“Umi ohóva pe Ovecharaʼy rapykuéri”

“Umíva hína umi ohóva pe Ovecharaʼy rapykuéri mamo ohohápe.” (REV. 14:4.)

1. Mbaʼéichapa ohechauka Jesús remimboʼekuéra ndohejaseiha chupe?

 JESÚS oĩrõ guare ko yvy ape ári, dos áño ha seis mése oñepyrũ haguépe opredika, heta hemimboʼe ohendu chupe “pe aty guasu jave Capernaum sinagógape”. Péro heta oĩ ipochýva Jesús omboʼévare, upévare “oheja chupe ha ndohosevéi hendive”. Upéicha rupi, Jesús oporandu umi doce apóstolpe ndohejaséipa avei chupe. Ha Simón Pedro katu heʼi: ‘Máva rendápe piko rohóta? Ne ñeʼẽ niko, ñeʼẽ oporomoingovéva opa ára g̃uarã. Ore niko rogueroviáma, ha roikuaa nde haʼeha pe Cristo, pe Ñandejára oikovéva Raʼy’ (Juan 6:​48, 59, 60, 66-69, BNP). Umi Jesús remimboʼe teetéva ndohejaséi chupe. Ha upéi ojeporavo rire chupekuéra espíritu sánto rupive, akóinte omoirũ hikuái Jesúspe (Hech. 16:​7-10).

2. a) Mávapa pe ‘tembiguái jeroviaha ha iñarandúva’ ha ‘pe mbaʼerepy ñangarekoha imbaʼeporãva’? b) Mbaʼépa ojeʼe pe tembiguáire?

² Mbaʼépa ikatu jaʼe umi ungido rehe? Jesús heʼivaʼekue mbaʼéichapa ojekuaáta haʼe ‘ou ha oĩmaha, ha ojeikomaha pe ára pahápe’. Umi ungido hína pe ‘tembiguái jeroviaha ha iñarandúva’ ha ‘pe mbaʼerepy ñangarekoha imbaʼeporãva’ (Mat. 24:​3, 45; Luc. 12:​42, JMP). Upe tembiguái rehe ojeʼe ‘ohoha pe Ovecharaʼy rapykuéri mamo ohohápe’ (jaleemína Revelación 14:​4, 5). Haʼekuéra noñemongyʼái umi mbaʼe hendapeʼỹ omboʼéva ha ojapóvare “Babilonia Guasu”, upéva ningo hína opa rrelihión japu oĩva guive ko múndope (Rev. 17:5). Umi ungido ningo ndaijapúi ha “hekopotĩ”, noñemoĩri Satanás múndo poguýpe (Juan 15:19). Ha amo gotyove, umi ungido oĩva gueteri ko yvýpe, ‘ohóta pe Ovecharaʼy rapykuéri’ yvagápe (Juan 13:36).

3. Mbaʼérepa jajeroviavaʼerã pe tembiguáire?

³ Jesús oheja pe tembiguái jeroviaha ha iñarandúvape “omongaru hag̃ua hiʼórape” umi ‘hogayguakuérape’, térã káda uno umi ungídope. Omoĩ avei ‘ipoguýpe opa mbaʼe oguerekóva’ (Mat. 24:​45-47). Koʼã mbaʼe apytépe oĩ pe “aty guasu”, haʼéva “umi ambue ovechakuéra” (Rev. 7:9; Juan 10:16). Upévare, enterove umi ungido ha “ambue ovechakuéra” ojeroviavaʼerã upe Jesús omoĩvaʼekuére oñangareko hag̃ua hesekuéra. Mbaʼérepa jajeroviavaʼerã pe tembiguáire? Koʼã mokõi mbaʼére: 1) Jehová voi ojeroviágui pe tembiguái rehe ha 2) Jesús avei ojerovia hese. Jahechami mbaʼérepa jaʼe Jehová ha Jesús ojeroviaha pe tembiguái jeroviaha ha iñarandúva rehe.

