Jehová Ñeʼẽ ningo oikove

Mbaʼe mbaʼépa ñanemboʼe Revelación (párte 2)

MBAʼÉPA ohaʼarõ Jehová rembiguaikuérape? Ha mbaʼépa ojehúta umi naiñeʼẽrenduséivape chupe? Mbaʼépa oikóta Satanás ha idemoniokuéragui? Mbaʼe iporãvapa ohupytýta umi oikótava Jesucristo goviérno poguýpe mil áño aja? Jaikuaa hag̃ua koʼãva ha ambue mbaʼe iñimportánteva jahechamíta Revelación 13:1–22:21 heʼíva. * Koʼã kapítulope oñemombeʼu umi 9 visión hembýva umi 16 ohechavaʼekuégui apóstol Juan.

Juan ohai: ‘Ovyʼaiténepa umi omoñeʼẽva ko kuatia, ohendúva ko marandu ha omombaʼéva opa ipype oĩva’ (Rev. 1:3; 22:7). Jalee ha jajapóramo Revelación heʼíva, ñanekyreʼỹvéta jaservi hag̃ua Jehovápe, jajeroviavéta hese ha itaʼýrare, ha ikatúta jahupyty heta mbaʼe iporãitereíva (Heb. 4:12). *

OÑEÑOHẼ UMI 7 MBAʼYRU HENYHẼVA ÑANDEJÁRA POCHÝGUI

(Rev. 13:1–16:21)

Revelación 11:18 heʼi: ‘Tetãnguéra ipochyjoa; ha og̃uahẽ [Ñandejára] ipochyha ára, upe ára [...] ohundi hag̃ua umi yvy ohundívape’. Mbaʼérepa ipochy Ñandejára? Ipochy ohechávo umi mbaʼe ojapóva pe ‘mymba vai guasu 7 iñakã ha 10 hatĩva’ Juan ohechavaʼekue pe visión ochohápe (Rev. 13:1).

Pe visión nuevehápe ojehecha “pe Ovecharaʼy, oñemboʼyvahína yvyty Sión ári. Hendive oĩ 144.000” ojeporavovaʼekue “yvypóra apytégui” (Rev. 14:​1, 4). Upe rire oñehendu umi ánhel omeʼẽrõ marandukuéra. Pe visión diezhápe Juan ohecha ‘siete ánhel siete plága reheve’. Ikatu jaʼe Jehová voi heʼiha koʼã ánhelpe ‘oñohẽ hag̃ua umi 7 mbaʼyru henyhẽva Ñandejára pochýgui’ Satanás múndo ári. Koʼã mbaʼyrúpe oĩhína umi kastígo Jehová oguerútava hiʼarikuéra (Rev. 15:​1, BNP; 16:1). Koʼã mokõi visión omyesakã mbaʼépa oikóta oñembopúvo pe trompéta sieteha ha oñepyrũ vove pe “sarambi guasu” mbohapyha (Rev. 11:​14, 15).

Porandukuéra:

13:8. Mbaʼépa hína pe ‘Ovecharaʼy kuatiañeʼẽ jeikove rehegua’? Kóva ningo peteĩ kuatiañeʼẽ joguaha ha ipype oĩ umi Jesús ndive ogovernátava réra. Umíva apytépe oĩ umi ungido opytáva gueteri ko yvy ape ári.

13:​11-13. Mbaʼérepa ojeʼe pe mymba vai guasu mokõi hatĩva oñeʼẽha peteĩ dragón oñeʼẽháicha ha omboguejyha tata yvágagui? Ko mymba ningo orrepresenta Estados Unidos ha Gran Bretáñape. Ojeʼe oñeʼẽha dragón oñeʼẽháicha pórke mbaretépe ojopy umi héntepe oñemoĩ hag̃ua ipoguýpe. Ha mbaʼéichapa omboguejy tata yvágagui? Upearã koʼã tetã oiko guaʼu profétaramo ha heʼi ipuʼaka hague umi iñañávare umi mokõi gérra guasu oikovaʼekuépe, ha avei ipuʼaka hague comunismo rehe.

16:17. Pe mbaʼyru sieteha ningo oñeñohẽ “yvytúre”, mbaʼépa heʼise upéva? Ko ‘yvytu’ ningo hína Satanás opensa lája. Haʼe oguereko ‘ipoguýpe umi Ñandejárape ohenduseʼỹva’. Ko yvytu kyʼa isarambi opárupi Satanás múndore (Efe. 2:2).

