‘Peñatende porãke’

‘Og̃uahẽmahína ára opa mbaʼe vai opa hag̃ua. Upévare, peñatende porãke ha peñemboʼe tapia.’ (1 PED. 4:7.)

1. Mbaʼépa pe iñimportantevéva Jesucristo omboʼevaʼekue?

 JESUCRISTO oĩrõ guare ko yvy ape ári omboʼe meme vaʼekue Ñandejára Rréino iñimportantetereiha. Ko goviérno rupive Jehová omopotĩta héra ha ohechaukáta haʼe añoite ikatuha ñanesãmbyhy porã. Upévare Jesús omboʼe hemimboʼekuérape ojerure hag̃ua ñande Apoharépe: “Tou ne rréino, tojejapo ne rembipota yvy ári yvagapeguáicha” (Mat. 4:17; 6:​9, 10, BNP). Koʼẽrõitéma ojejapóta Ñandejára rembipota ko yvy tuichakuére, ha Ñandejára Rréino ohundietéta Satanás múndo aña. Daniel heʼi haguéicha: ‘Ohundipavaʼerã opaite goviérno oĩva guive ko yvy apére, ha igoviérno katu oikóta opaite ára peve’ (Dan. 2:​44, ÑÑB).

2. a) Mbaʼéichapa opilláta Jesucristo remimboʼekuéra haʼe oisãmbyhymaha yvágape? b) Mbaʼépa oñepyrũta avei oñekumplívo koʼã mbaʼe?

² Jesucristo remimboʼekuéra oikuaasetereivaʼekue arakaʼépa oúta Ñandejára Rréino, upévare oporandu hikuái: ‘Roipota niko ere oréve arakaʼépa ojehúta koʼã mbaʼe. Mbaʼéichapa roikuaáta regovernatamaha ha opatamaha ko múndo?’ (Mat. 24:​3, BNP). Yvyporakuéra ndaikatumoʼãi ohecha oñemoĩ vove chupe yvágape Rréiramo. Upévare ikatu hag̃uáicha ojepilla omombeʼu chupekuéra mbaʼe mbaʼépa oikovaʼerã. Oñekumplívo umi mbaʼe heʼivaʼekue ojekuaáta Jesús oñepyrũmaha ogoverna  yvágape. Ha péicha oñepyrũta avei pe ára paha, Satanás múndo aña oñehunditahápe (2 Tim. 3:​1-5, 13; Mat. 24:​7-14).

Ñañatende porãkena ko ára pahápe

3. Mbaʼérepa oñatende porã vaʼerã Ñandejára siervokuéra?

³ Apóstol Pedro ohaivaʼekue: ‘Og̃uahẽmahína ára opa mbaʼe vai opa hag̃ua. Upévare, peñatende porãke ha peñemboʼe tapia’ (1 Ped. 4:7). Ñandejára siervokuéra oñatende porã vaʼerã umi mbaʼe oikóvare ko múndope ohechakuaa hag̃ua Jesús oñepyrũmaha ogoverna. Ha hiʼag̃uivévo ko ára paha katu oñatende porãvéma vaʼerã hikuái. Jesús heʼivaʼekue hemimboʼekuérape: “Pejesarekóke aipóramo, ndapeikuaaihína arakaʼetépa oúta pe óga jára [ohundi hag̃ua Satanás múndo]” (Mar. 13:​35, 36).

4. Mbaʼépa ohechakuaa Jehová siervokuéra hetaiterei hénte ndopilláiva? (Ehecha pe rrekuádro.)

⁴ Hetaitereípe ningo Satanás oguereko ipoguýpe ha umíva ndopillái mbaʼépa heʼise umi mbaʼe oikóva ko múndope. Upévare ndohechakuaái Jesucristo ogovernamaha yvágape. Péro Jehová siervokuéra katu oñatende porã ha ontende mbaʼépa heʼise umi mbaʼe oikóva. Pór ehémplo, 1925-pe testigos de Jehová ohechakuaa primera guerra mundial ha umi mbaʼe oikóva upe rire ohechaukaha Cristo oisãmbyhymaha yvágape 1914 guive. Upe áñope oñepyrũ avei pe ára paha. Heta tapicha ohechakuaa primera guerra mundial rire heta mbaʼe okambia hague ko múndope, ndoikuaáiramo jepe mbaʼérepa (Ehecha pe rrekuádro “Oñepyrũ tiémpo ijetuʼúva”).

