Reñemboʼépa nde Jesús omboʼe haguéicha?

“Jesús oñeʼẽmba rire, opavave ohecharamojoaite mbaʼéichapa haʼe omboʼe chupekuéra.” (MAT. 7:28.)

1, 2. Mbaʼérepa umi hénte ohecharamojoaite Jesúspe?

 ENTEROVE jajesarekovaʼerã Jesús omboʼevaʼekuére ha jajapo upéicha. Ndaipóri gueteri haʼéicha omboʼe porãva koʼág̃a peve. Ha ndareíri upéicharõ umi hénte ohecharamojoaite mbaʼéichapa oporomboʼe pe Sermón del Móntepe (jaleemína Mateo 7:​28, 29).

² Ñandejára raʼy ningo nomboʼeivaʼekue umi hudío rrelihión omoakãvaicha. Umíva oñeʼẽ hapichakuéra imperfékto omboʼévarente. Péro Jesús ‘oporomboʼe peteĩ oguerekóva autoridáicha’. Haʼe ningo oporomboʼe Ñandejára heʼivaʼekue chupénte (Juan 12:50). Upévare, ñahesaʼỹijomiéta mbaʼépa ñanemboʼe pe Sermón del Monte ha jahecháta mbaʼéichapa ñañemboʼevaʼerã.

Aníkena ñañemboʼe umi hovamokõivaicha

3. Mbaʼe rehépa oñeʼẽvaʼekue Jesús Mateo 6:​5-pe?

³ Iñimportánte ningo ñañemboʼe meme ñamombaʼeguasu hag̃ua Jehovápe. Ha jajapo hag̃ua upéva, iporãta ñanemanduʼa mbaʼépa Jesús heʼivaʼekue pe ñemboʼére Sermón del Móntepe. Haʼe heʼi: ‘Peñemboʼe jave ani pejapo umi hovamokõivaicha, oñemboʼéva oñemboʼyhápe sinagóga ha kálle eskína rupi ojechauka hag̃ua opavavépe. Añetehápe haʼe peẽme, chupekuéra niko oñemyengoviapáma oñemyengoviavaʼerã’ (Mat. 6:​5, BNP).

4-6. a) Mbaʼérepa umi fariséo ‘oñemboʼe oñemboʼyhápe sinagógape ha kálle eskína rupi’? b) Mbaʼépa heʼi Jesús umi tovamokõime?

⁴ Jesús remimboʼekuéra ningo noñemboʼeivaʼerã umi fariséoicha. Koʼã tekove rovamokõi oimoʼãvaʼekue hekoporãveha hapichakuéragui. Ojechauka hag̃uánte ohayhueteguaʼu hikuái Ñandejárape, péro ijapu (Mat. 23:​13-32). Haʼekuéra ningo ‘oñemboʼe oñemboʼyhápe sinagógape ha kálle eskína rupi’. Ha ojapo upéicha ‘ojechauka hag̃uánte opavavépe’. Umi hudío ningo síglo primérope ojepokuaávami oñembyaty oñemboʼe hag̃ua ojejapo aja umi sakrifísio témplope. Upéicha ojapo jepi hikuái pyhareve las nueve ha kaʼaru las tres rupi. Umi oikóva Jerusalénpe oho pe témplope oñemboʼe hag̃ua, ha umi  oikóva ótro hendápe katu oho dos vése ál día sinagógape (embojojami Lucas 18:​11, 13 rehe).

⁵ Heta hénte oĩ jepi mombyry pe témplo térã umi sinagógagui oñeñemboʼeha órape. Ha upévare, pe oĩhápentema oñemboʼe. Péro oĩ umi oñemosantuláriova ha jaikuaase voi mbaʼéichapa ojapo oñemoĩ hag̃ua umi “kálle eskína rupi”, ojehechauka hag̃ua umi ohasávape. Oheka voi hikuái mbaʼéichapa ombopuku pukuvéta iñemboʼe, ikatu hag̃uáicha ojehecharamo chupekuéra (Luc. 20:47). Péro animoʼãkena ñande avei jajapose upéicha.

