Enterove ñamombaʼeguasuvaʼerã Jehovápe

‘Pemombaʼeguasu Jehovápe.’ (SAL. 111:​1, ÑÑB.)

1, 2. a) Mbaʼépa heʼise “alelúja”? b) Maʼerãpa Escrituras Griegas-pe ojeporu “alelúja”?

 “ALELÚJA!” Kóicha ñahendu jepi ojeʼe umi iglesiaha rupi. Oĩ avei heʼíva jepi oñemongeta jave, péro saʼi oĩ oikuaáva mbaʼépa heʼise upéva. Ha umíva apytépe heta oĩ ndoikóiva Ñandejára oipotaháicha ha omotĩva chupe (Tito 1:16). Peteĩ diksionário vívliko heʼi: “Alelúja ningo peteĩ ñeʼẽ oiporúva umi salmo ohaivaʼekue heʼi hag̃ua hetãyguakuérape omombaʼeguasu hag̃ua Jehovápe hendivekuéra”. Ha heta oĩ heʼíva “alelúja” heʼiseha ‘pemombaʼeguasu Jehovápe’.

² Upévare oĩ porã Salmo 111:​1-pe oñemoĩ: ‘Pemombaʼeguasu Jehovápe’. Ha oñemoĩ cuatro vése Escrituras Griegas-pe, upéva jatopa Revelación 19:​1-6-pe. Upépe ojeporu ojehechauka hag̃ua ojevyʼaha oñehundipa haguére rrelihión japu. Ha oñekumpli vove upéva, Jehová siervokuéra omombaʼeguasuvétantema chupe heʼívo: “Alelúja!”.

Umi mbaʼe porã Jehová ojapóva

3. Maʼerãpa ñañembyaty jepi?

³ Salmo 111 ojapovaʼekue ohechauka mbaʼe mbaʼérepa ñamombaʼeguasuvaʼerã Jehovápe. Salmo 111:​1-pe heʼi: ‘Amombaʼeguasúta Jehovápe che pyʼaite guive, aty guasúpe ha hekojojáva atyhápe’. Ñande testigos de Jehová ningo jajapose avei upe salmísta ojapo haguéicha. Ñañembyaty jepi umi rreunión ha asambleahápe ñamombaʼeguasu hag̃ua Jehovápe.

4. Mbaʼépa ojapo umi oguerohorýva Ñandejára rembiapokue?

⁴ “Tuicháko hína umi Ñandejára rembiapokue, ha umíva oguerohorýva ojepyʼamongeta hese.” (Sal. 111:2.) Peteĩ lívro heʼi ko téystope oñeñeʼẽha umi “ohesaʼỹijo ha ojepyʼamongetávare” Ñandejára rembiapokuére. Hetaiterei mbaʼe ningo Jehová ojapovaʼekue, ha enterovénte ndaijojahái. Haʼe ningo omoĩ hendaitépe ko yvy, pe kuarahy ha jasy. Upéicha rupi pe kuarahy ojope medidaitére ko yvy ha omyesakã. Avei oĩ ára ha pyhare, ára haku ha roʼy.

5. Mbaʼépa ohechakuaa umi sientífiko?

⁵ Umi sientífiko ningo heta mbaʼéma oaprende ohechakuaávo mbaʼéichapa oĩ porã ko yvy, mbaʼéichapa ojere ha hendag̃uaitépe  opyta pe kuarahýgui, ha maʼerãpa avei oĩ pe jasy. Upéicha rupi oĩ ára roʼy ha ára haku umíva. Ha koʼẽ koʼẽre oñentendeve mbaʼéichapa ombaʼapo oñondive umi cuatro fuerzas fundamentales oĩva. Upévare peteĩ profesór de ingeniería mecánica heʼi: “Ndareíri ningo heta sientífiko umi treinta áño ohasavaʼekuépe okambiáma umi mbaʼe heʼivaʼekue. Enterove ohechakuaa hasyha jarovia hag̃ua ko yvy oiko hague ijehegui reínte. Jahechakuaavévo ko yvy oĩha hendag̃uaitépe, hesakãve oĩmantevaʼerãha peteĩ iñarandúva ojapovaʼekue opa mbaʼe”.