5. Mbaʼérepa tekotevẽterei ñañatende porã?

⁵ Umi mbaʼe vaieta oikóva 1914 guive ohechauka jaikomaha ára pahápe. Saʼietereíma ofalta Jehová heʼi hag̃ua Jesús ha umi ánhelpe ohundi hag̃ua Satanás múndo aña (Rev. 19:​11-21). Upévare tekotevẽterei ñañatende porã koʼã mbaʼe oikóvare (Mat. 24:42). Ha upe aja jajapovaʼerã peteĩ  tembiapo tuichaitereíva, Jesucristo omoakãvahína.

Peteĩ tembiapo ojejapóva opárupi

6, 7. Mbaʼéichapa oñekumpli Jesús heʼivaʼekue?

⁶ Jesús oñeʼẽvo umi mbaʼe oikótavare ñane tiémpope heʼi: ‘Pe marandu porã oñemoherakuãta opárupi ko yvy jerekuévo, opa tetãygua ohendu hag̃ua. Upe rire ae, og̃uahẽta huʼãme pe ára paha’ (Mat. 24:14). Ko tembiapo ohechaukahína jaikomaha ára pahápe.

⁷ Ñapensamína mbaʼéichapa oñekumpli ko mbaʼe Jesús heʼivaʼekue. Oñepyrũvo ko ára paha 1914-pe saʼimi oĩvaʼekue opredikáva, upe rire oúma hetave. Koʼág̃a katu ñaiméma siete millones testigos de Jehová japredikáva ko yvy tuichakuére. Diez millones oĩkuri ñanemoirũva Conmemoracionhápe umi cien mil kongregasión oĩva rupi. Upéva heʼise un millón rupi hetaveha akokuehe áñogui.

8. Mbaʼérepa Satanás ndaikatúi ojoko ko tembiapo jajapóva?

⁸ Ko ára paha og̃uahẽ mboyve huʼãme iñasãive ohóvo opa tetãre umi notísia porã Ñandejára Rréinore oñeʼẽva. Satanás ningo “ko múndo ruvicha” ha ojapohína ikatúva entéro ojoko hag̃ua ko tembiapo (2 Cor. 4:​4, BNP). Ipoguýpe voi ningo oĩ polítika, rrelihión, negosiokuéra ha umi propagánda. Upéicharamo jepe hetave rei oĩ opredikáva. Mbaʼéicha rupi piko ndaikatúi ojoko upéva? Pórke Jehová hína pe omomýiva ko tembiapo. Upévare Satanás ndaikatumoʼãi voínte ojoko.

9. Mbaʼéicha rupípa Jehová organisasión oñakãrapuʼã?

⁹ Oparupiete ningo oñemombeʼuhína pe marandu porã ha Jehová organisasión katu tuicha oñakãrapuʼã. Upéva ningo oiko Jehová ñanepytyvõ, ñanesãmbyhy ha oñangareko rupínte ñanderehe (jaleemína Mateo 19:26). Jajeroviakuaa og̃uahẽ  porãtaha huʼãme ko tembiapo Ñandejára espíritu sánto oipytyvõ rupi umi oñatende porã ha oservisévape chupe. Upe rire, Jesús heʼi haguéicha ‘og̃uahẽta huʼãme pe ára paha’. Hiʼag̃uimbaitéma hína upéva.