⁶ Jesús heʼi umi tovamokõime ‘oñemyengoviapamaha oñemyengoviavaʼerã’. Haʼekuéra ningo oipotánte umi hapicha ohecharamo chupekuéra. Ha upévantema añete ohupytýta hikuái pórke Jehová nohendumoʼãi iñemboʼekuéra. Péro haʼe ohendu Jesús remimboʼekuéra ñemboʼe. Upéva jahechakuaa Jesús heʼivaʼekuére upe rire.

7. Mbaʼépa ohechauka ñandéve Jesús heʼívo ñañemboʼevaʼerãha koty ñembotypýpe?

⁷ “Peẽ peñemboʼéta vove katu, peike pende kotýpe, pemboty pene rokẽ, ha peñemboʼe pende Rúpe pene añoháme. Ha pende Ru ohecháva mbaʼépa pejapo pene añoháme, omyengoviáta peẽme pene rembiapokue.” (Mat. 6:6.) Jesús heʼíramo jepe ñañemboʼevaʼerãha koty ñembotypýpe, ndeʼiséi ndovaleiha ñañemboʼe ñande rapichakuéra renondépe. Haʼe ningo ohechaukasénte naiporãiha ñañemboʼe jajechauka hag̃uánte. Ha iporãta ñanemanduʼa upévare ñañemboʼe jave ñane ermanokuéra rérape. Jajapovaʼerã avei Jesús heʼivaʼekue upe rire.

8. Heʼiháicha Mateo 6:​7, mbaʼépa naiporãi jajapo ñañemboʼe jave?

⁸ ‘Peñemboʼe jave ani perrepeti heta rei, ojapoháicha umi Ñandejárare ojeroviaʼỹva. Haʼekuéra niko oimoʼã oñeʼẽ heta haguére Ñandejára ohendutaha chupekuéra.’ (Mat. 6:7.) Jesús heʼi koʼápe oĩha jepi umi orrepetipáva heʼíva oñemboʼe jave. Haʼe ningo ndeʼiséi ndovaleiha jarrepeti jaʼéva jaagradese térã jajerure asy hag̃ua Ñandejárape peteĩ mbaʼe. Haʼe voi upe pyhare omano mboyve oñemboʼe jey jey hardín de Getsemanípe ‘ha heʼi jey upe heʼivaʼekue’ (Mar. 14:​32-39, BNP).

9, 10. Mbaʼérepa noĩporãi jaʼe jey jey peteĩ mbaʼe ñañemboʼe jave?

⁹ Péro ivaíta jarrepetíramo jaʼéva ñañemboʼe jave ‘ojapoháicha umi Ñandejárare ojeroviaʼỹva’. Umíva ningo heta mbaʼe orrepeti de memóriantema. Upéicha yma ojapovaʼekue umi omombaʼeguasúva Baálpe. Haʼekuéra oñemboʼe rei ha “pyhareve guive asaje pyte peve ohenói Baálpe. Heʼi hikuái: ‘Baal, orerendúna!’” (1 Rey. 18:26). Koʼág̃a rupi hetaiterei oĩ orrepetíva iñemboʼe oimoʼãgui péicha oñehendutaha chupekuéra. Péro Jesús ohechauka porã Jehovápe ndogustaiha oñeñemboʼe jave ojerrepetínte umi mbaʼe ojeʼéva. Jahechavemi mbaʼépa Jesús heʼi upéi.

¹⁰ “Ani pejapo haʼekuéra ojapoháicha. Pende Ru niko oikuaáma voi peneremikotevẽ, peẽ pejerure mboyve chupe.” (Mat. 6:8.) Umi hudíope omoakãva ningo oñemboʼe puku puku ‘umi Ñandejárare ojeroviaʼỹva’ oñemboʼeháicha. Péro, jaikuaa iñimportanteha ñañemboʼe jaagradese, ñamombaʼeguasu ha jajerure asy hag̃ua Ñandejárape peteĩ mbaʼe (Fili. 4:6). Upéicharõ jepe naiporãi jaʼe jey jey peteĩ mbaʼe Jehovápe ñaimoʼãgui tekotevẽha jaʼe chupe heta vése ani hag̃ua hesarái. Ñanemanduʼavaʼerã ñañeʼẽhañaína pe ‘oikuaáva ndive mbaʼépa ñaikotevẽ, jajerure mboyve voi chupe’.