6. Mbaʼépa repensa rehechávo mbaʼéichapa Ñandejára ojapovaʼekue yvypórape?

⁶ Jehová rembiapokue ijojahaʼỹva apytépe ningo oĩ yvyporakuéra (Sal. 139:14). Ñandejára ojapo ypýrõ guare yvypórape, omeʼẽ chupekuéra heterã ha avei ombokatupyry ikatu hag̃uáicha ojapo heta mbaʼe. Pór ehémplo, ikatu ñañeʼẽ ha ñahendu. Koʼã mbaʼe ningo peteĩ milágro! Upéicha avei ñanembokatupyry ikatu hag̃uáicha jalee ha jahai. Jahecharamoiterei avei mbaʼéichapa ojejapo ñande rete ikatu hag̃uáicha ñañemboʼy. Ñamombaʼe avei ñapensávo mbaʼéichapa ombaʼapo pe ñande retepy. Ndaipóri sientífiko rembiapokue ombojojavaʼerã ñane nerviokuéra ojapóvare, omombaʼapo ñane apytuʼũ, ñande resa, ñande apysa ha mbaʼe. Ha upéicha rupínteko jajapo opa mbaʼe. Ni umi ingeniéro ikatupyryvéva ningo ndaikatúi ojapo peteĩ erramiénta iporã ha ideprovéchova ñande po ha ñane kuãicha. Ñapensamíntena: Ñandejára omeʼẽgui ñandéve ñande po ha ñane kuã, ikatu jajapo heta mbaʼe porã.

Jehová rembiapokue ningo ndaijojahái

7. Mbaʼérepa la Biblia ndaijojahái?

⁷ Ñandejára Ñeʼẽ ningo ohechauka Jehová omeʼẽ hague hetave jopói yvyporakuérape. Umíva apytépe oĩ la Biblia, upe lívro ningo ndaijojahái. Ñandejára voi ‘ohaiuka ha iporã oñehekomboʼe hag̃ua’ (2 Tim. 3:​16, ÑÑB). Pór ehémplo, pe primer lívro oĩva la Bíbliape ningo Génesis. Upépe omombeʼu mbaʼépa Ñandejára ojapo yma Noé tiémpope oipeʼa hag̃ua ko yvy ape árigui umi iñañáva. Pe segundo lívro katu Éxodo, omombeʼu mbaʼéichapa Jehová oguenohẽ Israélpe Egipto poguýgui. Ha upéicha ohechauka haʼeñoitenteha Ñandejára. Oiménengo koʼã mbaʼére imanduʼarakaʼe pe salmísta ha upévare opurahéi: ‘Ñandejára rembiapokue iporã ha omimbipa, ha haʼe hekojoja opa ára. Mbaʼe hechapyrãva ojapo ha umívagui ndoikói tesarái. Ñandejára ipyʼaporã ha oporoporiahuvereko’ (Sal. 111:​3, 4). Ymaite guive Jehová ojapóva koʼág̃a peve ningo ñanemomanduʼa ‘hembiapokue iporã ha omimbipaha’.

8, 9. a) Mbaʼérepa ndojojoguaiete Ñandejára ha yvypóra rembiapokue? b) Mbaʼépa reguerohoryve Jehováre?

⁸ Pe salmísta heʼi avei Jehováre hekojoja, ipyʼaporã ha oporoporiahuverekoha. Jaikuaa ningo yvyporakuéra heta vése ojapoha peteĩ mbaʼe itaryrýi, iñenvidíoso ha oñemombaʼeguasúgui, ndahaʼeiete hekojojágui mbaʼe. Pór ehémplo oĩ ojapóva umi árma iplatave hag̃ua ha ojeporúva ñorairõhápe. Péicha hetaiterei inoséntepe oñembohasa asy. Heta mbaʼe avei ojehupyty umi imboriahúva kostíllare. Pór ehémplo, yma ningo hetaiterei tembiguáipe oñemombaʼapo ojejapo hag̃ua umi pirámide oĩva Egíptope. Umívango ojejapo oñemoĩ hag̃ua umi faraón iñañaitéva omanovaʼekuépe. Koʼág̃a rupi avei heta mbaʼe yvypóra ojapóva oporombohasa asy, ha ‘ohundi ohóvo ko yvy’ (jaleemína Revelación 11:18).