‘Jehasa asy guasu’

10. Mbaʼépa heʼivaʼekue Jesús jehasa asy guasúre?

¹⁰ Ko múndo aña oñehundíta pe ‘jehasa asy guasúpe’ (Rev. 7:​14, BNP). La Biblia ndeʼíri mboy tiémpopa ipukúta, péro jaikuaa mbaʼéichatapa Jesús heʼivaʼekuére: “Upérõ, tuicha ojehasa asýta, ojehasaʼỹ haguéicha ko yvy ári iñepyrũmby guive. Ha arakaʼeve peichagua jehasa asy ndojehumoʼãvéi” (Mat. 24:21). Ivaietereima vaʼerã hína ko jehasa asy guasu ndaikatúi hag̃ua ñambojoja mbaʼeve oikovaʼekuére ko yvy ape ári. Ñapensamína segunda guerra mundiálpe oikovaʼekuére. Upépe omano cincuenta térã sesenta millones tapicha rupi. Upéicharamo jepe ko mbaʼe ndahaʼéi jey mbaʼeve pe jehasa asy guasu rovake. Ajépa ñanemopirĩ ñapensávo mbaʼeichaitépa ivaíta! Koʼã mbaʼe opáta pe ñorairõ guasu Armagedónpe, Jehová heʼi vove ijehérsitope ohundipaite hag̃ua Satanás múndo (Rev. 16:​14, 16).

11, 12. Mbaʼépa oikóta oñepyrũ vove pe jehasa asy guasu?

¹¹ La Biblia ndeʼíri arakaʼetépa oñepyrũta pe jehasa asy guasu, péro heʼi mbaʼépa oikovaʼerã oñepyrũ vove. Heʼi umi polítiko ohunditaha umi rrelihión japu. Revelación kapítulo 17 ha 18-pe oñembojoja umi rrelihión japu peteĩ kuña rekovaíre, oñentremetéva umi polítiko rehe. Revelación 17:​16, (BNP) heʼi mbaʼépa ojapóta umi polítiko: ‘Ndaijaʼemoʼãi pe kuña rekovaíre, ha ohejavaʼerã ichupe haʼeño ha opívo; okaruvaʼerã pe kuña roʼo rehe ha ohapyvaʼerã ichupe tatápe’.

¹² Og̃uahẽvo upe ára, la Biblia heʼi Ñandejára omoĩtaha umi mburuvicha pyʼapýpe “ojapo hag̃ua pe haʼe oipotáva”, ohundi hag̃ua hikuái pe rrelihión japúpe (Rev. 17:17). Upéicharõ jaʼekuaa Ñandejára voi ohunditaha chupekuéra. Umi rrelihión japu ningo hovamokõi, heta tiémporema omboʼe meme japu ha opersegi Ñandejára siervokuérape. Opa umívare Ñandejára okastigáta chupekuéra. Ko múndope ningo heta hénte nohaʼarõi asy umi rrelihión japu oñehunditaha. Péro Jehová siervokuéra katu oikuaa porã oikotaha, upévare ko ára paha pukukuépe omombeʼuhikóni opavavépe upe notísia.

13. Mbaʼépa ohechauka pyaʼe oñehunditaha umi rrelihión japu?

¹³ Heta ningo ndogueroviasemoʼãi ág̃a ohechávo oñehundipaiteha umi rrelihión japu. La Biblia heʼi mbaʼéichapa ojaheʼóta “umi mburuvicha” ko yvy arigua: ‘Aichejáranga nde. Péina sapyʼaitépe reñehundipa!’ (Rev. 18:​9, 10, 16, 19). Heʼívo “sapyʼaitépe” ohechauka ñandéve pyaʼe oñehunditaha.

14. Mbaʼépa ojapóta Jehová oñepuʼãvo ipuévlore?

¹⁴ Oñehundi riremi umi rrelihión japu oñepuʼãta Ñandejára puévlore, omombeʼuvahína  oparupiete umi mbaʼe oikótava (Eze. 38:​14-16). Péro upérõ Jehová odefendéta ipuévlope, haʼe heʼi: ‘Chepochy rupi añeʼẽma. Oikuaa hag̃ua hikuái che haʼeha Jehová’ (jaleemína Ezequiel 38:​18-23, ÑÑB). Heʼi avei: ‘Oimeraẽ opokóva che retãyguáre, opokohína che resaʼỹire’ (Zac. 2:​12, 13; [2:​8, NM]). Ág̃a oñepuʼãmbávo Jehová siervokuérare Jehová opuʼãta avei odefende hag̃ua chupekuéra. Upépe oñemohuʼãta pe jehasa asy guasu ha oñepyrũta Armagedón. Jesucristo ha umi ánhel imbaretepa jepéva ohundíta Satanás múndo aña.

