Mbaʼépa naiporãi jajapo oĩ jave omanóva

HETA hendárupi, oĩ jave omanóva jahecha umi hénte oñembyatyjoa. Osapukaipa ha ojaheʼo hikuái. Oĩ umi oñembolútova ha oñembyasyetereígui ojepokyty yvýre. Ótro katu ojeroky kyreʼỹ, okarujoa ha opuka hatã hikuái. Oĩ avei hoʼúva servésa térã víno ha okaʼuetégui otyryrýva yvýre. Péicha ningo heta oĩ ñande rapicha ojapóva omanovahápe.

Ñandejerére ñahendu mbaʼéichapa umi hénte okyhyje omanovaʼekuégui. Heta ningo oĩ oimoʼãva umi omanóvagui oikoha espíritu ha ikatuha ñanepytyvõ térã ojapo mbaʼe vai ñanderehe. Upévare heta mbaʼe jahecha ojejapo omanovahápe. Añetehápe ningo ndaivaíri ñanerasẽ omanóramo ñandehegui peteĩ jahayhúva. Jesús ha hemimboʼekuéra hasẽvaʼekue avei péicha jave (Juan 11:​33-35, 38; Hech. 8:2; 9:39). Péro ndahaʼéi ojeplagea ha osapukáiva hikuái umi hénte ojapoháicha (Luc. 23:​27, 28; 1 Tes. 4:13). Haʼekuéra oikuaa porã mbaʼépa oiko umi omanovaʼekuégui.

Ñandejára Ñeʼẽ ningo heʼi voi: ‘Oikovéva oikuaa omanovaʼerãha, omanóva katu ndoikuaái mbaʼeve. Opáma ohayhúva, ijaʼeʼỹha ha opa mbaʼe oñandúva, ha arakaʼevéma ndorekomoʼãvéi mbaʼeve ojapovaʼerã pe yvyguýpe’ (Ecl. 9:​5, 6, 10). Ko téysto ohechauka porã ñandéve umi omanovaʼekue ndojapoveimaha mbaʼevete. Ndaikatúi opensa, oñandu ni oñemongeta avavéndi. Jaikuaávo koʼã mbaʼe, mbaʼépa ñande jajapovaʼerã oĩ jave omanóva?

“Ani pepoko mbaʼeve ipotĩʼỹvare”

Toĩ oĩhápe, opavave testigos de Jehová omboyke opa mbaʼe ojejapóva omanovahápe oñeimoʼãgui umi omanovaʼekuégui oikoha espíritu. Ha ikatuha ñanepytyvõ térã ojapo ñanderehe mbaʼe vai. Umi mbaʼe noĩporãiva apytépe oĩ koʼã mbaʼe: Oñemyataindy omanovaʼekue, ojejapo karuguasu, novenário térã oĩ oñembolútova umi omanovaʼekue rérape. Koʼã mbaʼe ningo ndogustaiete Ñandejárape. Mbaʼérepa? Ndeʼírigui la Bíbliape jajapo hag̃ua, Satanás uvei oipota jajapo (Eze. 18:4). Upévare opavave oservíva Ñandejárape ndojapói koʼã mbaʼe. Jaikuaa voi ningo ‘ndaikatuiha jaguapývo Ñandejára mesápe ha upe jave avei Satanás mesápe’ (1 Cor. 10:21). Ñañehaʼãvaʼerã jajapo heʼiháicha ko téysto: ‘Pejei chuguikuéra ha ani pepoko mbaʼeve ipotĩʼỹvare’ (2 Cor. 6:17). Sapyʼánte ningo ijetuʼu jajapo hag̃ua upéva.