11. Mbaʼérepa ñanemanduʼavaʼerã ñañemboʼéta jave ñande rapichakuéra renondépe?

¹¹ Jahecha rire Jesús heʼivaʼekue ñemboʼére, ñanemanduʼavaʼerã Ñandejára ndohecharamoiha umi iñeʼẽkuaávape térã oñeʼẽmbareívape oñemboʼe jave. Ñanemanduʼavaʼerã avei ñañemboʼe jave ñande rapichakuéra renondépe ndahaʼeiha jajechauka  hag̃ua. Ndaipukuetereirivaʼerã ñane ñemboʼe ani hag̃ua ermanokuéra heʼi: “Mbaʼe óra piko opáta”. Ha ndovaléi avei jaaprovecha ñañemboʼe jave ñameʼẽ hag̃ua marandu térã konsého. Upéicha jajapóramo nañahenduiñaína Jesús heʼivaʼekuépe Sermón del Móntepe.

Jesús ñanemboʼe ñañemboʼe hag̃ua

12. Mbaʼépa jajerureñaína jaʼévo “toñemomarangatu nde réra”?

¹² Jesús heʼi rire hemimboʼekuérape mbaʼépa ndojapoivaʼerã, heʼi chupekuéra mbaʼéichapa oñemboʼevaʼerã (jaleemína Mateo 6:​9-13). Haʼe ndeʼíri chupekuéra pe padrenuestro oikuaa hag̃ua de memória ha orrepeti hag̃ua. Haʼe ningo ohechaukánte chupekuéra mbaʼéichapa ikatu oñemboʼe. Pór ehémplo, oñepyrũvo iñemboʼe ohechauka ñamotenondevaʼerãha Ñandejárape. Heʼi voi: “Ore Ru reiméva yvágape, toñemomarangatu nde réra” (Mat. 6:​9, BNP). Jaʼe ningo Jehovápe “ore Ru”, haʼégui ñande Apohare, pe oikóva yvágape (Deu. 32:6; 2 Cró. 6:21; Hech. 17:​24, 28). Ha jaʼévo “ore”, jahechakuaa ñande ha ermanokuéra ñaime porãha avei Ñandejára ndive. Ha jaʼévo “toñemomarangatu nde réra”, jajerureñaína Jehovápe omopotĩ hag̃ua héra opa mbaʼe vaígui. Jehová ningo oñemomarangatúta ohundi vove opa mbaʼe vai ko yvy ape ári oĩva (Eze. 36:23).

13. a) Mbaʼépa Ñandejára ojapóta ‘ou hag̃ua irréino’? b) Mbaʼéichapa jaikóta ojejapo vove Ñandejára rembipota ko yvy ape ári?

¹³ “Tou ne rréino, tojejapo ne rembipota yvy ári yvagapeguáicha.” (Mat. 6:​10, BNP.) Mbaʼépa hína pe Rréino jajeruréva padrenuéstrope? Upéva ningo pe goviérno yvagapegua Jehová omeʼẽva Jesucrístope, ha upéicha ohechauka Haʼe oisãmbyhyvaʼerãha. Ha umi ungídope oñemoingove jey rire, oisãmbyhyvaʼerã Jesucristo ndive yvágape (Dan. 7:​13, 14, 18; Isa. 9:​6, 7). Jajerurévo ‘ou’ hag̃ua Ñandejára Rréino, jajerureñaína Ñandejárape ohundi hag̃ua umi opuʼãvape hese. Upe vove, ojapótama hembipota ko yvy ape ári ha jaikóta peteĩ hardín neporãmba jepévape, tekojoja ha pyʼaguapýpe (Sal. 72:​1-15; Dan. 2:44; 2 Ped. 3:13). Jehová rembipota ojejapomahína yvágape. Upévare jajerure Ñandejárape ojejapo hag̃ua avei hembipota ko yvy ape ári. Jehová ningo heʼi yma ojapo haguéicha, ohunditaha umi opuʼãvape hese (jaleemína Salmo 83:​1, 2, 13-18).