Mbaʼépa jajapovaʼerã

15. Mbaʼépa jajapovaʼerã jaikuaávo oñehundipotaitemaha ko múndo aña?

¹⁵ Mbaʼépa jajapovaʼerã jaikuaávo oñehundipotaitemaha ko múndo aña? Apóstol Pedro heʼivaʼekue: ‘Péicha oñehundipátagui opa mbaʼe vai, peẽ peñehaʼãvaʼerã pemeʼẽmbaite Ñandejárape pende rekove’ (2 Ped. 3:11). Upéva heʼise jajesareko porã vaʼerãha Ñandejára Ñeʼẽre ha jajapo umi mbaʼe ohechaukáva jahayhuha Chupe. Pór ehémplo, japredika ikatuháicha pe marandu porã oñehundi mboyve ko múndo aña. Apóstol Pedro heʼi avei: ‘Og̃uahẽmahína ára opa mbaʼe vai opa hag̃ua. Upévare peñatende porãke ha peñemboʼe tapia’ (1 Ped. 4:7). Jahecha upéicharõ tekotevẽha avei tapiaite ñañemboʼe Jehovápe ha jajerure chupe tañanesãmbyhy ijespíritu sánto ha ikongregasión rupive. Péicha ikatúta ñañemoag̃uive hese ha jahechaukáta jahayhuha chupe.

16. Mbaʼérepa tekotevẽterei jajapo Efesios 5:​15, 16 heʼíva?

¹⁶ Koʼã tiémpo ijetuʼuetévape tekotevẽterei ñañatende porã ko konséhore: “Pévare, pemaʼẽ porãke mbaʼéichapa peikóta. Ani peiko itavývaicha, penearandu uvei. Peiporukuaáke koʼã ára ijahápe peẽme cháke ivai hína koʼã ára oúva” (Efe. 5:​15, 16). Ko múndo ningo henyhẽ mbaʼe vaígui. Satanás ndoipotái avave ojapo Jehová rembipota ha oñehaʼãmbaite opavavépe omomombyry chugui. Péro ñande jaservíva Jehovápe jaikuaa porã upéva, upéicha rupi aníkena jahejátei ñanemboyke Ñandejára rapégui. Jajerovia uvei Jehováre ha umi mbaʼe ojapótavare (jaleemína 1 Juan 2:​15-17).

17. Mbaʼéichapa ñañeñandúta ág̃a oiko vove pe ñemoingove jey?

¹⁷ Jehová opromete avei “umi omanovaʼekue oikove jey vaʼerãha” (Hech. 24:15). Haʼe heʼíva ningo katuete oiko, upévare jajeroviakuaa okumplitaha ipromésa. Isaías 26:19 heʼi: ‘Umi ojeroviáva nderehe omanóramo jepe oikove jeýta. Pepáy ha pepurahéi, peẽ yvytimbo rehe peikóva. Pe yvy omeʼẽ jeýta umi omanomavaʼekue’. Ko promésa oñekumpli ñepyrũ vaʼekue Ñandejára puévlo oho jeýrõ guare hetãme. Ha upéva ñanemokyreʼỹ jajerovia hag̃ua oñekumplitaha avei Ñandejára múndo pyahúpe. Ajépa iporãitéta ág̃a umi oikove jeýva oañua vove umi ohayhúvape! Koʼẽrõitéma ningo oñehundíta Satanás múndo aña ha oñepyrũta Ñandejára múndo pyahu. Upévare tekotevẽterei ñañatende porã.

Nemanduʼápa?

• Mbaʼépa pe iñimportantevéva Jesucristo omboʼevaʼekue?

• Mbaʼéichapa oñekumpli Jesús heʼivaʼekue predikasión rehe?

• Mbaʼérepa tekotevẽterei ñañatende porã?

• Mbaʼéichapa nemokyreʼỹ Hechos 24:15 heʼíva?