Jehová ojerovia pe tembiguáire

4. Mbaʼérepa ikatu jajerovia pe tembiguái omboʼévare?

⁴ Ñapensamína mbaʼéichapa pe tembiguái jeroviaha ha iñarandúva omoĩ ñandéve ñaikotevẽva jaikuaave hag̃ua Jehovápe ha jajeroviave hag̃ua hese. Jehová heʼi: “Che rohekomboʼéta. Ahechaukáta ndéve moõ rupípa rehovaʼerã, ha nderehe ajesarekóta opa árape” (Sal. 32:8). Jahechaháicha, Jehová voi oisãmbyhy pe tembiguáipe. Upévare ikatu jajerovia pe tembiguái omboʼévare ha  mbaʼéichapa omyesakã heta mbaʼe la Biblia rupive.

5. Mbaʼéichapa jahecha Ñandejára espíritu oipytyvõha pe tembiguáipe?

⁵ Jehová omeʼẽ avei ijespíritu sánto pe tembiguáipe. Ndajahecháiramo jepe upe espíritu, ikatu jahecha mbaʼéichapa oporopytyvõ. Ñapensamíntena mbaʼéichapa osẽ porã pe tembiguái jeroviaha ha iñarandúva oñeʼẽvo Jehová, Itaʼýra ha pe Rréino rehe. Jehová siervokuéra opredikáma doscientos treinta tetãme rupi. Péicha jahecha Jehová espíritu oipytyvõha pe tembiguáipe (jaleemína Hechos 1:8). Pe tembiguái odesidivaʼerã heta mbaʼe iñimportánteva omombarete hag̃ua Jehová siervokuéra jerovia. Ha umi mbaʼe odesidi ha ojapóvare ohechauka oporohayhu ha ipyʼaporãha, ha hetave mbaʼe pe espíritugui oúva (Gál. 5:​22, 23).

6, 7. Mbaʼéichapa Jehová ohechauka ojeroviaha pe tembiguáire?

⁶ Jahechamína mbaʼépa Jehová oprometevaʼekue pe tembiguáipe ha ohechaukáva ojeroviaha hese. Apóstol Pablo ohai: ‘Oñembopúvo pe turu, Ñandejára ñanemoingove jeýta ha omeʼẽta ñandéve ñande reterã ipyahúva, oñembyaiʼỹva arakaʼeve. Ñande rete oñembyaivahína oñemondevaʼerã peteĩ oñembyaiʼỹvape ha ñande rete omanóva oñemondevaʼerã peteĩ omanoveʼỹvape’ (1 Cor. 15:​52, 53, ÑÑB). Umi ungido ningo oservi Ñandejárape ipyʼaite guive ha omano térã oñehundívo pe hete oñembyaíva, oñemoingove jey chupekuéra yvágape umi espírituicha. Haʼekuéra oikovéta opa ára g̃uarã, nomanomoʼãvéima voi. Upéva heʼise oñemeʼẽtaha chupekuéra peteĩ tekove ndopamoʼãiva ha noñehundimoʼãiva. Oñemeʼẽta avei chupekuéra heterã oñembyaiʼỹva, ha ikatu jaʼe hesekuéra nodependemoʼãiha ambue mbaʼére oikove hag̃ua. Revelación 4:4 heʼi hesekuéra oguapyha umi trónope ha ikoróna de óro hikuái. Péicha ohechauka oisãmbyhytaha hikuái rréiramo.

⁷ Revelación 19:​7, 8 heʼi avei: ‘Og̃uahẽma pe Ovecharaʼy omenda hag̃ua ára, ha hembireko oñembosakoʼipáma, ha oñepermiti chupe oñemonde ao líno iporãvévape, ipotĩ ha omimbipáva. Pe líno fíno ningo orrepreseta umi imarangatúva rekovekue’. Jehová oiporavo Itaʼýra noviarã umi  ungídope. Jahecháma haguéicha oñemeʼẽ chupekuéra tekove opaveʼỹva, noñehundimoʼãiva. Oikóta avei chuguikuéra rréi yvágape ha oĩta pe Ovecharaʼy rembirekorã apytépe. Koʼã mbaʼe porãite Ñandejára omeʼẽva umi ungídope ohechauka ojeroviaha hesekuéra. Umíva ningo ‘oho pe Ovecharaʼy rapykuéri mamo ohohápe’.