 Mbaʼépa ñanemboʼe:

13:​1-4, 18. Peteĩ ‘mymba vai guasu’ orrepresentáva mburuvichakuérape osẽ ‘márgui’. Pe már katu orrepresenta umi yvypóra oĩva mombyry Ñandejáragui (Isa. 17:​12, 13; Dan. 7:​2-8, 17). Satanás hína ko mymba apohare, ha haʼe omeʼẽ chupe ipuʼaka. Ko mymba vaiete oreko pe número 666 heʼiséva peteĩ mbaʼe noĩporãiva ni michĩmi. Ñande ningo jaikuaa porã mávapepa orrepresenta ko mymba, upévare ndajaikói hapykuéri ha nañamombaʼéi ojapoháicha heta yvypóra (Juan 12:31; 15:19).

13:​16, 17. Ndajahejaivaʼerã pe mymba vai guasu oisãmbyhy ñande rekove, jepe upéicha ijetuʼuvéta jahupyty ñane remikotevẽ káda diagua. Jahejáramo ko mymba omoĩ imárka ñande po térã ñande syváre, heʼise jahejaha chupe oisãmbyhy ñapensáva ha jajapóva.

14:​6, 7. Pe ánhel heʼíva ohechauka tekotevẽtereiha ñamombeʼu umi marandu porã oñeʼẽva Ñandejára Rréinore. Avei ñaipytyvõvaʼerã ñane estudiantekuérape okyhyje hag̃ua Jehovágui ha omombaʼeguasu hag̃ua héra.

14:​14-20, BNP. Ág̃a oñembyatypa vove umi yvypóra ojesalvátava, heʼise “pe kóga yvy arigua” oñemonoʼõmbamaha. Upérõ pe ánhel oitýta pe ‘parrál yvy arigua’ pe “mbaʼyru guasúpe”, upéva ningo Ñandejára pochy ipohyietéva. Upépe oñehundíta tapia g̃uarã. Pe parrál orrepresenta umi polítiko japu atýra oĩva Satanás múndope. Umi parralʼa katu hembiapo vaikuéra. Upévare aníkena arakaʼeve jajeheʼa hesekuéra.

16:​13-16. Koʼã mbaʼe “ikyʼáva” ningo propagánda oúva demoniokuéragui. Haʼekuéra ndoipotái umi mburuvicha oñembyasy oñehẽvo umi 7 mbaʼyru henyhẽva Ñandejára pochýgui. Umi demónio oipota mburuvichakuéra oñemoĩ ipoguýpe ha opuʼã Jehováre (Mat. 24:​42, 44).

16:21. Satanás múndo aña ningo oñehundipotaitéma. Upévare oiméne koʼẽrõite jaikuaaukáta umi kastígo pohýi oútava chupekuéra, ojoguáva amandáu tuichaichávape. Upéicharamo jepe hetaiterei yvypóra osegíta okopi Ñandejárare.

PE MBURUVICHA IMBARETEVÉVA OISÃMBYHÝMA

(Rev. 17:1–22:21)

Umi rrelihión japu oñehenóiva ‘Babilonia guasu’, ningo peteĩ mbaʼe ñanembopyʼajeréva oĩva Satanás múndope. Pe visión oncehápe ojeʼe haʼeha peteĩ “kuña rekovai” oguapyvahína ‘peteĩ mymba pytã vai guasu ári’. Ko mymba ningo ‘10 hatĩ’ ha umíva rupive ohundipaitéta Babilóniape (Rev. 17:​1, 3, 5, 16). Pe visión docehápe ojeʼe Babilonia haʼeha peteĩ ‘táva guasu’, ha oñemombeʼu oñehunditamaha. Upévare ojeʼe Ñandejára rembiguaikuérape: “Pesẽ pe táva guasúgui”. Heta oĩ hasẽva ko táva oñehundi haguére. Yvágape katu ojevyʼapa ‘pe Ovecharaʼy omenda’ haguére (Rev. 18:​4, 9, 10, 15-19; 19:7). Pe visión trecehápe ojehecha peteĩ ohóva “kavaju morotĩ” ári. Kóva oñorairõ tetãnguérandi ha ohundi Satanás múndo aña (Rev. 19:​11-16).

Mbaʼépa ojehúta pe ‘mbói yma guarépe hérava Aña Ruvicha ha Satanás’? Arakaʼépa oñemombóta chupe “tata hendyhápe”? Koʼã mbaʼe ojehecha pe visión catorcehápe (Rev. 20:​2, 10). Umi mokõi visión oĩva ipahávo ohechauka ñandéve mbaʼéichapa ojeikóta Cristo ogoverna vove Mil áñore. Ha og̃uahẽvo huʼãme umi mbaʼe ojehechaukáva Juánpe, ojekuaa peteĩ ysyry oporomoingovéva osyrýva peteĩ tape ipévare. Upérõ Juan ohendu ojeʼeha mayma ‘hoyʼusévape’ tou ha toyʼu (Rev. 1:1; 22:​1, 2, 17).