Áfricape ha ótro hendárupi oĩ avei oimoʼãva umi omanovaʼekue espíritu ipochytaha ndojejapóiramo mbaʼeve hesehapekuéra. Umi hénte ningo ipochy ndojejapóiramo mbaʼeve omanovahápe ha heʼi voi upévare ojekastigataha enterovépe. Heta testigos de Jehováre oñeʼẽ vai ihénte ha ivesíno, ha omaltrata chupekuéra ndojapói haguére omanovahápe umi mbaʼe noĩporãiva Jehovápe g̃uarã. Ojeʼe voi hesekuéra ndojeheʼaiha hapicháre ha ndorrespetaiha umi omanovaʼekuépe. Sapyʼánte omano jave peteĩ  ermáno, umi ihénte ndahaʼéiva testígo mbaretépe ojapo haʼekuéra oipotávante. Mbaʼépa ikatu jajapo ani hag̃ua oiko upéva? Ha mbaʼéichapa ikatu avei ñamboyke umi mbaʼe noĩporãiva ha ikatúva ñanemoĩ vai Jehová ndive?

Ñamombeʼu porã vaʼerã mbaʼérepa nañandegustái

Heta hendárupi umi pariénte térã umi itujáva ogustaháicha ojejapo oñeñotỹta jave peteĩ omanovaʼekue. Upévare, ñande jaservíva Ñandejárape ñamombeʼu porã vaʼerã chupekuéra ñamano vove oñenkargataha ñanderehe umi testigos de Jehová (2 Cor. 6:​14-16). Ñañatendevaʼerã pe omanovahápe ani hag̃ua jajapo mbaʼeve hendapeʼỹ ñane ermanokuérape térã ambue ñande rapicha renondépe.

Ojejeruréramo umi ansiánope oñenkarga hag̃ua opa mbaʼére oĩ jave peteĩ omanóva, haʼekuéra ikatu oipytyvõ ojejapo hag̃ua Ñandejára Ñeʼẽ heʼiháicha. Oĩramo omyataindyséva térã oñemboʼeséva pe omanovaʼekuére, pyʼaguapýpe porãnte jaʼevaʼerã chupe mbaʼérepa nañandegustái upéva (1 Ped. 3:15). Ha mbaʼépa jajapóta ñane hentekuéra oñemohatãramo ha ojapo haʼekuéra oipotaháichante? Upéicharõ iporãvéta ñasẽnte upégui (1 Cor. 10:20). Ikatu avei ojejapo Salónpe térã ambue hendápe peteĩ diskúrso ikatu hag̃uáicha Ñandejára Ñeʼẽ rupive oñembopyʼaguapy umi ihénte manóvape (Rom. 15:4). Ha natekotevẽi ningo pe omanovaʼekue oĩ katuete upépe ojejapo hag̃ua pe diskúrso (Deu. 34:​5, 6, 8). Ñambyasy ningo ñane hentekuéra ndahaʼéiva testígo oñentremetéramo koʼã mbaʼépe. Péro ñanembopyʼaguapy jaikuaávo Jehová ohechaha ñañehaʼãramo jajapo Haʼe oipotaháicha. Ha jajerovia Hese ñanepytyvõtaha jagueropuʼaka hag̃ua ñaneñembyasy (2 Cor. 4:7).

Jahai mbaʼéichapa jaipotáta ojejapo ñamano vove

Jahaíramo mbaʼéichapa jaipotáta ojejapo opa mbaʼe ñamano vove, ndahasyivéta ñane hentekuéra ndahaʼéiva testígo ontende hag̃ua mbaʼérepa ndojejapói ambue mbaʼe. Ñamoĩvaʼerã moõpa jaipota ojejapo ha mávapa oñenkargáta ñanderehe ha mbaʼeichaitépa ojejapóta (Gén. 50:5). Upe rire ikatu jajerure peteĩ térã mokõi tapichápe ohecha hag̃ua ñafirmahápe upe kuatia. La Bíbliape heʼi voi ñandéve jajeprepara hag̃ua. Upéicharõ natekotevẽi ñahaʼarõ ñandetuja raẽ térã ñamanombota jajapo hag̃ua umi mbaʼe jaʼevaʼekue (Pro. 22:3; Ecl. 9:12).