Jesús ojerovia pe tembiguáire

8. Mbaʼéichapa Jesús ohechauka ojeroviaha umi ungídore?

⁸ Mbaʼérepa ikatu jaʼe Jesús ojeroviaha umi ungídore? Jahechamína. Pe último pyhare ohasavaʼekuépe ko yvy ape ári, Jesús heʼi umi once apóstolpe: ‘Peẽ niko peime tapia vaʼekue chendive ahasa asy jave’. Upéi opromete chupekuéra: ‘Che ameʼẽta peẽme peteĩ rréino che Ru omeʼẽ haguéicha chéve avei. Pekaru ha peyʼu hag̃ua che mesápe che rréinope; ha peguapy hag̃ua mburuvicha guapyhápe pehusga hag̃ua umi doce trívupe’ (Luc. 22:​28-30, BNP). Jesús oprometevaʼekue upéva umi once apóstolpe, oĩva umi 144.000 ungido apytépe (Luc. 12:32; Rev. 5:​9, 10; 14:1). Upévare ñapensamína ko mbaʼére: oprometénepa chupekuéra Jesús oisãmbyhytaha hendive ndojeroviáiramo hesekuéra?

9. Mbaʼe mbaʼépa Jesús omoĩ pe tembiguái poguýpe?

⁹ Upéicha avei Jesucristo omoĩ pe tembiguái jeroviaha ha iñarandúva poguýpe ‘opa mbaʼe oguerekóva’. Upéva heʼise omoĩha ipoguýpe opa mbaʼe Ñandejára Rréino oguerekóva ko yvy ape ári (Mat. 24:47). Umíva apytépe oĩ pe central mundial de los testigos de Jehová, umi sukursál oĩva heta tetã rupi, umi Salones de Asambleas ha Salones del Reino. Avei ojepredika ha oñemboʼe hag̃ua hetápe Ñandejára rembipota. Ha Jesús ndojeroviáiramo pe tembiguáire, ohejáta piko ipoguýpe opa mbaʼe oguerekóva?

10. Mbaʼérepa ikatu jaʼe Jesucristo omoirũha umi ungídope?

¹⁰ Jesús oikove jey riréma ha oho mboyvemi yvágape ojechauka hemimboʼekuérape. Ha heʼi chupekuéra: “Peikuaa, che aimeha penendive opa árape ko múndo paha peve” (Mat. 28:​20, BNP). Ojapópa Jesús upe heʼivaʼekue? Umi quince áño ohasavaʼekuépe  ningo oĩma hetaitereive kongregasión: setenta mílgui ohasa cien mílpe. Ha mboýpa oĩ umi oservi ramóva Jehovápe? Umi ojevautisavaʼekue haimete ohupyty cuatro millones quinientos mil, amo ochocientos ári pór día. Péicha jahechakuaa rreunionhápe ha predikasiónpe Jesucristo omoirũha umi ungídope.

Pe tembiguái jeroviaha ha iñarandúva

11, 12. Mbaʼérepa ikatu jajerovia pe tembiguáire, ha jaʼe hese iñaranduha?

¹¹ Ñandejára Jehová ha Jesucristo ojerovia pe tembiguáire. Upéicharõ koʼýte ñande jajeroviavaʼerã hesekuéra. Pe tembiguái jeroviaha ningo ojapo pe hembiaporã oñemeʼẽvaʼekue chupe. Upéva jahechakuaa pe rrevísta Ñemañaha rehe, ciento treinta áñoma ojejapo hague oikóvo. Ha jahechakuaa avei umi ñane rreunión ha aty guasu rehe. Umíva ningo tuichaiterei ñanepytyvõ.

