Javyʼáta jajapóramo Jesús omboʼevaʼekue
Javyʼáta jajapóramo Jesús omboʼevaʼekue
‘Jesús ojupi peteĩ montáñape, ha ou hendápe hemimboʼekuéra. Ha haʼe oñepyrũ omboʼe chupekuéra.’ (MAT. 5:1, 2.)
1, 2. a) Mbaʼérõ guarépa Jesús ojapovaʼekue pe Sermón del Monte? b) Mbaʼéichapa Jesús omoñepyrũ idiskúrso?
PE ÁÑO 31-pe, Jesús opredikahágui oikóvo Galiléape, osẽ oho Jerusalénpe Pascuarã (Juan 5:1). Ha ou rire jey Galiléape, peteĩ pyharekue entéro oñemboʼe Jehovápe. Haʼe ojerure Ñandejárape oipytyvõmínte hag̃ua chupe oiporavo hag̃ua umi doce apóstol. Upe koʼẽme katu, hetaiterei oĩ ohóva Jesús rendápe ha haʼe omonguera umi hasývape. Upéi ojupi peteĩ montáñape ha oñepyrũ omboʼe hemimboʼekuérape ha umi héntepe avei (Mat. 4:23–5:2; Luc. 6:12-19).
2 Jesús oñepyrũ hag̃ua idiskúrso térã pe Sermón del Monte, heʼi hemimboʼekuérape ovyʼa hag̃ua tekotevẽha oĩ porã Jehovándi (jaleemína Mateo 5:1-12). Pe vyʼa ningo heʼise ñañeñandu porã ha ñandepyʼarory peteĩ mbaʼére. Jesús ningo omombeʼuvaʼekue mbaʼérepa ikatu javyʼa, ha upearã oñeʼẽ nueve mbaʼe ñanepytyvõtavare. Jahechamína peteĩteĩ umi mbaʼe.
‘Umi ohechakuaáva oikotevẽha Ñandejárare’
3. Mbaʼépa heʼise ‘jahechakuaa ñaikotevẽha Ñandejárare’?
3 ‘Ovyʼavaʼerã umi ohechakuaáva oikotevẽha Ñandejárare, imbaʼekuerarã pe Rréino yvagapegua.’ (Mat. 5:3, JMP.) ‘Umi ohechakuaáva oikotevẽha Ñandejárare’ ningo oikuaa oikotevẽha Ñandejára oiporiahuvereko chupekuéra.
4, 5. a) Mbaʼérepa ovyʼa ‘umi ohechakuaáva oikotevẽha Ñandejárare’? b) Mbaʼéichapa jahechauka ñaikotevẽha Jehováre?
4 Ovyʼa ningo umi ohechakuaáva oikotevẽha Ñandejárare, ‘imbaʼekuerarã rupi pe Rréino yvagapegua’. Jesús remimboʼekuérape ningo ojeporavo oisãmbyhy hag̃ua yvágape Ñandejára Rréinope, ojerovia rupi hikuái Jesús haʼeha pe Mesías (Luc. 22:28-30). Ha oiméramo ñaisãmbyhýta Jesús ndive yvágape térã ñahaʼarõ jaikove opa ára g̃uarã ko yvy ape ári, ikatu javyʼa jahechakuaáramo ñaikotevẽha Jehováre.
5 Heta oĩ ndohechakuaáiva oikotevẽha Ñandejárare, ndojeroviái rupi hese ha nomombaʼéigui hembipota (2 Tes. 3:1, 2; Heb. 12:16). Péro mbaʼéichapa jahechauka ñaikotevẽha Jehováre? Jahechauka upéva jastudia meméramo la Biblia, jahávo rreunionhápe ha kyreʼỹme japredika (Mat. 28:19, 20; Heb. 10: 23-25).
‘Ovyʼavaʼerã umi ohasa asýva’
6. Mávapa ‘umi ohasa asýva’, ha mbaʼérepa ovyʼa hikuái?
6 ‘Ovyʼavaʼerã umi ohasa asýva, Ñandejára voi okonsoláta chupekuéra.’ (Mat. 5:4.) Umi ohasa asýva ningo haʼe hína umi ‘ohechakuaáva oikotevẽha Ñandejárare’. Ndahaʼéi ohasa asýva oikógui hesekuéra heta mbaʼe ivaíva, ohasa asy guei ohechágui mbaʼéichapa jaiko asy ñaneimperfékto rupi. Péro, mbaʼérepa Jesús heʼi ‘ovyʼaha umi ohasa asýva’? Ojerovia rupi Jesús ha Jehováre, ha oĩ porã rupi hendive (Juan 3:36).
