ohenói chupekuéra “tovamokõi”, oikóre oikuaauka “sinagógape ha tapére” umi mbaʼe ojapóva. Chupekuéra ningo ‘upéicha ojehepymeʼẽma’. Hapichakuéra añoite omombaʼe ha oguerohorýta hembiapokuéra ha ikatu voi oguapy hikuái umi rabino ykére sinagógape. Péro Jehovágui ndohupytymoʼãi mbaʼevete (Mat. 23:6). Mbaʼépa ojapovaʼerã upéicharõ Jesús remimboʼekuéra?

²⁰ Jesús heʼi chupekuéra ha ñandéve avei: ‘Nde katu, reipytyvõramo oikotevẽvape, pende po asu ndoikuaaivaʼerã pende po derécha ojapóva, eñehaʼã uvei remeʼẽ ñemihápe, ha pende Ru ohechapáva ñemihapegua omyengoviáta ndéve’ (Mat. 6:​3, 4, JMP). Mokõive ñande po ningo ombaʼapo oñondive. Ha ‘ndajaikuaaukái ñande po asúpe ojapóva ñande po derécha’ heʼise natekotevẽiha ñamopropagánda ñaipytyvõ hague ñande rapichápe. Ni umi ñane irũetépe jepe natekotevẽi ñamombeʼu.

21. Mbaʼéichapa ‘ñande Ru ohechapáva ñemihapegua omyengoviáta ñandéve’?

²¹ Ñande ningo nañañemombaʼeguasúi ñaipytyvõ haguére ñande rapichápe, haʼete ñemihápe jajapóva. Ha ‘ñande Ru ohechapáva ñemihapegua omyengoviáta ñandéve’. Ñandejára ningo oĩ yvágape ha ndajahechái chupe, haʼe oĩ ‘ñemihápe’ ñandehegui (Juan 1:18). Haʼe ‘omyengoviáta ñandéve’ ñaneperdonávo ñane rembiapo vaikuére, ñaime porãvo hendive ha omeʼẽvo ñandéve jeikove opaveʼỹva (Pro. 3:32; Juan 17:3; Efe. 1:7). Koʼãva tuichaitereive mbaʼe jahekarangue ñande rapichakuéra ñandeguerohory.

Ñamombaʼékena umi mbaʼe porãita Jesús omboʼevaʼekue

22, 23. Mbaʼérepa jajapovaʼerã Jesús omboʼevaʼekue?

²² Jahecha haguéicha, pe diskúrso Jesús ojapovaʼekue hetaiterei mbaʼe neporãva ñanemboʼe. Umi mbaʼe heʼíva ñanembovyʼa, jaikóramo jepe ko múndo añáme. Javyʼaitereíta ningo jajapóramo Jesús omboʼevaʼekue ha jahejáramo oisãmbyhy opa mbaʼe ñapensáva ha jajapóva.

²³ Ohendu ha ojapóva guive Jesús omboʼevaʼekue ohupytýta heta mbaʼe porã (jaleemína Mateo 7:​24, 25). Upévare, jajapókena umi konsého Jesús omeʼẽvaʼekue. Pe artíkulo oúvape jahecháta mbaʼépa Jesús ñanemboʼeve pe Sermón del Móntepe.

Mbaʼépa rembohováita?

• Mbaʼérepa iñimportánte jaiko porã jey ñane ermánondi?

• Mbaʼépa jajapovaʼerã ani hag̃ua ñande resa ojapouka ñandéve ivaíva?

• Mbaʼépa jajapovaʼerã jahechauka hag̃ua añetehápe ñanembaʼeporãha?

[Porandu ñahesaʼỹijóva]

[Nóta oĩva taʼanga ndive páhina 11]

Tuichaite ningo ñandepyʼaguapýta jaiko porã jeýramo ñane ermánondi!

[Nóta oĩva taʼanga ndive páhina 13]

Jehová ningo ovendesi umi ipyʼaite guive omeʼẽvape