[Porandu ñahesaʼỹijóva]

[Taʼanga ha rrekuádro oĩva páhina 16-pe]

Oñepyrũ tiémpo Ijetuʼúva

Áño 2007-pe Alan Greenspan ojapo peteĩ lívro hérava La era de las turbulencias. Las aventuras en un nuevo mundo. Ko karai ningo presidente vaʼekue veinte áñore pe Reserva Federal Estados Unidosgua. Haʼe ojesarekómi umi vánko upe tetãygua rehe. Karai Greenspan omombeʼu ilívrope mbaʼeichaitépa okambia ko múndo áño 1914 rire.

Haʼe heʼi: “Ojeʼe 1914 mboyve entéro mbaʼe opinta porãiterei hague, haʼete voi ku jahupytýtava perfeksión mbaʼe. Pór ehémplo amo áño 1800 rupi noñevendevéima yvypórape tembiguairã, ymave ojejapo haguéicha. Noñehenduguasuvéima oĩha oñorairõ ha oporojukáva, umi mbaʼe haʼete vaʼekue opáva ohóvo. [...] Yvyporakuéra oñakãrapuʼã heta mbaʼépe. Ojejapo trén, teléfono, oĩ lús heta hendápe, síne ojehecha hag̃ua pelíkula ha kochekuéra. Avei ojejapo hetaiterei mbaʼe ojeporu hag̃ua ogapýpe. Umi doktór katu opilla heta mbaʼe ha oĩ pohã opaichagua mbaʼasýpe g̃uarã. Ojekaru porãve ha hetaiterei lugárpe oñemog̃uahẽ y potĩ ojeyʼu hag̃ua. Opa koʼã mbaʼére ojeʼe ojeiko arevetaha avei [...]. Opavavénte oimoʼãvaʼekue koʼã mbaʼe porã ndopamoʼãiha”.

Péro upe rire karai Greenspan heʼi jey: “Tuichavéramo jepe segunda guerra mundial, pe primera guerra mundial oity yvýre umi mbaʼe oñehaʼarõvaʼekue. Ndacheresaraimoʼãi voi mbaʼéichapa opensámi umi hénte oikovaʼekue primera guerra mundial mboyve. Upérõ ningo haʼetévaicha ojehupytýtava hetaiterei mbaʼe porã. Koʼág̃a rupi katu ñande nañahaʼarõvéima heta mbaʼe porã, pe primera guerra mundial mboyve oñehaʼarõ haguéicha, jaikuaágui hasyetereiha. Jahechakuaa voi ningo mbaʼéichapa pe terrorísmo heta hetave, oñembyaipa ohóvo ñande yvy ha hakuetereive upéva rupi. Hetave avei umi polítiko heʼiguaʼúva ojepyʼapyha hentekuérare. Ikatúnepa koʼã mbaʼe ojoko avei pe progréso? Avave ndoikuaaporãi upéva.”

Karai Greenspan imanduʼa yma ostudia tiémpope iprofesór de Economía Benjamin M. Anderson (1886-1949) heʼivaʼekuére: “Umi karai ha kuñakarai oikovaʼekue primera guerra mundial mboyve ohechagaʼu upe tiémpo. Oĩvaʼekue pyʼaguapy koʼág̃a rupi ndojehechavéimava” (Economics and the Public Welfare [La Economía y el bienestar público]).

G. J. Meyer ohaivaʼekue peteĩ lívro áño 2006-pe hérava A World Undone (Un mundo desgarrado), upépe heʼi: “Ñañeʼẽ jave umi mbaʼe oikovaʼekuére gérra mboyve jahechakuaa mbaʼéichapa ‘opa mbaʼe okambia’. Primera guerra mundial [1914-1918] añetehápe okambia opa mbaʼe. Okambia umi frontéra, goviérno, umi hénte rekove ha okambia ñandehegui ñapensa lája. Haʼete ningo umi tiémpo opyta rei vaʼekue, ha koʼág̃a katu nañanemanduʼái térã ndajaikuaái voi mbaʼéichapa ojeikovaʼekue”.

[Nóta oĩva taʼanga ndive páhina 18]

Armagedónpe, Jehová oiporúta umi ánhel imbaretepa jepévape