7. Mbaʼépa ikatu jajapo jahechakuaáramo ko múndo aña ñanemomombyryha Jehovágui?
7 Ñambyasýpa umi mbaʼe vaieta oikóva ko múndo añáme? Mbaʼéichapa jahecha ko múndo ha umi mbaʼe oikuaveʼẽva? Apóstol Juan ohai: ‘Ñande rete rembipota vai, pe envídia ha pe ñembotuicha, ndoúi ñande Rúgui, ou uvei ko múndogui’ (1 Juan 2:16, ÑÑB). Péro mbaʼépa ikatu jajapo jahechakuaáramo ko múndo aña ñanemomombyryha Jehovágui? Ñañemboʼe meme vaʼerã ñande pyʼaite guive, jastudia la Biblia ha ñañemboja ansianokuéra rendápe ñanepytyvõ hag̃ua. Tahaʼe haʼéva upe jahasáva, ñañemoag̃uivévo Jehováre jahecháta mbaʼéichapa ñanekonsola (1 Cor. 2:12; Sal. 119:52; Sant. 5:14, 15).
‘Ovyʼavaʼerã umi ipyʼaporãva’
8, 9. a) Mbaʼépa ojapo umi ipyʼaporãva? b) Mbaʼérepa ovyʼa umi ipyʼaporãva?
8 ‘Ovyʼavaʼerã umi ipyʼaporãva, Ñandejára omeʼẽta chupekuéra yvy imbaʼe teerã.’ (Mat. 5:5.) Ñandepyʼaporãramo ndeʼiséi ñandevyroha ni ñanderory guaʼunteha (1 Tim. 6:11). Umi ipyʼaporãva ojapo Jehová rembipota ha oheja oisãmbyhy chupe. Upéva ojehechakuaa hesekuéra otrata jave hapichápe heʼi haguéicha apóstol Pablo umi kristiáno Romayguápe (jaleemína Romanos 12:17-19).
9 Mbaʼérepa Jesús heʼi ‘ovyʼaha umi ipyʼaporãva’? Haʼe heʼi: ‘Ñandejára omeʼẽtagui chupekuéra yvy imbaʼe teerã’. Ha Jesús voi ohechauka ñandéve mbaʼéichapa ñandepyʼaporãvaʼerã. Chupe ningo upévare oñemeʼẽ ko yvy (Sal. 2:8; Mat. 11:29; Heb. 2:8, 9). Umi ungídope, ipyʼaporãgui oñemeʼẽta ko yvy ogoverna hag̃ua Jesús ndive (Rom. 8:16, 17). Ha heta tapicha ipyʼaporãva oikóta opa ára g̃uarã ko yvy ape ári Jesús poguýpe (Sal. 37:10, 11).
10. Mbaʼépa oikóta ñanderehe ñande arhél ha japorotrata vaíramo, ha mbaʼépa noñemeʼẽmoʼãi ñandéve?
10 Ñande ningo ñandepyʼaporãvaʼerã Jesús ojapo haguéicha. Péro, mbaʼépa oikóta entéronte heʼíramo ñanderehe ñande arhél ha japorotrata vaietereiha? Avave ningo ndojeheʼasemoʼãi ñanderehe. Avei, peteĩ ermáno péicha ilájaramo, ni mbaʼevéicharõ noñemeʼẽmoʼãi chupe hembiaporã kongregasiónpe (1 Tim. 3:1, 3). Apóstol Pablo heʼivaʼekue Títope oñemoñeʼẽ hag̃ua umi kristiáno Cretayguápe. Heʼi chupekuéra ani hag̃ua ijarhél, iñakãguapy ha oporotrata hag̃ua pyʼaporãme (Tito 3:1, 2). Umi ipyʼaporãva ningo peteĩ vendisión hapichakuérape g̃uarã.