¹² Pe tembiguái ningo iñarandu avei. Noñemombaʼeguasúi ha noñemotenondéi Jehováre mbaʼevépe. Péro ndaitapykuéi avei Jehová omeʼẽvo chupe omyesakã porã hag̃ua peteĩ mbaʼe. Jahechami peteĩ ehémplo. Umi rrelihión japu omoakãva ningo okirirĩnte térã heʼi voi oĩ porãha ohechávo la hénte ipyʼahatã ha iñaña. Pe tembiguái katu heʼi porã ñandéve mbaʼeichagua ñuhãpa oiporu ko múndo aña. Ha upéva ojapo Jehová ha Jesucristo ovendesi rupi chupe. Upévare jajeroviavaʼerã pe tembiguái rehe. Mbaʼéicha piko ikatu jahechauka jajeroviaha hese?

Ñamoirũkena umi ungídope

13. Mbaʼéichapa pe aty guasu ohechauka ojeroviaha pe tembiguáire?

¹³ Proféta Zacarías heʼi “diez kuimbaʼe” oñembojaha ‘peteĩ hudío’ rendápe ha heʼi chupe: “Ore rohose penendive” (jaleemína Zacarías 8:23). Pe hudíope heʼi hikuái “rohose penedive”, upévare jaʼekuaa oñeʼẽha peteĩ atýpe. Koʼág̃a rupi, pe hudío orrepresenta umi ungídope ojeporavovaʼekue espíritu sánto rupive. Umíva haʼe avei pe ‘Israel Ñandejára mbaʼéva’ (Gál. 6:​16, JMP). Ha umi ‘diez kuimbaʼe tetã ambueguáva’ orrepresenta umi ovecha aty guasúpe. Umi ungido ohoháicha Jesús rapykuéri mamo ohohápe, pe aty guasu omoirũ avei pe tembiguái jeroviaha ha iñarandúvape. Upe aty guasúpe oĩva notĩrivaʼerã omoirũ hag̃ua ‘umi Ñandejára ohenoivaʼekuépe imbaʼerã’ (Heb. 3:1). Ñanemanduʼákena Jesús notĩriha heʼi hag̃ua ‘ermáno’ umi ungídope (Heb. 2:11).

14. Mbaʼéichapa ikatu ñaipytyvõ umi Jesucristo ermanokuérape?

¹⁴ Jesucristo heʼivaʼekue umi oipytyvõva iñermanokuérape haʼeteha voi chupe oipytyvõva (jaleemína Mateo 25:40). Mbaʼéichapa ikatu ñaipytyvõ umi Jesucristo ermanokuérape? Ñamoirũvo chupekuéra kyreʼỹme predikasiónpe (Mat. 24:14; Juan 14:12). Umi ungido ningo mbovyvéma  ko yvy ape ári, ha ambue ovechakuéra katu hetavéntema ohóvo. Pe aty guasúpe oĩva ningo oñeʼẽ hapichakuérape Ñandejára Rréinore. Upéicha oipytyvõ hikuái umi ungídope omboʼe hag̃ua hapichakuérape ojeʼe haguéicha chupekuéra. Ha ikatúma guive, ojapo avei hikuái iprekursorádo oipytyvõhávo chupekuéra (Mat. 28:​19, 20). Heta mbaʼe avei ikatu jakolavora ojejapo hag̃ua ko tembiapo.

15. Mbaʼéichapa jahechavaʼerã umi mbaʼe omoĩva ñandéve pe tembiguái? Mbaʼépa oñehaʼarõ ñandehegui ojedesidi jave ojejapo ótro hendáicha peteĩ mbaʼe?

¹⁵ Pe tembiguái jeroviaha ningo omoĩ ñandéve ñaikotevẽ jave umi rrevísta, lívro ha rreunionkuéra. Ñamombaʼépa ha jajapo voi umi mbaʼe ñanemboʼéva? Mbaʼépa jaʼe ojedesidi jave ojejapo ótro hendáicha peteĩ mbaʼe? Jajapóramo kyreʼỹme pe tembiguái heʼíva, jahechaukáta jajeroviaha Jehováre ha jaguerohoryha opa mbaʼe ojapóva (Sant. 3:17).