14. Mbaʼérepa iporã jajerure ‘ñane rembiʼurã ko árape g̃uarã’?

¹⁴ “Emeʼẽ oréve ore rembiʼurã ko árape g̃uarã.” (Mat. 6:​11, BNP; Luc. 11:3.) Kóicha jajerure Ñandejárape omeʼẽ hag̃ua ñandéve ñane  rembiʼurã “ko árape g̃uarã”. Upéva iporã jajerovia rupi haʼe ikatuha omeʼẽ ñandéve ñaikotevẽva káda día, ha natekotevẽi jajerure chupe koʼẽrõ g̃uarã. Péva ñanemomanduʼa Jehová heʼivaʼekuére umi Israelguápe: ‘Peteĩteĩ tosẽ tombyaty maná upe árape g̃uarã’ (Éxo. 16:4).

15. Emombeʼu mbaʼépa heʼise “oreperdona ore rembiapo vaikue rehe, ore roperdonaháicha avei umi ojapo vaívape orerehe”.

¹⁵ Jesús heʼivaʼekue upe rire, ohechauka peteĩ mbaʼe ñande jajapovaʼerã avei. Haʼe heʼi: “Oreperdona ore rembiapo vaikue rehe, ore roperdonaháicha avei umi ojapo vaívape orerehe” (Mat. 6:​12, BNP). Lucas ohechauka umi ‘tembiapo vai’ heʼiseha avei pekádo (Luc. 11:4). Ha Jehová ningo ñaneperdonáta, ñaperdonáramo añoite umi ojapo vaívape ñanderehe (jaleemína Mateo 6:​14, 15). Upéicharõ, akóinte ñaperdonavaʼerã ñande pyʼaite guive ñande rapichakuérape (Efe. 4:32; Col. 3:13).

16. Mbaʼépa jajerureñaína jaʼe jave ‘ani reheja roñemoñuhã’ ha ‘orepeʼa pe ivaívagui’?

¹⁶ ‘Ani reheja roñemoñuhã, orepeʼa uvei pe ivaívagui.’ (Mat. 6:​13, BNP.) Mbaʼépa heʼise upéva? Jaikuaa ningo Jehová nomoñuhãiha avavépe ohecha hag̃ua ojapótapa ivaíva (jaleemína Santiago 1:13). Upe oporomoñuhãva ningo Satanás, pe mbaʼe “aña” (Mat. 4:3). Upéicharõ jepe, la Bíbliape heʼi jepi Ñandejára ojapoha, péro upéva heʼise haʼe ohejanteha oiko (Rut 1:​20, 21; Ecl. 11:5). Upéicharõ, jaʼe jave Ñandejárape: ‘Ani reheja roñemoñuhã’, jajerureñaína chupe ñanepytyvõ hag̃ua pono ñamboyke haʼe heʼíva. Upéi jaʼévo: ‘Orepeʼa pe ivaívagui’, jajerureñaína chupe ani hag̃ua oheja Satanás ipuʼaka ñanderehe. Jajerovia ningo Ñandejára ‘ndohejamoʼãiha ojehu ñandéve mbaʼeve ikatuʼỹvaʼerã jaropuʼaka’ (jaleemína 1 Corintios 10:13).

Pejerure meme, peheka meme ha pembota meme

17, 18. Mbaʼépa heʼise ‘pejerure meme, peheka meme ha pembota meme’?

¹⁷ Apóstol Pablo heʼi iñermanokuérape: “Peñemboʼe opa árape” (Rom. 12:​12, JMP). Jesús heʼi avei jajapo hag̃ua upéicha: ‘Pejerure meme ha oñemeʼẽvaʼerã peẽme; peheka meme ha pejuhuvaʼerã, pembota meme okẽ ha ojepeʼavaʼerã peẽme. Pe ojerurévape oñemeʼẽvaʼerã, pe ohekáva ojuhuvaʼerã, ha pe ombotávape ojepeʼavaʼerã’ (Mat. 7:​7, 8, BNP). Iporã ningo ‘jajerure meme’ umi mbaʼe ndojoavýiva Ñandejára rembipota ndive. Jesús heʼi haguéicha avei apóstol Juan ohai: ‘Jajerovia niko Ñandejára rehe jajeruréramo chupe haʼe oipotaháicha ñanerendutaha’ (1 Juan 5:​14, JMP).