“Ovyʼavaʼerã umi Ñandejára rembipotánte oipotáva oiko”
11-13. a) Mávarepa oñeʼẽ Jesús heʼívo ‘umi Ñandejára rembipotánte oipotáva oiko’? b) Mbaʼéichapa Ñandejára omeʼẽ enterovépe opa mbaʼe oikotevẽva?
11 “Ovyʼavaʼerã umi Ñandejára rembipotánte oipotáva oiko, haʼe omeʼẽ chupekuéra opa oikotevẽva.” (Mat. 5:6.) Jesús oñeʼẽvo ‘umi oipotávare Ñandejára rembipotánte oiko’, oñeʼẽhína umi ojapóvare Ñandejára heʼíva. Pe salmísta ningo omombaʼetereivaʼekue Jehová heʼíva (Sal. 119:20). Ha ñande piko ñamombaʼe avei upéicha?
12 Jesús heʼi oñemeʼẽtaha oikotevẽva ‘umi Ñandejára rembipotánte oipotávape oiko’. Upéva oiko Pentecostés áño 33 guive, Jehová omeʼẽrõ guare ijespíritu sánto hemimboʼekuérape (Juan 16:8, BNP). Ñandejára ijespíritu sánto rupive ohaika pe Escrituras Griegas Cristianas “oporohekomboʼe hag̃ua pe hekopeteguáva rehe” (2 Tim. 3:16). Pe espíritu sánto ñanepytyvõ avei ‘ñamonde hag̃ua pe tekopyahu Ñandejára oipotaháicha’ (Efe. 4:24). Tuichaite ningo ñanembopyʼaguapy ikatu haguére ñaime porã Jehovándi. Upéva ningo ikatu Jesús omano rupi ñanderehehápe. Péro ñañembyasy ha jajevyvaʼerã avei ñane rembiapo vaikuégui (jaleemína Romanos 3:23, 24).
13 Oiméramo ñahaʼarõ jaikove tekojojápe opa ára g̃uarã ko yvy ape ári. Upe vove Ñandejára omeʼẽta enterovépe opa mbaʼe oikotevẽva. Ha og̃uahẽ meve upe ára, ñaneñeʼẽrendúkena Ñandejárape opa mbaʼépe. Jesús heʼivaʼekue: ‘Peheka raẽ Ñandejára Rréino ha pe teko marangatu haʼe oipotáva’ (Mat. 6:33, BNP). Upéicha jajapóramo, jarekóta hetaiterei mbaʼe jajapovaʼerã Jehová servísiope ha javyʼavéta (1 Cor. 15:58).
Mbaʼérepa ovyʼa umi oiporiahuverekóva hapichápe?
14, 15. a) Mbaʼéichapa ikatu jahechauka jaiporiahuverekoha ñande rapichápe? b) Mbaʼérepa ovyʼa umi oiporiahuverekóva hapichápe?
14 ‘Ovyʼavaʼerã umi oiporiahuverekóva hapichápe, Ñandejára oiporiahuverekóta rupi chupekuéra.’ (Mat. 5:7.) Umi oiporiahuverekóva hapichápe ningo ombyasy ohechávo mbaʼéichapa ojehasa asy. Pór ehémplo, Jesús ohechárõ guare hetaiterei hasýva, oiporiahuvereko rupi omonguera chupekuéra (Mat. 14:14). Ikatu jahechauka jaiporiahuverekoha ñande rapichápe ñaperdonávo chupe, Jehová ñaneperdonaháicha ñane rembiapo vaikuére (Éxo. 34:6, 7; Sal. 103:10). Ikatu avei ñaipytyvõ ha ñamokyreʼỹ ñande rapichakuérape jaʼéva ha jajapóva rupive. Koʼýte jahechaukáta jaiporiahuverekoha ñande rapichápe japredikáramo chupe. Upéicha jasegíta Jesús ehémplo. Haʼe ningo oiporiahuverekógui umi héntepe ‘oñepyrũ omboʼe chupekuéra heta mbaʼe’ (Mar. 6:34).