 Ndaigústoi ningo jahai mbaʼéichapa jaipotáta ojejapo ág̃a ñamano vove. Péro jajapóramo upéicha jahechauka jajaposeha opa mbaʼe Jehová oipotaháicha ha jahayhuha umi ñane família testígovape (Fili. 2:4). Iporãvéta ningo koʼág̃ama voi jahecháramo koʼã mbaʼe, jahejarangue ñane família testígova ári. Haʼekuéra ningo oñembyasýgui ikatu ojejopy chupekuéra ojapo hag̃ua ambue mbaʼe noĩporãiva ha ndogustáiva Ñandejárape.

Hekópe porã ojejapovaʼerã

Áfricape ningo ojeʼe pe omanovahápe ojejapovaʼerãha heta mbaʼe ani hag̃ua oñemotĩ umi omanovaʼekue espíritupe. Oĩ voi katu oaprovecháva upéva ohechauka hag̃ua iplataha (1 Juan 2:16). Ha ojesakrifika hikuái opaga hag̃ua umívare. Oĩ ojapoukáva kartél guasu ha omoĩka hese pe omanovaʼekue raʼanga, ikatu hag̃uáicha heta ojeho pe ñeñotỹhápe. Ojapouka avei kamiséta orekóva pe omanovaʼekue raʼanga ha omeʼẽ umi héntepe omonde hag̃ua upépe. Ha ojogua hikuái umi atau térã kahón hepyetereíva. Peteĩ tetãme katu pe Áfricape ojejapouka voi umi atau ojoguáva áuto, avión térã várkope ha upéicha ohechauka hikuái oĩ porãha. Oĩ avei onohẽva ataúgui pe omanovaʼekue ha omoñeno peteĩ tupa ojeguapávape. Kuñáramo la omanóva katu oñemonde chupe peteĩ vestído de nóvia, oñemakilla ha oñemonamichãimba. Iporãtapa ojapo upéicha umi oservíva Ñandejárape?

Naiporãmoʼãi ningo jajapo umi hénte ojapoháicha. Haʼekuéra ningo ojechaukasénte ha ndoikuaaséi la Biblia heʼíva. Jaikuaa ningo heta mbaʼe ojejapóva omanovahápe ndouiha Ñandejáragui, ‘ou uvei ko múndogui’ (1 Juan 2:​15-17). Ñañeñangarekovaʼerã ani jajapose umi mbaʼe vai ko múndope ojejapóva (Gál. 5:26). Heta hendápe ningo ojekyhyje pe omanovaʼekuégui ha ijatyjoa umi hénte, ha upeichaha rupi ojejapóma ojejapoʼỹvaʼerã. Oĩ ningo omombaʼetereíva pe omanovaʼekue ha upéicha rupi ojapo umi mbaʼe Ñandejárape ndogustáiva. Oñemoĩ ojaheʼo ha  osapukaisoro, oañua ha oñeʼẽ pe omanovaʼekuépe oikoverõguáicha. Omoĩ chupe ivolsíllope pláta térã ambue mbaʼe. Péicha ojejapóramo peteĩ testígo omanovahápe, oñemongyʼáta Jehová réra ha oñeñeʼẽ vaíta ñanderehe (1 Ped. 1:​14-16).

Ñande ningo jaikuaa mbaʼépa oiko umi omanovaʼekuégui, upévare ñamboykevaʼerã opa mbaʼe noĩporãiva ojejapo omanovahápe (Efe. 4:​17-19). Jesús ningo pe kuimbaʼe iñimportantevéva ko yvy ape ári, upéicharõ jepe oñeñotỹvaʼekue isensillomiháichante (Juan 19:​40-42). Ñapensáramo Jesucristo opensaháicha, nañatĩmoʼãi jajapo hag̃ua avei upéicha (1 Cor. 2:16). Isensillomínteramo pe funerál, oñeĩta pyʼaguapýpe ha ojejapóta Jehovápe ogustaháicha. Upéicha avei ñamboykéta umi mbaʼe ojejapóva jepi omanovahápe ha ndogustáiva Ñandejárape.