⁹ Ajépa ndojoguaiete Jehová rembiapokuépe! Jaguerohoryeterei ningo mbaʼéichapa ojapo opa mbaʼe tekojojápe. Upévare voi omeʼẽvaʼekue itaʼýra osalva hag̃ua  yvyporakuérape (Rom. 3:​25, 26). Ha jaikuaa haʼe nokambiaiha ha ‘hekojojaha opa árape’.Jehová ningo ohechauka avei ipyʼaporãha ipasiénsiavo yvyporakuéra imperféktore. Heta vése ojerure asy chupekuéra ohejamínte hag̃ua hembiapo vai ha ojapo jey hag̃ua iporãva (jaleemína Ezequiel 18:25).

Jehová katuete ojapo oprometevaʼekue

10. Mbaʼéichapa Jehová okumpli pe oprometevaʼekue Abrahánpe?

¹⁰ “Haʼe omongaru umi hese ojeroviávape, ha opa ára imanduʼa iñeʼẽ omeʼẽvaʼekuére.” (Sal. 111:5.) Koʼápe oiméne pe salmísta imanduʼáraʼe Jehová oprometevaʼekuére Abrahánpe. Jehová heʼi chupe ovendesitaha ifamiliarépe ha ‘ipuʼakataha umi hesekuéra ijaʼeʼỹvare’ (Gén. 22:​17, 18; Sal. 105:​8, 9). Upéva oñekumpli Abrahán ñemoñare hetavérõ guare ha oiko chuguikuéra pe tetã Israel. Umi Israelgua ningo are oikovaʼekue Egipto poguýpe, péro Ñandejára ‘imanduʼa iñeʼẽ omeʼẽvaʼekuére Abrahánpe’ ha omosãso chupekuéra (Éxo. 2:​24, ÑÑB). Upe rire Jehová ohechauka imbaʼeporãha otrata porãvo umi Israelguápe. Haʼe ningo omeʼẽ chupekuéra oikotevẽva, tahaʼe hembiʼurã térã oikuaave hag̃ua chupe (Deu. 6:​1-3; 8:4; Neh. 9:21). Heta áño rire, umi Israelgua naiñeʼẽrendúi Ñandejárape. Upévare ojokuái jepi umi iprofétape oñemoñeʼẽ hag̃ua chupekuéra, péro nopenái jeýnte hese hikuái. Mil quinientos áño omosãso haguépe Israélpe, Jehová ombou Itaʼýra peteĩmi ko yvy ape ári. Péro heta hudío ndaijaʼéi hese ha ojukau ka chupe. Upémaramo, Ñandejára omoĩ peteĩ tetã pyahu oñehenóiva ‘Israel Ñandejára mbaʼéva’. Ko tetãme ha Jesúspe avei oñehenói Abrahán ñemoñare pyahu, ha upéva rupive Jehová opromete ovendesitaha yvyporakuérape (Gál. 3:​16, 29; 6:16).

11. Mbaʼéichapa Jehová ohechauka imanduʼaha gueteri oprometevaʼekuére Abrahánpe?

¹¹ Jehová imanduʼa gueteri oprometevaʼekuére Abrahánpe ha umi mbaʼe porã heʼivaʼekuére omeʼẽtaha chupe. Upévare koʼág̃a rupi cuatrocientos idiómape ojejapo umi lívro, rrevísta ha folléto omombaretétava ñande jerovia. Akóinte avei omeʼẽ ñandéve ñaneremikotevẽ jajerurégui chupe: “Koʼẽ koʼẽrekena emeʼẽ oréve ore rembiʼurã” (Luc. 11:3; Sal. 72:​16, 17; Isa. 25:​6-8).