15 Upévare ikatu jaʼe Jesús heʼi haguéicha: ‘Ovyʼa umi oiporiahuverekóva hapichápe, Ñandejára oiporiahuverekóta rupi chupekuéra’. Ñande jaiporiahuverekóramo ñande rapichakuérape, katuete haʼekuéra ñandetratáta avei upéicha. Ha og̃uahẽ vove Jehová oporohusgaha ára, káda uno jajecháta hendive ñane rembiapokuére. Oiméramo jaiporiahuverekóraʼe ñande rapichápe, haʼe ndahesaraimoʼãi upévagui ha ikatu jajesalva (Sant. 2:13). Jahechaháicha, umi oporoporiahuverekóvape añoite Jehová oheja reíta hembiapo vaikue ha omeʼẽta jeikove opaveʼỹva (Mat. 6:15).
Mbaʼérepa ovyʼa “umi ipyʼapotĩva”?
16. Mbaʼéichapa ojehechakuaáta ñanderehe ñandepyʼapotĩha? Mbaʼéichapa ikatu enterove jahecha Ñandejárape?
16 ‘Ovyʼavaʼerã umi ipyʼapotĩva, haʼekuéra ohecháta Ñandejárape.’ (Mat. 5:8.) Ñandepyʼapotĩramo ojehechakuaáta ñanderehe. Ha opa mbaʼe jajapóvape jahechaukáta pe ‘mborayhu osẽva pyʼapotĩgui’ (1 Tim. 1:5). Upéicha jajapóramo, ‘jahecháta avei Ñandejárape’. Upéva ndeʼiséi jahechataha chupe ñande resa tee rupi. Ñandejára ningo heʼi voi: ‘Pe kuimbaʼe cherecháva katuete omanovaʼerã’ (Éxo. 33:20, ÑÑB). Péro, enterove ikatu ‘jahecha’ Jehovápe ñahesaʼỹijóramo Jesús ojapovaʼekue. Haʼe ningo ohechauka porã vaʼekue mbaʼeichaguápa Itúva. Jesús voi heʼivaʼekue: “Upe chéve cherecháva, ohecháma che Rúpe” (Juan 14:7-9). Ñande ikatu avei jahecha Ñandejárape umi mbaʼe ojapóva rupive ñanderehehápe (Job 42:5). Péro umi ungido añetehápe ohecháta Ñandejárape oñemoingove jey vove chupekuéra yvágape (1 Juan 3:2).
17. Mbaʼépa ojapo umi ipyʼapotĩva?
17 Umi ipyʼapotĩva ndohekái ha ndojapói umi mbaʼe Jehovápe ombojeguarúva (1 Cró. 28:9; Isa. 52:11). Ñandepyʼapotĩramo nañaneñeʼẽkyʼamoʼãi ha jajapóta hekoitépe opa mbaʼe Jehovápe g̃uarã.
‘Ñandejára oguerekóta itaʼýra ha itajýraramo umi oporomoingo porãvape’
18, 19. Mbaʼépa ojapo umi “oporomoingo porãva”?
18 ‘Ovyʼavaʼerã umi oporomoingo porãva, Ñandejára oguerekóta chupekuéra itaʼýra ha itajýraramo.’ (Mat. 5:9.) Umi ‘tapicha oporomoingo porãva’ ningo opa mbaʼe ojapóvape ohechauka oiko porãseha hapichándi. Pór ehémplo, haʼekuéra noñevengái avavére. Ojapo guei ‘iporãva opavavére’ (1 Tes. 5:15, ÑÑB).
19 Mateo 5:9 oñeʼẽ umi “oporomoingo porãva” rehe. Haʼekuéra ningo ‘nomopuʼãi oñoakãre umi ojoayhúvape’ (Pro. 16:28). Ha oñehaʼã avei ‘oiko porã opavave ndive’ (Heb. 12:14, BNP).