Javyʼavaʼerãpa pe omanovahápe?

Heta hendárupi oñeñotỹ rire pe omanovaʼekue, umi ihentekuéra ha ivesíno ojapo fiésta tuicháva ha ojerokyjoa hikuái. Umichahápe oñemoĩ heta vevída ha ojapo hikuái mbaʼe tieʼỹ. Oĩ oimoʼãva umichagua fiésta oipytyvõtaha chupekuéra ani hag̃ua oñembyasyeterei. Ambue katu ojapo ohechágui ótro ojapónte. Péro heta heʼíva upeichagua vyʼa ojejapoha oñemombaʼeguasu ha ojeguerohory hag̃ua pe omanovaʼekuépe. Ha ikatu hag̃uáicha pe omanovaʼekue espíritu oho avei umi ótro omanovaʼekue rendápe.

Péro ñande jaservíva Ñandejárape jaikuaa añeteha ko téysto heʼíva: ‘Tasẽ iporãve pukágui, ikatu ombovai ñande rova, péro upéicha avei ojapo porã ñande pyʼapýre’ (Ecl. 7:3). Iporãve ningo jahechakuaa mbykynteha voi ñande rekove ha koʼẽrõitéma oñemoingove jeytaha umi omanovaʼekuépe. Jaikuaáramo Jehovápe jahechakuaa ‘iporãveha oñemanoha ára oñenaseha áragui’ (Ecl. 7:1). Jahecha ningo umi omanovahápe ojejapoha heta mbaʼe noĩporãiva, ojejapo espiritísmo ha avei heta mbaʼe tieʼỹ. Upévare ñande jaservíva Jehovápe ndajajapoivaʼerã upéicha, ni ndajahaivaʼerã umichahápe. Jajapóramo koʼã mbaʼe ndogustamoʼãi Jehovápe ha ojapo vaíta ñane ermanokuérare.

Ojehechavaʼerã ñanediferenteha

Heta ñande rapicha ningo okyhyjeterei umi omanovaʼekuégui. Ñande katu jaagradese Jehovápe ñandepeʼa haguére umi mbaʼe japu ojegueroviávagui (Juan 8:32). Ñandejára omyesakãgui ñandéve jaikuaa mbaʼépa oiko umi omanovaʼekuégui ha avei koʼẽrõitéma oñemoingove jeytaha. Upéicha rupi oĩ jave omanóva ndahaʼéi ñanerasẽsoro ha jasapukáiva, ndajajapói avei ambue mbaʼe noĩporãiva (Efe. 5:8; Juan 5:​28, 29). Umi mbaʼe porãite Ñandejára oikuaaukáva ñandéve ningo tuichaiterei ñanepytyvõ (1 Tes. 4:13). Upéicha rupi ndajakyhyjéi jajapo hag̃ua Jehová oipotáva ha ndajaguevíri oĩ jave ojapoukaséva ñandéve umi mbaʼe noĩporãiva (1 Ped. 3:​13, 14).

Jajapóramo opa mbaʼe Jehová oipotaháicha, ñande rapichakuéra ohechakuaáta mávapa ‘umi omombaʼeguasúva Ñandejárape ha umi omombaʼeguasuʼỹva chupe’ (Mal. 3:18). La Biblia heʼi opataha pe ñemano (Rev. 21:4). Ñahaʼarõ aja upéva ñañehaʼãvaʼerã ani hag̃ua Jehová ‘ñandejuhu jajapohápe ivaíva’. Aníkena jajapo umi mbaʼe vai ko múndope ojejapóva ha ndogustáiva Ñandejárape (2 Ped. 3:14).

[Nóta oĩva taʼanga ndive páhina 30]

Iporã jahai mbaʼéichapa jaipotáta ojejapo ñamano vove

[Nóta oĩva taʼanga ndive páhina 31]

Hekópe porã ojejapovaʼerã opa mbaʼe oĩ jave omanóva