Porandukuéra:

17:16; 18:​9, 10. Mbaʼérepa “umi mburuvicha” ombyasy ohundi haguére Babilonia  Guasu? Haʼekuéra oñembyasy ou vaígui chupekuéra. Ohundi rire entéro rrelihión japúpe umi mburuvicha ohecha mbaʼeichaitépa oipytyvõraʼe chupekuéra. Babilonia Guasu ningo oipytyvõ chupekuéra omoʼã hag̃ua umi mbaʼe vaieta ojapóva, orrekluta hag̃ua mitãrusu ñorairõrã, ha avei oreko hag̃ua umi hénte ipoguýpe.

19:12. Mbaʼérepa ojeʼe avave ndoikuaaiha Jesús réra? Oiméne ko téra ohechauka mbaʼe tembiapópa oreko Jesús pe ára paha aja, heʼiháicha Isaías 9:6. Avave ndoikuaái ko téra ha upéva heʼise umi tembiapo oñemeʼẽva Jesúspe ndaikatuiha oñembojoja ambuére. Heʼise avei avave ndaikatuiha ontende peichagua rresponsavilida guasuete. Upéicharõ jepe Jesús oikuaauka koʼã tembiapo umi ungídope, ha ‘omoĩ héra’ hesekuéra (Rev. 3:12).

19:14. Mávapa umi kavaju arigua omoirũva Jesúspe Armagedónpe? Umi ehérsito omoirũva Jesúspe Ñandejára ñorairõme ningo anhelkuéra ha umi ungido oĩva yvágape (Mat. 25:​31, 32; Rev. 2:​26, 27).

20:​11-15. Máva rérapa oñemoĩ pe ‘kuatiañeʼẽ jeikove reheguápe’? Ko kuatiañeʼẽme oñemoĩ entéro umi oikótava tapia g̃uarã réra. Koʼãva hína umi ungido, pe aty guasu ha Ñandejára rembiguaikuéra “hekopotĩva” oikove jeýtava (Hech. 24:​15, ÑÑB; Rev. 2:10; 7:9). Ha mbaʼépa oikóta umi ‘iñañáva’ oikove jeýtavagui? Ojapóramo hikuái ‘umi kuatiañeʼẽ’ pyahu heʼíva, herakuéra oñemoĩta avei pe ‘kuatiañeʼẽ jeikove reheguápe’. Péro upéva ndeʼiséi herakuéra ndaikatumoʼãveimaha ojepeʼa upe kuatiañeʼẽgui. Umi ungido omano raẽ vaʼerã herakuéra opytaitéma hag̃ua pe kuatiañeʼẽme (Rev. 3:5). Ha umi oikótava ko yvy ape ári ohasa raẽ vaʼerã pe pruéva paha oĩtava opávo Cristo goviérno ipukútava Mil áño (Rev. 20:​7, 8).

Mbaʼépa ñanemboʼe:

17:​3, 5, 7, 16. ‘Ñandejára arandu’ rupive hesakã ñandéve mávapa ‘pe kuña ha pe mymba vai guasu ogueraháva chupe hiʼári’ (Sant. 3:17). Ko mymba ningo ñepyrũrã haʼevaʼekue pe Liga de Naciones ha upéi katu oiko chugui Organización de las Naciones Unidas. Ñandéve ningo ojekuaauka ã mbaʼe, ha upévare kyreʼỹme jaikuaaukavaʼerã pe marandu porã ha ñamombeʼu og̃uahẽtamaha Jehová ára oporohusga hag̃ua.

21:​1-6, BNP. Jagueroviakuaa Ñandejára rréino poguýpe oikotaha katuete umi mbaʼe porã Haʼe oprometevaʼekue. Mbaʼérepa? La Bíbliape oñeñeʼẽ koʼã mbaʼére ku oikomaramoguáicha. Revelación kuatiañeʼẽ heʼi voi: “Oikopáma”.

22:​1, 17. Pe ‘ysyry jeikove rehegua’ haʼe hína umi mbaʼe Jehová oiporútava oipeʼa hag̃ua ñandehegui pekádo ha ñemano. Ha koʼág̃a voi umi tapicha ipyʼaporãva ikatu hoyʼu chugui. Ñandejára oipota jayʼu ‘ko jeikove rehegua ýgui’ japagaʼỹre mbaʼeve. Jajapókena kyreʼỹme haʼe oipotáva ha ñaipytyvõke ñande rapichakuérape ojapo hag̃ua avei upéva.

[Nóta]

[Nóta oĩva taʼanga ndive páhina 5]

Ñandejára omeʼẽta mayma iñeʼẽrendúvape heta mbaʼe porã igoviérno rupive