20. Mávapepa ‘Ñandejára oguerekóma itaʼýra ha itajýraramo’, ha mávapa haʼéta avei upe rire?
20 Umi ‘oporomoingo porãva’ ningo ovyʼa, ‘Ñandejára oguerekóta rupi chupekuéra itaʼýra ha itajýraramo’. Ñandejára voi oiporavo umi ohótavape yvágape, upévare haʼekuéra itaʼýra ha oĩ porã hendive. Umi ungido ningo ohupyty umi mbaʼe porãita ojerovia rupi Jesucristo rehe ha omombaʼeguasúgui Jehovápe, pe ‘mborayhu ha pyʼaguapy Jára’ (2 Cor. 13:11; Juan 1:12). Ha mbaʼépa ikatu jaʼe umi ‘ambue ovechakuérare’? Jesús mil áño oisãmbyhy aja haʼéta ‘pe Túva opa ára g̃uarãva’. Péro ohasa rire upe mil áño Haʼe voi oñemoĩta Jehová poguýpe, ha umi oikótava opa ára g̃uarã ko yvy ape ári haʼéta avei Ñandejára raʼy (Juan 10:16; Isa. 9:5, [9:6, NM]; Rom. 8:21; 1 Cor. 15:27, 28).
21. Mbaʼépa ojekuaáta ñanderehe jahejáramo Ñandejára espíritu ñanesãmbyhy?
21 Jahejáramo Ñandejára espíritu ñanesãmbyhy, ojekuaáta ñanderehe ñandepyʼaguapy ha jaiko porãseha opavavéndi. ‘Nañañemombaʼeguasumoʼãi ñande rapichakuéra renondépe’, ha ‘nañañombopochymoʼãi’ (Gál. 5:22-26; BNP). Ñañehaʼãta guei ‘jaiko porã opavave ndive’ (Rom. 12:18, BNP).
Javyʼa oĩramo jepe ñandepersegíva
22-24. a) Mbaʼérepa ovyʼa umi ojepersegíva ojapo haguére Ñandejára rembipota? b) Mbaʼépa jahecháta umi mokõi artíkulo ñahesaʼỹijótavape?
22 ‘Ovyʼavaʼerã umi ohasa asýva Ñandejára rembipota ojapógui, chupekuéra g̃uarã hína pe rréino yvagapegua.’ (Mat. 5:10.) Upe rire, Jesús heʼive: ‘Pevyʼavaʼerã pejejaʼo ha pehasa asýramo, ha ojeʼéramo penderehe opa mbaʼe vai, chendive peikógui. Pevyʼa ha pendepyʼarorýke, tuicha jopói oñemeʼẽtagui peẽme yvágape. Peẽicha avei, umi proféta ohasa asy vaʼekue peẽ mboyve’ (Mat. 5:11, 12).
23 Ñande ningo jaikuaa oĩtaha oñeʼẽ vaíva ñanderehe, ijapúva ha ñandepersegíva ‘jajapógui Ñandejára rembipota’. Péro jagueropuʼakáramo, javyʼáta jajapo haguére Jehová oipotáva ha ñamombaʼeguasúta chupe (1 Ped. 2:19-21). Ñande ningo jahasa asýramo jepe, javyʼaiterei jaservi haguére Jehovápe koʼág̃ama voi. Enterove javyʼaiterei, umi ohótava yvágape oisãmbyhy hag̃ua Jesús ndive, ha umi oikótava opa ára g̃uarã ko yvy ape ári. Koʼã mbaʼe ohechauka ñaime porãha Ñandejára ndive ha Haʼe imbaʼeporãitereiha ñanendive.
24 Péro hetaiterei mbaʼe gueteri ikatu ñaaprende pe diskúrso Jesús ojapovaʼekuégui. Umi mokõi artíkulo ñahesaʼỹijótavape jahecháta hetaitereive mbaʼe porã. Jahechami raẽta mbaʼéichapa ikatu jajapo ñande rekovépe umi mbaʼe porã Jesús omboʼevaʼekue.
Mbaʼéichapa ñambohováita?
• Mbaʼérepa ‘ovyʼa umi ohechakuaáva oikotevẽha Ñandejárare’?
• Mbaʼérepa ‘ovyʼa umi ipyʼaporãva’?
• Mbaʼérepa javyʼa oĩramo jepe ñandepersegíva?
• Mbaʼe Jesús heʼivaʼekuépa remombaʼeve?
[Porandu ñahesaʼỹijóva]
[Nóta oĩva taʼanga ndive páhina 7]
Jesús ningo oñeʼẽvaʼekue nueve mbaʼe ñanepytyvõtavare javyʼa hag̃ua
[Nóta oĩva taʼanga ndive páhina 8]
Jaiporiahuverekoñaína ñande rapichápe ñamboʼévo chupe Ñandejára Ñeʼẽ