Jehová puʼaka ningo ndaijojahái

12. Mbaʼéichapa Jehová ‘omeʼẽ Israélpe umi tetãnguéra yvy’?

¹² ‘Hetãyguápe ohechauka ipuʼaka hembiapo porã rupi, omeʼẽvo chupekuéra ambue tetã yvy.’ (Sal. 111:6.) Koʼápe oiméne pe salmísta imanduʼáraʼe Jehová ojapovaʼekuére oguenohẽ hag̃ua Israélpe Egipto poguýgui. Ha Jehová heʼírõ guare umi Israelguápe oike hag̃ua pe yvy oprometevaʼekuépe chupekuéra, ojagarra hikuái heta tetã mokõive ládo pe rrío Jordán ypýpe (jaleemína Nehemías 9:​22-25). Péicha Jehová ‘omeʼẽ Israélpe umi tetãnguéra yvy’. Aje piko ipoderosoite la Ñandejára!

13, 14. a) Mbaʼérepa pe salmísta omombaʼeguasu Jehovápe? b) Mbaʼépa Jehová ojapo avei koʼág̃a ohechauka hag̃ua ipoderosoitereiha?

¹³ Jehová ojapóramo jepe heta mbaʼe umi hudío rehehápe, haʼekuéra nomombaʼéi chupe ni Abrahán, Isaac ha Jacóbpe. Opuʼã jey jey hikuái Ñandejárare, ha upévare oheja Babilonia ogueraha chupekuéra (2 Cró. 36:​15-17; Neh. 9:​28-30). Oĩ ningo heʼíva pe Salmo 111 apohare oiko hague Israel oñeguenohẽ riréma Babilóniagui. Upégui ningo mbaʼeveichavérõ ndaiporivaʼekue osẽva. Upévare, koʼýte pe salmísta omombaʼeguasu Jehovápe ohechakuaágui ipoderosoha ha okumpliha ipromésa (Isa. 14:​4, 17).

¹⁴ Ohasa rire quinientos áño rupi, Jehová ohechauka ipoderosoitereiha oipeʼávo pekádo ha ñemano poguýgui umi oñembyasývape (Rom. 5:12). Upévare espíritu sánto rupive ojeporavo 144.000 Jesús remimboʼépe  oho hag̃ua yvágape. Ha 1919-pe Jehová oiporu jey ipuʼaka oguenohẽ hag̃ua rrelihión japu poguýgui umi mbovymi ungido opytávape. Koʼã kristiáno ojapo heta mbaʼe ko ára pahápe Ñandejára oipytyvõ ha omeʼẽ rupi chupekuéra ipuʼaka. Haʼekuéra ohechauka rire iñeʼẽrenduha Ñandejárape omano meve, ohovaʼerã yvágape ogoverna hag̃ua Jesucristo ndive. Upéicha oipytyvõta hikuái umi iñeʼẽrendúvape (Rev. 2:​26, 27; 5:​9, 10). Chupekuéra ningo hetave mbaʼe porã oñemeʼẽta pe Israel yma guarégui (Mat. 5:5).

Opa árare jajeroviakuaa Ñandejára Ñeʼẽre

15, 16. a) Mbaʼépa oĩ avei Ñandejára rembiapokue apytépe? b) Mbaʼe mbaʼépa heʼi umi léi Jehová omeʼẽvaʼekue Israélpe?

¹⁵ ‘Añete ha tekojojapegua meme hembiapokue, iléi heʼívare jajeroviakuaa. Añete ha tekojojápe oñembohapo, ha nokambiaichéne arakaʼeve.’ (Sal. 111:​7, 8.) Jehová rembiapokue apytépe ningo oĩ umi mokõi ita ojehai hague diez mandamiénto Israélpe g̃uarã (Éxo. 31:18). Koʼãva ha ambue léi oñemeʼẽvaʼekue Moisés rupive ningo iporã ha jajeroviakuaa hese opa árare.