16. Mbaʼérepa ñaneñeʼẽrenduvaʼerã umi ungídope?

¹⁶ Jesús heʼivaʼekue: “Che ovechakuéra ohendu che ñeʼẽ, ha che aikuaa chupekuéra ha haʼekuéra oho cherapykuéri” (Juan 10:​27, BNP). Umi ungido ningo ojapo koʼápe heʼíva. Mbaʼépa ojapovaʼerã upéicharõ ambue ovechakuéra? Iñeʼẽrenduvaʼerã Jesúspe ha umi ungídope avei. Chupekuéra ningo Jehová omoĩ oñangareko hag̃ua isiervokuérare. Péro mbaʼépa heʼise ñaneñeʼẽrendu chupekuéra?

17. Mbaʼépa heʼise ñaneñeʼẽrendu pe tembiguáipe?

¹⁷ Pe Cuerpo Gobernante ningo orrepresenta pe tembiguái jeroviaha ha iñarandúvape. Péicha oisãmbyhy ha omotenonde predikasión oparupiete ko múndope. Oñemoĩ hag̃ua pe Cuerpo Gobernante ningo ojeporavo umi ansiáno ungido ikatupyrývape. Hesekuéra ikatu jaʼe ‘ñanesãmbyhyha’ (Heb. 13:7). Haimetéma ningo oĩ siete millones puvlikadór ha cien mil kongregasión ko yvy ape ári. Upévare, umi ungido akóinte ‘ombaʼapo kyreʼỹ Ñandejárape g̃uarã’ (1 Cor. 15:​58, BNP). Upéicharõ, ñaneñeʼẽrendu pe tembiguái jeroviahápe heʼise jajepytaso mbarete pe Cuerpo Gobernante ykére.

Umi mbaʼe porã jahupytýva ñaneñeʼẽrendu rupi pe tembiguáipe

18, 19. a) Mbaʼépa jahupytýta ñaneñeʼẽrendúramo pe tembiguái jeroviaha ha iñarandúvape? b) Mbaʼépa tekotevẽ jajapo?

¹⁸ Oñemoĩha ára guive, pe tembiguái jeroviaha ha iñarandúva ‘oisãmbyhy hetápe pe tape porãre’ (Dan. 12:3). Umíva apytépe oĩ umi oikovétava oñehundi vove ko múndo aña. Ajépa tuichaite mbaʼe ñaime porã Ñandejára ndive!

¹⁹ “Pe siuda marangatu, Jerusalén pyahu” haʼéva umi 144.000, oguejýta ág̃a ‘yvágagui ha oñembosakoʼi tembirekorã ojeguáva imenarãme g̃uarãicha’. Upéva oiko vove, mbaʼépa ohupytýta umi iñeʼẽrenduvaʼekue pe tembiguáipe? La Biblia heʼi: ‘Ñandejára voi oĩta hendivekuéra. Ñandejára omokãta hesaykuéra, ha ndaiporivéima ñemano, tasẽ, jaheʼo, mbaʼasy, opa umi mbaʼe yma oĩvaʼekue ningo ndaiporimoʼãvéima’ (Rev. 21:​2-4, BNP). Upévare, akóintekena ñaneñeʼẽrendu Jesucrístope ha umi ungídope avei. Hesekuéra ningo jajeroviavaʼerã.

Mbaʼérepa ñanemanduʼa?

• Mbaʼérepa jaʼe Jehová ojeroviaha pe tembiguáire?

• Mbaʼérepa jaʼe Jesucristo ojeroviaha pe tembiguáire?

• Mbaʼérepa ñande jajeroviavaʼerã pe tembiguáire?

• Mbaʼéichapa jahechauka jajeroviaha pe tembiguáire?

[Porandu ñahesaʼỹijóva]

[Nóta oĩva taʼanga ndive páhina 25]

Ndépa reikuaa mávapepa Jehová oiporavo Itaʼýra noviarã?

[Nóta oĩva taʼanga ndive páhina 26]

Jesucristo omoĩ ‘opa mbaʼe oguerekóva’ pe tembiguái jeroviaha ha iñarandúva poguýpe

[Nóta oĩva taʼanga ndive páhina 27]

Japredika jave ñamoirũñaína umi ungídope