¹⁸ Jesús heʼírõ guare ‘pejerure meme ha peheka meme’, heʼise ñañemboʼevaʼerãha pyʼỹinte ha ñande pyʼaite guive. Avei, ‘ñambota meme vaʼerã’ pe okẽ jaike hag̃ua Ñandejára Rréinope ha jahupyty hag̃ua heta mbaʼe porã. Péro añetehápe piko Ñandejára ombohováita ñane ñemboʼe? Haʼe ñanerendu jajapóramo haʼe heʼíva. Jesucristo heʼivaʼekue voi: “Pe ojerurévape oñemeʼẽvaʼerã, pe ohekáva ojuhuvaʼerã, ha pe ombotávape ojepeʼavaʼerã”. Heta ermáno rembiasakue ningo ohechauka Jehová ‘ohenduha maymáva ñemboʼe’ (Sal. 65:2).

19, 20. Mbaʼérepa Jehová ojogua peteĩ túvape heʼiháicha Mateo 7:​9-11?

¹⁹ Jesús ombojoja Ñandejárape peteĩ túva omeʼẽvare heta mbaʼe porã itaʼyrakuérape.  Epensamíntena reimeha Jesús ndive ha rehenduhareína chupe heʼívo kóicha: ‘Mávapa peẽkuérava, itaʼýra ojeruréramo pán, omeʼẽne chupe ita? Térã ojeruréramo pira, omeʼẽne chupe mbói? Peẽ pene ñañáva pemeʼẽkuaáramo umi mbaʼe iporãva pende raʼykuérape, pende Ru yvagapeguáma katu omeʼẽvaʼerã umi mbaʼe iporãva umi ojerurévape chupe’ (Mat. 7:​9-11, BNP).

²⁰ Ñande tuvakuéra ningo onaséma voi imperfékto, ha upévare ikatu jaʼe hesekuéra ‘iñañaha’. Upéicharõ jepe, haʼekuéra ijeheguíntema ohayhu ifamíliape. Peteĩ túva ningo nombotavymoʼãi itaʼýrape; oñehaʼãta guei omeʼẽ chupe umi “mbaʼe iporãva”. Upévare ikatu jaʼe Jehová ojoguaha peteĩ túvape. Haʼe ningo ñande Ru yvagapegua ha omeʼẽ ñandéve umi “mbaʼe porã”. Pór ehémplo pe espíritu sánto (Luc. 11:13). Upe espíritu ñanepytyvõ jaservi hag̃ua pe omeʼẽvape “opa mbaʼe porã ha hekopeguáva” (Sant. 1:17).

Jahejákena tañanepytyvõ Jesús omboʼevaʼekue

21, 22. a) Mbaʼérepa pe Sermón del Monte rasaharã ndaipóri? b) Mbaʼépa nde ere umi mbaʼe Jesús omboʼevaʼekuére?

²¹ Pe Sermón del Monte rasaharã ndaipóri. Jahecharamoiterei ningo umi mbaʼe porã ñanemboʼéva Ñandejáragui. Jahecháma haguéicha koʼã mbohapy artíkulope, heta mbaʼe porã jahupytýta jajapóramo Jesús heʼivaʼekue. Jajapóramo Jesús omboʼevaʼekue ikatu jaiko porãve ha ñahaʼarõ heta mbaʼe porã.

²² Koʼã artíkulope ndajahechapái umi mbaʼe porãita pe Sermón del Móntepe Jesús omboʼevaʼekue. Ndareíri umi ohendúva chupe ‘ohecharamoite mbaʼéichapa omboʼe chupekuéra’! (Mat. 7:28.) Ñande ñamombaʼetereíta avei ñamyenyhẽramo ñane akãme ha ñande pyʼapýpe umi mbaʼe porãite pe Mboʼehára Guasu Jesucristo omboʼevaʼekue.

Ñambohovaimi koʼã porandu

• Mbaʼépa heʼivaʼekue Jesús umi hovamokõiva ñemboʼére?

• Mbaʼérepa ndovaléi jarrepeti rei jaʼéva ñañemboʼe jave?

• Mbaʼe mbaʼépa jajerure pe padrenuéstrope?

• Mbaʼépa heʼise ‘pejerure meme, peheka meme ha pembota meme’?

[Porandu ñahesaʼỹijóva]

[Nóta oĩva taʼanga ndive páhina 15]

Mbaʼépa heʼi Jesús umi hovamokõivare, oñemboʼéva ojechauka hag̃uánte?

[Nóta oĩva taʼanga ndive páhina 17]

Ndépa reikuaa mbaʼérepa iporã jajerure káda día Ñandejárape ñane rembiʼurã?