¹⁶ Pór ehémplo, peteĩ léi oñemoĩvaʼekue umi ita rehe heʼi: ‘Che Jehová nde Jára, chéve añoite chemombaʼeguasuvaʼerã’. Upéi heʼi Jehová ‘oiporiahuverekoha umi ohayhúvape chupe ha ojapóva hembipota 1.000 iñemoñare peve’. Heʼi avei: “Ehayhúke nde ru ha nde sýpe” ha “Ani remondátei”. Upéicha avei upe léi heʼi ani hag̃ua jaipota mbaʼe ahéno. Koʼã mbaʼe ohechauka Ñandejára ñandekuaa porãitereiha (Éxo. 20:​5, 6, 12, 15, 17, ÑÑB).

Jehová ningo tuichaiterei mbaʼe ha imarangatu

17. Mbaʼérepa umi Israelgua ohechakuaavaʼerãmoʼã Ñandejára réra imarangatu ha oñemombaʼeguasuvaʼerãha?

¹⁷ ‘Hetãyguápe haʼe oguenohẽ jejopy vaígui, ha omeʼẽ iñeʼẽ opa ára g̃uarã. Ñandejára réra niko imarangatu ha ñamombaʼevaʼerã.’ (Sal. 111:9.) Koʼápe oiméne pe salmísta imanduʼa jeýraʼe mbaʼéichapa Jehová okumpli pe oprometevaʼekue Abrahánpe. Ñandejára ningo ndohejareirivaʼekue isiervokuérape Egipto ha Babilonia poguýpe. Mokõive hendágui haʼe omosãso Israélpe.  Koʼã mbaʼére ningo umi hudío ohechakuaavaʼerãmoʼã, Ñandejára réra imarangatu ha oñemombaʼeguasuvaʼerãha (jaleemína Éxodo 20:7 ha Romanos 2:​23, 24).

18. Mbaʼérepa nde remombaʼete Ñandejára réra?

¹⁸ Ñandéve avei Ñandejára ñaneguenohẽma pekádo ha ñemano poguýgui. Upévare, ñañehaʼãmbaitevaʼerã jahechauka ñande rekovépe jaipotaha oiko jajeruréva pe padrenuéstrope: “Toñemomarangatu nde réra” (Mat. 6:​9, BNP). Jajepyʼamongetáramo Ñandejára rérare ñamombaʼetereíta chupe. Pe Salmo 111 apohare oikuaavaʼekue mbaʼépa heʼise ñamombaʼe Ñandejárape: ‘Jakyhyjéramo Jehovágui ñanearanduve jahávo. Iñaranduete umi ojapóva hembipota’ (Sal. 111:​10, ÑÑB).

19. Mbaʼépa ñahesaʼỹijóta pe artíkulo oúvape?

¹⁹ Ñamombaʼéramo Ñandejárape ñanepytyvõta ani hag̃ua jajapo ivaíva ha ñahaʼanga hag̃ua Chupe umi mbaʼe porã ojapóvape ha omombeʼúva pe Salmo 112. Upéva ñahesaʼỹijóta pe artíkulo oúvape. Upe salmo omyesakã ñandéve mbaʼépa jajapovaʼerã ñamombaʼeguasu hag̃ua Jehovápe hetaiterei ñande rapicha ndive opa ára g̃uarã. Ha ñamombaʼeguasuvaʼerã voínte ningo Ñandejárape. Heʼiháicha pe salmísta: ‘Oñemombaʼeguasu héra opaite ára’ (Sal. 111:​10, ÑÑB).

Jajepyʼamongetamína koʼã mbaʼére

• Mbaʼérepa enterove ñamombaʼeguasuvaʼerã Jehovápe?

• Mbaʼe mbaʼépa jahechakuaa Jehová rembiapokuére?

• Mbaʼéichapa reñeñandu ojeʼe haguére ndéve testigo de Jehová?

[[Porandu ñahesaʼỹijóva]

[Nóta oĩva taʼanga ndive páhina 20]

Ñande ningo ñañembyaty jepi ñamombaʼeguasu hag̃ua Jehovápe

[Nóta oĩva taʼanga ndive páhina 23]

Ñandejára léi iporã ha ikatu jajerovia hese